10. ஸங்கா²ருபபத்திஸுத்தவண்ணனா

160. ஏவம் மே ஸுதந்தி ஸங்கா²ருபபத்திஸுத்தம். தத்த² ஸங்கா²ருபபத்திந்தி ஸங்கா²ரானம்யேவ உபபத்திம், ந ஸத்தஸ்ஸ, ந போஸஸ்ஸ, புஞ்ஞாபி⁴ஸங்கா²ரேன வா ப⁴வூபக³க்க²ந்தா⁴னம் உபபத்திம்.

161. ஸத்³தா⁴ய ஸமன்னாக³தோதி ஸத்³தா⁴த³யோ பஞ்ச த⁴ம்மா லோகிகா வட்டந்தி. த³ஹதீதி ட²பேதி. அதி⁴ட்டா²தீதி பதிட்டா²பேதி. ஸங்கா²ரா ச விஹாரா சாதி ஸஹ பத்த²னாய ஸத்³தா⁴த³யோவ பஞ்ச த⁴ம்மா. தத்ருபபத்தியாதி தஸ்மிம் டா²னே நிப்³ப³த்தனத்தா²ய. அயம் மக்³கோ³ அயம் படிபதா³தி ஸஹ பத்த²னாய பஞ்ச த⁴ம்மாவ. யஸ்ஸ ஹி பஞ்ச த⁴ம்மா அத்தி², ந பத்த²னா, தஸ்ஸ க³தி அனிப³த்³தா⁴. யஸ்ஸ பத்த²னா அத்தி², ந பஞ்ச த⁴ம்மா, தஸ்ஸபி அனிப³த்³தா⁴. யேஸம் உப⁴யம் அத்தி², தேஸம் க³தி நிப³த்³தா⁴. யதா² ஹி ஆகாஸே கி²த்தத³ண்டோ³ அக்³கே³ன வா மஜ்ஜே²ன வா மூலேன வா நிபதிஸ்ஸதீதி நியமோ நத்தி², ஏவம் ஸத்தானம் படிஸந்தி⁴க்³க³ஹணம் அனியதம். தஸ்மா குஸலம் கம்மம் கத்வா ஏகஸ்மிம் டா²னே பத்த²னம் காதும் வட்டதி.

165. ஆமண்ட³ந்தி ஆமலகம். யதா² தம் பரிஸுத்³த⁴சக்கு²ஸ்ஸ புரிஸஸ்ஸ ஸப்³ப³ஸோவ பாகடம் ஹோதி, ஏவம் தஸ்ஸ ப்³ரஹ்முனோ ஸத்³தி⁴ம் தத்த² நிப்³ப³த்தஸத்தேஹி ஸஹஸ்ஸீ லோகதா⁴து. ஏஸ நயோ ஸப்³ப³த்த².

167. ஸுபோ⁴தி ஸுந்த³ரோ. ஜாதிமாதி ஆகரஸம்பன்னோ. ஸுபரிகம்மகதோதி தோ⁴வனாதீ³ஹி ஸுட்டு²கதபரிகம்மோ. பண்டு³கம்ப³லே நிக்கி²த்தோதி ரத்தகம்ப³லே ட²பிதோ.

168. ஸதஸஹஸ்ஸோதி லோகதா⁴துஸதஸஹஸ்ஸம்ஹி ஆலோகப²ரணப்³ரஹ்மா. நிக்க²ந்தி நிக்கே²ன கதம் பிளந்த⁴னம், நிக்க²ம் நாம பஞ்சஸுவண்ணம், ஊனகனிக்கே²ன கதம் பஸாத⁴னஞ்ஹி க⁴ட்டனமஜ்ஜனக்க²மம் ந ஹோதி, அதிரேகேன கதம் க⁴ட்டனமஜ்ஜனம் க²மதி, வண்ணவந்தம் பன ந ஹோதி, ப²ருஸதா⁴துகம் கா²யதி. நிக்கே²ன கதம் க⁴ட்டனமஜ்ஜனஞ்சேவ க²மதி, வண்ணவந்தஞ்ச ஹோதி. ஜம்போ³னத³ந்தி ஜம்பு³னதி³யம் நிப்³ப³த்தம். மஹாஜம்பு³ருக்க²ஸ்ஸ ஹி ஏகேகா ஸாகா² பண்ணாஸ பண்ணாஸ யோஜனானி வட்³டி⁴தா, தாஸு மஹந்தா நதி³யோ ஸந்த³ந்தி, தாஸம் நதீ³னம் உப⁴யதீரேஸு ஜம்பு³பக்கானம் பதிதட்டா²னே ஸுவண்ணங்குரா உட்ட²ஹந்தி, தே நதீ³ஜலேன வுய்ஹமானா அனுபுப்³பே³ன மஹாஸமுத்³த³ம் பவிஸந்தி. தம் ஸந்தா⁴ய ஜம்போ³னத³ந்தி வுத்தம். த³க்க²கம்மாரபுத்தஉக்காமுக²ஸுகுஸலஸம்பஹட்ட²ந்தி த³க்கே²ன ஸுகுஸலேன கம்மாரபுத்தேன உக்காமுகே² பசித்வா ஸம்பஹட்ட²ம். உக்காமுகே²தி உத்³த⁴னே. ஸம்பஹட்ட²ந்தி தோ⁴தக⁴ட்டிதமஜ்ஜிதம். வத்தோ²பமே (ம. நி. 1.75-76) ச தா⁴துவிப⁴ங்கே³ (ம. நி. 3.357-360) ச பிண்ட³ஸோத⁴னம் வுத்தம். இமஸ்மிம் ஸுத்தே கதப⁴ண்ட³ஸோத⁴னம் வுத்தம்.

யம் பன ஸப்³ப³வாரேஸு ப²ரித்வா அதி⁴முச்சித்வாதி வுத்தம், தத்த² பஞ்சவித⁴ம் ப²ரணம் சேதோப²ரணம் கஸிணப²ரணம் தி³ப்³ப³சக்கு²ப²ரணம் ஆலோகப²ரணம் ஸரீரப²ரணந்தி. தத்த² சேதோப²ரணம் நாம லோகதா⁴துஸஹஸ்ஸே ஸத்தானம் சித்தஜானனம். கஸிணப²ரணம் நாம லோகதா⁴துஸஹஸ்ஸே கஸிணபத்த²ரணம். தி³ப்³ப³சக்கு²ப²ரணம் நாம ஆலோகம் வட்³டே⁴த்வா தி³ப்³பே³ன சக்கு²னா ஸஹஸ்ஸலோகதா⁴துத³ஸ்ஸனம். ஆலோகப²ரணம்பி ஏததே³வ. ஸரீரப²ரணம் நாம லோகதா⁴துஸஹஸ்ஸே ஸரீரபபா⁴ய பத்த²ரணம். ஸப்³ப³த்த² இமானி பஞ்ச ப²ரணானி அவினாஸேந்தேன கதே²தப்³ப³ந்தி.

திபிடகசூளாப⁴யத்தே²ரோ பனாஹ – ‘‘மணிஓபம்மே கஸிணப²ரணம் விய நிக்கோ²பம்மே ஸரீரப²ரணம் விய தி³ஸ்ஸதீ’’தி. தஸ்ஸ வாத³ம் விய அட்ட²கதா² நாம நத்தீ²தி படிக்கி²த்வா ஸரீரப²ரணம் ந ஸப்³ப³காலிகம், சத்தாரிமானி ப²ரணானி அவினாஸேத்வாவ கதே²தப்³ப³ந்தி வுத்தம். அதி⁴முச்சதீதி பத³ம் ப²ரணபத³ஸ்ஸேவ வேவசனம், அத² வா ப²ரதீதி பத்த²ரதி. அதி⁴முச்சதீதி ஜானாதி.

169. ஆபா⁴திஆதீ³ஸு ஆபா⁴த³யோ நாம பாடியேக்கா தே³வா நத்தி², தயோ பரித்தாபா⁴த³யோ தே³வா ஆபா⁴ நாம, பரித்தாஸுபா⁴த³யோ ச. ஸுப⁴கிண்ஹாத³யோ ச ஸுபா⁴ நாம. வேஹப்ப²லாதி³வாரா பாகடாயேவ.

இமே தாவ பஞ்ச த⁴ம்மே பா⁴வேத்வா காமாவசரேஸு நிப்³ப³த்தது. ப்³ரஹ்மலோகே நிப்³ப³த்தம் பன ஆஸவக்க²யஞ்ச கத²ம் பாபுணாதீதி? இமே பஞ்ச த⁴ம்மா ஸீலம், ஸோ இமஸ்மிம் ஸீலே பதிட்டா²ய கஸிணபரிகம்மம் கத்வா தா தா ஸமாபத்தியோ பா⁴வேத்வா ரூபீப்³ரஹ்மலோகே நிப்³ப³த்ததி, அரூபஜ்ஜா²னானி நிப்³ப³த்தேத்வா அரூபீப்³ரஹ்மலோகே, ஸமாபத்திபத³ட்டா²னம் விபஸ்ஸனம் வட்³டே⁴த்வா அனாகா³மிப²லம் ஸச்சி²கத்வா பஞ்சஸு ஸுத்³தா⁴வாஸேஸு நிப்³ப³த்ததி. உபரிமக்³க³ம் பா⁴வேத்வா ஆஸவக்க²யம் பாபுணாதீதி.

பபஞ்சஸூத³னியா மஜ்ஜி²மனிகாயட்ட²கதா²ய

ஸங்கா²ருபபத்திஸுத்தவண்ணனா நிட்டி²தா.

து³தியவக்³க³வண்ணனா நிட்டி²தா.