10. ஏணிஜங்க⁴ஸுத்தவண்ணனா

30. த³ஸமே ஏணிஜங்க⁴ந்தி ஏணிமிக³ஸ்ஸ விய ஸுவட்டிதஜங்க⁴ம். கிஸந்தி அதூ²லம் ஸமஸரீரம். அத² வா ஆதபேன மிலாதம் மாலாக³ந்த⁴விலேபனேஹி அனுபப்³ரூஹிதஸரீரந்திபி அத்தோ². வீரந்தி வீரியவந்தம். அப்பாஹாரந்தி போ⁴ஜனே மத்தஞ்ஞுதாய மிதாஹாரம், விகாலபோ⁴ஜனபடிக்கே²பவஸேன வா பரித்தாஹாரம். அலோலுபந்தி சதூஸு பச்சயேஸு லோலுப்பவிரஹிதம். ரஸதண்ஹாபடிக்கே²போ வா ஏஸ. ஸீஹம்வேகசரம் நாக³ந்தி ஏகசரம் ஸீஹம் விய, ஏகசரம் நாக³ம் விய. க³ணவாஸினோ ஹி பமத்தா ஹோந்தி, ஏகசரா அப்பமத்தா, தஸ்மா ஏகசராவ க³ஹிதாதி. பவேதி³தாதி பகாஸிதா கதி²தா. ஏத்தா²தி ஏதஸ்மிம் நாமரூபே. பஞ்சகாமகு³ணவஸேன ஹி ரூபம் க³ஹிதம், மனேன நாமம், உப⁴யேஹி பன அவினிபு⁴த்தத⁴ம்மே க³ஹேத்வா பஞ்சக்க²ந்தா⁴தி³வஸேனபேத்த² பு⁴ம்மம் யோஜேதப்³ப³ந்தி. த³ஸமம்.

ஸத்திவக்³கோ³ ததியோ.