10. இந்த்³ரியபா⁴வனாஸுத்தவண்ணனா

453. ஏவம் மே ஸுதந்தி இந்த்³ரியபா⁴வனாஸுத்தம். தத்த² க³ஜங்க³லாயந்தி ஏவம்னாமகே நிக³மே. ஸுவேளுவனேதி ஸுவேளு நாம ஏகா ருக்க²ஜாதி, தேஹி ஸஞ்ச²ன்னோ மஹாவனஸண்டோ³, தத்த² விஹரதி. சக்கு²னா ரூபம் ந பஸ்ஸதி, ஸோதேன ஸத்³த³ம் ந ஸுணாதீதி சக்கு²னா ரூபம் ந பஸ்ஸிதப்³ப³ம், ஸோதேன ஸத்³தோ³ ந ஸோதப்³போ³தி ஏவம் தே³ஸேதீதி அதி⁴ப்பாயேன வத³தி.

அஞ்ஞதா² அரியஸ்ஸ வினயேதி இமினா ப⁴க³வா அத்தனோ ஸாஸனே அஸதி³ஸாய இந்த்³ரியபா⁴வனாய கத²னத்த²ம் ஆலயம் அகாஸி. அதா²யஸ்மா ஆனந்தோ³ – ‘‘ஸத்தா² ஆலயம் த³ஸ்ஸேதி, ஹந்தா³ஹம் இமிஸ்ஸம் பரிஸதி பி⁴க்கு²ஸங்க⁴ஸ்ஸ இந்த்³ரியபா⁴வனாகத²ம் காரேமீ’’தி ஸத்தா²ரம் யாசந்தோ ஏதஸ்ஸ ப⁴க³வாதிஆதி³மாஹ. அத²ஸ்ஸ ப⁴க³வா இந்த்³ரியபா⁴வனம் கதே²ந்தோ தேன ஹானந்தா³திஆதி³மாஹ.

454. தத² யதி³த³ம் உபேக்கா²தி யா ஏஸா விபஸ்ஸனுபேக்கா² நாம, ஏஸா ஸந்தா ஏஸா பணீதா, அதப்பிகாதி அத்தோ². இதி அயம் பி⁴க்கு² சக்கு²த்³வாரே ரூபாரம்மணம்பி இட்டே² ஆரம்மணே மனாபம், அனிட்டே² அமனாபம், மஜ்ஜ²த்தே மனாபாமனாபஞ்ச சித்தம், தஸ்ஸ ரஜ்ஜிதும் வா து³ஸ்ஸிதும் வா முய்ஹிதும் வா அத³த்வாவ பரிக்³க³ஹேத்வா விபஸ்ஸனம் மஜ்ஜ²த்தே ட²பேதி. சக்கு²மாதி ஸம்பன்னசக்கு²விஸுத்³த⁴னேத்தோ. சக்கா²பா³தி⁴கஸ்ஸ ஹி உத்³த⁴ம் உம்மீலனனிம்மீலனம் ந ஹோதி, தஸ்மா ஸோ ந க³ஹிதோ.

456. ஈஸகம்போணேதி ரதீ²ஸா விய உட்ட²ஹித்வா டி²தே.

461. படிகூலே அப்படிகூலஸஞ்ஞீதிஆதீ³ஸு படிகூலே மேத்தாப²ரணேன வா தா⁴துஸோ உபஸம்ஹாரேன வா அப்படிகூலஸஞ்ஞீ விஹரதி. அப்படிகூலே அஸுப⁴ப²ரணேன வா அனிச்சதோ உபஸம்ஹாரேன வா படிகூலஸஞ்ஞீ விஹரதி. ஸேஸபதே³ஸுபி ஏஸேவ நயோ. தது³ப⁴யம் அபி⁴னிவஜ்ஜேத்வாதி மஜ்ஜ²த்தோ ஹுத்வா விஹரிதுகாமோ கிம் கரோதீதி? இட்டா²னிட்டே²ஸு ஆபாத²க³தேஸு நேவ ஸோமனஸ்ஸிகோ ந தோ³மனஸ்ஸிகோ ஹோதி. வுத்தஞ்ஹேதம் –

‘‘கத²ம் படிகூலே அப்படிகூலஸஞ்ஞீ விஹரதி? அனிட்ட²ஸ்மிம் வத்து²ஸ்மிம் மேத்தாய வா ப²ரதி, தா⁴துதோ வா உபஸம்ஹரதி, ஏவம் படிகூலே அப்படிகூலஸஞ்ஞீ விஹரதி. கத²ம் அப்படிகூலே படிகூலஸஞ்ஞீ விஹரதி? இட்ட²ஸ்மிம் வத்து²ஸ்மிம் அஸுபா⁴ய வா ப²ரதி, அனிச்சதோ வா உபஸம்ஹரதி, ஏவம் அப்படிகூலே படிகூலஸஞ்ஞீ விஹரதி. கத²ம் படிகூலே ச அப்படிகூலே ச அப்படிகூலஸஞ்ஞீ விஹரதி? அனிட்ட²ஸ்மிஞ்ச இட்ட²ஸ்மிஞ்ச வத்து²ஸ்மிம் மேத்தாய வா ப²ரதி, தா⁴துதோ வா உபஸம்ஹரதி. ஏவம் படிகூலே ச அப்படிகூலே ச அப்படிகூலஸஞ்ஞீ விஹரதி. கத²ம் அப்படிகூலே ச படிகூலே ச படிகூலஸஞ்ஞீ விஹரதி? இட்ட²ஸ்மிஞ்ச அனிட்ட²ஸ்மிஞ்ச வத்து²ஸ்மிம் அஸுபா⁴ய வா ப²ரதி, அனிச்சதோ வா உபஸம்ஹரதி, ஏவம் அப்படிகூலே ச படிகூலே ச படிகூலஸஞ்ஞீ விஹரதி. கத²ம் படிகூலே ச அப்படிகூலே ச தது³ப⁴யம் அபி⁴னிவஜ்ஜேத்வா உபேக்க²கோ விஹரதி ஸதோ ஸம்பஜானோ? இத⁴ பி⁴க்கு² சக்கு²னா ரூபம் தி³ஸ்வா நேவ ஸுமனோ ஹோதி ந து³ம்மனோ, உபேக்க²கோ விஹரதி ஸதோ ஸம்பஜானோ…பே… மனஸா த⁴ம்மம் விஞ்ஞாய நேவ ஸுமனோ ஹோதி ந து³ம்மனோ, உபேக்க²கோ விஹரதி ஸதோ ஸம்பஜானோ. ஏவம் படிகூலே ச அப்படிகூலே ச தது³ப⁴யம் அபி⁴னிவஜ்ஜேத்வா உபேக்க²கோ விஹரதி ஸதோ ஸம்பஜானோ’’தி.

இமேஸு ச தீஸு நயேஸு பட²மனயே மனாபம் அமனாபம் மனாபாமனாபந்தி ஸம்கிலேஸம் வட்டதி, நிக்கிலேஸம் வட்டதி. து³தியனயே ஸம்கிலேஸம், ததியனயே ஸம்கிலேஸனிக்கிலேஸம் வட்டதி. புன வுத்தம் – ‘‘பட²மம் ஸம்கிலேஸம் வட்டதி, து³தியம் ஸம்கிலேஸம்பி நிக்கிலேஸம்பி, ததியம் நிக்கிலேஸமேவ வட்டதீ’’தி. ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

இந்த்³ரியபா⁴வனாஸுத்தவண்ணனா நிட்டி²தா.

பஞ்சமவக்³க³வண்ணனா நிட்டி²தா.

உபரிபண்ணாஸட்ட²கதா² நிட்டி²தா.

யோ சாயம் ‘‘ஸப்³ப³த⁴ம்மமூலபரியாயம் வோ, பி⁴க்க²வே, தே³ஸிஸ்ஸாமீ’’தி ஆரத்³த⁴த்தா ஆதி³கல்யாணோ, மஜ்ஜே² ‘‘ஸுத்தம் கே³ய்யம் வேய்யாகரணம் கா³தா² உதா³னம் இதிவுத்தகம் ஜாதகம் அப்³பு⁴தத⁴ம்மம் வேத³ல்ல’’ந்தி வசனதோ மஜ்ஜே²கல்யாணோ, ஸன்னிட்டா²னே ‘‘அரியோ பா⁴விதிந்த்³ரியோ’’தி வசனதோ பரியோஸானகல்யாணோதி திவித⁴கல்யாணோ மஜ்ஜி²மனிகாயோ ‘‘மஹாவிபஸ்ஸனா நாமாய’’ந்தி வுத்தோ, ஸோ வண்ணனாவஸேன ஸமத்தோ ஹோதி.

நிக³மனகதா²

ஏத்தாவதா ச –

ஆயாசிதோ ஸுமதினா தே²ரேன ப⁴த³ந்தபு³த்³த⁴மித்தேன,

புப்³பே³ மயூரதூ³தபட்டனம்ஹி ஸத்³தி⁴ம் நிவஸந்தேன.

பரவாத³வித⁴ம்ஸனஸ்ஸ மஜ்ஜி²மனிகாயஸேட்ட²ஸ்ஸ,

யமஹம் பபஞ்சஸூத³னிமட்ட²கத²ம் காதுமாரபி⁴ம்.

ஸா ஹி மஹாஅட்ட²கதா²ய ஸாரமாதா³ய நிட்டி²தா ஏஸா,

ஸத்துத்தரஸதமத்தாய பாளியா பா⁴ணவாரேஹி.

ஏகூனஸட்டி²மத்தோ விஸுத்³தி⁴மக்³கோ³பி பா⁴ணவாரேஹி,

அத்த²ப்பகாஸனத்தா²ய ஆக³மானம் கதோ யஸ்மா.

தஸ்மா தேன ஸஹா’யம் கா³தா²க³ணனானயேன அட்ட²கதா²,

ஸமதி⁴கச²ஸட்டி²ஸதமிதி விஞ்ஞேய்யா பா⁴ணவாரானம்.

ஸமதி⁴கச²ஸட்டி²ஸதபமாணமிதி பா⁴ணவாரதோ ஏஸா,

ஸமயம் பகாஸயந்தீ மஹாவிஹாராதி⁴வாஸீனம்.

மூலட்ட²கதா²ஸாரம் ஆதா³ய மயா இமம் கரோந்தேன,

யம் பஞ்ஞமுபசிதம் தேன ஹோது லோகோ ஸதா³ ஸுகி²தோதி.

பரமவிஸுத்³த⁴ஸத்³தா⁴பு³த்³தி⁴வீரியப்படிமண்டி³தேன ஸீலாசாரஜ்ஜவமத்³த³வாதி³கு³ணஸமுத³யஸமுதி³தேன ஸகஸமயஸமயந்தரக³ஹனஜ்ஜோ²கா³ஹனஸமத்தே²ன பஞ்ஞாவேய்யத்தியஸமன்னாக³தேன திபிடகபரியத்திப்பபே⁴தே³ ஸாட்ட²கதே² ஸத்து² ஸாஸனே அப்படிஹதஞாணப்பபா⁴வேன மஹாவேய்யாகரணேன கரணஸம்பத்திஜனிதஸுக²வினிக்³க³தமது⁴ரோதா³ரவசனலாவண்ணயுத்தேன யுத்தமுத்தவாதி³னா வாதீ³வரேன மஹாகவினா பபி⁴ன்னபடிஸம்பி⁴தா³பரிவாரே ச²ளபி⁴ஞ்ஞாதி³ப்பபே⁴த³கு³ணப்படிமண்டி³தே உத்தரிமனுஸ்ஸத⁴ம்மே ஸுப்பதிட்டி²தபு³த்³தீ⁴னம் தே²ரவம்ஸப்பதீ³பானம் தே²ரானம் மஹாவிஹாரவாஸீனம் வம்ஸாலங்காரபூ⁴தேன விபுலவிஸுத்³த⁴பு³த்³தி⁴னா பு³த்³த⁴கோ⁴ஸோதி க³ரூஹி க³ஹிதனாமதே⁴ய்யேன தே²ரேன கதா அயம் பபஞ்சஸூத³னீ நாம மஜ்ஜி²மனிகாயட்ட²கதா² –

தாவ திட்ட²து லோகஸ்மிம், லோகனித்த²ரணேஸினம்;

த³ஸ்ஸேந்தீ குலபுத்தானம், நயம் தி³ட்டி²விஸுத்³தி⁴யா.

பு³த்³தோ⁴தி நாமம்பி, ஸுத்³த⁴சித்தஸ்ஸ தாதி³னோ;

லோகம்ஹி லோகஜேட்ட²ஸ்ஸ, பவத்ததி மஹேஸினோதி.

பபஞ்சஸூத³னீ நாம