5. ஸங்கா³ரவஸுத்தவண்ணனா

236. பஞ்சமே பகே³வாதி பட²மஞ்ஞேவ. காமராக³பரியுட்டி²தேனாதி காமராக³க³ஹிதேன. காமராக³பரேதேனாதி காமராகா³னுக³தேன. நிஸ்ஸரணந்தி திவித⁴ம் காமராக³ஸ்ஸ நிஸ்ஸரணம் விக்க²ம்ப⁴னனிஸ்ஸரணம் தத³ங்க³னிஸ்ஸரணம் ஸமுச்சே²த³னிஸ்ஸரணந்தி. தத்த² அஸுபே⁴ பட²மஜ்ஜா²னம் விக்க²ம்ப⁴னனிஸ்ஸரணம் நாம, விபஸ்ஸனா தத³ங்க³னிஸ்ஸரணம் நாம, அரஹத்தமக்³கோ³ ஸமுச்சே²த³னிஸ்ஸரணம் நாம. தம் திவித⁴ம்பி நப்பஜானாதீதி அத்தோ². அத்தத்த²ம்பீதிஆதீ³ஸு அரஹத்தஸங்கா²தோ அத்தனோ அத்தோ² அத்தத்தோ² நாம, பச்சயதா³யகானம் அத்தோ² பரத்தோ² நாம, ஸ்வேவ து³விதோ⁴பி உப⁴யத்தோ² நாம. இமினா நயேன ஸப்³ப³வாரேஸு அத்தோ² வேதி³தப்³போ³.

அயம் பன விஸேஸோ – ப்³யாபாத³ஸ்ஸ நிஸ்ஸரணந்திஆதீ³ஸு ஹி த்³வேவ நிஸ்ஸரணானி விக்க²ம்ப⁴னனிஸ்ஸரணஞ்ச ஸமுச்சே²த³னிஸ்ஸரணஞ்ச. தத்த² ப்³யாபாத³ஸ்ஸ தாவ மேத்தாய பட²மஜ்ஜா²னம் விக்க²ம்ப⁴னனிஸ்ஸரணம், அனாகா³மிமக்³கோ³ ஸமுச்சே²த³னிஸ்ஸரணம். தி²னமித்³த⁴ஸ்ஸ ஆலோகஸஞ்ஞா விக்க²ம்ப⁴னனிஸ்ஸரணம், அரஹத்தமக்³கோ³ ஸமுச்சே²த³னிஸ்ஸரணம். உத்³த⁴ச்சகுக்குச்சஸ்ஸ யோ கோசி ஸமதோ² விக்க²ம்ப⁴னனிஸ்ஸரணம், உத்³த⁴ச்சஸ்ஸ பனேத்த² அரஹத்தமக்³கோ³, குக்குச்சஸ்ஸ அனாகா³மிமக்³கோ³ ஸமுச்சே²த³னிஸ்ஸரணம். விசிகிச்சா²ய த⁴ம்மவவத்தா²னம் விக்க²ம்ப⁴னனிஸ்ஸரணம், பட²மமக்³கோ³ ஸமுச்சே²த³னிஸ்ஸரணம்.

யா பனேத்த² ஸேய்யதா²பி ப்³ராஹ்மண உத³பத்தோ ஸம்ஸட்டோ² லாகா²ய வாதிஆதி³கா உபமா வுத்தா, தாஸு உத³பத்தோதி உத³கப⁴ரிதா பாதி. ஸம்ஸட்டோ²தி வண்ணபே⁴த³கரணவஸேன ஸம்ஸட்டோ². பக்குதி²தோதி குதி²தோ. உஸ்முத³கஜாதோதி உஸுமஜாதோ. ஸேவாலபணகபரியோனத்³தோ⁴தி திலபீ³ஜகாதி³பே⁴தே³ன ஸேவாலேன வா நீலமண்டூ³கபிட்டி²வண்ணேன வா உத³கபிட்டி²ம் சா²தே³த்வா நிப்³ப³த்தபணகேன பரியோனத்³தோ⁴. வாதேரிதோதி வாதேன ஏரிதோ கம்பிதோ. ஆவிலோதி அப்பஸன்னோ. லுளிதோதி அஸன்னிஸின்னோ. கலலீபூ⁴தோதி கத்³த³மீபூ⁴தோ. அந்த⁴காரே நிக்கி²த்தோதி கோட்ட²ந்தராதி³பே⁴தே³ அனாலோகட்டா²னே ட²பிதோ. இமஸ்மிம் ஸுத்தே ப⁴க³வா தீஹி ப⁴வேஹி தே³ஸனம் நிவத்தேத்வா அரஹத்தனிகூடேன தே³ஸனம் நிட்டா²பேஸி, ப்³ராஹ்மணோ பன ஸரணமத்தே பதிட்டி²தோ.