8. ஆனாபானஸ்ஸதிஸுத்தவண்ணனா

144. ஏவம் மே ஸுதந்தி ஆனாபானஸ்ஸதிஸுத்தம். தத்த² அஞ்ஞேஹி சாதி ட²பேத்வா பாளியம் ஆக³தே த³ஸ தே²ரே அஞ்ஞேஹிபி அபி⁴ஞ்ஞாதேஹி ப³ஹூஹி ஸாவகேஹி ஸத்³தி⁴ம். ததா³ கிர மஹா பி⁴க்கு²ஸங்கோ⁴ அஹோஸி அபரிச்சி²ன்னக³ணனோ.

ஓவத³ந்தி அனுஸாஸந்தீதி ஆமிஸஸங்க³ஹேன த⁴ம்மஸங்க³ஹேன சாதி த்³வீஹி ஸங்க³ஹேஹி ஸங்க³ண்ஹித்வா கம்மட்டா²னோவாதா³னுஸாஸனீஹி ஓவத³ந்தி ச அனுஸாஸந்தி ச. தே சாதி சகாரோ ஆக³மஸந்தி⁴மத்தம். உளாரம் புப்³பே³னாபரம் விஸேஸம் ஜானந்தீதி ஸீலபரிபூரணாதி³தோ புப்³ப³விஸேஸதோ உளாரதரம் அபரம் கஸிணபரிகம்மாதி³விஸேஸம் ஜானந்தீதி அத்தோ².

145. ஆரத்³தோ⁴தி துட்டோ². அப்பத்தஸ்ஸ பத்தியாதி அப்பத்தஸ்ஸ அரஹத்தஸ்ஸ பாபுணனத்த²ம். ஸேஸபத³த்³வயேபி அயமேவ அத்தோ². கோமுதி³ம் சாதுமாஸினிந்தி பச்சி²மகத்திகசாதுமாஸபுண்ணமம். ஸா ஹி குமுதா³னம் அத்தி²தாய கோமுதீ³, சதுன்னம் வஸ்ஸிகானம் மாஸானம் பரியோஸானத்தா சாதுமாஸினீதி வுச்சதி. ஆக³மேஸ்ஸாமீதி உதி³க்கி²ஸ்ஸாமி, அஜ்ஜ அபவாரேத்வா யாவ ஸா ஆக³ச்ச²தி, தாவ கத்த²சி அக³ந்த்வா இதே⁴வ வஸிஸ்ஸாமீதி அத்தோ². இதி பி⁴க்கூ²னம் பவாரணஸங்க³ஹம் அனுஜானந்தோ ஏவமாஹ.

பவாரணஸங்க³ஹோ நாம ஞத்திது³தியேன கம்மேன தி³ய்யதி கஸ்ஸ பனேஸ தி³ய்யதி, கஸ்ஸ ந தி³ய்யதீதி. அகாரகஸ்ஸ தாவ பா³லபுது²ஜ்ஜனஸ்ஸ ந தி³ய்யதி, ததா² ஆரத்³த⁴விபஸ்ஸகஸ்ஸ சேவ அரியஸாவகஸ்ஸ ச. யஸ்ஸ பன ஸமதோ² வா தருணோ ஹோதி விபஸ்ஸனா வா, தஸ்ஸ தி³ய்யதி. ப⁴க³வாபி ததா³ பி⁴க்கூ²னம் சித்தாசாரம் பரிவீமம்ஸந்தோ ஸமத²விபஸ்ஸனானம் தருணபா⁴வம் ஞத்வா – ‘‘மயி அஜ்ஜ பவாரேந்தே தி³ஸாஸு வஸ்ஸம்வுட்டா² பி⁴க்கூ² இத⁴ ஓஸரிஸ்ஸந்தி. ததோ இமே பி⁴க்கூ² வுட்³ட⁴தரேஹி பி⁴க்கூ²ஹி ஸேனாஸனே க³ஹிதே விஸேஸம் நிப்³ப³த்தேதும் ந ஸக்கி²ஸ்ஸந்தி. ஸசேபி சாரிகம் பக்கமிஸ்ஸாமி, இமேஸம் வஸனட்டா²னம் து³ல்லப⁴மேவ ப⁴விஸ்ஸதி. மயி பன அபவாரேந்தே பி⁴க்கூ²பி இமம் ஸாவத்தி²ம் ந ஓஸரிஸ்ஸந்தி, அஹம்பி சாரிகம் ந பக்கமிஸ்ஸாமி, ஏவம் இமேஸம் பி⁴க்கூ²னம் வஸனட்டா²னம் அபலிபு³த்³த⁴ம் ப⁴விஸ்ஸதி. தே அத்தனோ அத்தனோ வஸனட்டா²னே பா²ஸு விஹரந்தா ஸமத²விபஸ்ஸனா தா²மஜாதா கத்வா விஸேஸம் நிப்³ப³த்தேதும் ஸக்கி²ஸ்ஸந்தீ’’தி ஸோ தம்தி³வஸம் அபவாரேத்வா கத்திகபுண்ணமாயம் பவாரேஸ்ஸாமீதி பி⁴க்கூ²னம் பவாரணஸங்க³ஹம் அனுஜானி. பவாரணஸங்க³ஹஸ்மிஞ்ஹி லத்³தே⁴ யஸ்ஸ நிஸ்ஸயபடிபன்னஸ்ஸ ஆசரியுபஜ்ஜா²யா பக்கமந்தி, ஸோபி ‘‘ஸசே பதிரூபோ நிஸ்ஸயதா³யகோ ஆக³மிஸ்ஸதி, தஸ்ஸ ஸந்திகே நிஸ்ஸயம் க³ண்ஹிஸ்ஸாமீ’’தி யாவ கி³ம்ஹானம் பச்சி²மமாஸா வஸிதும் லப⁴தி. ஸசேபி ஸட்டி²வஸ்ஸா பி⁴க்கூ² ஆக³ச்ச²ந்தி, தஸ்ஸ ஸேனாஸனம் க³ஹேதும் ந லப⁴ந்தி. அயஞ்ச பன பவாரணஸங்க³ஹோ ஏகஸ்ஸ தி³ன்னோபி ஸப்³பே³ஸம் தி³ன்னோயேவ ஹோதி.

ஸாவத்தி²ம் ஓஸரந்தீதி ப⁴க³வதா பவாரணஸங்க³ஹோ தி³ன்னோதி ஸுதஸுதட்டா²னேயேவ யதா²ஸபா⁴வேன ஏகம் மாஸம் வஸித்வா கத்திகபுண்ணமாய உபோஸத²ம் கத்வா ஓஸரந்தே ஸந்தா⁴ய இத³ம் வுத்தம். புப்³பே³னாபரந்தி இத⁴ தருணஸமத²விபஸ்ஸனாஸு கம்மம் கத்வா ஸமத²விபஸ்ஸனா தா²மஜாதா அகம்ஸு, அயம் புப்³பே³ விஸேஸோ நாம. ததோ ஸமாஹிதேன சித்தேன ஸங்கா²ரே ஸம்மஸித்வா கேசி ஸோதாபத்திப²லம்…பே… கேசி அரஹத்தம் ஸச்சி²கரிம்ஸு. அயம் அபரோ உளாரோ விஸேஸோ நாம.

146. அலந்தி யுத்தம். யோஜனக³ணனானீதி ஏகம் யோஜனம் யோஜனமேவ, த³ஸபி யோஜனானி யோஜனானேவ, ததோ உத்³த⁴ம் யோஜனக³ணனானீதி வுச்சந்தி. இத⁴ பன யோஜனஸதம்பி யோஜனஸஹஸ்ஸம்பி அதி⁴ப்பேதம். புடோஸேனாபீதி புடோஸம் வுச்சதி பாதே²ய்யம். தம் பாதே²ய்யம் க³ஹேத்வாபி உபஸங்கமிதும் யுத்தமேவாதி அத்தோ². ‘‘புடம்ஸேனா’’திபி பாடோ², தஸ்ஸத்தோ² – புடோ அம்ஸே அஸ்ஸாதி புடம்ஸோ, தேன புடம்ஸேன, அம்ஸே பாதே²ய்யபுடம் வஹந்தேனாபீதி வுத்தம் ஹோதி.

147. இதா³னி ஏவரூபேஹி சரணேஹி ஸமன்னாக³தா ஏத்த² பி⁴க்கூ² அத்தீ²தி த³ஸ்ஸேதும் ஸந்தி, பி⁴க்க²வேதிஆதி³மாஹ. தத்த² சதுன்னம் ஸதிபட்டா²னானந்திஆதீ³னி தேஸம் பி⁴க்கூ²னம் அபி⁴னிவிட்ட²கம்மட்டா²னத³ஸ்ஸனத்த²ம் வுத்தானி. தத்த² ஸத்ததிம்ஸ போ³தி⁴பக்கி²யத⁴ம்மா லோகியலோகுத்தரா கதி²தா. தத்ர ஹி யே பி⁴க்கூ² தஸ்மிம் க²ணே மக்³க³ம் பா⁴வேந்தி, தேஸம் லோகுத்தரா ஹோந்தி. ஆரத்³த⁴விபஸ்ஸகானம் லோகியா. அனிச்சஸஞ்ஞாபா⁴வனானுயோக³ந்தி ஏத்த² ஸஞ்ஞாஸீஸேன விபஸ்ஸனா கதி²தா. யஸ்மா பனேத்த² ஆனாபானகம்மட்டா²னவஸேன அபி⁴னிவிட்டா²வ ப³ஹூ பி⁴க்கூ², தஸ்மா ஸேஸகம்மட்டா²னானி ஸங்கே²பேன கதே²த்வா ஆனாபானகம்மட்டா²னம் வித்தா²ரேன கதே²ந்தோ ஆனாபானஸ்ஸதி, பி⁴க்க²வேதிஆதி³மாஹ. இத³ம் பன ஆனாபானகம்மட்டா²னம் ஸப்³பா³காரேன விஸுத்³தி⁴மக்³கே³ வித்தா²ரிதம், தஸ்மா தத்த² வுத்தனயேனேவஸ்ஸ பாளித்தோ² ச பா⁴வனானயோ ச வேதி³தப்³போ³.

149. காயஞ்ஞதரந்தி பத²வீகாயாதீ³ஸு சதூஸு காயேஸு அஞ்ஞதரம் வதா³மி, வாயோ காயம் வதா³மீதி அத்தோ². அத² வா ரூபாயதனம்…பே… கப³ளீகாரோ ஆஹாரோதி பஞ்சவீஸதி ரூபகோட்டா²ஸா ரூபகாயோ நாம. தேஸு ஆனாபானம் போ²ட்ட²ப்³பா³யதனே ஸங்க³ஹிதத்தா காயஞ்ஞதரம் ஹோதி, தஸ்மாபி ஏவமாஹ. தஸ்மாதிஹாதி யஸ்மா சதூஸு காயேஸு அஞ்ஞதரம் வாயோகாயம், பஞ்சவீஸதிரூபகோட்டா²ஸே வா ரூபகாயே அஞ்ஞதரம் ஆனாபானம் அனுபஸ்ஸதி, தஸ்மா காயே காயானுபஸ்ஸீதி அத்தோ². ஏவம் ஸப்³ப³த்த² அத்தோ² வேதி³தப்³போ³. வேத³னாஞ்ஞதரந்தி தீஸு வேத³னாஸு அஞ்ஞதரம், ஸுக²வேத³னம் ஸந்தா⁴யேதம் வுத்தம். ஸாது⁴கம் மனஸிகாரந்தி பீதிபடிஸம்வேதி³தாதி³வஸேன உப்பன்னம் ஸுந்த³ரமனஸிகாரம். கிம் பன மனஸிகாரோ ஸுக²வேத³னா ஹோதீதி. ந ஹோதி, தே³ஸனாஸீஸம் பனேதம். யதே²வ ஹி ‘‘அனிச்சஸஞ்ஞாபா⁴வனானுயோக³மனுயுத்தா’’தி ஏத்த² ஸஞ்ஞானாமேன பஞ்ஞா வுத்தா, ஏவமிதா⁴பி மனஸிகாரனாமேன வேத³னா வுத்தாதி வேதி³தப்³பா³. ஏதஸ்மிம் சதுக்கே பட²மபதே³ பீதிஸீஸேன வேத³னா வுத்தா, து³தியபதே³ ஸுக²ந்தி ஸரூபேனேவ வுத்தா. சித்தஸங்கா²ரபத³த்³வயே ‘‘ஸஞ்ஞா ச வேத³னா ச சேதஸிகா, ஏதே த⁴ம்மா சித்தபடிப³த்³தா⁴ சித்தஸங்கா²ரா’’தி (படி. ம. 1.174) வசனதோ ‘‘விதக்கவிசாரே ட²பேத்வா ஸப்³பே³பி சித்தஸம்பயுத்தகா த⁴ம்மா சித்தஸங்கா²ரே ஸங்க³ஹிதா’’தி வசனதோ சித்தஸங்கா²ரனாமேன வேத³னா வுத்தா. தம் ஸப்³ப³ம் மனஸிகாரனாமேன ஸங்க³ஹேத்வா இத⁴ ‘‘ஸாது⁴கம் மனஸிகார’’ந்தி ஆஹ.

ஏவம் ஸந்தேபி யஸ்மா ஏஸா வேத³னா ஆரம்மணம் ந ஹோதி, தஸ்மா வேத³னானுபஸ்ஸனா ந யுஜ்ஜதீதி. நோ ந யுஜ்ஜதி, ஸதிபட்டா²னவண்ணனாயம்பி ஹி ‘‘தம்தம்ஸுகா²தீ³னம் வத்து²ம் ஆரம்மணம் கத்வா வேத³னாவ வேத³யதி, தம் பன வேத³னாபவத்திம் உபாதா³ய ‘அஹம் வேத³யாமீ’தி வோஹாரமத்தம் ஹோதீ’’தி வுத்தம். அபிச பீதிபடிஸம்வேதீ³திஆதீ³னம் அத்த²வண்ணனாயமேதஸ்ஸ பரிஹாரோ வுத்தோயேவ. வுத்தஞ்ஹேதம் விஸுத்³தி⁴மக்³கே³ –

‘‘த்³வீஹாகாரேஹி பீதி படிஸம்விதி³தா ஹோதி ஆரம்மணதோ ச அஸம்மோஹதோ ச. கத²ம் ஆரம்மணதோ பீதி படிஸம்விதி³தா ஹோதி? ஸப்பீதிகே த்³வே ஜா²னே ஸமாபஜ்ஜதி, தஸ்ஸ ஸமாபத்திக்க²ணே ஜா²னபடிலாபே⁴ன ஆரம்மணதோ பீதி படிஸம்விதி³தா ஹோதி ஆரம்மணஸ்ஸ படிஸம்விதி³தத்தா. கத²ம் அஸம்மோஹதோ (பீதி படிஸம்விதி³தா ஹோதி)? ஸப்பீதிகே த்³வே ஜா²னே ஸமாபஜ்ஜித்வா வுட்டா²ய ஜா²னஸம்பயுத்தம் பீதிம் க²யதோ வயதோ ஸம்மஸதி, தஸ்ஸ விபஸ்ஸனாக்க²ணே லக்க²ணபடிவேதா⁴ அஸம்மோஹதோ பீதி படிஸம்விதி³தா ஹோதி. வுத்தம்பி சேதம் படிஸம்பி⁴தா³யம் ‘தீ³க⁴ம் அஸ்ஸாஸவஸேன சித்தஸ்ஸ ஏகக்³க³தம் அவிக்கே²பம் பஜானதோ ஸதி உபட்டி²தா ஹோதி, தாய ஸதியா, தேன ஞாணேன ஸா பீதி படிஸம்விதி³தா ஹோதீ’தி. ஏதேனேவ நயேன அவஸேஸபதா³னிபி அத்த²தோ வேதி³தப்³பா³னீ’’தி.

இதி யதே²வ ஜா²னபடிலாபே⁴ன ஆரம்மணதோ பீதிஸுக²சித்தஸங்கா²ரா படிஸம்விதி³தா ஹோந்தி, ஏவம் இமினாபி ஜா²னஸம்பயுத்தேன வேத³னாஸங்கா²தமனஸிகாரபடிலாபே⁴ன ஆரம்மணதோ வேத³னா படிஸம்விதி³தா ஹோதி. தஸ்மா ஸுவுத்தமேதம் ஹோதி ‘‘வேத³னாஸு வேத³னானுபஸ்ஸீ தஸ்மிம் ஸமயே பி⁴க்கு² விஹரதீ’’தி.

நாஹம், பி⁴க்க²வே, முட்ட²ஸ்ஸதிஸ்ஸ அஸம்பஜானஸ்ஸாதி ஏத்த² அயமதி⁴ப்பாயோ – யஸ்மா சித்தபடிஸம்வேதீ³ அஸ்ஸஸிஸ்ஸாமீதிஆதி³னா நயேன பவத்தோ பி⁴க்கு² கிஞ்சாபி அஸ்ஸாஸபஸ்ஸாஸனிமித்தம் ஆரம்மணம் கரோதி, தஸ்ஸ பன சித்தஸ்ஸ ஆரம்மணே ஸதிஞ்ச ஸம்பஜஞ்ஞஞ்ச உபட்ட²பேத்வா பவத்தனதோ சித்தே சித்தானுபஸ்ஸீயேவ நாமேஸ ஹோதி. ந ஹி முட்ட²ஸ்ஸதிஸ்ஸ அஸம்பஜானஸ்ஸ ஆனாபானஸ்ஸதிபா⁴வனா அத்தி². தஸ்மா ஆரம்மணதோ சித்தபடிஸம்விதி³தாதி³வஸேன சித்தே சித்தானுபஸ்ஸீ தஸ்மிம் ஸமயே பி⁴க்கு² விஹரதீதி. ஸோ யம் தம் அபி⁴ஜ்ஜா²தோ³மனஸ்ஸானம் பஹானம், தம் பஞ்ஞாய தி³ஸ்வா ஸாது⁴கம் அஜ்ஜு²பேக்கி²தா ஹோதீதி ஏத்த² அபி⁴ஜ்ஜா²ய காமச்ச²ந்த³னீவரணம், தோ³மனஸ்ஸவஸேன ப்³யாபாத³னீவரணம் த³ஸ்ஸிதம். இத³ஞ்ஹி சதுக்கம் விபஸ்ஸனாவஸேனேவ வுத்தம், த⁴ம்மானுபஸ்ஸனா ச நீவரணபப்³பா³தி³வஸேன ச²ப்³பி³தா⁴ ஹோதி, தஸ்ஸா நீவரணபப்³ப³ம் ஆதி³, தஸ்ஸபி இத³ம் நீவரணத்³வயம் ஆதி³, இதி த⁴ம்மானுபஸ்ஸனாய ஆதி³ம் த³ஸ்ஸேதும் ‘‘அபி⁴ஜ்ஜா²தோ³மனஸ்ஸான’’ந்தி ஆஹ. பஹானந்தி அனிச்சானுபஸ்ஸனாய நிச்சஸஞ்ஞம் பஜஹதீதி ஏவம் பஹானகரஞாணம் அதி⁴ப்பேதம். தம் பஞ்ஞாய தி³ஸ்வாதி தம் அனிச்சவிராக³னிரோத⁴படினிஸ்ஸக்³கா³ஞாணஸங்கா²தம் பஹானஞாணம் அபராய விபஸ்ஸனாபஞ்ஞாய, தம்பி அபராயாதி ஏவம் விபஸ்ஸனாபரம்பரம் த³ஸ்ஸேதி. அஜ்ஜு²பேக்கி²தா ஹோதீதி யஞ்ச ஸமத²படிபன்னம் அஜ்ஜு²பேக்க²தி, யஞ்ச ஏகதோ உபட்டா²னம் அஜ்ஜு²பேக்க²தீதி த்³விதா⁴ அஜ்ஜு²பேக்க²தி நாம. தத்த² ஸஹஜாதானம்பி அஜ்ஜு²பேக்க²னா ஹோதி ஆரம்மணஸ்ஸபி அஜ்ஜு²பேக்க²னா, இத⁴ ஆரம்மணஅஜ்ஜு²பேக்க²னா அதி⁴ப்பேதா. தஸ்மாதிஹ, பி⁴க்க²வேதி யஸ்மா அனிச்சானுபஸ்ஸீ அஸ்ஸஸிஸ்ஸாமீதிஆதி³னா நயேன பவத்தோ ந கேவலம் நீவரணாதி³த⁴ம்மே, அபி⁴ஜ்ஜா²தோ³மனஸ்ஸஸீஸேன பன வுத்தானம் த⁴ம்மானம் பஹானஞாணம்பி பஞ்ஞாய தி³ஸ்வா அஜ்ஜு²பேக்கி²தா ஹோதி, தஸ்மா ‘‘த⁴ம்மேஸு த⁴ம்மானுபஸ்ஸீ தஸ்மிம் ஸமயே பி⁴க்கு² விஹரதீ’’தி வேதி³தப்³போ³.

150. பவிசினதீதி அனிச்சாதி³வஸேன பவிசினதி. இதரம் பத³த்³வயம் ஏதஸ்ஸேவ வேவசனம். நிராமிஸாதி நிக்கிலேஸா. பஸ்ஸம்ப⁴தீதி காயிகசேதஸிகத³ரத²படிப்பஸ்ஸத்³தி⁴யா காயோபி சித்தம்பி பஸ்ஸம்ப⁴தி. ஸமாதி⁴யதீதி ஸம்மா ட²பியதி, அப்பனாபத்தம் விய ஹோதி. அஜ்ஜு²பேக்கி²தா ஹோதீதி ஸஹஜாதஅஜ்ஜு²பேக்க²னாய அஜ்ஜு²பேக்கி²தா ஹோதி.

ஏவம் சுத்³த³ஸவிதே⁴ன காயபரிக்³கா³ஹகஸ்ஸ பி⁴க்கு²னோ தஸ்மிம் காயே ஸதி ஸதிஸம்போ³ஜ்ஜ²ங்கோ³, ஸதியா ஸம்பயுத்தம் ஞாணம் த⁴ம்மவிசயஸம்போ³ஜ்ஜ²ங்கோ³, தம்ஸம்பயுத்தமேவ காயிகசேதஸிகவீரியம் வீரியஸம்போ³ஜ்ஜ²ங்கோ³, பீதி, பஸ்ஸத்³தி⁴, சித்தேகக்³க³தா ஸமாதி⁴ஸம்போ³ஜ்ஜ²ங்கோ³, இமேஸம் ச²ன்னம் ஸம்போ³ஜ்ஜ²ங்கா³னம் அனோஸக்கனஅனதிவத்தனஸங்கா²தோ மஜ்ஜ²த்தாகாரோ உபேக்கா²ஸம்போ³ஜ்ஜ²ங்கோ³. யதே²வ ஹி ஸமப்பவத்தேஸு அஸ்ஸேஸு ஸாரதி²னோ ‘‘அயம் ஓலீயதீ’’தி துத³னம் வா, ‘‘அயம் அதிதா⁴வதீ’’தி ஆகட்³ட⁴னம் வா நத்தி², கேவலம் ஏவம் பஸ்ஸமானஸ்ஸ டி²தாகாரோவ ஹோதி, ஏவமேவ இமேஸம் ச²ன்னம் ஸம்போ³ஜ்ஜ²ங்கா³னம் அனோஸக்கனஅனதிவத்தனஸங்கா²தோ மஜ்ஜ²த்தாகாரோ உபேக்கா²ஸம்போ³ஜ்ஜ²ங்கோ³ நாம ஹோதி. ஏத்தாவதா கிம் கதி²தம்? ஏகசித்தக்க²ணிகா நானாரஸலக்க²ணா விபஸ்ஸனாஸம்போ³ஜ்ஜ²ங்கா³ நாம கதி²தா.

152. விவேகனிஸ்ஸிதந்திஆதீ³னி வுத்தத்தா²னேவ. ஏத்த² பன ஆனாபானபரிக்³கா³ஹிகா ஸதி லோகியா ஹோதி, லோகியா ஆனாபானா லோகியஸதிபட்டா²னம் பரிபூரேந்தி, லோகியா ஸதிபட்டா²னா லோகுத்தரபோ³ஜ்ஜ²ங்கே³ பரிபூரேந்தி, லோகுத்தரா போ³ஜ்ஜ²ங்கா³ விஜ்ஜாவிமுத்திப²லனிப்³பா³னம் பரிபூரேந்தி. இதி லோகியஸ்ஸ ஆக³தட்டா²னே லோகியம் கதி²தம், லோகுத்தரஸ்ஸ ஆக³தட்டா²னே லோகுத்தரம் கதி²தந்தி. தே²ரோ பனாஹ ‘‘அஞ்ஞத்த² ஏவம் ஹோதி, இமஸ்மிம் பன ஸுத்தே லோகுத்தரம் உபரி ஆக³தம், லோகியா ஆனாபானா லோகியஸதிபட்டா²னே பரிபூரேந்தி, லோகியா ஸதிபட்டா²னா லோகியே போ³ஜ்ஜ²ங்கே³ பரிபூரேந்தி, லோகியா போ³ஜ்ஜ²ங்கா³ லோகுத்தரம் விஜ்ஜாவிமுத்திப²லனிப்³பா³னம் பரிபூரேந்தி, விஜ்ஜாவிமுத்திபதே³ன ஹி இத⁴ விஜ்ஜாவிமுத்திப²லனிப்³பா³னம் அதி⁴ப்பேத’’ந்தி.

பபஞ்சஸூத³னியா மஜ்ஜி²மனிகாயட்ட²கதா²ய

ஆனாபானஸ்ஸதிஸுத்தவண்ணனா நிட்டி²தா.