9. ஸேத³கஸுத்தவண்ணனா

385. நவமே ஸும்பே⁴ஸூதி ஏவம்னாமகே ஜனபதே³. மேத³கதா²லிகாதி ஏவம் இத்தி²லிங்க³வஸேன லத்³த⁴னாமம். மமம் ரக்க², அஹம் தம் ரக்கி²ஸ்ஸாமீதி ஏத்த² அயம் தஸ்ஸ லத்³தி⁴ – ஆசரியோ உக்கி²த்தவம்ஸம் ஸுக்³க³ஹிதம் அக³ண்ஹந்தோ, அந்தேவாஸிகேன பக்க²ந்தபக்க²ந்ததி³ஸம் அக³ச்ச²ந்தோ, ஸப்³ப³காலஞ்ச வம்ஸக்³க³ம் அனுல்லோகேந்தோ அந்தேவாஸிகம் ந ரக்க²தி நாம, ஏவம் அரக்கி²தோ அந்தேவாஸிகோ பதித்வா சுண்ணவிசுண்ணம் ஹோதி. வம்ஸம் பன ஸுக்³க³ஹிதம் க³ண்ஹந்தோ, தேன பக்க²ந்தபக்க²ந்ததி³ஸம் க³ச்ச²ந்தோ, ஸப்³ப³காலஞ்ச வம்ஸக்³க³ம் உல்லோகேந்தோ தம் ரக்க²தி நாம. அந்தேவாஸிகோபி இதோ சிதோ ச பக்க²ந்தி³த்வா மிகோ³ விய கீளந்தோ ஆசரியம் ந ரக்க²தி நாம. ஏவஞ்ஹி ஸதி திகி²ணவம்ஸகோடி ஆசரியஸ்ஸ க³லவாடகே வா நலாடே வா ட²பிதா டி²தட்டா²னம் பி⁴ந்தி³த்வா க³ச்சே²ய்ய. ஆசாரஸம்பன்னதாய பன யதோ வம்ஸோ நமதி, ததோ அனாமேந்தோ தம் ஆகட்³டே⁴ந்தோ விய ஏகதோபா⁴கி³யம் கத்வா வாதூபத²ம்ப⁴ம் கா³ஹாபேத்வா ஸதிம் ஸூபட்டி²தம் கத்வா நிச்சலோவ நிஸீத³ந்தோ ஆசரியம் ரக்க²தி நாமாதி.

த்வம் ஆசரிய அத்தானம் ரக்க², அஹம் அத்தானம் ரக்கி²ஸ்ஸாமீதி ஏத்த² அயமதி⁴ப்பாயோ – ஆசரியோ வம்ஸம் ஸுக்³க³ஹிதம் க³ண்ஹந்தோ, அந்தேவாஸிகேன பக்க²ந்தபக்க²ந்ததி³ஸம்க³ச்ச²ந்தோ, ஸப்³ப³காலஞ்ச வம்ஸக்³க³ம் உல்லோகேந்தோ, அத்தானமேவ ரக்க²தி, ந அந்தேவாஸிகம். அந்தேவாஸிகோபி காயம்பி ஏகதோபா⁴கி³யம் கத்வா வாதூபத²ம்ப⁴ம் கா³ஹாபேத்வா ஸதிம் ஸூபட்டி²தம் கத்வா நிச்சலோவ நிஸீத³மானோ அத்தானம்யேவ ரக்க²தி நாம, ந ஆசரியம்.

ஸோ தத்த² ஞாயோதி யம் மேத³கதா²லிகா ஆஹ. ஸோ தத்த² ஞாயோ, ஸோ உபாயோ, தம் காரணந்தி அத்தோ². ஸதிபட்டா²னம் ஸேவிதப்³ப³ந்தி சதுப்³பி³த⁴ம் ஸதிபட்டா²னம் ஸேவிதப்³ப³ம். ஆஸேவனாயாதி கம்மட்டா²னாஸேவனாய. ஏவம் கோ², பி⁴க்க²வே, அத்தானம் ரக்க²ந்தோ பரம் ரக்க²தீதி யோ பி⁴க்கு² கம்மாராமதாதீ³னி பஹாய ரத்திட்டா²னதி³வாட்டா²னேஸு மூலகம்மட்டா²னம் ஆஸேவந்தோ பா⁴வேந்தோ அரஹத்தம் பாபுணாதி, அத² நம் பரோ தி³ஸ்வா – ‘‘ப⁴த்³த³கோ வதாயம், பி⁴க்கு², ஸம்மாபடிபன்னோ’’தி தஸ்மிம் சித்தம் பஸாதே³த்வா ஸக்³க³பராயணோ ஹோதி. அயம் அத்தானம் ரக்க²ந்தோ பரம் ரக்க²தி நாம.

க²ந்தியாதி அதி⁴வாஸனக²ந்தியா. அவிஹிம்ஸாயாதி ஸபுப்³ப³பா⁴கா³ய கருணாய. மேத்தசித்ததாயாதி ஸபுப்³ப³பா⁴கா³ய மேத்தாய. அனுத³யதாயாதி அனுவட்³டி⁴யா, ஸபுப்³ப³பா⁴கா³ய முதி³தாயாதி அத்தோ². பரம் ரக்க²ந்தோ அத்தானம் ரக்க²தீதி ஏத்த² யோ பி⁴க்கு² ரத்திட்டா²னதி³வாட்டா²னம் க³தோ தீஸு ப்³ரஹ்மவிஹாரேஸு திகசதுக்கஜ்ஜா²னானி நிப்³ப³த்தேத்வா ஜா²னம் பாத³கம் கத்வா ஸங்கா²ரே ஸம்மஸந்தோ விபஸ்ஸனம் வட்³டே⁴த்வா அரஹத்தம் பாபுணாதி. அயம் பரம் ரக்க²ந்தோ அத்தானம் ரக்க²தி நாமாதி வேதி³தப்³போ³.