6. அங்கு³லிமாலஸுத்தவண்ணனா

347. ஏவம் மே ஸுதந்தி அங்கு³லிமாலஸுத்தம். தத்த² அங்கு³லீனம் மாலம் தா⁴ரேதீதி கஸ்மா தா⁴ரேதி? ஆசரியவசனேன. தத்ராயம் அனுபுப்³பி³கதா² –

அயம் கிர கோஸலரஞ்ஞோ புரோஹிதஸ்ஸ மந்தாணியா நாம ப்³ராஹ்மணியா குச்சி²ஸ்மிம் படிஸந்தி⁴ம் அக்³க³ஹேஸி. ப்³ராஹ்மணியா ரத்திபா⁴கே³ க³ப்³ப⁴வுட்டா²னம் அஹோஸி. தஸ்ஸ மாதுகுச்சி²தோ நிக்க²மனகாலே ஸகலனக³ரே ஆவுதா⁴னி பஜ்ஜலிம்ஸு, ரஞ்ஞோ மங்க³லஸகுந்தோபி ஸிரிஸயனே ட²பிதா அஸிலட்டி²பி பஜ்ஜலி. ப்³ராஹ்மணோ நிக்க²மித்வா நக்க²த்தம் ஓலோகேந்தோ சோரனக்க²த்தேன ஜாதோதி ரஞ்ஞோ ஸந்திகம் க³ந்த்வா ஸுக²ஸேய்யபா⁴வம் புச்சி².

ராஜா ‘‘குதோ, மே ஆசரிய, ஸுக²ஸேய்யா? மய்ஹம் மங்க³லாவுத⁴ம் பஜ்ஜலி, ரஜ்ஜஸ்ஸ வா ஜீவிதஸ்ஸ வா அந்தராயோ ப⁴விஸ்ஸதி மஞ்ஞே’’தி. மா பா⁴யி, மஹாராஜ, மய்ஹம் க⁴ரே குமாரோ ஜாதோ, தஸ்ஸானுபா⁴வேன ந கேவலம் துய்ஹம் நிவேஸனே, ஸகலனக³ரேபி ஆவுதா⁴னி பஜ்ஜலிதானீதி. கிம் ப⁴விஸ்ஸதி ஆசரியாதி? சோரோ ப⁴விஸ்ஸதி மஹாராஜாதி. கிம் ஏகசோரகோ, உதா³ஹு ரஜ்ஜதூ³ஸகோ சோரோதி? ஏகசோரகோ தே³வாதி. ஏவம் வத்வா ச பன ரஞ்ஞோ மனம் க³ண்ஹிதுகாமோ ஆஹ – ‘‘மாரேத² நம் தே³வா’’தி. ஏகசோரகோ ஸமானோ கிம் கரிஸ்ஸதி? கரீஸஸஹஸ்ஸகே²த்தே ஏகஸாலிஸீஸம் விய ஹோதி, படிஜக்³க³த² நந்தி. தஸ்ஸ நாமக்³க³ஹணம் க³ண்ஹந்தா ஸயனே ட²பிதமங்க³லஅஸிலட்டி², ச²த³னே ட²பிதா ஸரா, கப்பாஸபிசும்ஹி ட²பிதம் தாலவண்டகரணஸத்த²கந்தி ஏதே பஜ்ஜலந்தா கிஞ்சி ந ஹிம்ஸிம்ஸு, தஸ்மா அஹிம்ஸகோதி நாமம் அகம்ஸு. தம் ஸிப்புக்³க³ஹணகாலே தக்கஸீலம் பேஸயிம்ஸு.

ஸோ த⁴ம்மந்தேவாஸிகோ ஹுத்வா ஸிப்பம் பட்ட²பேஸி. வத்தஸம்பன்னோ கிம்காரபடிஸ்ஸாவீ மனாபசாரீ பியவாதீ³ அஹோஸி. ஸேஸஅந்தேவாஸிகா பா³ஹிரகா அஹேஸும். தே – ‘‘அஹிம்ஸகமாணவகஸ்ஸ ஆக³தகாலதோ பட்டா²ய மயம் ந பஞ்ஞாயாம, கத²ம் நம் பி⁴ந்தே³ய்யாமா’’தி? நிஸீதி³த்வா மந்தயந்தா – ‘‘ஸப்³பே³ஹி அதிரேகபஞ்ஞத்தா து³ப்பஞ்ஞோதி. ந ஸக்கா வத்தும், வத்தஸம்பன்னத்தா து³ப்³ப³த்தோதி. ந ஸக்கா வத்தும், ஜாதிஸம்பன்னத்தா து³ஜ்ஜாதோதி ந ஸக்கா வத்தும், கிந்தி கரிஸ்ஸாமா’’தி? ததோ ஏகம் க²ரமந்தம் மந்தயிம்ஸு ‘‘ஆசரியஸ்ஸ அந்தரம் கத்வா நம் பி⁴ந்தி³ஸ்ஸாமா’’தி தயோ ராஸீ ஹுத்வா பட²மம் ஏகச்சே ஆசரியம் உபஸங்கமித்வா வந்தி³த்வா அட்ட²ம்ஸு. கிம் தாதாதி? இமஸ்மிம் கே³ஹே ஏகா கதா² ஸுய்யதீதி. கிம் தாதாதி? அஹிம்ஸகமாணவோ தும்ஹாகம் அந்தரே து³ப்³ப⁴தீதி மஞ்ஞாமாதி. ஆசரியோ ஸந்தஜ்ஜேத்வா – ‘‘க³ச்ச²த² வஸலா, மா மே புத்தம் மய்ஹம் அந்தரே பரிபி⁴ந்த³தா²’’தி நிட்டு²பி⁴. ததோ இதரே, அத² இதரேஹி தயோபி கோட்டா²ஸா ஆக³ந்த்வா ததே²வ வத்வா – ‘‘அம்ஹாகம் அஸத்³த³ஹந்தா உபபரிக்கி²த்வா ஜானாதா²’’தி ஆஹம்ஸு.

ஆசரியோ ஸினேஹேன வத³ந்தே தி³ஸ்வா ‘‘அத்தி² மஞ்ஞே ஸந்த²வோ’’தி பரிபி⁴ஜ்ஜித்வா சிந்தேஸி ‘‘கா⁴தேமி ந’’ந்தி. ததோ சிந்தேஸி – ‘‘ஸசே கா⁴தேஸ்ஸாமி ‘தி³ஸாபாமோக்கோ² ஆசரியோ அத்தனோ ஸந்திகம் ஸிப்புக்³க³ஹணத்த²ம் ஆக³தே மாணவகே தோ³ஸம் உப்பாதே³த்வா ஜீவிதா வோரோபேதீ’தி. புன கோசி ஸிப்புக்³க³ஹணத்த²ம் ந ஆக³மிஸ்ஸதி, ஏவம் மே லாபோ⁴ பரிஹாயிஸ்ஸதி, அத² நம் ஸிப்பஸ்ஸ பரியோஸானுபசாரோதி வத்வா ஜங்க⁴ஸஹஸ்ஸம் கா⁴தேஹீதி வக்கா²மி. அவஸ்ஸம் ஏத்த² ஏகோ உட்டா²ய தம் கா⁴தேஸ்ஸதீ’’தி.

அத² நம் ஆஹ – ‘‘ஏஹி தாத ஜங்க⁴ஸஹஸ்ஸம் கா⁴தேஹி, ஏவம் தே ஸிப்பஸ்ஸ உபசாரோ கதோ ப⁴விஸ்ஸதீ’’தி. மயம் அஹிம்ஸககுலே ஜாதா, ந ஸக்கா ஆசரியாதி. அலத்³து⁴பசாரம் ஸிப்பம் ப²லம் ந தே³தி தாதாதி. ஸோ பஞ்சாவுத⁴ம் க³ஹேத்வா ஆசரியம் வந்தி³த்வா அடவிம் பவிட்டோ². அடவிம் பவிஸனட்டா²னேபி அடவிமஜ்ஜே²பி அடவிதோ நிக்க²மனட்டா²னேபி ட²த்வா மனுஸ்ஸே கா⁴தேதி. வத்த²ம் வா வேட²னம் வா ந க³ண்ஹாதி. ஏகோ த்³வேதி க³ணிதமத்தமேவ கரோந்தோ க³ச்ச²தி, க³ணனம்பி ந உக்³க³ண்ஹாதி. பகதியாபி பஞ்ஞவா ஏஸ, பாணாதிபாதினோ பன சித்தம் ந பதிட்டா²தி, தஸ்மா அனுக்கமேன க³ணனம்பி ந ஸல்லக்கே²ஸி, ஏகேகம் அங்கு³லிம் சி²ந்தி³த்வா ட²பேதி. ட²பிதட்டா²னே அங்கு³லியோ வினஸ்ஸந்தி, ததோ விஜ்ஜி²த்வா அங்கு³லீனம் மாலம் கத்வா தா⁴ரேஸி, தேனேவ சஸ்ஸ அங்கு³லிமாலோதி ஸங்கா² உத³பாதி³. ஸோ ஸப்³ப³ம் அரஞ்ஞம் நிஸ்ஸஞ்சாரமகாஸி, தா³ருஆதீ³னம் அத்தா²ய அரஞ்ஞம் க³ந்தும் ஸமத்தோ² நாம நத்தி².

ரத்திபா⁴கே³ அந்தோகா³மம்பி ஆக³ந்த்வா பாதே³ன பஹரித்வா த்³வாரம் உக்³கா⁴தேதி. ததோ ஸயிதேயேவ மாரேத்வா ஏகோ ஏகோதி க³ஹேத்வா க³ச்ச²தி. கா³மோ ஓஸரித்வா நிக³மே அட்டா²ஸி, நிக³மோ நக³ரே. மனுஸ்ஸா தியோஜனதோ பட்டா²ய க⁴ரானி பஹாய தா³ரகே ஹத்தே²ஸு க³ஹேத்வா ஆக³ம்ம ஸாவத்தி²ம் பரிவாரேத்வா க²ந்தா⁴வாரம் ப³ந்தி⁴த்வா ராஜங்க³ணே ஸன்னிபதித்வா – ‘‘சோரோ, தே தே³வ, விஜிதே அங்கு³லிமாலோ நாமா’’திஆதீ³னி வத³ந்தா கந்த³ந்தி. ப⁴க்³க³வோ ‘‘மய்ஹம் புத்தோ ப⁴விஸ்ஸதீ’’தி ஞத்வா ப்³ராஹ்மணிம் ஆஹ – போ⁴தி அங்கு³லிமாலோ நாம சோரோ உப்பன்னோ, ஸோ ந அஞ்ஞோ, தவ புத்தோ அஹிம்ஸககுமாரோ. இதா³னி ராஜா தம் க³ண்ஹிதும் நிக்க²மிஸ்ஸதி, கிம் கத்தப்³ப³ந்தி? க³ச்ச² ஸாமி, புத்தம் மே க³ஹேத்வா ஏஹீதி. நாஹம் ப⁴த்³தே³ உஸ்ஸஹாமி, சதூஸு ஹி ஜனேஸு விஸ்ஸாஸோ நாம நத்தி², சோரோ மே புராணஸஹாயோதி அவிஸ்ஸாஸனீயோ, ஸாகா² மே புராணஸந்த²தாதி அவிஸ்ஸாஸனீயா, ராஜா மம் பூஜேதீதி அவிஸ்ஸாஸனீயோ, இத்தீ² மே வஸம் க³தாதி அவிஸ்ஸாஸனீயாதி. மாது ஹத³யம் பன முது³கம் ஹோதி. தஸ்மா அஹம் பன க³ந்த்வா மய்ஹம் புத்தம் ஆனேஸ்ஸாமீதி நிக்க²ந்தா.

தம்தி³வஸஞ்ச ப⁴க³வா பச்சூஸஸமயே லோகம் வோலோகேந்தோ அங்கு³லிமாலம் தி³ஸ்வா – ‘‘மயி க³தே ஏதஸ்ஸ ஸோத்தி² ப⁴விஸ்ஸதி. அகா³மகே அரஞ்ஞே டி²தோ சதுப்பதி³கம் கா³த²ம் ஸுத்வா மம ஸந்திகே பப்³ப³ஜித்வா ச² அபி⁴ஞ்ஞா ஸச்சி²கரிஸ்ஸதி. ஸசே ந க³மிஸ்ஸாமி, மாதரி அபரஜ்ஜி²த்வா அனுத்³த⁴ரணீயோ ப⁴விஸ்ஸதி, கரிஸ்ஸாமிஸ்ஸ ஸங்க³ஹ’’ந்தி புப்³ப³ண்ஹஸமயம் நிவாஸேத்வா பிண்டா³ய பவிஸித்வா கதப⁴த்தகிச்சோ தம் ஸங்க³ண்ஹிதுகாமோ விஹாரா நிக்க²மி. ஏதமத்த²ம் த³ஸ்ஸேதும் ‘‘அத² கோ² ப⁴க³வா’’திஆதி³ வுத்தம்.

348. ஸங்கரித்வா ஸங்கரித்வாதி ஸங்கேதம் கத்வா வக்³க³வக்³கா³ ஹுத்வா. ஹத்த²த்த²ம் க³ச்ச²ந்தீதி ஹத்தே² அத்த²ம் வினாஸம் க³ச்ச²ந்தி. கிம் பன தே ப⁴க³வந்தம் ஸஞ்ஜானித்வா ஏவம் வத³ந்தி அஸஞ்ஜானித்வாதி? அஸஞ்ஜானித்வா. அஞ்ஞாதகவேஸேன ஹி ப⁴க³வா ஏககோவ அக³மாஸி. சோரோபி தஸ்மிம் ஸமயே தீ³க⁴ரத்தம் து³ப்³போ⁴ஜனேன ச து³க்க²ஸேய்யாய ச உக்கண்டி²தோ ஹோதி. கித்தகா பனானேன மனுஸ்ஸா மாரிதாதி? ஏகேனூனஸஹஸ்ஸம். ஸோ பன இதா³னி ஏகம் லபி⁴த்வா ஸஹஸ்ஸம் பூரேஸ்ஸதீதி ஸஞ்ஞீ ஹுத்வா யமேவ பட²மம் பஸ்ஸாமி, தம் கா⁴தேத்வா க³ணனம் பூரேத்வா ஸிப்பஸ்ஸ உபசாரம் கத்வா கேஸமஸ்ஸும் ஓஹாரேத்வா ந்ஹாயித்வா வத்தா²னி பரிவத்தேத்வா மாதாபிதரோ பஸ்ஸிஸ்ஸாமீதி அடவிமஜ்ஜ²தோ அடவிமுக²ம் ஆக³ந்த்வா ஏகமந்தம் டி²தோவ ப⁴க³வந்தம் அத்³த³ஸ. ஏதமத்த²ம் த³ஸ்ஸேதும் ‘‘அத்³த³ஸா கோ²’’திஆதி³ வுத்தம்.

இத்³தா⁴பி⁴ஸங்கா²ரம் அபி⁴ஸங்கா²ஸீதி மஹாபத²விம் உம்மியோ உட்ட²பேந்தோ விய ஸம்ஹரித்வா அபரபா⁴கே³ அக்கமதி, ஓரபா⁴கே³ வலியோ நிக்க²மந்தி, அங்கு³லிமாலோ ஸரக்கே²பமத்தம் முஞ்சித்வா க³ச்ச²தி. ப⁴க³வா புரதோ மஹந்தம் அங்க³ணம் த³ஸ்ஸேத்வா ஸயம் மஜ்ஜே² ஹோதி, சோரோ அந்தே. ஸோ ‘‘இதா³னி நம் பாபுணித்வா க³ண்ஹிஸ்ஸாமீ’’தி ஸப்³ப³தா²மேன தா⁴வதி. ப⁴க³வா அங்க³ணஸ்ஸ பாரிமந்தே ஹோதி, சோரோ மஜ்ஜே². ஸோ ‘‘ஏத்த² நம் பாபுணித்வா க³ண்ஹிஸ்ஸாமீ’’தி வேகே³ன தா⁴வதி. ப⁴க³வா தஸ்ஸ புரதோ மாதிகம் வா த²லம் வா த³ஸ்ஸேதி, ஏதேனுபாயேன தீணி யோஜனானி க³ஹேத்வா அக³மாஸி. சோரோ கிலமி, முகே² கே²ளோ ஸுஸ்ஸி, கச்சே²ஹி ஸேதா³ முச்சிம்ஸு. அத²ஸ்ஸ ‘‘அச்ச²ரியம் வத போ⁴’’தி ஏதத³ஹோஸி. மிக³ம்பீதி மிக³ம் கஸ்மா க³ண்ஹாதி? சா²தஸமயே ஆஹாரத்த²ம். ஸோ கிர ஏகம் கு³ம்ப³ம் க⁴ட்டேத்வா மிகே³ உட்டா²பேதி. ததோ சித்தருசியம் மிக³ம் அனுப³ந்த⁴ந்தோ க³ண்ஹித்வா பசித்வா கா²த³தி. புச்சே²ய்யந்தி யேன காரணேனாயம் க³ச்ச²ந்தோவ டி²தோ நாம, அஹஞ்ச டி²தோவ அட்டி²தோ நாம, யம்னூனாஹம் இமம் ஸமணம் தம் காரணம் புச்சே²ய்யந்தி அத்தோ².

349. நிதா⁴யாதி யோ விஹிம்ஸனத்த²ம் பூ⁴தேஸு த³ண்டோ³ பவத்தயிதப்³போ³ ஸியா, தம் நிதா⁴ய அபனேத்வா மேத்தாய க²ந்தியா படிஸங்கா²ய அவிஹிம்ஸாய ஸாரணீயத⁴ம்மேஸு ச டி²தோ அஹந்தி அத்தோ². துவமட்டி²தோஸீதி பாணேஸு அஸஞ்ஞதத்தா ஏத்தகானி பாணஸஹஸ்ஸானி கா⁴தேந்தஸ்ஸ தவ மேத்தா வா க²ந்தி வா படிஸங்கா² வா அவிஹிம்ஸா வா ஸாரணீயத⁴ம்மோ வா நத்தி², தஸ்மா துவம் அட்டி²தோஸி, இதா³னி இரியாபதே²ன டி²தோபி நிரயே தா⁴விஸ்ஸஸி, திரச்சா²னயோனியம் பேத்திவிஸயே அஸுரகாயே வா தா⁴விஸ்ஸஸீதி வுத்தம் ஹோதி.

ததோ சோரோ – ‘‘மஹா அயம் ஸீஹனாதோ³, மஹந்தம் க³ஜ்ஜிதம், ந இத³ம் அஞ்ஞஸ்ஸ ப⁴விஸ்ஸதி, மஹாமாயாய புத்தஸ்ஸ ஸித்³த⁴த்த²ஸ்ஸ ஸமணரஞ்ஞோ ஏதம் க³ஜ்ஜிதம், தி³ட்டோ² வதம்ஹி மஞ்ஞே திகி²ணசக்கு²னா ஸம்மாஸம்பு³த்³தே⁴ன, ஸங்க³ஹகரணத்த²ம் மே ப⁴க³வா ஆக³தோ’’தி சிந்தேத்வா சிரஸ்ஸம் வத மேதிஆதி³மாஹ. தத்த² மஹிதோதி தே³வமனுஸ்ஸாதீ³ஹி சதுபச்சயபூஜாய பூஜிதோ. பச்சுபாதீ³தி சிரஸ்ஸம் காலஸ்ஸ அச்சயேன மய்ஹம் ஸங்க³ஹத்தா²ய இமம் மஹாவனம் படிபஜ்ஜி. பஹாய பாபந்தி பஜஹித்வா பாபம்.

இத்வேவாதி ஏவம் வத்வாயேவ. ஆவுத⁴ந்தி பஞ்சாவுத⁴ம். ஸோப்³பே⁴தி ஸமந்ததோ சி²ன்னே. பபாதேதி ஏகதோ சி²ன்னே. நரகேதி ப²லிதட்டா²னே. இத⁴ பன தீஹிபி இமேஹி பதே³ஹி அரஞ்ஞமேவ வுத்தம். அகிரீதி கி²பி ச²ட்³டே³ஸி.

தமேஹி பி⁴க்கூ²தி ததா³ அவோசாதி ப⁴க³வதோ இமம் பப்³பா³ஜேந்தோ குஹிம் ஸத்த²கம் லபி⁴ஸ்ஸாமி, குஹிம் பத்தசீவரந்தி பரியேஸனகிச்சம் நத்தி², கம்மம் பன ஓலோகேஸி. அத²ஸ்ஸ புப்³பே³ ஸீலவந்தானம் அட்ட²பரிக்கா²ரப⁴ண்ட³கஸ்ஸ தி³ன்னபா⁴வம் ஞத்வா த³க்கி²ணஹத்த²ம் பஸாரேத்வா – ‘‘ஏஹி பி⁴க்கு² ஸ்வாக்கா²தோ த⁴ம்மோ, சர ப்³ரஹ்மசரியம் ஸம்மா து³க்க²ஸ்ஸ அந்தகிரியாயா’’தி ஆஹ. ஸோ ஸஹ வசனேனேவ இத்³தி⁴மயபத்தசீவரம் படிலபி⁴. தாவதே³வஸ்ஸ கி³ஹிலிங்க³ம் அந்தரதா⁴யி, ஸமணலிங்க³ம் பாதுரஹோஸி.

‘‘திசீவரஞ்ச பத்தோ ச, வாஸி ஸூசி ச ப³ந்த⁴னம்;

பரிஸ்ஸாவனேன அட்டே²தே, யுத்தயோக³ஸ்ஸ பி⁴க்கு²னோ’’தி. –

ஏவம் வுத்தா அட்ட² பரிக்கா²ரா ஸரீரபடிப³த்³தா⁴வ ஹுத்வா நிப்³ப³த்திம்ஸு. ஏஸேவ தஸ்ஸ அஹு பி⁴க்கு²பா⁴வோதி ஏஸ ஏஹிபி⁴க்கு²பா⁴வோ தஸ்ஸ உபஸம்பன்னபி⁴க்கு²பா⁴வோ அஹோஸி, ந ஹி ஏஹிபி⁴க்கூ²னம் விஸும் உபஸம்பதா³ நாம அத்தி².

350. பச்சா²ஸமணேனாதி ப⁴ண்ட³க்³கா³ஹகேன பச்சா²ஸமணேன, தேனேவ அத்தனோ பத்தசீவரம் கா³ஹாபேத்வா தம் பச்சா²ஸமணம் கத்வா க³தோதி அத்தோ². மாதாபிஸ்ஸ அட்ட²உஸப⁴மத்தேன டா²னேன அந்தரிதா, – ‘‘தாத, அஹிம்ஸக கத்த² டி²தோஸி, கத்த² நிஸின்னோஸி, குஹிம் க³தோஸி? மயா ஸத்³தி⁴ம் ந கதே²ஸி தாதா’’தி வத³ந்தீ ஆஹிண்டி³த்வா அபஸ்ஸமானா ஏத்தோவ க³தா.

பஞ்சமத்தேஹி அஸ்ஸஸதேஹீதி ஸசே சோரஸ்ஸ பராஜயோ ப⁴விஸ்ஸதி, அனுப³ந்தி⁴த்வா நம் க³ண்ஹிஸ்ஸாமி. ஸசே மய்ஹம் பராஜயோ ப⁴விஸ்ஸதி, வேகே³ன பலாயிஸ்ஸாமீதி ஸல்லஹுகேன ப³லேன நிக்க²மி. யேன ஆராமோதி கஸ்மா ஆராமம் அக³மாஸி? ஸோ கிர சோரஸ்ஸ பா⁴யதி, சித்தேன க³ந்துகாமோ ந க³ச்ச²தி, க³ரஹாப⁴யேன நிக்க²மி. தேனஸ்ஸ ஏதத³ஹோஸி – ‘‘ஸம்மாஸம்பு³த்³த⁴ம் வந்தி³த்வா நிஸீதி³ஸ்ஸாமி, ஸோ புச்சி²ஸ்ஸதி ‘கஸ்மா ப³லம் க³ஹேத்வா நிக்க²ந்தோஸீ’தி. அதா²ஹம் ஆரோசேஸ்ஸாமி, ப⁴க³வா ஹி மம் ந கேவலம் ஸம்பராயிகேனேவ அத்தே²ன ஸங்க³ண்ஹாதி, தி³ட்ட²த⁴ம்மிகேனபி ஸங்க³ண்ஹாதியேவ. ஸோ ஸசே மய்ஹம் ஜயோ ப⁴விஸ்ஸதி, அதி⁴வாஸேஸ்ஸதி. ஸசே பராஜயோ ப⁴விஸ்ஸதி ‘கிம் தே, மஹாராஜ, ஏகம் சோரம் ஆரப்³ப⁴ க³மனேனா’தி வக்க²தி. ததோ மம் ஜனோ ஏவம் ஸஞ்ஜானிஸ்ஸதி – ‘ராஜா சோரம் க³ஹேதும் நிக்க²ந்தோ, ஸம்மாஸம்பு³த்³தே⁴ன பன நிவத்திதோ’தி’’ க³ரஹமோக்க²ம் ஸம்பஸ்ஸமானோ அக³மாஸி.

குதோ பனஸ்ஸாதி கஸ்மா ஆஹ? அபி நாம ப⁴க³வா தஸ்ஸ உபனிஸ்ஸயம் ஓலோகேத்வா தம் ஆனேத்வா பப்³பா³ஜேய்யாதி ப⁴க³வதோ பரிக³ண்ஹனத்த²ம் ஆஹ. ரஞ்ஞோதி ந கேவலம் ரஞ்ஞோயேவ ப⁴யம் அஹோஸி, அவஸேஸோபி மஹாஜனோ பீ⁴தோ ப²லகாவுதா⁴னி ச²ட்³டே³த்வா ஸம்முக²ஸம்முக²ட்டா²னேவ பலாயித்வா நக³ரம் பவிஸித்வா த்³வாரம் பிதா⁴ய அட்டாலகே ஆருய்ஹ ஓலோகேந்தோ அட்டா²ஸி. ஏவஞ்ச அவோச – ‘‘அங்கு³லிமாலோ ‘ராஜா மய்ஹம் ஸந்திகம் ஆக³ச்ச²தீ’தி ஞத்வா பட²மதரம் ஆக³ந்த்வா ஜேதவனே நிஸின்னோ, ராஜா தேன க³ஹிதோ, மயம் பன பலாயித்வா முத்தா’’தி. நத்தி² தே இதோ ப⁴யந்தி அயஞ்ஹி இதா³னி குந்த²கிபில்லிகம் ஜீவிதா ந வோரோபேதி, நத்தி² தே இமஸ்ஸ ஸந்திகா ப⁴யந்தி அத்தோ².

கத²ம் கோ³த்தோதி? கஸ்மா புச்ச²தி? பப்³ப³ஜிதம் தா³ருணகம்மேன உப்பன்னனாமம் க³ஹேத்வா வோஹரிதும் ந யுத்தம், மாதாபிதூனம் கோ³த்தவஸேன நம் ஸமுதா³சரிஸ்ஸாமீதி மஞ்ஞமானோ புச்சி². பரிக்கா²ரானந்தி ஏதேஸம் அத்தா²ய அஹம் உஸ்ஸுக்கம் கரிஸ்ஸாமீதி அத்தோ². கதே²ந்தோயேவ ச உத³ரே ப³த்³த⁴ஸாடகம் முஞ்சித்வா தே²ரஸ்ஸ பாத³மூலே ட²பேஸி.

351. ஆரஞ்ஞிகோதிஆதீ³னி சத்தாரி து⁴தங்கா³னி பாளியம் ஆக³தானி. தே²ரேன பன தேரஸபி ஸமாதி³ன்னானேவ அஹேஸும், தஸ்மா அலந்தி ஆஹ. யஞ்ஹி மயம், ப⁴ந்தேதி கிம் ஸந்தா⁴ய வத³தி? ‘‘ஹத்தி²ம்பி தா⁴வந்தம் அனுப³ந்தி⁴த்வா க³ண்ஹாமீ’’தி ஆக³தட்டா²னே ரஞ்ஞா பேஸிதஹத்தா²த³யோ ஸோ ஏவம் அக்³க³ஹேஸி. ராஜாபி – ‘‘ஹத்தீ²ஹியேவ நம் பரிக்கி²பித்வா க³ண்ஹத², அஸ்ஸேஹேவ, ரதே²ஹேவா’’தி ஏவம் அனேகவாரம் ப³ஹூ ஹத்தா²த³யோ பேஸேஸி. ஏவம் க³தேஸு பன தேஸு – ‘‘அஹம் அரே அங்கு³லிமாலோ’’தி தஸ்மிம் உட்டா²ய ஸத்³த³ம் கரோந்தே ஏகோபி ஆவுத⁴ம் பரிவத்தேதும் நாஸக்கி², ஸப்³பே³வ கோட்டேத்வா மாரேஸி. ஹத்தீ² அரஞ்ஞஹத்தீ², அஸ்ஸா அரஞ்ஞஅஸ்ஸா, ரதா²பி தத்தே²வ பி⁴ஜ்ஜந்தீதி இத³ம் ஸந்தா⁴ய ராஜா ஏவம் வத³தி.

பிண்டா³ய பாவிஸீதி ந இத³ம் பட²மம் பாவிஸி. இத்தி²த³ஸ்ஸனதி³வஸம் ஸந்தா⁴ய பனேதம் வுத்தம். தே³வஸிகம்பி பனேஸ பவிஸதேவ, மனுஸ்ஸா ச நம் தி³ஸ்வா உத்தஸந்திபி பலாயந்திபி த்³வாரம்பி த²கேந்தி, ஏகச்சே அங்கு³லிமாலோதி ஸுத்வாவ பலாயித்வா அரஞ்ஞம் வா பவிஸந்தி, க⁴ரம் வா பவிஸித்வா த்³வாரம் த²கேந்தி. பலாயிதும் அஸக்கோந்தா பிட்டி²ம் த³த்வா திட்ட²ந்தி. தே²ரோ உளுங்க³யாகு³ம்பி கடச்சு²பி⁴க்க²ம்பி ந லப⁴தி, பிண்ட³பாதேன கிலமதி. ப³ஹி அலப⁴ந்தோ நக³ரம் ஸப்³ப³ஸாதா⁴ரணந்தி நக³ரம் பவிஸதி. யேன த்³வாரேன பவிஸதி, தத்த² அங்கு³லிமாலோ ஆக³தோதி கூடஸஹஸ்ஸானம் பி⁴ஜ்ஜனகாரணம் ஹோதி. ஏதத³ஹோஸீதி காருஞ்ஞப்பத்தியா அஹோஸி. ஏகேன ஊனமனுஸ்ஸஸஹஸ்ஸம் கா⁴தேந்தஸ்ஸ ஏகதி³வஸம்பி காருஞ்ஞம் நாஹோஸி, க³ப்³ப⁴மூள்ஹாய இத்தி²யா த³ஸ்ஸனமத்தேனேவ கத²ம் உப்பன்னந்தி? பப்³ப³ஜ்ஜாப³லேன, பப்³ப³ஜ்ஜாப³லஞ்ஹி ஏதம்.

தேன ஹீதி யஸ்மா தே காருஞ்ஞம் உப்பன்னம், தஸ்மாதி அத்தோ². அரியாய ஜாதியாதி, அங்கு³லிமால, ஏதம் த்வம் மா க³ண்ஹி, நேஸா தவ ஜாதி. கி³ஹிகாலோ ஏஸ, கி³ஹீ நாம பாணம்பி ஹனந்தி, அதி³ன்னாதா³னாதீ³னிபி கரோந்தி. இதா³னி பன தே அரியா நாம ஜாதி. தஸ்மா த்வம் ‘‘யதோ அஹம், ப⁴கி³னி, ஜாதோ’’தி ஸசே ஏவம் வத்தும் குக்குச்சாயஸி, தேன ஹி ‘‘அரியாய ஜாதியா’’தி ஏவம் விஸேஸேத்வா வதா³ஹீதி உய்யோஜேஸி.

தம் இத்தி²ம் ஏதத³வோசாதி இத்தீ²னம் க³ப்³ப⁴வுட்டா²னட்டா²னம் நாம ந ஸக்கா புரிஸேன உபஸங்கமிதும். தே²ரோ கிம் கரோஸீதி? அங்கு³லிமாலத்தே²ரோ ஸச்சகிரியம் கத்வா ஸோத்தி²கரணத்தா²ய ஆக³தோதி ஆரோசாபேஸி. ததோ தே ஸாணியா பரிக்கி²பித்வா தே²ரஸ்ஸ ப³ஹிஸாணியம் பீட²கம் பஞ்ஞாபேஸும். தே²ரோ தத்த² நிஸீதி³த்வா – ‘‘யதோ அஹம் ப⁴கி³னி ஸப்³ப³ஞ்ஞுபு³த்³த⁴ஸ்ஸ அரியாய ஜாதியா ஜாதோ’’தி ஸச்சகிரியம் அகாஸி, ஸஹ ஸச்சவசனேனேவ த⁴மகரணதோ முத்தஉத³கம் விய தா³ரகோ நிக்க²மி. மாதாபுத்தானம் ஸோத்தி² அஹோஸி. இமஞ்ச பன பரித்தம் ந கிஞ்சி பரிஸ்ஸயம் ந மத்³த³தி, மஹாபரித்தம் நாமேதந்தி வுத்தம். தே²ரேன நிஸீதி³த்வா ஸச்சகிரியகதட்டா²னே பீட²கம் அகம்ஸு. க³ப்³ப⁴மூள்ஹம் திரச்சா²னக³தித்தி²ம்பி ஆனேத்வா தத்த² நிஸஜ்ஜாபேந்தி, தாவதே³வ ஸுகே²ன க³ப்³ப⁴வுட்டா²னம் ஹோதி. யா து³ப்³ப³லா ஹோதி ந ஸக்கா ஆனேதும், தஸ்ஸா பீட²கதோ⁴வனஉத³கம் நேத்வா ஸீஸே ஸிஞ்சந்தி, தங்க²ணம்யேவ க³ப்³ப⁴வுட்டா²னம் ஹோதி, அஞ்ஞம்பி ரோக³ம் வூபஸமேதி. யாவ கப்பா திட்ட²னகபாடிஹாரியம் கிரேதம்.

கிம் பன ப⁴க³வா தே²ரம் வேஜ்ஜகம்மம் காராபேஸீதி? ந காராபேஸி. தே²ரஞ்ஹி தி³ஸ்வா மனுஸ்ஸா பீ⁴தா பலாயந்தி. தே²ரோ பி⁴க்கா²ஹாரேன கிலமதி, ஸமணத⁴ம்மம் காதும் ந ஸக்கோதி. தஸ்ஸ அனுக்³க³ஹேன ஸச்சகிரியம் காரேஸி. ஏவம் கிரஸ்ஸ அஹோஸி – ‘‘இதா³னி கிர அங்கு³லிமாலத்தே²ரோ மேத்தசித்தம் படிலபி⁴த்வா ஸச்சகிரியாய மனுஸ்ஸானம் ஸோத்தி²பா⁴வம் கரோதீதி மனுஸ்ஸா தே²ரம் உபஸங்கமிதப்³ப³ம் மஞ்ஞிஸ்ஸந்தி, ததோ பி⁴க்கா²ஹாரேன அகிலமந்தோ ஸமணத⁴ம்மம் காதும் ஸக்கி²ஸ்ஸதீ’’தி அனுக்³க³ஹேன ஸச்சகிரியம் காரேஸி. ந ஹி ஸச்சகிரியா வேஜ்ஜகம்மம் ஹோதி. தே²ரஸ்ஸாபி ச ‘‘ஸமணத⁴ம்மம் கரிஸ்ஸாமீ’’தி மூலகம்மட்டா²னம் க³ஹேத்வா ரத்திட்டா²னதி³வாட்டா²னே நிஸின்னஸ்ஸ சித்தம் கம்மட்டா²னாபி⁴முக²ம் ந க³ச்ச²தி, அடவியம் ட²த்வா மனுஸ்ஸானம் கா⁴திதட்டா²னமேவ பாகடம் ஹோதி. ‘‘து³க்³க³தோம்ஹி, கு²த்³த³கபுத்தோம்ஹி, ஜீவிதம் மே தே³ஹி ஸாமீதி மரணபீ⁴தானம் வசனாகாரோ ச ஹத்த²பாத³விகாரோ ச ஆபாத²ம் ஆக³ச்ச²தி, ஸோ விப்படிஸாரீ ஹுத்வா ததோவ உட்டா²ய க³ச்ச²தி, அத²ஸ்ஸ ப⁴க³வா தம் ஜாதிம் அப்³போ³ஹாரிகம் கத்வாவாயம் விபஸ்ஸனம் வட்³டே⁴த்வா அரஹத்தம் க³ண்ஹிஸ்ஸதீதி அரியாய ஜாதியா ஸச்சகிரியம் காரேஸி. ஏகோ வூபகட்டோ²திஆதி³ வத்த²ஸுத்தே (ம. நி. 1.80) வித்தா²ரிதம்.

352. அஞ்ஞேனபி லேட்³டு³ கி²த்தோதி காகஸுனக²ஸூகராதீ³னம் படிக்கமாபனத்தா²ய ஸமந்தா ஸரக்கே²பமத்தே டா²னே யேன கேனசி தி³ஸாபா⁴கே³ன கி²த்தோ ஆக³ந்த்வா தே²ரஸ்ஸேவ காயே பததி. கித்தகே டா²னே ஏவம் ஹோதி? க³ண்டி²கம் படிமுஞ்சித்வா பிண்டா³ய சரித்வா படினிவத்தேத்வா யாவ க³ண்டி²கபடிமுக்கட்டா²னம் ஆக³ச்ச²தி, தாவ ஹோதி. பி⁴ன்னேன ஸீஸேனாதி மஹாசம்மம் சி²ந்தி³த்வா யாவ அட்டி²மரியாதா³ பி⁴ன்னேன.

ப்³ராஹ்மணாதி கீ²ணாஸவபா⁴வம் ஸந்தா⁴ய ஆஹ. யஸ்ஸ கோ² த்வம், ப்³ராஹ்மண, கம்மஸ்ஸ விபாகேனாதி இத³ம் ஸபா⁴க³தி³ட்ட²த⁴ம்மவேத³னீயகம்மம் ஸந்தா⁴ய வுத்தம். கம்மஞ்ஹி கரியமானமேவ தயோ கோட்டா²ஸே பூரேதி. ஸத்தஸு சித்தேஸு குஸலா வா அகுஸலா வா பட²மஜவனசேதனா தி³ட்ட²த⁴ம்மவேத³னீயகம்மம் நாம ஹோதி. தம் இமஸ்மிம்யேவ அத்தபா⁴வே விபாகம் தே³தி. ததா² அஸக்கோந்தம் அஹோஸிகம்மம், நாஹோஸி கம்மவிபாகோ, ந ப⁴விஸ்ஸதி கம்மவிபாகோ, நத்தி² கம்மவிபாகோதி இமஸ்ஸ திகஸ்ஸ வஸேன அஹோஸிகம்மம் நாம ஹோதி. அத்த²ஸாதி⁴கா ஸத்தமஜவனசேதனா உபபஜ்ஜவேத³னீயகம்மம் நாம. தம் அனந்தரே அத்தபா⁴வே விபாகம் தே³தி. ததா² அஸக்கோந்தம் வுத்தனயேனேவ தம் அஹோஸிகம்மம் நாம ஹோதி. உபி⁴ன்னமந்தரே பஞ்சஜவனசேதனா அபராபரியவேத³னீயகம்மம் நாம ஹோதி. தம் அனாக³தே யதா³ ஓகாஸம் லப⁴தி, ததா³ விபாகம் தே³தி. ஸதி ஸம்ஸாரப்பவத்தியா அஹோஸிகம்மம் நாம ந ஹோதி. தே²ரஸ்ஸ பன உபபஜ்ஜவேத³னீயஞ்ச அபராபரியவேத³னீயஞ்சாதி இமானி த்³வே கம்மானி கம்மக்க²யகரேன அரஹத்தமக்³கே³ன ஸமுக்³கா⁴டிதானி, தி³ட்ட²த⁴ம்மவேத³னீயம் அத்தி². தம் அரஹத்தப்பத்தஸ்ஸாபி விபாகம் தே³தியேவ. தம் ஸந்தா⁴ய ப⁴க³வா ‘‘யஸ்ஸ கோ² த்வ’’ந்திஆதி³மாஹ. தஸ்மா யஸ்ஸ கோ²தி ஏத்த² யாதி³ஸஸ்ஸ கோ² த்வம், ப்³ராஹ்மண, கம்மஸ்ஸ விபாகேனாதி ஏவம் அத்தோ² வேதி³தப்³போ³.

அப்³பா⁴ முத்தோதி தே³ஸனாஸீஸமத்தமேதம், அப்³பா⁴ மஹிகா தூ⁴மோ ரஜோ ராஹூதி இமேஹி பன உபக்கிலேஸேஹி முத்தோ சந்தி³மா இத⁴ அதி⁴ப்பேதோ. யதா² ஹி ஏவம் நிருபக்கிலேஸோ சந்தி³மா லோகம் பபா⁴ஸேதி, ஏவம் பமாத³கிலேஸவிமுத்தோ அப்பமத்தோ பி⁴க்கு² இமம் அத்தனோ க²ந்தா⁴யதனதா⁴துலோகம் பபா⁴ஸேதி, விஹதகிலேஸந்த⁴காரம் கரோதி.

குஸலேன பிதீ⁴யதீதி மக்³க³குஸலேன பிதீ⁴யதி அப்படிஸந்தி⁴கம் கரீயதி. யுஞ்ஜதி பு³த்³த⁴ஸாஸனேதி பு³த்³த⁴ஸாஸனே காயேன வாசாய மனஸா ச யுத்தப்பயுத்தோ விஹரதி. இமா திஸ்ஸோ தே²ரஸ்ஸ உதா³னகா³தா² நாம.

தி³ஸா ஹி மேதி இத³ம் கிர தே²ரோ அத்தனோ பரித்தாணாகாரம் கரோந்தோ ஆஹ. தத்த² தி³ஸா ஹி மேதி மம ஸபத்தா. யே மம் ஏவம் உபவத³ந்தி – ‘‘யதா² மயம் அங்கு³லிமாலேன மாரிதானம் ஞாதகானம் வஸேன து³க்க²ம் வேதி³யாம, ஏவம் அங்கு³லிமாலோபி வேதி³யதூ’’தி, தே மய்ஹம் தி³ஸா சதுஸச்சத⁴ம்மகத²ம் ஸுணந்தூதி அத்தோ². யுஞ்ஜந்தூதி காயவாசாமனேஹி யுத்தப்பயுத்தா விஹரந்து. யே த⁴ம்மமேவாத³பயந்தி ஸந்தோதி யே ஸந்தோ ஸப்புரிஸா த⁴ம்மம்யேவ ஆத³பேந்தி ஸமாத³பேந்தி க³ண்ஹாபேந்தி, தே மனுஜா மய்ஹம் ஸபத்தா ப⁴ஜந்து ஸேவந்து பயிருபாஸந்தூதி அத்தோ².

அவிரோத⁴ப்பஸம்ஸீனந்தி அவிரோதோ⁴ வுச்சதி மேத்தா, மேத்தாபஸம்ஸகானந்தி அத்தோ². ஸுணந்து த⁴ம்மம் காலேனாதி க²ணே க²ணே க²ந்திமேத்தாபடிஸங்கா²ஸாரணீயத⁴ம்மம் ஸுணந்து. தஞ்ச அனுவிதீ⁴யந்தூதி தஞ்ச த⁴ம்மம் அனுகரோந்து பூரேந்து.

ந ஹி ஜாது ஸோ மமம் ஹிம்ஸேதி யோ மய்ஹம் தி³ஸோ, ஸோ மம் ஏகம்ஸேனேவ ந ஹிம்ஸேய்ய. அஞ்ஞம் வா பன கிஞ்சி நந்தி ந கேவலம் மம், அஞ்ஞம்பி பன கஞ்சி புக்³க³லம் மா ஹிம்ஸந்து மா விஹேடே²ந்து. பப்புய்ய பரமம் ஸந்திந்தி பரமம் ஸந்திபூ⁴தம் நிப்³பா³னம் பாபுணித்வா. ரக்கே²ய்ய தஸதா²வரேதி தஸா வுச்சந்தி ஸதண்ஹா, தா²வரா நித்தண்ஹா. இத³ம் வுத்தம் ஹோதி – யோ நிப்³பா³னம் பாபுணாதி, ஸோ ஸப்³ப³ம் தஸதா²வரம் ரக்கி²தும் ஸமத்தோ² ஹோதி. தஸ்மா மய்ஹம்பி தி³ஸா நிப்³பா³னம் பாபுணந்து, ஏவம் மம் ஏகம்ஸேனேவ ந ஹிம்ஸிஸ்ஸந்தீதி. இமா திஸ்ஸோ கா³தா² அத்தனோ பரித்தம் காதும் ஆஹ.

இதா³னி அத்தனோவ படிபத்திம் தீ³பேந்தோ உத³கஞ்ஹி நயந்தி நேத்திகாதி ஆஹ. தத்த² நேத்திகாதி யே மாதிகம் ஸோதே⁴த்வா ப³ந்தி⁴தப்³ப³ட்டா²னே ப³ந்தி⁴த்வா உத³கம் நயந்தி. உஸுகாராதி உஸுகாரகா. நமயந்தீதி தேலகஞ்ஜிகேன மக்கே²த்வா குக்குளே தாபேத்வா உன்னதுன்னதட்டா²னே நமேந்தா உஜும் கரோந்தி. தேஜனந்தி கண்ட³ம். தஞ்ஹி இஸ்ஸாஸோ தேஜம் கரோதி, பரஞ்ச தஜ்ஜேதி, தஸ்மா தேஜனந்தி வுச்சதி. அத்தானம் த³மயந்தீதி யதா² நேத்திகா உஜுமக்³கே³ன உத³கம் நயந்தி, உஸுகாரா தேஜனம், தச்ச²கா ச தா³ரும் உஜும் கரோந்தி, ஏவமேவம் பண்டி³தா அத்தானம் த³மேந்தி உஜுகம் கரோந்தி நிப்³பி³ஸேவனம் கரோந்தி.

தாதி³னாதி இட்டா²னிட்டா²தீ³ஸு நிப்³பி³காரேன – ‘‘பஞ்சஹாகாரேஹி ப⁴க³வா தாதீ³, இட்டா²னிட்டே² தாதீ³, வந்தாவீதி தாதீ³, சத்தாவீதி தாதீ³, திண்ணாவீதி தாதீ³, தன்னித்³தே³ஸாதி தாதீ³’’தி (மஹானி. 38; 192) ஏவம் தாதி³லக்க²ணப்பத்தேன ஸத்தா²ரா. ப⁴வனேத்தீதி ப⁴வரஜ்ஜு, தண்ஹாயேதம் நாமம். தாய ஹி கோ³ணா விய கீ³வாய ரஜ்ஜுயா, ஸத்தா ஹத³யே ப³த்³தா⁴ தம் தம் ப⁴வம் நீயந்தி, தஸ்மா ப⁴வனேத்தீதி வுச்சதி. பு²ட்டோ² கம்மவிபாகேனாதி மக்³க³சேதனாய பு²ட்டோ². யஸ்மா ஹி மக்³க³சேதனாய கம்மம் பச்சதி விபச்சதி ட³ய்ஹதி, பரிக்க²யம் க³ச்ச²தி, தஸ்மா ஸா கம்மவிபாகோதி வுத்தா. தாய ஹி பு²ட்ட²த்தா ஏஸ அணணோ நிக்கிலேஸோ ஜாதோ, ந து³க்க²வேத³னாய அணணோ. பு⁴ஞ்ஜாமீதி சேத்த² தே²ய்யபரிபோ⁴கோ³ இணபரிபோ⁴கோ³ தா³யஜ்ஜபரிபோ⁴கோ³ ஸாமிபரிபோ⁴கோ³தி சத்தாரோ பரிபோ⁴கா³ வேதி³தப்³பா³. தத்த² து³ஸ்ஸீலஸ்ஸ பரிபோ⁴கோ³ தே²ய்யபரிபோ⁴கோ³ நாம. ஸோ ஹி சத்தாரோ பச்சயே தே²னேத்வா பு⁴ஞ்ஜதி. வுத்தம்பி சேதம் ‘‘தே²ய்யாய வோ, பி⁴க்க²வே, ரட்ட²பிண்டோ³ பு⁴த்தோ’’தி (பாரா. 195). ஸீலவதோ பன அபச்சவேக்க²ணபரிபோ⁴கோ³ இணபரிபோ⁴கோ³ நாம. ஸத்தன்னம் ஸேக்கா²னம் பரிபோ⁴கோ³ தா³யஜ்ஜபரிபோ⁴கோ³ நாம. கீ²ணாஸவஸ்ஸ பரிபோ⁴கோ³ ஸாமிபரிபோ⁴கோ³ நாம. இத⁴ கிலேஸஇணானம் அபா⁴வம் ஸந்தா⁴ய ‘‘அணணோ’’தி வுத்தம். ‘‘அனிணோ’’திபி பாடோ². ஸாமிபரிபோ⁴க³ம் ஸந்தா⁴ய ‘‘பு⁴ஞ்ஜாமி போ⁴ஜன’’ந்தி வுத்தம்.

காமரதிஸந்த²வந்தி து³விதே⁴ஸுபி காமேஸு தண்ஹாரதிஸந்த²வம் மா அனுயுஞ்ஜத² மா கரித்த². நயித³ம் து³ம்மந்திதம் மமாதி யம் மயா ஸம்மாஸம்பு³த்³த⁴ம் தி³ஸ்வா பப்³ப³ஜிஸ்ஸாமீதி மந்திதம், தம் மம மந்திதம் ந து³ம்மந்திதம். ஸம்விப⁴த்தேஸு த⁴ம்மேஸூதி அஹம் ஸத்தா²தி ஏவம் லோகே உப்பன்னேஹி யே த⁴ம்மா ஸம்விப⁴த்தா, தேஸு த⁴ம்மேஸு யம் ஸேட்ட²ம் நிப்³பா³னம், ததே³வ அஹம் உபக³மம் உபக³தோ ஸம்பத்தோ, தஸ்மா மய்ஹம் இத³ம் ஆக³மனம் ஸ்வாக³தம் நாம க³தந்தி. திஸ்ஸோ விஜ்ஜாதி புப்³பே³னிவாஸதி³ப்³ப³சக்கு²ஆஸவக்க²யபஞ்ஞா. கதம் பு³த்³த⁴ஸ்ஸ ஸாஸனந்தி யம் பு³த்³த⁴ஸ்ஸ ஸாஸனே கத்தப்³ப³கிச்சம் அத்தி², தம் ஸப்³ப³ம் மயா கதம். தீஹி விஜ்ஜாஹி நவஹி ச லோகுத்தரத⁴ம்மேஹி தே³ஸனம் மத்த²கம் பாபேஸீதி.

பபஞ்சஸூத³னியா மஜ்ஜி²மனிகாயட்ட²கதா²ய

அங்கு³லிமாலஸுத்தவண்ணனா நிட்டி²தா.