8. உபக்கிலேஸஸுத்தவண்ணனா

236. ஏவம் மே ஸுதந்தி உபக்கிலேஸஸுத்தம். தத்த² ஏதத³வோசாதி நேவ பே⁴தா³தி⁴ப்பாயேன ந பியகம்யதாய, அத² க்²வாஸ்ஸ ஏதத³ஹோஸி – ‘‘இமே பி⁴க்கூ² மம வசனம் க³ஹேத்வா ந ஓரமிஸ்ஸந்தி, பு³த்³தா⁴ ச நாம ஹிதானுகம்பகா, அத்³தா⁴ நேஸம் ப⁴க³வா ஏகம் காரணம் கதே²ஸ்ஸதி, தம் ஸுத்வா ஏதே ஓரமிஸ்ஸந்தி, ததோ தேஸம் பா²ஸுவிஹாரோ ப⁴விஸ்ஸதீ’’தி. தஸ்மா ஏதம் ‘‘இத⁴, ப⁴ந்தே’’திஆதி³வசனமவோச. மா ப⁴ண்ட³னந்திஆதீ³ஸு ‘‘அகத்தா²’’தி பாட²ஸேஸம் க³ஹேத்வா ‘‘மா ப⁴ண்ட³னம் அகத்தா²’’தி ஏவம் அத்தோ² த³ட்ட²ப்³போ³. அஞ்ஞதரோதி ஸோ கிர பி⁴க்கு² ப⁴க³வதோ அத்த²காமோ, அயம் கிரஸ்ஸ அதி⁴ப்பாயோ – ‘‘இமே பி⁴க்கூ² கோதா⁴பி⁴பூ⁴தா ஸத்து² வசனம் ந க³ண்ஹந்தி, மா ப⁴க³வா ஏதே ஓவத³ந்தோ கிலமீ’’தி, தஸ்மா ஏவமாஹ.

பிண்டா³ய பாவிஸீதி ந கேவலம் பாவிஸி, யேனபி ஜனேன ந தி³ட்டோ², ஸோ மம் பஸ்ஸதூதிபி அதி⁴ட்டா²ஸி. கிமத்த²ம் அதி⁴ட்டா²ஸீதி? தேஸம் பி⁴க்கூ²னம் த³மனத்த²ம். ப⁴க³வா ஹி ததா³ பிண்ட³பாதப்படிக்கந்தோ ‘‘புது²ஸத்³தோ³ ஸமஜனோ’’திஆதி³கா³தா² பா⁴ஸித்வா கோஸம்பி³தோ பா³லகலோணகாரகா³மம் க³தோ. ததோ பாசீனவம்ஸதா³யம், ததோ பாலிலேய்யகவனஸண்ட³ம் க³ந்த்வா பாலிலேய்யஹத்தி²னாகே³ன உபட்ட²ஹியமானோ தேமாஸம் வஸி. நக³ரவாஸினோபி – ‘‘ஸத்தா² விஹாரம் க³தோ, க³ச்சா²ம த⁴ம்மஸ்ஸவனாயா’’தி க³ந்த⁴புப்ப²ஹத்தா² விஹாரம் க³ந்த்வா ‘‘கஹம், ப⁴ந்தே, ஸத்தா²’’தி புச்சி²ம்ஸு. ‘‘கஹம் தும்ஹே ஸத்தா²ரம் த³க்க²த², ஸத்தா² ‘இமே பி⁴க்கூ² ஸமக்³கே³ கரிஸ்ஸாமீ’தி ஆக³தோ, ஸமக்³கே³ காதும் அஸக்கோந்தோ நிக்க²மித்வா க³தோ’’தி. ‘‘மயம் ஸதம்பி ஸஹஸ்ஸம்பி த³த்வா ஸத்தா²ரம் ஆனேதும் ந ஸக்கோம, ஸோ நோ அயாசிதோ ஸயமேவ ஆக³தோ, மயம் இமே பி⁴க்கூ² நிஸ்ஸாய ஸத்து² ஸம்முகா² த⁴ம்மகத²ம் ஸோதும் ந லபி⁴ம்ஹா. இமே ஸத்தா²ரம் உத்³தி³ஸ்ஸ பப்³ப³ஜிதா, தஸ்மிம்பி ஸாமக்³கி³ம் கரோந்தே ஸமக்³கா³ ந ஜாதா, கஸ்ஸாஞ்ஞஸ்ஸ வசனம் கரிஸ்ஸந்தி. அலம் ந இமேஸம் பி⁴க்கா² தா³தப்³பா³’’தி ஸகலனக³ரே த³ண்ட³ம் ட²பயிம்ஸு. தே புனதி³வஸே ஸகலனக³ரம் பிண்டா³ய சரித்வா கடச்சு²மத்தம்பி பி⁴க்க²ம் அலபி⁴த்வா விஹாரம் ஆக³மம்ஸு. உபாஸகாபி தே புன ஆஹம்ஸு – ‘‘யாவ ஸத்தா²ரம் ந க²மாபேத², தாவ வோ தமேவ த³ண்ட³கம்ம’’ந்தி. தே ‘‘ஸத்தா²ரம் க²மாபேஸ்ஸாமா’’தி ப⁴க³வதி ஸாவத்தி²யம் அனுப்பத்தே தத்த² அக³மம்ஸு. ஸத்தா² தேஸம் அட்டா²ரஸ பே⁴த³கரவத்தூ²னி தே³ஸேஸீதி அயமேத்த² பாளிமுத்தககதா².

237. இதா³னி புது²ஸத்³தோ³திஆதி³கா³தா²ஸு புது² மஹாஸத்³தோ³ அஸ்ஸாதி புது²ஸத்³தோ³. ஸமஜனோதி ஸமானோ ஏகஸதி³ஸோ ஜனோ, ஸப்³போ³வாயம் ப⁴ண்ட³னகாரகஜனோ ஸமந்ததோ ஸத்³த³னிச்ச²ரணேன புது²ஸத்³தோ³ சேவ ஸதி³ஸோ சாதி வுத்தம் ஹோதி. ந பா³லோ கோசி மஞ்ஞதா²தி தத்ர கோசி ஏகோபி அஹம் பா³லோதி ந மஞ்ஞதி, ஸப்³பே³பி பண்டி³தமானினோயேவ. நாஞ்ஞம் பி⁴ய்யோ அமஞ்ஞருந்தி கோசி ஏகோபி அஹம் பா³லோதி ந ச மஞ்ஞி, பி⁴ய்யோ ச ஸங்க⁴ஸ்மிம் பி⁴ஜ்ஜமானே அஞ்ஞம்பி ஏகம் ‘‘மய்ஹம் காரணா ஸங்கோ⁴ பி⁴ஜ்ஜதீ’’தி இத³ம் காரணம் ந மஞ்ஞீதி அத்தோ².

பரிமுட்டா²தி முட்ட²ஸ்ஸதினோ. வாசாகோ³சரபா⁴ணினோதி ராகாரஸ்ஸ ரஸ்ஸாதே³ஸோ கதோ; வாசாகோ³சராவ, ந ஸதிபட்டா²னகோ³சரா, பா⁴ணினோ ச, கத²ம் பா⁴ணினோ? யாவிச்ச²ந்தி முகா²யாமம், யாவ முக²ம் பஸாரேதும் இச்ச²ந்தி, தாவ பஸாரேத்வா பா⁴ணினோ, ஏகோபி ஸங்க⁴கா³ரவேன முக²ஸங்கோசனம் ந கரோதீதி அத்தோ². யேன நீதாதி யேன கலஹேன இமம் நில்லஜ்ஜபா⁴வம் நீதா. ந தம் விதூ³ ந தம் ஜானந்தி ‘‘ஏவம் ஸாதீ³னவோ அய’’ந்தி.

யே ச தம் உபனய்ஹந்தீதி தம் அக்கோச்சி² மந்திஆதி³கம் ஆகாரம் யே உபனய்ஹந்தி. ஸனந்தனோதி போராணோ.

பரேதி பண்டி³தே ட²பேத்வா ததோ அஞ்ஞே ப⁴ண்ட³னகாரகா பரே நாம. தே ஏத்த² ஸங்க⁴மஜ்ஜே² கலஹம் கரோந்தா ‘‘மயம் யமாமஸே உபயமாம நஸ்ஸாம ஸததம் ஸமிதம் மச்சுஸந்திகம் க³ச்சா²மா’’தி ந ஜானந்தி. யே ச தத்த² விஜானந்தீதி யே ச தத்த² பண்டி³தா ‘‘மயம் மச்சுனோ ஸமீபம் க³ச்சா²மா’’தி விஜானந்தி. ததோ ஸம்மந்தி மேத⁴கா³தி ஏவஞ்ஹி தே ஜானந்தா யோனிஸோமனஸிகாரம் உப்பாதே³த்வா மேத⁴கா³னம் கலஹானம் வூபஸமாய படிபஜ்ஜந்தி.

அட்டி²ச்சி²ன்னாதி அயம் கா³தா² ஜாதகே (ஜா. 1.9.16) ஆக³தா, ப்³ரஹ்மத³த்தஞ்ச தீ³கா⁴வுகுமாரஞ்ச ஸந்தா⁴ய வுத்தா. அயஞ்ஹேத்த² அத்தோ² – தேஸம்பி ததா² பவத்தவேரானம் ஹோதி ஸங்க³தி, கஸ்மா தும்ஹாகம் ந ஹோதி, யேஸம் வோ நேவ மாதாபிதூனம் அட்டீ²னி சி²ன்னானி, ந பாணா ஹடா ந க³வாஸ்ஸத⁴னானி ஹடானீதி.

ஸசே லபே⁴தா²திஆதி³கா³தா² பண்டி³தஸஹாயஸ்ஸ ச பா³லஸஹாயஸ்ஸ ச வண்ணாவண்ணதீ³பனத்த²ம் வுத்தா. அபி⁴பு⁴ய்ய ஸப்³பா³னி பரிஸ்ஸயானீதி பாகடபரிஸ்ஸயே ச படிச்ச²ன்னபரிஸ்ஸயே ச அபி⁴ப⁴வித்வா தேன ஸத்³தி⁴ம் அத்தமனோ ஸதிமா சரேய்யாதி.

ராஜாவ ரட்ட²ம் விஜிதந்தி யதா² அத்தனோ விஜிதரட்ட²ம் மஹாஜனகராஜா ச அரிந்த³மமஹாராஜா ச பஹாய ஏககா விசரிம்ஸு, ஏவம் விசரேய்யாதி அத்தோ². மாதங்க³ரஞ்ஞேவ நாகோ³தி மாதங்கோ³ அரஞ்ஞே நாகோ³வ. மாதங்கோ³தி ஹத்தி² வுச்சதி. நாகோ³தி மஹந்தாதி⁴வசனமேதம். யதா² ஹி மாதுபோஸகோ மாதங்க³னாகோ³ அரஞ்ஞே ஏகோ சரி, ந ச பாபானி அகாஸி, யதா² ச பாலிலேய்யகோ, ஏவம் ஏகோ சரே, ந ச பாபானி கயிராதி வுத்தம் ஹோதி.

238. பா³லகலோணகாரகா³மோதி உபாலிக³ஹபதிஸ்ஸ போ⁴க³கா³மோ. தேனுபஸங்கமீதி கஸ்மா உபஸங்கமி? க³ணே கிரஸ்ஸ ஆதீ³னவம் தி³ஸ்வா ஏகவிஹாரிம் பி⁴க்கு²ம் பஸ்ஸிதுகாமதா உத³பாதி³, தஸ்மா ஸீதாதீ³ஹி பீளிதோ உண்ஹாதீ³னி பத்த²யமானோ விய உபஸங்கமி. த⁴ம்மியா கதா²யாதி ஏகீபா⁴வே ஆனிஸம்ஸப்படிஸம்யுத்தாய. யேன பாசீனவம்ஸதா³யோ, தத்த² கஸ்மா உபஸங்கமி? கலஹகாரகே கிரஸ்ஸ தி³ட்டா²தீ³னவத்தா ஸமக்³க³வாஸினோ பி⁴க்கூ² பஸ்ஸிதுகாமதா உத³பாதி³, தஸ்மா ஸீதாதீ³ஹி பீளிதோ உண்ஹாதீ³னி பத்த²யமானோ விய தத்த² உபஸங்கமி. ஆயஸ்மா ச அனுருத்³தோ⁴திஆதி³ வுத்தனயமேவ.

241. அத்தி² பன வோதி பச்சி²மபுச்சா²ய லோகுத்தரத⁴ம்மம் புச்சே²ய்ய. ஸோ பன தே²ரானம் நத்தி², தஸ்மா தம் புச்சி²தும் ந யுத்தந்தி பரிகம்மோபா⁴ஸம் புச்ச²தி. ஓபா⁴ஸஞ்சேவ ஸஞ்ஜானாமாதி பரிகம்மோபா⁴ஸம் ஸஞ்ஜானாம. த³ஸ்ஸனஞ்ச ரூபானந்தி தி³ப்³ப³சக்கு²னா ரூபத³ஸ்ஸனஞ்ச ஸஞ்ஜானாம. தஞ்ச நிமித்தம் நப்படிவிஜ்ஜா²மாதி தஞ்ச காரணம் ந ஜானாம, யேன நோ ஓபா⁴ஸோ ச ரூபத³ஸ்ஸனஞ்ச அந்தரதா⁴யதி.

தம் கோ² பன வோ அனுருத்³தா⁴ நிமித்தம் படிவிஜ்ஜி²தப்³ப³ந்தி தம் வோ காரணம் ஜானிதப்³ப³ம். அஹம்பி ஸுத³ந்தி அனுருத்³தா⁴ தும்ஹே கிம் ந ஆளுலேஸ்ஸந்தி, அஹம்பி இமேஹி ஏகாத³ஸஹி உபக்கிலேஸேஹி ஆளுலிதபுப்³போ³தி த³ஸ்ஸேதும் இமம் தே³ஸனம் ஆரபி⁴. விசிகிச்சா² கோ² மேதிஆதீ³ஸு மஹாஸத்தஸ்ஸ ஆலோகம் வட்³டே⁴த்வா தி³ப்³ப³சக்கு²னா நானாவிதா⁴னி ரூபானி தி³ஸ்வா ‘‘இத³ம் கோ² கி’’ந்தி விசிகிச்சா² உத³பாதி³. ஸமாதி⁴ சவீதி பரிகம்மஸமாதி⁴ சவி. ஓபா⁴ஸோதி பரிகம்மோபா⁴ஸோபி அந்தரதா⁴யி, தி³ப்³ப³சக்கு²னாபி ரூபம் ந பஸ்ஸி. அமனஸிகாரோதி ரூபானி பஸ்ஸதோ விசிகிச்சா² உப்பஜ்ஜதி, இதா³னி கிஞ்சி ந மனஸிகரிஸ்ஸாமீதி அமனஸிகாரோ உத³பாதி³.

தி²னமித்³த⁴ந்தி கிஞ்சி அமனஸிகரோந்தஸ்ஸ தி²னமித்³த⁴ம் உத³பாதி³.

ச²ம்பி⁴தத்தந்தி ஹிமவந்தாபி⁴முக²ம் ஆலோகம் வட்³டே⁴த்வா தா³னவரக்க²ஸஅஜக³ராத³யோ அத்³த³ஸ, அத²ஸ்ஸ ச²ம்பி⁴தத்தம் உத³பாதி³.

உப்பிலந்தி ‘‘மயா தி³ட்ட²ப⁴யம் பகதியா ஓலோகியமானம் நத்தி². அதி³ட்டே² கிம் நாம ப⁴ய’’ந்தி சிந்தயதோ உப்பிலாவிதத்தம் உத³பாதி³. ஸகிதே³வாதி ஏகபயோகே³னேவ பஞ்ச நிதி⁴கும்பி⁴யோபி பஸ்ஸேய்ய.

து³ட்டு²ல்லந்தி மயா வீரியம் கா³ள்ஹம் பக்³க³ஹிதம், தேன மே உப்பிலம் உப்பன்னந்தி வீரியம் ஸிதி²லமகாஸி, ததோ காயத³ரதோ² காயது³ட்டு²ல்லம் காயாலஸியம் உத³பாதி³.

அச்சாரத்³த⁴வீரியந்தி மம வீரியம் ஸிதி²லம் கரோதோ து³ட்டு²ல்லம் உப்பன்னந்தி புன வீரியம் பக்³க³ண்ஹதோ அச்சாரத்³த⁴வீரியம் உத³பாதி³. பதமேய்யாதி மரேய்ய.

அதிலீனவீரியந்தி மம வீரியம் பக்³க³ண்ஹதோ ஏவம் ஜாதந்தி புன வீரியம் ஸிதி²லம் கரோதோ அதிலீனவீரியம் உத³பாதி³.

அபி⁴ஜப்பாதி தே³வலோகாபி⁴முக²ம் ஆலோகம் வட்³டே⁴த்வா தே³வஸங்க⁴ம் பஸ்ஸதோ தண்ஹா உத³பாதி³.

நானத்தஸஞ்ஞாதி மய்ஹம் ஏகஜாதிகம் ரூபம் மனஸிகரோந்தஸ்ஸ அபி⁴ஜப்பா உப்பன்னா, நானாவித⁴ரூபம் மனஸி கரிஸ்ஸாமீதி காலேன தே³வலோகாபி⁴முக²ம் காலேன மனுஸ்ஸலோகாபி⁴முக²ம் வட்³டே⁴த்வா நானாவிதா⁴னி ரூபானி மனஸிகரோதோ நானத்தஸஞ்ஞா உத³பாதி³.

அதினிஜ்ஜா²யிதத்தந்தி மய்ஹம் நானாவிதா⁴னி ரூபானி மனஸிகரோந்தஸ்ஸ நானத்தஸஞ்ஞா உத³பாதி³, இட்ட²ம் வா அனிட்ட²ம் வா ஏகஜாதிகமேவ மனஸி கரிஸ்ஸாமீதி ததா² மனஸிகரோதோ அதினிஜ்ஜா²யிதத்தம் ரூபானம் உத³பாதி³.

243. ஓபா⁴ஸனிமித்தம் மனஸி கரோமீதி பரிகம்மோபா⁴ஸமேவ மனஸி கரோமி. ந ச ரூபானி பஸ்ஸாமீதி தி³ப்³ப³சக்கு²னா ரூபானி ந பஸ்ஸாமி. ரூபனிமித்தம் மனஸி கரோமீதி தி³ப்³ப³சக்கு²னா விஸயரூபமேவ மனஸி கரோமி.

பரித்தஞ்சேவ ஓபா⁴ஸந்தி பரித்தகட்டா²னே ஓபா⁴ஸம். பரித்தானி ச ரூபானீதி பரித்தகட்டா²னே ரூபானி. விபரியாயேன து³தியவாரோ வேதி³தப்³போ³. பரித்தோ ஸமாதீ⁴தி பரித்தகோ பரிகம்மோபா⁴ஸோ, ஓபா⁴ஸபரித்ததஞ்ஹி ஸந்தா⁴ய இத⁴ பரிகம்மஸமாதி⁴ ‘‘பரித்தோ’’தி வுத்தோ. பரித்தம் மே தஸ்மிம் ஸமயேதி தஸ்மிம் ஸமயே தி³ப்³ப³சக்கு²பி பரித்தகம் ஹோதி. அப்பமாணவாரேபி ஏஸேவ நயோ.

245. அவிதக்கம்பி விசாரமத்தந்தி பஞ்சகனயே து³தியஜ்ஜா²னஸமாதி⁴ம். அவிதக்கம்பி அவிசாரந்தி சதுக்கனயேபி பஞ்சகனயேபி ஜா²னத்தயஸமாதி⁴ம். ஸப்பீதிகந்தி து³கதிகஜ்ஜா²னஸமாதி⁴ம். நிப்பீதிகந்தி து³கஜ்ஜா²னஸமாதி⁴ம். ஸாதஸஹக³தந்தி திகசதுக்கஜ்ஜா²னஸமாதி⁴ம். உபேக்கா²ஸஹக³தந்தி சதுக்கனயே சதுத்த²ஜ்ஜா²னஸமாதி⁴ம் பஞ்சகனயே பஞ்சமஜ்ஜா²னஸமாதி⁴ம்.

கதா³ பன ப⁴க³வா இமம் திவித⁴ம் ஸமாதி⁴ம் பா⁴வேதி? மஹாபோ³தி⁴மூலே நிஸின்னோ பச்சி²மயாமே. ப⁴க³வதோ ஹி பட²மமக்³கோ³ பட²மஜ்ஜா²னிகோ அஹோஸி, து³தியாத³யோ து³தியததியசதுத்த²ஜ்ஜா²னிகா. பஞ்சகனயே பஞ்சமஜ்ஜா²னஸ்ஸ மக்³கோ³ நத்தீ²தி ஸோ லோகியோ அஹோஸீதி லோகியலோகுத்தரமிஸ்ஸகம் ஸந்தா⁴யேதம் வுத்தம். ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

உபக்கிலேஸஸுத்தவண்ணனா நிட்டி²தா.