8. குமாரிபூ⁴தவக்³கோ³

1-2-3. பட²மது³தியததியஸிக்கா²பத³வண்ணனா

1119. குமாரிபூ⁴தவக்³க³ஸ்ஸ பட²மது³தியததியஸிக்கா²பதா³னி தீணி தீஹி கி³ஹிக³தஸிக்கா²பதே³ஹி ஸதி³ஸானி. யா பன தா ஸப்³ப³பட²மா த்³வே மஹாஸிக்க²மானா, தா அதிக்கந்தவீஸதிவஸ்ஸாதி வேதி³தப்³பா³. தா கி³ஹிக³தா வா ஹோந்து அகி³ஹிக³தா வா, ஸிக்க²மானா இச்சேவ வத்தப்³பா³, கி³ஹிக³தாதி வா குமாரிபூ⁴தாதி வா ந வத்தப்³பா³. கி³ஹிக³தாய த³ஸவஸ்ஸகாலே ஸிக்கா²ஸம்முதிம் த³த்வா த்³வாத³ஸவஸ்ஸகாலே உபஸம்பதா³ காதப்³பா³. ஏகாத³ஸவஸ்ஸகாலே த³த்வா தேரஸவஸ்ஸகாலே காதப்³பா³, த்³வாத³ஸதேரஸசுத்³த³ஸபன்னரஸஸோளஸஸத்தரஸஅட்டா²ரஸவஸ்ஸகாலே ஸம்முதிம் த³த்வா வீஸதிவஸ்ஸகாலே உபஸம்பதா³ காதப்³பா³. அட்டா²ரஸவஸ்ஸகாலதோ பட்டா²ய ச பனாயம் கி³ஹிக³தாதிபி குமாரிபூ⁴தாதிபி வத்தும் வட்டதி, குமாரிபூ⁴தா பன கி³ஹிக³தாதி ந வத்தப்³பா³, குமாரிபூ⁴தா இச்சேவ வத்தப்³பா³. மஹாஸிக்க²மானா பன கி³ஹிக³தாதிபி வத்தும் ந வட்டதி, குமாரிபூ⁴தாதிபி வத்தும் ந வட்டதி, ஸிக்கா²ஸம்முதிதா³னவஸேன பன திஸ்ஸோபி ஸிக்க²மானாதி வத்தும் வட்டதி.

பட²மது³தியததியானி.

4-5-6. சதுத்த²பஞ்சமச²ட்ட²ஸிக்கா²பத³வண்ணனா

1136. சதுத்த²பஞ்சமச²ட்டே²ஸு ஸப்³ப³ம் உத்தானமேவ. ஸப்³பா³னி திஸமுட்டா²னானி சதுத்த²ம் கிரியம், ஸஞ்ஞாவிமோக்க²ம், ஸசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி. பஞ்சமம் கிரியாகிரியம், ஸஞ்ஞாவிமோக்க²ம், ஸசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி. யஞ்சேத்த² ஸங்கே⁴ன பரிச்சி²ந்தி³தப்³பா³தி வுத்தம், தஸ்ஸ உபபரிக்கி²தப்³பா³தி அத்தோ². ச²ட்ட²ம் கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம் து³க்க²வேத³னந்தி. யம் பனேத்த² ‘‘பரிச்சி²ந்தி³த்வா’’தி வுத்தம், தஸ்ஸ உபபரிக்கி²த்வாதி அத்தோ².

சதுத்த²பஞ்சமச²ட்ட²ஸிக்கா²பதா³னி

7. ஸத்தமஸிக்கா²பத³வண்ணனா

1150. ஸத்தமே – ஸப்³ப³ம் உத்தானமேவ. து⁴ரனிக்கே²பஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

ஸத்தமஸிக்கா²பத³ம்.

8. அட்ட²மஸிக்கா²பத³வண்ணனா

1154. அட்ட²மேபி – ஸப்³ப³ம் உத்தானமேவ. ஸமுட்டா²னாதீ³னிபி அனந்தரஸதி³ஸானேவாதி.

அட்ட²மஸிக்கா²பத³ம்.

9. நவமஸிக்கா²பத³வண்ணனா

1158. நவமே – ஸோகாவாஸந்தி ஸங்கேதம் கத்வா அக³ச்ச²மானா புரிஸானம் அந்தோ ஸோகம் பவேஸேதீதி ஸோகாவாஸா, தம் ஸோகாவாஸம். தேனேவாஹ – ‘‘ஸோகாவாஸா நாம பரேஸம் து³க்க²ம் உப்பாதே³தீ’’தி. அத² வா க⁴ரம் விய க⁴ரஸாமிகா, அயம்பி புரிஸஸமாக³மம் அலப⁴மானா ஸோகம் ஆவிஸதி. இதி யம் ஆவிஸதி, ஸ்வாஸ்ஸா ஆவாஸோ ஹோதீதி ஸோகாவாஸா. தேனாஹ – ‘‘ஸோகம் ஆவிஸதீ’’தி. அஜானந்தீதி ஏதி³ஸா அயந்தி அஜானமானா. ஸேஸம் உத்தானமேவ. திஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

நவமஸிக்கா²பத³ம்.

10. த³ஸமஸிக்கா²பத³வண்ணனா

1164. த³ஸமே – அனாபுச்சா²தி அனாபுச்சி²த்வா. பி⁴க்கு²னீஹி த்³விக்க²த்தும் ஆபுச்சி²தப்³ப³ம் – பப்³ப³ஜ்ஜாகாலே ச உபஸம்பதா³காலே ச, பி⁴க்கூ²னம் பன ஸகிம் ஆபுச்சி²தேபி வட்டதி.

1165. அஜானந்தீதி மாதாதீ³னம் அத்தி²பா⁴வம் அஜானந்தீ. ஸேஸம் உத்தானமேவ. இத³ம் அபுப்³ப³ஸமுட்டா²னஸீஸம். சதுஸமுட்டா²னம் – வாசதோ காயவாசதோ வாசாசித்ததோ காயவாசாசித்ததோ ச ஸமுட்டா²தி. கத²ம்? அப்³பா⁴னகம்மாதீ³ஸு கேனசிதே³வ கரணீயேன க²ண்ட³ஸீமாயம் நிஸின்னா ‘‘பக்கோஸத² ஸிக்க²மானம், இதே⁴வ நம் உபஸம்பாதே³ஸ்ஸாமா’’தி உபஸம்பாதே³தி; ஏவம் வாசதோ ஸமுட்டா²தி. உபஸ்ஸயதோ பட்டா²ய உபஸம்பாதே³ஸ்ஸாமீதி வத்வா க²ண்ட³ஸீமம் க³ச்ச²ந்தியா காயவாசதோ ஸமுட்டா²தி. த்³வீஸுபி டா²னேஸு பண்ணத்திபா⁴வம் ஜானித்வாவ வீதிக்கமம் கரோந்தியா வாசாசித்ததோ காயவாசாசித்ததோ ச ஸமுட்டா²தி. அனனுஜானாபேத்வா உபஸம்பாத³னதோ கிரியாகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

த³ஸமஸிக்கா²பத³ம்.

11. ஏகாத³ஸமஸிக்கா²பத³வண்ணனா

1167-8. ஏகாத³ஸமே – பாரிவாஸிகச²ந்த³தா³னேனாதி பாரிவாஸியேன ச²ந்த³தா³னேன. தத்த² சதுப்³பி³த⁴ம் பாரிவாஸியம் – பரிஸபாரிவாஸியம், ரத்திபாரிவாஸியம், ச²ந்த³பாரிவாஸியம், அஜ்ஜா²ஸயபாரிவாஸியந்தி. தத்த² பரிஸபாரிவாஸியம் நாம பி⁴க்கூ² கேனசிதே³வ கரணீயேன ஸன்னிபதிதா ஹோந்தி, அத² மேகோ⁴ வா உட்டா²தி, உஸ்ஸாரணா வா கரியதி, மனுஸ்ஸா வா அஜ்ஜோ²த்த²ரந்தா ஆக³ச்ச²ந்தி, பி⁴க்கூ² ‘‘அனோகாஸா மயம் அஞ்ஞத்ர க³ச்சா²மா’’தி ச²ந்த³ம் அவிஸ்ஸஜ்ஜேத்வாவ உட்ட²ஹந்தி. இத³ம் பரிஸபாரிவாஸியம். கிஞ்சாபி பரிஸபாரிவாஸியம், ச²ந்த³ஸ்ஸ பன அவிஸ்ஸட்ட²த்தா கம்மம் காதும் வட்டதி.

புன பி⁴க்கூ² ‘‘உபோஸதா²தீ³னி கரிஸ்ஸாமா’’தி ரத்திம் ஸன்னிபதித்வா ‘‘யாவ ஸப்³பே³ ஸன்னிபதந்தி, தாவ த⁴ம்மம் ஸுணிஸ்ஸாமா’’தி ஏகம் அஜ்ஜே²ஸந்தி, தஸ்மிம் த⁴ம்மகத²ம் கதே²ந்தேயேவ அருணோ உக்³க³ச்ச²தி. ஸசே ‘‘சாதுத்³த³ஸிகம் உபோஸத²ம் கரிஸ்ஸாமா’’தி நிஸின்னா ‘‘பன்னரஸோ’’தி காதும் வட்டதி. ஸசே பன்னரஸிகம் காதும் நிஸின்னா பாடிபதே³ அனுபோஸதே² உபோஸத²ம் காதும் ந வட்டதி, அஞ்ஞம் பன ஸங்க⁴கிச்சம் காதும் வட்டதி. இத³ம் ரத்திபாரிவாஸியம் நாம.

புன பி⁴க்கூ² ‘‘கிஞ்சிதே³வ அப்³பா⁴னாதி³ஸங்க⁴கம்மம் கரிஸ்ஸாமா’’தி நிஸின்னா ஹோந்தி, தத்ரேகோ நக்க²த்தபாட²கோ பி⁴க்கு² ஏவம் வத³தி – ‘‘அஜ்ஜ நக்க²த்தம் தா³ருணம், மா இமம் கம்மம் கரோதா²’’தி. தே தஸ்ஸ வசனேன ச²ந்த³ம் விஸ்ஸஜ்ஜேத்வா தத்தே²வ நிஸின்னா ஹோந்தி. அத²ஞ்ஞோ ஆக³ந்த்வா ‘‘நக்க²த்தம் படிமானேந்தம் அத்தோ² பா³லம் உபச்சகா³’’தி (ஜா. 1.1.49) வத்வா ‘‘கிம் நக்க²த்தேன கரோதா²’’தி வத³தி. இத³ம் ச²ந்த³பாரிவாஸியஞ்சேவ அஜ்ஜா²ஸயபாரிவாஸியஞ்ச. ஏதஸ்மிம் பாரிவாஸியே புன ச²ந்த³பாரிஸுத்³தி⁴ம் அனானேத்வா கம்மம் காதும் ந வட்டதி.

வுட்டி²தாய பரிஸாயாதி ச²ந்த³ம் விஸ்ஸஜ்ஜேத்வா காயேன வா வாசாய வா ச²ந்த³விஸ்ஸஜ்ஜனமத்தேனேவ வா உட்டி²தாய பரிஸாய.

1169. அனாபத்தி அவுட்டி²தாய பரிஸாயாதி ச²ந்த³ம் அவிஸ்ஸஜ்ஜேத்வா அவுட்டி²தாய அனாபத்தி. ஸேஸம் உத்தானமேவ. திஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

ஏகாத³ஸமஸிக்கா²பத³ம்.

12. த்³வாத³ஸமஸிக்கா²பத³வண்ணனா

1170. த்³வாத³ஸமே – உபஸ்ஸயோ ந ஸம்மதீதி வஸனோகாஸோ நப்பஹோதி. ஸேஸம் உத்தானமேவ. ஸமுட்டா²னாதீ³னி அனந்தரஸதி³ஸானேவாதி.

த்³வாத³ஸமஸிக்கா²பத³ம்.

13. தேரஸமஸிக்கா²பத³வண்ணனா

1175. தேரஸமே – ஏகம் வஸ்ஸம் த்³வேதி ஏகந்தரிகே ஏகஸ்மிம் ஸம்வச்ச²ரே த்³வே வுட்டா²பேதி. ஸேஸம் உத்தானமேவ. ஸமுட்டா²னாதீ³னிபி வுத்தஸதி³ஸானேவாதி.

தேரஸமஸிக்கா²பத³ம்.

குமாரிபூ⁴தவக்³கோ³ அட்ட²மோ.