4. பாசித்தியகண்ட³ம் (பி⁴க்கு²னீவிப⁴ங்க³வண்ணனா)

1. லஸுணவக்³கோ³

1. பட²மலஸுணஸிக்கா²பத³வண்ணனா

திம்ஸகானந்தரம் த⁴ம்மா, ச²ஸட்டி²ஸதஸங்க³ஹா;

ஸங்கீ³தா யே அயம் தா³னி, ஹோதி தேஸம்பி வண்ணனா.

793. தத்த² லஸுணவக்³க³ஸ்ஸ தாவ பட²மஸிக்கா²பதே³ – த்³வே தயோ ப⁴ண்டி³கேதி த்³வே வா தயோ வா போட்டலிகே; ஸம்புண்ணமிஞ்ஜானமேதம் அதி⁴வசனம். ந மத்தம் ஜானித்வாதி பமாணம் அஜானித்வா கே²த்தபாலஸ்ஸ வாரேந்தஸ்ஸ ப³ஹும் லஸுணம் ஹராபேஸி.

அஞ்ஞதரம் ஹம்ஸயோனிந்தி ஸுவண்ணஹம்ஸயோனிம். ஸோ தாஸம் ஏகேகந்தி ஸோ ஹம்ஸோ ஜாதிஸ்ஸரோ அஹோஸி, அத² புப்³ப³ஸினேஹேன ஆக³ந்த்வா தாஸம் ஏகேகம் பத்தம் தே³தி, தம் தாபனதாலனச்சே²த³னக்க²மம் ஸுவண்ணமேவ ஹோதி.

795. மாக³த⁴கந்தி மக³தே⁴ஸு ஜாதம். மக³த⁴ரட்டே² ஜாதலஸுணமேவ ஹி இத⁴ லஸுணந்தி அதி⁴ப்பேதம், தம்பி ப⁴ண்டி³கலஸுணமேவ, ந ஏகத்³விதிமிஞ்ஜகம். குருந்தி³யம் பன ஜாததே³ஸம் அவத்வா ‘‘மாக³த⁴கம் நாம ப⁴ண்டி³கலஸுண’’ந்தி வுத்தம். அஜ்ஜோ²ஹாரே அஜ்ஜோ²ஹாரேதி ஏத்த² ஸசே த்³வே தயோ ப⁴ண்டி³கே ஏகதோயேவ ஸங்கா²தி³த்வா அஜ்ஜோ²ஹரதி, ஏகம் பாசித்தியம். பி⁴ந்தி³த்வா ஏகேகம் மிஞ்ஜம் கா²த³ந்தியா பன பயோக³க³ணனாய பாசித்தியானீதி.

797. பலண்டு³காதீ³னம் வண்ணேன வா மிஞ்ஜாய வா நானத்தம் வேதி³தப்³ப³ம் – வண்ணேன தாவ பலண்டு³கோ பண்டு³வண்ணோ ஹோதி. ப⁴ஞ்ஜனகோ லோஹிதவண்ணோ. ஹரிதகோ ஹரிதபண்ணவண்ணோ. மிஞ்ஜாய பன பலண்டு³கஸ்ஸ ஏகா மிஞ்ஜா ஹோதி, ப⁴ஞ்ஜனகஸ்ஸ த்³வே, ஹரிதகஸ்ஸ திஸ்ஸோ. சாபலஸுணோ அமிஞ்ஜகோ, அங்குரமத்தமேவ ஹி தஸ்ஸ ஹோதி. மஹாபச்சரியாதீ³ஸு பன ‘‘பலண்டு³கஸ்ஸ தீணி மிஞ்ஜானி, ப⁴ஞ்ஜனகஸ்ஸ த்³வே, ஹரிதகஸ்ஸ ஏக’’ந்தி வுத்தம். ஏதே பலண்டு³காத³யோ ஸபா⁴வேனேவ வட்டந்தி. ஸூபஸம்பாகாதீ³ஸு பன மாக³த⁴கம்பி வட்டதி. தஞ்ஹி பச்சமானேஸு முக்³க³ஸூபாதீ³ஸு வா மச்ச²மம்ஸவிகதியா வா தேலாதீ³ஸு வா ப³த³ரஸாளவாதீ³ஸு வா அம்பி³லஸாகாதீ³ஸு வா உத்தரிப⁴ங்கே³ஸு வா யத்த² கத்த²சி அந்தமஸோ யாகு³ப⁴த்தேபி பக்கி²பிதும் வட்டதி. ஸேஸமேத்த² உத்தானமேவ.

ஏளகலோமஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், திசித்தம், திவேத³னந்தி.

லஸுணஸிக்கா²பத³ம் பட²மம்.

2. து³தியஸிக்கா²பத³வண்ணனா

799. து³தியே – ஸம்பா³தே⁴தி படிச்ச²ன்னோகாஸே. தஸ்ஸ விபா⁴க³த³ஸ்ஸனத்த²ம் பன ‘‘உபோ⁴ உபகச்ச²கா முத்தகரண’’ந்தி வுத்தம். ஏகம்பி லோமந்தி கத்தரியா வா ஸண்டா³ஸகேன வா கு²ரேன வா யேன கேனசி ஏகபயோகே³ன வா நானாபயோகே³ன வா ஏகம் வா ப³ஹூனி வா ஸம்ஹராபேந்தியா பயோக³க³ணனாய பாசித்தியானி, ந லோமக³ணனாய.

801. ஆபா³த⁴பச்சயாதி கண்டு³கச்சு²ஆதி³ஆபா³த⁴பச்சயா ஸம்ஹராபேந்தியா அனாபத்தி. ஸேஸம் உத்தானமேவ. சதுஸமுட்டா²னம் – காயதோ காயவாசதோ காயசித்ததோ காயவாசாசித்ததோ ச ஸமுட்டா²தி, கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

து³தியஸிக்கா²பத³ம்.

3. ததியஸிக்கா²பத³வண்ணனா

803-4. ததியே – தலகா⁴தகேதி முத்தகரணதலகா⁴தனே. அந்தமஸோ உப்பலபத்தேனாபீதி ஏத்த² பத்தம் தாவ மஹந்தம், கேஸரேனாபி பஹாரம் தே³ந்தியா ஆபத்தியேவ.

805. ஆபா³த⁴பச்சயாதி க³ண்ட³ம் வா வணம் வா பஹரிதும் வட்டதி. ஸேஸம் உத்தானமேவ. பட²மபாராஜிகஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், அகுஸலசித்தம், திவேத³னந்தி.

ததியஸிக்கா²பத³ம்.

4. சதுத்த²ஸிக்கா²பத³வண்ணனா

806. சதுத்தே² – புராணராஜோரோதா⁴தி புராணே கி³ஹிபா⁴வே ரஞ்ஞோ ஓரோதா⁴. சிராசிரம் க³ச்ச²தீதி சிரேன சிரேன க³ச்ச²தி. தா⁴ரேதா²தி ஸக்கோத². கஸ்ஸித³ம் கம்மந்தி வுத்தே அனாரோசிதேபி ஏதா மயி ஆஸங்கம் கரிஸ்ஸந்தீதி மஞ்ஞமானா ஏவமாஹ – ‘‘மய்ஹித³ம் கம்ம’’ந்தி.

807. ஜதுமட்ட²கேதி ஜதுனா கதே மட்ட²த³ண்ட³கே. வத்து²வஸேனேவேதம் வுத்தம், யம்கிஞ்சி பன த³ண்ட³கம் பவேஸேந்தியா ஆபத்தியேவ. தேனாஹ – ‘‘அந்தமஸோ உப்பலபத்தம்பி முத்தகரணம் பவேஸேதீ’’தி. ஏதம்பி ச அதிமஹந்தம், கேஸரமத்தம்பி பன பவேஸேந்தியா ஆபத்தி ஏவ. ஸேஸம் உத்தானமேவ. ஸமுட்டா²னாதீ³னி தலகா⁴தகே வுத்தஸதி³ஸானேவாதி.

சதுத்த²ஸிக்கா²பத³ம்.

5. பஞ்சமஸிக்கா²பத³வண்ணனா

810. பஞ்சமே – அதிக³ம்பீ⁴ரம் உத³கஸுத்³தி⁴கம் ஆதி³யந்தீதி அதிஅந்தோ பவேஸேத்வா உத³கேன தோ⁴வனம் குருமானா.

812. கேஸக்³க³மத்தம்பி அதிக்காமேதீதி வித்தா²ரதோ ததியம் வா சதுத்த²ம் வா அங்கு³லம் க³ம்பீ⁴ரதோ த்³வின்னம் பப்³பா³னம் உபரி கேஸக்³க³மத்தம்பி பவேஸேந்தியா பாசித்தியந்தி அத்தோ². வுத்தஞ்ஹேதம் மஹாபச்சரியம் – ‘‘ஏகிஸ்ஸா அங்கு³லியா தீணி பப்³பா³னி ஆதா³தும் ந லப⁴தி, திண்ணம் வா சதுன்னம் வா ஏகேகம்பி பப்³ப³ம் ஆதா³தும் ந லப⁴தீ’’தி. ஸேஸம் உத்தானமேவ. ஸமுட்டா²னாதீ³னிபி தலகா⁴தகே வுத்தஸதி³ஸானேவாதி.

பஞ்சமஸிக்கா²பத³ம்.

6. ச²ட்ட²ஸிக்கா²பத³வண்ணனா

815. ச²ட்டே² – ப⁴த்தவிஸ்ஸக்³க³ந்தி ப⁴த்தகிச்சம். பானீயேன ச விதூ⁴பனேன ச உபதிட்டி²த்வாதி ஏகேன ஹத்தே²ன பானீயதா²லகம் ஏகேன பீ³ஜனிம் க³ஹேத்வா பீ³ஜமானா ஸமீபே ட²த்வாதி அத்தோ². அச்சாவத³தீதி புப்³பே³பி தும்ஹே ஏவம் பு⁴ஞ்ஜத², அஹம் ஏவம் உபட்டா²னம் கரோமீ’’தி பப்³ப³ஜிதசாரித்தம் அதிக்கமித்வா கே³ஹஸ்ஸிதகத²ம் கதே²தீதி அத்தோ².

817. யம்கிஞ்சி பானீயந்தி ஸுத்³த⁴உத³கம் வா ஹோது, தக்கத³தி⁴மத்து²ரஸகீ²ராதீ³னம் வா அஞ்ஞதரம். யா காசி பீ³ஜனீதி அந்தமஸோ சீவரகண்ணோபி. ஹத்த²பாஸே திட்ட²தி ஆபத்தி பாசித்தியஸ்ஸாதி இத⁴ டா²னபச்சயாவ பாசித்தியம் வுத்தம். பஹாரபச்சயா பன க²ந்த⁴கே து³க்கடம் பஞ்ஞத்தம்.

819. தே³தி தா³பேதீதி பானீயம் வா ஸூபாதி³ம் வா இமம் பிவத², இமினா பு⁴ஞ்ஜதா²தி தே³தி; தாலவண்டம் இமினா பீ³ஜந்தா பு⁴ஞ்ஜதா²தி தே³தி; அஞ்ஞேன வா உப⁴யம்பி தா³பேதி, அனாபத்தி. அனுபஸம்பன்னம் ஆணாபேதீதி உபதிட்ட²னத்த²ம் ஸாமணேரிம் ஆணாபேதி, அனாபத்தி. ஸேஸம் உத்தானமேவ.

ஏளகலோமஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், திசித்தம், திவேத³னந்தி.

ச²ட்ட²ஸிக்கா²பத³ம்.

7. ஸத்தமஸிக்கா²பத³வண்ணனா

822. ஸத்தமே – பு⁴ஞ்ஜிஸ்ஸாமீதி படிக்³க³ண்ஹாதி ஆபத்தி து³க்கடஸ்ஸாதி இத³ம் பயோக³து³க்கடம் நாம, தஸ்மா ந கேவலம் படிக்³க³ஹணேயேவ ஹோதி, படிக்³க³ண்ஹித்வா பன அரஞ்ஞதோ ஆஹரணேபி ஸுக்கா²பனேபி வத்³த³லிதி³வஸே ப⁴ஜ்ஜனத்தா²ய உத்³த⁴னஸஜ்ஜனேபி கபல்லஸஜ்ஜனேபி த³ப்³பி³ஸஜ்ஜனேபி தா³ரூனி ஆதா³ய அக்³கி³கரணேபி கபல்லம்ஹி த⁴ஞ்ஞபக்கி²பனேபி த³ப்³பி³யா ஸங்க⁴ட்டனேஸுபி கோட்டனத்த²ம் உது³க்க²லமுஸலாதி³ஸஜ்ஜனேஸுபி கோட்டனபப்போ²டனதோ⁴வனாதீ³ஸுபி யாவ முகே² ட²பேத்வா அஜ்ஜோ²ஹரணத்த²ம் த³ந்தேஹி ஸங்கா²த³தி, தாவ ஸப்³ப³பயோகே³ஸு து³க்கடானி, அஜ்ஜோ²ஹரணகாலே பன அஜ்ஜோ²ஹரணக³ணனாய பாசித்தியானி. ஏத்த² ச விஞ்ஞத்தி சேவ போ⁴ஜனஞ்ச பமாணம். தஸ்மா ஸயம் விஞ்ஞாபேத்வா அஞ்ஞாய ப⁴ஜ்ஜனகோட்டனபசனானி காராபேத்வா பு⁴ஞ்ஜந்தியாபி ஆபத்தி. அஞ்ஞாய விஞ்ஞாபேத்வா ஸயம் ப⁴ஜ்ஜனாதீ³னி கத்வா பு⁴ஞ்ஜந்தியாபி ஆபத்தி. மஹாபச்சரியம் பன வுத்தம் – ‘‘இத³ம் ஆமகத⁴ஞ்ஞம் நாம மாதரம்பி விஞ்ஞாபேத்வா பு⁴ஞ்ஜந்தியா பாசித்தியமேவ, அவிஞ்ஞத்தியா லத்³த⁴ம் ஸயம் ப⁴ஜ்ஜனாதீ³னி கத்வா வா காராபேத்வா வா பு⁴ஞ்ஜந்தியா து³க்கடம். அஞ்ஞாய விஞ்ஞத்தியா லத்³த⁴ம் ஸயம் வா ப⁴ஜ்ஜனாதீ³னி கத்வா தாய வா காராபேத்வா அஞ்ஞாய வா காராபேத்வா பு⁴ஞ்ஜந்தியாபி து³க்கடமேவா’’தி. புனபி வுத்தம் ‘‘அஞ்ஞாய விஞ்ஞத்தியா லத்³த⁴ம், ஸயம் ப⁴ஜ்ஜனாதீ³னி கத்வா பு⁴ஞ்ஜந்தியா பாசித்தியமேவ. ப⁴ஜ்ஜனாதீ³னி காராபேத்வா பு⁴ஞ்ஜந்தியா பன து³க்கட’’ந்தி. தம் புப்³பா³பரவிருத்³த⁴ம் ஹோதி, ந ஹி ப⁴ஜ்ஜனாதீ³னம் கரணே வா காராபனே வா விஸேஸோ அத்தி². மஹாஅட்ட²கதா²யம் பன ‘‘அஞ்ஞாய விஞ்ஞத்தம் பு⁴ஞ்ஜந்தியா து³க்கட’’ந்தி அவிஸேஸேன வுத்தம்.

823. ஆபா³த⁴பச்சயாதி ஸேத³கம்மாதீ³னம் அத்தா²ய த⁴ஞ்ஞவிஞ்ஞத்தியா அனாபத்தி. ‘‘அவிஞ்ஞத்தியா லப்³ப⁴மானம் பன நவகம்மத்தா²ய ஸம்படிச்சி²தும் வட்டதீ’’தி மஹாபச்சரியம் வுத்தம். அபரண்ணம் விஞ்ஞாபேதீதி ட²பேத்வா ஸத்த த⁴ஞ்ஞானி முக்³க³மாஸாதி³ம் வா லாபு³கும்ப⁴ண்டா³தி³ம் வா அஞ்ஞம் யம்கிஞ்சி ஞாதகபவாரிதட்டா²னே விஞ்ஞாபேந்தியா அனாபத்தி. ஆமகத⁴ஞ்ஞம் பன ஞாதகபவாரிதட்டா²னே ந வட்டதி. ஸேஸம் உத்தானமேவ.

சதுஸமுட்டா²னம் – காயதோ காயவாசதோ காயசித்ததோ காயவாசாசித்ததோ ச ஸமுட்டா²தி, கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

ஸத்தமஸிக்கா²பத³ம்.

8. அட்ட²மஸிக்கா²பத³வண்ணனா

824. அட்ட²மே – நிப்³பி³ட்டோ² ராஜப⁴டோ ரஞ்ஞோ ப⁴தி கேணி ஏதேனாதி நிப்³பி³ட்ட²ராஜப⁴டோ, ஏகம் டா²னந்தரம் கேணியா க³ஹேத்வா ததோ லத்³த⁴உத³யோதி அத்தோ². தஞ்ஞேவ ப⁴டபத²ம் யாசிஸ்ஸாமீதி ரஞ்ஞோ கேணிம் த³த்வா புன தம்யேவ டா²னந்தரம் யாசிஸ்ஸாமீதி சிந்தேந்தோ. பரிபா⁴ஸீதி தா பி⁴க்கு²னியோ ‘‘மா புன ஏவம் கரித்தா²’’தி ஸந்தஜ்ஜேஸி.

826. ஸயம் ச²ட்³டே³தீதி சத்தாரிபி வத்தூ²னி ஏகபயோகே³ன ச²ட்³டே³ந்தியா ஏகாவ ஆபத்தி, பாடேக்கம் ச²ட்³டே³ந்தியா வத்து²க³ணனாய ஆபத்தியோ. ஆணத்தியம்பி ஏஸேவ நயோ. த³ந்தகட்ட²ச²ட்³ட³னேபி பி⁴க்கு²னியா பாசித்தியமேவ. பி⁴க்கு²ஸ்ஸ ஸப்³ப³த்த² து³க்கடம். ஸேஸம் உத்தானமேவ.

ச²ஸமுட்டா²னம் – கிரியாகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

அட்ட²மஸிக்கா²பத³ம்.

9. நவமஸிக்கா²பத³வண்ணனா

830-2. நவமே – யம் மனுஸ்ஸானம் உபபோ⁴க³பரிபோ⁴க³ம் ரோபிமந்தி கே²த்தம் வா ஹோது நாளிகேராதி³ஆராமோ வா, யத்த² கத்த²சி ரோபிமஹரிதட்டா²னே ஏதானி வத்தூ²னி ச²ட்³டே³ந்தியா புரிமனயேனேவ ஆபத்திபே⁴தோ³ வேதி³தப்³போ³. கே²த்தே வா ஆராமே வா நிஸீதி³த்வா பு⁴ஞ்ஜமானா உச்சு²ஆதீ³னி வா கா²த³ந்தீ; க³ச்ச²மானா உச்சி²ட்டோ²த³கசலகாதீ³னி ஹரிதட்டா²னே ச²ட்³டே³தி, அந்தமஸோ உத³கம் பிவித்வா மத்த²கச்சி²ன்னனாளிகேரம்பி ச²ட்³டே³தி, பாசித்தியமேவ. பி⁴க்கு²னோ து³க்கடம். கஸிதட்டா²னே பன நிக்கி²த்தபீ³ஜே யாவ அங்குரம் ந உட்ட²ஹதி, தாவ ஸப்³பே³ஸம் து³க்கடம். அனிக்கி²த்தபீ³ஜேஸு கே²த்தகோணாதீ³ஸு வா அஸஞ்ஜாதரோபிமேஸு கே²த்தமரியாதா³தீ³ஸு வா ச²ட்³டே³தும் வட்டதி. மனுஸ்ஸானம் கசவரச²ட்³ட³னட்டா²னேபி வட்டதி. ச²ட்³டி³தகே²த்தேதி மனுஸ்ஸேஸு ஸஸ்ஸம் உத்³த⁴ரித்வா க³தேஸு ச²ட்³டி³தகே²த்தம் நாம ஹோதி, தத்த² வட்டதி. யத்த² பன லாயிதம்பி புப்³ப³ண்ணாதி³ புன உட்ட²ஹிஸ்ஸதீதி ரக்க²ந்தி, தத்த² யதா²வத்து²கமேவ. ஸேஸம் உத்தானமேவ. ச²ஸமுட்டா²னம் – கிரியாகிரியம்…பே… திவேத³னந்தி.

நவமஸிக்கா²பத³ம்.

10. த³ஸமஸிக்கா²பத³வண்ணனா

835. த³ஸமே – யம்கிஞ்சி நச்சந்தி நடாத³யோ வா நச்சந்து ஸோண்டா³ வா, அந்தமஸோ மோரஸுவமக்கடாத³யோபி, ஸப்³ப³ம்பேதம் நச்சமேவ. யம்கிஞ்சி கீ³தந்தி யம்கிஞ்சி நடாதீ³னம் வா கீ³தம் ஹோது, அரியானம் பரினிப்³பா³னகாலே ரதனத்தயகு³ணூபஸம்ஹிதம் ஸாது⁴கீளிதகீ³தம் வா அஸம்யதபி⁴க்கூ²னம் த⁴ம்மபா⁴ணககீ³தம் வா, ஸப்³ப³ம்பேதம் கீ³தமேவ. யம்கிஞ்சி வாதி³தந்தி தந்திப³த்³தா⁴தி³வாத³னீயப⁴ண்ட³வாதி³தம் வா ஹோது, குடபே⁴ரிவாதி³தம் வா, அந்தமஸோ உத³கபே⁴ரிவாதி³தம்பி, ஸப்³ப³ம்பேதம் வாதி³தமேவ.

836. த³ஸ்ஸனாய க³ச்ச²தி ஆபத்தி து³க்கடஸ்ஸாதி பத³வாரக³ணனாய ஆபத்தி து³க்கடஸ்ஸ. யத்த² டி²தா பஸ்ஸதி வா ஸுணாதி வாதி ஏகபயோகே³ன ஓலோகேந்தீ பஸ்ஸதி, தேஸம்யேவ கீ³தவாதி³தம் ஸுணாதி, ஏகமேவ பாசித்தியம். ஸசே பன ஏகம் தி³ஸம் ஓலோகேத்வா நச்சம் பஸ்ஸதி, புன அஞ்ஞதோ ஓலோகேத்வா கா³யந்தே பஸ்ஸதி அஞ்ஞதோ வாதே³ந்தே, பாடேக்கா ஆபத்தியோ. பி⁴க்கு²னீ ஸயம்பி நச்சிதும் வா கா³யிதும் வா வாதி³தும் வா ந லப⁴தி, அஞ்ஞே ‘‘நச்ச, கா³ய, வாதே³ஹீ’’தி வத்தும்பி ந லப⁴தி. ‘‘சேதியஸ்ஸ உபஹாரம் தே³த², உபாஸகா’’தி வத்தும்பி ‘‘தும்ஹாகம் சேதியஸ்ஸ உபட்டா²னம் கரோமா’’தி வுத்தே ‘‘ஸாதூ⁴’’தி ஸம்படிச்சி²தும்பி ந லப⁴தி. ஸப்³ப³த்த² பாசித்தியந்தி ஸப்³ப³அட்ட²கதா²ஸு வுத்தம். பி⁴க்கு²னோ து³க்கடம். ‘‘தும்ஹாகம் சேதியஸ்ஸ உபட்டா²னம் கரோமா’’தி வுத்தே பன ‘‘உபட்டா²னகரணம் நாம ஸுந்த³ர’’ந்தி வத்தும் வட்டதி.

837. ஆராமே டி²தாதி ஆராமே ட²த்வா அந்தராராமே வா ப³ஹிஆராமே வா நச்சாதீ³னி பஸ்ஸதி வா ஸுணாதி வா, அனாபத்தி. ஸதி கரணீயேதி ஸலாகப⁴த்தாதீ³னம் வா அத்தா²ய அஞ்ஞேன வா கேனசி கரணீயேன க³ந்த்வா க³தட்டா²னே பஸ்ஸதி வா ஸுணாதி வா, அனாபத்தி. ஆபதா³ஸூதி தாதி³ஸேன உபத்³த³வேன உபத்³து³தா ஸமஜ்ஜட்டா²னம் பவிஸதி, ஏவம் பவிஸித்வா பஸ்ஸந்தியா வா ஸுணந்தியா வா அனாபத்தி. ஸேஸம் உத்தானமேவ.

ஏளகலோமஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், லோகவஜ்ஜம், காயகம்மம், அகுஸலசித்தம், திவேத³னந்தி.

த³ஸமஸிக்கா²பத³ம்.

லஸுணவக்³கோ³ பட²மோ.

2. அந்த⁴காரவக்³கோ³

1. பட²மஸிக்கா²பத³வண்ணனா

839. அந்த⁴காரவக்³க³ஸ்ஸ பட²மஸிக்கா²பதே³ – அப்பதீ³பேதி பதீ³பசந்த³ஸூரியஅக்³கீ³ஸு ஏகேனாபி அனோபா⁴ஸிதே. தேனேவஸ்ஸ பத³பா⁴ஜனே ‘‘அனாலோகே’’தி வுத்தம். ஸல்லபேய்ய வாதி கே³ஹஸ்ஸிதகத²ம் கதே²ய்ய.

841. அரஹோபேக்கா² அஞ்ஞவிஹிதாதி ந ரஹோஅஸ்ஸாதா³பேக்கா² ரஹோஅஸ்ஸாத³தோ அஞ்ஞவிஹிதாவ ஹுத்வா ஞாதிம் வா புச்ச²தி, தா³னே வா பூஜாய வா மந்தேதி. ஸேஸம் உத்தானமேவ. தே²ய்யஸத்த²ஸமுட்டா²னம் – காயசித்ததோ காயவாசாசித்ததோ ச ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், த்³விவேத³னந்தி.

பட²மஸிக்கா²பத³ம்.

2. து³தியஸிக்கா²பத³வண்ணனா

842. து³தியே – படிச்ச²ன்னே ஓகாஸேதி இத³மேவ நானம். ஸேஸம் ஸப்³ப³ம் புரிமஸதி³ஸமேவாதி.

து³தியஸிக்கா²பத³ம்.

3. ததியஸிக்கா²பத³வண்ணனா

846. ததியே – அஜ்ஜோ²காஸேதி நானம், ஸேஸம் ஸப்³ப³ம் தாதி³ஸமேவாதி.

ததியஸிக்கா²பத³ம்.

4. சதுத்த²ஸிக்கா²பத³வண்ணனா

850-3. சதுத்தே² – நிகண்ணிகந்தி கண்ணமூலம் வுச்சதி; கண்ணமூலே ஜப்பேய்யாதி வுத்தம் ஹோதி. ஸதி கரணீயேதி ஸலாகப⁴த்தாதீ³னம் ஆஹரணத்தா²ய விஹாரே வா து³ன்னிக்கி²த்தம் படிஸாமனத்தா²ய. ஸேஸம் உத்தானமேவ. ஸமுட்டா²னாதீ³னி புரிமஸதி³ஸானேவாதி.

சதுத்த²ஸிக்கா²பத³ம்.

5. பஞ்சமஸிக்கா²பத³வண்ணனா

854. பஞ்சமே – க⁴ரம் ஸோதே⁴ந்தாதி தேஸம் கிர ஏதத³ஹோஸி – ‘‘தே²ரியா கோசி காயிகவாசஸிகோ வீதிக்கமோ ந தி³ஸ்ஸதி, க⁴ரம்பி தாவ ஸோதே⁴மா’’தி, ததோ க⁴ரம் ஸோதே⁴ந்தா நம் அத்³த³ஸம்ஸு.

856. அனோவஸ்ஸகம் அதிக்காமேந்தியாதி பட²மம் பாத³ம் அதிக்காமேந்தியா து³க்கடம், து³தியம் அதிக்காமேந்தியா பாசித்தியம், உபசாராதிக்கமே ஏஸேவ நயோ.

858. கி³லானாயாதி யா தாதி³ஸேன கே³லஞ்ஞேன ஆபுச்சி²தும் ந ஸக்கோதி. ஆபதா³ஸூதி க⁴ரே அக்³கி³ வா உட்டி²தோ ஹோதி, சோரா வா; ஏவரூபே உபத்³த³வே அனாபுச்சா² பக்கமதி, அனாபத்தி. ஸேஸமேத்த² உத்தானமேவ.

கதி²னஸமுட்டா²னம் – காயவாசதோ காயவாசாசித்ததோ ச ஸமுட்டா²தி, கிரியாகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

பஞ்சமஸிக்கா²பத³ம்.

6. ச²ட்ட²ஸிக்கா²பத³வண்ணனா

860. ச²ட்டே² – அபி⁴னிஸீதே³ய்யாதி நிஸீதே³ய்ய. நிஸீதி³த்வா க³ச்ச²ந்தியா ஏகா ஆபத்தி, அனிஸீதி³த்வா நிபஜ்ஜித்வா க³ச்ச²ந்தியா ஏகா, நிஸீதி³த்வா நிபஜ்ஜித்வா க³ச்ச²ந்தியா த்³வே.

863. து⁴வபஞ்ஞத்தேதி பி⁴க்கு²னீனம் அத்தா²ய நிச்சபஞ்ஞத்தே. ஸேஸம் உத்தானமேவ. கதி²னஸமுட்டா²னம்…பே… திவேத³னந்தி.

ச²ட்ட²ஸிக்கா²பத³ம்.

7. ஸத்தமஸிக்கா²பத³வண்ணனா

864. ஸத்தமேபி – ஸப்³ப³ம் ச²ட்டே² வுத்தனயேனேவ வேதி³தப்³ப³ம்.

ஸத்தமஸிக்கா²பத³ம்.

8. அட்ட²மஸிக்கா²பத³வண்ணனா

869. அட்ட²மே – ஸப்³ப³ம் உத்தானமேவ. திஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம் அகுஸலசித்தம், து³க்க²வேத³னந்தி.

அட்ட²மஸிக்கா²பத³ம்.

9. நவமஸிக்கா²பத³வண்ணனா

875. நவமே – அபி⁴ஸபேய்யாதி ஸபத²ம் கரேய்ய. நிரயேன அபி⁴ஸபதி நாம ‘‘நிரயே நிப்³ப³த்தாமி, அவீசிம்ஹி நிப்³ப³த்தாமி, நிரயே நிப்³ப³த்தது, அவீசிம்ஹி நிப்³ப³த்ததூ’’தி ஏவமாதி³னா நயேன அக்கோஸதி. ப்³ரஹ்மசரியேன அபி⁴ஸபதி நாம ‘‘கி³ஹினீ ஹோமி, ஓதா³தவத்தா² ஹோமி, பரிப்³பா³ஜிகா ஹோமி, இதரா வா ஏதி³ஸா ஹோதூ’’தி ஏவமாதி³னா நயேன அக்கோஸதி; வாசாய வாசாய பாசித்தியம். ட²பேத்வா பன நிரயஞ்ச ப்³ரஹ்மசரியஞ்ச ‘‘ஸுனகீ² ஸூகரீ காணா குணீ’’திஆதி³னா நயேன அக்கோஸந்தியா வாசாய வாசாய து³க்கடம்.

878. அத்த²புரேக்கா²ராயாதி அட்ட²கத²ம் கதே²ந்தியா. த⁴ம்மபுரேக்கா²ராயாதி பாளிம் வாசேந்தியா. அனுஸாஸனிபுரேக்கா²ராயாதி ‘‘இதா³னிபி த்வம் ஏதி³ஸா, ஸாது⁴ விரமஸ்ஸு, நோ சே விரமஸி, அத்³தா⁴ புன ஏவரூபானி கம்மானி கத்வா நிரயே உப்பஜ்ஜிஸ்ஸஸி, திரச்சா²னயோனியா உப்பஜ்ஜிஸ்ஸஸீ’’தி ஏவம் அனுஸாஸனியம் ட²த்வா வத³ந்தியா அனாபத்தி. ஸேஸம் உத்தானமேவ.

திஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

நவமஸிக்கா²பத³ம்.

10. த³ஸமஸிக்கா²பத³வண்ணனா

879. த³ஸமே – ஸப்³ப³ம் உத்தானமேவ. து⁴ரனிக்கே²பஸமுட்டா²னம் – காயவாசாசித்ததோ ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலகம்மம், து³க்க²வேத³னந்தி.

த³ஸமஸிக்கா²பத³ம்.

அந்த⁴காரவக்³கோ³ து³தியோ.

3. நக்³க³வக்³கோ³

1. பட²மஸிக்கா²பத³வண்ணனா

883-6. நக்³க³வக்³க³ஸ்ஸ பட²மஸிக்கா²பதே³ – ப்³ரஹ்மசரியம் சிண்ணேனாதி ப்³ரஹ்மசரியேன சிண்ணேன; அத² வா ப்³ரஹ்மசரியஸ்ஸ சரணேனாதி; ஏவம் கரணத்தே² வா ஸாமிஅத்தே² வா உபயோக³வசனம் வேதி³தப்³ப³ம். அச்சி²ன்னசீவரிகாயாதி இத³ம் உத³கஸாடிகம் ஸந்தா⁴ய வுத்தம், ந அஞ்ஞம் சீவரம். தஸ்மா உத³கஸாடிகாய அச்சி²ன்னாய வா நட்டா²ய வா நக்³கா³ய ந்ஹாயந்தியா அனாபத்தி. ஸசேபி உத³கஸாடிகசீவரம் மஹக்³க⁴ம் ஹோதி, ந ஸக்கா நிவாஸேத்வா ப³ஹி க³ந்தும், ஏவம்பி நக்³கா³ய ந்ஹாயிதும் வட்டதி. ஸேஸமேத்த² உத்தானமேவ.

ஏளகலோமஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், திசித்தம், திவேத³னந்தி.

பட²மஸிக்கா²பத³ம்.

2. து³தியஸிக்கா²பத³வண்ணனா

887. து³தியே – ஸப்³ப³ம் உத்தானமேவ. ச²ஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

து³தியஸிக்கா²பத³ம்.

3. ததியஸிக்கா²பத³வண்ணனா

893-4. ததியே – அனந்தராயிகினீதி த³ஸஸு அந்தராயேஸு ஏகேனபி அந்தராயேன அனந்தராயா. து⁴ரம் நிக்கி²த்தமத்தேதி து⁴ரம் நிக்கி²பித்வா ஸசேபி பச்சா² ஸிப்³ப³தி, ஆபத்தியேவாதி அத்தோ². ஸேஸம் உத்தானமேவ.

து⁴ரனிக்கே²பஸமுட்டா²னம் – அகிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

ததியஸிக்கா²பத³ம்.

4. சதுத்த²ஸிக்கா²பத³வண்ணனா

898-9. சதுத்தே² – பஞ்ச அஹானி பஞ்சாஹம், பஞ்சாஹமேவ பஞ்சாஹிகம். ஸங்கா⁴டீனம் சாரோ ஸங்கா⁴டிசாரோ; பரிபோ⁴க³வஸேன வா ஓதாபனவஸேன வா ஸங்க⁴டிதட்டே²ன ஸங்கா⁴டீதி லத்³த⁴னாமானம் பஞ்சன்னம் சீவரானம் பரிவத்தனந்தி அத்தோ². தஸ்மாயேவ பத³பா⁴ஜனே ‘‘பஞ்சமம் தி³வஸம் பஞ்ச சீவரானீ’’திஆதி³மாஹ. ஆபத்தி பாசித்தியஸ்ஸாதி ஏத்த² ச ஏகஸ்மிம் சீவரே ஏகா ஆபத்தி; பஞ்சஸு பஞ்ச.

900. ஆபதா³ஸூதி மஹக்³க⁴ம் சீவரம், ந ஸக்கா ஹோதி சோரப⁴யாதீ³ஸு பரிபு⁴ஞ்ஜிதும்; ஏவரூபே உபத்³த³வே அனாபத்தி. ஸேஸம் உத்தானமேவ. கதி²னஸமுட்டா²னம் – அகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

சதுத்த²ஸிக்கா²பத³ம்.

5. பஞ்சமஸிக்கா²பத³வண்ணனா

903. பஞ்சமே – சீவரஸங்கமனீயந்தி ஸங்கமேதப்³ப³ம் சீவரம்; அஞ்ஞிஸ்ஸா ஸந்தகம் அனாபுச்சா² க³ஹிதம் புன படிதா³தப்³ப³சீவரந்தி அத்தோ².

906. ஆபதா³ஸூதி ஸசே அபாருதம் வா அனிவத்த²ம் வா சோரா ஹரந்தி, ஏவரூபாஸு ஆபதா³ஸு தா⁴ரேந்தியா அனாபத்தி. ஸேஸம் உத்தானமேவ. கதி²னஸமுட்டா²னம் – கிரியாகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

பஞ்சமஸிக்கா²பத³ம்.

6. ச²ட்ட²ஸிக்கா²பத³வண்ணனா

909-10. ச²ட்டே² – அஞ்ஞம் பரிக்கா²ரந்தி யம்கிஞ்சி தா²லகாதீ³னம் வா ஸப்பிதேலாதீ³னம் வா அஞ்ஞதரம். ஆனிஸம்ஸந்தி ‘‘கித்தகம் அக்³க⁴னகம் தா³துகாமத்தா²’’தி புச்ச²தி, ‘‘ஏத்தகம் நாமா’’தி வத³ந்தி, ‘‘ஆக³மேத² தாவ, இதா³னி வத்த²ம் மஹக்³க⁴ம், கதிபாஹேன கப்பாஸே ஆக³தே ஸமக்³க⁴ம் ப⁴விஸ்ஸதீ’’தி ஏவம் வத்வா நிவாரேந்தியா அனாபத்தி. ஸேஸம் உத்தானமேவ.

திஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், திவேத³னந்தி.

ச²ட்ட²ஸிக்கா²பத³ம்.

7. ஸத்தமஸிக்கா²பத³வண்ணனா

911. ஸத்தமே – பக்கமிம்ஸூதி அஞ்ஞாஸம்பி ஆக³மனம் ஆக³மேந்தீ ‘‘அத்³தா⁴ அம்ஹாகம்பி ஆக³மேஸ்ஸதீ’’தி தத்த² தத்த² அக³மம்ஸு. படிபா³ஹேய்யாதி படிஸேதே⁴ய்ய.

915. ஆனிஸம்ஸந்தி ‘‘ஏகிஸ்ஸா ஏகம் ஸாடகம் நப்பஹோதி, ஆக³மேத² தாவ, கதிபாஹேன உப்பஜ்ஜிஸ்ஸதி, ததோ பா⁴ஜேஸ்ஸாமீ’’தி ஏவம் ஆனிஸம்ஸம் த³ஸ்ஸேத்வா படிபா³ஹந்தியா அனாபத்தி. ஸேஸம் உத்தானமேவ.

திஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

ஸத்தமஸிக்கா²பத³ம்.

8. அட்ட²மஸிக்கா²பத³வண்ணனா

916-8. அட்ட²மே – நடா நாம யே நாடகம் நாடேந்தி. நடகா நாம யே நச்சந்தி. லங்க⁴கா நாம யே வம்ஸவரத்தாதீ³ஸு லங்க⁴னகம்மம் கரோந்தி. ஸோகஜ்ஜா²யிகா நாம மாயாகாரா. கும்ப⁴தூ²ணிகா நாம க⁴டகேன கீளனகா; பி³ம்பி³ஸகவாத³காதிபி வத³ந்தி. தே³தி ஆபத்தி பாசித்தியஸ்ஸாதி ஏத்த² சீவரக³ணனாய ஆபத்தியோ வேதி³தப்³பா³. ஸேஸம் உத்தானமேவ.

ச²ஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

அட்ட²மஸிக்கா²பத³ம்.

9. நவமஸிக்கா²பத³வண்ணனா

921-4. நவமே – து³ப்³ப³லசீவரபச்சாஸாயாதி து³ப்³ப³லாய சீவரபச்சாஸாய. ஆனிஸம்ஸந்தி கிஞ்சாபி ‘‘ந மயம் அய்யே ஸக்கோமா’’தி வத³ந்தி, ‘‘இதா³னி பன தேஸம் கப்பாஸோ ஆக³மிஸ்ஸதி, ஸத்³தோ⁴ பஸன்னோ புரிஸோ ஆக³மிஸ்ஸதி, அத்³தா⁴ த³ஸ்ஸதீ’’தி ஏவம் ஆனிஸம்ஸம் த³ஸ்ஸேத்வா நிவாரேந்தியா அனாபத்தி. ஸேஸம் உத்தானமேவ.

திஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், திவேத³னந்தி.

நவமஸிக்கா²பத³ம்.

10. த³ஸமஸிக்கா²பத³வண்ணனா

927. த³ஸமே – கதி²னுத்³தா⁴ரம் ந த³ஸ்ஸந்தீதி கீதி³ஸோ கதி²னுத்³தா⁴ரோ தா³தப்³போ³, கீதி³ஸோ ந தா³தப்³போ³தி? யஸ்ஸ அத்தா²ரமூலகோ ஆனிஸம்ஸோ மஹா, உப்³பா⁴ரமூலகோ அப்போ, ஏவரூபோ ந தா³தப்³போ³. யஸ்ஸ பன அத்தா²ரமூலகோ ஆனிஸம்ஸோ அப்போ, உப்³பா⁴ரமூலகோ மஹா, ஏவரூபோ தா³தப்³போ³. ஸமானிஸம்ஸோபி ஸத்³தா⁴பரிபாலனத்த²ம் தா³தப்³போ³வ.

931. ஆனிஸம்ஸந்தி பி⁴க்கு²னிஸங்கோ⁴ ஜிண்ணசீவரோ, கதி²னானிஸம்ஸமூலகோ மஹாலாபோ⁴தி ஏவரூபம் ஆனிஸம்ஸம் த³ஸ்ஸேத்வா படிபா³ஹந்தியா அனாபத்தி. ஸேஸம் உத்தானமேவ.

திஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், திவேத³னந்தி.

த³ஸமஸிக்கா²பத³ம்.

நக்³க³வக்³கோ³ ததியோ.

4. துவட்டவக்³கோ³

1. பட²மஸிக்கா²பத³வண்ணனா

933. துவட்டவக்³க³ஸ்ஸ பட²மஸிக்கா²பதே³ – துவட்டேய்யுந்தி நிபஜ்ஜேய்யும். ஸேஸம் உத்தானமேவ. ஏளகலோமஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், திசித்தம், திவேத³னந்தி.

பட²மஸிக்கா²பத³ம்.

2. து³தியஸிக்கா²பத³வண்ணனா

937. து³தியே – ஏகம் அத்த²ரணஞ்சேவ பாவுரணஞ்ச ஏதாஸந்தி ஏகத்த²ரணபாவுரணா; ஸம்ஹாரிமானம் பாவாரத்த²ரணகடஸாரகாதீ³னம் ஏகம் அந்தம் அத்த²ரித்வா ஏகம் பாருபித்வா துவட்டேந்தீனமேதம் அதி⁴வசனம்.

940. வவத்தா²னம் த³ஸ்ஸேத்வாதி மஜ்ஜே² காஸாவம் வா கத்தரயட்டி²ம் வா அந்தமஸோ காயப³ந்த⁴னம்பி ட²பேத்வா நிபஜ்ஜந்தீனம் அனாபத்தீதி அத்தோ². ஸேஸம் உத்தானமேவ. ஏளகலோமஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், திசித்தம், திவேத³னந்தி.

து³தியஸிக்கா²பத³ம்.

3. ததியஸிக்கா²பத³வண்ணனா

941. ததியே – உளாரஸம்பா⁴விதாதி உளாரகுலா பப்³ப³ஜிதத்தா கு³ணேஹி ச உளாரத்தா உளாராதி ஸம்பா⁴விதா. இஸ்ஸாபகதாதி இஸ்ஸாய அபகதா; அபி⁴பூ⁴தாதி அத்தோ². ஸஞ்ஞத்தி ப³ஹுலா ஏதாஸந்தி ஸஞ்ஞத்திப³ஹுலா; தி³வஸம் மஹாஜனம் ஸஞ்ஞாபயமானாதி அத்தோ². விஞ்ஞத்தி ப³ஹுலா ஏதாஸந்தி விஞ்ஞத்திப³ஹுலா. விஞ்ஞத்தீதி ஹேதூதா³ஹரணாதீ³ஹி விவிதே⁴ஹி நயேஹி ஞாபனா வேதி³தப்³பா³, ந யாசனா.

943. சங்கமனே நிவத்தனக³ணனாய ஆபத்தியோ வேதி³தப்³பா³. திட்ட²தி வாதிஆதீ³ஸு பயோக³க³ணனாய. உத்³தி³ஸதி வாதிஆதீ³ஸு பதா³தி³க³ணனாய. ஸேஸம் உத்தானமேவ.

திஸமுட்டா²னம் – கிரியாகிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

ததியஸிக்கா²பத³ம்.

4. சதுத்த²ஸிக்கா²பத³வண்ணனா

949. சதுத்தே² – ஸதி அந்தராயேதி த³ஸவிதே⁴ அந்தராயே ஸதி. பரியேஸித்வா ந லப⁴தீதி அஞ்ஞம் உபட்டா²யிகம் ந லப⁴தி. கி³லானாயாதி ஸயம் கி³லானாய. ஆபதா³ஸூதி ததா²ரூபே உபத்³த³வே ஸதி அனாபத்தி. ஸேஸம் உத்தானமேவ.