4. மேத்தாஸஹக³தஸுத்தவண்ணனா

235. சதுத்தே² மேத்தாஸஹக³தேன சேதஸாதிஆதி³ ஸப்³ப³ம் ஸப்³பா³காரேன விஸுத்³தி⁴மக்³கே³ (விஸுத்³தி⁴. 1.240-241) வித்தா²ரிதமேவ. மயம்பி கோ², ஆவுஸோ, ஸாவகானம் ஏவம் த⁴ம்மம் தே³ஸேமாதி இத³ம்பி தே புரிமனயேனேவ ஸத்து² த⁴ம்மதே³ஸனம் ஸுத்வா வத³ந்தி. தித்தி²யானஞ்ஹி ஸமயே பஞ்சனீவரணப்பஹானம் வா மேத்தாதி³ப்³ரஹ்மவிஹாரபா⁴வனா வா நத்தி². கிம் க³திகா ஹோதீதி கிம் நிப்ப²த்தி ஹோதி. கிம் பரமாதி கிம் உத்தமா. கிம் ப²லாதி கிம் ஆனிஸம்ஸா. கிம் பரியோஸானாதி கிம் நிட்டா². மேத்தாஸஹக³தந்தி மேத்தாய ஸஹக³தம் ஸம்ஸட்ட²ம் ஸம்பயுத்தம். ஏஸேவ நயோ ஸப்³ப³த்த². விவேகனிஸ்ஸிதாதீ³னி வுத்தத்தா²னேவ.

அப்படிகூலந்தி து³வித⁴ம் அப்படிகூலம் – ஸத்தஅப்படிகூலஞ்ச, ஸங்கா²ரஅப்படிகூலஞ்ச. தஸ்மிம் அப்படிகூலே இட்டே² வத்து²ஸ்மிந்தி அத்தோ². படிகூலஸஞ்ஞீதி அனிட்ட²ஸஞ்ஞீ. கத²ம் பனேத்த² ஏவம் விஹரதி? அஸுப⁴ப²ரணம் வா அனிச்சந்தி மனஸிகாரம் வா கரோந்தோ. வுத்தஞ்ஹேதம் படிஸம்பி⁴தா³யம் ‘‘கத²ம் அப்படிகூலே படிகூலஸஞ்ஞீ விஹரதி. இட்ட²ஸ்மிம் வத்து²ஸ்மிம் அஸுபா⁴ய வா ப²ரதி, அனிச்சதோ வா உபஸம்ஹரதீ’’தி. படிகூலே பன அனிட்டே² வத்து²ஸ்மிம் மேத்தாப²ரணம் வா தா⁴துமனஸிகாரம் வா கரோந்தோ அப்படிகூலஸஞ்ஞீ விஹரதி நாம. யதா²ஹ ‘‘கத²ம் படிகூலே அப்படிகூலஸஞ்ஞீ விஹரதி. அனிட்ட²ஸ்மிம் வத்து²ஸ்மிம் மேத்தாய வா ப²ரதி, தா⁴துதோ வா உபஸம்ஹரதீ’’தி (படி. ம. 2.17). உப⁴யமிஸ்ஸகபதே³ஸுபி ஏஸேவ நயோ. அப்படிகூலப்படிகூலேஸு ஹி ததே³வ அஸுப⁴ப²ரணம் வா அனிச்சந்தி மனஸிகாரம் வா கரோந்தோ படிகூலஸஞ்ஞீ விஹரதி நாம. படிகூலாபடிகூலேஸு ச ததே³வ மேத்தாப²ரணம் வா தா⁴துமனஸிகாரம் வா கரோந்தோ அப்படிகூலஸஞ்ஞீ விஹரதி நாம. ‘‘சக்கு²னா ரூபம் தி³ஸ்வா நேவ ஸுமனோ ஹோதீ’’திஆதி³னா (படி. ம. 2.17) நயேன வுத்தம் பன ச²ளங்கு³பேக்க²ம் பவத்தயமானோ ‘‘அப்படிகூலே ச படிகூலே ச தது³ப⁴யம் அபி⁴னிவஜ்ஜேத்வா உபேக்க²கோ தத்த² விஹரதி ஸதோ ஸம்பஜானோ’’தி வேதி³தப்³போ³.

ஏத்தாவதா ச இமஸ்ஸ பி⁴க்கு²னோ மேத்தாய திகசதுக்கஜ்ஜா²னம் நிப்³ப³த்தேத்வா ததே³வ பாத³கம் கத்வா விபஸ்ஸனம் வட்³டே⁴த்வா அரஹத்தம் பத்தஸ்ஸ ஸஹ விபஸ்ஸனாய மக்³க³ஸம்போ³ஜ்ஜ²ங்கா³னம் அரியித்³தி⁴யா ச த³ஸ்ஸிதத்தா தே³ஸனா வினிவட்டேதப்³பா³ ஸியா. இத³ம் பன மேத்தாஜா²னம் பாத³கம் கத்வா ஸங்கா²ரே ஸம்மஸந்தோபி யோ அரஹத்தம் பாபுணிதும் ந ஸக்கோதி, யஸ்மா தஸ்ஸ அரஹத்தபரமா மேத்தா ந ஹோதி. யம்பரமா பன ஹோதி, தம் த³ஸ்ஸேதப்³ப³ம். தஸ்மா தஸ்ஸ த³ஸ்ஸனத்த²ம் அயம் தே³ஸனா ஆரத்³தா⁴. பரதோ ஸப்³ப³ஸோ வா பன ரூபஸஞ்ஞானம் ஸமதிக்கமாதிஆதீ³ஸுபி இமினா நயேன புன தே³ஸனாரம்ப⁴பயோஜனம் வேதி³தப்³ப³ம்.

ஸுப⁴பரமந்தி ஸுப⁴னிட்ட²ம், ஸுப⁴கோடிகம், ஸுப⁴னிப்ப²த்திம். இத⁴பஞ்ஞஸ்ஸாதி இதே⁴வ பஞ்ஞா அஸ்ஸ, நயிமம் லோகம் அதிக்கமதீதி இத⁴பஞ்ஞோ, தஸ்ஸ இத⁴பஞ்ஞஸ்ஸ, லோகியபஞ்ஞஸ்ஸாதி அத்தோ². உத்தரிவிமுத்திம் அப்படிவிஜ்ஜ²தோதி லோகுத்தரத⁴ம்மம் அப்படிவிஜ்ஜ²ந்தஸ்ஸ. யோ பன படிவிஜ்ஜி²தும் ஸக்கோதி, தஸ்ஸ அரஹத்தபரமாவ மேத்தா ஹோதீதி அத்தோ². கருணாதீ³ஸுபி ஏஸேவ நயோ.

கஸ்மா பனேதாஸம் மேத்தாதீ³னம் ஸுப⁴பரமாதி³தா வுத்தா ப⁴க³வதாதி? ஸபா⁴க³வஸேன தஸ்ஸ தஸ்ஸ உபனிஸ்ஸயத்தா. மேத்தாவிஹாரிஸ்ஸ ஹி ஸத்தா அப்படிகூலா ஹோந்தி, அத²ஸ்ஸ அப்படிகூலபரிசயா அப்படிகூலேஸு பரிஸுத்³த⁴வண்ணேஸு நீலாதீ³ஸு சித்தம் உபஸம்ஹரதோ அப்பகஸிரேனேவ தத்த² சித்தம் பக்க²ந்த³தி. இதி மேத்தா ஸுப⁴விமோக்க²ஸ்ஸ உபனிஸ்ஸயோ ஹோதி, ந ததோ பரம், தஸ்மா ஸுப⁴பரமாதி வுத்தா.

கருணாவிஹாரிஸ்ஸ உண்ஹாபி⁴கா⁴தாதி³ரூபனிமித்தம் ஸத்தது³க்க²ம் ஸமனுபஸ்ஸந்தஸ்ஸ கருணாய பவத்திஸம்ப⁴வதோ ரூபே ஆதீ³னவோ பரிவிதி³தோ ஹோதி, அத²ஸ்ஸ பரிவிதி³தரூபாதீ³னவத்தா பத²வீகஸிணாதீ³ஸு அஞ்ஞதரம் உக்³கா⁴டேத்வா ரூபனிஸ்ஸரணே ஆகாஸே சித்தம் உபஸம்ஹரதோ அப்பகஸிரேனேவ தத்த² சித்தம் பக்க²ந்த³தி. இதி கருணா ஆகாஸானஞ்சாயதனஸ்ஸ உபனிஸ்ஸயோ ஹோதி, ந ததோ பரம், தஸ்மா ஆகாஸானஞ்சாயதனபரமாதி வுத்தா.

முதி³தாவிஹாரிஸ்ஸ பன தேன தேன பாமோஜ்ஜகாரணேன உப்பன்னபாமோஜ்ஜஸத்தானம் விஞ்ஞாணம் ஸமனுபஸ்ஸந்தஸ்ஸ முதி³தாய பவத்திஸம்ப⁴வதோ விஞ்ஞாணக்³க³ஹணபரிசிதம் ஹோதி, அத²ஸ்ஸ அனுக்கமாதி⁴க³தம் ஆகாஸானஞ்சாயதனம் அதிக்கம்ம ஆகாஸனிமித்தகோ³சரே விஞ்ஞாணே சித்தம் உபஸம்ஹரதோ அப்பகஸிரேனேவ தத்த² சித்தம் பக்க²ந்த³தி. இதி முதி³தா விஞ்ஞாணஞ்சாயதனஸ்ஸ உபனிஸ்ஸயோ ஹோதி, ந ததோ பரம், தஸ்மா விஞ்ஞாணஞ்சாயதனபரமாதி வுத்தா.

உபேக்கா²விஹாரிஸ்ஸ பன ‘‘ஸத்தா ஸுகி²தா வா ஹோந்து, து³க்க²தோ வா விமுச்சந்து, ஸம்பத்தஸுக²தோ வா மா விக³ச்ச²ந்தூ’’தி ஆபோ⁴கா³பா⁴வதோ ஸுக²து³க்கா²தி³பரமத்த²கா³ஹவிமுக²ஸம்ப⁴வதோ அவிஜ்ஜமானக்³க³ஹணது³க்க²சித்தம் ஹோதி. அத²ஸ்ஸ பரமத்த²கா³ஹதோ விமுக²பா⁴வபரிசிதசித்தஸ்ஸ பரமத்த²தோ அவிஜ்ஜமானக்³க³ஹணது³க்க²சித்தஸ்ஸ ச அனுக்கமாதி⁴க³தம் விஞ்ஞாணாஞ்சாயதனம் ஸமதிக்கம்மஸம்ப⁴வதோ அவிஜ்ஜமானே பரமத்த²பூ⁴தஸ்ஸ விஞ்ஞாணஸ்ஸ அபா⁴வே சித்தம் உபஸம்ஹரதோ அப்பகஸிரேனேவ தத்த² சித்தம் பக்க²ந்த³தி. இதி உபேக்கா² ஆகிஞ்சஞ்ஞாயதனஸ்ஸ உபனிஸ்ஸயோ ஹோதி, ந ததோ பரம், தஸ்மா ஆகிஞ்சஞ்ஞாயதனபரமாதி வுத்தா. தே³ஸனாபரியோஸானே பஞ்சஸதா பி⁴க்கூ² அரஹத்தம் பத்தாதி.