13. குலதூ³ஸகஸிக்கா²பத³வண்ணனா

431. தேன ஸமயேன பு³த்³தோ⁴ ப⁴க³வாதி குலதூ³ஸகஸிக்கா²பத³ம். தத்த² அஸ்ஸஜிபுனப்³ப³ஸுகா நாமாதி அஸ்ஸஜி சேவ புனப்³ப³ஸுகோ ச. கீடாகி³ரிஸ்மிந்தி ஏவம்னாமகே ஜனபதே³. ஆவாஸிகா ஹோந்தீதி ஏத்த² ஆவாஸோ ஏதேஸம் அத்தீ²தி ஆவாஸிகா. ‘‘ஆவாஸோ’’தி விஹாரோ வுச்சதி. ஸோ யேஸம் ஆயத்தோ நவகம்மகரணபுராணபடிஸங்க²ரணாதி³பா⁴ரஹாரதாய, தே ஆவாஸிகா. யே பன கேவலம் விஹாரே வஸந்தி, தே நேவாஸிகாதி வுச்சந்தி. இமே ஆவாஸிகா அஹேஸும். அலஜ்ஜினோ பாபபி⁴க்கூ²தி நில்லஜ்ஜா லாமகபி⁴க்கூ², தே ஹி ச²ப்³ப³க்³கி³யானம் ஜேட்ட²கச²ப்³ப³க்³கி³யா.

ஸாவத்தி²யம் கிர ச² ஜனா ஸஹாயகா ‘‘கஸிகம்மாதீ³னி து³க்கரானி, ஹந்த³ மயம் ஸம்மா பப்³ப³ஜாம! பப்³ப³ஜந்தேஹி ச உப்பன்னே கிச்சே நித்த²ரணகட்டா²னே பப்³ப³ஜிதும் வட்டதீ’’தி ஸம்மந்தயித்வா த்³வின்னம் அக்³க³ஸாவகானம் ஸந்திகே பப்³ப³ஜிம்ஸு. தே பஞ்சவஸ்ஸா ஹுத்வா மாதிகம் பகு³ணம் கத்வா மந்தயிம்ஸு ‘‘ஜனபதோ³ நாம கதா³சி ஸுபி⁴க்கோ² ஹோதி கதா³சி து³ப்³பி⁴க்கோ², மயம் மா ஏகட்டா²னே வஸிம்ஹ, தீஸு டா²னேஸு வஸாமா’’தி. ததோ பண்டு³கலோஹிதகே ஆஹம்ஸு – ‘‘ஆவுஸோ, ஸாவத்தி² நாம ஸத்தபஞ்ஞாஸாய குலஸதஸஹஸ்ஸேஹி அஜ்ஜா²வுத்தா², அஸீதிகா³மஸஹஸ்ஸபடிமண்டி³தானம் தியோஜனஸதிகானம் த்³வின்னம் காஸிகோஸலரட்டா²னம் ஆயமுக²பூ⁴தா, தத்ர தும்ஹே து⁴ரட்டா²னேயேவ பரிவேணானி காரேத்வா அம்ப³பனஸனாளிகேராதீ³னி ரோபேத்வா புப்பே²ஹி ச ப²லேஹி ச குலானி ஸங்க³ண்ஹந்தா குலதா³ரகே பப்³பா³ஜேத்வா பரிஸம் வட்³டே⁴தா²’’தி.

மேத்தியபூ⁴மஜகே ஆஹம்ஸு – ‘‘ஆவுஸோ, ராஜக³ஹம் நாம அட்டா²ரஸஹி மனுஸ்ஸகோடீஹி அஜ்ஜா²வுத்த²ம் அஸீதிகா³மஸஹஸ்ஸபடிமண்டி³தானம் தியோஜனஸதிகானம் த்³வின்னம் அங்க³மக³த⁴ரட்டா²னம் ஆயமுக²பூ⁴தம், தத்ர தும்ஹே து⁴ரட்டா²னேயேவ…பே… பரிஸம் வட்³டே⁴தா²’’தி.

அஸ்ஸஜிபுனப்³ப³ஸுகே ஆஹம்ஸு – ‘‘ஆவுஸோ, கீடாகி³ரி நாம த்³வீஹி மேகே⁴ஹி அனுக்³க³ஹிதோ தீணி ஸஸ்ஸானி பஸவந்தி, தத்ர தும்ஹே து⁴ரட்டா²னேயேவ பரிவேணானி காரேத்வா…பே… பரிஸம் வட்³டே⁴தா²’’தி. தே ததா² அகம்ஸு. தேஸு ஏகமேகஸ்ஸ பக்க²ஸ்ஸ பஞ்ச பஞ்ச பி⁴க்கு²ஸதானி பரிவாரா, ஏவம் ஸமதி⁴கம் தி³யட்³ட⁴பி⁴க்கு²ஸஹஸ்ஸம் ஹோதி. தத்ர பண்டு³கலோஹிதகா ஸபரிவாரா ஸீலவந்தோவ ப⁴க³வதா ஸத்³தி⁴ம் ஜனபத³சாரிகம்பி சரந்தி, தே அகதவத்து²ம் உப்பாதே³ந்தி, பஞ்ஞத்தஸிக்கா²பத³ம் பன ந மத்³த³ந்தி, இதரே ஸப்³பே³ அலஜ்ஜினோ அகதவத்து²ஞ்ச உப்பாதே³ந்தி, பஞ்ஞத்தஸிக்கா²பத³ஞ்ச மத்³த³ந்தி, தேன வுத்தம் – ‘‘அலஜ்ஜினோ பாபபி⁴க்கூ²’’தி.

ஏவரூபந்தி ஏவம்ஜாதிகம். அனாசாரம் ஆசரந்தீதி அனாசரிதப்³ப³ம் ஆசரந்தி, அகாதப்³ப³ம் கரோந்தி. மாலாவச்ச²ந்தி தருணபுப்ப²ருக்க²ம், தருணகா ஹி புப்ப²ருக்கா²பி புப்ப²க³ச்சா²பி மாலாவச்சா² த்வேவ வுச்சந்தி, தே ச அனேகப்பகாரம் மாலாவச்ச²ம் ஸயம்பி ரோபேந்தி, அஞ்ஞேனபி ரோபாபேந்தி, தேன வுத்தம் – ‘‘மாலாவச்ச²ம் ரோபேந்திபி ரோபாபேந்திபீ’’தி. ஸிஞ்சந்தீதி ஸயமேவ உத³கேன ஸிஞ்சந்தி. ஸிஞ்சாபேந்தீதி அஞ்ஞேனபி ஸிஞ்சாபேந்தி.

ஏத்த² பன அகப்பியவோஹாரோ கப்பியவோஹாரோ பரியாயோ ஓபா⁴ஸோ நிமித்தகம்மந்தி இமானி பஞ்ச ஜானிதப்³பா³னி. தத்த² அகப்பியவோஹாரோ நாம அல்லஹரிதானம் கோட்டனம் கோட்டாபனம், ஆவாடஸ்ஸ க²ணனம் க²ணாபனம், மாலாவச்ச²ஸ்ஸ ரோபனம் ரோபாபனம், ஆளியா ப³ந்த⁴னம் ப³ந்தா⁴பனம், உத³கஸ்ஸ ஸேசனம் ஸேசாபனம், மாதிகாய ஸம்முக²கரணம் கப்பியஉத³கஸிஞ்சனம் ஹத்த²முக²பாத³தோ⁴வனன்ஹானோத³கஸிஞ்சனந்தி. கப்பியவோஹாரோ நாம ‘‘இமம் ருக்க²ம் ஜான, இமம் ஆவாடம் ஜான, இமம் மாலாவச்ச²ம் ஜான, ஏத்த² உத³கம் ஜானா’’தி வசனம் ஸுக்க²மாதிகாய உஜுகரணஞ்ச. பரியாயோ நாம ‘‘பண்டி³தேன நாம மாலாவச்சா²த³யோ ரோபாபேதப்³பா³ நசிரஸ்ஸேவ உபகாராய ஸம்வத்தந்தீ’’திஆதி³வசனம். ஓபா⁴ஸோ நாம குதா³லக²ணித்தாதீ³னி ச மாலாவச்சே² ச க³ஹேத்வா டா²னம், ஏவம் டி²தஞ்ஹி ஸாமணேராத³யோ தி³ஸ்வா தே²ரோ காராபேதுகாமோதி க³ந்த்வா கரோந்தி. நிமித்தகம்மம் நாம குதா³ல-க²ணித்தி-வாஸி-ப²ரஸு-உத³கபா⁴ஜனானி ஆஹரித்வா ஸமீபே ட²பனம்.

இமானி பஞ்சபி குலஸங்க³ஹத்தா²ய ரோபனே ந வட்டந்தி, ப²லபரிபோ⁴க³த்தா²ய கப்பியாகப்பியவோஹாரத்³வயமேவ ந வட்டதி, இதரத்தயம் வட்டதி. மஹாபச்சரியம் பன ‘‘கப்பியவோஹாரோபி வட்டதி. யஞ்ச அத்தனோ பரிபோ⁴க³த்தா²ய வட்டதி, தம் அஞ்ஞபுக்³க³லஸ்ஸ வா ஸங்க⁴ஸ்ஸ வா சேதியஸ்ஸ வா அத்தா²யபி வட்டதீ’’தி வுத்தம்.

ஆராமத்தா²ய பன வனத்தா²யச சா²யத்தா²ய ச அகப்பியவோஹாரமத்தமேவ ந ச வட்டதி, ஸேஸம் வட்டதி, ந கேவலஞ்ச ஸேஸம் யம்கிஞ்சி மாதிகம்பி உஜும் காதும் கப்பியஉத³கம் ஸிஞ்சிதும் ந்ஹானகோட்ட²கம் கத்வா ந்ஹாயிதும் ஹத்த²பாத³முக²தோ⁴வனுத³கானி ச தத்த² ச²ட்³டே³தும்பி வட்டதி. மஹாபச்சரியம் பன குருந்தி³யஞ்ச ‘‘கப்பியபத²வியம் ஸயம் ரோபேதும்பி வட்டதீ’’தி வுத்தம். ஆராமாதி³அத்தா²ய பன ரோபிதஸ்ஸ வா ரோபாபிதஸ்ஸ வா ப²லம் பரிபு⁴ஞ்ஜிதும்பி வட்டதி.

ஓசினனஓசினாபனே பகதியாபி பாசித்தியம். குலதூ³ஸனத்தா²ய பன பாசித்தியஞ்சேவ து³க்கடஞ்ச. க³ந்த²னாதீ³ஸு ச உரச்ச²த³பரியோஸானேஸு குலதூ³ஸனத்தா²ய அஞ்ஞத்தா²ய வா கரோந்தஸ்ஸ து³க்கடமேவ. கஸ்மா? அனாசாரத்தா, ‘‘பாபஸமாசாரோ’’தி ஏத்த² வுத்தபாபஸமாசாரத்தா ச. ஆராமாதி³அத்தா²ய ருக்க²ரோபனே விய வத்து²பூஜனத்தா²ய கஸ்மா ந அனாபத்தீதி சே? அனாபத்தியேவ. யதா² ஹி தத்த² கப்பியவோஹாரேன பரியாயாதீ³ஹி ச அனாபத்தி ததா² வத்து²பூஜத்தா²யபி அனாபத்தியேவ.

நனு ச தத்த² ‘‘கப்பியபத²வியம் ஸயம் ரோபேதும்பி வட்டதீ’’தி வுத்தந்தி? வுத்தம், ந பன மஹாஅட்ட²கதா²யம். அதா²பி மஞ்ஞேய்யாஸி இதராஸு வுத்தம்பி பமாணம். மஹாஅட்ட²கதா²யஞ்ச கப்பியஉத³கஸேசனம் வுத்தம், தம் கத²ந்தி? தம்பி ந விருஜ்ஜ²தி. தத்ர ஹி அவிஸேஸேன ‘‘ருக்க²ம் ரோபேந்திபி ரோபாபேந்திபி, ஸிஞ்சந்திபி ஸிஞ்சாபேந்திபீ’’தி வத்தப்³பே³ ‘‘மாலாவச்ச²’’ந்தி வத³ந்தோ ஞாபேதி ‘‘குலஸங்க³ஹத்தா²ய புப்ப²ப²லூபக³மேவ ஸந்தா⁴யேதம் வுத்தம், அஞ்ஞத்ர பன பரியாயோ அத்தீ²’’தி. தஸ்மா தத்த² பரியாயம், இத⁴ ச பரியாயாபா⁴வம் ஞத்வா யம் அட்ட²கதா²ஸு வுத்தம், தம் ஸுவுத்தமேவ. வுத்தஞ்சேதம் –

‘‘பு³த்³தே⁴ன த⁴ம்மோ வினயோ ச வுத்தோ;

யோ தஸ்ஸ புத்தேஹி ததே²வ ஞாதோ;

ஸோ யேஹி தேஸம் மதிமச்சஜந்தா;

யஸ்மா புரே அட்ட²கதா² அகம்ஸு.

‘‘தஸ்மா ஹி யம் அட்ட²கதா²ஸு வுத்தம்;

தம் வஜ்ஜயித்வான பமாத³லேக²ம்;

ஸப்³ப³ம்பி ஸிக்கா²ஸு ஸகா³ரவானம்;

யஸ்மா பமாணம் இத⁴ பண்டி³தான’’ந்தி.

ஸப்³ப³ம் வுத்தனயேனேவ வேதி³தப்³ப³ம். தத்த² ஸியா யதி³ வத்து²பூஜனத்தா²யபி க³ந்தா²னாதீ³ஸு ஆபத்தி, ஹரணாதீ³ஸு கஸ்மா அனாபத்தீதி? குலித்தீ²ஆதீ³னம் அத்தா²ய ஹரணதோ ஹரணாதி⁴காரே ஹி விஸேஸேத்வா தே குலித்தீ²னந்திஆதி³ வுத்தம், தஸ்மா பு³த்³தா⁴தீ³னம் அத்தா²ய ஹரந்தஸ்ஸ அனாபத்தி.

தத்த² ஏகதோவண்டிகந்தி புப்பா²னம் வண்டே ஏகதோ கத்வா கதமாலம். உப⁴தோவண்டிகந்தி உபோ⁴ஹி பஸ்ஸேஹி புப்ப²வண்டே கத்வா கதமாலம். மஞ்ஜரிகந்திஆதீ³ஸு பன மஞ்ஜரீ விய கதா புப்ப²விகதி மஞ்ஜரிகாதி வுச்சதி. விதூ⁴திகாதி ஸூசியா வா ஸலாகாய வா ஸிந்து³வாரபுப்பா²தீ³னி விஜ்ஜி²த்வா கதா. வடம்ஸகோதி வதம்ஸகோ. ஆவேளாதி கண்ணிகா. உரச்ச²தோ³தி ஹாரஸதி³ஸம் உரே ட²பனகபுப்ப²தா³மம். அயம் தாவ ஏத்த² பத³வண்ணனா.

அயம் பன ஆதி³தோ பட்டா²ய வித்தா²ரேன ஆபத்திவினிச்ச²யோ. குலதூ³ஸனத்தா²ய அகப்பியபத²வியம் மாலாவச்ச²ம் ரோபேந்தஸ்ஸ பாசித்தியஞ்சேவ து³க்கடஞ்ச, ததா² அகப்பியவோஹாரேன ரோபாபேந்தஸ்ஸ. கப்பியபத²வியம் ரோபனேபி ரோபாபனேபி து³க்கடமேவ. உப⁴யத்தா²பி ஸகிம் ஆணத்தியா ப³ஹுன்னம்பி ரோபனே ஏகமேவ ஸபாசித்தியது³க்கடம் வா ஸுத்³த⁴து³க்கடம் வா ஹோதி. பரிபோ⁴க³த்தா²ய ஹி கப்பியபூ⁴மியம் வா அகப்பியபூ⁴மியம் வா கப்பியவோஹாரேன ரோபாபனே அனாபத்தி. ஆராமாதி³அத்தா²யபி அகப்பியபத²வியம் ரோபேந்தஸ்ஸ வா அகப்பியவசனேன ரோபாபேந்தஸ்ஸ வா பாசித்தியம். அயம் பன நயோ மஹாஅட்ட²கதா²யம் ந ஸுட்டு² விப⁴த்தோ, மஹாபச்சரியம் விப⁴த்தோதி.

ஸிஞ்சனஸிஞ்சாபனே பன அகப்பியஉத³கேன ஸப்³ப³த்த² பாசித்தியம், குலதூ³ஸனபரிபோ⁴க³த்தா²ய து³க்கடம்பி. கப்பியேன தேஸம்யேவ த்³வின்னமத்தா²ய து³க்கடம். பரிபோ⁴க³த்தா²ய சேத்த² கப்பியவோஹாரேன ஸிஞ்சாபனே அனாபத்தி. ஆபத்திட்டா²னே பன தா⁴ராவச்சே²த³வஸேன பயோக³ப³ஹுலதாய ஆபத்திப³ஹுலதா வேதி³தப்³பா³.

குலதூ³ஸனத்தா²ய ஓசினனே புப்ப²க³ணனாய து³க்கடபாசித்தியானி அஞ்ஞத்த² பாசித்தியானேவ. ப³ஹூனி பன புப்பா²னி ஏகபயோகே³ன ஓசினந்தோ பயோக³வஸேன காரேதப்³போ³. ஓசினாபனே குலதூ³ஸனத்தா²ய ஸகிம் ஆணத்தோ ப³ஹும்பி ஓசினதி, ஏகமேவ ஸபாசித்தியது³க்கடம், அஞ்ஞத்ர பாசித்தியமேவ.

க³ந்த²னாதீ³ஸு ஸப்³பா³பி ச² புப்ப²விகதியோ வேதி³தப்³பா³ – க³ந்தி²மம், கோ³ப்பி²மம், வேதி⁴மம், வேடி²மம், பூரிமம், வாயிமந்தி. தத்த² ‘‘க³ந்தி²மம்’’ நாம ஸத³ண்ட³கேஸு வா உப்பலபது³மாதீ³ஸு அஞ்ஞேஸு வா தீ³க⁴வண்டேஸு புப்பே²ஸு த³ட்ட²ப்³ப³ம். த³ண்ட³கேன த³ண்ட³கம் வண்டேன வா வண்டம் க³ந்தே²த்வா கதமேவ ஹி க³ந்தி²மம். தம் பி⁴க்கு²ஸ்ஸ வா பி⁴க்கு²னியா வா காதும்பி அகப்பியவசனேன காராபேதும்பி ந வட்டதி. ஏவம் ஜான, ஏவம் கதே ஸோபே⁴ய்ய, யதா² ஏதானி புப்பா²னி ந விகிரியந்தி ததா² கரோஹீதிஆதி³னா பன கப்பியவசனேன காரேதும் வட்டதி.

‘‘கோ³ப்பி²மம்’’ நாம ஸுத்தேன வா வாகாதீ³ஹி வா வஸ்ஸிகபுப்பா²தீ³னம் ஏகதோவண்டிகஉப⁴தோவண்டிகமாலாவஸேன கோ³ப்ப²னம், வாகம் வா ரஜ்ஜும் வா தி³கு³ணம் கத்வா தத்த² அவண்டகானி நீபபுப்பா²தீ³னி பவேஸேத்வா படிபாடியா ப³ந்த⁴ந்தி, ஏதம்பி கோ³ப்பி²மமேவ. ஸப்³ப³ம் புரிமனயேனேவ ந வட்டதி.

‘‘வேதி⁴மம்’’ நாம ஸவண்டகானி வஸ்ஸிகபுப்பா²தீ³னி வண்டேஸு, அவண்டகானி வா வகுலபுப்பா²தீ³னி அந்தோசி²த்³தே³ ஸூசிதாலஹீராதீ³ஹி வினிவிஜ்ஜி²த்வா ஆவுனந்தி, ஏதம் வேதி⁴மம் நாம, தம்பி புரிமனயேனேவ ந வட்டதி. கேசி பன கத³லிக்க²ந்த⁴ம்ஹி கண்டகே வா தாலஹீராதீ³னி வா பவேஸேத்வா தத்த² புப்பா²னி விஜ்ஜி²த்வா ட²பேந்தி, கேசி கண்டகஸாகா²ஸு, கேசி புப்ப²ச்ச²த்தபுப்ப²கூடாகா³ரகரணத்த²ம் ச²த்தே ச பி⁴த்தியஞ்ச பவேஸேத்வா ட²பிதகண்டகேஸு, கேசி த⁴ம்மாஸனவிதானே ப³த்³த⁴கண்டகேஸு, கேசி கணிகாரபுப்பா²தீ³னி ஸலாகாஹி விஜ்ஜ²ந்தி, ச²த்தாதி⁴ச²த்தம் விய ச கரோந்தி, தம் அதிஓளாரிகமேவ. புப்ப²விஜ்ஜ²னத்த²ம் பன த⁴ம்மாஸனவிதானே கண்டகம்பி ப³ந்தி⁴தும் கண்டகாதீ³ஹி வா ஏகபுப்ப²ம்பி விஜ்ஜி²தும் புப்பே²யேவ வா புப்ப²ம் பவேஸேதும் ந வட்டதி. ஜாலவிதானவேதி³க-நாக³த³ந்தக புப்ப²படிச்ச²கதாலபண்ணகு³ளகாதீ³னம் பன சி²த்³தே³ஸு அஸோகபிண்டி³யா வா அந்தரேஸு புப்பா²னி பவேஸேதும் ந தோ³ஸோ. ஏதம் வேதி⁴மம் நாம ந ஹோதி. த⁴ம்மரஜ்ஜுயம்பி ஏஸேவ நயோ.

‘‘வேடி²மம்’’ நாம புப்ப²தா³மபுப்ப²ஹத்த²கேஸு த³ட்ட²ப்³ப³ம். கேசி ஹி மத்த²கதா³மம் கரோந்தா ஹேட்டா² க⁴டகாகாரம் த³ஸ்ஸேதும் புப்பே²ஹி வேடே²ந்தி, கேசி அட்ட²ட்ட² வா த³ஸ த³ஸ வா உப்பலபுப்பா²தீ³னி ஸுத்தேன வா வாகேன வா த³ண்ட³கேஸு ப³ந்தி⁴த்வா உப்பலஹத்த²கே வா பது³மஹத்த²கே வா கரோந்தி, தம் ஸப்³ப³ம் புரிமனயேனேவ ந வட்டதி. ஸாமணேரேஹி உப்பாடேத்வா த²லே ட²பிதஉப்பலாதீ³னி காஸாவேன ப⁴ண்டி³கம்பி ப³ந்தி⁴தும் ந வட்டதி. தேஸம்யேவ பன வாகேன வா த³ண்ட³கேன வா ப³ந்தி⁴தும் அம்ஸப⁴ண்டி³கம் வா காதும் வட்டதி. அம்ஸப⁴ண்டி³கா நாம க²ந்தே⁴ ட²பிதகாஸாவஸ்ஸ உபோ⁴ அந்தே ஆஹரித்வா ப⁴ண்டி³கம் கத்வா தஸ்மிம் பஸிப்³ப³கே விய புப்பா²னி பக்கி²பந்தி, அயம் வுச்சதி அம்ஸப⁴ண்டி³கா, ஏதம் காதும் வட்டதி. த³ண்ட³கேஹி பது³மினிபண்ணம் விஜ்ஜி²த்வா உப்பலாதீ³னி பண்ணேன வேடே²த்வா க³ண்ஹந்தி, தத்ராபி புப்பா²னம் உபரி பது³மினிபண்ணமேவ ப³ந்தி⁴தும் வட்டதி. ஹேட்டா² த³ண்ட³கம் பன ப³ந்தி⁴தும் ந வட்டதி.

‘‘பூரிமம்’’ நாம மாலாகு³ணே ச புப்ப²படே ச த³ட்ட²ப்³ப³ம். யோ ஹி மாலாகு³ணேன சேதியம் வா போ³தி⁴ம் வா வேதி³கம் வா பரிக்கி²பந்தோ புன ஆனேத்வா பூரிமடா²னம் அதிக்காமேதி, ஏத்தாவதாபி பூரிமம் நாம ஹோதி. கோ பன வாதோ³ அனேகக்க²த்தும் பரிக்கி²பந்தஸ்ஸ, நாக³த³ந்த-கந்தரேஹி பவேஸேத்வா ஹரந்தோ ஓலம்ப³கம் கத்வா புன நாக³த³ந்தகம் பரிக்கி²பதி, ஏதம்பி பூரிமம் நாம. நாக³த³ந்தகே பன புப்ப²வலயம் பவேஸேதும் வட்டதி. மாலாகு³ணேஹி புப்ப²படம் கரோந்தி. தத்ராபி ஏகமேவ மாலாகு³ணம் ஹரிதும் வட்டதி. புன பச்சாஹரதோ பூரிமமேவ ஹோதி, தம் ஸப்³ப³ம் புரிமனயேனேவ ந வட்டதி. மாலாகு³ணேஹி பன ப³ஹூஹிபி கதம் புப்ப²தா³மம் லபி⁴த்வா ஆஸனமத்த²காதீ³ஸு ப³ந்தி⁴தும் வட்டதி. அதிதீ³க⁴ம் பன மாலாகு³ணம் ஏகவாரம் ஹரித்வா வா பரிக்கி²பித்வா வா புன அஞ்ஞஸ்ஸ பி⁴க்கு²னோ தா³தும் வட்டதி. தேனாபி ததே²வ காதும் வட்டதி.

‘‘வாயிமம்’’ நாம புப்ப²ஜாலபுப்ப²படபுப்ப²ரூபேஸு த³ட்ட²ப்³ப³ம். சேதியேஸு புப்ப²ஜாலம் கரோந்தஸ்ஸ ஏகமேகம்ஹி ஜாலச்சி²த்³தே³ து³க்கடம். பி⁴த்திச்ச²த்தபோ³தி⁴த்த²ம்பா⁴தீ³ஸுபி ஏஸேவ நயோ. புப்ப²படம் பன பரேஹி பூரிதம்பி வாயிதும் ந லப்³ப⁴தி. கோ³ப்பி²மபுப்பே²ஹேவ ஹத்தி²அஸ்ஸாதி³ரூபகானி கரோந்தி, தானிபி வாயிமட்டா²னே திட்ட²ந்தி. புரிமனயேனேவ ஸப்³ப³ம் ந வட்டதி. அஞ்ஞேஹி கதபரிச்சே²தே³ பன புப்பா²னி ட²பேந்தேன ஹத்தி²அஸ்ஸாதி³ரூபகம்பி காதும் வட்டதி. மஹாபச்சரியம் பன கலம்ப³கேன அட்³ட⁴சந்த³கேன ச ஸத்³தி⁴ம் அட்ட²புப்ப²விகதியோ வுத்தா. தத்த² கலம்ப³கோதி அட்³ட⁴சந்த³கந்தரே க⁴டிகதா³மஓலம்ப³கோ வுத்தோ. ‘‘அட்³ட⁴சந்த³கோ’’தி அட்³ட⁴சந்தா³காரேன மாலாகு³ணபரிக்கே²போ. தது³ப⁴யம்பி பூரிமேயேவ பவிட்ட²ம். குருந்தி³யம் பன ‘‘த்³வே தயோ மாலாகு³ணே ஏகதோ கத்வா புப்ப²தா³மகரணம்பி வாயிமம்யேவா’’தி வுத்தம். தம்பி இத⁴ பூரிமட்டா²னேயேவ பவிட்ட²ம், ந கேவலஞ்ச புப்ப²கு³ளதா³மமேவ பிட்ட²மயதா³மம்பி கே³ண்டு³கபுப்ப²தா³மம்பி குருந்தி³யம் வுத்தம், க²ரபத்ததா³மம்பி ஸிக்கா²பத³ஸ்ஸ ஸாதா⁴ரணத்தா பி⁴க்கூ²னம்பி பி⁴க்கு²னீனம்பி நேவ காதும் ந காராபேதும் வட்டதி. பூஜானிமித்தம் பன கப்பியவசனம் ஸப்³ப³த்த² வத்தும் வட்டதி. பரியாயஓபா⁴ஸனிமித்தகம்மானி வட்டந்தியேவ.

துவட்டேந்தீதி நிபஜ்ஜந்தி. லாஸேந்தீதி பீதியா உப்பிலவமானா விய உட்ட²ஹித்வா லாஸியனாடகம் நாடேந்தி, ரேசகம் தே³ந்தி. நச்சந்தியாபி நச்சந்தீதி யதா³ நாடகித்தீ² நச்சதி, ததா³ தேபி தஸ்ஸா புரதோ வா பச்ச²தோ வா க³ச்ச²ந்தா நச்சந்தி. நச்சந்தியாபி கா³யந்தீதி யதா³ ஸா நச்சதி, ததா³ நச்சானுரூபம் கா³யந்தி. ஏஸ நயோ ஸப்³ப³த்த². அட்ட²பதே³பி கீளந்தீதி அட்ட²பத³ப²லகே ஜூதம் கீளந்தி. ததா² த³ஸபதே³, ஆகாஸேபீதி அட்ட²பத³த³ஸபதே³ஸு விய ஆகாஸேயேவ கீளந்தி. பரிஹாரபதே²பீதி பூ⁴மியம் நானாபத²மண்ட³லம் கத்வா தத்த² பரிஹரிதப்³ப³பத²ம் பரிஹரந்தா கீளந்தி. ஸந்திகாயபி கீளந்தீதி ஸந்திககீளாய கீளந்தி, ஏகஜ்ஜ²ம் ட²பிதா ஸாரியோ வா பாஸாணஸக்க²ராயோ வா அசாலேந்தா நகே²னேவ அபனேந்தி ச உபனேந்தி ச, ஸசே தத்த² காசி சலதி, பராஜயோ ஹோதி. க²லிகாயாதி ஜூதப²லகே பாஸககீளாய கீளந்தி. க⁴டிகாயாதி க⁴டிகா வுச்சதி த³ண்ட³ககீளா, தாய கீளந்தி. தீ³க⁴த³ண்ட³கேன ரஸ்ஸத³ண்ட³கம் பஹரந்தா விசரந்தி.

ஸலாகஹத்தே²னாதி லாகா²ய வா மஞ்ஜட்டி²யா வா பிட்ட²உத³கே வா ஸலாகஹத்த²ம் தேமேத்வா ‘‘கிம் ஹோதூ’’தி பூ⁴மியம் வா பி⁴த்தியம் வா தம் பஹரித்வா ஹத்தி²அஸ்ஸாதீ³ரூபானி த³ஸ்ஸேந்தா கீளந்தி. அக்கே²னாதி கு³ளேன. பங்க³சீரேனாதி பங்க³சீரம் வுச்சதி பண்ணனாளிகா, தம் த⁴மந்தா கீளந்தி. வங்ககேனாதி கா³மதா³ரகானம் கீளனகேன கு²த்³த³கனங்க³லேன. மோக்க²சிகாயாதி மோக்க²சிகா வுச்சதி ஸம்பரிவத்தககீளா, ஆகாஸே வா த³ண்ட³ம் க³ஹேத்வா, பூ⁴மியம் வா ஸீஸம் ட²பேத்வா ஹேட்டு²பரியபா⁴வேன பரிவத்தந்தா கீளந்தீதி அத்தோ². சிங்கு³லகேனாதி சிங்கு³லகம் வுச்சதி தாலபண்ணாதீ³ஹி கதம் வாதப்பஹாரேன பரிப்³ப⁴மனசக்கம், தேன கீளந்தி. பத்தாள்ஹகேனாதி பத்தாள்ஹகம் வுச்சதி பண்ணனாளி, தாய வாலிகாதீ³னி மினந்தா கீளந்தி. ரத²கேனாதி கு²த்³த³கரதே²ன. த⁴னுகேனாதி கு²த்³த³கத⁴னுனா.

அக்க²ரிகாயாதி அக்க²ரிகா வுச்சதி ஆகாஸே வா பிட்டி²யம் வா அக்க²ரஜானனகீளா, தாய கீளந்தி. மனேஸிகாயாதி மனேஸிகா வுச்சதி மனஸா சிந்திதஜானனகீளா, தாய கீளந்தி. யதா²வஜ்ஜேனாதி யதா²வஜ்ஜம் வுச்சதி காணகுணிகக²ஞ்ஜாதீ³னம் யம் யம் வஜ்ஜம் தம் தம் பயோஜேத்வா த³ஸ்ஸனகீளா தாய கீளந்தி, வேலம்ப⁴கா விய. ஹத்தி²ஸ்மிம்பி ஸிக்க²ந்தீதி ஹத்தி²னிமித்தம் யம் ஸிப்பம் ஸிக்கி²தப்³ப³ம், தம் ஸிக்க²ந்தி. ஏஸேவ நயோ அஸ்ஸாதீ³ஸு. தா⁴வந்திபீதி பரம்முகா² க³ச்ச²ந்தா தா⁴வந்தி. ஆதா⁴வந்திபீதி யத்தகம் தா⁴வந்தி, தத்தகமேவ அபி⁴முகா² புன ஆக³ச்ச²ந்தா ஆதா⁴வந்தி. நிப்³பு³ஜ்ஜ²ந்தீதி மல்லயுத்³த⁴ம் கரோந்தி. நலாடிகம்பி தே³ந்தீதி ‘‘ஸாது⁴, ஸாது⁴, ப⁴கி³னீ’’தி அத்தனோ நலாடே அங்கு³லிம் ட²பேத்வா தஸ்ஸா நலாடே ட²பேந்தி. விவித⁴ம்பி அனாசாரம் ஆசரந்தீதி அஞ்ஞம்பி பாளியம் அனாக³தம் முக²டி³ண்டி³மாதி³விவித⁴ம் அனாசாரம் ஆசரந்தி.

432. பாஸாதி³கேனாதி பஸாதா³வஹேன, ஸாருப்பேன ஸமணானுச்ச²விகேன. அபி⁴க்கந்தேனாதி க³மனேன. படிக்கந்தேனாதி நிவத்தனேன. ஆலோகிதேனாதி புரதோ த³ஸ்ஸனேன. விலோகிதேனாதி இதோ சிதோ ச த³ஸ்ஸனேன. ஸமிஞ்ஜிதேனாதி பப்³ப³ஸங்கோசனேன. பஸாரிதேனாதி தேஸம்யேவ பஸாரணேன. ஸப்³ப³த்த² இத்த²ம்பூ⁴தாக்²யானத்தே² கரணவசனம், ஸதிஸம்பஜஞ்ஞேஹி அபி⁴ஸங்க²தத்தா பாஸாதி³க அபி⁴க்கந்த-படிக்கந்த-ஆலோகித-விலோகித-ஸமிஞ்ஜித-பஸாரிதோ ஹுத்வாதி வுத்தம் ஹோதி. ஓக்கி²த்தசக்கூ²தி ஹேட்டா²-கி²த்தசக்கு². இரியாபத²ஸம்பன்னோதி தாய பாஸாதி³கஅபி⁴க்கந்தாதி³தாய ஸம்பன்னஇரியாபதோ².

க்வாயந்தி கோ அயம். அப³லப³லோ வியாதி அப³லோ கிர போ³ந்தோ³ வுச்சதி, அதிஸயத்தே² ச இத³ம் ஆமேடி³தம், தஸ்மா அதிபோ³ந்தோ³ வியாதி வுத்தம் ஹோதி. மந்த³மந்தோ³தி அபி⁴க்கந்தாதீ³னம் அனுத்³த⁴ததாய அதிமந்தோ³. அதிஸண்ஹோதி ஏவம் கு³ணமேவ தோ³ஸதோ த³ஸ்ஸேந்தி. பா⁴குடிகபா⁴குடிகோ வியாதி ஓக்கி²த்தசக்கு²தாய ப⁴குடிம் கத்வா ஸங்குடிதமுகோ² குபிதோ விய விசரதீதி மஞ்ஞமானா வத³ந்தி. ஸண்ஹாதி நிபுணா, ‘‘அம்ம தாத ப⁴கி³னீ’’தி ஏவம் உபாஸகஜனம் யுத்தட்டா²னே உபனேதும் சே²கா, ந யதா² அயம்; ஏவம் அப³லப³லோ வியாதி அதி⁴ப்பாயோ. ஸகி²லாதி ஸாக²ல்யேன யுத்தா. ஸுக²ஸம்பா⁴ஸாதி இத³ம் புரிமஸ்ஸ காரணவசனம். யேஸஞ்ஹி ஸுக²ஸம்பா⁴ஸா ஸம்மோத³னீயகதா² நேலா ஹோதி கண்ணஸுகா², தே ஸகி²லாதி வுச்சந்தி. தேனாஹம்ஸு – ‘‘ஸகி²லா ஸுக²ஸம்பா⁴ஸா’’தி. அயம் பனேத்த² அதி⁴ப்பாயோ – அம்ஹாகம் அய்யா உபாஸகே தி³ஸ்வா மது⁴ரம் ஸம்மோத³னீயம் கத²ம் கதே²ந்தி, தஸ்மா ஸகி²லா ஸுக²ஸம்பா⁴ஸா, ந யதா² அயம்; ஏவம் மந்த³மந்தா³ வியாதி. மிஹிதபுப்³ப³ங்க³மாதி மிஹிதம் புப்³ப³ங்க³மம் ஏதேஸம் வசனஸ்ஸாதி மிஹிதபுப்³ப³ங்க³மா, பட²மம் ஸிதம் கத்வா பச்சா² வத³ந்தீதி அத்தோ². ஏஹிஸ்வாக³தவாதி³னோதி உபாஸகம் தி³ஸ்வா ‘‘ஏஹி ஸ்வாக³தம் தவா’’தி ஏவம்வாதி³னோ, ந யதா² அயம்; ஏவம் ஸங்குடிதமுக²தாய பா⁴குடிகபா⁴குடிகா விய ஏவம் மிஹிதபுப்³ப³ங்க³மாதி³தாய அபா⁴குடிகபா⁴வம் அத்த²தோ த³ஸ்ஸேத்வா புன ஸரூபேனபி த³ஸ்ஸேந்தோ ஆஹம்ஸு – ‘‘அபா⁴குடிகா உத்தானமுகா² புப்³ப³பா⁴ஸினோ’’தி. உப்படிபாடியா வா திண்ணம்பி ஆகாரானம் அபா⁴வத³ஸ்ஸனமேதந்தி வேதி³தப்³ப³ம். கத²ம்? ஏத்த² ஹி ‘‘அபா⁴குடிகா’’தி இமினா பா⁴குடிகபா⁴குடிகாகாரஸ்ஸ அபா⁴வோ த³ஸ்ஸிதோ. ‘‘உத்தானமுகா²’’தி இமினா மந்த³மந்தா³காரஸ்ஸ, யே ஹி சக்கூ²னி உம்மிலேத்வா ஆலோகனேன உத்தானமுகா² ஹோந்தி, ந தே மந்த³மந்தா³. புப்³ப³பா⁴ஸினோதி இமினா அப³லப³லாகாரஸ்ஸ அபா⁴வோ த³ஸ்ஸிதோ, யே ஹி ஆபா⁴ஸனகுஸலதாய ‘‘அம்ம தாதா’’தி பட²மதரம் ஆபா⁴ஸந்தி, ந தே அப³லப³லாதி.

ஏஹி, ப⁴ந்தே, க⁴ரம் க³மிஸ்ஸாமாதி ஸோ கிர உபாஸகோ ‘‘ந கோ², ஆவுஸோ, பிண்டோ³ லப்³ப⁴தீ’’தி வுத்தே ‘‘தும்ஹாகம் பி⁴க்கூ²ஹியேவ ஏதம் கதம், ஸகலம்பி கா³மம் விசரந்தா ந லச்ச²தா²’’தி வத்வா பிண்ட³பாதம் தா³துகாமோ ‘‘ஏஹி, ப⁴ந்தே, க⁴ரம் க³மிஸ்ஸாமா’’தி ஆஹ. கிம் பனாயம் பயுத்தவாசா ஹோதி, ந ஹோதீதி? ந ஹோதி. புச்சி²தபஞ்ஹோ நாமாயம் கதே²தும் வட்டதி. தஸ்மா இதா³னி சேபி புப்³ப³ண்ஹே வா ஸாயன்ஹே வா அந்தரக⁴ரம் பவிட்ட²ம் பி⁴க்கு²ம் கோசி புச்சே²ய்ய – ‘‘கஸ்மா, ப⁴ந்தே, சரதா²’’தி? யேனத்தே²ன சரதி, தம் ஆசிக்கி²த்வா ‘‘லத்³த⁴ம் ந லத்³த⁴’’ந்தி வுத்தே ஸசே ந லத்³த⁴ம், ‘‘ந லத்³த⁴’’ந்தி வத்வா யம் ஸோ தே³தி, தம் க³ஹேதும் வட்டதி.

து³ட்டோ²தி ந பஸாதா³தீ³னம் வினாஸேன து³ட்டோ², புக்³க³லவஸேன து³ட்டோ². தா³னபதா²னீதி தா³னானியேவ வுச்சந்தி. அத² வா தா³னபதா²னீதி தா³னனிப³த்³தா⁴னி தா³னவத்தானீதி வுத்தம் ஹோதி. உபச்சி²ன்னானீதி தா³யகேஹி உபச்சி²ன்னானி, ந தே தானி ஏதரஹி தே³ந்தி. ரிஞ்சந்தீதி விஸும் ஹோந்தி நானா ஹோந்தி, பக்கமந்தீதி வுத்தம் ஹோதி. ஸண்ட²ஹேய்யாதி ஸம்மா திட்டே²ய்ய, பேஸலானம் பி⁴க்கூ²னம் பதிட்டா² ப⁴வேய்ய.

ஏவமாவுஸோதி கோ² ஸோ பி⁴க்கு² ஸத்³த⁴ஸ்ஸ பஸன்னஸ்ஸ உபாஸகஸ்ஸ ஸாஸனம் ஸம்படிச்சி². ஏவரூபம் கிர ஸாஸனம் கப்பியம் ஹரிதும் வட்டதி, தஸ்மா ‘‘மம வசனேன ப⁴க³வதோ பாதே³ வந்த³தா²’’தி வா ‘‘சேதியம் படிமம் போ³தி⁴ம் ஸங்க⁴த்தே²ரம் வந்த³தா²’’தி வா ‘‘சேதியே க³ந்த⁴பூஜம் கரோத², புப்ப²பூஜம் கரோதா²’’தி வா ‘‘பி⁴க்கூ² ஸன்னிபாதேத², தா³னம் த³ஸ்ஸாம, த⁴ம்மம் ஸோஸ்ஸாமாதி வா ஈதி³ஸேஸு ஸாஸனேஸு குக்குச்சம் ந காதப்³ப³ம். கப்பியஸாஸனானி ஏதானி ந கி³ஹீனம் கி³ஹிகம்மபடிஸம்யுத்தானீதி. குதோ ச த்வம், பி⁴க்கு², ஆக³ச்ச²ஸீதி நிஸின்னோ ஸோ பி⁴க்கு² ந ஆக³ச்ச²தி அத்த²தோ பன ஆக³தோ ஹோதி; ஏவம் ஸந்தேபி வத்தமானஸமீபே வத்தமானவசனம் லப்³ப⁴தி, தஸ்மா ந தோ³ஸோ. பரியோஸானே ‘‘ததோ அஹம் ப⁴க³வா ஆக³ச்சா²மீ’’தி ஏத்தா²பி வசனே ஏஸேவ நயோ.

433. பட²மம் அஸ்ஸஜிபுனப்³ப³ஸுகா பி⁴க்கூ² சோதே³தப்³பா³தி ‘‘மயம் தும்ஹே வத்துகாமா’’தி ஓகாஸம் காரேத்வா வத்து²னா ச ஆபத்தியா ச சோதே³தப்³பா³. சோதே³த்வா யம் ந ஸரந்தி, தம் ஸாரேதப்³பா³. ஸசே வத்து²ஞ்ச ஆபத்திஞ்ச படிஜானந்தி, ஆபத்திமேவ வா படிஜானந்தி, ந வத்து²ம், ஆபத்திம் ரோபேதப்³பா³. அத² வத்து²மேவ படிஜானந்தி, நாபத்திம்; ஏவம்பி ‘‘இமஸ்மிம் வத்து²ஸ்மிம் அயம் நாம ஆபத்தீ’’தி ரோபேதப்³பா³ ஏவ. யதி³ நேவ வத்து²ம், நாபத்திம் படிஜானந்தி, ஆபத்திம் ந ரோபேதப்³பா³ அயமேத்த² வினிச்ச²யோ. யதா²படிஞ்ஞாய பன ஆபத்திம் ரோபேத்வா; ஏவம் பப்³பா³ஜனீயகம்மம் காதப்³ப³ந்தி த³ஸ்ஸேந்தோ ‘‘ப்³யத்தேன பி⁴க்கு²னா’’திஆதி³மாஹ, தம் உத்தானத்த²மேவ.

ஏவம் பப்³பா³ஜனீயகம்மகதேன பி⁴க்கு²னா யஸ்மிம் விஹாரே வஸந்தேன யஸ்மிம் கா³மே குலதூ³ஸககம்மம் கதம் ஹோதி, தஸ்மிம் விஹாரே வா தஸ்மிம் கா³மே வா ந வஸிதப்³ப³ம். தஸ்மிம் விஹாரே வஸந்தேன ஸாமந்தகா³மேபி பிண்டா³ய ந சரிதப்³ப³ம். ஸாமந்தவிஹாரேபி வஸந்தேன தஸ்மிம் கா³மே பிண்டா³ய ந சரிதப்³ப³ம். உபதிஸ்ஸத்தே²ரோ பன ‘‘ப⁴ந்தே நக³ரம் நாம மஹந்தம் த்³வாத³ஸயோஜனிகம்பி ஹோதீ’’தி அந்தேவாஸிகேஹி வுத்தோ ‘‘யஸ்ஸா வீதி²யா குலதூ³ஸககம்மம் கதம் தத்தே²வ வாரித’’ந்தி ஆஹ. ததோ ‘‘வீதி²பி மஹதீ நக³ரப்பமாணாவ ஹோதீ’’தி வுத்தோ ‘‘யஸ்ஸா க⁴ரபடிபாடியா’’தி ஆஹ, ‘‘க⁴ரபடிபாடீபி வீதி²ப்பமாணாவ ஹோதீ’’தி வுத்தோ இதோ சிதோ ச ஸத்த க⁴ரானி வாரிதானீ’’தி ஆஹ. தம் பன ஸப்³ப³ம் தே²ரஸ்ஸ மனோரத²மத்தமேவ. ஸசேபி விஹாரோ தியோஜனபரமோ ஹோதி த்³வாத³ஸயோஜனபரமஞ்ச நக³ரம், நேவ விஹாரே வஸிதும் லப்³ப⁴தி, ந நக³ரே சரிதுந்தி.

435. தே ஸங்கே⁴ன பப்³பா³ஜனீயகம்மகதாதி கத²ம் ஸங்கோ⁴ தேஸம் கம்மம் அகாஸி? ந க³ந்த்வாவ அஜ்ஜோ²த்த²ரித்வா அகாஸி, அத² கோ² குலேஹி நிமந்தேத்வா ஸங்க⁴ப⁴த்தேஸு கயிரமானேஸு தஸ்மிம் தஸ்மிம் டா²னே தே²ரா ஸமணபடிபத³ம் கதே²த்வா ‘‘அயம் ஸமணோ, அயம் அஸ்ஸமணோ’’தி மனுஸ்ஸே ஸஞ்ஞாபேத்வா ஏகம் த்³வே பி⁴க்கூ² ஸீமம் பவே ஸேத்வா ஏதேனேவுபாயேன ஸப்³பே³ஸம் பப்³பா³ஜனீயகம்மம் அகம்ஸூதி. ஏவம் பப்³பா³ஜனீயகம்மகதஸ்ஸ ச அட்டா²ரஸ வத்தானி பூரேத்வா யாசந்தஸ்ஸ கம்மம் படிப்பஸ்ஸம்பே⁴தப்³ப³ம். படிப்பஸ்ஸத்³த⁴கம்மேனாபி ச தேன யேஸு குலேஸு புப்³பே³ குலதூ³ஸககம்மம் கதம், ததோ பச்சயா ந க³ஹேதப்³பா³, ஆஸவக்க²யப்பத்தேனாபி ந க³ஹேதப்³பா³, அகப்பியாவ ஹோந்தி. ‘‘கஸ்மா ந க³ண்ஹதா²’’தி புச்சி²தேன ‘‘புப்³பே³ ஏவம் கதத்தா’’தி வுத்தே, ஸசே வத³ந்தி ‘‘ந மயம் தேன காரணேன தே³ம இதா³னி ஸீலவந்ததாய தே³மா’’தி க³ஹேதப்³பா³. பகதியா தா³னட்டா²னேயேவ குலதூ³ஸககம்மம் கதம் ஹோதி. ததோ பகதிதா³னமேவ க³ஹேதும் வட்டதி, யம் வட்³டே⁴த்வா தே³ந்தி, தம் ந வட்டதி.

ந ஸம்மா வத்தந்தீதி தே பன அஸ்ஸஜிபுனப்³ப³ஸுகா அட்டா²ரஸஸு வத்தேஸு ஸம்மா ந வத்தந்தி. ந லோமம் பாதேந்தீதி அனுலோமபடிபத³ம் அப்படிபஜ்ஜனதாய ந பன்னலோமா ஹோந்தி. ந நேத்தா²ரம் வத்தந்தீதி அத்தனோ நித்த²ரணமக்³க³ம் ந படிபஜ்ஜந்தி. ந பி⁴க்கூ² க²மாபேந்தீதி ‘‘து³க்கடம், ப⁴ந்தே, அம்ஹேஹி, ந புன ஏவம் கரிஸ்ஸாம, க²மத² அம்ஹாக’’ந்தி ஏவம் பி⁴க்கூ²னம் க²மாபனம் ந கரோந்தி. அக்கோஸந்தீதி காரகஸங்க⁴ம் த³ஸஹி அக்கோஸவத்தூ²ஹி அக்கோஸந்தி. பரிபா⁴ஸந்தீதி ப⁴யம் நேஸம் த³ஸ்ஸேந்தி. ச²ந்த³கா³மிதா…பே… ப⁴யகா³மிதா பாபேந்தீதி ஏதே ச²ந்த³கா³மினோ ச…பே… ப⁴யகா³மினோ சாதி ஏவம் ச²ந்த³கா³மிதாயபி…பே… ப⁴யகா³மிதாயபி பாபேந்தி, யோஜேந்தீதி அத்தோ². பக்கமந்தீதி தேஸம் பரிவாரேஸு பஞ்சஸு ஸமணஸதேஸு ஏகச்சே தி³ஸா பக்கமந்தி. விப்³ப⁴மந்தீதி ஏகச்சே கி³ஹீ ஹோந்தி. கத²ஞ்ஹி நாம அஸ்ஸஜிபுனப்³ப³ஸுகா பி⁴க்கூ²தி ஏத்த² த்³வின்னம் பமோக்கா²னம் வஸேன ஸப்³பே³பி ‘‘அஸ்ஸஜிபுனப்³ப³ஸுகா’’தி வுத்தா.

436-7. கா³மம் வாதி ஏத்த² நக³ரம்பி கா³மக்³க³ஹணேனேவ க³ஹிதம். தேனஸ்ஸ பத³பா⁴ஜனே ‘‘கா³மோபி நிக³மோபி நக³ரம்பி கா³மோ சேவ நிக³மோ சா’’தி வுத்தம். தத்த² அபாகாரபரிக்கே²போ ஸஆபணோ நிக³மோதி வேதி³தப்³போ³.

குலானி தூ³ஸேதீதி குலதூ³ஸகோ. தூ³ஸேந்தோ ச ந அஸுசிகத்³த³மாதீ³ஹி தூ³ஸேதி, அத² கோ² அத்தனோ து³ப்படிபத்தியா தேஸம் பஸாத³ம் வினாஸேதி. தேனேவஸ்ஸ பத³பா⁴ஜனே ‘‘புப்பே²ன வா’’திஆதி³ வுத்தம். தத்த² யோ ஹரித்வா வா ஹராபேத்வா வா பக்கோஸித்வா வா பக்கோஸாபேத்வா வா ஸயம் வா உபக³தானம் யம்கிஞ்சி அத்தனோ ஸந்தகம் புப்ப²ம் குலஸங்க³ஹத்தா²ய தே³தி, து³க்கடம். பரஸந்தகம் தே³தி, து³க்கடமேவ. தே²ய்யசித்தேன தே³தி, ப⁴ண்ட³க்³கே⁴ன காரேதப்³போ³. ஏஸேவ நயோ ஸங்கி⁴கேபி. அயம் பன விஸேஸோ, ஸேனாஸனத்தா²ய நியாமிதம் இஸ்ஸரவதாய த³த³தோ து²ல்லச்சயம்.

புப்ப²ம் நாம கஸ்ஸ தா³தும் வட்டதி, கஸ்ஸ ந வட்டதீதி? மாதாபிதூன்னம் தாவ ஹரித்வாபி ஹராபேத்வாபி பக்கோஸித்வாபி பக்கோஸாபேத்வாபி தா³தும் வட்டதி, ஸேஸஞாதகானம் பக்கோஸாபேத்வாவ. தஞ்ச கோ² வத்து²பூஜனத்தா²ய, மண்ட³னத்தா²ய பன ஸிவலிங்கா³தி³பூஜனத்தா²ய வா கஸ்ஸசிபி தா³தும் ந வட்டதி. மாதாபிதூனஞ்ச ஹராபேந்தேன ஞாதிஸாமணேரேஹேவ ஹராபேதப்³ப³ம். இதரே பன யதி³ ஸயமேவ இச்ச²ந்தி, வட்டதி. ஸம்மதேன புப்ப²பா⁴ஜகேன பா⁴ஜனகாலே ஸம்பத்தானம் ஸாமணேரானம் உபட்³ட⁴பா⁴க³ம் தா³தும் வட்டதி. குருந்தி³யம் ஸம்பத்தகி³ஹீனம் உபட்³ட⁴பா⁴க³ம். மஹாபச்சரியம் ‘‘சூளகம் தா³தும் வட்டதீ’’தி வுத்தம். அஸம்மதேன அபலோகேத்வா தா³தப்³ப³ம்.

ஆசரியுபஜ்ஜா²யேஸு ஸகா³ரவா ஸாமணேரா ப³ஹூனி புப்பா²னி ஆஹரித்வா ராஸிம் கத்வா ட²பேந்தி, தே²ரா பாதோவ ஸம்பத்தானம் ஸத்³தி⁴விஹாரிகாதீ³னம் உபாஸகானம் வா ‘‘த்வம் இத³ம் க³ண்ஹ, த்வம் இத³ம் க³ண்ஹா’’தி தே³ந்தி, புப்ப²தா³னம் நாம ந ஹோதி. ‘‘சேதியம் பூஜேஸ்ஸாமா’’தி க³ஹேத்வா க³ச்ச²ந்தாபி பூஜம் கரோந்தாபி தத்த² தத்த² ஸம்பத்தானம் சேதியபூஜனத்தா²ய தே³ந்தி, ஏதம்பி புப்ப²தா³னம் நாம ந ஹோதி. உபாஸகே அக்கபுப்பா²தீ³ஹி பூஜேந்தே தி³ஸ்வா ‘‘விஹாரே கணிகாரபுப்பா²தீ³னி அத்தி², உபாஸகா தானி க³ஹேத்வா பூஜேதா²’’தி வத்தும்பி வட்டதி. பி⁴க்கூ² புப்ப²பூஜம் கத்வா தி³வாதரம் கா³மம் பவிட்டே² ‘‘கிம், ப⁴ந்தே, அதிதி³வா பவிட்ட²த்தா²’’தி புச்ச²ந்தி, ‘‘விஹாரே ப³ஹூனி புப்பா²னி பூஜம் அகரிம்ஹா’’தி வத³ந்தி. மனுஸ்ஸா ‘‘ப³ஹூனி கிர விஹாரே புப்பா²னீ’’தி புனதி³வஸே பஹூதம் கா²த³னீயம் போ⁴ஜனீயம் க³ஹேத்வா விஹாரம் க³ந்த்வா புப்ப²பூஜஞ்ச கரோந்தி, தா³னஞ்ச தே³ந்தி, வட்டதி. மனுஸ்ஸா ‘‘மயம், ப⁴ந்தே, அஸுகதி³வஸம் நாம பூஜேஸ்ஸாமா’’தி புப்ப²வாரம் யாசித்வா அனுஞ்ஞாததி³வஸே ஆக³ச்ச²ந்தி, ஸாமணேரேஹி ச பகே³வ புப்பா²னி ஓசினித்வா ட²பிதானி ஹோந்தி, தே ருக்கே²ஸு புப்பா²னி அபஸ்ஸந்தா ‘‘குஹிம், ப⁴ந்தே, புப்பா²னீ’’தி வத³ந்தி, ஸாமணேரேஹி ஓசினித்வா ட²பிதானி தும்ஹே பன பூஜேத்வா க³ச்ச²த², ஸங்கோ⁴ அஞ்ஞம் தி³வஸம் பூஜேஸ்ஸதீதி. தே பூஜேத்வா தா³னம் த³த்வா க³ச்ச²ந்தி, வட்டதி. மஹாபச்சரியம் பன குருந்தி³யஞ்ச ‘‘தே²ரா ஸாமணேரேஹி தா³பேதும் ந லப⁴ந்தி. ஸசே ஸயமேவ தானி புப்பா²னி தேஸம் தே³ந்தி, வட்டதி. தே²ரேஹி பன ‘ஸாமணேரேஹி ஓசினித்வா ட²பிதானீ’தி ஏத்தகமேவ வத்தப்³ப³’’ந்தி வுத்தம். ஸசே பன புப்ப²வாரம் யாசித்வா அனோசிதேஸு புப்பே²ஸு யாகு³ப⁴த்தாதீ³னி ஆதா³ய ஆக³ந்த்வா ஸாமணேரே ‘‘ஓசினித்வா தே³தா²’’தி வத³ந்தி. ஞாதகஸாமணேரானம்யேவ ஓசினித்வா தா³தும் வட்டதி. அஞ்ஞாதகே உக்கி²பித்வா ருக்க²ஸாகா²ய ட²பேந்தி, ந ஓரோஹித்வா பலாயிதப்³ப³ம், ஓசினித்வா தா³தும் வட்டதி. ஸசே பன கோசி த⁴ம்மகதி²கோ ‘‘ப³ஹூனி உபாஸகா விஹாரே புப்பா²னி யாகு³ப⁴த்தாதீ³னி ஆதா³ய க³ந்த்வா புப்ப²பூஜம் கரோதா²’’தி வத³தி, தஸ்ஸேவ ந கப்பதீதி மஹாபச்சரியஞ்ச குருந்தி³யஞ்ச வுத்தம். மஹாஅட்ட²கதா²யம் பன ‘‘ஏதம் அகப்பியம் ந வட்டதீ’’தி அவிஸேஸேன வுத்தம்.

ப²லம்பி அத்தனோ ஸந்தகம் வுத்தனயேனேவ மாதாபிதூனம்ஞ்ச ஸேஸஞாதகானஞ்ச தா³தும் வட்டதி. குலஸங்க³ஹத்தா²ய பன தே³ந்தஸ்ஸ வுத்தனயேனேவ அத்தனோ ஸந்தகே பரஸந்தகே ஸங்கி⁴கே ஸேனாஸனத்தா²ய நியாமிதே ச து³க்கடாதீ³னி வேதி³தப்³பா³னி. அத்தனோ ஸந்தகம்யேவ கி³லானமனுஸ்ஸானம் வா ஸம்பத்தஇஸ்ஸரானம் வா கீ²ணபரிப்³ப³யானம் வா தா³தும் வட்டதி, ப²லதா³னம் ந ஹோதி. ப²லபா⁴ஜகேனாபி ஸம்மதேன ஸங்க⁴ஸ்ஸ ப²லபா⁴ஜனகாலே ஸம்பத்தமனுஸ்ஸானம் உபட்³ட⁴பா⁴க³ம் தா³தும் வட்டதி. அஸம்மதேன அபலோகேத்வா தா³தப்³ப³ம். ஸங்கா⁴ராமேபி ப²லபரிச்சே²தே³ன வா ருக்க²பரிச்சே²தே³ன வா கதிகா காதப்³பா³. ததோ கி³லானமனுஸ்ஸானம் வா அஞ்ஞேஸம் வா ப²லம் யாசந்தானம் யதா²பரிச்சே²தே³ன சத்தாரி பஞ்ச ப²லானி தா³தப்³பா³னி. ருக்கா² வா த³ஸ்ஸேதப்³பா³ ‘‘இதோ க³ஹேதும் லப்³ப⁴தீ’’தி. ‘‘இக⁴ ப²லானி ஸுந்த³ரானி, இதோ க³ண்ஹதா²’’தி ஏவம் பன ந வத்தப்³ப³ம்.

சுண்ணேனாதி ஏத்த² அத்தனோ ஸந்தகம் ஸிரீஸசுண்ணம் வா அஞ்ஞம் வா கஸாவம் யம்கிஞ்சி குலஸங்க³ஹத்தா²ய தே³தி, து³க்கடம். பரஸந்தகாதீ³ஸுபி வுத்தனயேனேவ வினிச்ச²யோ வேதி³தப்³போ³. அயம் பன விஸேஸோ – இத⁴ ஸங்க⁴ஸ்ஸ ரக்கி²தகோ³பிதாபி ருக்க²ச்ச²ல்லி க³ருப⁴ண்ட³மேவ. மத்திகத³ந்தகட்ட²வேளூஸுபி க³ருப⁴ண்டூ³பக³ம் ஞத்வா சுண்ணே வுத்தனயேனேவ வினிச்ச²யோ வேதி³தப்³போ³. பண்ணதா³னம் பன ஏத்த² ந ஆக³தம், தம்பி வுத்தனயேனேவ வேதி³தப்³ப³ம். பரதோபி க³ருப⁴ண்ட³வினிச்ச²யே ஸப்³ப³ம் வித்தா²ரேன வண்ணயிஸ்ஸாம.

வேஜ்ஜிகாய வாதி ஏத்த² வேஜ்ஜகம்மவிதி⁴ ததியபாராஜிகவண்ணனாயம் வுத்தனயேனேவ வேதி³தப்³போ³.

ஜங்க⁴பேஸனிகேனாதி ஏத்த² ஜங்க⁴பேஸனியந்தி கி³ஹீனம் தூ³தேய்யஸாஸனஹரணகம்மம் வுச்சதி, தம் ந காதப்³ப³ம். கி³ஹீனஞ்ஹி ஸாஸனம் க³ஹேத்வா க³ச்ச²ந்தஸ்ஸ பதே³ பதே³ து³க்கடம். தம் கம்மம் நிஸ்ஸாய லத்³த⁴போ⁴ஜனம் பு⁴ஞ்ஜந்தஸ்ஸாபி அஜ்ஜோ²ஹாரே அஜ்ஜோ²ஹாரே து³க்கடம். பட²மம் ஸாஸனம் அக்³க³ஹேத்வாபி பச்சா² ‘‘அயம் தா³னி ஸோ கா³மோ ஹந்த³ தம் ஸாஸனம் ஆரோசேமீ’’தி மக்³கா³ ஓக்கமந்தஸ்ஸாபி பதே³ பதே³ து³க்கடம். ஸாஸனம் ஆரோசேத்வா லத்³த⁴போ⁴ஜனம் பு⁴ஞ்ஜதோ புரிமனயேனேவ து³க்கடம். ஸாஸனம் அக்³க³ஹேத்வா ஆக³தேன பன ‘‘ப⁴ந்தே தஸ்மிம் கா³மே இத்த²ன்னாமஸ்ஸ கா பவத்தீ’’தி புச்சி²யமானேன கதே²தும் வட்டதி, புச்சி²தபஞ்ஹே தோ³ஸோ நத்தி². பஞ்சன்னம் பன ஸஹத⁴ம்மிகானம் மாதாபிதூனம் பண்டு³பலாஸஸ்ஸ அத்தனோ வேய்யாவச்சகரஸ்ஸ ச ஸாஸனம் ஹரிதும் வட்டதி, கி³ஹீனஞ்ச புப்³பே³ வுத்தப்பகாரம் கப்பியஸாஸனம். இத³ஞ்ஹி ஜங்க⁴பேஸனியகம்மம் நாம ந ஹோதி. இமேஹி பன அட்ட²ஹி குலதூ³ஸககம்மேஹி உப்பன்னபச்சயா பஞ்சன்னம்பி ஸஹத⁴ம்மிகானம் ந கப்பந்தி, அபூ⁴தாரோசனரூபியஸம்வோஹாரேஹி உப்பன்னபச்சயஸதி³ஸாவ ஹோந்தி.

பாபா ஸமாசாரா அஸ்ஸாதி பாபஸமாசாரோ. தே பன யஸ்மா மாலாவச்ச²ரோபனாத³யோ இத⁴ அதி⁴ப்பேதா, தஸ்மா ‘‘மாலாவச்ச²ம் ரோபேந்திபீ’’திஆதி³னா நயேனஸ்ஸ பத³பா⁴ஜனம் வுத்தம். திரோக்கா²தி பரம்முகா². குலானி ச தேன து³ட்டா²னீதி ஏத்த² பன யஸ்மா ‘‘குலானீ’’தி வோஹாரமத்தமேதம், அத்த²தோ ஹி மனுஸ்ஸா தேன து³ட்டா² ஹோந்தி, தஸ்மாஸ்ஸ பத³பா⁴ஜனே ‘‘புப்³பே³ ஸத்³தா⁴ ஹுத்வா’’திஆதி³மாஹ. ச²ந்த³கா³மினோதி ச²ந்தே³ன க³ச்ச²ந்தீதி ச²ந்த³கா³மினோ. ஏஸ நயோ ஸேஸேஸு. ஸமனுபா⁴ஸிதப்³போ³ தஸ்ஸ படினிஸ்ஸக்³கா³யாதி ஏத்த² குலதூ³ஸககம்மேன து³க்கடமேவ. யம் பன ஸோ ஸங்க⁴ம் பரிப⁴வித்வா ‘‘ச²ந்த³கா³மினோ’’திஆதி³மாஹ. தஸ்ஸ படினிஸ்ஸக்³கா³ய ஸமனுபா⁴ஸனகம்மம் காதப்³ப³ந்தி ஏவமத்தோ² த³ட்ட²ப்³போ³. ஸேஸம் ஸப்³ப³த்த² உத்தானத்த²மேவ.

ஸமுட்டா²னாதீ³னிபி பட²மஸங்க⁴பே⁴த³ஸதி³ஸானேவாதி.

குலதூ³ஸகஸிக்கா²பத³வண்ணனா நிட்டி²தா.

நிக³மனவண்ணனா

442. உத்³தி³ட்டா² கோ²…பே… ஏவமேதம் தா⁴ரயாமீதி ஏத்த² பட²மம் ஆபத்தி ஏதேஸந்தி பட²மாபத்திகா, பட²மம் வீதிக்கமக்க²ணேயேவ ஆபஜ்ஜிதப்³பா³தி அத்தோ². இதரே பன யதா² ததியே சதுத்தே² ச தி³வஸே ஹோதீதி ஜரோ ‘‘ததியகோ சதுத்த²கோ’’தி ச வுச்சதி; ஏவம் யாவததியே ஸமனுபா⁴ஸனகம்மே ஹோந்தீதி யாவததியகாதி வேதி³தப்³பா³.

யாவதீஹம் ஜானம் படிச்சா²தே³தீதி யத்தகானி அஹானி ஜானந்தோ படிச்சா²தே³தி, ‘‘அஹம் இத்த²ன்னாமம் ஆபத்திம் ஆபன்னோ’’தி ஸப்³ரஹ்மசாரீனம் நாரோசேதி. தாவதீஹந்தி தத்தகானி அஹானி. அகாமா பரிவத்த²ப்³ப³ந்தி ந காமேன, ந வஸேன, அத² கோ² அகாமேன அவஸேன பரிவாஸம் ஸமாதா³ய வத்த²ப்³ப³ம். உத்தரி சா²ரத்தந்தி பரிவாஸதோ உத்தரி ச² ரத்தியோ. பி⁴க்கு²மானத்தாயாதி பி⁴க்கூ²னம் மானனபா⁴வாய, ஆராத⁴னத்தா²யாதி வுத்தம் ஹோதி. வீஸதிஸங்கோ⁴ க³ணோ அஸ்ஸாதி வீஸதிக³ணோ. தத்ராதி யத்ர ஸப்³ப³ந்திமேன பரிச்சே²தே³ன வீஸதிக³ணோ பி⁴க்கு²ஸங்கோ⁴ அத்தி² தத்ர. அப்³பே⁴தப்³போ³தி அபி⁴ஏதப்³போ³ ஸம்படிச்சி²தப்³போ³, அப்³பா⁴னகம்மவஸேன ஓஸாரேதப்³போ³தி வுத்தம் ஹோதி, அவ்ஹாதப்³போ³தி வா அத்தோ². அனப்³பி⁴தோதி ந அப்³பி⁴தோ, அஸம்படிச்சி²தோ, அகதப்³பா⁴னகம்மோதி வுத்தம் ஹோதி, அனவ்ஹாதோதி வா அத்தோ². ஸாமீசீதி அனுத⁴ம்மதா, லோகுத்தரத⁴ம்மம் அனுக³தா ஓவாதா³னுஸாஸனீ, ஸாமீசி த⁴ம்மதாதி வுத்தம் ஹோதி. ஸேஸமேத்த² வுத்தனயமேவாதி.

ஸமந்தபாஸாதி³காய வினயஸம்வண்ணனாய

தேரஸகவண்ணனா நிட்டி²தா.