1. சூளஸுஞ்ஞதஸுத்தவண்ணனா

176. ஏவம் மே ஸுதந்தி சூளஸுஞ்ஞதஸுத்தம். தத்த² ஏகமித³ந்தி தே²ரோ கிர ப⁴க³வதோ வத்தம் கத்வா அத்தனோ தி³வாட்டா²னம் க³ந்த்வா காலபரிச்சே²த³ம் கத்வா நிப்³பா³னாரம்மணம் ஸுஞ்ஞதாப²லஸமாபத்திம் அப்பேத்வா நிஸின்னோ யதா²பரிச்சே²தே³ன வுட்டா²ஸி. அத²ஸ்ஸ ஸங்கா²ரா ஸுஞ்ஞதோ உபட்ட²ஹிம்ஸு. ஸோ ஸுஞ்ஞதாகத²ம் ஸோதுகாமோ ஜாதோ. அத²ஸ்ஸ ஏதத³ஹோஸி – ‘‘ந கோ² பன ஸக்கா து⁴ரேன து⁴ரம் பஹரந்தேன விய க³ந்த்வா ‘ஸுஞ்ஞதாகத²ம் மே, ப⁴ந்தே, கதே²தா²’தி ப⁴க³வந்தம் வத்தும், ஹந்தா³ஹம் யம் மே ப⁴க³வா நக³ரகம் உபனிஸ்ஸாய விஹரந்தோ ஏகம் கத²ம் கதே²ஸி, தம் ஸாரேமி, ஏவம் மே ப⁴க³வா ஸுஞ்ஞதாகத²ம் கதே²ஸ்ஸதீ’’தி த³ஸப³லம் ஸாரேந்தோ ஏகமித³ந்திஆதி³மாஹ.

தத்த² இத³ந்தி நிபாதமத்தமேவ. கச்சிமேதம், ப⁴ந்தேதி தே²ரோ ஏகபதே³ ட²த்வா ஸட்டி²பத³ஸஹஸ்ஸானி உக்³க³ஹேத்வா தா⁴ரேதும் ஸமத்தோ², கிம் ஸோ ‘‘ஸுஞ்ஞதாவிஹாரேனா’’தி ஏகம் பத³ம் தா⁴ரேதும் ந ஸக்கி²ஸ்ஸதி, ஸோதுகாமேன பன ஜானந்தேன விய புச்சி²தும் ந வட்டதி, பாகடம் கத்வா வித்தா²ரியமானம் ஸுஞ்ஞதாகத²ம் ஸோதுகாமோ அஜானந்தோ விய ஏவமாஹ. ஏகோ அஜானந்தோபி ஜானந்தோ விய ஹோதி, தே²ரோ ஏவரூபம் கோஹஞ்ஞம் கிம் கரிஸ்ஸதி, அத்தனோ ஜானனட்டா²னேபி ப⁴க³வதோ அபசிதிம் த³ஸ்ஸேத்வா ‘‘கச்சிமேத’’ந்திஆதி³மாஹ.

புப்³பே³பீதி பட²மபோ³தி⁴யம் நக³ரகம் உபனிஸ்ஸாய விஹரணகாலேபி. ஏதரஹிபீதி இதா³னிபி. ஏவம் பன வத்வா சிந்தேஸி – ‘‘ஆனந்தோ³ ஸுஞ்ஞதாகத²ம் ஸோதுகாமோ, ஏகோ பன ஸோதும் ஸக்கோதி, ந உக்³க³ஹேதும், ஏகோ ஸோதும்பி உக்³க³ஹேதும்பி ஸக்கோதி, ந கதே²தும், ஆனந்தோ³ பன ஸோதும்பி ஸக்கோதி உக்³க³ஹேதும்பி கதே²தும்பி, (கதே²மிஸ்ஸ) ஸுஞ்ஞதாகத²’’ந்தி. இதி தம் கதே²ந்தோ ஸேய்யதா²பீதிஆதி³மாஹ. தத்த² ஸுஞ்ஞோ ஹத்தி²க³வாஸ்ஸவளவேனாதி தத்த² கட்ட²ரூபபோத்த²கரூபசித்தரூபவஸேன கதா ஹத்தி²ஆத³யோ அத்தி², வேஸ்ஸவணமந்தா⁴தாதீ³னம் டி²தட்டா²னே சித்தகம்மவஸேன கதம்பி, ரதனபரிக்க²தானம் வாதபானத்³வாரப³ந்த⁴மஞ்சபீடா²தீ³னம் வஸேன ஸண்டி²தம்பி, ஜிண்ணபடிஸங்க²ரணத்த²ம் ட²பிதம்பி ஜாதரூபரஜதம் அத்தி², கட்ட²ரூபாதி³வஸேன கதா த⁴ம்மஸவனபஞ்ஹபுச்ச²னாதி³வஸேன ஆக³ச்ச²ந்தா ச இத்தி²புரிஸாபி அத்தி², தஸ்மா ந ஸோ தேஹி ஸுஞ்ஞோ. இந்த்³ரியப³த்³தா⁴னம் ஸவிஞ்ஞாணகானம் ஹத்தி²ஆதீ³னம், இச்சி²திச்சி²தக்க²ணே பரிபு⁴ஞ்ஜிதப்³ப³ஸ்ஸ ஜாதரூபரஜதஸ்ஸ, நிப³த்³த⁴வாஸம் வஸந்தானம் இத்தி²புரிஸானஞ்ச அபா⁴வம் ஸந்தா⁴யேதம் வுத்தம்.

பி⁴க்கு²ஸங்க⁴ம் படிச்சாதி பி⁴க்கூ²ஸு ஹி பிண்டா³ய பவிட்டே²ஸுபி விஹாரப⁴த்தம் ஸாதி³யந்தேஹி பி⁴க்கூ²ஹி சேவ கி³லானகி³லானுபட்டா²கஉத்³தே³ஸசீவரகம்மபஸுதாதீ³ஹி ச பி⁴க்கூ²ஹி ஸோ அஸுஞ்ஞோவ ஹோதி, இதி நிச்சம்பி பி⁴க்கூ²னம் அத்தி²தாய ஏவமாஹ. ஏகத்தந்தி ஏகபா⁴வம், ஏகம் அஸுஞ்ஞதம் அத்தீ²தி அத்தோ². ஏகோ அஸுஞ்ஞபா⁴வோ அத்தீ²தி வுத்தம் ஹோதி. அமனஸிகரித்வாதி சித்தே அகத்வா அனாவஜ்ஜித்வா அபச்சவேக்கி²த்வா. கா³மஸஞ்ஞந்தி கா³மோதி பவத்தவஸேன வா கிலேஸவஸேன வா உப்பன்னம் கா³மஸஞ்ஞம். மனுஸ்ஸஸஞ்ஞாயபி ஏஸேவ நயோ. அரஞ்ஞஸஞ்ஞம் படிச்ச மனஸி கரோதி ஏகத்தந்தி இத³ம் அரஞ்ஞம், அயம் ருக்கோ², அயம் பப்³ப³தோ, அயம் நீலோபா⁴ஸோ வனஸண்டோ³தி ஏவம் ஏகம் அரஞ்ஞம்யேவ படிச்ச அரஞ்ஞஸஞ்ஞம் மனஸி கரோதி. பக்க²ந்த³தீதி ஓதரதி. அதி⁴முச்சதீதி ஏவந்தி அதி⁴முச்சதி. யே அஸ்ஸு த³ரதா²தி யே ச பவத்தத³ரதா² வா கிலேஸத³ரதா² வா கா³மஸஞ்ஞம் படிச்ச ப⁴வேய்யும், தே இத⁴ அரஞ்ஞஸஞ்ஞாய ந ஸந்தி. து³தியபதே³பி ஏஸேவ நயோ. அத்தி² சேவாயந்தி அயம் பன ஏகம் அரஞ்ஞஸஞ்ஞம் படிச்ச உப்பஜ்ஜமானா பவத்தத³ரத²மத்தா அத்தி².

யஞ்ஹி கோ² தத்த² ந ஹோதீதி யம் மிகா³ரமாதுபாஸாதே³ ஹத்தி²ஆத³யோ விய இமிஸ்ஸா அரஞ்ஞஸஞ்ஞாய கா³மஸஞ்ஞாமனுஸ்ஸஸஞ்ஞாவஸேன உப்பஜ்ஜமானம் பவத்தத³ரத²கிலேஸத³ரத²ஜாதம், தம் ந ஹோதி. யம் பன தத்த² அவஸிட்ட²ந்தி யம் மிகா³ரமாதுபாஸாதே³ பி⁴க்கு²ஸங்கோ⁴ விய தத்த² அரஞ்ஞஸஞ்ஞாய பவத்தத³ரத²மத்தம் அவஸிட்ட²ம் ஹோதி. தம் ஸந்தமித³ம் அத்தீ²தி பஜானாதீதி தம் விஜ்ஜமானமேவ ‘‘அத்தி² இத³’’ந்தி பஜானாதி, ஸுஞ்ஞதாவக்கந்தீதி ஸுஞ்ஞதானிப்³ப³த்தி.

177. அமனஸிகரித்வா மனுஸ்ஸஸஞ்ஞந்தி இத⁴ கா³மஸஞ்ஞம் ந க³ண்ஹாதி. கஸ்மா? ஏவம் கிரஸ்ஸ அஹோஸி – ‘‘மனுஸ்ஸஸஞ்ஞாய கா³மஸஞ்ஞம் நிவத்தேத்வா, அரஞ்ஞஸஞ்ஞாய மனுஸ்ஸஸஞ்ஞம், பத²வீஸஞ்ஞாய அரஞ்ஞஸஞ்ஞம், ஆகாஸானஞ்சாயதனஸஞ்ஞாய பத²வீஸஞ்ஞம்…பே… நேவஸஞ்ஞானாஸஞ்ஞாயதனஸஞ்ஞாய ஆகிஞ்சஞ்ஞாயதனஸஞ்ஞம், விபஸ்ஸனாய நேவஸஞ்ஞானாஸஞ்ஞாயதனஸஞ்ஞம், மக்³கே³ன விபஸ்ஸனம் நிவத்தேத்வா அனுபுப்³பே³ன அச்சந்தஸுஞ்ஞதம் நாம த³ஸ்ஸேஸ்ஸாமீ’’தி. தஸ்மா ஏவம் தே³ஸனம் ஆரபி⁴. தத்த² பத²வீஸஞ்ஞந்தி கஸ்மா அரஞ்ஞஸஞ்ஞம் பஹாய பத²வீஸஞ்ஞம் மனஸி கரோதி? அரஞ்ஞஸஞ்ஞாய விஸேஸானதி⁴க³மனதோ. யதா² ஹி புரிஸஸ்ஸ ரமணீயம் கே²த்தட்டா²னம் தி³ஸ்வா – ‘‘இத⁴ வுத்தா ஸாலிஆத³யோ ஸுட்டு² ஸம்பஜ்ஜிஸ்ஸந்தி, மஹாலாப⁴ம் லபி⁴ஸ்ஸாமீ’’தி ஸத்தக்க²த்தும்பி கே²த்தட்டா²னம் ஓலோகேந்தஸ்ஸ ஸாலிஆத³யோ ந ஸம்பஜ்ஜந்தேவ, ஸசே பன தம் டா²னம் விஹதகா²ணுககண்டகம் கத்வா கஸித்வா வபதி, ஏவம் ஸந்தே ஸம்பஜ்ஜந்தி, ஏவமேவ – ‘‘இத³ம் அரஞ்ஞம், அயம் ருக்கோ², அயம் பப்³ப³தோ, அயம் நீலோபா⁴ஸோ வனஸண்டோ³’’தி ஸசேபி ஸத்தக்க²த்தும் அரஞ்ஞஸஞ்ஞம் மனஸி கரோதி, நேவூபசாரம் ந ஸமாதி⁴ம் பாபுணாதி, பத²வீஸஞ்ஞாய பனஸ்ஸ து⁴வஸேவனம் கம்மட்டா²னம் பத²வீகஸிணம் பரிகம்மம் கத்வா ஜா²னானி நிப்³ப³த்தேத்வா ஜா²னபத³ட்டா²னம்பி விபஸ்ஸனம் வட்³டே⁴த்வா ஸக்கா அரஹத்தம் பாபுணிதும். தஸ்மா அரஞ்ஞஸஞ்ஞம் பஹாய பத²வீஸஞ்ஞம் மனஸி கரோதி. படிச்சாதி படிச்ச ஸம்பூ⁴தம்.

இதா³னி யஸ்மிம் பத²வீகஸிணே ஸோ பத²வீஸஞ்ஞீ ஹோதி, தஸ்ஸ ஓபம்மத³ஸ்ஸனத்த²ம் ஸேய்யதா²பீதிஆதி³மாஹ. தத்த² உஸப⁴ஸ்ஸ ஏதந்தி ஆஸப⁴ம். அஞ்ஞேஸம் பன கு³ன்னம் க³ண்டா³பி ஹோந்தி பஹாராபி. தேஸஞ்ஹி சம்மம் பஸாரியமானம் நிப்³ப³லிகம் ந ஹோதி, உஸப⁴ஸ்ஸ லக்க²ணஸம்பன்னதாய தே தோ³ஸா நத்தி². தஸ்மா தஸ்ஸ சம்மம் க³ஹிதம். ஸங்குஸதேனாதி கி²லஸதேன. ஸுவிஹதந்தி பஸாரேத்வா ஸுட்டு² விஹதம். ஊனகஸதஸங்குவிஹதஞ்ஹி நிப்³ப³லிகம் ந ஹோதி, ஸங்குஸதேன விஹதம் பே⁴ரிதலம் விய நிப்³ப³லிகம் ஹோதி. தஸ்மா ஏவமாஹ. உக்கூலவிக்கூலந்தி உச்சனீசம் த²லட்டா²னம் நின்னட்டா²னம். நதீ³விது³க்³க³ந்தி நதி³யோ சேவ து³க்³க³மட்டா²னஞ்ச. பத²வீஸஞ்ஞம் படிச்ச மனஸி கரோதி ஏகத்தந்தி கஸிணபத²வியம்யேவ படிச்ச ஸம்பூ⁴தம் ஏகம் ஸஞ்ஞம் மனஸி கரோதி. த³ரத²மத்தாதி இதோ பட்டா²ய ஸப்³ப³வாரேஸு பவத்தத³ரத²வஸேன த³ரத²மத்தா வேதி³தப்³பா³.

182. அனிமித்தம் சேதோஸமாதி⁴ந்தி விபஸ்ஸனாசித்தஸமாதி⁴ம். ஸோ ஹி நிச்சனிமித்தாதி³விரஹிதோ அனிமித்தோதி வுச்சதி. இமமேவ காயந்தி விபஸ்ஸனாய வத்து²ம் த³ஸ்ஸேதி. தத்த² இமமேவாதி இமம் ஏவ சதுமஹாபூ⁴திகம். ஸளாயதனிகந்தி ஸளாயதனபடிஸம்யுத்தம். ஜீவிதபச்சயாதி யாவ ஜீவிதிந்த்³ரியானம் பவத்தி, தாவ ஜீவிதபச்சயா பவத்தத³ரத²மத்தா அத்தீ²தி வுத்தம் ஹோதி.

183. புன அனிமித்தந்தி விபஸ்ஸனாய படிவிபஸ்ஸனம் த³ஸ்ஸேதும் வுத்தம். காமாஸவம் படிச்சாதி காமாஸவம் படிச்ச உப்பஜ்ஜனபவத்தத³ரதா² இத⁴ ந ஸந்தி, அரியமக்³கே³ சேவ அரியப²லே ச நத்தீ²தி வுத்தம் ஹோதி. இமமேவ காயந்தி இமம் உபாதி³ஸேஸத³ரத²த³ஸ்ஸனத்த²ம் வுத்தம். இதி மனுஸ்ஸஸஞ்ஞாய கா³மஸஞ்ஞம் நிவத்தேத்வா…பே… மக்³கே³ன விபஸ்ஸனம் நிவத்தேத்வா அனுபுப்³பே³ன அச்சந்தஸுஞ்ஞதா நாம த³ஸ்ஸிதா ஹோதி.

184. பரிஸுத்³த⁴ந்தி நிருபக்கிலேஸம். அனுத்தரந்தி உத்தரவிரஹிதம் ஸப்³ப³ஸேட்ட²ம். ஸுஞ்ஞதந்தி ஸுஞ்ஞதப²லஸமாபத்திம். தஸ்மாதி யஸ்மா அதீதேபி, பு³த்³த⁴பச்சேகபு³த்³த⁴பு³த்³த⁴ஸாவகஸங்கா²தா ஸமணப்³ராஹ்மணா. அனாக³தேபி, ஏதரஹிபி பு³த்³த⁴பு³த்³த⁴ஸாவகஸங்கா²தா ஸமணப்³ராஹ்மணா இமம்யேவ பரிஸுத்³த⁴ம் பரமம் அனுத்தரம் ஸுஞ்ஞதம் உபஸம்பஜ்ஜ விஹரிம்ஸு விஹரிஸ்ஸந்தி விஹரந்தி ச, தஸ்மா. ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

சூளஸுஞ்ஞதஸுத்தவண்ணனா நிட்டி²தா.