9. பா³லபண்டி³தஸுத்தவண்ணனா

246. ஏவம் மே ஸுதந்தி பா³லபண்டி³தஸுத்தம். தத்த² பா³லலக்க²ணானீதி பா³லோ அயந்தி ஏதேஹி லக்கி²யதி ஞாயதீதி பா³லலக்க²ணானி. தானேவ தஸ்ஸ ஸஞ்ஜானனகாரணானீதி பா³லனிமித்தானி. பா³லஸ்ஸ அபதா³னானீதி பா³லாபதா³னானி. து³ச்சிந்திதசிந்தீதி சிந்தயந்தோ அபி⁴ஜ்ஜா²ப்³யாபாத³மிச்சா²த³ஸ்ஸனவஸேன து³ச்சிந்திதமேவ சிந்தேதி. து³ப்³பா⁴ஸிதபா⁴ஸீதி பா⁴ஸமானோபி முஸாவாதா³தி³பே⁴த³ம் து³ப்³பா⁴ஸிதமேவ பா⁴ஸதி. து³க்கடகம்மகாரீதி கரோந்தோபி பாணாதிபாதாதி³வஸேன து³க்கடகம்மமேவ கரோதி. தத்ர சேதி யத்த² நிஸின்னோ, தஸ்ஸம் பரிஸதி. தஜ்ஜம் தஸ்ஸாருப்பந்தி தஜ்ஜாதிகம் தத³னுச்ச²விகம், பஞ்சன்னம் வேரானம் தி³ட்ட²த⁴ம்மகஸம்பராயிகஆதீ³னவப்படிஸம்யுத்தந்தி அதி⁴ப்பாயோ. தத்ராதி தாய கதா²ய கச்ச²மானாய. பா³லந்திஆதீ³னி ஸாமிஅத்தே² உபயோக³வசனம்.

248. ஓலம்ப³ந்தீதி உபட்ட²ஹந்தி. ஸேஸபத³த்³வயம் தஸ்ஸேவ வேவசனம், ஓலம்ப³னாதி³ஆகாரேன ஹி தானி உபட்ட²ஹந்தி, தஸ்மா ஏவம் வுத்தம். பத²வியா ஓலம்ப³ந்தீதி பத²விதலே பத்த²ரந்தி. ஸேஸபத³த்³வயம் தஸ்ஸேவ வேவசனம். பத்த²ரணாகாரோயேவ ஹேஸ. தத்ர, பி⁴க்க²வே, பா³லஸ்ஸாதி தஸ்மிம் உபட்டா²னாகாரே ஆபாத²க³தே பா³லஸ்ஸ ஏவம் ஹோதி.

249. ஏதத³வோசாதி அனுஸந்தி⁴குஸலோ பி⁴க்கு² ‘‘நிரயஸ்ஸ உபமா காதும் ந ஸக்கா’’தி ந ப⁴க³வா வத³தி, ‘‘ந ஸுகரா’’தி பன வத³தி, ந ஸுகரம் பன ஸக்கா ஹோதி காதும், ஹந்தா³ஹம் த³ஸப³லம் உபமம் காராபேமீதி சிந்தேத்வா ஏதம் ‘‘ஸக்கா, ப⁴ந்தே’’தி வசனம் அவோச. ஹனேய்யுந்தி வினிவிஜ்ஜி²த்வா க³மனவஸேன யதா² ஏகஸ்மிம் டா²னே த்³வே பஹாரா நிபதந்தி, ஏவம் ஹனேய்யும். தேனஸ்ஸ த்³வே வணமுக²ஸதானி ஹோந்தி. இதோ உத்தரிபி ஏஸேவ நயோ.

250. பாணிமத்தந்தி அந்தோமுட்டி²யம் ட²பனமத்தம். ஸங்க²ம்பி ந உபேதீதி க³ணனமத்தம்பி ந க³ச்ச²தி. கலபா⁴க³ம்பீதி ஸதிமம் கலம் ஸஹஸ்ஸிமம் கலம் ஸதஸஹஸ்ஸிமம் வா கலம் உபக³ச்ச²தீதிபி வத்தப்³ப³தம் ந உபேதி. உபனித⁴ம்பீதி உபனிக்கே²பனமத்தம்பி ந உபேதி, ஓலோகேந்தஸ்ஸ ஓலோகிதமத்தம்பி நத்தி². தத்தம் அயோகி²லந்தி திகா³வுதம் அத்தபா⁴வம் ஸம்பஜ்ஜலிதாய லோஹபத²வியா உத்தானகம் நிபஜ்ஜாபேத்வா தஸ்ஸ த³க்கி²ணஹத்தே² தாலப்பமாணம் அயஸூலம் பவேஸேந்தி, ததா² வாமஹத்தா²தீ³ஸு. யதா² ச உத்தானகம் நிபஜ்ஜாபேத்வா, ஏவம் உரேனபி த³க்கி²ணபஸ்ஸேனபி வாமபஸ்ஸேனபி நிபஜ்ஜாபேத்வா தம் கம்மகாரணம் கரோந்தியேவ. ஸம்வேஸேத்வாதி ஸம்பஜ்ஜலிதாய லோஹபத²வியா திகா³வுதம் அத்தபா⁴வம் நிபஜ்ஜாபேத்வா. குடா²ரீஹீதி மஹதீஹி கே³ஹஸ்ஸ ஏகபக்க²ச²த³னமத்தாஹி குடா²ரீஹி தச்ச²ந்தி. லோஹிதம் நதீ³ ஹுத்வா ஸந்த³தி, லோஹபத²விதோ ஜாலா உட்ட²ஹித்வா தச்சி²தட்டா²னம் க³ண்ஹந்தி. மஹாது³க்க²ம் உப்பஜ்ஜதி, தச்ச²ந்தா பன ஸுத்தாஹதம் கரித்வா தா³ரூ விய அட்ட²ம்ஸம்பி ச²ளம்ஸம்பி கரோந்தி. வாஸீஹீதி மஹாஸுப்பபமாணாஹி வாஸீஹி. தாஹி தச்ச²ந்தா தசதோ யாவ அட்டீ²னி ஸணிகம் தச்ச²ந்தி, தச்சி²தம் தச்சி²தம் படிபாகதிகம் ஹோதி. ரதே² யோஜேத்வாதி ஸத்³தி⁴ம் யுக³யோத்தபஞ்சரசக்ககுப்³ப³ரபாசனேஹி ஸப்³ப³தோ ஸம்பஜ்ஜலிதே ரதே² யோஜேத்வா. மஹந்தந்தி மஹாகூடாகா³ரப்பமாணம். ஆரோபேந்தீதி ஸம்பஜ்ஜலிதேஹி அயமுக்³க³ரேஹி போதே²ந்தா ஆரோபேந்தி. ஸகிம்பி உத்³த⁴ந்தி ஸுபக்குதி²தாய உக்க²லியா பக்கி²த்ததண்டு³லா விய உத்³த⁴ம் அதோ⁴ திரியஞ்ச க³ச்ச²தி.

பா⁴க³ஸோ மிதோதி பா⁴கே³ ட²பேத்வா ட²பேத்வா விப⁴த்தோ. பரியந்தோதி பரிக்கி²த்தோ. அயஸாதி உபரி அயபட்டேன சா²தி³தோ.

ஸமந்தா யோஜனஸதம் ப²ரித்வா திட்ட²தீதி ஏவம் ப²ரித்வா திட்ட²தி, யதா² ஸமந்தா யோஜனஸதே டா²னே ட²த்வா ஓலோகேந்தஸ்ஸ அக்கீ²னி யமககோ³ளகா விய நிக்க²மந்தி.

ந ஸுகரா அக்கா²னேன பாபுணிதுந்தி நிரயோ நாம ஏவம்பி து³க்கோ² ஏவம்பி து³க்கோ²தி வஸ்ஸஸதம் வஸ்ஸஸஹஸ்ஸம் கதே²ந்தேனாபி மத்த²கம் பாபேத்வா கதே²தும் ந ஸுகராதி அத்தோ².

251. த³ந்துல்லேஹகந்தி த³ந்தேஹி உல்லேஹித்வா, லுஞ்சித்வாதி வுத்தம் ஹோதி. ரஸாதோ³தி ரஸகே³தே⁴ன பரிபு⁴த்தரஸோ.

252. அஞ்ஞமஞ்ஞகா²தி³காதி அஞ்ஞமஞ்ஞகா²த³னம்.

து³ப்³ப³ண்ணோதி து³ரூபோ. து³த்³த³ஸிகோதி தா³ரகானம் ப⁴யாபனத்த²ம் கதயக்கோ² விய து³த்³த³ஸோ. ஓகோடிமகோதி லகுண்ட³கோ பவிட்ட²கீ³வோ மஹோத³ரோ. காணோதி ஏகக்கி²காணோ வா உப⁴யக்கி²காணோ வா. குணீதி ஏகஹத்த²குணீ வா உப⁴யஹத்த²குணீ வா. பக்க²ஹதோதி பீட²ஸப்பீ. ஸோ காயேனாதி இத³மஸ்ஸ து³க்கா²னுபப³ந்த⁴த³ஸ்ஸனத்த²ம் ஆரத்³த⁴ம்.

கலிக்³க³ஹேனாதி பராஜயேன. அதி⁴ப³ந்த⁴ம் நிக³ச்சே²ய்யாதி யஸ்மா ப³ஹும் ஜிதோ ஸப்³ப³ஸாபதேய்யம்பிஸ்ஸ நப்பஹோதி, தஸ்மா அத்தனாபி ப³ந்த⁴ம் நிக³ச்சே²ய்ய. கேவலா பரிபூரா பா³லபூ⁴மீதி பா³லோ தீணி து³ச்சரிதானி பூரேத்வா நிரயே நிப்³ப³த்ததி, தத்த² பக்காவஸேஸேன மனுஸ்ஸத்தம் ஆக³தோ பஞ்சஸு நீசகுலேஸு நிப்³ப³த்தித்வா புன தீணி து³ச்சரிதானி பூரேத்வா நிரயே நிப்³ப³த்ததீதி அயம் ஸகலா பரிபுண்ணா பா³லபூ⁴மி.

253. பண்டி³தலக்க²ணானீதிஆதி³ வுத்தானுஸாரேனேவ வேதி³தப்³ப³ம். ஸுசிந்திதசிந்தீதிஆதீ³னி சேத்த² மனோஸுசரிதாதீ³னம் வஸேன யோஜேதப்³பா³னி.

சக்கரதனவண்ணனா

256. ஸீஸம் ந்ஹாதஸ்ஸாதி ஸீஸேன ஸத்³தி⁴ம் க³ந்தோ⁴த³கேன ந்ஹாதஸ்ஸ. உபோஸதி²கஸ்ஸாதி ஸமாதி³ன்னஉபோஸத²ங்க³ஸ்ஸ. உபரிபாஸாத³வரக³தஸ்ஸாதி பாஸாத³வரஸ்ஸ உபரி க³தஸ்ஸ ஸுபோ⁴ஜனம் பு⁴ஞ்ஜித்வா பாஸாத³வரஸ்ஸ உபரி மஹாதலே ஸிரீக³ப்³ப⁴ம் பவிஸித்வா ஸீலானி ஆவஜ்ஜந்தஸ்ஸ. ததா³ கிர ராஜா பாதோவ ஸதஸஹஸ்ஸம் விஸ்ஸஜ்ஜேத்வா மஹாதா³னம் த³த்வா புனபி ஸோளஸஹி க³ந்தோ⁴த³கக⁴டேஹி ஸீஸம் ந்ஹாயித்வா கதபாதராஸோ ஸுத்³த⁴ம் உத்தராஸங்க³ம் ஏகம்ஸம் கத்வா உபரிபாஸாத³ஸ்ஸ ஸிரீஸயனே பல்லங்கம் ஆபு⁴ஜித்வா நிஸின்னோ அத்தனோ தா³னமயபுஞ்ஞஸமுத³யம் ஆவஜ்ஜேத்வா நிஸீத³தி, அயம் ஸப்³ப³சக்கவத்தீனம் த⁴ம்மதா.

தேஸம் தம் ஆவஜ்ஜந்தானம்யேவ வுத்தப்பகாரபுஞ்ஞகம்மபச்சயம் உதுஸமுட்டா²னம் நீலமணிஸங்கா⁴டஸதி³ஸம் பாசீனஸமுத்³த³ஜலதலம் சி²ந்த³மானம் விய ஆகாஸம் அலங்குருமானம் விய தி³ப்³ப³ம் சக்கரதனம் பாதுப⁴வதி. தயித³ம் தி³ப்³பா³னுபா⁴வயுத்தத்தா தி³ப்³ப³ந்தி வுத்தம். ஸஹஸ்ஸம் அஸ்ஸ அரானந்தி ஸஹஸ்ஸாரம். ஸஹ நேமியா ஸஹ நாபி⁴யா சாதி ஸனேமிகம் ஸனாபி⁴கம். ஸப்³பே³ஹி ஆகாரேஹி பரிபூரந்தி ஸப்³பா³காரபரிபூரம்.

தத்த² சக்கஞ்ச தம் ரதிஜனனட்டே²ன ரதனஞ்சாதி சக்கரதனம். யாய பன தம் நாபி⁴யா ‘‘ஸனாபி⁴க’’ந்தி வுத்தம், ஸா இந்த³னீலமணிமயா ஹோதி. மஜ்ஜே² பனஸ்ஸா ரஜதமயா பனாளி, யாய ஸுத்³த⁴ஸினித்³த⁴த³ந்தபந்தியா ஹஸமானம் விய விரோசதி. மஜ்ஜே² சி²த்³தே³ன விய சந்த³மண்ட³லேன உபோ⁴ஸுபி பா³ஹிரந்தேஸு ரஜதபட்டேன கதபரிக்கே²போ ஹோதி. தேஸு பனஸ்ஸா நாபி⁴பனாளி பரிக்கே²பபட்டேஸு யுத்தட்டா²னே பரிச்சே²த³லேகா² ஸுவிப⁴த்தாவ ஹுத்வா பஞ்ஞாயந்தி. அயம் தாவஸ்ஸ நாபி⁴யா ஸப்³பா³காரபரிபூரதா.

யேஹி பன தம் அரேஹி ‘‘ஸஹஸ்ஸார’’ந்தி வுத்தம், தே ஸத்தரதனமயா ஸூரியரஸ்மியோ விய பபா⁴ஸம்பன்னா ஹோந்தி. தேஸம்பி க⁴டமணிகபரிச்சே²த³லேகா²தீ³னி ஸுவிப⁴த்தானேவ பஞ்ஞாயந்தி. அயமஸ்ஸ அரானம் ஸப்³பா³காரபரிபூரதா.

யாய பன தம் நேமியா ஸஹ ‘‘ஸனேமிக’’ந்தி வுத்தம், ஸா பா³லஸூரியரஸ்மிகலாபஸிரிம் அவஹஸமானா விய ஸுரத்தஸுத்³த⁴ஸினித்³த⁴பவாளமயா ஹோதி. ஸந்தீ⁴ஸு பனஸ்ஸா ஸஞ்ஜா²ராக³ஸஸ்ஸிரிகரத்தஜம்போ³னத³பட்டா வட்டபரிச்சே²த³லேகா² ச ஸுவிப⁴த்தா பஞ்ஞாயந்தி. அயமஸ்ஸ நேமியா ஸப்³பா³காரபரிபூரதா.

நேமிமண்ட³லபிட்டி²யம் பனஸ்ஸ த³ஸன்னம் த³ஸன்னம் அரானமந்தரே த⁴மனவம்ஸோ விய அந்தோஸுஸிரோ சி²த்³த³மண்ட³லசித்தோ வாதகா³ஹீ பவாளத³ண்டோ³ ஹோதி, யஸ்ஸ வாதேன பஹரிதஸ்ஸ ஸுகுஸலஸமன்னாஹதஸ்ஸ பஞ்சங்கி³கதூரியஸ்ஸ விய ஸத்³தோ³ வக்³கு³ ச ரஜனீயோ ச கமனீயோ ச ஹோதி. தஸ்ஸ கோ² பன பவாளத³ண்ட³ஸ்ஸ உபரி ஸேதச்ச²த்தம், உபோ⁴ஸு பஸ்ஸேஸு ஸமோஸரிதகுஸுமதா³மபந்தியோதி ஏவம் ஸமோஸரிதகுஸுமதா³மபந்திஸதத்³வயபரிவாரேன ஸேதச்ச²த்தஸததா⁴ரினா பவாளத³ண்ட³ஸதேன ஸமுபஸோபி⁴தனேமிபரிக்கே²பஸ்ஸ த்³வின்னம்பி நாபி⁴பனாளீனம் அந்தோ த்³வே ஸீஹமுகா²னி ஹோந்தி, யேஹி தாலக்க²ந்த⁴ப்பமாணா புண்ணசந்த³கிரணகலாபஸஸ்ஸிரிகா தருணரவிஸமானரத்தகம்ப³லகே³ண்டு³கபரியந்தா ஆகாஸக³ங்கா³க³திஸோப⁴ம் அபி⁴ப⁴வமானா விய த்³வே முத்தகலாபா ஓலம்ப³ந்தி, யேஹி சக்கரதனேன ஸத்³தி⁴ம் ஆகாஸே ஸம்பரிவத்தமானேஹி தீணி சக்கானி ஏகதோ பரிவத்தந்தானி விய கா²யந்தி. அயமஸ்ஸ ஸப்³ப³ஸோ ஸப்³பா³காரபரிபூரதா.

தம் பனேதம் ஏவம் ஸப்³பா³காரபரிபூரம் பகதியா ஸாயமாஸப⁴த்தம் பு⁴ஞ்ஜித்வா அத்தனோ அத்தனோ க⁴ரத்³வாரே பஞ்ஞத்தாஸனேஸு நிஸீதி³த்வா பவத்தகதா²ஸல்லாபேஸு மனுஸ்ஸேஸு வீதி²சதுக்காதீ³ஸு கீளமானே தா³ரகஜனே நாதிஉச்சேன நாதினீசேன வனஸண்ட³மத்த²காஸன்னேன ஆகாஸப்பதே³ஸேன உபஸோப⁴யமானம் விய ருக்க²ஸாக²க்³கா³னி, த்³வாத³ஸயோஜனதோ பட்டா²ய ஸுய்யமானேன மது⁴ரஸ்ஸரேன ஸத்தானம் ஸோதானி ஓதா⁴பயமானம் யோஜனதோ பட்டா²ய நானப்பபா⁴ஸமுத³யஸமுஜ்ஜலேன வண்ணேன நயனானி ஸமாகட்³ட⁴ந்தம் ரஞ்ஞோ சக்கவத்திஸ்ஸ புஞ்ஞானுபா⁴வம் உக்³கோ⁴ஸயந்தம் விய ராஜதா⁴னிஅபி⁴முக²ம் ஆக³ச்ச²தி.

அத² தஸ்ஸ சக்கரதனஸ்ஸ ஸத்³த³ஸ்ஸவனேனேவ ‘‘குதோ நு கோ², கஸ்ஸ நு கோ² அயம் ஸத்³தோ³’’தி ஆவஜ்ஜிதஹத³யானம் புரத்தி²மதி³ஸம் ஓலோகயமானானம் தேஸம் மனுஸ்ஸானம் அஞ்ஞதரோ அஞ்ஞதரம் ஏவமாஹ – ‘‘பஸ்ஸ போ⁴ அச்ச²ரியம், அயம் புண்ணசந்தோ³ புப்³பே³ ஏகோ உக்³க³ச்ச²தி, அஜ்ஜ பன அத்தது³தியோ உக்³க³தோ, ஏதஞ்ஹி ராஜஹம்ஸமிது²னம் விய புண்ணசந்த³மிது²னம் புப்³பா³பரியேன க³க³னதலம் அபி⁴லங்க⁴தீ’’தி. தமஞ்ஞோ ஆஹ – ‘‘கிம் கதே²ஸி ஸம்ம கஹம் நாம தயா த்³வே புண்ணசந்தா³ ஏகதோ உக்³க³ச்ச²ந்தா தி³ட்ட²புப்³பா³, நனு ஏஸ தபனீயரம்ஸிதா⁴ரோ பிஞ்ச²ரகிரணோ தி³வாகரோ உக்³க³தோ’’தி. தமஞ்ஞோ ஸிதம் கத்வா ஏவமாஹ – ‘‘கிம் உம்மத்தோஸி, நனு கோ² இதா³னிமேவ தி³வாகரோ அத்த²ங்க³தோ, ஸோ கத²ம் இமம் புண்ணசந்த³ம் அனுப³ந்த⁴மானோ உக்³க³ச்சி²ஸ்ஸதி, அத்³தா⁴ பனேதம் அனேகரதனப்பபா⁴ஸமுஜ்ஜலம் ஏகஸ்ஸ புஞ்ஞவதோ விமானம் ப⁴விஸ்ஸதீ’’தி. தே ஸப்³பே³பி அபஸாத³யந்தா அஞ்ஞே ஏவமாஹம்ஸு – ‘‘கிம் ப³ஹும் விப்பலபத², நேவேஸ புண்ணசந்தோ³, ந ஸூரியோ ந தே³வவிமானம். ந ஹேதேஸம் ஏவரூபா ஸிரிஸம்பத்தி அத்தி², சக்கரதனேன பனேதேன ப⁴விதப்³ப³’’ந்தி.

ஏவம் பவத்தஸல்லாபஸ்ஸேவ தஸ்ஸ ஜனஸ்ஸ சந்த³மண்ட³லம் ஓஹாய தம் சக்கரதனம் அபி⁴முக²ம் ஹோதி. ததோ தேஹி ‘‘கஸ்ஸ நு கோ² இத³ம் நிப்³ப³த்த’’ந்தி வுத்தே ப⁴வந்தி வத்தாரோ – ‘‘ந கஸ்ஸசி அஞ்ஞஸ்ஸ, நனு அம்ஹாகம் ராஜா பூரிதசக்கவத்திவத்தோ, தஸ்ஸேதம் நிப்³ப³த்த’’ந்தி. அத² ஸோ ச மஹாஜனோ, யோ ச அஞ்ஞோ பஸ்ஸதி, ஸப்³போ³ சக்கரதனமேவ அனுக³ச்ச²தி. தம்பி சக்கரதனம் ரஞ்ஞோயேவ அத்தா²ய அத்தனோ ஆக³தபா⁴வம் ஞாபேதுகாமம் விய ஸத்தக்க²த்தும் பாகாரமத்த²கேனேவ நக³ரம் அனுஸம்யாயித்வா ரஞ்ஞோ அந்தேபுரம் பத³க்கி²ணம் கத்வா அந்தேபுரஸ்ஸ உத்தரஸீஹபஞ்ஜரஆஸன்னே டா²னே யதா² க³ந்த⁴புப்பா²தீ³ஹி ஸுகே²ன ஸக்கா ஹோதி பூஜேதும், ஏவம் அக்கா²ஹதம் விய திட்ட²தி.

ஏவம் டி²தஸ்ஸ பனஸ்ஸ வாதபானச்சி²த்³தா³தீ³ஹி பவிஸித்வா நானாவிராக³ரதனப்பபா⁴ஸமுஜ்ஜலம் அந்தோ பாஸாத³ம் அலங்குருமானம் பபா⁴ஸமூஹம் தி³ஸ்வா த³ஸ்ஸனத்தா²ய ஸஞ்ஜாதாபி⁴லாஸோ ராஜா ஹோதி. பரிஜனோபிஸ்ஸ பியவசனபாப⁴தேன ஆக³ந்த்வா தமத்த²ம் நிவேதே³தி. அத² ராஜா ப³லவபீதிபாமோஜ்ஜபு²டஸரீரோ பல்லங்கம் மோசேத்வா உட்டா²யாஸனா ஸீஹபஞ்ஜரஸமீபம் க³ந்த்வா தம் சக்கரதனம் தி³ஸ்வா ‘‘ஸுதம் கோ² பன மேத’’ந்திஆதி³கம் சிந்தனம் சிந்தேஸி. தேன வுத்தம் – ‘‘தி³ஸ்வான ரஞ்ஞோ க²த்தியஸ்ஸ…பே… அஸ்ஸம் நு கோ² அஹம் ராஜா சக்கவத்தீ’’தி. தத்த² ஸோ ஹோதி ராஜா சக்கவத்தீதி கித்தாவதா சக்கவத்தீ ஹோதி? ஏகங்கு³லத்³வங்கு³லமத்தம்பி சக்கரதனே ஆகாஸம் அப்³பு⁴க்³க³ந்த்வா பவத்தே.

இதா³னி தஸ்ஸ பவத்தாபனத்த²ம் யம் காதப்³ப³ம் தம் த³ஸ்ஸேந்தோ அத² கோ², பி⁴க்க²வேதிஆதி³மாஹ. தத்த² உட்டா²யாஸனாதி நிஸின்னாஸனதோ உட்ட²ஹித்வா சக்கரதனஸமீபம் ஆக³ந்த்வா. பி⁴ங்காரம் க³ஹேத்வாதி ஹத்தி²ஸோண்ட³ஸதி³ஸபனாளிம் ஸுவண்ணபி⁴ங்காரம் உக்கி²பித்வா வாமஹத்தே²ன உத³கம் க³ஹேத்வா. பவத்தது ப⁴வம் சக்கரதனம், அபி⁴விஜினாது ப⁴வம் சக்கரதனந்தி. அன்வதே³வ ராஜா சக்கவத்தீ ஸத்³தி⁴ம் சதுரங்கி³னியா ஸேனாயாதி ஸப்³ப³சக்கவத்தீனஞ்ஹி உத³கேன அபி⁴ஸிஞ்சித்வா ‘‘அபி⁴விஜானாது ப⁴வம் சக்கரதன’’ந்தி வசனஸமனந்தரமேவ வேஹாஸம் அப்³பு⁴க்³க³ந்த்வா சக்கரதனம் பவத்ததி, யஸ்ஸ பவத்திஸமகாலமேவ ஸோ ராஜா சக்கவத்தீ நாம ஹோதி.

பவத்தே பன சக்கரதனே தம் அனுப³ந்த⁴மானோவ ராஜா சக்கவத்தீ யானவரம் ஆருய்ஹ வேஹாஸம் அப்³பு⁴க்³க³ச்ச²தி, அத²ஸ்ஸ ச²த்தசாமராதி³ஹத்தோ² பரிஜனோ சேவ அந்தேபுரஜனோ ச. ததோ நானப்பகாரகஞ்சுககவசாதி³ஸன்னாஹவிபூ⁴ஸிதேன விவிதா⁴ஹரணப்பபா⁴ஸமுஜ்ஜலிதேன ஸமுஸ்ஸிதத்³த⁴ஜபடாகபடிமண்டி³தேன அத்தனோ அத்தனோ ப³லகாயேன ஸத்³தி⁴ம் உபராஜஸேனாபதி பபூ⁴தயோபி வேஹாஸம் அப்³பு⁴க்³க³ந்த்வா ராஜானமேவ பரிவாரேந்தி. ராஜயுத்தா பன ஜனஸங்க³ஹத்த²ம் நக³ரவீதீ²ஸு பே⁴ரியோ சராபேந்தி ‘‘தாதா அம்ஹாகம் ரஞ்ஞோ சக்கரதனம் நிப்³ப³த்தம், அத்தனோ அத்தனோ விப⁴வானுரூபேன மண்டி³தப்பஸாதி⁴தா ஸன்னிபததா²’’தி. மஹாஜனோ பன பகதியா சக்கரதனஸத்³தே³னேவ ஸப்³ப³கிச்சானி பஹாய க³ந்த⁴புப்பா²தீ³னி ஆதா³ய ஸன்னிபதிதோவ, ஸோபி ஸப்³போ³ வேஹாஸம் அப்³பு⁴க்³க³ந்த்வா ராஜானமேவ பரிவாரேதி. யஸ்ஸ யஸ்ஸ ஹி ரஞ்ஞா ஸத்³தி⁴ம் க³ந்துகாமதா உப்பஜ்ஜதி, ஸோ ஸோ ஆகாஸக³தோவ ஹோதி. ஏவம் த்³வாத³ஸயோஜனாயாமவித்தா²ரா பரிஸா ஹோதி. தத்த² ஏகபுரிஸோபி சி²ன்னபி⁴ன்னஸரீரோ வா கிலிட்ட²வத்தோ² வா நத்தி². ஸுசிபரிவாரோ ஹி ராஜா சக்கவத்தீ. சக்கவத்திபரிஸா நாம விஜ்ஜாத⁴ரபரிஸா விய ஆகாஸே க³ச்ச²மானா இந்த³னீலமணிதலே விப்பகிண்ணரதனஸதி³ஸா ஹோதி. தேன வுத்தம் ‘‘அன்வதே³வ ராஜா சக்கவத்தீ ஸத்³தி⁴ம் சதுரங்கி³னியா ஸேனாயா’’தி.

தம்பி சக்கரதனம் ருக்க²க்³கா³னம் உபரூபரி நாதிஉச்சேன க³க³னபதே³ஸேன பவத்ததி, யதா² ருக்கா²னம் புப்ப²ப²லபல்லவேஹி அத்தி²கா தானி ஸுகே²ன க³ஹேதும் ஸக்கோந்தி, பூ⁴மியம் டி²தா ‘‘ஏஸ ராஜா, ஏஸ உபராஜா, ஏஸ ஸேனாபதீ’’தி ஸல்லக்கே²தும் ஸக்கோந்தி. டா²னாதீ³ஸுபி இரியாபதே²ஸு யோ யேன இச்ச²தி, ஸோ தேனேவ க³ச்ச²தி. சித்தகம்மாதி³ஸிப்பபஸுதா சேத்த² அத்தனோ அத்தனோ கிச்சம் கரோந்தாயேவ க³ச்ச²ந்தி. யதே²வ ஹி பூ⁴மியம், ததா² நேஸம் ஸப்³ப³கிச்சானி ஆகாஸே இஜ்ஜ²ந்தி. ஏவம் சக்கவத்திபரிஸம் க³ஹேத்வா தம் சக்கரதனம் வாமபஸ்ஸேன ஸினேரும் பஹாய ஸமுத்³த³ஸ்ஸ உபரிபா⁴கே³ன அட்ட²யோஜனஸஹஸ்ஸப்பமாணம் புப்³ப³விதே³ஹம் க³ச்ச²தி.

தத்த² யோ வினிப்³பே³தே⁴ன த்³வாத³ஸயோஜனாய பரிக்கே²பதோ ச²த்திம்ஸயோஜனபரிஸாய ஸன்னிவேஸக்க²மோ ஸுலபா⁴ஹாரூபகரணோ சா²யூத³கஸம்பன்னோ ஸுசிஸமதலோ ரமணீயோ பூ⁴மிபா⁴கோ³, தஸ்ஸ உபரிபா⁴கே³ தம் சக்கரதனம் ஆகாஸே அக்கா²ஹதம் விய திட்ட²தி. அத² தேன ஸஞ்ஞாணேன ஸோ மஹாஜனோ ஓதரித்வா யதா²ருசி ந்ஹானபோ⁴ஜனாதீ³னி ஸப்³ப³கிச்சானி கரோந்தோ வாஸம் கப்பேதி, தேன வுத்தம் ‘‘யஸ்மிம் கோ² பன, பி⁴க்க²வே, பதே³ஸே தம் சக்கரதனம் பதிட்டா²தி, தத்த² ராஜா சக்கவத்தீ வாஸம் உபேதி ஸத்³தி⁴ம் சதுரங்கி³னியா ஸேனாயா’’தி.

ஏவம் வாஸம் உபக³தே சக்கவத்திம்ஹி யே தத்த² ராஜானோ, தே ‘‘பரசக்கம் ஆக³த’’ந்தி ஸுத்வாபி ந ப³லகாயம் ஸன்னிபாதேத்வா யுத்³த⁴ஸஜ்ஜா ஹோந்தி. சக்கரதனஸ்ஸ உப்பத்திஸமனந்தரமேவ நத்தி² ஸோ ஸத்தோ நாம, யோ பச்சத்தி²கஸஞ்ஞாய ராஜானம் ஆரப்³ப⁴ ஆவுத⁴ம் உக்கி²பிதும் விஸஹேய்ய. அயமனுபா⁴வோ சக்கரதனஸ்ஸ.

சக்கானுபா⁴வேன ஹி தஸ்ஸ ரஞ்ஞோ,

அரீ அஸேஸா த³மத²ம் உபேந்தி;

அரிந்த³மம் நாம நராதி⁴பஸ்ஸ,

தேனேவ தம் வுச்சதி தஸ்ஸ சக்கம்.

தஸ்மா ஸப்³பே³பி தே ராஜானோ அத்தனோ அத்தனோ ரஜ்ஜஸிரிவிப⁴வானுரூபம் பாப⁴தம் க³ஹேத்வா தம் ராஜானம் உபக³ம்ம ஓனதஸிரா அத்தனோ மோளியமணிப்பபா⁴பி⁴ஸேகேனஸ்ஸ பாத³பூஜம் கரோந்தோ ‘‘ஏஹி கோ² மஹாராஜா’’திஆதீ³ஹி வசனேஹி தஸ்ஸ கிங்காரப்படிஸ்ஸாவிதம் ஆபஜ்ஜந்தி. தேன வுத்தம் யே கோ² பன, பி⁴க்க²வே, புரத்தி²மாய…பே… அனுஸாஸ மஹாராஜாதி.

தத்த² ஸ்வாக³தந்தி ஸுஆக³மனம். ஏகஸ்மிஞ்ஹி ஆக³தே ஸோசந்தி, க³தே நந்த³ந்தி. ஏகஸ்மிம் ஆக³தே நந்த³ந்தி, க³தே ஸோசந்தி. தாதி³ஸோ த்வம் ஆக³தனந்த³னோ க³மனஸோசனோ, தஸ்மா தவ ஆக³மனம் ஸுஆக³மனந்தி வுத்தம் ஹோதி. ஏவம் வுத்தே பன சக்கவத்தீ நாபி ‘‘ஏத்தகம் நாம மே அனுவஸ்ஸம் ப³லிம் உபகப்பேதா²’’தி வத³தி, நாபி அஞ்ஞஸ்ஸ போ⁴க³ம் அச்சி²ந்தி³த்வா அஞ்ஞஸ்ஸ தே³தி. அத்தனோ பன த⁴ம்மராஜபா⁴வஸ்ஸ அனுரூபாய பஞ்ஞாய பாணாதிபாதாதீ³னி உபபரிக்கி²த்வா பேமனீயேன மஞ்ஜுனா ஸரேன ‘‘பஸ்ஸத² தாதா, பாணாதிபாதோ நாமேஸ ஆஸேவிதோ பா⁴விதோ ப³ஹுலீகதோ நிரயஸம்வத்தனிகோ ஹோதீ’’திஆதி³னா நயேன த⁴ம்மம் தே³ஸேத்வா ‘‘பாணோ ந ஹந்தப்³போ³’’திஆதி³கம் ஓவாத³ம் தே³தி. தேன வுத்தம் ராஜா சக்கவத்தீ ஏவமாஹ பாணோ ந ஹந்தப்³போ³…பே… யதா²பு⁴த்தஞ்ச பு⁴ஞ்ஜதா²தி.

கிம் பன ஸப்³பே³பி ரஞ்ஞோ இமம் ஓவாத³ம் க³ண்ஹந்தீதி. பு³த்³த⁴ஸ்ஸபி தாவ ஸப்³பே³ ந க³ண்ஹந்தி, ரஞ்ஞோ கிம் க³ண்ஹிஸ்ஸந்தி. தஸ்மா யே பண்டி³தா விபா⁴வினோ, தே க³ண்ஹந்தி. ஸப்³பே³ பன அனுயந்தா ப⁴வந்தி. தஸ்மா ‘‘யே கோ² பன, பி⁴க்க²வே’’திஆதி³மாஹ.

அத² தம் சக்கரதனம் ஏவம் புப்³ப³விதே³ஹவாஸீனம் ஓவாதே³ தி³ன்னே கதபாதராஸே சக்கவத்தீப³லேன வேஹாஸம் அப்³பு⁴க்³க³ந்த்வா புரத்தி²மம் ஸமுத்³த³ம் அஜ்ஜோ²கா³ஹதி. யதா² யதா² ச தம் அஜ்ஜோ²கா³ஹதி, ததா² ததா² அக³த³க³ந்த⁴ம் கா⁴யித்வா ஸம்கி²த்தப²ணோ நாக³ராஜா விய ஸம்கி²த்தஊமிவிப்பா²ரம் ஹுத்வா ஓக³ச்ச²மானம் மஹாஸமுத்³த³ஸலிலம் யோஜனமத்தம் ஓக³ந்த்வா அந்தோஸமுத்³தே³ வேளுரியபி⁴த்தி விய திட்ட²தி. தங்க²ணஞ்ஞேவ ச தஸ்ஸ ரஞ்ஞோ புஞ்ஞஸிரிம் த³ட்டு²காமானி விய மஹாஸமுத்³த³தலே விப்பகிண்ணானி நானாரதனானி ததோ ததோ ஆக³ந்த்வா தம் பதே³ஸம் பூரயந்தி. அத² ஸா ராஜபரிஸா தம் நானாரதனபரிபூரம் மஹாஸமுத்³த³தலம் தி³ஸ்வா யதா²ருசி உச்ச²ங்கா³தீ³ஹி ஆதி³யதி, யதா²ருசி ஆதி³ன்னரதனாய பன பரிஸாய தம் சக்கரதனம் படினிவத்ததி. படினிவத்தமானே ச தஸ்மிம் பரிஸா அக்³க³தோ ஹோதி, மஜ்ஜே² ராஜா, அந்தே சக்கரதனம். தம்பி ஜலனிதி⁴ஜலம் பலோபி⁴யமானமிவ சக்கரதனஸிரியா, அஸஹமானமிவ ச தேன வியோக³ம், நேமிமண்ட³லபரியந்தம் அபி⁴ஹனந்தம் நிரந்தரமேவ உபக³ச்ச²தி.

257. ஏவம் ராஜா சக்கவத்தீ புரத்தி²மஸமுத்³த³பரியந்தம் புப்³ப³விதே³ஹம் அபி⁴விஜினித்வா த³க்கி²ணஸமுத்³த³பரியந்தம் ஜம்பு³தீ³பம் விஜேதுகாமோ சக்கரதனதே³ஸிதேன மக்³கே³ன த³க்கி²ணஸமுத்³தா³பி⁴முகோ² க³ச்ச²தி. தேன வுத்தம் அத² கோ² தம், பி⁴க்க²வே, சக்கரதனம் புரத்தி²மஸமுத்³த³ம் அஜ்ஜோ²கா³ஹேத்வா பச்சுத்தரித்வா த³க்கி²ணம் தி³ஸம் பவத்ததீதி. ஏவம் பவத்தமானஸ்ஸ பன தஸ்ஸ பவத்தனவிதா⁴னம் ஸேனாஸன்னிவேஸோ படிராஜக³மனம் தேஸம் அனுஸாஸனிப்பதா³னம் த³க்கி²ணஸமுத்³த³ம் அஜ்ஜோ²கா³ஹனம் ஸமுத்³த³ஸலிலஸ்ஸ ஓக³ச்ச²னம் ரதனாதா³னந்தி ஸப்³ப³ம் புரிமனயேனேவ வேதி³தப்³ப³ம்.

விஜினித்வா பன தம் த³ஸஸஹஸ்ஸயோஜனப்பமாணம் ஜம்பு³தீ³பம் த³க்கி²ணஸமுத்³த³தோபி பச்சுத்தரித்வா ஸத்தயோஜனஸஹஸ்ஸப்பமாணம் அபரகோ³யானம் விஜேதும் புப்³பே³ வுத்தனயேனேவ க³ந்த்வா தம்பி ஸமுத்³த³பரியந்தம் ததே²வ அபி⁴விஜினித்வா பச்சி²மஸமுத்³த³தோபி பச்சுத்தரித்வா அட்ட²யோஜனஸஹஸ்ஸப்பமாணம் உத்தரகுரும் விஜேதும் ததே²வ க³ந்த்வா தம்பி ஸமுத்³த³பரியந்தம் ததே²வ அபி⁴விஜிய உத்தரஸமுத்³த³தோபி பச்சுத்தரதி.

ஏத்தாவதா ரஞ்ஞா சக்கவத்தினா சாதுரந்தாய பத²வியா ஆதி⁴பச்சம் அதி⁴க³தம் ஹோதி. ஸோ ஏவம் விஜிதவிஜயோ அத்தனோ ரஜ்ஜஸிரிஸம்பத்தித³ஸ்ஸனத்த²ம் ஸபரிஸோ உத்³த⁴ம் க³க³னதலம் அபி⁴லங்கி⁴த்வா ஸுவிகஸிதபது³முப்பலபுண்ட³ரீகவனவிசித்தே சத்தாரோ ஜாதஸ்ஸரே விய பஞ்சஸதபஞ்சஸதபரித்ததீ³பபரிவாரே சத்தாரோ மஹாதீ³பே ஓலோகேத்வா சக்கரதனதே³ஸிதேனேவ மக்³கே³ன யதா²னுக்கமம் அத்தனோ ராஜதா⁴னிமேவ பச்சாக³ச்ச²தி. அத² தம் சக்கரதனம் அந்தேபுரத்³வாரம் ஸோப⁴யமானம் விய ஹுத்வா திட்ட²தி.

ஏவம் பதிட்டி²தே பன தஸ்மிம் சக்கரதனே ராஜந்தேபுரே உக்காஹி வா தீ³பிகாஹி வா கிஞ்சி கரணீயம் ந ஹோதி, சக்கரதனோபா⁴ஸோயேவ ரத்திம் அந்த⁴காரம் வித⁴மதி. யே ச பன ரத்திம் அந்த⁴காரத்தி²கா ஹோந்தி, தேஸம் அந்த⁴காரமேவ ஹோதி. தேன வுத்தம் த³க்கி²ணஸமுத்³த³ம் அஜ்ஜோ²கா³ஹேத்வா…பே… ஏவரூபம் சக்கரதனம் பாதுப⁴வதீதி.

ஹத்தி²ரதனவண்ணனா

258. ஏவம் பாதுபூ⁴தசக்கரதனஸ்ஸ பனஸ்ஸ சக்கவத்தினோ அமச்சா பகதிமங்க³லஹத்தி²ட்டா²னம் ஸுசிபூ⁴மிபா⁴க³ம் காரேத்வா ஹரிசந்த³னாதீ³ஹி ஸுரபி⁴க³ந்தே⁴ஹி உபலிம்பாபேத்வா ஹேட்டா² விசித்தவண்ணஸுரபி⁴குஸுமஸமாகிண்ணம் உபரி ஸுவண்ணதாரகானம் அந்தரந்தரா ஸமோஸரிதமனுஞ்ஞ-குஸுமதா³மப்படிமண்டி³தவிதானம் தே³வவிமானம் விய அபி⁴ஸங்க²ரித்வா ‘‘ஏவரூபஸ்ஸ நாம தே³வ ஹத்தி²ரதனஸ்ஸ ஆக³மனம் சிந்தேதா²’’தி வத³ந்தி. ஸோ புப்³பே³ வுத்தனயேனேவ மஹாதா³னம் த³த்வா ஸீலானி ஸமாதா³ய தம் புஞ்ஞஸம்பத்திம் ஆவஜ்ஜந்தோ நிஸீத³தி, அத²ஸ்ஸ புஞ்ஞானுபா⁴வசோதி³தோ ச²த்³த³ந்தகுலா வா உபோஸத²குலா வா தம் ஸக்காரவிஸேஸம் அனுப⁴விதுகாமோ தருணரவிமண்ட³லாபி⁴ரத்தசரண-கீ³வமுக²ப்படிமண்டி³தவிஸுத்³த⁴ஸேதஸரீரோ ஸத்தப்பதிட்டோ² ஸுஸண்டி²தங்க³பச்சங்க³ஸன்னிவேஸோ விகஸிதரத்த-பது³மசாருபோக்க²ரோ இத்³தி⁴மா யோகீ³ விய வேஹாஸம் க³மனஸமத்தோ² மனோஸிலாசுண்ணரஞ்ஜிதபரியந்தோ விய ரஜதபப்³ப³தோ ஹத்தி²ஸேட்டோ² தஸ்மிம் பதே³ஸே பதிட்டா²தி. ஸோ ச²த்³த³ந்தகுலா ஆக³ச்ச²ந்தோ ஸப்³ப³கனிட்டோ² ஆக³ச்ச²தி, உபோஸத²குலா ஸப்³ப³ஜேட்டோ². பாளியம் பன ‘‘உபோஸதோ² நாக³ராஜா’’ இச்சேவ ஆக³ச்ச²தி. ஸ்வாயம் பூரிதசக்கவத்திவத்தானம் சக்கவத்தீனம் ஸுத்தே வுத்தனயேனேவ சிந்தயந்தானம் ஆக³ச்ச²தி, ந இதரேஸம். ஸயமேவ பகதிமங்க³லஹத்தி²ட்டா²னம் ஆக³ந்த்வா மங்க³லஹத்தி²ம் அபனேத்வா தத்த² திட்ட²தி. தேன வுத்தம் புன சபரம், பி⁴க்க²வே…பே… நாக³ராஜாதி.

ஏவம் பாதுபூ⁴தம் பன தம் ஹத்தி²ரதனம் தி³ஸ்வா ஹத்தி²கோ³பகாத³யோ ஹட்ட²துட்டா² வேகே³ன க³ந்த்வா ரஞ்ஞோ ஆரோசேந்தி. ராஜா துரிததுரிதம் ஆக³ந்த்வா தம் தி³ஸ்வா பஸன்னசித்தோ ‘‘ப⁴த்³த³கம் வத போ⁴ ஹத்தி²யானம், ஸசே த³மத²ம் உபேய்யா’’தி சிந்தயந்தோ ஹத்த²ம் பஸாரேதி. அத² ஸோ க⁴ரதே⁴னுவச்ச²கோ விய கண்ணே ஓலம்பே³த்வா ஸூரதபா⁴வம் த³ஸ்ஸேந்தோ ராஜானம் உபஸங்கமதி, ராஜா தம் அபி⁴ருஹிதுகாமோ ஹோதி. அத²ஸ்ஸ பரிஜனா அதி⁴ப்பாயம் ஞத்வா தம் ஹத்தி²ரதனம் ஸோவண்ணத்³த⁴ஜம் ஸோவண்ணாலங்காரம் ஹேமஜாலபடிச்ச²ன்னம் கத்வா உபனேந்தி. ராஜா தம் அனிஸீதா³பேத்வாவ ஸத்தரதனமயாய நிஸ்ஸேணியா அபி⁴ருய்ஹ ஆகாஸம் க³மனனின்னசித்தோ ஹோதி. தஸ்ஸ ஸஹ சித்துப்பாதே³னேவ ஸோ ஹத்தி²ராஜா ராஜஹம்ஸோ விய இந்த³னீலமணிப்பபா⁴ஜாலனீலக³க³னதலம் அபி⁴லங்க⁴தி, ததோ சக்கசாரிகாய வுத்தனயேனேவ ஸகலராஜபரிஸா. இதி ஸபரிஸோ ராஜா அந்தோபாதராஸேயேவ ஸகலபத²விம் அனுஸம்யாயித்வா ராஜதா⁴னிம் பச்சாக³ச்ச²தி, ஏவம் மஹித்³தி⁴கம் சக்கவத்தினோ ஹத்தி²ரதனம் ஹோதி. தேன வுத்தம் தி³ஸ்வான ரஞ்ஞோ சக்கவத்திஸ்ஸ…பே… ஏவரூபம் ஹத்தி²ரதனம் பாதுப⁴வதீதி.

அஸ்ஸரதனவண்ணனா

ஏவம் பாதுபூ⁴தஹத்தி²ரதனஸ்ஸ பன சக்கவத்தினோ பரிஸா பகதிமங்க³லஅஸ்ஸட்டா²னம் ஸுசிஸமதலம் காரேத்வா அலங்கரித்வா ச புரிமனயேனேவ ரஞ்ஞோ தஸ்ஸ ஆக³மனசிந்தனத்த²ம் உஸ்ஸாஹம் ஜனேந்தி. ஸோ புரிமனயேனேவ கததா³னஸக்காரோ ஸமாதி³ன்னஸீலோவ பாஸாத³தலே நிஸின்னோ புஞ்ஞஸம்பத்திம் ஸமனுஸ்ஸரதி, அத²ஸ்ஸ புஞ்ஞானுபா⁴வசோதி³தோ ஸிந்த⁴வகுலதோ விஜ்ஜுல்லதாவினத்³த⁴ஸரத³காலஸேதவலாஹகராஸிஸஸ்ஸிரிகோ ரத்தபாதோ³ ரத்ததுண்டோ³ சந்த³ப்பபா⁴புஞ்ஜஸதி³ஸஸுத்³த⁴ஸினித்³த⁴க⁴னஸங்கா⁴தஸரீரோ காககீ³வா விய இந்த³னீலமணி விய ச காளவண்ணேன ஸீஸேன ஸமன்னாக³தத்தா காளஸீஸோ ஸுட்டு² கப்பேத்வா ட²பிதேஹி விய முஞ்ஜஸதி³ஸேஹி ஸண்ஹவட்டஉஜுக³திக³தேஹி கேஸேஹி ஸமன்னாக³தத்தா முஞ்ஜகேஸோ வேஹாஸங்க³மோ வலாஹகோ நாம அஸ்ஸராஜா ஆக³ந்த்வா தஸ்மிம் டா²னே பதிட்டா²தி. ஸேஸம் ஸப்³ப³ம் ஹத்தி²ரதனே வுத்தனயேனேவ வேதி³தப்³ப³ம். ஏவரூபம் அஸ்ஸரதனம் ஸந்தா⁴ய ப⁴க³வா புன சபரந்திஆதி³மாஹ.

மணிரதனவண்ணனா

ஏவம் பாதுபூ⁴தஅஸ்ஸரதனஸ்ஸ பன ரஞ்ஞோ சக்கவத்திஸ்ஸ சதுஹத்தா²யாமம் ஸகடனாபி⁴ஸமப்பமாணம் உபோ⁴ஸு அந்தேஸு கண்ணிகபரியந்ததோ வினிக்³க³தஸுபரிஸுத்³த⁴முத்தாகலாபேஹி த்³வீஹி கஞ்சனபது³மேஹி அலங்கதம் சதுராஸீதிமணிஸஹஸ்ஸபரிவாரம் தாராக³ணபரிவுதஸ்ஸ புண்ணசந்த³ஸ்ஸ ஸிரிம் படிப்ப²ரமானம் விய வேபுல்லபப்³ப³ததோ மணிரதனம் ஆக³ச்ச²தி. தஸ்ஸேவம் ஆக³தஸ்ஸ முத்தாஜாலகே ட²பேத்வா வேளுபரம்பராய ஸட்டி²ஹத்த²ப்பமாணம் ஆகாஸம் ஆரோபிதஸ்ஸ ரத்திபா⁴கே³ ஸமந்தா யோஜனப்பமாணம் ஓகாஸம் ஆபா⁴ ப²ரதி, யாய ஸப்³போ³ ஸோ ஓகாஸோ அருணுக்³க³மனவேலா விய ஸஞ்ஜாதாலோகோ ஹோதி. ததோ கஸ்ஸகா கஸிகம்மம், வாணிஜா ஆபணுக்³கா⁴டனம், தே தே ச ஸிப்பினோ தம் தம் கம்மந்தம் பயோஜேந்தி தி³வாதி மஞ்ஞமானா. தேன வுத்தம் புன சபரம், பி⁴க்க²வே…பே… மணிரதனம் பாதுப⁴வதீதி.

இத்தி²ரதனவண்ணனா

ஏவம் பாதுபூ⁴தமணிரதனஸ்ஸ பன சக்கவத்திஸ்ஸ விஸயஸுக²விஸேஸகாரணம் இத்தி²ரதனம் பாதுப⁴வதி. மத்³த³ராஜகுலதோ வா ஹிஸ்ஸ அக்³க³மஹேஸிம் ஆனேந்தி, உத்தரகுருதோ வா புஞ்ஞானுபா⁴வேன ஸயம் ஆக³ச்ச²தி. அவஸேஸா பனஸ்ஸா ஸம்பத்தி ‘‘புன சபரம், பி⁴க்க²வே, ரஞ்ஞோ சக்கவத்திஸ்ஸ இத்தி²ரதனம் பாதுப⁴வதி அபி⁴ரூபா த³ஸ்ஸனீயா’’திஆதி³னா நயேன பாளியம்யேவ ஆக³தா.

தத்த² ஸண்டா²னபாரிபூரியா அதி⁴கம் ரூபம் அஸ்ஸாதி அபி⁴ரூபா. தி³ஸ்ஸமானா ச சக்கூ²னி பீணயதி, தஸ்மா அஞ்ஞம் கிச்சவிக்கே²பம் ஹித்வாபி த³ட்ட²ப்³பா³தி த³ஸ்ஸனீயா. தி³ஸ்ஸமானா ச ஸோமனஸ்ஸவஸேன சித்தம் பஸாதே³தீதி பாஸாதி³கா. பரமாயாதி ஏவம் பஸாதா³வஹத்தா உத்தமாய. வண்ணபோக்க²ரதாயாதி வண்ணஸுந்த³ரதாய. ஸமன்னாக³தாதி உபேதா. அபி⁴ரூபா வா யஸ்மா நாதிதீ³கா⁴ நாதிரஸ்ஸா த³ஸ்ஸனீயா யஸ்மா நாதிகிஸா நாதிதூ²லா, பாஸாதி³கா யஸ்மா நாதிகாளிகா நச்சோதா³தா. பரமாய வண்ணபோக்க²ரதாய ஸமன்னாக³தா யஸ்மா அதிக்கந்தா மானுஸம் வண்ணம் அப்பத்தா தி³ப்³ப³வண்ணம். மனுஸ்ஸானஞ்ஹி வண்ணாபா⁴ ப³ஹி ந நிச்ச²ரதி, தே³வானம் அதிதூ³ரம் நிச்ச²ரதி, தஸ்ஸா பன த்³வாத³ஸஹத்த²ப்பமாணம் பதே³ஸம் ஸரீராபா⁴ ஓபா⁴ஸேதி.

நாதிதீ³கா⁴தீ³ஸு சஸ்ஸா பட²மயுக³ளேன ஆரோஹஸம்பத்தி, து³தியயுக³ளேன பரிணாஹஸம்பத்தி, ததியயுக³ளேன வண்ணஸம்பத்தி வுத்தா. ச²ஹி வாபி ஏதேஹி காயவிபத்தியா அபா⁴வோ, அதிக்கந்தா மானுஸம் வண்ணந்தி இமினா காயஸம்பத்தி வுத்தா.

தூலபிசுனோ வா கப்பாஸபிசுனோ வாதி ஸப்பிமண்டே³ பக்கி²பித்வா ட²பிதஸ்ஸ ஸதவிஹதஸ்ஸ தூலபிசுனோ வா ஸதவிஹதஸ்ஸ கப்பாஸபிசுனோ வா காயஸம்ப²ஸ்ஸோ ஹோதி. ஸீதேதி ரஞ்ஞோ ஸீதகாலே. உண்ஹேதி ரஞ்ஞோ உண்ஹகாலே. சந்த³னக³ந்தோ⁴தி நிச்சகாலமேவ ஸுபிஸிதஸ்ஸ அபி⁴னவஸ்ஸ சதுஜ்ஜாதிஸமாயோஜிதஸ்ஸ ஹரிசந்த³னஸ்ஸ க³ந்தோ⁴ காயதோ வாயதி. உப்பலக³ந்தோ⁴தி ஹஸிதகதி²தகாலேஸு முக²தோ நிக்க²ந்தோ தங்க²ணம் விகஸிதஸ்ஸேவ நீலுப்பலஸ்ஸ அதிஸுரபி⁴க³ந்தோ⁴ வாயதி.

ஏவம் ரூபஸம்ப²ஸ்ஸக³ந்த⁴ஸம்பத்தியுத்தாய பனஸ்ஸா ஸரீரஸம்பத்தியா அனுரூபம் ஆசாரம் த³ஸ்ஸேதும் தம் கோ² பனாதிஆதி³ வுத்தம். தத்த² ராஜானம் தி³ஸ்வா நிஸின்னாஸனதோ அக்³கி³த³ட்³டா⁴ விய பட²மமேவ உட்டா²தீதி புப்³பு³ட்டா²யினீ. தஸ்மிம் நிஸின்னே தஸ்ஸ ரஞ்ஞோ தாலவண்டேன பீ³ஜனாதி³கிச்சம் கத்வா பச்சா² நிபததி நிஸீத³தீதி பச்சா²னிபாதினீ. கிம் கரோமி தே³வாதி தஸ்ஸ கிம்காரம் படிஸ்ஸாவேதீதி கிம்காரபடிஸ்ஸாவினீ. ரஞ்ஞோ மனாபமேவ சரதி கரோதீதி மனாபசாரினீ. யம் ரஞ்ஞோ பியம், ததே³வ வத³தீதி பியவாதி³னீ.

இதா³னி ஸ்வாஸ்ஸா ஆசாரோ பா⁴வஸுத்³தி⁴யா ஏவ, ந ஸாடே²ய்யேனாதி த³ஸ்ஸேதும் தம் கோ² பனாதிஆதி³மாஹ. தத்த² நோ அதிசரதீதி ந அதிக்கமித்வா சரதி, அஞ்ஞம் புரிஸம் சித்தேனபி ந பத்தே²தீதி வுத்தம் ஹோதி. தத்த² யே தஸ்ஸா ஆதி³ம்ஹி ‘‘அபி⁴ரூபா’’திஆத³யோ அந்தே ‘‘புப்³பு³ட்டா²யினீ’’திஆத³யோ கு³ணா வுத்தா, தே பகதிகு³ணா ஏவ ‘‘அதிக்கந்தா மானுஸம் வண்ண’’ந்திஆத³யோ பன சக்கவத்தினோ புஞ்ஞம் உபனிஸ்ஸாய சக்கரதனபாதுபா⁴வதோ பட்டா²ய புரிமகம்மானுபா⁴வேன நிப்³ப³த்தந்தீதி வேதி³தப்³பா³. அபி⁴ரூபதாதி³காபி வா சக்கரதனபாதுபா⁴வதோ பட்டா²ய ஸப்³பா³காரபாரிபூரா ஜாதா. தேனாஹ ஏவரூபம் இத்தி²ரதனம் பாதுப⁴வதீதி.

க³ஹபதிரதனவண்ணனா

ஏவம் பாதுபூ⁴தஇத்தி²ரதனஸ்ஸ பன ரஞ்ஞோ சக்கவத்திஸ்ஸ த⁴னகரணீயானம் கிச்சானம் யதா²ஸுக²ப்பவத்தனத்த²ம் க³ஹபதிரதனம் பாதுப⁴வதி. ஸோ பகதியாவ மஹாபோ⁴கோ³ மஹாபோ⁴க³குலே ஜாதோ ரஞ்ஞோ த⁴னராஸிவட்³ட⁴கோ ஸேட்டி² க³ஹபதி ஹோதி, சக்கரதனானுபா⁴வஸஹிதம் பனஸ்ஸ கம்மவிபாகஜம் தி³ப்³ப³சக்கு² பாதுப⁴வதி, யேன அந்தோபத²வியம் யோஜனப்³ப⁴ந்தரே நிதி⁴ம் பஸ்ஸதி. ஸோ தம் ஸம்பத்திம் தி³ஸ்வா துட்ட²ஹத³யோ க³ந்த்வா ராஜானம் த⁴னேன பவாரேத்வா ஸப்³பா³னி த⁴னகரணீயானி ஸம்பாதே³தி. தேன வுத்தம் புன சபரம், பி⁴க்க²வே…பே… ஏவரூபம் க³ஹபதிரதனம் பாதுப⁴வதீதி.

பரிணாயகரதனவண்ணனா

ஏவம் பாதுபூ⁴தக³ஹபதிரதனஸ்ஸ பன ரஞ்ஞோ சக்கவத்திஸ்ஸ ஸப்³ப³கிச்சஸம்விதா⁴னஸமத்த²ம் பரிணாயகரதனம் பாதுப⁴வதி. ஸோ ரஞ்ஞோ ஜேட்ட²புத்தோவ ஹோதி. பகதியா ஏவ பண்டி³தோ ப்³யத்தோ மேதா⁴வீ, ரஞ்ஞோ புஞ்ஞானுபா⁴வம் நிஸ்ஸாய பனஸ்ஸ அத்தனோ கம்மானுபா⁴வேன பரசித்தஞாணம் உப்பஜ்ஜதி. யேன த்³வாத³ஸயோஜனாய ராஜபரிஸாய சித்தாசாரம் ஞத்வா ரஞ்ஞோ அஹிதே ஹிதே ச வவத்த²பேதும் ஸமத்தோ² ஹோதி. ஸோபி தம் அத்தனோ ஆனுபா⁴வம் தி³ஸ்வா துட்ட²ஹத³யோ ராஜானம் ஸப்³ப³கிச்சானுஸாஸனேன பவாரேதி. தேன வுத்தம் புன சபரம்…பே… பரிணாயகரதனம் பாதுப⁴வதீதி. தத்த² ட²பேதப்³ப³ம் ட²பேதுந்தி தஸ்மிம் தஸ்மிம் டா²னந்தரே ட²பேதப்³ப³ம் ட²பேதும்.

259. ஸமவேபாகினியாதிஆதி³ ஹேட்டா² வுத்தமேவ.

260. கடக்³க³ஹேனாதி ஜயக்³கா³ஹேன. மஹந்தம் போ⁴க³க்க²ந்த⁴ந்தி ஏகப்பஹாரேனேவ த்³வே வா தீணி வா ஸதஸஹஸ்ஸானி. கேவலா பரிபூரா பண்டி³தபூ⁴மீதி பண்டி³தோ தீணி ஸுசரிதானி பூரேத்வா ஸக்³கே³ நிப்³ப³த்ததி, ததோ மனுஸ்ஸலோகம் ஆக³ச்ச²ந்தோ குலரூபபோ⁴க³ஸம்பத்தியம் நிப்³ப³த்ததி, தத்த² டி²தோ தீணி ச ஸுசரிதானி பூரேத்வா புன ஸக்³கே³ நிப்³ப³த்ததீதி அயம் ஸகலா பரிபுண்ணா பண்டி³தபூ⁴மி. ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

பா³லபண்டி³தஸுத்தவண்ணனா நிட்டி²தா.