7. அனுருத்³த⁴ஸுத்தவண்ணனா

230. ஏவம் மே ஸுதந்தி அனுருத்³த⁴ஸுத்தம். தத்த² ஏவமாஹம்ஸூதி தஸ்ஸ உபாஸகஸ்ஸ அபா²ஸுககாலோ அஹோஸி, ததா³ உபஸங்கமித்வா ஏவமாஹம்ஸு. அபண்ணகந்தி அவிராதி⁴தம். ஏகத்தா²தி அப்பமாணாதி வா மஹக்³க³தாதி வா ஜா²னமேவ சித்தேகக்³க³தாயேவ ஏவம் வுச்சதீதி இமம் ஸந்தா⁴ய ஏவமாஹ.

231. யாவதா ஏகம் ருக்க²மூலம் மஹக்³க³தந்தி ப²ரித்வா அதி⁴முச்சித்வா விஹரதீதி ஏகருக்க²மூலபமாணட்டா²னம் கஸிணனிமித்தேன ஓத்த²ரித்வா தஸ்மிம் கஸிணனிமித்தே மஹக்³க³தஜ்ஜா²னம் ப²ரித்வா அதி⁴முச்சித்வா விஹரதி. மஹக்³க³தந்தி பனஸ்ஸ ஆபோ⁴கோ³ நத்தி², கேவலம் மஹக்³க³தஜ்ஜா²னபவத்திவஸேன பனேதம் வுத்தம். ஏஸ நயோ ஸப்³ப³த்த². இமினா கோ² ஏதம் க³ஹபதி பரியாயேனாதி இமினா காரணேன. ஏத்த² ஹி அப்பமாணாதி வுத்தானம் ப்³ரஹ்மவிஹாரானம் நிமித்தம் ந வட்³ட⁴தி, உக்³கா⁴டனம் ந ஜாயதி, தானி ஜா²னானி அபி⁴ஞ்ஞானம் வா நிரோத⁴ஸ்ஸ வா பாத³கானி ந ஹோந்தி, விபஸ்ஸனாபாத³கானி பன வட்டபாத³கானி ப⁴வோக்கமனானி ச ஹோந்தி. ‘‘மஹக்³க³தா’’தி வுத்தானம் பன கஸிணஜ்ஜா²னானம் நிமித்தம் வட்³ட⁴தி, உக்³கா⁴டனம் ஜாயதி, ஸமதிக்கமா ஹோந்தி, அபி⁴ஞ்ஞாபாத³கானி நிரோத⁴பாத³கானி வட்டபாத³கானி ப⁴வோக்கமனானி ச ஹோந்தி. ஏவமிமே த⁴ம்மா நானத்தா², அப்பமாணா மஹக்³க³தாதி ஏவம் நானாப்³யஞ்ஜனா ச.

232. இதா³னி மஹக்³க³தஸமாபத்திதோ நீஹரித்வா ப⁴வூபபத்திகாரணம் த³ஸ்ஸேந்தோ சதஸ்ஸோ கோ² இமாதிஆதி³மாஹ. பரித்தாபா⁴தி ப²ரித்வா ஜானந்தஸ்ஸ அயமாபோ⁴கோ³ அத்தி², பரித்தாபே⁴ஸு பன தே³வேஸு நிப்³ப³த்திகாரணம் ஜா²னம் பா⁴வேந்தோ ஏவம் வுத்தோ. ஏஸ நயோ ஸப்³ப³த்த². பரித்தாபா⁴ ஸியா ஸம்கிலிட்டா²பா⁴ ஹோந்தி ஸியா பரிஸுத்³தா⁴பா⁴, அப்பமாணாபா⁴ ஸியா ஸம்கிலிட்டா²பா⁴ ஹோந்தி ஸியா பரிஸுத்³தா⁴பா⁴. கத²ம்? ஸுப்பமத்தே வா ஸராவமத்தே வா கஸிணபரிகம்மம் கத்வா ஸமாபத்திம் நிப்³ப³த்தேத்வா பஞ்சஹாகாரேஹி ஆசிண்ணவஸிபா⁴வோ பச்சனீகத⁴ம்மானம் ஸுட்டு² அபரிஸோதி⁴தத்தா து³ப்³ப³லமேவ ஸமாபத்திம் வளஞ்ஜித்வா அப்பகு³ணஜ்ஜா²னே டி²தோ காலம் கத்வா பரித்தாபே⁴ஸு நிப்³ப³த்ததி, வண்ணோ பனஸ்ஸ பரித்தோ சேவ ஹோதி ஸம்கிலிட்டோ² ச. பஞ்சஹி பனாகாரேஹி ஆசிண்ணவஸிபா⁴வோ பச்சனீகத⁴ம்மானம் ஸுட்டு² பரிஸோதி⁴தத்தா ஸுவிஸுத்³த⁴ம் ஸமாபத்திம் வளஞ்ஜித்வா பகு³ணஜ்ஜா²னே டி²தோ காலம் கத்வா பரித்தாபே⁴ஸு நிப்³ப³த்ததி, வண்ணோ பனஸ்ஸ பரித்தோ சேவ ஹோதி பரிஸுத்³தோ⁴ ச. ஏவம் பரித்தாபா⁴ ஸியா ஸம்கிலிட்டா²பா⁴ ஹோந்தி ஸியா பரிஸுத்³தா⁴பா⁴. கஸிணே பன விபுலபரிகம்மம் கத்வா ஸமாபத்திம் நிப்³ப³த்தேத்வா பஞ்சஹாகாரேஹி ஆசிண்ணவஸிபா⁴வோதி ஸப்³ப³ம் புரிமஸதி³ஸமேவ வேதி³தப்³ப³ம். ஏவம் அப்பமாணாபா⁴ ஸியா ஸம்கிலிட்டா²பா⁴ ஹோந்தி ஸியா பரிஸுத்³தா⁴பா⁴தி.

வண்ணனானத்தந்தி ஸரீரவண்ணஸ்ஸ நானத்தம். நோ ச ஆபா⁴னானத்தந்தி ஆலோகே நானத்தம் ந பஞ்ஞாயதி. அச்சினானத்தந்தி தீ³க⁴ரஸ்ஸஅணுதூ²லவஸேன அச்சியா நானத்தம்.

யத்த² யத்தா²தி உய்யானவிமானகப்பருக்க²னதீ³தீரபோக்க²ரணீதீரேஸு யத்த² யத்த². அபி⁴னிவிஸந்தீதி வஸந்தி. அபி⁴ரமந்தீதி ரமந்தி ந உக்கண்ட²ந்தி. காஜேனாதி யாகு³ப⁴த்ததேலபா²ணிதமச்ச²மம்ஸகாஜேஸு யேன கேனசி காஜேன. ‘‘காசேனாதி’’பி பாடோ², அயமேவ அத்தோ². பிடகேனாதி பச்சி²யா. தத்த² தத்தே²வாதி ஸப்பிமது⁴பா²ணிதாதீ³னம் ஸுலப⁴ட்டா²னதோ லோணபூதிமச்சா²தீ³னம் உஸ்ஸன்னட்டா²னம் நீதா ‘‘புப்³பே³ அம்ஹாகம் வஸனட்டா²னம் பா²ஸுகம், தத்த² ஸுக²ம் வஸிம்ஹா, இத⁴ லோணம் வா நோ பா³த⁴தி பூதிமச்ச²க³ந்தோ⁴ வா ஸீஸரோக³ம் உப்பாதே³தீ’’தி ஏவம் சித்தம் அனுப்பாதே³த்வா தத்த² தத்தே²வ ரமந்தி.

234. ஆபா⁴தி ஆபா⁴ஸம்பன்னா. தத³ங்கே³னாதி தஸ்ஸா ப⁴வூபபத்தியா அங்கே³ன, ப⁴வூபபத்திகாரணேனாதி அத்தோ². இதா³னி தம் காரணம் புச்ச²ந்தோ கோ நு கோ², ப⁴ந்தேதிஆதி³மாஹ.

காயது³ட்டு²ல்லந்தி காயாலஸியபா⁴வோ. ஜா²யதோதி ஜலதோ.

235. தீ³க⁴ரத்தம் கோ² மேதி தே²ரோ கிர பாரமியோ பூரேந்தோ இஸிபப்³ப³ஜ்ஜம் பப்³ப³ஜித்வா ஸமாபத்திம் நிப்³ப³த்தேத்வா நிரந்தரம் தீணி அத்தபா⁴வஸதானி ப்³ரஹ்மலோகே படிலபி⁴, தம் ஸந்தா⁴யேதம் ஆஹ. வுத்தம்பி சேதம் –

‘‘அவோகிண்ணம் தீணி ஸதம், யம் பப்³ப³ஜிம் இஸிபப்³ப³ஜ்ஜம்;

அஸங்க²தம் க³வேஸந்தோ, புப்³பே³ ஸஞ்சரிதம் மம’’ந்தி.

ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

அனுருத்³த⁴ஸுத்தவண்ணனா நிட்டி²தா.