6. இஸிகி³லிஸுத்தவண்ணனா

133. ஏவம் மே ஸுதந்தி இஸிகி³லிஸுத்தம். தத்த² அஞ்ஞாவ ஸமஞ்ஞா அஹோஸீதி இஸிகி³லிஸ்ஸ இஸிகி³லீதி ஸமஞ்ஞாய உப்பன்னகாலே வேபா⁴ரோ ந வேபா⁴ரோதி பஞ்ஞாயித்த², அஞ்ஞாயேவஸ்ஸ ஸமஞ்ஞா அஹோஸி. அஞ்ஞா பஞ்ஞத்தீதி இத³ம் புரிமபத³ஸ்ஸேவ வேவசனம். ஸேஸேஸுபி ஏஸேவ நயோ.

ததா³ கிர ப⁴க³வா ஸாயன்ஹஸமயே ஸமாபத்திதோ வுட்டா²ய க³ந்த⁴குடிதோ நிக்க²மித்வா யஸ்மிம் டா²னே நிஸின்னானம் பஞ்ச பப்³ப³தா பஞ்ஞாயந்தி, தத்த² பி⁴க்கு²ஸங்க⁴பரிவுதோ நிஸீதி³த்வா இமே பஞ்ச பப்³ப³தே படிபாடியா ஆசிக்கி². தத்த² ந ப⁴க³வதோ பப்³ப³தேஹி அத்தோ² அத்தி², இதி இமேஸு பன பப்³ப³தேஸு படிபாடியா கதி²யமானேஸு இஸிகி³லிஸ்ஸ இஸிகி³லிபா⁴வோ கதே²தப்³போ³ ஹோதி. தஸ்மிம் கதி²யமானே பது³மவதியா புத்தானம் பஞ்சஸதானம் பச்சேகபு³த்³தா⁴னம் நாமானி சேவ பது³மவதியா ச பத்த²னா கதே²தப்³பா³ ப⁴விஸ்ஸதீதி ப⁴க³வா இமம் பஞ்ச பப்³ப³தபடிபாடிம் ஆசிக்கி².

பவிஸந்தா தி³ஸ்ஸந்தி பவிட்டா² ந தி³ஸ்ஸந்தீதி யதா²பா²ஸுகட்டா²னே பிண்டா³ய சரித்வா கதப⁴த்தகிச்சா ஆக³ந்த்வா சேதியக³ப்³பே⁴ யமகமஹாத்³வாரம் விவரந்தா விய தம் பப்³ப³தம் த்³வேதா⁴ கத்வா அந்தோ பவிஸித்வா ரத்திட்டா²னதி³வாட்டா²னானி மாபேத்வா தத்த² வஸிம்ஸு, தஸ்மா ஏவமாஹ. இமே இஸீதி இமே பச்சேகபு³த்³த⁴இஸீ.

கதா³ பன தே தத்த² வஸிம்ஸு? அதீதே கிர அனுப்பன்னே ததா²க³தே பா³ராணஸிம் உபனிஸ்ஸாய ஏகஸ்மிம் கா³மகே ஏகா குலதீ⁴தா கே²த்தம் ரக்க²மானா ஏகஸ்ஸ பச்சேகபு³த்³த⁴ஸ்ஸ பஞ்சஹி லாஜாஸதேஹி ஸத்³தி⁴ம் ஏகம் பது³மபுப்ப²ம் த³த்வா பஞ்ச புத்தஸதானி பத்தே²ஸி. தஸ்மிம்யேவ ச க²ணே பஞ்சஸதா மிக³லுத்³த³கா மது⁴ரமம்ஸம் த³த்வா ‘‘ஏதிஸ்ஸா புத்தா ப⁴வேய்யாமா’’தி பத்த²யிம்ஸு. ஸா யாவதாயுகம் ட²த்வா தே³வலோகே நிப்³ப³த்தா, ததோ சுதா ஜாதஸ்ஸரே பது³மக³ப்³பே⁴ நிப்³ப³த்தி. தமேகோ தாபஸோ தி³ஸ்வா படிஜக்³கி³, தஸ்ஸா விசரந்தியாவ பாது³த்³தா⁴ரே பாது³த்³தா⁴ரே பூ⁴மிதோ பது³மானி உட்ட²ஹந்தி. ஏகோ வனசரகோ தி³ஸ்வா பா³ராணஸிரஞ்ஞோ ஆரோசேஸி. ராஜா நம் ஆஹராபேத்வா அக்³க³மஹேஸிம் அகாஸி, தஸ்ஸா க³ப்³போ⁴ ஸண்டா²ஸி. மஹாபது³மகுமாரோ மாதுகுச்சி²யம் வஸி, ஸேஸா க³ப்³ப⁴மலம் நிஸ்ஸா நிப்³ப³த்தா. வயப்பத்தா உய்யானே பது³மஸ்ஸரே கீளந்தா ஏகேகஸ்மிம் பது³மே நிஸீதி³த்வா க²யவயம் பட்ட²பேத்வா பச்சேகபோ³தி⁴ஞாணம் நிப்³ப³த்தயிம்ஸு. அயம் தேஸம் ப்³யாகரணகா³தா² அஹோஸி –

‘‘ஸரோருஹம் பது³மபலாஸபத்தஜம், ஸுபுப்பி²தம் ப⁴மரக³ணானுசிண்ணம்;

அனிச்சதாயுபக³தம் விதி³த்வா, ஏகோ சரே க²க்³க³விஸாணகப்போ’’தி.

தஸ்மிம் காலே தே தத்த² வஸிம்ஸு, ததா³ சஸ்ஸ பப்³ப³தஸ்ஸ இஸிகி³லீதி ஸமஞ்ஞா உத³பாதி³.

135. யே ஸத்தஸாராதி அரிட்டோ² உபரிட்டோ² தக³ரஸிகீ² யஸஸ்ஸீ ஸுத³ஸ்ஸனோ பியத³ஸ்ஸீ க³ந்தா⁴ரோ பிண்டோ³லோ உபாஸபோ⁴ நீதோ ததோ² ஸுதவா பா⁴விதத்தோதி தேரஸன்னம் பச்சேகபு³த்³தா⁴னம் நாமானி வத்வா இதா³னி தேஸஞ்ச அஞ்ஞேஸஞ்ச கா³தா²ப³ந்தே⁴ன நாமானி ஆசிக்க²ந்தோ யே ஸத்தஸாராதிஆதி³மாஹ. தத்த² ஸத்தஸாராதி ஸத்தானம் ஸாரபூ⁴தா. அனீகா⁴தி நித்³து³க்கா². நிராஸாதி நித்தண்ஹா.

த்³வே ஜாலினோதி சூளஜாலி மஹாஜாலீதி த்³வே ஜாலினாமகா. ஸந்தசித்தோதி இத³ம்பி ஏகஸ்ஸ நாமமேவ. பஸ்ஸி ஜஹி உபதி⁴து³க்க²மூலந்தி ஏத்த² பஸ்ஸி நாம ஸோ பச்சேகபு³த்³தோ⁴, து³க்க²ஸ்ஸ பன மூலம் உபதி⁴ம் ஜஹீதி அயமஸ்ஸ து²தி. அபராஜிதோதிபி ஏகஸ்ஸ நாமமேவ.

ஸத்தா² பவத்தா ஸரப⁴ங்கோ³ லோமஹம்ஸோ உச்சங்க³மாயோதி இமே பஞ்ச ஜனா. அஸிதோ அனாஸவோ மனோமயோதி இமேபி தயோ ஜனா. மானச்சி²தோ³ ச ப³ந்து⁴மாதி ப³ந்து⁴மா நாம ஏகோ, மானஸ்ஸ பன சி²ன்னத்தா மானச்சி²தோ³தி வுத்தோ. ததா³தி⁴முத்தோதிபி நாமமேவ.

கேதும்ப⁴ராகோ³ ச மாதங்கோ³ அரியோதி இமே தயோ ஜனா. அத²ச்சுதோதி அத² அச்சுதோ. அச்சுதகா³மப்³யாமங்கோதி இமே த்³வே ஜனா. கே²மாபி⁴ரதோ ச ஸோரதோதி இமே த்³வேயேவ.

ஸய்ஹோ அனோமனிக்கமோதி ஸய்ஹோ நாம ஸோ பு³த்³தோ⁴, அனோமவீரியத்தா பன அனோமனிக்கமோதி வுத்தோ. ஆனந்தோ³ நந்தோ³ உபனந்தோ³ த்³வாத³ஸாதி சத்தாரோ ஆனந்தா³, சத்தாரோ நந்தா³ சத்தாரோ உபனந்தா³தி ஏவம் த்³வாத³ஸ. பா⁴ரத்³வாஜோ அந்திமதே³ஹதா⁴ரீதி பா⁴ரத்³வாஜோ நாம ஸோ பு³த்³தோ⁴. அந்திமதே³ஹதா⁴ரீதி து²தி.

தண்ஹச்சி²தோ³தி ஸிக²ரிஸ்ஸாயம் து²தி. வீதராகோ³தி மங்க³லஸ்ஸ து²தி. உஸப⁴ச்சி²தா³ ஜாலினிம் து³க்க²மூலந்தி உஸபோ⁴ நாம ஸோ பு³த்³தோ⁴ து³க்க²மூலபூ⁴தம் ஜாலினிம் அச்சி²தா³தி அத்தோ². ஸந்தம் பத³ம் அஜ்ஜ²க³மோபனீதோதி உபனீதோ நாம ஸோ பு³த்³தோ⁴ ஸந்தம் பத³ம் அஜ்ஜ²க³மா. வீதராகோ³திபி ஏகஸ்ஸ நாமமேவ. ஸுவிமுத்தசித்தோதி அயம் கண்ஹஸ்ஸ து²தி.

ஏதே ச அஞ்ஞே சாதி ஏதே பாளியம் ஆக³தா ச பாளியம் அனாக³தா அஞ்ஞே ச ஏதேஸம் ஏகனாமகாயேவ. இமேஸு ஹி பஞ்சஸு பச்சேகபு³த்³த⁴ஸதேஸு த்³வேபி தயோபி த³ஸபி த்³வாத³ஸபி ஆனந்தா³த³யோ விய ஏகனாமகா அஹேஸும். இதி பாளியம் ஆக³தனாமேஹேவ ஸப்³பே³ஸம் நாமானி வுத்தானி ஹோந்தீதி இதோ பரம் விஸும் விஸும் அவத்வா ‘‘ஏதே ச அஞ்ஞே சா’’தி ஆஹ. ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

இஸிகி³லிஸுத்தவண்ணனா நிட்டி²தா.