9. பிண்ட³பாதபாரிஸுத்³தி⁴ஸுத்தவண்ணனா

438. ஏவம் மே ஸுதந்தி பிண்ட³பாதபாரிஸுத்³தி⁴ஸுத்தம். தத்த² படிஸல்லானாதி ப²லஸமாபத்திதோ.

விப்பஸன்னானீதி ஓகாஸவஸேனேதம் வுத்தம். ப²லஸமாபத்திதோ ஹி வுட்டி²தஸ்ஸ பஞ்சஹி பஸாதே³ஹி பதிட்டி²தோகாஸோ விப்பஸன்னோ ஹோதி, ச²விவண்ணோ பரிஸுத்³தோ⁴. தஸ்மா ஏவமாஹ. ஸுஞ்ஞதவிஹாரேனாதி ஸுஞ்ஞதப²லஸமாபத்திவிஹாரேன. மஹாபுரிஸவிஹாரோதி பு³த்³த⁴பச்சேகபு³த்³த⁴ததா²க³தமஹாஸாவகானம் மஹாபுரிஸானம் விஹாரோ. யேன சாஹம் மக்³கே³னாதிஆதீ³ஸு விஹாரதோ பட்டா²ய யாவ கா³மஸ்ஸ இந்த³கீ²லா ஏஸ பவிட்ட²மக்³கோ³ நாம, அந்தோகா³மம் பவிஸித்வா கே³ஹபடிபாடியா சரித்வா யாவ நக³ரத்³வாரேன நிக்க²மனா ஏஸ சரிதப்³ப³பதே³ஸோ நாம, ப³ஹி இந்த³கீ²லதோ பட்டா²ய யாவ விஹாரா ஏஸ படிக்கந்தமக்³கோ³ நாம. படிக⁴ம் வாபி சேதஸோதி சித்தே படிஹஞ்ஞனகிலேஸஜாதம் கிஞ்சி அத்தி² நத்தீ²தி. அஹோரத்தானுஸிக்கி²னாதி தி³வஸஞ்ச ரத்திஞ்ச அனுஸிக்க²ந்தேன.

440. பஹீனா நு கோ² மே பஞ்ச காமகு³ணாதிஆதீ³ஸு ஏகபி⁴க்கு²ஸ்ஸ பச்சவேக்க²ணா நானா, நானாபி⁴க்கூ²னம் பச்சவேக்க²ணா நானாதி. கத²ம்? ஏகோ ஹி பி⁴க்கு² பச்சா²ப⁴த்தம் பிண்ட³பாதபடிக்கந்தோ பத்தசீவரம் படிஸாமேத்வா விவித்தோகாஸே நிஸின்னோ பச்சவேக்க²தி ‘‘பஹீனா நு கோ² மே பஞ்சகாமகு³ணா’’தி. ஸோ ‘‘அப்பஹீனா’’தி ஞத்வா வீரியம் பக்³க³ய்ஹ அனாகா³மிமக்³கே³ன பஞ்சகாமகு³ணிகராக³ம் ஸமுக்³கா⁴டேத்வா மக்³கா³னந்தரம் ப²லம் ப²லானந்தரம் மக்³க³ம் ததோ வுட்டா²ய பச்சவேக்க²ந்தோ ‘‘பஹீனா’’தி பஜானாதி. நீவரணாதீ³ஸுபி ஏஸேவ நயோ. ஏதேஸம் பன அரஹத்தமக்³கே³ன பஹானாதீ³னி ஹோந்தி, ஏவம் ஏகபி⁴க்கு²ஸ்ஸ நானாபச்சவேக்க²ணா ஹோதி. ஏதாஸு பன பச்சவேக்க²ணாஸு அஞ்ஞோ பி⁴க்கு² ஏகம் பச்சவேக்க²ணம் பச்சவேக்க²தி, அஞ்ஞோ ஏகந்தி ஏவம் நானாபி⁴க்கூ²னம் நானாபச்சவேக்க²ணா ஹோதி. ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

பிண்ட³பாதபாரிஸுத்³தி⁴ஸுத்தவண்ணனா நிட்டி²தா.