12. து³ப்³ப³சஸிக்கா²பத³வண்ணனா

424. தேன ஸமயேன பு³த்³தோ⁴ ப⁴க³வாதி து³ப்³ப³சஸிக்கா²பத³ம். தத்த² அனாசாரம் ஆசரதீதி அனேகப்பகாரம் காயவசீத்³வாரவீதிக்கமம் கரோதி. கிம் நு கோ² நாமாதி வம்ப⁴னவசனமேதம். அஹம் கோ² நாமாதி உக்கம்ஸவசனம். தும்ஹே வதே³ய்யந்தி ‘‘இத³ம் கரோத², இத³ம் மா கரோதா²’’தி அஹம் தும்ஹே வத்தும் அரஹாமீதி த³ஸ்ஸேதி. கஸ்மாதி சே? யஸ்மா அம்ஹாகம் பு³த்³தோ⁴ ப⁴க³வா கண்டகம் ஆருய்ஹ மயா ஸத்³தி⁴ம் நிக்க²மித்வா பப்³ப³ஜிதோதிஏவமாதி³மத்த²ம் ஸந்தா⁴யாஹ. ‘‘அம்ஹாகம் த⁴ம்மோ’’தி வத்வா பன அத்தனோ ஸந்தகபா⁴வே யுத்திம் த³ஸ்ஸேந்தோ ‘‘அம்ஹாகம் அய்யபுத்தேன த⁴ம்மோ அபி⁴ஸமிதோ’’தி ஆஹ. யஸ்மா அம்ஹாகம் அய்யபுத்தேன சதுஸச்சத⁴ம்மோ படிவித்³தோ⁴, தஸ்மா த⁴ம்மோபி அம்ஹாகந்தி வுத்தம் ஹோதி. ஸங்க⁴ம் பன அத்தனோ வேரிபக்கே² டி²தம் மஞ்ஞமானோ அம்ஹாகம் ஸங்கோ⁴தி ந வத³தி. உபமம் பன வத்வா ஸங்க⁴ம் அபஸாதே³துகாமோ ‘‘ஸேய்யதா²பி நாமா’’திஆதி³மாஹ. திணகட்ட²பண்ணஸடந்தி தத்த² தத்த² பதிதம் திணகட்ட²பண்ணம். அத² வா திணஞ்ச நிஸ்ஸாரகம் லஹுகம் கட்ட²ஞ்ச திணகட்ட²ம். பண்ணஸடந்தி புராணபண்ணம். உஸ்ஸாரேய்யாதி ராஸிம் கரேய்ய.

பப்³ப³தேய்யாதி பப்³ப³தப்பப⁴வா, ஸா ஹி ஸீக⁴ஸோதா ஹோதி, தஸ்மா தமேவ க³ண்ஹாதி. ஸங்க²ஸேவாலபணகந்தி ஏத்த² ஸங்கோ²தி தீ³க⁴மூலகோ பண்ணஸேவாலோ வுச்சதி. ஸேவாலோதி நீலஸேவாலோ, அவஸேஸோ உத³கபப்படகதிலபீ³ஜகாதி³ ஸப்³போ³பி பணகோதி ஸங்க்²யம் க³ச்ச²தி. ஏகதோ உஸ்ஸாரிதாதி ஏகட்டா²னே கேனாபி ஸம்பிண்டி³தா ராஸீகதாதி த³ஸ்ஸேதி.

425-6. து³ப்³ப³சஜாதிகோதி து³ப்³ப³சஸபா⁴வோ வத்தும் அஸக்குணேய்யோதி அத்தோ². பத³பா⁴ஜனேபிஸ்ஸ து³ப்³ப³சோதி து³க்கே²ன கிச்சே²ன வதி³தப்³போ³, ந ஸக்கா ஸுகே²ன வத்துந்தி அத்தோ². தோ³வசஸ்ஸகரணேஹீதி து³ப்³ப³சபா⁴வகரணீயேஹி, யே த⁴ம்மா து³ப்³ப³சம் புக்³க³லம் கரோந்தி, தேஹி ஸமன்னாக³தோதி அத்தோ². தே பன ‘‘கதமே ச, ஆவுஸோ, தோ³வசஸ்ஸகரணா த⁴ம்மா? இதா⁴வுஸோ, பி⁴க்கு² பாபிச்சோ² ஹோதீ’’திஆதி³னா நயேன படிபாடியா அனுமானஸுத்தே (ம. நி. 1.181) ஆக³தா பாபிச்ச²தா, அத்துக்கம்ஸகபரவம்ப⁴கதா, கோத⁴னதா, கோத⁴ஹேது உபனாஹிதா, கோத⁴ஹேதுஅபி⁴ஸங்கி³தா, கோத⁴ஹேதுகோத⁴ஸாமந்தவாசானிச்சா²ரணதா, சோத³கம் படிப்ப²ரணதா, சோத³கம் அபஸாத³னதா, சோத³கஸ்ஸ பச்சாரோபனதா, அஞ்ஞேன அஞ்ஞம்படிசரணதா, அபதா³னேன ந ஸம்பாயனதா, மக்கி²பளாஸிதா, இஸ்ஸுகீமச்ச²ரிதா, ஸட²மாயாவிதா, த²த்³தா⁴திமானிதா, ஸந்தி³ட்டி²பராமாஸிஆதா⁴னக்³க³ஹிது³ப்படினிஸ்ஸக்³கி³தாதி ஏகூனவீஸதி த⁴ம்மா வேதி³தப்³பா³.

ஓவாத³ம் நக்க²மதி ந ஸஹதீதி அக்க²மோ. யதா²னுஸிட்ட²ம் அப்படிபஜ்ஜனதோ பத³க்கி²ணேன அனுஸாஸனிம் ந க³ண்ஹாதீதி அப்பத³க்கி²ணக்³கா³ஹீ அனுஸாஸனிம்.

உத்³தே³ஸபரியாபன்னேஸூதி உத்³தே³ஸே பரியாபன்னேஸு அந்தோக³தே⁴ஸு. ‘‘யஸ்ஸ ஸியா ஆபத்தி, ஸோ ஆவிகரேய்யா’’தி ஏவம் ஸங்க³ஹிதத்தா அந்தோ பாதிமோக்க²ஸ்ஸ வத்தமானேஸூதி அத்தோ². ஸஹத⁴ம்மிகம் வுச்சமானோதி ஸஹத⁴ம்மிகேன வுச்சமானோ கரணத்தே² உபயோக³வசனம், பஞ்சஹி ஸஹத⁴ம்மிகேஹி ஸிக்கி²தப்³ப³த்தா தேஸம் வா ஸந்தகத்தா ஸஹத⁴ம்மிகந்தி லத்³த⁴னாமேன பு³த்³த⁴பஞ்ஞத்தேன ஸிக்கா²பதே³ன வுச்சமானோதி அத்தோ².

விரமதா²யஸ்மந்தோ மம வசனாயாதி யேன வசனேன மம் வத³த², ததோ மம வசனதோ விரமத². மா மம் தம் வசனம் வத³தா²தி வுத்தம் ஹோதி.

வத³து ஸஹத⁴ம்மேனாதி ஸஹத⁴ம்மிகேன ஸிக்கா²பதே³ன ஸஹத⁴ம்மேன வா அஞ்ஞேனபி பாஸாதி³கபா⁴வஸம்வத்தனிகேன வசனேன வத³து. யதி³த³ந்தி வுட்³டி⁴காரணனித³ஸ்ஸனத்தே² நிபாதோ. தேன ‘‘யம் இத³ம் அஞ்ஞமஞ்ஞஸ்ஸ ஹிதவசனம் ஆபத்திதோ வுட்டா²பனஞ்ச தேன அஞ்ஞமஞ்ஞவசனேன அஞ்ஞமஞ்ஞவுட்டா²பனேன ச ஸம்வட்³டா⁴ பரிஸா’’தி ஏவம் பரிஸாய வுட்³டி⁴காரணம் த³ஸ்ஸிதம் ஹோதி. ஸேஸம் ஸப்³ப³த்த² உத்தானமேவ.

ஸமுட்டா²னாதீ³னி பட²மஸங்க⁴பே⁴த³ஸதி³ஸானேவாதி.

து³ப்³ப³சஸிக்கா²பத³வண்ணனா நிட்டி²தா.