11. து³தியஸங்க⁴பே⁴த³ஸிக்கா²பத³வண்ணனா

417-8. தேன ஸமயேன பு³த்³தோ⁴ ப⁴க³வாதி து³தியஸங்க⁴பே⁴த³ஸிக்கா²பத³ம். தத்த² அனுவத்தகாதி தஸ்ஸ தி³ட்டி²க²ந்திருசிக்³க³ஹணேன அனுபடிபஜ்ஜனகா. வக்³க³ம் அஸாமக்³கி³பக்கி²யவசனம் வத³ந்தீதி வக்³க³வாத³கா. பத³பா⁴ஜனே பன ‘‘தஸ்ஸ வண்ணாய பக்கா²ய டி²தா ஹோந்தீ’’தி வுத்தம், தஸ்ஸ ஸங்க⁴பே⁴தா³ய பரக்கமந்தஸ்ஸ வண்ணத்தா²ய ச பக்க²வுட்³டி⁴அத்தா²ய ச டி²தாதி அத்தோ². யே ஹி வக்³க³வாத³கா, தே நியமேன ஈதி³ஸா ஹோந்தி, தஸ்மா ஏவம் வுத்தம். யஸ்மா பன திண்ணம் உத்³த⁴ம் கம்மாரஹா ந ஹோந்தி, ந ஹி ஸங்கோ⁴ ஸங்க⁴ஸ்ஸ கம்மம் கரோதி, தஸ்மா ஏகோ வா த்³வே வா தயோ வாதி வுத்தம்.

ஜானாதி நோதி அம்ஹாகம் ச²ந்தா³தீ³னி ஜானாதி. பா⁴ஸதீதி ‘‘ஏவம் கரோமா’’தி அம்ஹேஹி ஸத்³தி⁴ம் பா⁴ஸதி. அம்ஹாகம்பேதம் க²மதீதி யம் ஸோ கரோதி, ஏதம் அம்ஹாகம்பி ருச்சதி.

ஸமேதாயஸ்மந்தானம் ஸங்கே⁴னாதி ஆயஸ்மந்தானம் சித்தம் ஸங்கே⁴ன ஸத்³தி⁴ம் ஸமேது ஸமாக³ச்ச²து, ஏகீபா⁴வம் யாதூதி வுத்தம் ஹோதி. ஸேஸமேத்த² பட²மஸிக்கா²பதே³ வுத்தனயத்தா உத்தானத்த²த்தா ச பாகடமேவ.

ஸமுட்டா²னாதீ³னிபி பட²மஸிக்கா²பத³ஸதி³ஸானேவாதி.

து³தியஸங்க⁴பே⁴த³ஸிக்கா²பத³வண்ணனா நிட்டி²தா.