9. ச²த்துபாஹனவக்³கோ³

1. பட²மஸிக்கா²பத³வண்ணனா

1181. ச²த்தவக்³க³ஸ்ஸ பட²மஸிக்கா²பதே³ – ஸகிம்பி தா⁴ரேதி ஆபத்தி பாசித்தியஸ்ஸாதி மக்³க³க³மனே ஏகபயோகே³னேவ தி³வஸம்பி தா⁴ரேதி, ஏகாவ ஆபத்தி. ஸசே கத்³த³மாதீ³னி பத்வா உபாஹனா ஓமுஞ்சித்வா ச²த்தமேவ தா⁴ரேந்தீ க³ச்ச²தி, து³க்கடம். அதா²பி க³ச்சா²தீ³னி தி³ஸ்வா ச²த்தம் அபனாமேத்வா உபாஹனாருள்ஹாவ க³ச்ச²தி, து³க்கடமேவ. ஸசே ச²த்தம்பி அபனாமேத்வா உபாஹனாபி ஓமுஞ்சித்வா புன தா⁴ரேதி, புன பாசித்தியம். ஏவம் பயோக³க³ணனாய ஆபத்தியோ வேதி³தப்³பா³. ஸேஸம் உத்தானமேவ. ஏளகலோமஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், திசித்தம், திவேத³னந்தி.

பட²மஸிக்கா²பத³ம்.

2. து³தியஸிக்கா²பத³வண்ணனா

1184. து³தியே – யானேன யாயந்தீதி ஏத்தா²பி ஓரோஹித்வா புனப்புனம் அபி⁴ருஹந்தியா பயோக³க³ணனாய ஆபத்தியோ வேதி³தப்³பா³. ஸேஸம் பட²மே வுத்தனயமேவாதி.

து³தியஸிக்கா²பத³ம்.

3. ததியஸிக்கா²பத³வண்ணனா

1190. ததியே – விப்பகிரியிம்ஸூதி மணயோ விப்பகிண்ணா. இதா⁴பி ஓமுஞ்சித்வா தா⁴ரேந்தியா பயோக³க³ணனாய ஆபத்தியோ. ஸமுட்டா²னாதீ³னி வுத்தனயானேவ. கேவலம் இத⁴ அகுஸலசித்தம் ஹோதீதி.

ததியஸிக்கா²பத³ம்.

4. சதுத்த²ஸிக்கா²பத³வண்ணனா

1194. சதுத்தே² – ஸீஸூபகா³தீ³ஸு யம் யம் தா⁴ரேதி, தஸ்ஸ தஸ்ஸ வஸேன வத்து²க³ணனாய ஆபத்தியோ வேதி³தப்³பா³. ஸேஸம் ததியே வுத்தனயமேவாதி.

சதுத்த²ஸிக்கா²பத³ம்.

5. பஞ்சமஸிக்கா²பத³வண்ணனா

1199. பஞ்சமே – க³ந்த⁴வண்ணகேனாதி க³ந்தே⁴ன ச வண்ணகேன ச. ஸேஸம் உத்தானமேவ. ஸமுட்டா²னாதீ³னி ததியஸதி³ஸானேவாதி.

பஞ்சமஸிக்கா²பத³ம்.

6. ச²ட்ட²ஸிக்கா²பத³வண்ணனா

1202. ச²ட்டே² – ஸப்³ப³ம் பஞ்சமே வுத்தஸதி³ஸமேவாதி.

ச²ட்ட²ஸிக்கா²பத³ம்.

7. ஸத்தமஸிக்கா²பத³வண்ணனா

1208-9. ஸத்தமே – உம்மத்³தா³பேதி ஆபத்தி பாசித்தியஸ்ஸாதி ஏத்த² ஹத்த²ம் அமோசேத்வா உம்மத்³த³னே ஏகாவ ஆபத்தி, மோசேத்வா மோசேத்வா உம்மத்³த³னே பயோக³க³ணனாய ஆபத்தியோ. ஸம்பா³ஹனேபி ஏஸேவ நயோ. கி³லானாயாதி அந்தமஸோ மக்³க³க³மனபரிஸ்ஸமேனாபி ஸாபா³தா⁴ய. ஆபதா³ஸூதி சோரப⁴யாதீ³ஹி ஸரீரகம்பனாதீ³ஸு. ஸேஸம் உத்தானமேவ. ஸமுட்டா²னாதீ³னி ததியஸதி³ஸானேவாதி.

ஸத்தமஸிக்கா²பத³ம்.

8-9-10. அட்ட²மனவமத³ஸமஸிக்கா²பத³வண்ணனா

1210. அட்ட²மாதீ³ஸு தீஸு ஸிக்க²மானாய ஸாமணேரியா, கி³ஹினியாதி இத³மேவ நானாகரணம், ஸேஸம் ஸத்தமே வுத்தஸதி³ஸமேவாதி.

அட்ட²மனவமத³ஸமஸிக்கா²பதா³னி.

11. ஏகாத³ஸமஸிக்கா²பத³வண்ணனா

1214. ஏகாத³ஸமே – பி⁴க்கு²ஸ்ஸ புரதோதி அபி⁴முக²மேவாதி அத்தோ². இத³ம் பன உபசாரம் ஸந்தா⁴ய கதி²தந்தி வேதி³தப்³ப³ம். ஸேஸம் உத்தானமேவ. கதி²னஸமுட்டா²னம் – காயவாசதோ காயவாசாசித்ததோ ச ஸமுட்டா²தி, கிரியாகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

ஏகாத³ஸமஸிக்கா²பத³ம்.

12. த்³வாத³ஸமஸிக்கா²பத³வண்ணனா

1219-23. த்³வாத³ஸமே – அனோகாஸகதந்தி அஸுகஸ்மிம் நாம டா²னே புச்சா²மீதி ஏவம் அகதஓகாஸம். தேனேவாஹ – ‘‘அனோகாஸகதந்தி அனாபுச்சா²’’தி. அனோதி³ஸ்ஸாதி அஸுகஸ்மிம் நாம டா²னே புச்சா²மீதி ஏவம் அனியமேத்வா கேவலம் ‘‘புச்சி²தப்³ப³ம் அத்தி², புச்சா²மி அய்யா’’தி ஏவம் வத்வா. ஸேஸம் உத்தானமேவ. பத³ஸோத⁴ம்மஸமுட்டா²னம் – வாசதோ வாசாசித்ததோ ச ஸமுட்டா²தி, கிரியாகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், வசீகம்மம், திசித்தம், திவேத³னந்தி.

த்³வாத³ஸமஸிக்கா²பத³ம்.

13. தேரஸமஸிக்கா²பத³வண்ணனா

1226. தேரஸமே – பரிக்கே²பம் அதிக்காமேந்தியாதி ஏகேன பாதே³ன அதிக்கந்தே து³க்கடம், து³தியேன பாசித்தியம். உபசாரேபி ஏஸேவ நயோ.

1227. அச்சி²ன்னசீவரிகாயாதிஆதீ³ஸு ஸங்கச்சிகசீவரமேவ சீவரந்தி வேதி³தப்³ப³ம். ஆபதா³ஸூதி மஹக்³க⁴ம் ஹோதி ஸங்கச்சிகம், பாருபித்வா க³ச்ச²ந்தியாவ உபத்³த³வோ உப்பஜ்ஜதி, ஏவரூபாஸு ஆபதா³ஸு அனாபத்தி. ஸேஸம் உத்தானமேவ. ஏளகலோமஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், திசித்தம், திவேத³னந்தி.

தேரஸமஸிக்கா²பத³ம்.

ச²த்துபாஹனவக்³கோ³ நவமோ.

உத்³தி³ட்டா² கோ² அய்யாயோ ச²ஸட்டி²ஸதம் பாசித்தியா த⁴ம்மாதி ஏத்த² ஸப்³பா³னேவ பி⁴க்கு²னீனம் கு²த்³த³கேஸு ச²ன்னவுதி, பி⁴க்கூ²னம் த்³வேனவுதீதி அட்டா²ஸீதிஸதம் ஸிக்கா²பதா³னி, ததோ ஸகலம் பி⁴க்கு²னீவக்³க³ம், பரம்பரபோ⁴ஜனம், அனதிரித்தபோ⁴ஜனம், அனதிரித்தேன அபி⁴ஹட்டு²ம் பவாரணம், பணீதபோ⁴ஜனவிஞ்ஞத்தி, அசேலகஸிக்கா²பத³ம், து³ட்டு²ல்லபடிச்சா²த³னம், ஊனவீஸதிவஸ்ஸுபஸம்பாத³னம், மாதுகா³மேன ஸத்³தி⁴ம் ஸம்விதா⁴ய அத்³தா⁴னக³மனம், ராஜந்தேபுரப்பவேஸனம், ஸந்தம் பி⁴க்கு²ம் அனாபுச்சா² விகாலே கா³மப்பவேஸனம், நிஸீத³னம் வஸ்ஸிகஸாடிகந்தி இமானி த்³வாவீஸதி ஸிக்கா²பதா³னி அபனேத்வா ஸேஸானி ஸதஞ்ச ச²ஸட்டி² ச ஸிக்கா²பதா³னி பாதிமோக்கு²த்³தே³ஸமக்³கே³ன உத்³தி³ட்டா²னி ஹோந்தீதி வேதி³தப்³பா³னி. தேனாஹ – ‘‘உத்³தி³ட்டா² கோ² அய்யாயோ ச²ஸட்டி²ஸதம் பாசித்தியா த⁴ம்மா…பே… ஏவமேதம் தா⁴ரயாமீ’’தி.

தத்ராயம் ஸங்கே²பதோ ஸமுட்டா²னவினிச்ச²யோ – கி³ரக்³க³ஸமஜ்ஜம், சித்தாகா³ரஸிக்கா²பத³ம், ஸங்கா⁴ணி, இத்தா²லங்காரோ, க³ந்த⁴வண்ணகோ, வாஸிதகபிஞ்ஞாகோ, பி⁴க்கு²னீஆதீ³ஹி உம்மத்³த³னபரிமத்³த³னானீதி இமானி த³ஸ ஸிக்கா²பதா³னி அசித்தகானி லோகவஜ்ஜானி. அயம் பனேத்த² அதி⁴ப்பாயோ – வினாபி சித்தேன ஆபஜ்ஜிதப்³ப³த்தா அசித்தகானி, சித்தே பன ஸதி அகுஸலேனேவ ஆபஜ்ஜிதப்³ப³த்தா லோகவஜ்ஜானி. அவஸேஸானி அசித்தகானி, பண்ணத்திவஜ்ஜானேவ. சோரீவுட்டா²பனம், கா³மந்தரம், ஆராமஸிக்கா²பத³ம் க³ப்³பி⁴னிவக்³கே³ ஆதி³தோ பட்டா²ய ஸத்த, குமாரிபூ⁴தவக்³கே³ ஆதி³தோ பட்டா²ய பஞ்ச, புரிஸஸம்ஸட்ட²ம் பாரிவாஸியச²ந்த³தா³னம், அனுவஸ்ஸவுட்டா²பனம், ஏகந்தரிகவுட்டா²பனந்தி இமானி ஏகூனவீஸதி ஸிக்கா²பதா³னி ஸசித்தகானி பண்ணத்திவஜ்ஜானி, அவஸேஸானி ஸசித்தகானி லோகவஜ்ஜானேவாதி.

ஸமந்தபாஸாதி³காய வினயஸம்வண்ணனாய பி⁴க்கு²னீவிப⁴ங்கே³

கு²த்³த³கவண்ணனா நிட்டி²தா.

பாசித்தியகண்ட³ம் நிட்டி²தம்.