4. ராஜவக்³கோ³

1. க⁴டிகாரஸுத்தவண்ணனா

282. ஏவம் மே ஸுதந்தி க⁴டிகாரஸுத்தம். தத்த² ஸிதம் பாத்வாகாஸீதி மஹாமக்³கே³ன க³ச்ச²ந்தோ அஞ்ஞதரம் பூ⁴மிப்பதே³ஸம் ஓலோகேத்வா – ‘‘அத்தி² நு கோ² மயா சரியம் சரமானேன இமஸ்மிம் டா²னே நிவுத்த²புப்³ப³’’ந்தி ஆவஜ்ஜந்தோ அத்³த³ஸ – ‘‘கஸ்ஸபபு³த்³த⁴காலே இமஸ்மிம் டா²னே வேக³ளிங்க³ம் நாம கா³மனிக³மோ அஹோஸி, அஹம் ததா³ ஜோதிபாலோ நாம மாணவோ அஹோஸிம், மய்ஹம் ஸஹாயோ க⁴டிகாரோ நாம கும்ப⁴காரோ அஹோஸி, தேன ஸத்³தி⁴ம் மயா இத⁴ ஏகம் ஸுகாரணம் கதம், தம் பி⁴க்கு²ஸங்க⁴ஸ்ஸ அபாகடம் படிச்ச²ன்னம், ஹந்த³ நம் பி⁴க்கு²ஸங்க⁴ஸ்ஸ பாகடம் கரோமீ’’தி மக்³கா³ ஓக்கம்ம அஞ்ஞதரஸ்மிம் பதே³ஸே டி²தகோவ ஸிதபாதுகம்மமகாஸி, அக்³க³க்³க³த³ந்தே த³ஸ்ஸேத்வா மந்த³ஹஸிதம் ஹஸி. யதா² ஹி லோகியமனுஸ்ஸா உரம் பஹரந்தா – ‘‘குஹம் குஹ’’ந்தி ஹஸந்தி, ந ஏவம் பு³த்³தா⁴, பு³த்³தா⁴னம் பன ஹஸிதம் ஹட்ட²பஹட்டா²காரமத்தமேவ ஹோதி.

ஹஸிதஞ்ச நாமேதம் தேரஸஹி ஸோமனஸ்ஸஸஹக³தசித்தேஹி ஹோதி. தத்த² லோகியமஹாஜனோ அகுஸலதோ சதூஹி, காமாவசரகுஸலதோ சதூஹீதி அட்ட²ஹி சித்தேஹி ஹஸதி, ஸேக்கா² அகுஸலதோ தி³ட்டி²ஸம்பயுத்தானி த்³வே அபனேத்வா ச²ஹி சித்தேஹி ஹஸந்தி, கீ²ணாஸவா சதூஹி ஸஹேதுககிரியசித்தேஹி ஏகேன அஹேதுககிரியசித்தேனாதி பஞ்சஹி சித்தேஹி ஹஸந்தி. தேஸுபி ப³லவாரம்மணே ஆபாத²க³தே த்³வீஹி ஞாணஸம்பயுத்தசித்தேஹி ஹஸந்தி, து³ப்³ப³லாரம்மணே து³ஹேதுகசித்தத்³வயேன ச அஹேதுகசித்தேன சாதி தீஹி சித்தேஹி ஹஸந்தி. இமஸ்மிம் பன டா²னே கிரியாஹேதுகமனோவிஞ்ஞாணதா⁴துஸோமனஸ்ஸஸஹக³தசித்தம் ப⁴க³வதோ ஹட்ட²பஹட்டா²காரமத்தம் ஹஸிதம் உப்பாதே³ஸி.

தம் பனேதம் ஹஸிதம் ஏவம் அப்பமத்தகம்பி தே²ரஸ்ஸ பாகடம் அஹோஸி. கத²ம்? ததா²ரூபே ஹி காலே ததா²க³தஸ்ஸ சதூஹி தா³டா²ஹி சதுத்³தீ³பிகமஹாமேக⁴முக²தோ ஸதேரதாவிஜ்ஜுலதா விய விரோசமானா மஹாதாலக்க²ந்த⁴பமாணா ரஸ்மிவட்டியோ உட்ட²ஹித்வா திக்க²த்தும் ஸீஸவரம் பத³க்கி²ணம் கத்வா தா³ட²க்³கே³ஸுயேவ அந்தரதா⁴யந்தி. தேன ஸஞ்ஞாணேன ஆயஸ்மா ஆனந்தோ³ ப⁴க³வதோ பச்ச²தோ க³ச்ச²மானோபி ஸிதபாதுபா⁴வம் ஜானாதி.

ப⁴க³வந்தம் ஏதத³வோசாதி – ‘‘ஏத்த² கிர கஸ்ஸபோ ப⁴க³வா பி⁴க்கு²ஸங்க⁴ம் ஓவதி³, சதுஸச்சப்பகாஸனம் அகாஸி, ப⁴க³வதோபி ஏத்த² நிஸீதி³தும் ருசிம் உப்பாதே³ஸ்ஸாமி, ஏவமயம் பூ⁴மிபா⁴கோ³ த்³வீஹி பு³த்³தே⁴ஹி பரிபு⁴த்தோ ப⁴விஸ்ஸதி, மஹாஜனோ க³ந்த⁴மாலாதீ³ஹி பூஜேத்வா சேதியட்டா²னம் கத்வா பரிசரந்தோ ஸக்³க³மக்³க³பராயணோ ப⁴விஸ்ஸதீ’’தி சிந்தேத்வா ஏதம் ‘‘தேன ஹி, ப⁴ந்தே,’’திஆதி³வசனம் அவோச.

283. முண்ட³கேன ஸமணகேனாதி முண்ட³ம் முண்டோ³தி, ஸமணம் வா ஸமணோதி வத்தும் வட்டதி, அயம் பன அபரிபக்கஞாணத்தா ப்³ராஹ்மணகுலே உக்³க³ஹிதவோஹாரவஸேனேவ ஹீளேந்தோ ஏவமாஹ. ஸோத்திஸினானிந்தி ஸினானத்தா²ய கதஸோத்திம். ஸோத்தி நாம குருவிந்த³பாஸாணசுண்ணானி லாகா²ய ப³ந்தி⁴த்வா கதகு³ளிககலாபகா வுச்சதி, யம் ஸந்தா⁴ய – ‘‘தேன கோ² பன ஸமயேன ச²ப்³ப³க்³கி³யா பி⁴க்கூ² குருவிந்த³கஸுத்தியா நஹாயந்தீ’’தி (சூளவ. 243) வுத்தம். தம் உபோ⁴ஸு அந்தேஸு க³ஹேத்வா ஸரீரம் க⁴ம்ஸந்தி. ஏவம் ஸம்மாதி யதா² ஏதரஹிபி மனுஸ்ஸா ‘‘சேதியவந்த³னாய க³ச்சா²ம, த⁴ம்மஸ்ஸவனத்தா²ய க³ச்சா²மா’’தி வுத்தா உஸ்ஸாஹம் ந கரோந்தி, ‘‘நடஸமஜ்ஜாதி³த³ஸ்ஸனத்தா²ய க³ச்சா²மா’’தி வுத்தா பன ஏகவசனேனேவ ஸம்படிச்ச²ந்தி, ததே²வ ஸின்ஹாயிதுந்தி வுத்தே ஏகவசனேன ஸம்படிச்ச²ந்தோ ஏவமாஹ.

284. ஜோதிபாலம் மாணவம் ஆமந்தேஸீதி ஏகபஸ்ஸே அரியபரிஹாரேன பட²மதரம் ந்ஹாயித்வா பச்சுத்தரித்வா டி²தோ தஸ்ஸ மஹந்தேன இஸ்ஸரியபரிஹாரேன ந்ஹாயந்தஸ்ஸ ந்ஹானபரியோஸானம் ஆக³மேத்வா தம் நிவத்த²னிவாஸனம் கேஸே வோத³கே குருமானம் ஆமந்தேஸி. அயந்தி ஆஸன்னத்தா த³ஸ்ஸேந்தோ ஆஹ. ஓவட்டிகம் வினிவட்டே²த்வாதி நாக³ப³லோ போ³தி⁴ஸத்தோ ‘‘அபேஹி ஸம்மா’’தி ஈஸகம் பரிவத்தமானோவ தேன க³ஹிதக³ஹணம் விஸ்ஸஜ்ஜாபேத்வாதி அத்தோ². கேஸேஸு பராமஸித்வா ஏதத³வோசாதி ஸோ கிர சிந்தேஸி – ‘‘அயம் ஜோதிபாலோ பஞ்ஞவா, ஸகிம் த³ஸ்ஸனம் லப⁴மானோ ததா²க³தஸ்ஸ த³ஸ்ஸனேபி பஸீதி³ஸ்ஸதி, த⁴ம்மகதா²யபி பஸீதி³ஸ்ஸதி, பஸன்னோ ச பஸன்னாகாரம் காதும் ஸக்கி²ஸ்ஸதி, மித்தா நாம ஏதத³த்த²ம் ஹோந்தி, யம்கிஞ்சி கத்வா மம ஸஹாயம் க³ஹேத்வா த³ஸப³லஸ்ஸ ஸந்திகம் க³மிஸ்ஸாமீ’’தி. தஸ்மா நம் கேஸேஸு பராமஸித்வா ஏதத³வோச.

இத்தரஜச்சோதி அஞ்ஞஜாதிகோ, மயா ஸத்³தி⁴ம் அஸமானஜாதிகோ, லாமகஜாதிகோதி அத்தோ². ந வதித³ந்தி இத³ம் அம்ஹாகம் க³மனம் ந வத ஓரகம் ப⁴விஸ்ஸதி ந கு²த்³த³கம், மஹந்தம் ப⁴விஸ்ஸதி. அயஞ்ஹி ந அத்தனோ தா²மேன க³ண்ஹி, ஸத்து² தா²மேன க³ண்ஹீதி க³ஹணஸ்மிம்யேவ நிட்ட²ம் அக³மாஸி. யாவதாதோ³ஹிபீதி ஏத்த² தோ³காரஹிகாரபிகாரா நிபாதா, யாவதுபரிமந்தி அத்தோ². இத³ம் வுத்தம் ஹோதி – ‘‘வாசாய ஆலபனம் ஓவட்டிகாய க³ஹணஞ்ச அதிக்கமித்வா யாவ கேஸக்³க³ஹணம்பி தத்த² க³மனத்த²ம் பயோகோ³ கத்தப்³போ³’’தி.

285. த⁴ம்மியா கதா²யாதி இத⁴ ஸதிபடிலாப⁴த்தா²ய புப்³பே³னிவாஸபடிஸம்யுத்தா த⁴ம்மீ கதா² வேதி³தப்³பா³. தஸ்ஸ ஹி ப⁴க³வா, – ‘‘ஜோதிபால, த்வம் ந லாமகட்டா²னம் ஓதிண்ணஸத்தோ, மஹாபோ³தி⁴பல்லங்கே பன ஸப்³ப³ஞ்ஞுதஞ்ஞாணம் பத்தே²த்வா ஓதிண்ணோஸி, தாதி³ஸஸ்ஸ நாம பமாத³விஹாரோ ந யுத்தோ’’திஆதி³னா நயேன ஸதிபடிலாபா⁴ய த⁴ம்மம் கதே²ஸி. பரஸமுத்³த³வாஸீதே²ரா பன வத³ந்தி – ‘‘ஜோதிபால, யதா² அஹம் த³ஸபாரமியோ பூரேத்வா ஸப்³ப³ஞ்ஞுதஞ்ஞாணம் படிவிஜ்ஜி²த்வா வீஸதிஸஹஸ்ஸபி⁴க்கு²பரிவாரோ லோகே விசராமி, ஏவமேவம் த்வம்பி த³ஸபாரமியோ பூரேத்வா ஸப்³ப³ஞ்ஞுதஞ்ஞாணம் படிவிஜ்ஜி²த்வா ஸமணக³ணபரிவாரோ லோகே விசரிஸ்ஸஸி. ஏவரூபேன நாம தயா பமாத³ம் ஆபஜ்ஜிதும் ந யுத்த’’ந்தி யதா²ஸ்ஸ பப்³ப³ஜ்ஜாய சித்தம் நமதி, ஏவம் காமேஸு ஆதீ³னவம் நேக்க²ம்மே ச ஆனிஸம்ஸம் கதே²ஸீதி.

286. அலத்த² கோ², ஆனந்த³,…பே… பப்³ப³ஜ்ஜம் அலத்த² உபஸம்பத³ந்தி பப்³ப³ஜித்வா கிமகாஸி? யம் போ³தி⁴ஸத்தேஹி கத்தப்³ப³ம். போ³தி⁴ஸத்தா ஹி பு³த்³தா⁴னம் ஸம்முகே² பப்³ப³ஜந்தி. பப்³ப³ஜித்வா ச பன இத்தரஸத்தா விய பதிதஸிங்கா³ ந ஹோந்தி, சதுபாரிஸுத்³தி⁴ஸீலே பன ஸுபதிட்டா²ய தேபிடகம் பு³த்³த⁴வசனம் உக்³க³ண்ஹித்வா தேரஸ து⁴தங்கா³னி ஸமாதா³ய அரஞ்ஞம் பவிஸித்வா க³தபச்சாக³தவத்தம் பூரயமானா ஸமணத⁴ம்மம் கரோந்தா விபஸ்ஸனம் வட்³டே⁴த்வா யாவ அனுலோமஞாணம் ஆஹச்ச திட்ட²ந்தி, மக்³க³ப²லத்த²ம் வாயாமம் ந கரோந்தி. ஜோதிபாலோபி ததே²வ அகாஸி.

287. அட்³ட⁴மாஸுபஸம்பன்னேதி குலதா³ரகஞ்ஹி பப்³பா³ஜேத்வா அட்³ட⁴மாஸம்பி அவஸித்வா க³தே மாதாபிதூனம் ஸோகோ ந வூபஸம்மதி, ஸோபி பத்தசீவரக்³க³ஹணம் ந ஜானாதி, த³ஹரபி⁴க்கு²ஸாமணேரேஹி ஸத்³தி⁴ம் விஸ்ஸாஸோ ந உப்பஜ்ஜதி, தே²ரேஹி ஸத்³தி⁴ம் ஸினேஹோ ந பதிட்டா²தி, க³தக³தட்டா²னே அனபி⁴ரதி உப்பஜ்ஜதி. ஏத்தகம் பன காலம் நிவாஸே ஸதி மாதாபிதரோ பஸ்ஸிதும் லப⁴ந்தி. தேன தேஸம் ஸோகோ தனுபா⁴வம் க³ச்ச²தி, பத்தசீவரக்³க³ஹணம் ஜானாதி, ஸாமணேரத³ஹரபி⁴க்கூ²ஹி ஸத்³தி⁴ம் விஸ்ஸாஸோ ஜாயதி, தே²ரேஹி ஸத்³தி⁴ம் ஸினேஹோ பதிட்டா²தி, க³தக³தட்டா²னே அபி⁴ரமதி, ந உக்கண்ட²தி. தஸ்மா ஏத்தகம் வஸிதும் வட்டதீதி அட்³ட⁴மாஸம் வஸித்வா பக்காமி.

பண்டு³புடகஸ்ஸ ஸாலினோதி புடகே கத்வா ஸுக்கா²பிதஸ்ஸ ரத்தஸாலினோ. தஸ்ஸ கிர ஸாலினோ வப்பகாலதோ பட்டா²ய அயம் பரிஹாரோ – கேதா³ரா ஸுபரிகம்மகதா ஹோந்தி, தத்த² பீ³ஜானி பதிட்டா²பேத்வா க³ந்தோ⁴த³கேன ஸிஞ்சிம்ஸு, வப்பகாலே விதானம் விய உபரி வத்த²கிலஞ்ஜம் ப³ந்தி⁴த்வா பரிபக்ககாலே வீஹிஸீஸானி சி²ந்தி³த்வா முட்டி²மத்தே புடகே கத்வா யோத்தப³த்³தே⁴ வேஹாஸம்யேவ ஸுக்கா²பேத்வா க³ந்த⁴சுண்ணானி அத்த²ரித்வா கோட்ட²கேஸு பூரேத்வா ததியே வஸ்ஸே விவரிம்ஸு. ஏவம் திவஸ்ஸம் பரிவுத்த²ஸ்ஸ ஸுக³ந்த⁴ரத்தஸாலினோ அபக³தகாளகே ஸுபரிஸுத்³தே⁴ தண்டு³லே க³ஹேத்வா க²ஜ்ஜகவிகதிம்பி ப⁴த்தம்பி படியாதி³யிம்ஸு. தம் ஸந்தா⁴ய வுத்தம் பணீதம் கா²த³னீயம் போ⁴ஜனீயம்…பே… காலம் ஆரோசாபேஸீதி.

288. அதி⁴வுட்டோ² மேதி கிம் ஸந்தா⁴ய வத³தி? வேக³ளிங்க³தோ நிக்க²மனகாலே க⁴டிகாரோ அத்தனோ ஸந்திகே வஸ்ஸாவாஸம் வஸனத்தா²ய படிஞ்ஞம் அக்³க³ஹேஸி, தம் ஸந்தா⁴ய வத³தி. அஹுதே³வ அஞ்ஞத²த்தம் அஹு தோ³மனஸ்ஸந்தி தேமாஸம் தா³னம் தா³தும், த⁴ம்மஞ்ச ஸோதும், இமினா ச நியாமேன வீஸதி பி⁴க்கு²ஸஹஸ்ஸானி படிஜக்³கி³தும் நாலத்த²ந்தி அலாப⁴ம் ஆரப்³ப⁴ சித்தஞ்ஞத²த்தம் சித்ததோ³மனஸ்ஸம் அஹோஸி, ந ததா²க³தம் ஆரப்³ப⁴. கஸ்மா? ஸோதாபன்னத்தா. ஸோ கிர புப்³பே³ ப்³ராஹ்மணப⁴த்தோ அஹோஸி. அதே²கஸ்மிம் ஸமயே பச்சந்தே குபிதே வூபஸமனத்த²ம் க³ச்ச²ந்தோ உரச்ச²த³ம் நாம தீ⁴தரமாஹ – ‘‘அம்ம அம்ஹாகம் தே³வே மா பமஜ்ஜீ’’தி. ப்³ராஹ்மணா தம் ராஜதீ⁴தரம் தி³ஸ்வா விஸஞ்ஞினோ அஹேஸும். கே இமே சாதி வுத்தே தும்ஹாகம் பூ⁴மிதே³வாதி. பூ⁴மிதே³வா நாம ஏவரூபா ஹோந்தீதி நிட்டு²பி⁴த்வா பாஸாத³ம் அபி⁴ருஹி. ஸா ஏகதி³வஸம் வீதி²ம் ஓலோகேந்தீ டி²தா கஸ்ஸபஸ்ஸ ப⁴க³வதோ அக்³க³ஸாவகம் தி³ஸ்வா பக்கோஸாபேத்வா பிண்ட³பாதம் த³த்வா அனுமோத³னம் ஸுணமானாயேவ ஸோதாபன்னா ஹுத்வா ‘‘அஞ்ஞேபி பி⁴க்கூ² அத்தீ²’’தி புச்சி²த்வா ‘‘ஸத்தா² வீஸதியா பி⁴க்கு²ஸஹஸ்ஸேஹி ஸத்³தி⁴ம் இஸிபதனே வஸதீ’’தி ச ஸுத்வா நிமந்தேத்வா தா³னம் அதா³ஸி.

ராஜா பச்சந்தம் வூபஸமேத்வா ஆக³தோ. அத² நம் பட²மதரமேவ ப்³ராஹ்மணா ஆக³ந்த்வா தீ⁴து அவண்ணம் வத்வா பரிபி⁴ந்தி³ம்ஸு. ராஜா பன தீ⁴து ஜாதகாலேயேவ வரம் அதா³ஸி. தஸ்ஸா ‘‘ஸத்த தி³வஸானி ரஜ்ஜம் தா³தப்³ப³’’ந்தி வரம் க³ண்ஹிம்ஸு. அத²ஸ்ஸா ராஜா ஸத்த தி³வஸானி ரஜ்ஜம் நிய்யாதேஸி. ஸா ஸத்தா²ரம் போ⁴ஜயமானா ராஜானம் பக்கோஸாபேத்வா ப³ஹிஸாணியம் நிஸீதா³பேஸி. ராஜா ஸத்து² அனுமோத³னம் ஸுத்வாவ ஸோதாபன்னோ ஜாதோ. ஸோதாபன்னஸ்ஸ ச நாம ததா²க³தம் ஆரப்³ப⁴ ஆகா⁴தோ நத்தி². தேன வுத்தம் – ‘‘ந ததா²க³தம் ஆரப்³பா⁴’’தி.

யம் இச்ச²தி தம் ஹரதூதி ஸோ கிர பா⁴ஜனானி பசித்வா கயவிக்கயம் ந கரோதி, ஏவம் பன வத்வா தா³ருத்தா²ய வா மத்திகத்தா²ய வா பலாலத்தா²ய வா அரஞ்ஞம் க³ச்ச²தி. மஹாஜனா ‘‘க⁴டிகாரேன பா⁴ஜனானி பக்கானீ’’தி ஸுத்வா பரிஸுத்³த⁴தண்டு³லலோணத³தி⁴தேலபா²ணிதாதீ³னி க³ஹேத்வா ஆக³ச்ச²ந்தி. ஸசே பா⁴ஜனம் மஹக்³க⁴ம் ஹோதி, மூலம் அப்பம், யம் வா தம் வா த³த்வா க³ண்ஹாமாதி தம் ந க³ண்ஹந்தி. த⁴ம்மிகோ வாணிஜோ மாதாபிதரோ படிஜக்³க³தி, ஸம்மாஸம்பு³த்³த⁴ம் உபட்ட²ஹதி, ப³ஹு நோ அகுஸலம் ப⁴விஸ்ஸதீதி புன க³ந்த்வா மூலம் ஆஹரந்தி. ஸசே பன பா⁴ஜனம் அப்பக்³க⁴ம் ஹோதி, ஆப⁴தம் மூலம் ப³ஹு, த⁴ம்மிகோ வாணிஜோ, அம்ஹாகம் புஞ்ஞம் ப⁴விஸ்ஸதீதி யதா²ப⁴தம் க⁴ரஸாமிகா விய ஸாது⁴கம் படிஸாமேத்வா க³ச்ச²ந்தி. ஏவம்கு³ணோ பன கஸ்மா ந பப்³ப³ஜதீதி. ரஞ்ஞோ வசனபத²ம் பச்சி²ந்த³ந்தோ அந்தே⁴ ஜிண்ணே மாதாபிதரோ போஸேதீதி ஆஹ.

289. கோ நு கோ²தி குஹிம் நு கோ². கும்பி⁴யாதி உக்க²லிதோ. பரியோகா³தி ஸூபபா⁴ஜனதோ. பரிபு⁴ஞ்ஜாதி பு⁴ஞ்ஜ. கஸ்மா பனேதே ஏவம் வத³ந்தி? க⁴டிகாரோ கிர ப⁴த்தம் பசித்வா ஸூபம் ஸம்பாதே³த்வா மாதாபிதரோ போ⁴ஜேத்வா ஸயம்பி பு⁴ஞ்ஜித்வா ப⁴க³வதோ வட்³ட⁴மானகம் ப⁴த்தஸூபம் பட்ட²பேத்வா ஆஸனம் பஞ்ஞபேத்வா ஆதா⁴ரகம் உபட்ட²பேத்வா உத³கம் பச்சுபட்ட²பேத்வா மாதாபிதூனம் ஸஞ்ஞம் த³த்வா அரஞ்ஞம் க³ச்ச²தி. தஸ்மா ஏவம் வத³ந்தி. அபி⁴விஸ்ஸத்தோ²தி அதிவிஸ்ஸத்தோ². பீதிஸுக²ம் ந விஜஹதீதி ந நிரந்தரம் விஜஹதி, அத² கோ² ரத்திபா⁴கே³ வா தி³வஸபா⁴கே³ வா கா³மே வா அரஞ்ஞே வா யஸ்மிம் யஸ்மிம் க²ணே – ‘‘ஸதே³வகே நாம லோகே அக்³க³புக்³க³லோ மய்ஹம் கே³ஹம் பவிஸித்வா ஸஹத்தே²ன ஆமிஸம் க³ஹேத்வா பரிபு⁴ஞ்ஜதி, லாபா⁴ வத மே’’தி அனுஸ்ஸரதி, தஸ்மிம் தஸ்மிம் க²ணே பஞ்சவண்ணா பீதி உப்பஜ்ஜதி. தம் ஸந்தா⁴ய ஏவம் வுத்தம்.

290. களோபியாதி பச்சி²தோ. கிம் பன ப⁴க³வா ஏவமகாஸீதி. பச்சயோ த⁴ம்மிகோ, பி⁴க்கூ²னம் பத்தே ப⁴த்தஸதி³ஸோ, தஸ்மா ஏவமகாஸி. ஸிக்கா²பத³பஞ்ஞத்திபி ச ஸாவகானம்யேவ ஹோதி, பு³த்³தா⁴னம் ஸிக்கா²பத³வேலா நாம நத்தி². யதா² ஹி ரஞ்ஞோ உய்யானே புப்ப²ப²லானி ஹோந்தி, அஞ்ஞேஸம் தானி க³ண்ஹந்தானம் நிக்³க³ஹம் கரோந்தி, ராஜா யதா²ருசியா பரிபு⁴ஞ்ஜதி, ஏவம்ஸம்பத³மேதம். பரஸமுத்³த³வாஸீதே²ரா பன ‘‘தே³வதா கிர படிக்³க³ஹேத்வா அத³ம்ஸூ’’தி வத³ந்தி.

291. ஹரத², ப⁴ந்தே, ஹரத² ப⁴த்³ரமுகா²தி அம்ஹாகம் புத்தோ ‘‘குஹிம் க³தோஸீ’’தி வுத்தே – ‘‘த³ஸப³லஸ்ஸ ஸந்திக’’ந்தி வத³தி, குஹிம் நு கோ² க³ச்ச²தி, ஸத்து² வஸனட்டா²னஸ்ஸ ஓவஸ்ஸகபா⁴வம்பி ந ஜானாதீதி புத்தே அபராத⁴ஸஞ்ஞினோ க³ஹணே துட்ட²சித்தா ஏவமாஹம்ஸு.

தேமாஸம் ஆகாஸச்ச²த³னம் அட்டா²ஸீதி ப⁴க³வா கிர சதுன்னம் வஸ்ஸிகானம் மாஸானம் ஏகம் மாஸம் அதிக்கமித்வா திணம் ஆஹராபேஸி, தஸ்மா ஏவமாஹ. அயம் பனேத்த² பத³த்தோ² – ஆகாஸம் ச²த³னமஸ்ஸாதி ஆகாஸச்ச²த³னம். ந தே³வோதிவஸ்ஸீதி கேவலம் நாதிவஸ்ஸி, யதா² பனேத்த² பகதியா ச நிப்³ப³கோஸஸ்ஸ உத³கபாதட்டா²னப்³ப⁴ந்தரே ஏகம்பி உத³கபி³ந்து³ நாதிவஸ்ஸி, ஏவம் க⁴னச²த³னகே³ஹப்³ப⁴ந்தரே விய ந வாதாதபாபி ஆபா³த⁴ம் அகம்ஸு, பகதியா உதுப²ரணமேவ அஹோஸி. அபரபா⁴கே³ தஸ்மிம் நிக³மே ச²ட்³டி³தேபி தம் டா²னம் அனோவஸ்ஸகமேவ அஹோஸி. மனுஸ்ஸா கம்மம் கரோந்தா தே³வே வஸ்ஸந்தே தத்த² ஸாடகே ட²பேத்வா கம்மம் கரோந்தி. யாவ கப்புட்டா²னா தம் டா²னம் தாதி³ஸமேவ ப⁴விஸ்ஸதி. தஞ்ச கோ² பன ந ததா²க³தஸ்ஸ இத்³தா⁴னுபா⁴வேன, தேஸம்யேவ பன கு³ணஸம்பத்தியா. தேஸஞ்ஹி – ‘‘ஸம்மாஸம்பு³த்³தோ⁴ கத்த² ந லபே⁴ய்ய, அம்ஹாகம் நாம த்³வின்னம் அந்த⁴கானம் நிவேஸனம் உத்திணம் காரேஸீ’’தி ந தப்பச்சயா தோ³மனஸ்ஸம் உத³பாதி³ – ‘‘ஸதே³வகே லோகே அக்³க³புக்³க³லோ அம்ஹாகம் நிவேஸனா திணம் ஆஹராபேத்வா க³ந்த⁴குடிம் சா²தா³பேஸீ’’தி பன தேஸம் அனப்பகம் ப³லவஸோமனஸ்ஸம் உத³பாதி³. இதி தேஸம்யேவ கு³ணஸம்பத்தியா இத³ம் பாடிஹாரியம் ஜாதந்தி வேதி³தப்³ப³ம்.

292. தண்டு³லவாஹஸதானீதி ஏத்த² த்³வே ஸகடானி ஏகோ வாஹோதி வேதி³தப்³போ³. தது³பியஞ்ச ஸூபேய்யந்தி ஸூபத்தா²ய தத³னுரூபம் தேலபா²ணிதாதி³ம். வீஸதிபி⁴க்கு²ஸஹஸ்ஸஸ்ஸ தேமாஸத்தா²ய ப⁴த்தம் ப⁴விஸ்ஸதீதி கிர ஸஞ்ஞாய ராஜா ஏத்தகம் பேஸேஸி. அலம் மே ரஞ்ஞோவ ஹோதூதி கஸ்மா படிக்கி²பி? அதி⁴க³தஅப்பிச்ச²தாய. ஏவம் கிரஸ்ஸ அஹோஸி – ‘‘நாஹம் ரஞ்ஞா தி³ட்ட²புப்³போ³, கத²ம் நு கோ² பேஸேஸீ’’தி. ததோ சிந்தேஸி – ‘‘ஸத்தா² பா³ராணஸிம் க³தோ, அத்³தா⁴ ஸோ ரஞ்ஞோ வஸ்ஸாவாஸம் யாசியமானோ மய்ஹம் படிஞ்ஞாதபா⁴வம் ஆரோசேத்வா மம கு³ணகத²ம் கதே²ஸி, கு³ணகதா²ய லத்³த⁴லாபோ⁴ பன நடேன நச்சித்வா லத்³த⁴ம் விய கா³யகேன கா³யித்வா லத்³த⁴ம் விய ச ஹோதி. கிம் மய்ஹம் இமினா, கம்மம் கத்வா உப்பன்னேன மாதாபிதூனம்பி ஸம்மாஸம்பு³த்³த⁴ஸ்ஸபி உபட்டா²னம் ஸக்கா காது’’ந்தி. ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

க⁴டிகாரஸுத்தவண்ணனா நிட்டி²தா.

2. ரட்ட²பாலஸுத்தவண்ணனா

293. ஏவம் மே ஸுதந்தி ரட்ட²பாலஸுத்தம். தத்த² து²ல்லகோட்டி²கந்தி து²ல்லகோட்ட²ம் பரிபுண்ணகோட்டா²கா³ரம். ஸோ கிர ஜனபதோ³ நிச்சஸஸ்ஸோ ஸதா³ பீ³ஜப⁴ண்ட³ம் நிக்க²மதி, க²லப⁴ண்ட³ம் பவிஸதி. தேன தஸ்மிம் நிக³மே கோட்டா² நிச்சபூராவ ஹோந்தி. தஸ்மா ஸோ து²ல்லகோட்டி²கந்தேவ ஸங்க²ம் க³தோ.

294. ரட்ட²பாலோதி கஸ்மா ரட்ட²பாலோ? பி⁴ன்னம் ரட்ட²ம் ஸந்தா⁴ரேதும் பாலேதும் ஸமத்தோ²தி ரட்ட²பாலோ. கதா³ பனஸ்ஸேதம் நாமம் உப்பன்னந்தி. பது³முத்தரஸம்மாஸம்பு³த்³த⁴காலே. இதோ ஹி புப்³பே³ ஸதஸஹஸ்ஸகப்பமத்த²கே வஸ்ஸஸதஸஹஸ்ஸாயுகேஸு மனுஸ்ஸேஸு பது³முத்தரோ நாம ஸத்தா² உப்பஜ்ஜித்வா பி⁴க்கு²ஸதஸஹஸ்ஸபரிவாரோ லோகஹிதாய சாரிகம் சரி, யம் ஸந்தா⁴ய வுத்தம் –

‘‘நக³ரம் ஹம்ஸவதீ நாம, ஆனந்தோ³ நாம க²த்தியோ;

ஸுஜாதா நாம ஜனிகா, பது³முத்தரஸ்ஸ ஸத்து²னோ’’தி. (பு³. வம். 12.19);

பது³முத்தரே பன அனுப்பன்னே ஏவ ஹம்ஸவதியா த்³வே குடும்பி³கா ஸத்³தா⁴ பஸன்னா கபணத்³தி⁴கயாசகாதீ³னம் தா³னம் பட்ட²பயிம்ஸு. ததா³ பப்³ப³தவாஸினோ பஞ்சஸதா தாபஸா ஹம்ஸவதிம் அனுப்பத்தா. தே த்³வேபி ஜனா தாபஸக³ணம் மஜ்ஜே² பி⁴ந்தி³த்வா உபட்ட²ஹிம்ஸு. தாபஸா கிஞ்சிகாலம் வஸித்வா பப்³ப³தபாத³மேவ க³தா. த்³வே ஸங்க⁴த்தே²ரா ஓஹீயிம்ஸு. ததா³ தேஸம் தே யாவஜீவம் உபட்டா²னம் அகம்ஸு. தாபஸேஸு பு⁴ஞ்ஜித்வா அனுமோத³னம் கரோந்தேஸு ஏகோ ஸக்கப⁴வனஸ்ஸ வண்ணம் கதே²ஸி, ஏகோ பூ⁴மிந்த⁴ரனாக³ராஜப⁴வனஸ்ஸ.

குடும்பி³கேஸு ஏகோ ஸக்கப⁴வனம் பத்த²னம் கத்வா ஸக்கோ ஹுத்வா நிப்³ப³த்தோ, ஏகோ நாக³ப⁴வனே பாலிதனாக³ராஜா நாம. தம் ஸக்கோ அத்தனோ உபட்டா²னம் ஆக³தம் தி³ஸ்வா நாக³யோனியம் அபி⁴ரமஸீதி புச்சி². ஸோ நாபி⁴ரமாமீதி ஆஹ. தேன ஹி பது³முத்தரஸ்ஸ ப⁴க³வதோ தா³னம் த³த்வா இமஸ்மிம் டா²னே பத்த²னம் கரோஹி, உபோ⁴ ஸுக²ம் வஸிஸ்ஸாமாதி. நாக³ராஜா ஸத்தா²ரம் நிமந்தேத்வா பி⁴க்கு²ஸதஸஹஸ்ஸபரிவாரஸ்ஸ ப⁴க³வதோ ஸத்தாஹம் மஹாதா³னம் த³த³மானோ பது³முத்தரஸ்ஸ த³ஸப³லஸ்ஸ புத்தம் உபரேவதம் நாம ஸாமணேரம் தி³ஸ்வா ஸத்தமே தி³வஸே பு³த்³த⁴ப்பமுக²ஸ்ஸ ஸங்க⁴ஸ்ஸ தி³ப்³ப³வத்தா²னி த³த்வா ஸாமணேரஸ்ஸ டா²னந்தரம் பத்தே²ஸி. ப⁴க³வா அனாக³தம் ஓலோகேத்வா – ‘‘அனாக³தே கோ³தமஸ்ஸ நாம பு³த்³த⁴ஸ்ஸ புத்தோ ராஹுலகுமாரோ ப⁴விஸ்ஸதீ’’தி தி³ஸ்வா ‘‘ஸமிஜ்ஜி²ஸ்ஸதி தே பத்த²னா’’தி கதே²ஸி. நாக³ராஜா தமத்த²ம் ஸக்கஸ்ஸ கதே²ஸி. ஸக்கோ தஸ்ஸ வசனம் ஸுத்வா ததே²வ ஸத்தாஹம் தா³னம் த³த்வா பி⁴ன்னம் ரட்ட²ம் ஸந்தா⁴ரேதும் பாலேதும் ஸமத்த²குலே நிப்³ப³த்தித்வா ஸத்³தா⁴பப்³ப³ஜிதம் ரட்ட²பாலம் நாம குலபுத்தம் தி³ஸ்வா – ‘‘அஹம்பி அனாக³தே லோகஸ்மிம் தும்ஹாதி³ஸே பு³த்³தே⁴ உப்பன்னே பி⁴ன்னம் ரட்ட²ம் ஸந்தா⁴ரேதும் பாலேதும் ஸமத்த²குலே நிப்³ப³த்தித்வா அயம் குலபுத்தோ விய ஸத்³தா⁴பப்³ப³ஜிதோ ரட்ட²பாலோ நாம ப⁴வேய்ய’’ந்தி பத்த²னமகாஸி. ஸத்தா² ஸமிஜ்ஜ²னகபா⁴வம் ஞத்வா இமம் கா³த²மாஹ –

‘‘ஸராஜிகம் சாதுவண்ணம், போஸேதும் யம் பஹோஸ்ஸதி;

ரட்ட²பாலகுலம் நாம, தத்த² ஜாயிஸ்ஸதே அய’’ந்தி. –

ஏவம் பது³முத்தரஸம்மாஸம்பு³த்³த⁴காலே தஸ்ஸேதம் நாமம் உப்பன்னந்தி வேதி³தப்³ப³ம்.

ஏதத³ஹோஸீதி கிம் அஹோஸி? யதா² யதா² கோ²திஆதி³. தத்ராயம் ஸங்கே²பகதா² – அஹம் கோ² யேன யேன காரணேன ப⁴க³வதா த⁴ம்மம் தே³ஸிதம் ஆஜானாமி, தேன தேன மே உபபரிக்க²தோ ஏவம் ஹோதி – ‘‘யதே³தம் ஸிக்க²த்தயப்³ரஹ்மசரியம் ஏகதி³வஸம்பி அக²ண்ட³ம் கத்வா சரிமகசித்தம் பாபேதப்³ப³தாய ஏகந்தபரிபுண்ணம் சரிதப்³ப³ம், ஏகதி³வஸம்பி ச கிலேஸமலேன அமலீனம் கத்வா சரிமகசித்தம் பாபேதப்³ப³தாய ஏகந்தபரிஸுத்³த⁴ம், ஸங்க²லிகி²தம் விலிகி²தஸங்க²ஸதி³ஸம் தோ⁴தஸங்க²ஸப்படிபா⁴க³ம் கத்வா சரிதப்³ப³ம், நயித³ம் ஸுகரம் அகா³ரம் அஜ்ஜா²வஸதா அகா³ரமஜ்ஜே² வஸந்தேன ஏகந்தபரிபுண்ணம்…பே… சரிதும், யம்னூனாஹம் கேஸஞ்ச மஸ்ஸுஞ்ச ஓஹாரேத்வா காஸாயரஸபீததாய காஸாயானி ப்³ரஹ்மசரியம் சரந்தானம் அனுச்ச²விகானி வத்தா²னி அச்சா²தே³த்வா அகா³ரஸ்மா நிக்க²மித்வா அனகா³ரியம் பப்³ப³ஜேய்ய’’ந்தி.

அசிரபக்கந்தேஸு து²ல்லகோட்டி²கேஸு ப்³ராஹ்மணக³ஹபதிகேஸு யேன ப⁴க³வா தேனுபஸங்கமீதி ரட்ட²பாலோ அனுட்டி²தேஸு தேஸு ந ப⁴க³வந்தம் பப்³ப³ஜ்ஜம் யாசி. கஸ்மா? தத்த²ஸ்ஸ ப³ஹூ ஞாதிஸாலோஹிதா மித்தாமச்சா ஸந்தி, தே – ‘‘த்வம் மாதாபிதூனம் ஏகபுத்தகோ, ந லப்³பா⁴ தயா பப்³ப³ஜிது’’ந்தி பா³ஹாயம்பி க³ஹேத்வா ஆகட்³டே⁴ய்யும், ததோ பப்³ப³ஜ்ஜாய அந்தராயோ ப⁴விஸ்ஸதீதி ஸஹேவ பரிஸாய உட்ட²ஹித்வா தோ²கம் க³ந்த்வா புன கேனசி ஸரீரகிச்சலேஸேன நிவத்தித்வா ப⁴க³வந்தம் உபஸங்கம்ம பப்³ப³ஜ்ஜம் யாசி. தேன வுத்தம் – ‘‘அத² கோ² ரட்ட²பாலோ குலபுத்தோ அசிரபக்கந்தேஸு து²ல்லகோட்டி²கேஸு…பே… பப்³பா³ஜேது மம் ப⁴க³வா’’தி. ப⁴க³வா பன யஸ்மா ராஹுலகுமாரஸ்ஸ பப்³ப³ஜிததோ பபு⁴தி மாதாபிதூஹி அனனுஞ்ஞாதம் புத்தம் ந பப்³பா³ஜேதி, தஸ்மா நம் புச்சி² அனுஞ்ஞாதோஸி பன த்வம், ரட்ட²பால, மாதாபிதூஹி…பே… பப்³ப³ஜ்ஜாயாதி.

295. அம்மதாதாதி ஏத்த² அம்மாதி மாதரம் ஆலபதி, தாதாதி பிதரம். ஏகபுத்தகோதி ஏகோவ புத்தகோ, அஞ்ஞோ கோசி ஜேட்டோ² வா கனிட்டோ² வா நத்தி². ஏத்த² ச ஏகபுத்தோதி வத்தப்³பே³ அனுகம்பாவஸேன ஏகபுத்தகோதி வுத்தம். பியோதி பீதிஜனகோ. மனாபோதி மனவட்³ட⁴னகோ. ஸுகே²தி⁴தோதி ஸுகே²ன ஏதி⁴தோ, ஸுக²ஸம்வட்³டி⁴தோதி அத்தோ². ஸுக²பரிப⁴தோதி ஸுகே²ன பரிப⁴தோ, ஜாதகாலதோ பபு⁴தி தா⁴தீஹி அங்கதோ அங்கம் ஆஹரித்வா தா⁴ரியமானோ அஸ்ஸகரத²காதீ³ஹி பா³லகீளனகேஹி கீளயமானோ ஸாது³ரஸபோ⁴ஜனம் போ⁴ஜயமானோ ஸுகே²ன பரிஹடோ. ந த்வம், தாத ரட்ட²பால, கஸ்ஸசி து³க்க²ஸ்ஸ ஜானாஸீதி த்வம், தாத ரட்ட²பால அப்பமத்தகம்பி கலபா⁴க³ம் து³க்க²ஸ்ஸ ந ஜானாஸி ந ஸரஸீதி அத்தோ². மரணேனபி தே மயம் அகாமகா வினா ப⁴விஸ்ஸாமாதி ஸசேபி தவ அம்ஹேஸு ஜீவமானேஸு மரணம் ப⁴வேய்ய, தேன தே மரணேனபி மயம் அகாமகா அனிச்ச²கா ந அத்தனோ ருசியா வினா ப⁴விஸ்ஸாம, தயா வியோக³ம் பாபுணிஸ்ஸாமாதி அத்தோ². கிம் பன மயம் தந்தி ஏவம் ஸந்தே கிம் பன கிம் நாம தம் காரணம், யேன மயம் தம் ஜீவந்தம் அனுஜானிஸ்ஸாம. அத² வா கிம் பன மயம் தந்தி கேன பன காரணேன மயம் தம் ஜீவந்தம் அனுஜானிஸ்ஸாமாதி ஏவமேத்த² அத்தோ² த³ட்ட²ப்³போ³.

296. தத்தே²வாதி யத்த² நம் டி²தம் மாதாபிதரோ நானுஜானிம்ஸு, தத்தே²வ டா²னே. அனந்தரஹிதாயாதி கேனசி அத்த²ரணேன அனத்த²தாய. பரிசாரேஹீதி க³ந்த⁴ப்³ப³னடனாடகாதீ³னி பச்சுபட்ட²பேத்வா தத்த² ஸஹாயகேஹி ஸத்³தி⁴ம் யதா²ஸுக²ம் இந்த்³ரியானி சாரேஹி ஸஞ்சாரேஹி, இதோ சிதோ ச உபனேஹீதி வுத்தம் ஹோதி. அத² வா பரிசாரேஹீதி க³ந்த⁴ப்³ப³னடனாடகாதீ³னி பச்சுபட்ட²பேத்வா ஸஹாயகேஹி ஸத்³தி⁴ம் லள உபலள ரம, கீளஸ்ஸூதிபி வுத்தம் ஹோதி. காமே பரிபு⁴ஞ்ஜந்தோதி அத்தனோ புத்ததா³ரேஹி ஸத்³தி⁴ம் போ⁴கே³ பு⁴ஞ்ஜந்தோ. புஞ்ஞானி கரோந்தோதி பு³த்³த⁴ஞ்ச த⁴ம்மஞ்ச ஸங்க⁴ஞ்ச ஆரப்³ப⁴ தா³னப்பதா³னாதீ³னி ஸுக³திமக்³க³ஸம்ஸோத⁴கானி குஸலகம்மானி கரோந்தோ. துண்ஹீ அஹோஸீதி கதா²னுப்பப³ந்த⁴விச்சே²த³னத்த²ம் நிராலாபஸல்லாபோ அஹோஸி.

அத²ஸ்ஸ மாதாபிதரோ திக்க²த்தும் வத்வா படிவசனம்பி அலப⁴மானா ஸஹாயகே பக்கோஸாபேத்வா ‘‘ஏஸ வோ ஸஹாயகோ பப்³ப³ஜிதுகாமோ, நிவாரேத² ந’’ந்தி ஆஹம்ஸு. தேபி தம் உபஸங்கமித்வா திக்க²த்தும் அவோசும், தேஸம்பி துண்ஹீ அஹோஸி. தேன வுத்தம் – அத² கோ² ரட்ட²பாலஸ்ஸ குலபுத்தஸ்ஸ ஸஹாயகா…பே… துண்ஹீ அஹோஸீதி. அத²ஸ்ஸ ஸஹாயகானம் திக்க²த்தும் வத்வா ஏதத³ஹோஸி – ‘‘ஸசே அயம் பப்³ப³ஜ்ஜம் அலப⁴மானோ மரிஸ்ஸதி, ந கோசி கு³ணோ லப்³ப⁴தி. பப்³ப³ஜிதம் பன நம் மாதாபிதரோபி காலேன காலம் பஸ்ஸிஸ்ஸந்தி, மயம்பி பஸ்ஸிஸ்ஸாம, பப்³ப³ஜ்ஜாபி ச நாமேஸா பா⁴ரியா, தி³வஸே தி³வஸே மத்திகாபத்தம் க³ஹேத்வா பிண்டா³ய சரிதப்³ப³ம், ஏகஸேய்யம் ஏகப⁴த்தம் ப்³ரஹ்மசரியம் அதிது³க்கரம், அயஞ்ச ஸுகு²மாலோ நாக³ரிகஜாதியோ, ஸோ தம் சரிதும் அஸக்கோந்தோ புன இதே⁴வ ஆக³மிஸ்ஸதி, ஹந்த³ஸ்ஸ மாதாபிதரோ அனுஜானாபேஸ்ஸாமா’’தி. தே ததா² அகம்ஸு. மாதாபிதரோபி நம் ‘‘பப்³ப³ஜிதேன ச பன தே மாதாபிதரோ உத்³த³ஸ்ஸேதப்³பா³’’தி இமம் கதிகம் கத்வா அனுஜானிம்ஸு. தேன வுத்தம் – ‘‘அத² கோ² ரட்ட²பாலஸ்ஸ குலபுத்தஸ்ஸ ஸஹாயகா யேன ரட்ட²பாலஸ்ஸ குலபுத்தஸ்ஸ மாதாபிதரோ…பே… அனுஞ்ஞாதோஸி மாதாபிதூஹி…பே… உத்³த³ஸ்ஸேதப்³பா³’’தி. தத்த² உத்³த³ஸ்ஸேதப்³பா³தி உத்³த⁴ம் த³ஸ்ஸேதப்³பா³, யதா² தம் காலேன காலம் பஸ்ஸந்தி, ஏவம் ஆக³ந்த்வா அத்தானம் த³ஸ்ஸேதப்³பா³.

299. ப³லம் க³ஹேத்வாதி ஸப்பாயபோ⁴ஜனானி பு⁴ஞ்ஜந்தோ உச்சா²த³னாதீ³ஹி ச காயம் பரிஹரந்தோ காயப³லம் ஜனேத்வா மாதாபிதரோ வந்தி³த்வா அஸ்ஸுமுக²ம் ஞாதிபரிவட்டம் பஹாய யேன ப⁴க³வா தேனுபஸங்கமி…பே… பப்³பா³ஜேது மம், ப⁴ந்தே, ப⁴க³வாதி. ப⁴க³வா ஸமீபே டி²தம் அஞ்ஞதரம் பி⁴க்கு²ம் ஆமந்தேஸி – ‘‘தேன ஹி பி⁴க்கு² ரட்ட²பாலம் பப்³பா³ஜேஹி சேவ உபஸம்பாதே³ஹி சா’’தி. ஸாது⁴, ப⁴ந்தேதி கோ² ஸோ பி⁴க்கு² ப⁴க³வதோ படிஸ்ஸுத்வா ரட்ட²பாலம் குலபுத்தம் ஜினத³த்தியம் ஸத்³தி⁴விஹாரிகம் லத்³தா⁴ பப்³பா³ஜேஸி சேவ உபஸம்பாதே³ஸி ச. தேன வுத்தம் – ‘‘அலத்த² கோ² ரட்ட²பாலோ குலபுத்தோ ப⁴க³வதோ ஸந்திகே பப்³ப³ஜ்ஜம், அலத்த² உபஸம்பத³’’ந்தி.

பஹிதத்தோ விஹரந்தோதி த்³வாத³ஸ ஸம்வச்ச²ரானி ஏவம் விஹரந்தோ. நேய்யபுக்³க³லோ ஹி அயமாயஸ்மா, தஸ்மா புஞ்ஞவா அபி⁴னீஹாரஸம்பன்னோபி ஸமானோ ‘‘அஜ்ஜ அஜ்ஜேவ அரஹத்த’’ந்தி ஸமணத⁴ம்மம் கரோந்தோபி த்³வாத³ஸமே வஸ்ஸே அரஹத்தம் பாபுணி.

யேன ப⁴க³வா தேனுபஸங்கமீதி மய்ஹம் மாதாபிதரோ பப்³ப³ஜ்ஜம் அனுஜானமானா – ‘‘தயா காலேன காலம் ஆக³ந்த்வா அம்ஹாகம் த³ஸ்ஸனம் தா³தப்³ப³’’ந்தி வத்வா அனுஜானிம்ஸு, து³க்கரகாரிகா கோ² பன மாதாபிதரோ, அஹஞ்ச யேனஜ்ஜா²ஸயேன பப்³ப³ஜிதோ, ஸோ மே மத்த²கம் பத்தோ, இதா³னி ப⁴க³வந்தம் ஆபுச்சி²த்வா அத்தானம் மாதாபிதூனம் த³ஸ்ஸேஸ்ஸாமீதி சிந்தேத்வா ஆபுச்சி²துகாமோ உபஸங்கமி. மனஸாகாஸீதி ‘‘கிம் நு கோ² ரட்ட²பாலே க³தே கோசி உபத்³த³வோ ப⁴விஸ்ஸதீ’’தி மனஸி அகாஸி. ததோ ‘‘ப⁴விஸ்ஸதீ’’தி ஞத்வா ‘‘ஸக்கி²ஸ்ஸதி நு கோ² ரட்ட²பாலோ தம் மத்³தி³து’’ந்தி ஓலோகேந்தோ தஸ்ஸ அரஹத்தஸம்பத்திம் தி³ஸ்வா ‘‘ஸக்கி²ஸ்ஸதீ’’தி அஞ்ஞாஸி. தேன வுத்தம் – யதா² ப⁴க³வா அஞ்ஞாஸி…பே… காலம் மஞ்ஞஸீதி.

மிக³சீரேதி ஏவம்னாமகே உய்யானே. தஞ்ஹி ரஞ்ஞா – ‘‘அகாலே ஸம்பத்தபப்³ப³ஜிதானம் தி³ன்னமேவ இத³ம், யதா²ஸுக²ம் பரிபு⁴ஞ்ஜந்தூ’’தி ஏவமனுஞ்ஞாதமேவ அஹோஸி, தஸ்மா தே²ரோ – ‘‘மம ஆக³தபா⁴வம் மாதாபிதூனம் ஆரோசேஸ்ஸாமி, தே மே பாத³தோ⁴வனஉண்ஹோத³கபாத³மக்க²னதேலாதீ³னி பேஸிஸ்ஸந்தீ’’தி சித்தம்பி அனுப்பாதே³த்வா உய்யானமேவ பாவிஸி. பிண்டா³ய பாவிஸீதி து³தியதி³வஸே பாவிஸி.

மஜ்ஜி²மாயாதி ஸத்தத்³வாரகோட்ட²கஸ்ஸ க⁴ரஸ்ஸ மஜ்ஜி²மே த்³வாரகோட்ட²கே. உல்லிகா²பேதீதி கப்பகேன கேஸே பஹராபேதி. ஏதத³வோசாதி – ‘‘இமே ஸமணகா அம்ஹாகம் பியபுத்தகம் பப்³பா³ஜேத்வா சோரானம் ஹத்தே² நிக்கி²பித்வா விய ஏகதி³வஸம்பி ந த³ஸ்ஸாபேந்தி, ஏவம் ப²ருஸகாரகா ஏதே புன இமம் டா²னம் உபஸங்கமிதப்³ப³ம் மஞ்ஞந்தி, ஏத்தோவ நிகட்³டி⁴தப்³பா³ ஏதே’’தி சிந்தேத்வா ஏதம் ‘‘இமேஹி முண்ட³கேஹீ’’திஆதி³வசனம் அவோச. ஞாதிதா³ஸீதி ஞாதகானம் தா³ஸீ. ஆபி⁴தோ³ஸிகந்தி பாரிவாஸிகம் ஏகரத்தாதிக்கந்தம் பூதிபூ⁴தம். தத்தா²யம் பத³த்தோ² – பூதிபா⁴வதோ³ஸேன அபி⁴பூ⁴தோதி அபி⁴தோ³ஸோ, அபி⁴தோ³ஸோவ ஆபி⁴தோ³ஸிகோ. ஏகரத்தாதிக்கந்தஸ்ஸேவ நாமஸஞ்ஞா ஏஸா யதி³த³ம் ஆபி⁴தோ³ஸிகோதி, தம் ஆபி⁴தோ³ஸிகம். கும்மாஸந்தி யவகும்மாஸம். ச²ட்³டே³துகாமா ஹோதீதி யஸ்மா அந்தமஸோ தா³ஸகம்மகாரானம் கோ³ரூபானம்பி அபரிபோ⁴கா³ரஹோ, தஸ்மா நம் கசவரம் விய ப³ஹி ச²ட்³டே³துகாமா ஹோதி. ஸசேதந்தி ஸசே ஏதம். ப⁴கி³னீதி அரியவோஹாரேன அத்தனோ தா⁴திம் ஞாதிதா³ஸிம் ஆலபதி. ச²ட்³ட³னீயத⁴ம்மந்தி ச²ட்³டே³தப்³ப³ஸபா⁴வம். இத³ம் வுத்தம் ஹோதி – ‘‘ப⁴கி³னி ஏதம் ஸசே ப³ஹி ச²ட்³ட³னீயத⁴ம்மம் நிஸ்ஸட்ட²பரிக்³க³ஹம், இத⁴ மே பத்தே ஆகிராஹீ’’தி. கிம் பன ஏவம் வத்தும் லப்³ப⁴தி, விஞ்ஞத்தி வா பயுத்தவாசா வா ந ஹோதீதி. ந ஹோதி. கஸ்மா? நிஸ்ஸட்ட²பரிக்³க³ஹத்தா. யஞ்ஹி ச²ட்³ட³னீயத⁴ம்மம் நிஸ்ஸட்ட²பரிக்³க³ஹம், யத்த² ஸாமிகா அனாலயா ஹோந்தி, தம் ஸப்³ப³ம் ‘‘தே³த² ஆஹரத² ஆகிரதா²’’தி வத்தும் வட்டதி. தேனேவ ஹி அயமாயஸ்மா அக்³க³அரியவம்ஸிகோ ஸமானோபி ஏவமாஹ.

ஹத்தா²னந்தி பி⁴க்கா²க³ஹணத்த²ம் பத்தம் உபனாமயதோ மணிப³ந்த⁴தோ பபு⁴தி த்³வின்னம்பி ஹத்தா²னம். பாதா³னந்தி நிவாஸனந்ததோ பட்டா²ய த்³வின்னம்பி பாதா³னம். ஸரஸ்ஸாதி ஸசே தம் ப⁴கி³னீதி வாசம் நிச்சா²ரயதோ ஸரஸ்ஸ ச. நிமித்தம் அக்³க³ஹேஸீதி ஹத்த²பிட்டி²ஆதீ³னி ஓலோகயமானா – ‘‘புத்தஸ்ஸ மே ரட்ட²பாலஸ்ஸ விய ஸுவண்ணகச்ச²பபிட்டி²ஸதி³ஸா இமா ஹத்த²பாத³பிட்டி²யோ, ஹரிதாலவட்டியோ விய ஸுவட்டிதா அங்கு³லியோ, மது⁴ரோ ஸரோ’’தி கி³ஹிகாலே ஸல்லக்கி²தபுப்³ப³ம் ஆகாரம் அக்³க³ஹேஸி ஸஞ்ஜானி ஸல்லக்கே²ஸி. தஸ்ஸ ஹாயஸ்மதோ த்³வாத³ஸவஸ்ஸானி அரஞ்ஞாவாஸஞ்சேவ பிண்டி³யாலோபபோ⁴ஜனஞ்ச பரிபு⁴ஞ்ஜந்தஸ்ஸ அஞ்ஞாதி³ஸோ ஸரீரவண்ணோ அஹோஸி, தேன நம் ஸா ஞாதிதா³ஸீ தி³ஸ்வாவ ந ஸஞ்ஜானி, நிமித்தம் பன அக்³க³ஹேஸீதி.

300. ரட்ட²பாலஸ்ஸ மாதரம் ஏதத³வோசாதி தே²ரஸ்ஸ அங்க³பச்சங்கா³னி ஸண்டா²பேத்வா த²ஞ்ஞம் பாயேத்வா ஸம்வட்³டி⁴ததா⁴தீபி ஸமானா பப்³ப³ஜித்வா மஹாகீ²ணாஸவபா⁴வப்பத்தேன ஸாமிபுத்தேன ஸத்³தி⁴ம் – ‘‘த்வம் நு கோ², மே ப⁴ந்தே, புத்தோ ரட்ட²பாலோ’’திஆதி³வசனம் வத்தும் அவிஸஹந்தீ வேகே³ன க⁴ரம் பவிஸித்வா ரட்ட²பாலஸ்ஸ மாதரம் ஏதத³வோச. யக்³கே⁴தி ஆரோசனத்தே² நிபாதோ. ஸசே ஜே ஸச்சந்தி ஏத்த² ஜேதி ஆலபனே நிபாதோ. ஏவஞ்ஹி தஸ்மிம் தே³ஸே தா³ஸிஜனம் ஆலபந்தி, தஸ்மா ‘‘த்வஞ்ஹி, போ⁴தி தா³ஸி, ஸசே ஸச்சம் ப⁴ணஸீ’’தி ஏவமேத்த² அத்தோ² த³ட்ட²ப்³போ³.

உபஸங்கமீதி கஸ்மா உபஸங்கமி? மஹாகுலே இத்தி²யோ ப³ஹி நிக்க²மந்தா க³ரஹம் பாபுணந்தி, இத³ஞ்ச அச்சாயிககிச்சம், ஸேட்டி²ஸ்ஸ நம் ஆரோசேஸ்ஸாமீதி சிந்தேதி. தஸ்மா உபஸங்கமி. அஞ்ஞதரம் குட்டமூலந்தி தஸ்மிம் கிர தே³ஸே தா³னபதீனம் க⁴ரேஸு ஸாலா ஹோந்தி, ஆஸனானி சேத்த² பஞ்ஞத்தானி ஹோந்தி, உபட்டா²பிதம் உத³ககஞ்ஜியம். தத்த² பப்³ப³ஜிதா பிண்டா³ய சரித்வா நிஸீதி³த்வா பு⁴ஞ்ஜந்தி. ஸசே இச்ச²ந்தி, தா³னபதீனம்பி ஸந்தகம் க³ண்ஹந்தி. தஸ்மா தம்பி அஞ்ஞதரஸ்ஸ குலஸ்ஸ ஈதி³ஸாய ஸாலாய அஞ்ஞதரம் குட்டமூலந்தி வேதி³தப்³ப³ம். ந ஹி பப்³ப³ஜிதா கபணமனுஸ்ஸா விய அஸாருப்பே டா²னே நிஸீதி³த்வா பு⁴ஞ்ஜந்தீதி.

அத்தி² நாம தாதாதி ஏத்த² அத்தீ²தி விஜ்ஜமானத்தே², நாமாதி புச்ச²னத்தே² மஞ்ஞனத்தே² வா நிபாதோ. இத³ஞ்ஹி வுத்தம் ஹோதி – அத்தி² நு கோ², தாத ரட்ட²பால, அம்ஹாகம் த⁴னம், நனு மயம் நித்³த⁴னாதி வத்தப்³பா³, யேஸம் நோ த்வம் ஈதி³ஸே டா²னே நிஸீதி³த்வா ஆபி⁴தோ³ஸிகம் கும்மாஸம் பரிபு⁴ஞ்ஜிஸ்ஸஸி. ததா² அத்தி² நு கோ², தாத ரட்ட²பால, அம்ஹாகம் ஜீவிதம், நனு மயம் மதாதி வத்தப்³பா³, யேஸம் நோ த்வம் ஈதி³ஸே டா²னே நிஸீதி³த்வா ஆபி⁴தோ³ஸிகம் கும்மாஸம் பரிபு⁴ஞ்ஜிஸ்ஸஸி. ததா² அத்தி² மஞ்ஞே, தாத ரட்ட²பால, தவ அப்³ப⁴ந்தரே ஸாஸனம் நிஸ்ஸாய படிலத்³தோ⁴ ஸமணகு³ணோ, யம் த்வம் ஸுபோ⁴ஜனரஸஸம்வட்³டி⁴தோபி இமம் ஜிகு³ச்ச²னேய்யம் ஆபி⁴தோ³ஸிகம் கும்மாஸம் அமதமிவ நிப்³பி³காரோ பரிபு⁴ஞ்ஜிஸ்ஸஸீதி. ஸோ பன க³ஹபதி து³க்கா²பி⁴துன்னதாய ஏதமத்த²ம் பரிபுண்ணம் கத்வா வத்துமஸக்கோந்தோ – ‘‘அத்தி² நாம, தாத ரட்ட²பால, ஆபி⁴தோ³ஸிகம் கும்மாஸம் பரிபு⁴ஞ்ஜிஸ்ஸஸீ’’தி ஏத்தகமேவ அவச. அக்க²ரசிந்தகா பனேத்த² இத³ம் லக்க²ணம் வத³ந்தி – அனோகப்பனாமரிஸனத்த²வஸேனேதம் அத்தி²ஸத்³தே³ உபபதே³ ‘‘பரிபு⁴ஞ்ஜிஸ்ஸஸீ’’தி அனாக³தவசனம் கதம். தஸ்ஸாயமத்தோ² – ‘‘அத்தி² நாம…பே… பரிபு⁴ஞ்ஜிஸ்ஸஸி, இத³ம் பச்சக்க²ம்பி அஹம் ந ஸத்³த³ஹாமி ந மரிஸயாமீ’’தி. இத³ம் ஏத்தகம் வசனம் க³ஹபதி தே²ரஸ்ஸ பத்தமுக²வட்டியம் க³ஹேத்வா டி²தகோவ கதே²ஸி. தே²ரோபி பிதரி பத்தமுக²வட்டியம் க³ஹேத்வா டி²தேயேவ தம் பூதிகும்மாஸம் பரிபு⁴ஞ்ஜி ஸுனக²வந்தஸதி³ஸம் பூதிகுக்குடண்ட³மிவ பி⁴ன்னட்டா²னே பூதிகம் வாயந்தம். புது²ஜ்ஜனேன கிர ததா²ரூபம் கும்மாஸம் பரிபு⁴ஞ்ஜிதும் ந ஸக்கா. தே²ரோ பன அரியித்³தி⁴யம் ட²த்வா தி³ப்³போ³ஜம் அமதரஸம் பரிபு⁴ஞ்ஜமானோ விய பரிபு⁴ஞ்ஜித்வா த⁴மகரணேன உத³கம் க³ஹேத்வா பத்தஞ்ச முக²ஞ்ச ஹத்த²பாதே³ ச தோ⁴வித்வா குதோ நோ க³ஹபதீதிஆதி³மாஹ.

தத்த² குதோ நோதி குதோ நு. நேவ தா³னந்தி தே³ய்யத⁴ம்மவஸேன நேவ தா³னம் அலத்த²ம்ஹ. ந பச்சக்கா²னந்தி ‘‘கிம், தாத ரட்ட²பால, கச்சி தே க²மனீயம், கச்சிஸி அப்பகிலமதே²ன ஆக³தோ, ந தாவ தாத கே³ஹே ப⁴த்தம் ஸம்பாதி³யதீ’’தி ஏவம் படிஸந்தா²ரவஸேன பச்சக்கா²னம்பி ந அலத்த²ம்ஹ. கஸ்மா பன தே²ரோ ஏவமாஹ? பிது அனுக்³க³ஹேன. ஏவம் கிரஸ்ஸ அஹோஸி – ‘‘யதா² ஏஸ மம் வத³தி, அஞ்ஞேபி பப்³ப³ஜிதே ஏவம் வத³தி மஞ்ஞே. பு³த்³த⁴ஸாஸனே ச பத்தந்தரே பது³மம் விய ப⁴ஸ்மாச²ன்னோ அக்³கி³ விய பே²க்³கு³படிச்ச²ன்னோ சந்த³னஸாரோ விய ஸுத்திகாபடிச்ச²ன்னம் முத்தரதனம் விய வலாஹகபடிச்ச²ன்னோ சந்தி³மா விய மாதி³ஸானம் படிச்ச²ன்னகு³ணானம் பி⁴க்கூ²னம் அந்தோ நத்தி², தேஸுபி ந ஏவரூபம் வசனம் பவத்தேஸ்ஸதி, ஸம்வரே ட²ஸ்ஸதீ’’தி அனுக்³க³ஹேன ஏவமாஹ.

ஏஹி தாதாதி தாத துய்ஹம் க⁴ரம் மா ஹோது, ஏஹி க⁴ரம் க³மிஸ்ஸாமாதி வத³தி. அலந்தி தே²ரோ உக்கட்ட²ஏகாஸனிகதாய படிக்கி²பந்தோ ஏவமாஹ. அதி⁴வாஸேஸீதி தே²ரோ பன பகதியா உக்கட்ட²ஸபதா³னசாரிகோ ஸ்வாதனாயபி⁴க்க²ம் நாம நாதி⁴வாஸேதி, மாது அனுக்³க³ஹேன பன அதி⁴வாஸேஸி. மாது கிரஸ்ஸ தே²ரம் அனுஸ்ஸரித்வா மஹாஸோகோ உப்பஜ்ஜி, ரோத³னேனேவ பக்கக்கி² விய ஜாதா, தஸ்மா தே²ரோ ‘‘ஸசாஹம் தம் அபஸ்ஸித்வா க³மிஸ்ஸாமி, ஹத³யம்பிஸ்ஸா பா²லேய்யா’’தி அனுக்³க³ஹேன அதி⁴வாஸேஸி. காராபேத்வாதி ஏகம் ஹிரஞ்ஞஸ்ஸ, ஏகம் ஸுவண்ணஸ்ஸாதி த்³வே புஞ்ஜே காராபேத்வா. கீவமஹந்தா பன புஞ்ஜா அஹேஸுந்தி. யதா² ஓரதோ டி²தோ புரிஸோ பாரதோ டி²தம் மஜ்ஜி²மப்பமாணம் புரிஸம் ந பஸ்ஸதி, ஏவம்மஹந்தா.

301. இத³ம் தே தாதாதி கஹாபணபுஞ்ஜஞ்ச ஸுவண்ணபுஞ்ஜஞ்ச த³ஸ்ஸேந்தோ ஆஹ. மத்திகந்தி மாதிதோ ஆக³தம், இத³ம் தே மாதாமஹியா மாது இமம் கே³ஹம் ஆக³ச்ச²ந்தியா க³ந்த⁴மாலாதீ³னம் அத்தா²ய தி³ன்னம் த⁴னந்தி அத்தோ². அஞ்ஞம் பேத்திகம் அஞ்ஞம் பிதாமஹந்தி யம் பன தே பிது ச பிதாமஹானஞ்ச ஸந்தகம், தம் அஞ்ஞம்யேவ, நிஹிதஞ்ச பயுத்தஞ்ச அதிவிய ப³ஹு. ஏத்த² ச ‘‘பிதாமஹ’’ந்தி தத்³தி⁴தலோபம் கத்வா வுத்தந்தி வேதி³தப்³ப³ம். ‘‘பேதாமஹ’’ந்தி வா பாடோ². ஸக்கா ததோனிதா³னந்தி த⁴னஹேது த⁴னபச்சயா. தம் தம் த⁴னம் ரக்க²ந்தஸ்ஸ ச ராஜாதீ³னம் வஸேன த⁴னபரிக்க²யம் பாபுணந்தஸ்ஸ கஸ்ஸசி உப்பஜ்ஜமானஸோகாத³யோ ஸந்தா⁴ய ஏவமாஹ. ஏவம் வுத்தே ஸேட்டி² க³ஹபதி – ‘‘அஹம் இமம் உப்பப்³பா³ஜேஸ்ஸாமீதி ஆனேஸிம், ஸோ தா³னி மே த⁴ம்மகத²ம் காதும் ஆரத்³தோ⁴, அயம் ந மே வசனம் கரிஸ்ஸதீ’’தி உட்டா²ய க³ந்த்வா அஸ்ஸ ஓரோதா⁴னம் த்³வாரம் விவராபேத்வா – ‘‘அயம் வோ ஸாமிகோ, க³ச்ச²த² யம் கிஞ்சி கத்வா நம் க³ண்ஹிதும் வாயமதா²’’தி உய்யோஜேஸி. ஸுவயே டி²தா நாடகித்தி²யோ நிக்க²மித்வா தே²ரம் பரிவாரயிம்ஸு, தாஸு த்³வே ஜேட்ட²கித்தி²யோ ஸந்தா⁴ய புராணது³தியிகாதிஆதி³ வுத்தம். பச்சேகம் பாதே³ஸு க³ஹேத்வாதி ஏகேகம்ஹி பாதே³ நம் க³ஹேத்வா.

கீதி³ஸா நாம தா அய்யபுத்த அச்ச²ராயோதி கஸ்மா ஏவமாஹம்ஸு? ததா³ கிர ஸம்ப³ஹுலே க²த்தியகுமாரேபி ப்³ராஹ்மணகுமாரேபி ஸேட்டி²புத்தேபி மஹாஸம்பத்தியோ பஹாய பப்³ப³ஜந்தே தி³ஸ்வா பப்³ப³ஜ்ஜாகு³ணம் அஜானந்தா கத²ம் ஸமுட்டா²பேந்தி ‘‘கஸ்மா ஏதே பப்³ப³ஜந்தீ’’தி. அத²ஞ்ஞே வத³ந்தி ‘‘தே³வச்ச²ராதே³வனாடகானம் காரணா’’தி. ஸா கதா² வித்தா²ரிகா அஹோஸி. தம் க³ஹேத்வா ஸப்³பா³ ஏவமாஹம்ஸு. அத² தே²ரோ படிக்கி²பந்தோ ந கோ² மயம் ப⁴கி³னீதிஆதி³மாஹ. ஸமுதா³சரதீதி வோஹரதி வத³தி. தத்தே²வ முச்சி²தா பபதிம்ஸூதி தம் ப⁴கி³னிவாதே³ன ஸமுதா³சரந்தம் தி³ஸ்வா ‘‘மயம் அஜ்ஜ ஆக³மிஸ்ஸதி, அஜ்ஜ ஆக³மிஸ்ஸதீ’’தி த்³வாத³ஸ வஸ்ஸானி ப³ஹி ந நிக்க²ந்தா, ஏதம் நிஸ்ஸாய நோ தா³ரகா ந லத்³தா⁴, யேஸம் ஆனுபா⁴வேன ஜீவேய்யாம, இதோ சம்ஹா பரிஹீனா அஞ்ஞதோ ச. அயம் லோகோ நாம அத்தனோவ சிந்தேஸி, தஸ்மா தாபி ‘‘இதா³னி மயம் அனாதா² ஜாதா’’தி அத்தனோவ சிந்தயமானா – ‘‘அனத்தி²கோ தா³னி அம்ஹேஹி அயம், ஸோ அம்ஹே பஜாபதியோ ஸமானா அத்தனா ஸத்³தி⁴ம் ஏகமாதுகுச்சி²யா ஸயிததா³ரிகா விய மஞ்ஞதீ’’தி ஸமுப்பன்னப³லவஸோகா ஹுத்வா தஸ்மிம்யேவ பதே³ஸே முச்சி²தா பபதிம்ஸு, பதிதாதி அத்தோ².

மா நோ விஹேடே²தா²தி மா அம்ஹே த⁴னம் த³ஸ்ஸேத்வா மாதுகா³மே ச உய்யோஜேத்வா விஹேட²யித்த², விஹேஸா ஹேஸா பப்³ப³ஜிதானந்தி. கஸ்மா ஏவமாஹ? மாதாபிதூனம் அனுக்³க³ஹேன. ஸோ கிர ஸேட்டி² – ‘‘பப்³ப³ஜிதலிங்க³ம் நாம கிலிட்ட²ம், பப்³ப³ஜ்ஜாவேஸம் ஹாரேத்வா ந்ஹாயித்வா தயோ ஜனா ஏகதோ பு⁴ஞ்ஜிஸ்ஸாமா’’தி மஞ்ஞமானோ தே²ரஸ்ஸ பி⁴க்க²ம் ந தே³தி. தே²ரோ – ‘‘மாதி³ஸஸ்ஸ கீ²ணாஸவஸ்ஸ ஆஹாரந்தராயம் கத்வா ஏதே ப³ஹும் அபுஞ்ஞம் பஸவேய்யு’’ந்தி தேஸம் அனுக்³க³ஹேன ஏவமாஹ.

302. கா³தா² அபா⁴ஸீதி கா³தா²யோ அபா⁴ஸி. தத்த² பஸ்ஸாதி ஸந்திகே டி²தஜனம் ஸந்தா⁴ய வத³தி. சித்தந்தி சித்தவிசித்தம். பி³ம்ப³ந்தி அத்தபா⁴வம். அருகாயந்தி நவன்னம் வணமுகா²னம் வஸேன வணகாயம். ஸமுஸ்ஸிதந்தி தீணி அட்டி²ஸதானி நவஹி ந்ஹாருஸதேஹி ப³ந்தி⁴த்வா நவஹி மம்ஸபேஸிஸதேஹி லிம்பித்வா ஸமந்ததோ உஸ்ஸிதம். ஆதுரந்தி ஜராதுரதாய ரோகா³துரதாய கிலேஸாதுரதாய ச நிச்சாதுரம். ப³ஹுஸங்கப்பந்தி பரேஸம் உப்பன்னபத்த²னாஸங்கப்பேஹி ப³ஹுஸங்கப்பம். இத்தீ²னஞ்ஹி காயே புரிஸானம் ஸங்கப்பா உப்பஜ்ஜந்தி, தேஸம் காயே இத்தீ²னம். ஸுஸானே ச²ட்³டி³தகளேவரபூ⁴தம்பி சேதம் காககுலலாத³யோ பத்த²யந்தியேவாதி ப³ஹுஸங்கப்போ நாம ஹோதி. யஸ்ஸ நத்தி² து⁴வம் டி²தீதி யஸ்ஸ காயஸ்ஸ மாயாமரீசிபே²ணபிண்ட³ உத³கபுப்பு²ளாதீ³னம் விய ஏகம்ஸேனேவ டி²தி நாம நத்தி², பி⁴ஜ்ஜனத⁴ம்மதாவ நியதா.

தசேன ஓனத்³த⁴ந்தி அல்லமனுஸ்ஸசம்மேன ஓனத்³த⁴ம். ஸஹ வத்தே²பி⁴ ஸோப⁴தீதி க³ந்தா⁴தீ³ஹி மணிகுண்ட³லேஹி ச சித்தகதம்பி ரூபம் வத்தே²ஹி ஸஹேவ ஸோப⁴தி, வினா வத்தே²ஹி ஜேகு³ச்ச²ம் ஹோதி அனோலோகனக்க²மம்.

அலத்தககதாதி அலத்தகேன ரஞ்ஜிதா. சுண்ணகமக்கி²தந்தி ஸாஸபகக்கேன முக²பீளகாதீ³னி நீஹரித்வா லோணமத்திகாய து³ட்ட²லோஹிதம் விலியாபேத்வா திலபிட்டே²ன லோஹிதம் பஸாதே³த்வா ஹலித்³தி³யா வண்ணம் ஸம்பாதே³த்வா சுண்ணகக³ண்டி³காய முக²ம் பஹரந்தி, தேனேஸ அதிவிய விரோசதி. தம் ஸந்தா⁴யேதம் வுத்தம்.

அட்டா²பத³கதாதி ரஸோத³கேன மக்கி²த்வா நலாடபரியந்தே ஆவத்தனபரிவத்தே கத்வா அட்ட²பத³கரசனாய ரசிதா. அஞ்ஜனீதி அஞ்ஜனனாளிகா.

ஓத³ஹீதி ட²பேஸி. பாஸந்தி வாகராஜாலம். நாஸதா³தி ந க⁴ட்டயி. நிவாபந்தி நிவாபஸுத்தே வுத்தனிவாபதிணஸதி³ஸபோ⁴ஜனம். கந்த³ந்தேதி விரவமானே பரிதே³வமானே. இமாய ஹி கா³தா²ய தே²ரோ மாதாபிதரோ மிக³லுத்³த³கே விய கத்வா த³ஸ்ஸேஸி, அவஸேஸஞாதகே மிக³லுத்³த³கபரிஸம் விய, ஹிரஞ்ஞஸுவண்ணம் வாகராஜாலம் விய, அத்தனா பு⁴த்தபோ⁴ஜனம் நிவாபதிணம் விய, அத்தானம் மஹாமிக³ம் விய கத்வா த³ஸ்ஸேஸி. யதா² ஹி மஹாமிகோ³ யாவத³த்த²ம் நிவாபதிணம் கா²தி³த்வா பானீயம் பிவித்வா கீ³வம் உக்கி²பித்வா தி³ஸம் ஓலோகேத்வா ‘‘இமம் நாம டா²னம் க³தஸ்ஸ ஸோத்தி² ப⁴விஸ்ஸதீ’’தி மிக³லுத்³த³கானம் பரிதே³வந்தானம்யேவ வாகரம் அக⁴ட்டயமானோவ உப்பதித்வா அரஞ்ஞம் பவிஸித்வா க⁴னச்சா²யஸ்ஸ ச²த்தஸ்ஸ விய கு³ம்ப³ஸ்ஸ ஹேட்டா² மந்த³மந்தே³ன வாதேன பீ³ஜயமானோ ஆக³தமக்³க³ம் ஓலோகேந்தோ திட்ட²தி, ஏவமேவ தே²ரோ இமா கா³தா² பா⁴ஸித்வா ஆகாஸேனேவ க³ந்த்வா மிக³சீரே பச்சுபட்டா²ஸி.

கஸ்மா பன தே²ரோ ஆகாஸேன க³தோதி. பிதா கிரஸ்ஸ ஸேட்டி² ஸத்தஸு த்³வாரகோட்ட²கேஸு அக்³க³ளம் தா³பேத்வா மல்லே ஆணாபேஸி – ‘‘ஸசே நிக்க²மித்வா க³ச்ச²தி, ஹத்த²பாதே³ஸு நம் க³ஹேத்வா காஸாயானி ஹரித்வா கி³ஹிவேஸம் க³ண்ஹாபேதா²’’தி. தஸ்மா தே²ரோ – ‘‘ஏதே மாதி³ஸம் மஹாகீ²ணாஸவம் ஹத்தே² வா பாதே³ வா க³ஹேத்வா அபுஞ்ஞம் பஸவேய்யும், தம் நேஸம் மா அஹோஸீ’’தி சிந்தேத்வா ஆகாஸேன அக³மாஸி. பரஸமுத்³த³வாஸித்தே²ரானம் பன – ‘‘டி²தகோவ இமா கா³தா² பா⁴ஸித்வா வேஹாஸம் அப்³பு⁴க்³க³ந்த்வா ரஞ்ஞோ கோரப்³யஸ்ஸ மிக³சீரே பச்சுபட்டா²ஸீ’’தி அயம் வாசனாமக்³கோ³யேவ.

303. மிக³வோதி தஸ்ஸ உய்யானபாலஸ்ஸ நாமம். ஸோதே⁴ந்தோதி உய்யானமக்³க³ம் ஸமம் காரேத்வா அந்தோஉய்யானே தச்சி²தப்³ப³யுத்தட்டா²னானி தச்சா²பேந்தோ ஸம்மஜ்ஜிதப்³ப³யுத்தானி டா²னானி ஸம்மஜ்ஜாபேந்தோ வாலுகாஓகிரண-புப்ப²விகிரண-புண்ணக⁴டட்ட²பன-கத³லிக்க²ந்த⁴ட²பனாதீ³னி ச கரோந்தோதி அத்தோ². யேன ராஜா கோரப்³யோ தேனுபஸங்கமீதி அம்ஹாகம் ராஜா ஸதா³ இமஸ்ஸ குலபுத்தஸ்ஸ வண்ணம் கதே²ஸி, பஸ்ஸிதுகாமோ ஏதம், ஆக³தபா⁴வம் பனஸ்ஸ ந ஜானாதி, மஹா கோ² பனாயம் பண்ணாகாரோ, க³ந்த்வா ரஞ்ஞோ ஆரோசேஸ்ஸாமீதி சிந்தேத்வா யேன ராஜா கோரப்³யோ தேனுபஸங்கமி.

கித்தயமானோ அஹோஸீதி ஸோ கிர ராஜா தே²ரம் அனுஸ்ஸரித்வா ப³லமஜ்ஜே²பி நாடகமஜ்ஜே²பி – ‘‘து³க்கரம் கதம் குலபுத்தேன தாவ மஹந்தம் ஸம்பத்திம் பஹாய பப்³ப³ஜித்வா புனனிவத்தித்வா அனபலோகேந்தேனா’’தி கு³ணம் கதே²ஸி, தம் க³ஹேத்வா அயம் ஏவமாஹ. விஸ்ஸஜ்ஜேதா²தி வத்வாதி ஓரோத⁴மஹாமத்தப³லகாயாதீ³ஸு யஸ்ஸ யம் அனுச்ச²விகம், தஸ்ஸ தம் தா³பேத்வாதி அத்தோ². உஸ்ஸடாய உஸ்ஸடாயாதி உஸ்ஸிதாய உஸ்ஸிதாய, மஹாமத்தமஹாரட்டி²காதீ³னம் வஸேன உக்³க³துக்³க³தமேவ பரிஸம் க³ஹேத்வா உபஸங்கமீதி அத்தோ². இத⁴ ப⁴வம் ரட்ட²பாலோ ஹத்த²த்த²ரே நிஸீத³தூதி ஹத்த²த்த²ரோ தனுகோ ப³ஹலபுப்பா²தி³கு³ணம் கத்வா அத்த²தோ அபி⁴லக்கி²தோ ஹோதி, தாதி³ஸே அனாபுச்சி²த்வா நிஸீதி³தும் ந யுத்தந்தி மஞ்ஞமானோ ஏவமாஹ.

304. பாரிஜுஞ்ஞானீதி பாரிஜுஞ்ஞபா⁴வா பரிக்க²யா. ஜிண்ணோதி ஜராஜிண்ணோ. வுட்³டோ⁴தி வயோவுட்³டோ⁴. மஹல்லகோதி ஜாதிமஹல்லகோ. அத்³த⁴க³தோதி அத்³தா⁴னம் அதிக்கந்தோ. வயோஅனுப்பத்தோதி பச்சி²மவயம் அனுப்பத்தோ. பப்³ப³ஜதீதி து⁴ரவிஹாரம் க³ந்த்வா பி⁴க்கூ² வந்தி³த்வா, – ‘‘ப⁴ந்தே, மயா த³ஹரகாலே ப³ஹும் குஸலம் கதம், இதா³னி மஹல்லகோம்ஹி, மஹல்லகஸ்ஸ சேஸா பப்³ப³ஜ்ஜா நாம, சேதியங்க³ணம் ஸம்மஜ்ஜித்வா அப்பஹரிதம் கத்வா ஜீவிஸ்ஸாமி, பப்³பா³ஜேத² மம், ப⁴ந்தே,’’தி காருஞ்ஞம் உப்பாதே³ந்தோ யாசதி, தே²ரா அனுகம்பாய பப்³பா³ஜேந்தி. தம் ஸந்தா⁴யேதம் வுத்தம். து³தியவாரேபி ஏஸேவ நயோ.

அப்பாபா³தோ⁴தி அரோகோ³. அப்பாதங்கோதி நித்³து³க்கோ². ஸமவேபாகினியாதி ஸமவிபாசனியா. க³ஹணியாதி கம்மஜதேஜோதா⁴துயா. தத்த² யஸ்ஸ பு⁴த்தபு⁴த்தோ ஆஹாரோ ஜீரதி, யஸ்ஸ வா பன புடப⁴த்தம் விய ததே²வ திட்ட²தி, உபோ⁴பேதே ந ஸமவேபாகினியா க³ஹணியா ஸமன்னாக³தா. யஸ்ஸ பன பு⁴த்தகாலே ப⁴த்தச்ச²ந்தோ³ உப்பஜ்ஜதேவ, அயம் ஸமவேபாகினியா ஸமன்னாக³தோ. நாதிஸீதாய நச்சுண்ஹாயாதி தேனேவ காரணேன நாதிஸீதாய நச்சுண்ஹாய. அனுபுப்³பே³னாதி ராஜானோ வா ஹரந்தீதிஆதி³னா அனுக்கமேன. து³தியவாரே ராஜப⁴யசோரப⁴யசா²தகப⁴யாதி³னா அனுக்கமேன.

305. த⁴ம்முத்³தே³ஸா உத்³தி³ட்டா²தி த⁴ம்மனித்³தே³ஸா உத்³தி³ட்டா². உபனிய்யதீதி ஜராமரணஸந்திகம் க³ச்ச²தி, ஆயுக்க²யேன வா தத்த² நிய்யதி. அத்³து⁴வோதி து⁴வட்டா²னவிரஹிதோ. அதாணோதி தாயிதும் ஸமத்தே²ன விரஹிதோ. அனபி⁴ஸ்ஸரோதி அஸரணோ அபி⁴ஸரித்வா அபி⁴க³ந்த்வா அஸ்ஸாஸேதும் ஸமத்தே²ன விரஹிதோ. அஸ்ஸகோதி நிஸ்ஸகோ ஸகப⁴ண்ட³விரஹிதோ. ஸப்³ப³ம் பஹாய க³மனீயந்தி ஸகப⁴ண்ட³ந்தி ஸல்லக்கி²தம் ஸப்³ப³ம் பஹாய லோகேன க³ந்தப்³ப³ம். தண்ஹாதா³ஸோதி தண்ஹாய தா³ஸோ.

306. ஹத்தி²ஸ்மிந்தி ஹத்தி²ஸிப்பே. கதாவீதி கதகரணீயோ, ஸிக்கி²தஸிக்கோ² பகு³ணஸிப்போதி அத்தோ². ஏஸ நயோ ஸப்³ப³த்த². ஊருப³லீதி ஊருப³லஸம்பன்னோ. யஸ்ஸ ஹி ப²லகஞ்ச ஆவுத⁴ஞ்ச க³ஹேத்வா பரஸேனம் பவிஸித்வா அபி⁴ன்னம் பி⁴ந்த³தோ பி⁴ன்னம் ஸந்தா⁴ரயதோ பரஹத்த²க³தம் ரஜ்ஜம் ஆஹரிதும் ஊருப³லம் அத்தி², அயம் ஊருப³லீ நாம. பா³ஹுப³லீதி பா³ஹுப³லஸம்பன்னோ. ஸேஸம் புரிமஸதி³ஸமேவ. அலமத்தோதி ஸமத்த²அத்தபா⁴வோ.

பரியோதா⁴ய வத்திஸ்ஸந்தீதி உப்பன்னம் உப்பத்³த³வம் ஓதா⁴ய அவத்த²ரித்வா வத்திஸ்ஸந்தீதி ஸல்லக்கே²த்வா க³ஹிதா.

ஸம்விஜ்ஜதி கோ², போ⁴ ரட்ட²பால, இமஸ்மிம் ராஜகுலே பஹூதம் ஹிரஞ்ஞஸுவண்ணந்தி இத³ம் ஸோ ராஜா உபரி த⁴ம்முத்³தே³ஸஸ்ஸ காரணம் ஆஹரந்தோ ஆஹ.

அதா²பரம் ஏதத³வோசாதி ஏதம் ‘‘பஸ்ஸாமி லோகே’’திஆதி³னா நயேன சதுன்னம் த⁴ம்முத்³தே³ஸானம் அனுகீ³திம் அவோச.

307. தத்த² பி⁴ய்யோவ காமே அபி⁴பத்த²யந்தீதி ஏகம் லபி⁴த்வா த்³வே பத்த²யந்தி, த்³வே லபி⁴த்வா சத்தாரோதி ஏவம் உத்தருத்தரி வத்து²காமகிலேஸகாமே பத்த²யந்தியேவ.

பஸய்ஹாதி ஸபத்தக³ணம் அபி⁴ப⁴வித்வா. ஸஸாக³ரந்தந்தி ஸத்³தி⁴ம் ஸாக³ரந்தேன. ஓரம் ஸமுத்³த³ஸ்ஸாதி யம் ஸமுத்³த³ஸ்ஸ ஓரதோ ஸகரட்ட²ம், தேன அதித்தரூபோதி அத்தோ². ந ஹத்தீ²தி ந ஹி அத்தி².

அஹோ வதா நோதி அஹோ வத நு, அயமேவ வா பாடோ². அமராதி சாஹூதி அமரம் இதி ச ஆஹு. இத³ம் வுத்தம் ஹோதி – யம் மதம் ஞாதீ பரிவாரேத்வா கந்த³ந்தி, தம் – ‘‘அஹோ வத அம்ஹாகம் பா⁴தா மதோ, புத்தோ மதோ’’திஆதீ³னிபி வத³ந்தி.

பு²ஸந்தி ப²ஸ்ஸந்தி மரணப²ஸ்ஸம் பு²ஸந்தி. ததே²வ பு²ட்டோ²தி யதா² பா³லோ, தீ⁴ரோபி ததே²வ மரணப²ஸ்ஸேன பு²ட்டோ², அபு²ட்டோ² நாம நத்தி², அயம் பன விஸேஸோ. பா³லோ ச பா³ல்யா வதி⁴தோவ ஸேதீதி பா³லோ பா³லபா⁴வேன மரணப²ஸ்ஸம் ஆக³ம்ம வதி⁴தோவ ஸேதி அபி⁴ஹதோவ ஸயதி. அகதம் வத மே கல்யாணந்திஆதி³விப்படிஸாரவஸேன சலதி வேத⁴தி விப்ப²ந்த³தி. தீ⁴ரோ ச ந வேத⁴தீதி தீ⁴ரோ ஸுக³தினிமித்தம் பஸ்ஸந்தோ ந வேத⁴தி ந சலதி.

யாய வோஸானம் இதா⁴தி⁴க³ச்ச²தீதி யாய பஞ்ஞாய இமஸ்மிம் லோகே ஸப்³ப³கிச்சவோஸானம் அரஹத்தம் அதி⁴க³ச்ச²தி, ஸாவ த⁴னதோ உத்தமதரா. அப்³யோஸிதத்தாதி அபரியோஸிதத்தா, அரஹத்தபத்தியா, அபா⁴வேனாதி அத்தோ². ப⁴வாப⁴வேஸூதி ஹீனப்பணீதேஸு ப⁴வேஸு.

உபேதி க³ப்³ப⁴ஞ்ச பரஞ்ச லோகந்தி தேஸு பாபம் கரோந்தேஸு யோ கோசி ஸத்தோ பரம்பராய ஸம்ஸாரம் ஆபஜ்ஜித்வா க³ப்³ப⁴ஞ்ச பரஞ்ச லோகம் உபேதி. தஸ்ஸப்பபஞ்ஞோதி தஸ்ஸ தாதி³ஸஸ்ஸ அப்பபஞ்ஞஸ்ஸ அஞ்ஞோ அப்பபஞ்ஞோ அபி⁴ஸத்³த³ஹந்தோ.

ஸகம்முனா ஹஞ்ஞதீதி அத்தனா கதகம்மவஸேன ‘‘கஸாஹிபி தாலேதீ’’திஆதீ³ஹி கம்மகாரணாஹி ஹஞ்ஞதி. பேச்ச பரம்ஹி லோகேதி இதோ க³ந்த்வா பரம்ஹி அபாயலோகே.

விரூபரூபேனாதி விவித⁴ரூபேன, நானாஸபா⁴வேனாதி அத்தோ². காமகு³ணேஸூதி தி³ட்ட²த⁴ம்மிகஸம்பராயிகேஸு ஸப்³ப³காமகு³ணேஸு ஆதீ³னவம் தி³ஸ்வா. த³ஹராதி அந்தமஸோ கலலமத்தபா⁴வம் உபாதா³ய தருணா. வுட்³டா⁴தி வஸ்ஸஸதாதிக்கந்தா. அபண்ணகம் ஸாமஞ்ஞமேவ ஸேய்யோதி அவிருத்³த⁴ம் அத்³வஜ்ஜ²கா³மிம் ஏகந்தனிய்யானிகம் ஸாமஞ்ஞமேவ ‘‘ஸேய்யோ, உத்தரிதரஞ்ச பணீததரஞ்சா’’தி உபதா⁴ரேத்வா பப்³ப³ஜிதோஸ்மி மஹாராஜாதி. தஸ்மா யம் த்வம் வத³ஸி – ‘‘கிம் தி³ஸ்வா வா ஸுத்வா வா’’தி, இத³ம் தி³ஸ்வா ச ஸுத்வா ச பப்³ப³ஜிதோஸ்மீதி மம் தா⁴ரேஹீதி தே³ஸனம் நிட்டா²பேஸீதி.

பபஞ்சஸூத³னியா மஜ்ஜி²மனிகாயட்ட²கதா²ய

ரட்ட²பாலஸுத்தவண்ணனா நிட்டி²தா.

3. மக⁴தே³வஸுத்தவண்ணனா

308. ஏவம் மே ஸுதந்தி மக⁴தே³வஸுத்தம். தத்த² மக⁴தே³வஅம்ப³வனேதி புப்³பே³ மக⁴தே³வோ நாம ராஜா தம் அம்ப³வனம் ரோபேஸி. தேஸு ருக்கே²ஸு பலுஜ்ஜமானேஸு அபரபா⁴கே³ அஞ்ஞேபி ராஜானோ ரோபேஸும்யேவ. தம் பன பட²மவோஹாரவஸேன மக⁴தே³வம்ப³வனந்தேவ ஸங்க²ம் க³தம். ஸிதம் பாத்வாகாஸீதி ஸாயன்ஹஸமயே விஹாரசாரிகம் சரமானோ ரமணீயம் பூ⁴மிபா⁴க³ம் தி³ஸ்வா – ‘‘வஸிதபுப்³ப³ம் நு கோ² மே இமஸ்மிம் ஓகாஸே’’தி ஆவஜ்ஜந்தோ – ‘‘புப்³பே³ அஹம் மக⁴தே³வோ நாம ராஜா ஹுத்வா இமம் அம்ப³வனம் ரோபேஸிம், ஏத்தே²வ பப்³ப³ஜித்வா சத்தாரோ ப்³ரஹ்மவிஹாரே பா⁴வேத்வா ப்³ரஹ்மலோகே நிப்³ப³த்திம். தம் கோ² பனேதம் காரணம் பி⁴க்கு²ஸங்க⁴ஸ்ஸ அபாகடம், பாகடம் கரிஸ்ஸாமீ’’தி அக்³க³க்³க³த³ந்தே த³ஸ்ஸேந்தோ ஸிதம் பாது அகாஸி.

த⁴ம்மோ அஸ்ஸ அத்தீ²தி த⁴ம்மிகோ. த⁴ம்மேன ராஜா ஜாதோதி த⁴ம்மராஜா. த⁴ம்மே டி²தோதி த³ஸகுஸலகம்மபத²த⁴ம்மே டி²தோ. த⁴ம்மம் சரதீதி ஸமம் சரதி. தத்ர ப்³ராஹ்மணக³ஹபதிகேஸூதி யோபி ஸோ புப்³ப³ராஜூஹி ப்³ராஹ்மணானம் தி³ன்னபரிஹாரோ, தம் அஹாபேத்வா பகதினியாமேனேவ அதா³ஸி, ததா² க³ஹபதிகானம். தம் ஸந்தா⁴யேதம் வுத்தம். பக்க²ஸ்ஸாதி இமினா பாடிஹாரிகபக்கோ²பி ஸங்க³ஹிதோ. அட்ட²மீஉபோஸத²ஸ்ஸ ஹி பச்சுக்³க³மனானுக்³க³மனவஸேன ஸத்தமியஞ்ச நவமியஞ்ச, சாதுத்³த³ஸபன்னரஸானம் பச்சுக்³க³மனானுக்³க³மனவஸேன தேரஸியஞ்ச பாடிபதே³ சாதி இமே தி³வஸா பாடிஹாரிகபக்கா²தி வேதி³தப்³பா³. தேஸுபி உபோஸத²ம் உபவஸி.

309. தே³வதூ³தாதி தே³வோதி மச்சு, தஸ்ஸ தூ³தாதி தே³வதூ³தா. ஸிரஸ்மிஞ்ஹி பலிதேஸு பாதுபூ⁴தேஸு மச்சுராஜஸ்ஸ ஸந்திகே டி²தோ விய ஹோதி, தஸ்மா பலிதானி மச்சுதே³வஸ்ஸ தூ³தாதி வுச்சந்தி. தே³வா விய தூ³தாதிபி தே³வதூ³தா. யதா² ஹி அலங்கதபடியத்தாய தே³வதாய ஆகாஸே ட²த்வா ‘‘அஸுகதி³வஸே மரிஸ்ஸதீ’’தி வுத்தே தம் ததே²வ ஹோதி, ஏவம் ஸிரஸ்மிம் பலிதேஸு பாதுபூ⁴தேஸு தே³வதாப்³யாகரணஸதி³ஸமேவ ஹோதி. தஸ்மா பலிதானி தே³வஸதி³ஸா தூ³தாதி வுச்சந்தி. விஸுத்³தி⁴தே³வானம் தூ³தாதிபி தே³வதூ³தா. ஸப்³ப³போ³தி⁴ஸத்தா ஹி ஜிண்ணப்³யாதி⁴தமதபப்³ப³ஜிதே தி³ஸ்வாவ ஸம்வேக³மாபஜ்ஜித்வா நிக்க²ம்ம பப்³ப³ஜந்தி. யதா²ஹ –

‘‘ஜிண்ணஞ்ச தி³ஸ்வா து³கி²தஞ்ச ப்³யாதி⁴தம்,

மதஞ்ச தி³ஸ்வா க³தமாயுஸங்க²யம்;

காஸாயவத்த²ம் பப்³ப³ஜிதஞ்ச தி³ஸ்வா,

தஸ்மா அஹம் பப்³ப³ஜிதோம்ஹி ராஜா’’தி.

இமினா பரியாயேன பலிதானி விஸுத்³தி⁴தே³வானம் தூ³தத்தா தே³வதூ³தாதி வுச்சந்தி.

கப்பகஸ்ஸ கா³மவரம் த³த்வாதி ஸதஸஹஸ்ஸுட்டா²னகம் ஜேட்ட²ககா³மம் த³த்வா. கஸ்மா அதா³ஸி? ஸம்விக்³க³மானஸத்தா. தஸ்ஸ ஹி அஞ்ஜலிஸ்மிம் ட²பிதானி பலிதானி தி³ஸ்வாவ ஸம்வேகோ³ உப்பஜ்ஜதி. அஞ்ஞானி சதுராஸீதிவஸ்ஸஸஹஸ்ஸானி ஆயு அத்தி², ஏவம் ஸந்தேபி மச்சுராஜஸ்ஸ ஸந்திகே டி²தம் விய அத்தானம் மஞ்ஞமானோ ஸம்விக்³கோ³ பப்³ப³ஜ்ஜம் ரோசேதி. தேன வுத்தம் –

‘‘ஸிரே தி³ஸ்வான பலிதம், மக⁴தே³வோ தி³ஸம்பதி;

ஸம்வேக³ம் அலபீ⁴ தீ⁴ரோ, பப்³ப³ஜ்ஜம் ஸமரோசயீ’’தி.

அபரம்பி வுத்தம் –

‘‘உத்தமங்க³ருஹா மய்ஹம், இமே ஜாதா வயோஹரா;

பாதுபூ⁴தா தே³வதூ³தா, பப்³ப³ஜ்ஜாஸமயோ மமா’’தி.

புரிஸயுகே³தி வம்ஸஸம்ப⁴வே புரிஸே. கேஸமஸ்ஸும் ஓஹாரேத்வாதி தாபஸபப்³ப³ஜ்ஜம் பப்³ப³ஜந்தாபி ஹி பட²மம் கேஸமஸ்ஸும் ஓஹாரேத்வா பப்³ப³ஜந்தி, ததோ பட்டா²ய வட்³டி⁴தே கேஸே ப³ந்தி⁴த்வா ஜடாகலாபத⁴ரா ஹுத்வா விசரந்தி. போ³தி⁴ஸத்தோபி தாபஸபப்³ப³ஜ்ஜம் பப்³ப³ஜி. பப்³ப³ஜிதோ பன அனேஸனம் அனனுயுஞ்ஜித்வா ராஜகே³ஹதோ ஆஹடபி⁴க்கா²ய யாபேந்தோ ப்³ரஹ்மவிஹாரம் பா⁴வேஸி. தஸ்மா ஸோ மேத்தாஸஹக³தேனாதிஆதி³ வுத்தம்.

குமாரகீளிதம் கீளீதி அங்கேன அங்கம் பரிஹரியமானோ கீளி. மாலாகலாபம் விய ஹி நம் உக்கி²பித்வாவ விசரிம்ஸு. ரஞ்ஞோ மக⁴தே³வஸ்ஸ புத்தோ…பே… பப்³ப³ஜீதி இமஸ்ஸ பப்³ப³ஜிததி³வஸே பஞ்ச மங்க³லானி அஹேஸும். மக⁴தே³வரஞ்ஞோ மதகப⁴த்தம், தஸ்ஸ ரஞ்ஞோ பப்³ப³ஜிதமங்க³லம், தஸ்ஸ புத்தஸ்ஸ ச²த்துஸ்ஸாபனமங்க³லம், தஸ்ஸ புத்தஸ்ஸ உபரஜ்ஜமங்க³லம், தஸ்ஸ புத்தஸ்ஸ நாமகரணமங்க³லந்தி ஏகஸ்மிம்யேவ ஸமயே பஞ்ச மங்க³லானி அஹேஸும், ஸகலஜம்பு³தீ³பதலே உன்னங்க³லமஹோஸி.

311. புத்தபபுத்தகாதி புத்தா ச புத்தபுத்தா சாதி ஏவம் பவத்தா தஸ்ஸ பரம்பரா. பச்சி²மகோ அஹோஸீதி பப்³ப³ஜ்ஜாபச்சி²மகோ அஹோஸி. போ³தி⁴ஸத்தோ கிர ப்³ரஹ்மலோகே நிப்³ப³த்தோ – ‘‘பவத்ததி நு கோ² தம் மயா மனுஸ்ஸலோகே நிஹதம் கல்யாணவத்த’’ந்தி ஆவஜ்ஜந்தோ அத்³த³ஸ – ‘‘ஏத்தகம் அத்³தா⁴னம் பவத்ததி, இதா³னி ந பவத்திஸ்ஸதீ’’தி. ந கோ² பனாஹம் மய்ஹம் பவேணியா உச்சி²ஜ்ஜிதும் த³ஸ்ஸாமீதி அத்தனோ வம்ஸே ஜாதரஞ்ஞோயேவ அக்³க³மஹேஸியா குச்சி²ஸ்மிம் படிஸந்தி⁴ம் க³ஹேத்வா அத்தனோ வம்ஸஸ்ஸ நேமிம் க⁴டேந்தோ விய நிப்³ப³த்தோ, தேனேவஸ்ஸ நிமீதி நாமம் அஹோஸி. இதி ஸோ பப்³ப³ஜிதராஜூனம் ஸப்³ப³பச்சி²மகோ ஹுத்வா பப்³ப³ஜிதோதி பப்³ப³ஜ்ஜாபச்சி²மகோ அஹோஸி. கு³ணேஹி பன அதிரேகதரோ. தஸ்ஸ ஹி ஸப்³ப³ராஜூஹி அதிரேகதரா த்³வே கு³ணா அஹேஸும். சதூஸு த்³வாரேஸு ஸதஸஹஸ்ஸம் ஸதஸஹஸ்ஸம் விஸ்ஸஜ்ஜேத்வா தே³வஸிகம் தா³னம் அதா³ஸி, அனுபோஸதி²கஸ்ஸ ச த³ஸ்ஸனம் நிவாரேஸி. அனுபோஸதி²கேஸு ஹி ராஜானம் பஸ்ஸிஸ்ஸாமாதி க³தேஸு தோ³வாரிகோ புச்ச²தி ‘‘தும்ஹே உபோஸதி²கா நோ வா’’தி. யே அனுபோஸதி²கா ஹோந்தி, தே நிவாரேதி ‘‘அனுபோஸதி²கானம் ராஜா த³ஸ்ஸனம் ந தே³தீ’’தி. ‘‘மயம் ஜனபத³வாஸினோ காலே போ⁴ஜனம் குஹிம் லபி⁴ஸ்ஸாமா’’திபி தத்த² வசனோகாஸோ நத்தி². சதூஸு ஹி த்³வாரேஸு ராஜங்க³ணே ச அனேகானி ப⁴த்தசாடிஸஹஸ்ஸானி படியத்தானேவ ஹோந்தி. தஸ்மா மஹாஜனோ இச்சி²திச்சி²தட்டா²னே மஸ்ஸும் காரேத்வா ந்ஹாயித்வா வத்தா²னி பரிவத்தேத்வா யதா²ருசிதம் போ⁴ஜனம் பு⁴ஞ்ஜித்வா உபோஸத²ங்கா³னி அதி⁴ட்டா²ய ரஞ்ஞோ கே³ஹத்³வாரம் க³ச்ச²தி. தோ³வாரிகேன ‘‘உபோஸதி²கா தும்ஹே’’தி புச்சி²தபுச்சி²தா ‘‘ஆம ஆமா’’தி வத³ந்தி. தேன ஹி ஆக³ச்ச²தா²தி பவேஸேத்வா ரஞ்ஞோ த³ஸ்ஸேதி. இதி இமேஹி த்³வீஹி கு³ணேஹி அதிரேகதரோ அஹோஸி.

312. தே³வானம் தாவதிம்ஸானந்தி தாவதிம்ஸப⁴வனே நிப்³ப³த்ததே³வானம். தே கிர தே³வா விதே³ஹரட்டே² மிதி²லனக³ரவாஸினோ ரஞ்ஞோ ஓவாதே³ ட²த்வா பஞ்ச ஸீலானி ரக்கி²த்வா உபோஸத²கம்மம் கத்வா தத்த² நிப்³ப³த்தா ரஞ்ஞோ கு³ணகத²ம் கதே²ந்தி. தே ஸந்தா⁴ய வுத்தம் ‘‘தே³வானம் தாவதிம்ஸான’’ந்தி.

நிஸின்னோ ஹோதீதி பாஸாத³வரஸ்ஸ உபரிக³தோ தா³னஞ்ச ஸீலஞ்ச உபபரிக்க²மானோ நிஸின்னோ ஹோதி. ஏவம் கிரஸ்ஸ அஹோஸி – ‘‘தா³னம் நு கோ² மஹந்தம் உதா³ஹு ஸீலம், யதி³ தா³னம் மஹந்தம், அஜ்ஜோ²த்த²ரித்வா தா³னமேவ த³ஸ்ஸாமி. அத² ஸீலம், ஸீலமேவ பூரிஸ்ஸாமீ’’தி. தஸ்ஸ ‘‘இத³ம் மஹந்தம் இத³ம் மஹந்த’’ந்தி நிச்சி²தும் அஸக்கோந்தஸ்ஸேவ ஸக்கோ க³ந்த்வா புரதோ பாதுரஹோஸி. தேன வுத்தம் அத² கோ², ஆனந்த³,…பே… ஸம்முகே² பாதுரஹோஸீதி. ஏவம் கிரஸ்ஸ அஹோஸி – ‘‘ரஞ்ஞோ கங்கா² உப்பன்னா, தஸ்ஸ கங்க²ச்சே²த³னத்த²ம் பஞ்ஹஞ்ச கதே²ஸ்ஸாமி, இதா⁴க³மனத்தா²ய படிஞ்ஞஞ்ச க³ண்ஹிஸ்ஸாமீ’’தி. தஸ்மா க³ந்த்வா ஸம்முகே² பாதுரஹோஸி. ராஜா அதி³ட்ட²புப்³ப³ம் ரூபம் தி³ஸ்வா பீ⁴தோ அஹோஸி லோமஹட்ட²ஜாதோ. அத² நம் ஸக்கோ – ‘‘மா பா⁴யி, மஹாராஜ, விஸ்ஸத்தோ² பஞ்ஹம் புச்ச², கங்க²ம் தே படிவினோதே³ஸ்ஸாமீ’’தி ஆஹ.

ராஜா –

‘‘புச்சா²மி தம் மஹாராஜ, ஸப்³ப³பூ⁴தானமிஸ்ஸர;

தா³னம் வா ப்³ரஹ்மசரியம் வா, கதமம் ஸு மஹப்ப²ல’’ந்தி. –

பஞ்ஹம் புச்சி². ஸக்கோ – ‘‘தா³னம் நாம கிம், ஸீலமேவ கு³ணவிஸிட்ட²தாய மஹந்தம். அஹஞ்ஹி புப்³பே³, மஹாராஜ, த³ஸவஸ்ஸஸஹஸ்ஸானி த³ஸன்னம் ஜடிலஸஹஸ்ஸானம் தா³னம் த³த்வா பேத்திவிஸயதோ ந முத்தோ, ஸீலவந்தா பன மய்ஹம் தா³னம் பு⁴ஞ்ஜித்வா ப்³ரஹ்மலோகே நிப்³ப³த்தா’’தி வத்வா இமா கா³தா² அவோச –

‘‘ஹீனேன ப்³ரஹ்மசரியேன, க²த்தியே உபபஜ்ஜதி;

மஜ்ஜி²மேன ச தே³வத்தம், உத்தமேன விஸுஜ்ஜ²தி.

ந ஹேதே ஸுலபா⁴ காயா, யாசயோகே³ன கேனசி;

யே காயே உபபஜ்ஜந்தி, அனாகா³ரா தபஸ்ஸினோ’’தி. (ஜா. 2.22.429-430);

ஏவம் ரஞ்ஞோ கங்க²ம் வினோதே³த்வா தே³வலோகக³மனாய படிஞ்ஞாக³ஹணத்த²ம் லாபா⁴ தே மஹாராஜாதிஆதி³மாஹ. தத்த² அவிகம்பமானோதி அபா⁴யமானோ. அதி⁴வாஸேஸீதி அஹம் மஹாஜனம் குஸலம் ஸமாத³பேமி, புஞ்ஞவந்தானம் பன வஸனட்டா²னம் தி³ஸ்வா ஆக³தேன மனுஸ்ஸபதே² ஸுக²ம் கதே²தும் ஹோதீதி அதி⁴வாஸேஸி.

313. ஏவம் ப⁴த்³த³ந்தவாதி ஏவம் ஹோது ப⁴த்³த³கம் தவ வசனந்தி வத்வா. யோஜேத்வாதி ஏகஸ்மிம்யேவ யுகே³ ஸஹஸ்ஸஅஸ்ஸாஜானீயே யோஜேத்வா. தேஸம் பன பாடியேக்கம் யோஜனகிச்சம் நத்தி², மனம் ஆக³ம்ம யுத்தாயேவ ஹோந்தி. ஸோ பன தி³ப்³ப³ரதோ² தி³யட்³ட⁴யோஜனஸதிகோ ஹோதி, நத்³தி⁴தோ பட்டா²ய ரத²ஸீஸம் பஞ்ஞாஸயோஜனானி, அக்க²ப³ந்தோ⁴ பண்ணாஸயோஜனானி, அக்க²ப³ந்த⁴தோ பட்டா²ய பச்சா²பா⁴கோ³ பண்ணாஸயோஜனானி, ஸப்³போ³ ஸத்தவண்ணரதனமயோ. தே³வலோகோ நாம உத்³த⁴ம், மனுஸ்ஸலோகோ அதோ⁴, தஸ்மா ஹேட்டா²முக²ம் ரத²ம் பேஸேஸீதி ந ஸல்லக்கே²தப்³ப³ம். யதா² பன பகதிமக்³க³ம் பேஸேதி, ஏவமேவ மனுஸ்ஸானம் ஸாயமாஸப⁴த்தே நிட்டி²தே சந்தே³ன ஸத்³தி⁴ம் யுக³னத்³த⁴ம் கத்வா பேஸேஸி, யமகசந்தா³ உட்டி²தா விய அஹேஸும். மஹாஜனோ தி³ஸ்வா ‘‘யமகசந்தா³ உக்³க³தா’’தி ஆஹ. ஆக³ச்ச²ந்தே ஆக³ச்ச²ந்தே ந யமகசந்தா³, ஏகம் விமானம், ந விமானம், ஏகோ ரதோ²தி. ரதோ²பி ஆக³ச்ச²ந்தோ ஆக³ச்ச²ந்தோ பகதிரத²ப்பமாணோவ, அஸ்ஸாபி பகதிஅஸ்ஸப்பமாணாவ அஹேஸும். ஏவம் ரத²ம் ஆஹரித்வா ரஞ்ஞோ பாஸாத³ம் பத³க்கி²ணம் கத்வா பாசீனஸீஹபஞ்ஜரட்டா²னே ரத²ம் நிவத்தேத்வா ஆக³தமக்³கா³பி⁴முக²ம் கத்வா ஸீஹபஞ்ஜரே ட²த்வாவ ஆரோஹனஸஜ்ஜம் ட²பேஸி.

அபி⁴ருஹ மஹாராஜாதி ராஜா – ‘‘தி³ப்³ப³யானம் மே லத்³த⁴’’ந்தி ந தாவதே³வ அபி⁴ருஹி, நாக³ரானம் பன ஓவாத³ம் அதா³ஸி ‘‘பஸ்ஸத² தாதா, யம் மே ஸக்கேன தே³வரஞ்ஞா தி³ப்³ப³ரதோ² பேஸிதோ, ஸோ ச கோ² ந ஜாதிகோ³த்தம் வா குலப்பதே³ஸம் வா படிச்ச பேஸிதோ, மய்ஹம் பன ஸீலாசாரகு³ணே பஸீதி³த்வா பேஸிதோ. ஸசே தும்ஹேபி ஸீலம் ரக்கி²ஸ்ஸத², தும்ஹாகம்பி பேஸேஸ்ஸதி, ஏவம் ரக்கி²தும் யுத்தம் நாமேதம் ஸீலம். நாஹம் தே³வலோகம் க³ந்த்வா சிராயிஸ்ஸாமி, அப்பமத்தா ஹோதா²’’தி மஹாஜனம் ஓவதி³த்வா பஞ்சஸு ஸீலேஸு பதிட்டா²பேத்வா ரத²ம் அபி⁴ருஹி. ததோ மாதலி ஸங்கா³ஹகோ ‘‘அஹம்பி மஹாராஜஸ்ஸ மமானுச்ச²விகம் கரிஸ்ஸாமீ’’தி ஆகாஸம்ஹி த்³வே மக்³கே³ த³ஸ்ஸேத்வா அபிச மஹாராஜாதிஆதி³மாஹ.

தத்த² கதமேனாதி, மஹாராஜ, இமேஸு மக்³கே³ஸு ஏகோ நிரயம் க³ச்ச²தி, ஏகோ தே³வலோகம், தேஸு தம் கதமேன நேமி. யேனாதி யேன மக்³கே³ன க³ந்த்வா யத்த² பாபகம்மந்தா பாபகானம் கம்மானம் விபாகம் படிஸம்வேதி³யந்தி, தம் டா²னம் ஸக்கா ஹோதி பஸ்ஸிதுந்தி அத்தோ². து³தியபதே³பி ஏஸேவ நயோ. ஜாதகேபி –

‘‘கேன தம் நேமி மக்³கே³ன, ராஜஸேட்ட² தி³ஸம்பதி;

யேன வா பாபகம்மந்தா, புஞ்ஞகம்மா ச யே நரா’’தி. (ஜா. 2.22.450) –

கா³தா²ய அயமேவத்தோ². தேனேவாஹ –

‘‘நிரயே தாவ பஸ்ஸாமி, ஆவாஸே பாபகம்மினம்;

டா²னானி லுத்³த³கம்மானம், து³ஸ்ஸீலானஞ்ச யா க³தீ’’தி. (ஜா. 2.22.451);

உப⁴யேனேவ மம் மாதலி நேஹீதி மாதலி த்³வீஹி மக்³கே³ஹி மம் நேஹி, அஹம் நிரயம் பஸ்ஸிதுகாமோ தே³வலோகம்பீதி. பட²மம் கதமேன நேமீதி. பட²மம் நிரயமக்³கே³ன நேஹீதி. ததோ மாதலி அத்தனோ ஆனுபா⁴வேன ராஜானம் பஞ்சத³ஸ மஹானிரயே த³ஸ்ஸேஸி. வித்தா²ரகதா² பனேத்த² –

‘‘த³ஸ்ஸேஸி மாதலி ரஞ்ஞோ, து³க்³க³ம் வேதரணிம் நதி³ம்;

குதி²தம் கா²ரஸம்யுத்தம், தத்தம் அக்³கி³ஸிகூ²பம’’ந்தி. (ஜா. 2.22.452) –

ஜாதகே வுத்தனயேன வேதி³தப்³பா³. நிரயம் த³ஸ்ஸேத்வா ரத²ம் நிவத்தேத்வா தே³வலோகாபி⁴முக²ம் க³ந்த்வா பீ³ரணீதே³வதீ⁴தாய ஸோணதி³ன்னதே³வபுத்தஸ்ஸ க³ணதே³வபுத்தானஞ்ச விமானானி த³ஸ்ஸேந்தோ தே³வலோகம் நேஸி. தத்ராபி வித்தா²ரகதா² –

‘‘யதி³ தே ஸுதா பீ³ரணீ ஜீவலோகே,

ஆமாயதா³ஸீ அஹு ப்³ராஹ்மணஸ்ஸ;

ஸா பத்தகாலே அதிதி²ம் விதி³த்வா,

மாதாவ புத்தம் ஸகிமாபி⁴னந்தீ³;

ஸம்யமா ஸம்விபா⁴கா³ ச,

ஸா விமானஸ்மி மோத³தீ’’தி. (ஜா. 2.22.507) –

ஜாதகே வுத்தனயேனேவ வேதி³தப்³பா³.

ஏவம் க³ச்ச²தோ பன தஸ்ஸ ரத²னேமி வட்டியா சித்தகூடத்³வாரகோட்ட²கஸ்ஸ உம்மாரே பஹதமத்தேவ தே³வனக³ரே கோலாஹலம் அஹோஸி. ஸக்கம் தே³வராஜானம் ஏககம்யேவ ஓஹாய தே³வஸங்கோ⁴ மஹாஸத்தம் பச்சுக்³க³மனமகாஸி, தம் தே³வதானம் ஆத³ரம் தி³ஸ்வா ஸக்கோ சித்தம் ஸந்தா⁴ரேதும் அஸக்கோந்தோ – ‘‘அபி⁴ரம, மஹாராஜ, தே³வேஸு தே³வானுபா⁴வேனா’’தி ஆஹ. ஏவம் கிரஸ்ஸ அஹோஸி – ‘‘அயம் ராஜா அஜ்ஜ ஆக³ந்த்வா ஏகதி³வஸேனேவ தே³வக³ணம் அத்தனோ அபி⁴முக²மகாஸி. ஸசே ஏகம் த்³வே தி³வஸே வஸிஸ்ஸதி, ந மம் தே³வா ஓலோகேஸ்ஸந்தீ’’தி. ஸோ உஸூயமானோ, ‘‘மஹாராஜ, துய்ஹம் இமஸ்மிம் தே³வலோகே வஸிதும் புஞ்ஞம் நத்தி², அஞ்ஞேஸம் புஞ்ஞேன வஸாஹீ’’தி இமினா அதி⁴ப்பாயேன ஏவமாஹ. போ³தி⁴ஸத்தோ – ‘‘நாஸக்கி² ஜரஸக்கோ மனம் ஸந்தா⁴ரேதும், பரம் நிஸ்ஸாய லத்³த⁴ம் கோ² பன யாசித்வா லத்³த⁴ப⁴ண்ட³கம் விய ஹோதீ’’தி படிக்கி²பந்தோ அலம் மாரிஸாதிஆதி³மாஹ. ஜாதகேபி வுத்தம் –

‘‘யதா² யாசிதகம் யானம், யதா² யாசிதகம் த⁴னம்;

ஏவம்ஸம்பத³மேவே தம், யம் பரதோ தா³னபச்சயா;

ந சாஹமேதமிச்சா²மி, யம் பரதோ தா³னபச்சயா’’தி. (ஜா. 2.22.585-586) –

ஸப்³ப³ம் வத்தப்³ப³ம். போ³தி⁴ஸத்தோ பன மனுஸ்ஸத்தபா⁴வேன கதிவாரே தே³வலோகம் க³தோதி. சத்தாரோ – மந்தா⁴துராஜகாலே ஸாதி⁴னராஜகாலே கு³த்திலவீணாவாத³ககாலே நிமிமஹாராஜகாலேதி. ஸோ மந்தா⁴துகாலே தே³வலோகே அஸங்க்²யேய்யம் காலம் வஸி, தஸ்மிஞ்ஹி வஸமானேயேவ ச²த்திம்ஸ ஸக்கா சவிம்ஸு. ஸாதி⁴னராஜகாலே ஸத்தாஹம் வஸி, மனுஸ்ஸக³ணனாய ஸத்த வஸ்ஸஸதானி ஹோந்தி. கு³த்திலவீணாவாத³ககாலே ச நிமிராஜகாலே ச முஹுத்தமத்தம் வஸி, மனுஸ்ஸக³ணனாய ஸத்த தி³வஸானி ஹோந்தி.

314. தத்தே²வ மிதி²லம் படினேஸீதி படினேத்வா பகதிஸிரிக³ப்³பே⁴யேவ பதிட்டா²பேஸி.

315. களாரஜனகோதி தஸ்ஸ நாமம். களாரத³ந்ததாய பன களாரஜனகோதி வுத்தோ. ந ஸோ அகா³ரஸ்மா அனகா³ரியம் பப்³ப³ஜீதி ஏத்தகமத்தமேவ ந அகாஸி, ஸேஸம் ஸப்³ப³ம் பாகதிகமேவ அஹோஸி.

316. ஸமுச்சே²தோ³ ஹோதீதி ஏத்த² கல்யாணவத்தம் கோ ஸமுச்சி²ந்த³தி, கேன ஸமுச்சி²ன்னம், கோ பவத்தேதி, கேன பவத்திதம் நாம ஹோதீதி அயம் விபா⁴கோ³ வேதி³தப்³போ³. தத்த² ஸீலவா பி⁴க்கு² ‘‘ந ஸக்கா மயா அரஹத்தம் லத்³து⁴’’ந்தி வீரியம் அகரோந்தோ ஸமுச்சி²ந்த³தி. து³ஸ்ஸீலேன ஸமுச்சி²ன்னம் நாம ஹோதி. ஸத்த ஸேகா² பவத்தேந்தி. கீ²ணாஸவேன பவத்திதம் நாம ஹோதி. ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

மக⁴தே³வஸுத்தவண்ணனா நிட்டி²தா.

4. மது⁴ரஸுத்தவண்ணனா

317. ஏவம் மே ஸுதந்தி மது⁴ரஸுத்தம். தத்த² மஹாகச்சானோதி கி³ஹிகாலே உஜ்ஜேனிகரஞ்ஞோ புரோஹிதபுத்தோ அபி⁴ரூபோ த³ஸ்ஸனீயோ பாஸாதி³கோ ஸுவண்ணவண்ணோ ச. மது⁴ராயந்தி ஏவம்னாமகே நக³ரே. கு³ந்தா³வனேதி கண்ஹககு³ந்தா³வனே. அவந்திபுத்தோதி அவந்திரட்டே² ரஞ்ஞோ தீ⁴தாய புத்தோ. வுத்³தோ⁴ சேவ அரஹா சாதி த³ஹரம் அரஹந்தம்பி ந ததா² ஸம்பா⁴வேந்தி யதா² மஹல்லகம், தே²ரோ பன வுத்³தோ⁴ சேவ அஹோஸி அரஹா ச. ப்³ராஹ்மணா, போ⁴ கச்சானாதி ஸோ கிர ராஜா ப்³ராஹ்மணலத்³தி⁴கோ, தஸ்மா ஏவமாஹ. ப்³ராஹ்மணோவ ஸேட்டோ² வண்ணோதிஆதீ³ஸு ஜாதிகோ³த்தாதீ³னம் பஞ்ஞாபனட்டா²னே ப்³ராஹ்மணாவ ஸேட்டா²தி த³ஸ்ஸேதி. ஹீனோ அஞ்ஞோ வண்ணோதி இதரே தயோ வண்ணா ஹீனா லாமகாதி வத³தி. ஸுக்கோதி பண்ட³ரோ. கண்ஹோதி காளகோ. ஸுஜ்ஜ²ந்தீதி ஜாதிகோ³த்தாதி³பஞ்ஞாபனட்டா²னேஸு ஸுஜ்ஜ²ந்தி. ப்³ரஹ்முனோ புத்தாதி மஹாப்³ரஹ்முனோ புத்தா. ஓரஸா முக²தோ ஜாதாதி உரே வஸித்வா முக²தோ நிக்க²ந்தா, உரே கத்வா ஸம்வத்³தி⁴தாதி வா ஓரஸா. ப்³ரஹ்மஜாதி ப்³ரஹ்மதோ நிப்³ப³த்தா. ப்³ரஹ்மனிம்மிதாதி ப்³ரஹ்முனா நிம்மிதா. ப்³ரஹ்மதா³யாதா³தி ப்³ரஹ்முனோ தா³யாதா³. கோ⁴ஸோயேவ கோ² ஏஸோதி வோஹாரமத்தமேவேதம்.

318. இஜ்ஜே²ய்யாதி ஸமிஜ்ஜே²ய்ய, யத்தகானி த⁴னாதீ³னி பத்தே²ய்ய, தத்தகேஹிஸ்ஸ மனோரதோ² பூரேய்யாதி அத்தோ². க²த்தியோபிஸ்ஸாஸ்ஸாதி க²த்தியோபி அஸ்ஸ இஸ்ஸரியஸம்பத்தஸ்ஸ புப்³பு³ட்டா²யீ அஸ்ஸ. நேஸம் ஏத்த² கிஞ்சீதி ந ஏதேஸம் ஏத்த² கிஞ்சி.

322. ஆஸனேன வா நிமந்தேய்யாமாதி நிஸின்னாஸனம் பப்போ²டேத்வா இத⁴ நிஸீதா³தி வதே³ய்யாம. அபி⁴னிமந்தேய்யாமபி நந்தி அபி⁴ஹரித்வா தம் நிமந்தேய்யாம. தத்த² து³விதோ⁴ அபி⁴ஹாரோ வாசாய சேவ காயேன ச. ‘‘தும்ஹாகம் இச்சி²திச்சி²தக்க²ணே மமம் சீவராதீ³ஹி வதே³ய்யாத² யேனத்தோ²’’தி வத³ந்தோ ஹி வாசாய அபி⁴ஹரித்வா நிமந்தேதி நாம. சீவராதி³வேகல்லம் ஸல்லக்கே²த்வா ‘‘இத³ம் க³ண்ஹதா²’’தி தானி தே³ந்தோ பன காயேன அபி⁴ஹரித்வா நிமந்தேதி நாம. தது³ப⁴யம்பி ஸந்தா⁴ய ‘‘அபி⁴னிமந்தேய்யாமபி ந’’ந்தி ஆஹ. ரக்கா²வரணகு³த்திந்தி ரக்கா²ஸங்கா²தஞ்சேவ ஆவரணஸங்கா²தஞ்ச கு³த்திம். யா பனேஸா ஆவுத⁴ஹத்தே² புரிஸே ட²பேந்தேன ரக்கா², ஸா த⁴ம்மிகா நாம ஸம்விஹிதா ந ஹோதி. யதா² பன அவேலாய கட்ட²ஹாரிகாபண்ணஹாரிகாத³யோ விஹாரம் ந பவிஸந்தி, மிக³லுத்³த³காத³யோ விஹாரஸீமாய மிகே³ வா மச்சே² வா ந க³ண்ஹந்தி, ஏவம் ஸம்வித³ஹந்தேன த⁴ம்மிகா நாம ஸம்விஹிதா ஹோதி. தம் ஸந்தா⁴யாஹ ‘‘த⁴ம்மிக’’ந்தி.

ஏவம் ஸந்தேதி ஏவம் சதுன்னம்பி வண்ணானம் பப்³ப³ஜிதானம் பப்³ப³ஜிதஸக்காரேன ஸமே ஸமானே. ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

மது⁴ரஸுத்தவண்ணனா நிட்டி²தா.

5. போ³தி⁴ராஜகுமாரஸுத்தவண்ணனா

324. ஏவம் மே ஸுதந்தி போ³தி⁴ராஜகுமாரஸுத்தம். தத்த² கோகனதோ³தி கோகனத³ம் வுச்சதி பது³மம். ஸோ ச மங்க³லபாஸாதோ³ ஓலோகனகபது³மம் த³ஸ்ஸேத்வா கதோ, தஸ்மா கோகனதோ³தி ஸங்க²ம் லபி⁴.

325. யாவ பச்சி²மஸோபானகளேவராதி ஏத்த² பச்சி²மஸோபானகளேவரந்தி பட²மம் ஸோபானப²லகம் வுத்தம். அத்³த³ஸா கோ²தி ஓலோகனத்த²ம்யேவ த்³வாரகோட்ட²கே டி²தோ அத்³த³ஸ. ப⁴க³வா துண்ஹீ அஹோஸீதி ‘‘கிஸ்ஸ நு கோ² அத்தா²ய ராஜகுமாரேன அயம் மஹாஸக்காரோ கதோ’’தி ஆவஜ்ஜந்தோ புத்தபத்த²னாய கதபா⁴வம் அஞ்ஞாஸி. ஸோ ஹி ராஜகுமாரோ அபுத்தகோ, ஸுதஞ்சானேன அஹோஸி – ‘‘பு³த்³தா⁴னம் கிர அதி⁴காரம் கத்வா மனஸா இச்சி²தம் லப⁴ந்தீ’’தி. ஸோ – ‘‘ஸசாஹம் புத்தம் லபி⁴ஸ்ஸாமி, ஸம்மாஸம்பு³த்³தோ⁴ மம சேலப்படிகம் அக்கமிஸ்ஸதி. நோ சே லபி⁴ஸ்ஸாமி, ந அக்கமிஸ்ஸதீ’’தி பத்த²னம் கத்வா ஸந்த²ராபேஸி. அத² ப⁴க³வா ‘‘நிப்³ப³த்திஸ்ஸதி நு கோ² ஏதஸ்ஸ புத்தோ’’தி ஆவஜ்ஜேத்வா ‘‘ந நிப்³ப³த்திஸ்ஸதீ’’தி அத்³த³ஸ.

புப்³பே³ கிர ஸோ ஏகஸ்மிம் தீ³பே வஸமானோ ஸமச்ச²ந்தே³ன ஸகுணபோதகே கா²தி³. ஸசஸ்ஸ மாதுகா³மோ அஞ்ஞோவ ப⁴வேய்ய, புத்தம் லபே⁴ய்ய. உபோ⁴ஹி பன ஸமானச்ச²ந்தே³ஹி ஹுத்வா பாபகம்மம் கதம், தேனஸ்ஸ புத்தோ ந நிப்³ப³த்திஸ்ஸதீதி அஞ்ஞாஸி. து³ஸ்ஸே பன அக்கந்தே – ‘‘பு³த்³தா⁴னம் அதி⁴காரம் கத்வா பத்தி²தபத்தி²தம் லப⁴ந்தீதி லோகே அனுஸ்ஸவோ, மயா ச மஹாஅபி⁴னீஹாரோ கதோ, ந ச புத்தம் லபா⁴மி, துச்ச²ம் இத³ம் வசன’’ந்தி மிச்சா²க³ஹணம் க³ண்ஹேய்ய. தித்தி²யாபி – ‘‘நத்தி² ஸமணானம் அகத்தப்³ப³ம் நாம, சேலப்படிகம் மத்³த³ந்தா ஆஹிண்ட³ந்தீ’’தி உஜ்ஜா²யேய்யும். ஏதரஹி ச அக்கமந்தேஸு ப³ஹூ பி⁴க்கூ² பரசித்தவிது³னோ, தே ப⁴ப்³ப³ம் ஜானித்வா அக்கமிஸ்ஸந்தி, அப⁴ப்³ப³ம் ஜானித்வா ந அக்கமிஸ்ஸந்தி. அனாக³தே பன உபனிஸ்ஸயோ மந்தோ³ ப⁴விஸ்ஸதி, அனாக³தம் ந ஜானிஸ்ஸந்தி. தேஸு அக்கமந்தேஸு ஸசே பத்தி²தம் இஜ்ஜி²ஸ்ஸதி, இச்சேதம் குஸலம். நோ சே இஜ்ஜி²ஸ்ஸதி, – ‘‘புப்³பே³ பி⁴க்கு²ஸங்க⁴ஸ்ஸ அபி⁴னீஹாரம் கத்வா இச்சி²திச்சி²தம் லப⁴ந்தி, தம் இதா³னி ந லப⁴ந்தி. தேயேவ மஞ்ஞே பி⁴க்கூ² படிபத்திபூரகா அஹேஸும், இமே படிபத்திம் பூரேதும் ந ஸக்கோந்தீ’’தி மனுஸ்ஸா விப்படிஸாரினோ ப⁴விஸ்ஸந்தீதி இமேஹி காரணேஹி ப⁴க³வா அக்கமிதும் அனிச்ச²ந்தோ துண்ஹீ அஹோஸி. ஸிக்கா²பத³ம் பஞ்ஞபேஸி ‘‘ந, பி⁴க்க²வே, சேலப்படிகா அக்கமிதப்³பா³’’தி (சூளவ. 268). மங்க³லத்தா²ய பஞ்ஞத்தம் அனக்கமந்தேஸு பன அக்கமனத்தா²ய அனுபஞ்ஞத்திம் ட²பேஸி – ‘‘கி³ஹீ, பி⁴க்க²வே, மங்க³லிகா, அனுஜானாமி, பி⁴க்க²வே, கி³ஹீனம் மங்க³லத்தா²யா’’தி (சூளவ. 268).

326. பச்சி²மம் ஜனதம் ததா²க³தோ அனுகம்பதீதி இத³ம் தே²ரோ வுத்தேஸு காரணேஸு ததியம் காரணம் ஸந்தா⁴யாஹ. ந கோ² ஸுகே²ன ஸுக²ந்தி கஸ்மா ஆஹ? காமஸுக²ல்லிகானுயோக³ஸஞ்ஞீ ஹுத்வா ஸம்மாஸம்பு³த்³தோ⁴ ந அக்கமி, தஸ்மா அஹம்பி ஸத்தா²ரா ஸமானச்ச²ந்தோ³ ப⁴விஸ்ஸாமீதி மஞ்ஞமானோ ஏவமாஹ.

327. ஸோ கோ² அஹந்திஆதி³ ‘‘யாவ ரத்தியா பச்சி²மே யாமே’’தி தாவ மஹாஸச்சகே (ம. நி. 1.364 ஆத³யோ) வுத்தனயேன வேதி³தப்³ப³ம். ததோ பரம் யாவ பஞ்சவக்³கி³யானம் ஆஸவக்க²யா பாஸராஸிஸுத்தே (ம. நி. 1.272 ஆத³யோ) வுத்தனயேன வேதி³தப்³ப³ம்.

343. அங்குஸக³ய்ஹே ஸிப்பேதி அங்குஸக³ஹணஸிப்பே. குஸலோ அஹந்தி சே²கோ அஹம். கஸ்ஸ பனாயம் ஸந்திகே ஸிப்பம் உக்³க³ண்ஹீதி? பிது ஸந்திகே, பிதாபிஸ்ஸ பிது ஸந்திகேவ உக்³க³ண்ஹி. கோஸம்பி³யம் கிர பரந்தபராஜா நாம ரஜ்ஜம் காரேஸி. ராஜமஹேஸீ க³ருபா⁴ரா ஆகாஸதலே ரஞ்ஞா ஸத்³தி⁴ம் பா³லாதபம் தப்பமானா ரத்தகம்ப³லம் பாருபித்வா நிஸின்னா ஹோதி, ஏகோ ஹத்தி²லிங்க³ஸகுணோ ‘‘மம்ஸபேஸீ’’தி மஞ்ஞமானோ க³ஹேத்வா ஆகாஸம் பக்க²ந்தி³. ஸா ‘‘ச²ட்³டே³ய்ய ம’’ந்தி ப⁴யேன நிஸ்ஸத்³தா³ அஹோஸி, ஸோ தம் பப்³ப³தபாதே³ ருக்க²விடபே ட²பேஸி. ஸா பாணிஸ்ஸரம் கரோந்தீ மஹாஸத்³த³மகாஸி. ஸகுணோ பலாயி, தஸ்ஸா தத்தே²வ க³ப்³ப⁴வுட்டா²னம் அஹோஸி. தியாமரத்திம் தே³வே வஸ்ஸந்தே கம்ப³லம் பாருபித்வா நிஸீதி³. ததோ ச அவிதூ³ரே தாபஸோ வஸதி. ஸோ தஸ்ஸா ஸத்³தே³ன அருணே உக்³க³தே ருக்க²மூலம் ஆக³தோ ஜாதிம் புச்சி²த்வா நிஸ்ஸேணிம் ப³ந்தி⁴த்வா ஓதாரேத்வா அத்தனோ வஸனட்டா²னம் நேத்வா யாகு³ம் பாயேஸி. தா³ரகஸ்ஸ மேக⁴உதுஞ்ச பப்³ப³தஉதுஞ்ச க³ஹேத்வா ஜாதத்தா உதே³னோதி நாமம் அகாஸி. தாபஸோ ப²லாப²லானி ஆஹரித்வா த்³வேபி ஜனே போஸேஸி.

ஸா ஏகதி³வஸம் தாபஸஸ்ஸ ஆக³மனவேலாய பச்சுக்³க³மனம் கத்வா இத்தி²குத்தம் த³ஸ்ஸேத்வா தாபஸம் ஸீலபே⁴த³ம் ஆபாதே³ஸி. தேஸம் ஏகதோ வஸந்தானம் காலே க³ச்ச²ந்தே பரந்தபராஜா காலம் அகாஸி. தாபஸோ ரத்திபா⁴கே³ நக்க²த்தம் ஓலோகேத்வா ரஞ்ஞோ மதபா⁴வம் ஞத்வா – ‘‘துய்ஹம் ராஜா மதோ, புத்தோ தே கிம் இத⁴ வஸிதும் இச்ச²தி, உதா³ஹு பேத்திகே ரஜ்ஜே ச²த்தம் உஸ்ஸாபேது’’ந்தி புச்சி². ஸா புத்தஸ்ஸ ஆதி³தோ பட்டா²ய ஸப்³ப³ம் பவத்திம் ஆசிக்கி²த்வா ச²த்தம் உஸ்ஸாபேதுகாமதஞ்சஸ்ஸ ஞத்வா தாபஸஸ்ஸ ஆரோசேஸி. தாபஸோ ச ஹத்தி²க³ந்த²ஸிப்பம் ஜானாதி, குதோனேன லத்³த⁴ம்? ஸக்கஸ்ஸ ஸந்திகா. புப்³பே³ கிரஸ்ஸ ஸக்கோ உபட்டா²னம் ஆக³ந்த்வா ‘‘கேன கிலமதா²’’தி புச்சி². ஸோ ‘‘ஹத்தி²பரிஸ்ஸயோ அத்தீ²’’தி ஆரோசேஸி. தஸ்ஸ ஸக்கோ ஹத்தி²க³ந்த²ஞ்சேவ வீணகஞ்ச த³த்வா ‘‘பலாபேதுகாமதாய ஸதி இமம் தந்திம் வாதே³த்வா இமம் ஸிலோகம் வதே³ய்யாத², பக்கோஸிதுகாமதாய ஸதி இமம் ஸிலோகம் வதே³ய்யாதா²’’தி ஆஹ. தாபஸோ தம் ஸிப்பம் குமாரஸ்ஸ அதா³ஸி. ஸோ ஏகம் வடருக்க²ம் அபி⁴ருஹித்வா ஹத்தீ²ஸு ஆக³தேஸு தந்திம் வாதே³த்வா ஸிலோகம் வத³தி, ஹத்தீ² பீ⁴தா பலாயிம்ஸு.