10. ஜனபத³கல்யாணீஸுத்தவண்ணனா

386. த³ஸமே ஜனபத³கல்யாணீதி ஜனபத³ம்ஹி கல்யாணீ உத்தமா ச²ஸரீரதோ³ஸரஹிதா பஞ்சகல்யாணஸமன்னாக³தா. ஸா ஹி யஸ்மா நாதிதீ³கா⁴ நாதிரஸ்ஸா, நாதிகிஸா நாதிதூ²லா, நாதிகாளா நாச்சோதா³தா, அதிக்கந்தா, மானுஸவண்ணம் அப்பத்தா தி³ப்³ப³வண்ணம், தஸ்மா ச²ஸரீரதோ³ஸரஹிதா. ச²விகல்யாணம், மம்ஸகல்யாணம், ந்ஹாருகல்யாணம், அட்டி²கல்யாணம், வயகல்யாணந்தி இமேஹி பன கல்யாணேஹி ஸமன்னாக³தத்தா பஞ்சகல்யாணேஹி ஸமன்னாக³தா நாம. தஸ்ஸா ஹி ஆக³ந்துகோபா⁴ஸகிச்சம் நத்தி², அத்தனோ ஸரீரோபா⁴ஸேனேவ த்³வாத³ஸஹத்த²ட்டா²னே ஆலோகம் கரோதி, பியங்கு³ஸாமா வா ஹோதி, ஸுவண்ணஸாமா வா, அயமஸ்ஸா ச²விகல்யாணதா. சத்தாரோ பனஸ்ஸா ஹத்த²பாதா³ முக²பரியோஸானஞ்ச லாகா²ரஸபரிகம்மகதம் விய ரத்தபவாளரத்தகம்ப³லஸதி³ஸம் ஹோதி, அயமஸ்ஸா மம்ஸகல்யாணதா. வீஸதி பன நக²பத்தானி மம்ஸதோ அமுத்தட்டா²னே லாகா²ரஸபூரிதானி விய, முத்தட்டா²னே கீ²ரதா⁴ராஸதி³ஸானி, ஹோந்தி அயமஸ்ஸா ந்ஹாருகல்யாணகதா. த்³வத்திம்ஸ த³ந்தா ஸுபு²ஸிதா ஸுதோ⁴தவஜிரபந்தி விய கா²யந்தி, அயமஸ்ஸா அட்டி²கல்யாணதா. வீஸதிவஸ்ஸஸதிகாபி பன ஸமானா ஸோளஸவஸ்ஸுத்³தே³ஸிகா விய ஹோதி நிப்பலிதா, அயமஸ்ஸா வயகல்யாணதா.

பரமபாஸாவினீதி ஏத்த² பஸவனம் பஸாவோ, பவத்தீதி அத்தோ². பஸாவோ ஏவ பாஸாவோ. பரமோ பாஸாவோ பரமபாஸாவோ, ஸோ அஸ்ஸா அத்தீ²தி பரமபாஸாவினீ. நச்சே ச கீ³தே ச உத்தமபவத்தி ஸேட்ட²கிரியா, உத்தமமேவ நச்சம் நச்சதி, கீ³தம் வா கா³யதீதி வுத்தம் ஹோதி. ஸேஸம் ஸப்³ப³த்த² உத்தானத்த²மேவ. இமேஸு பன த்³வீஸு ஸுத்தேஸு புப்³ப³பா⁴க³விபஸ்ஸனாவ கதி²தாதி.

நாலந்த³வக்³கோ³ து³தியோ.