9. பட²மபஜ்ஜுன்னதீ⁴துஸுத்தவண்ணனா

39. நவமே பஜ்ஜுன்னஸ்ஸ தீ⁴தாதி பஜ்ஜுன்னஸ்ஸ நாம வஸ்ஸவலாஹகதே³வரஞ்ஞோ சாதுமஹாராஜிகஸ்ஸ தீ⁴தா. அபி⁴வந்தே³தி ப⁴க³வா தும்ஹாகம் பாதே³ வந்தா³மி. சக்கு²மதாதி பஞ்சஹி சக்கூ²ஹி சக்கு²மந்தேன ததா²க³தேன. த⁴ம்மோ அனுபு³த்³தோ⁴தி, ‘‘இத³ம் மயா புப்³பே³ பரேஸம் ஸந்திகே கேவலம் ஸுதம்யேவ ஆஸீ’’தி வத³தி. ஸாஹம் தா³னீதி, ஸா அஹம் இதா³னி. ஸக்கி² ஜானாமீதி, படிவேத⁴வஸேன பச்சக்க²மேவ ஜானாமி. விக³ரஹந்தாதி, ‘‘ஹீனக்க²ரபத³ப்³யஞ்ஜனோ’’தி வா ‘‘அனிய்யானிகோ’’தி வா ஏவம் க³ரஹந்தா. ரோருவந்தி, த்³வே ரோருவா – தூ⁴மரோருவோ ச ஜாலரோருவோ ச. தத்த² தூ⁴மரோருவோ விஸும் ஹோதி, ஜாலரோருவோதி பன அவீசிமஹானிரயஸ்ஸேவேதம் நாமம். தத்த² ஹி ஸத்தா அக்³கி³ம்ஹி ஜலந்தே ஜலந்தே புனப்புனம் ரவம் ரவந்தி, தஸ்மா ஸோ ‘‘ரோருவோ’’தி வுச்சதி. கோ⁴ரந்தி தா³ருணம். க²ந்தியா உபஸமேன உபேதாதி ருச்சித்வா க²மாபேத்வா க³ஹணக²ந்தியா ச ராகா³தி³உபஸமேன ச உபேதாதி. நவமம்.