7. மஹாசத்தாரீஸகஸுத்தவண்ணனா

136. ஏவம் மே ஸுதந்தி மஹாசத்தாரீஸகஸுத்தம். தத்த² அரியந்தி நித்³தோ³ஸம் லோகுத்தரம், நித்³தோ³ஸஞ்ஹி ‘‘அரிய’’ந்தி வுச்சதி. ஸம்மாஸமாதி⁴ந்தி மக்³க³ஸமாதி⁴ம். ஸஉபனிஸந்தி ஸபச்சயம். ஸபரிக்கா²ரந்தி ஸபரிவாரம்.

பரிக்க²தாதி பரிவாரிதா. ஸம்மாதி³ட்டி² புப்³ப³ங்க³மா ஹோதீதி த்³விதா⁴ ஸம்மாதி³ட்டி² புப்³ப³ங்க³மா ஹோதி புரேசாரிகா விபஸ்ஸனாஸம்மாதி³ட்டி² ச மக்³க³ஸம்மாதி³ட்டி² ச. விபஸ்ஸனாஸம்மாதி³ட்டி² தேபூ⁴மகஸங்கா²ரே அனிச்சாதி³வஸேன பரிவீமம்ஸதி; மக்³க³ஸம்மாதி³ட்டி² பன பரிவீமம்ஸனபரியோஸானே பூ⁴மிலத்³த⁴ம் வட்டம் ஸமுக்³கா⁴டயமானா வூபஸமயமானா ஸீதுத³கக⁴டஸஹஸ்ஸம் மத்த²கே ஆஸிஞ்சமானா விய உப்பஜ்ஜதி. யதா² ஹி கே²த்தம் குருமானோ கஸ்ஸகோ பட²மம் அரஞ்ஞே ருக்கே² சி²ந்த³தி, பச்சா² அக்³கி³ம் தே³தி, ஸோ அக்³கி³ பட²மம் சி²ன்னே ருக்கே² அனவஸேஸே ஜா²பேதி, ஏவமேவ விபஸ்ஸனாஸம்மாதி³ட்டி² பட²மம் அனிச்சாதி³வஸேன ஸங்கா²ரே வீமம்ஸதி, மக்³க³ஸம்மாதி³ட்டி² தாய வீமம்ஸனத்த²ம் ஸங்கா²ரே புன அப்பவத்திவஸேன ஸமுக்³கா⁴டயமானா உப்பஜ்ஜதி, ஸா து³விதா⁴பி இத⁴ அதி⁴ப்பேதா.

மிச்சா²தி³ட்டீ²தி பஜானாதீதி மிச்சா²தி³ட்டி²ம் அனிச்சம் து³க்க²ம் அனத்தாதி லக்க²ணபடிவேதே⁴ன ஆரம்மணதோ பஜானாதி, ஸம்மாதி³ட்டி²ம் கிச்சதோ அஸம்மோஹதோ பஜானாதி. ஸாஸ்ஸ ஹோதி ஸம்மாதி³ட்டீ²தி ஸா ஏவம் பஜானனா அஸ்ஸ ஸம்மாதி³ட்டி² நாம ஹோதி.

த்³வாயம் வதா³மீதி த்³வயம் வதா³மி, து³வித⁴கோட்டா²ஸம் வதா³மீதி அத்தோ². புஞ்ஞபா⁴கி³யாதி புஞ்ஞகோட்டா²ஸபூ⁴தா. உபதி⁴வேபக்காதி உபதி⁴ஸங்கா²தஸ்ஸ விபாகஸ்ஸ தா³யிகா.

பஞ்ஞா பஞ்ஞிந்த்³ரியந்திஆதீ³ஸு விப⁴ஜித்வா விப⁴ஜித்வா அமதத்³வாரம் பஞ்ஞபேதி த³ஸ்ஸேதீதி பஞ்ஞா. தஸ்மிம் அத்தே² இந்த³த்தம் கரோதீதி பஞ்ஞிந்த்³ரியம். அவிஜ்ஜாய ந கம்பதீதி பஞ்ஞாப³லம். போ³ஜ்ஜ²ங்க³ப்பத்தா ஹுத்வா சதுஸச்சத⁴ம்மே விசினாதீதி த⁴ம்மவிசயஸம்போ³ஜ்ஜ²ங்கோ³. மக்³க³ஸம்பத்தியா பஸட்டா² ஸோப⁴னா தி³ட்டீ²தி ஸம்மாதி³ட்டி². அரியமக்³க³ஸ்ஸ அங்க³ந்தி மக்³க³ங்க³ம். ஸோதி ஸோ பி⁴க்கு². பஹானாயாதி பஜஹனத்தா²ய. உபஸம்பதா³யாதி படிலாப⁴த்தா²ய. ஸம்மாவாயாமோதி நிய்யானிகோ குஸலவாயாமோ. ஸதோதி ஸதியா ஸமன்னாக³தோ ஹுத்வா. அனுபரிதா⁴வந்தி அனுபரிவத்தந்தீதி ஸஹஜாதா ச புரேஜாதா ச ஹுத்வா பரிவாரேந்தி. ஏத்த² ஹி ஸம்மாவாயாமோ ச ஸம்மாஸதி ச லோகுத்தரஸம்மாதி³ட்டி²ம் ஸஹஜாதா பரிவாரேந்தி ராஜானம் விய ஏகரதே² டி²தா அஸிக்³கா³ஹச²த்தக்³கா³ஹா. விபஸ்ஸனாஸம்மாதி³ட்டி² பன புரேஜாதா ஹுத்வா பரிவாரேதி ரத²ஸ்ஸ புரதோ பத்திகாத³யோ விய. து³தியபப்³ப³தோ பட்டா²ய பன ஸம்மாஸங்கப்பாதீ³னம் தயோபி ஸஹஜாதபரிவாராவ ஹோந்தீதி வேதி³தப்³பா³.

137. மிச்சா²ஸங்கப்போதி பஜானாதீதி மிச்சா²ஸங்கப்பம் அனிச்சம் து³க்க²ம் அனத்தாதி லக்க²ணபடிவேதே⁴ன ஆரம்மணதோ பஜானாதி ஸம்மாஸங்கப்பம் கிச்சதோ அஸம்மோஹதோ பஜானாதி. இதோ அபரேஸு ஸம்மாவாசாதீ³ஸுபி ஏவமேவ யோஜனா வேதி³தப்³பா³. காமஸங்கப்பாத³யோ த்³வேதா⁴விதக்கஸுத்தே (ம. நி. 1.206) வுத்தாயேவ.

தக்கோதிஆதீ³ஸு தக்கனவஸேன தக்கோ. ஸ்வேவ ச உபஸக்³கே³ன பத³ம் வட்³டே⁴த்வா விதக்கோதி வுத்தோ, ஸ்வேவ ஸங்கப்பனவஸேன ஸங்கப்போ. ஏகக்³கோ³ ஹுத்வா ஆரம்மணே அப்பேதீதி அப்பனா. உபஸக்³கே³ன பன பத³ம் வட்³டே⁴த்வா ப்³யப்பனாதி வுத்தம். சேதஸோ அபி⁴னிரோபனாதி சித்தஸ்ஸ அபி⁴னிரோபனா. விதக்கஸ்மிஞ்ஹி ஸதி விதக்கோ ஆரம்மணே சித்தம் அபி⁴னிரோபேதி விதக்கே பன அஸதி அத்தனோயேவ த⁴ம்மதாய சித்தம் ஆரம்மணம் அபி⁴ருஹதி ஜாதிஸம்பன்னோ அபி⁴ஞ்ஞாதபுரிஸோ விய ராஜகே³ஹம். அனபி⁴ஞ்ஞாதஸ்ஸ ஹி படிஹாரேன வா தோ³வாரிகேன வா அத்தோ² ஹோதி, அபி⁴ஞ்ஞாதம் ஜாதிஸம்பன்னம் ஸப்³பே³ ராஜராஜமஹாமத்தா ஜானந்தீதி அத்தனோவ த⁴ம்மதாய நிக்க²மதி சேவ பவிஸதி ச, ஏவம்ஸம்பத³மித³ம் வேதி³தப்³ப³ம். வாசம் ஸங்க²ரோதீதி வசீஸங்கா²ரோ. ஏத்த² ச லோகியவிதக்கோ வாசம் ஸங்க²ரோதி, ந லோகுத்தரோ. கிஞ்சாபி ந ஸங்க²ரோதி, வசீஸங்கா²ரோத்வேவ ச பனஸ்ஸ நாமம் ஹோதி. ஸம்மாஸங்கப்பம் அனுபரிதா⁴வந்தீதி லோகுத்தரஸம்மாஸங்கப்பம் பரிவாரேந்தி. ஏத்த² ச தயோபி நேக்க²ம்மஸங்கப்பாத³யோ புப்³ப³பா⁴கே³ நானாசித்தேஸு லப்³ப⁴ந்தி, மக்³க³க்க²ணே பன திண்ணம்பி காமஸங்கப்பாதீ³னஞ்ச பத³ச்சே²த³ம் ஸமுக்³கா⁴தம் கரோந்தோ மக்³க³ங்க³ம் பூரயமானோ ஏகோவ ஸம்மாஸங்கப்போ உப்பஜ்ஜித்வா நேக்க²ம்மஸங்கப்பாதி³வஸேன தீணி நாமானி லப⁴தி. பரதோ ஸம்மாவாசாதீ³ஸுபி ஏஸேவ நயோ.

138. முஸாவாதா³ வேரமணீதிஆதீ³ஸு விரதிபி சேதனாபி வட்டதி. ஆரதீதிஆதீ³ஸு வசீது³ச்சரிதேஹி ஆரகா ரமதீதி ஆரதி. வினா தேஹி ரமதீதி விரதி. ததோ ததோ படினிவத்தாவ ஹுத்வா தேஹி வினா ரமதீதி படிவிரதி. உபஸக்³க³வஸேன வா பத³ம் வட்³டி⁴தம், ஸப்³ப³மித³ம் ஓரமனபா⁴வஸ்ஸேவ அதி⁴வசனம். வேரம் மணதி வினாஸேதீதி வேரமணி. இத³ம்பி ஓரமனஸ்ஸேவ வேவசனம்.

139. பாணாதிபாதா வேரமணீதிஆதீ³ஸுபி சேதனா விரதீதி உப⁴யம்பி வட்டதியேவ.

140. குஹனாதிஆதீ³ஸு திவிதே⁴ன குஹனவத்து²னா லோகம் ஏதாய குஹயந்தி விம்ஹாபயந்தீதி குஹனா. லாப⁴ஸக்காரத்தி²கா ஹுத்வா ஏதாய லபந்தீதி லபனா. நிமித்தம் ஸீலமேதேஸந்தி நேமித்திகா, தேஸம் பா⁴வோ நேமித்திகதா. நிப்பேஸோ ஸீலமேதேஸந்தி நிப்பேஸிகா, தேஸம் பா⁴வோ நிப்பேஸிகதா. லாபே⁴ன லாப⁴ம் நிஜிகீ³ஸந்தி மக்³க³ந்தி பரியேஸந்தீதி லாபே⁴ன லாப⁴ம் நிஜிகீ³ஸனா, தேஸம் பா⁴வோ லாபே⁴ன லாப⁴ம் நிஜிகீ³ஸனதா. அயமேத்த² ஸங்கே²போ, வித்தா²ரேன பனேதா குஹனாதி³கா விஸுத்³தி⁴மக்³கே³ ஸீலனித்³தே³ஸேயேவ பாளிஞ்ச அட்ட²கத²ஞ்ச ஆஹரித்வா பகாஸிதா. மிச்சா²ஆஜீவஸ்ஸ பஹானாயாதி ஏத்த² ந கேவலம் பாளியம் ஆக³தோவ மிச்சா²ஆஜீவோ, ஆஜீவஹேது பன பவத்திதா பாணாதிபாதாத³யோ ஸத்தகம்மபத²சேதனாபி மிச்சா²ஆஜீவோவ. தாஸம்யேவ ஸத்தன்னம் சேதனானம் பத³பச்சே²த³ம் ஸமுக்³கா⁴தம் குருமானம் மக்³க³ங்க³ம் பூரயமானா உப்பன்னா விரதி ஸம்மாஆஜீவோ நாம.

141. ஸம்மாதி³ட்டி²ஸ்ஸாதி மக்³க³ஸம்மாதி³ட்டி²யம் டி²தஸ்ஸ புக்³க³லஸ்ஸ. ஸம்மாஸங்கப்போ பஹோதீதி மக்³க³ஸம்மாஸங்கப்போ பஹோதி, ப²லஸம்மாதி³ட்டி²ஸ்ஸபி ப²லஸம்மாஸங்கப்போ பஹோதீதி ஏவம் ஸப்³ப³பதே³ஸு அத்தோ² வேதி³தப்³போ³. ஸம்மாஞாணஸ்ஸ ஸம்மாவிமுத்தீதி ஏத்த² பன மக்³க³ஸம்மாஸமாதி⁴ம்ஹி டி²தஸ்ஸ மக்³க³பச்சவேக்க²ணம் ஸம்மாஞாணம் பஹோதி, ப²லஸம்மாஸமாதி⁴ம்ஹி டி²தஸ்ஸ ப²லபச்சவேக்க²ணம் ஸம்மாஞாணம் பஹோதி. மக்³க³பச்சவேக்க²ணஸம்மாஞாணே ச டி²தஸ்ஸ மக்³க³ஸம்மாவிமுத்தி பஹோதி, ப²லபச்சவேக்க²ணஸம்மாஞாணே டி²தஸ்ஸ ப²லஸம்மாவிமுத்தி பஹோதீதி அத்தோ². ஏத்த² ச ட²பேத்வா அட்ட² ப²லங்கா³னி ஸம்மாஞாணம் பச்சவேக்க²ணம் கத்வா ஸம்மாவிமுத்திம் ப²லம் காதும் வட்டதீதி வுத்தம்.

142. ஸம்மாதி³ட்டி²ஸ்ஸ, பி⁴க்க²வே, மிச்சா²தி³ட்டி² நிஜ்ஜிண்ணா ஹோதீதிஆதீ³ஸு அவஸேஸனிகாயபா⁴ணகா ப²லம் கதி²தந்தி வத³ந்தி, மஜ்ஜி²மபா⁴ணகா பன த³ஸன்னம் நிஜ்ஜரவத்தூ²னம் ஆக³தட்டா²னே மக்³கோ³ கதி²தோதி வத³ந்தி. தத்த² த³ஸ்ஸனட்டே²ன ஸம்மாதி³ட்டி² வேதி³தப்³பா³, விதி³தகரணட்டே²ன ஸம்மாஞாணம், தத³தி⁴முத்தட்டே²ன ஸம்மாவிமுத்தி.

வீஸதி குஸலபக்கா²தி ஸம்மாதி³ட்டி²ஆத³யோ த³ஸ, ‘‘ஸம்மாதி³ட்டி²பச்சயா ச அனேகே குஸலா த⁴ம்மா’’திஆதி³னா நயேன வுத்தா த³ஸாதி ஏவம் வீஸதி குஸலபக்கா² ஹோந்தி. வீஸதி அகுஸலபக்கா²தி ‘‘மிச்சா²தி³ட்டி² நிஜ்ஜிண்ணா ஹோதீ’’திஆதி³னா நயேன வுத்தா மிச்சா²தி³ட்டி²ஆத³யோ த³ஸ, ‘‘யே ச மிச்சா²தி³ட்டி²பச்சயா அனேகே பாபகா’’திஆதி³னா வுத்தா த³ஸ சாதி ஏவம் வீஸதி அகுஸலபக்கா² வேதி³தப்³பா³. மஹாசத்தாரீஸகோதி மஹாவிபாகதா³னேன மஹந்தானம் குஸலபக்கி²கானஞ்சேவ அகுஸலபக்கி²கானஞ்ச சத்தாரீஸாய த⁴ம்மானம் பகாஸிதத்தா மஹாசத்தாரீஸகோதி.

இமஸ்மிஞ்ச பன ஸுத்தே பஞ்ச ஸம்மாதி³ட்டி²யோ கதி²தா விபஸ்ஸனாஸம்மாதி³ட்டி² கம்மஸ்ஸகதாஸம்மாதி³ட்டி² மக்³க³ஸம்மாதி³ட்டி² ப²லஸம்மாதி³ட்டி² பச்சவேக்க²ணாஸம்மாதி³ட்டீ²தி. தத்த² ‘‘மிச்சா²தி³ட்டி²ம் மிச்சா²தி³ட்டீ²தி பஜானாதீ’’திஆதி³னா நயேன வுத்தா விபஸ்ஸனாஸம்மாதி³ட்டி² நாம. ‘‘அத்தி² தி³ன்ன’’ந்திஆதி³னா நயேன வுத்தா கம்மஸ்ஸகதாஸம்மாதி³ட்டி² நாம. ‘‘ஸம்மாதி³ட்டி²ஸ்ஸ, பி⁴க்க²வே, ஸம்மாஸங்கப்போ பஹோதீ’’தி ஏத்த² பன மக்³க³ஸம்மாதி³ட்டி² ப²லஸம்மாதி³ட்டீ²தி த்³வேபி கதி²தா. ‘‘ஸம்மாஞாணம் பஹோதீ’’தி. ஏத்த² பன பச்சவேக்க²ணாஸம்மாதி³ட்டி² கதி²தாதி வேதி³தப்³பா³.

143. ஸம்மாதி³ட்டி²ம் சே ப⁴வம் க³ரஹதீதி மிச்சா²தி³ட்டி² நாமாயம் ஸோப⁴னாதி வத³ந்தோபி ஸம்மாதி³ட்டி² நாமாயம் ந ஸோப⁴னாதி வத³ந்தோபி ஸம்மாதி³ட்டி²ம் க³ரஹதி நாம. ஓக்கலாதி ஓக்கலஜனபத³வாஸினோ. வஸ்ஸப⁴ஞ்ஞாதி வஸ்ஸோ ச ப⁴ஞ்ஞோ சாதி த்³வே ஜனா. அஹேதுவாதா³தி நத்தி² ஹேது நத்தி² பச்சயோ ஸத்தானம் விஸுத்³தி⁴யாதி ஏவமாதி³வாதி³னோ. அகிரியவாதா³தி கரோதோ ந கரீயதி பாபந்தி ஏவம் கிரியபடிக்கே²பவாதி³னோ. நத்தி²கவாதா³தி நத்தி² தி³ன்னந்திஆதி³வாதி³னோ. தே இமேஸு தீஸுபி த³ஸ்ஸனேஸு ஓக்கந்தனியாமா அஹேஸும். கத²ம் பனேதேஸு நியாமோ ஹோதீதி. யோ ஹி ஏவரூபம் லத்³தி⁴ம் க³ஹேத்வா ரத்திட்டா²னதி³வாட்டா²னே நிஸின்னோ ஸஜ்ஜா²யதி வீமம்ஸதி, தஸ்ஸ ‘‘நத்தி² ஹேது நத்தி² பச்சயோ கரோதோ ந கரீயதி பாபம், நத்தி² தி³ன்னம், காயஸ்ஸ பே⁴தா³ உச்சி²ஜ்ஜதீ’’தி தஸ்மிம் ஆரம்மணே மிச்சா²ஸதி ஸந்திட்ட²தி, சித்தம் ஏகக்³க³ம் ஹோதி, ஜவனானி ஜவந்தி. பட²மஜவனே ஸதேகிச்சோ² ஹோதி, ததா² து³தியாதீ³ஸு. ஸத்தமே பு³த்³தா⁴னம்பி அதேகிச்சோ² அனிவத்தீ அரிட்ட²கண்ட³கஸதி³ஸோ ஹோதி.

தத்த² கோசி ஏகம் த³ஸ்ஸனம் ஓக்கமதி, கோசி த்³வே, கோசி தீணிபி, நியதமிச்சா²தி³ட்டி²கோவ ஹோதி, பத்தோ ஸக்³க³மக்³கா³வரணஞ்சேவ மோக்க²மக்³கா³வரணஞ்ச. அப⁴ப்³போ³ தஸ்ஸ அத்தபா⁴வஸ்ஸ அனந்தரம் ஸக்³க³ம்பி க³ந்தும், பகே³வ மோக்க²ம், வட்டகா²ணு நாமேஸ ஸத்தோ பத²வீகோ³பகோ, யேபு⁴ய்யேன ஏவரூபஸ்ஸ ப⁴வதோ வுட்டா²னம் நத்தி². வஸ்ஸப⁴ஞ்ஞாபி ஏதி³ஸா அஹேஸும். நிந்தா³ப்³யாரோஸஉபாரம்ப⁴ப⁴யாதி அத்தனோ நிந்தா³ப⁴யேன க⁴ட்டனப⁴யேன உபவாத³ப⁴யேன சாதி அத்தோ². ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

மஹாசத்தாரீஸகஸுத்தவண்ணனா நிட்டி²தா.