7. க³ப்³பி⁴னிவக்³கோ³

1. பட²மஸிக்கா²பத³வண்ணனா

1069. க³ப்³பி⁴னிவக்³க³ஸ்ஸ பட²மஸிக்கா²பதே³ – ஆபன்னஸத்தாதி குச்சி²பவிட்ட²ஸத்தா.

பட²மஸிக்கா²பத³ம்.

2. து³தியஸிக்கா²பத³வண்ணனா

1073-4. து³தியே – பாயந்திந்தி த²ஞ்ஞம் பாயமானம். மாதா வா ஹோதீதி யம் தா³ரகம் பாயேதி, தஸ்ஸ மாதா வா ஹோதி தா⁴தி வா. ஸேஸம் உத்தானமேவ. உப⁴யம்பி திஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

து³தியஸிக்கா²பத³ம்.

3. ததியஸிக்கா²பத³வண்ணனா

1077. ததியே – ஸிக்கா²ஸம்முதிம் தா³துந்தி கஸ்மா தா³பேஸி? ‘‘மாதுகா³மோ நாம லோலோ ஹோதி த்³வே வஸ்ஸானி ச²ஸு த⁴ம்மேஸு அஸிக்கி²த்வா ஸீலானி பூரயமானோ கிலமதி, ஸிக்கி²த்வா பன பச்சா² ந கிலமிஸ்ஸதி, நித்த²ரிஸ்ஸதீ’’தி தா³பேஸி.

1079. பாணாதிபாதா வேரமணிம் த்³வே வஸ்ஸானி அவீதிக்கம்ம ஸமாதா³னம் ஸமாதி³யாமீதி யம் தம் பாணாதிபாதா வேரமணீதி பஞ்ஞத்தம் ஸிக்கா²பத³ம், தம் பாணாதிபாதா வேரமணிஸிக்கா²பத³ம் த்³வே வஸ்ஸானி அவீதிக்கமிதப்³ப³ஸமாதா³னம் கத்வா ஸமாதி³யாமீதி அத்தோ². ஏஸ நயோ ஸப்³ப³த்த². இமா ச² ஸிக்கா²யோ ஸட்டி²வஸ்ஸாயபி பப்³ப³ஜிதாய தா³தப்³பா³யேவ, ந ஏதாஸு அஸிக்கி²தா உபஸம்பாதே³தப்³பா³.

ததியஸிக்கா²பத³ம்.

4. சதுத்த²ஸிக்கா²பத³வண்ணனா

1084. சதுத்தே² – ஸப்³ப³ம் உத்தானமேவ. ஸசே பன பட²மம் வுட்டா²னஸம்முதி ந தி³ன்னா ஹோதி, உபஸம்பத³மாளகேபி தா³தப்³பா³யேவ. இமா த்³வேபி மஹாஸிக்க²மானா நாம.

சதுத்த²ஸிக்கா²பத³ம்.

5. பஞ்சமஸிக்கா²பத³வண்ணனா

1090. பஞ்சமே – கிஞ்சாபி ஊனத்³வாத³ஸவஸ்ஸம் பரிபுண்ணஸஞ்ஞாய வுட்டா²பேந்தியா அனாபத்தி, ஸா பன அனுபஸம்பன்னாவ ஹோதி. ஸேஸம் உத்தானமேவ.

பஞ்சமஸிக்கா²பத³ம்.

6. ச²ட்ட²ஸிக்கா²பத³வண்ணனா

1095. ச²ட்டே² – த³ஸவஸ்ஸாய கி³ஹிக³தாய ஸிக்கா²ஸம்முதிம் த³த்வா பரிபுண்ணத்³வாத³ஸவஸ்ஸம் உபஸம்பாதே³தும் வட்டதி.

ச²ட்ட²ஸிக்கா²பத³ம்.

7. ஸத்தமஸிக்கா²பத³வண்ணனா

1101. ஸத்தமே – ஸப்³ப³ம் உத்தானமேவ. ஸமுட்டா²னாதீ³னிபி ஸப்³பே³ஸு து³தியே வுத்தஸதி³ஸானேவ. அயம் பன விஸேஸோ – யத்த² ஸம்முதி அத்தி², தத்த² கிரியாகிரியம் ஹோதீதி.

ஸத்தமஸிக்கா²பத³ம்.

8. அட்ட²மஸிக்கா²பத³வண்ணனா

1108. அட்ட²மே – ந அனுக்³க³ண்ஹாபேய்யாதி ‘‘இமிஸ்ஸா அய்யே உத்³தே³ஸாதீ³னி தே³ஹீ’’தி ஏவம் உத்³தே³ஸாதீ³ஹி ந அனுக்³க³ண்ஹாபேய்ய.

1110. பரியேஸித்வாதி அஞ்ஞம் பரியேஸித்வா ந லப⁴தி, ஸயம் கி³லானா ஹோதி, ந ஸக்கோதி உத்³தே³ஸாதீ³னி தா³தும், தஸ்ஸா அனாபத்தி. ஸேஸம் உத்தானமேவ. து⁴ரனிக்கே²பஸமுட்டா²னம் – அகிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

அட்ட²மஸிக்கா²பத³ம்.

9. நவமஸிக்கா²பத³வண்ணனா

1113. நவமே – ந உபட்ட²ஹேய்யாதி சுண்ணேன மத்திகாய த³ந்தகட்டே²ன முகோ²த³கேனாதி ஏவம் தேன தேன கரணீயேன ந உபட்ட²ஹேய்ய. ஸேஸம் உத்தானமேவ. பட²மபாராஜிகஸமுட்டா²னம் – அகிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், அகுஸலசித்தம், து³க்க²வேத³னந்தி.

நவமஸிக்கா²பத³ம்.

10. த³ஸமஸிக்கா²பத³வண்ணனா

1116. த³ஸமே – நேவ வூபகாஸேய்யாதி ந க³ஹேத்வா க³ச்சே²ய்ய. ந வூபகாஸாபேய்யாதி ‘‘இமம் அய்யே க³ஹேத்வா க³ச்சா²’’தி அஞ்ஞம் ந ஆணாபேய்ய. ஸேஸமேத்த² உத்தானமேவ. து⁴ரனிக்கே²பஸமுட்டா²னம் – அகிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

த³ஸமஸிக்கா²பத³ம்.

க³ப்³பி⁴னிவக்³கோ³ ஸத்தமோ.