8. ஸகலிகஸுத்தவண்ணனா

38. அட்ட²மே மத்³த³குச்சி²ஸ்மிந்தி ஏவம்னாமகே உய்யானே. தஞ்ஹி அஜாதஸத்தும்ஹி குச்சி²க³தே தஸ்ஸ மாதரா – ‘‘அயம் மய்ஹம் குச்சி²க³தோ க³ப்³போ⁴ ரஞ்ஞோ ஸத்து ப⁴விஸ்ஸதி. கிம் மே இமினா’’தி? க³ப்³ப⁴பாதனத்த²ம் குச்சி² மத்³தா³பிதா. தஸ்மா ‘‘மத்³த³குச்சீ²’’தி ஸங்க²ம் க³தம். மிகா³னம் பன அப⁴யவாஸத்தா²ய தி³ன்னத்தா மிக³தா³யோதி வுச்சதி.

தேன கோ² பன ஸமயேனாதி ஏத்த² அயம் அனுபுப்³பி³கதா² – தே³வத³த்தோ ஹி அஜாதஸத்தும் நிஸ்ஸாய த⁴னுக்³க³ஹே ச த⁴னபாலகஞ்ச பயோஜேத்வாபி ததா²க³தஸ்ஸ ஜீவிதந்தராயம் காதும் அஸக்கோந்தோ ‘‘ஸஹத்தே²னேவ மாரேஸ்ஸாமீ’’தி கி³ஜ்ஜ²கூடபப்³ப³தம் அபி⁴ருஹித்வா மஹந்தம் கூடாகா³ரப்பமாணம் ஸிலம் உக்கி²பித்வா, ‘‘ஸமணோ கோ³தமோ சுண்ணவிசுண்ணோ ஹோதூ’’தி பவிஜ்ஜி². மஹாதா²மவா கிரேஸ பஞ்சன்னம் ஹத்தீ²னம் ப³லம் தா⁴ரேதி. அட்டா²னம் கோ² பனேதம், யம் பு³த்³தா⁴னம் பரூபக்கமேன ஜீவிதந்தராயோ ப⁴வேய்யாதி தம் ததா²க³தஸ்ஸ ஸரீராபி⁴முக²ம் ஆக³ச்ச²ந்தம் ஆகாஸே அஞ்ஞா ஸிலா உட்ட²ஹித்வா ஸம்படிச்சி². த்³வின்னம் ஸிலானம் ஸம்பஹாரேன மஹந்தோ பாஸாணஸ்ஸ ஸகலிகா உட்ட²ஹித்வா ப⁴க³வதோ பிட்டி²பாத³பரியந்தம் அபி⁴ஹனி, பாதோ³ மஹாப²ரஸுனா பஹதோ விய ஸமுக்³க³தலோஹிதேன லாகா²ரஸமக்கி²தோ விய அஹோஸி. ப⁴க³வா உத்³த⁴ம் உல்லோகேத்வா தே³வத³த்தம் ஏதத³வோச – ‘‘ப³ஹு தயா மோக⁴புரிஸ, அபுஞ்ஞம் பஸுதம், யோ த்வம் பது³ட்ட²சித்தோ வத⁴கசித்தோ ததா²க³தஸ்ஸ லோஹிதம் உப்பாதே³ஸீ’’தி. ததோ பட்டா²ய ப⁴க³வதோ அபா²ஸு ஜாதம். பி⁴க்கூ² சிந்தயிம்ஸு – ‘‘அயம் விஹாரோ உஜ்ஜங்க³லோ விஸமோ, ப³ஹூனம் க²த்தியாதீ³னஞ்சேவ பப்³ப³ஜிதானஞ்ச அனோகாஸோ’’தி. தே ததா²க³தம் மஞ்சஸிவிகாய ஆதா³ய மத்³த³குச்சி²ம் நயிம்ஸு. தேன வுத்தம் – ‘‘தேன கோ² பன ஸமயேன ப⁴க³வதோ பாதோ³ ஸகலிகாய க²தோ ஹோதீ’’தி.

பு⁴ஸாதி ப³லவதியோ. ஸுத³ந்தி நிபாதமத்தம். து³க்க²ந்தி ஸுக²படிக்கே²போ. திப்³பா³தி ப³ஹலா. க²ராதி ப²ருஸா. கடுகாதி திகி²ணா. அஸாதாதி அமது⁴ரா. ந தாஸு மனோ அப்பேதி, ந தா மனம் அப்பாயந்தி வட்³டே⁴ந்தீதி அமனாபா. ஸதோ ஸம்பஜானோதி வேத³னாதி⁴வாஸனஸதிஸம்பஜஞ்ஞேன ஸமன்னாக³தோ ஹுத்வா. அவிஹஞ்ஞமானோதி அபீளியமானோ, ஸம்பரிவத்தஸாயிதாய வேத³னானம் வஸம் அக³ச்ச²ந்தோ.

ஸீஹஸேய்யந்தி ஏத்த² காமபோ⁴கி³ஸேய்யா, பேதஸேய்யா, ஸீஹஸேய்யா, ததா²க³தஸேய்யாதி சதஸ்ஸோ ஸேய்யா. தத்த² ‘‘யேபு⁴ய்யேன, பி⁴க்க²வே, காமபோ⁴கீ³ ஸத்தா வாமேன பஸ்ஸேன ஸேந்தீ’’தி அயம் காமபோ⁴கி³ஸேய்யா. தேஸு ஹி யேபு⁴ய்யேன த³க்கி²ணபஸ்ஸேன ஸயானோ நாம நத்தி². ‘‘யேபு⁴ய்யேன, பி⁴க்க²வே, பேதா உத்தானா ஸேந்தீ’’தி அயம் பேதஸேய்யா. அப்பமம்ஸலோஹிதத்தா ஹி அட்டி²ஸங்கா⁴டஜடிதா ஏகேன பஸ்ஸேன ஸயிதும் ந ஸக்கோந்தி, உத்தானாவ ஸேந்தி. ‘‘யேபு⁴ய்யேன, பி⁴க்க²வே, ஸீஹோ மிக³ராஜா நங்கு³ட்ட²ம் அந்தரஸத்தி²ம்ஹி அனுபக்கி²பித்வா த³க்கி²ணேன பஸ்ஸேன ஸேதீ’’தி அயம் ஸீஹஸேய்யா. தேஜுஸ்ஸத³த்தா ஹி ஸீஹோ மிக³ராஜா த்³வே புரிமபாதே³ ஏகஸ்மிம், ‘பச்சி²மபாதே³ ஏகஸ்மிம் டா²னே ட²பேத்வா நங்கு³ட்ட²ம் அந்தரஸத்தி²ம்ஹி பக்கி²பித்வா புரிமபாத³பச்சி²மபாத³னங்கு³ட்டா²னம் டி²தோகாஸம் ஸல்லக்கே²த்வா த்³வின்னம் புரிமபாதா³னம் மத்த²கே ஸீஸம் ட²பேத்வா ஸயதி, தி³வஸம்பி ஸயித்வா பபு³ஜ்ஜ²மானோ ந உத்ரஸந்தோ பபு³ஜ்ஜ²தி, ஸீஸம் பன உக்கி²பித்வா புரிமபாதா³தீ³னம் டி²தோகாஸம் ஸல்லக்கே²தி’. ஸசே கிஞ்சி டா²னம் விஜஹித்வா டி²தம் ஹோதி, ‘‘நயித³ம் துய்ஹம் ஜாதியா, ந ஸூரபா⁴வஸ்ஸ அனுரூப’’ந்தி அனத்தமனோ ஹுத்வா தத்தே²வ ஸயதி, ந கோ³சராய பக்கமதி. அவிஜஹித்வா டி²தே பன ‘‘துய்ஹம் ஜாதியா ச ஸூரபா⁴வஸ்ஸ ச அனுரூபமித³’’ந்தி ஹட்ட²துட்டோ² உட்டா²ய ஸீஹவிஜம்பி⁴தம் விஜம்பி⁴த்வா கேஸரபா⁴ரம் விது⁴னித்வா திக்க²த்தும் ஸீஹனாத³ம் நதி³த்வா கோ³சராய பக்கமதி. சதுத்த²ஜ்ஜா²னஸேய்யா பன ‘‘ததா²க³தஸேய்யா’’தி வுச்சதி. தாஸு இத⁴ ஸீஹஸேய்யா ஆக³தா. அயஞ்ஹி தேஜுஸ்ஸத³இரியாபத²த்தா உத்தமஸேய்யா நாம.

பாதே³ பாத³ந்தி த³க்கி²ணபாதே³ வாமபாத³ம். அச்சாதா⁴யாதி அதிஆதா⁴ய, ஈஸகம் அதிக்கம்ம ட²பேத்வா. கோ³ப்ப²கேன ஹி கோ³ப்ப²கே ஜாணுனா வா ஜாணும்ஹி ஸங்க⁴ட்டியமானே அபி⁴ண்ஹம் வேத³னா உப்பஜ்ஜதி, சித்தம் ஏகக்³க³ம் ந ஹோதி, ஸேய்யா அபா²ஸுகா ஹோதி. யதா² ந ஸங்க⁴ட்டேதி, ஏவம் அதிக்கம்ம ட²பிதே வேத³னா நுப்பஜ்ஜதி, சித்தம் ஏகக்³க³ம் ஹோதி, ஸேய்யா பா²ஸு ஹோதி. தஸ்மா ஏவம் நிபஜ்ஜி. ஸதோ ஸம்பஜானோதி ஸயனபரிக்³கா³ஹகஸதிஸம்பஜஞ்ஞேன ஸமன்னாக³தோ. ‘‘உட்டா²னஸஞ்ஞ’’ந்தி பனேத்த² ந வுத்தம், கி³லானஸேய்யா ஹேஸா ததா²க³தஸ்ஸ.

ஸத்தஸதாதி இமஸ்மிம் ஸுத்தே ஸப்³பா³பி தா தே³வதா கி³லானஸேய்யட்டா²னம் ஆக³தா. உதா³னம் உதா³னேஸீதி கி³லானஸேய்யம் ஆக³தானம் தோ³மனஸ்ஸேன ப⁴விதப்³ப³ம் ஸியா. இமாஸம் பன ததா²க³தஸ்ஸ வேத³னாதி⁴வாஸனம் தி³ஸ்வா, ‘‘அஹோ பு³த்³தா⁴னம் மஹானுபா⁴வதா! ஏவரூபாஸு நாம வேத³னாஸு வத்தமானாஸு விகாரமத்தம்பி நத்தி², ஸிரீஸயனே அலங்கரித்வா ட²பிதஸுவண்ணரூபகம் விய அனிஞ்ஜமானேன காயேன நிபன்னோ, இதா³னிஸ்ஸ அதி⁴கதரம் முக²வண்ணோ விரோசதி, ஆபா⁴ஸம்பன்னோ புண்ணசந்தோ³ விய ஸம்பதி விகஸிதம் விய ச அரவிந்த³ம் அஸ்ஸ முக²ம் ஸோப⁴தி, காயேபி வண்ணாயதனம் இதா³னி ஸுஸம்மட்ட²கஞ்சனம் விய விப்பஸீத³தீ’’தி உதா³னம் உத³பாதி³.

நாகோ³ வத போ⁴தி, ஏத்த² போ⁴தி த⁴ம்மாலபனம். ப³லவந்தட்டே²ன நாகோ³. நாக³வதாதி நாக³பா⁴வேன. ஸீஹோ வதாதிஆதீ³ஸு அஸந்தாஸனட்டே²ன ஸீஹோ. ப்³யத்தபரிசயட்டே²ன காரணாகாரணஜானனேன வா ஆஜானீயோ. அப்படிஸமட்டே²ன நிஸபோ⁴. க³வஸதஜேட்ட²கோ ஹி உஸபோ⁴, க³வஸஹஸ்ஸஜேட்ட²கோ வஸபோ⁴, க³வஸதஸஹஸ்ஸஜேட்ட²கோ நிஸபோ⁴தி வுச்சதி. ப⁴க³வா பன அப்படிஸமட்டே²ன ஆஸப⁴ம் டா²னம் படிஜானாதி. தேனேவத்தே²ன இத⁴ ‘‘நிஸபோ⁴’’தி வுத்தோ. து⁴ரவாஹட்டே²ன தோ⁴ரய்ஹோ. நிப்³பி³ஸேவனட்டே²ன த³ந்தோ.

பஸ்ஸாதி அனியமிதாணத்தி. ஸமாதி⁴ந்தி அரஹத்தப²லஸமாதி⁴ம். ஸுவிமுத்தந்தி ப²லவிமுத்தியா ஸுவிமுத்தம். ராகா³னுக³தம் பன சித்தம் அபி⁴னதம் நாம ஹோதி, தோ³ஸானுக³தம் அபனதம். தது³ப⁴யபடிக்கே²பேன ந சாபி⁴னதம் ந சாபனதந்தி ஆஹ. ந ச ஸஸங்கா²ரனிக்³க³ய்ஹவாரிதக³தந்தி ந ஸஸங்கா²ரேன ஸப்பயோகே³ன கிலேஸே நிக்³க³ஹேத்வா வாரிதவதம், கிலேஸானம் பன சி²ன்னத்தா வதம் ப²லஸமாதி⁴னா ஸமாஹிதந்தி அத்தோ². அதிக்கமிதப்³ப³ந்தி விஹேடே²தப்³ப³ம் க⁴ட்டேதப்³ப³ம். அத³ஸ்ஸனாதி அஞ்ஞாணா. அஞ்ஞாணீ ஹி அந்த⁴பா³லோவ ஏவரூபே ஸத்த²ரி அபரஜ்ஜே²ய்யாதி தே³வத³த்தம் க⁴ட்டயமானா வத³ந்தி.

பஞ்சவேதா³தி இதிஹாஸபஞ்சமானம் வேதா³னம் தா⁴ரகா. ஸதம் ஸமந்தி வஸ்ஸஸதம். தபஸ்ஸீதி தபனிஸ்ஸிதகா ஹுத்வா. சரந்தி சரந்தா. ந ஸம்மாவிமுத்தந்தி ஸசேபி ஏவரூபா ப்³ராஹ்மணா வஸ்ஸஸதம் சரந்தி, சித்தஞ்ச நேஸம் ஸம்மா விமுத்தம் ந ஹோதி. ஹீனத்தரூபா ந பாரம் க³மா தேதி ஹீனத்தஸபா⁴வா தே நிப்³பா³னங்க³மா ந ஹோந்தி. ‘‘ஹீனத்த²ரூபா’’திபி பாடோ², ஹீனத்த²ஜாதிகா பரிஹீனத்தா²தி அத்தோ². தண்ஹாதி⁴பன்னாதி தண்ஹாய அஜ்ஜோ²த்த²டா. வதஸீலப³த்³தா⁴தி அஜவதகுக்குரவதாதீ³ஹி ச வதேஹி தாதி³ஸேஹேவ ச ஸீலேஹி ப³த்³தா⁴. லூக²ம் தபந்தி பஞ்சாதபதாபனம் கண்டகஸேய்யாதி³கம் தபம். இதா³னி ஸா தே³வதா ஸாஸனஸ்ஸ நிய்யானிகபா⁴வம் கதே²ந்தீ ந மானகாமஸ்ஸாதிஆதி³மாஹ. தம் வுத்தத்த²மேவாதி. அட்ட²மம்.