7. பியஜாதிகஸுத்தவண்ணனா

353. ஏவம் மே ஸுதந்தி பியஜாதிகஸுத்தம். தத்த² நேவ கம்மந்தா படிப⁴ந்தீதி ந ஸப்³பே³ன ஸப்³ப³ம் படிப⁴ந்தி, பகதினியாமேன பன ந படிப⁴ந்தி. து³தியபதே³பி ஏஸேவ நயோ. ஏத்த² ச ந படிபா⁴தீதி ந ருச்சதி. ஆளாஹனந்தி ஸுஸானம். அஞ்ஞத²த்தந்தி விவண்ணதாய அஞ்ஞதா²பா⁴வோ. இந்த்³ரியானி நாம மனோவிஞ்ஞேய்யா த⁴ம்மா, பதிட்டி²தோகாஸம் பன ஸந்தா⁴ய இத³ம் வுத்தம். பியஜாதிகாதி பியதோ ஜாயந்தி. பியப்பபா⁴விகாதி பியதோ பப⁴வந்தி.

355. ஸசே தம், மஹாராஜாதி தஸ்ஸ அத்த²ம் அஸல்லக்க²யமானாபி ஸத்த²ரி ஸத்³தா⁴ய ஏவம் வத³தி. சர பிரேதி அபேஹி அம்ஹாகம் பரே, அனஜ்ஜ²த்திகபூ⁴தேதி அத்தோ². அத² வா சர பிரேதி பரதோ க³ச்ச², மா இத⁴ திட்டா²திபி அத்தோ².

356. த்³விதா⁴ சே²த்வாதி அஸினா த்³வே கோட்டா²ஸே கரோந்தோ சி²ந்தி³த்வா. அத்தானம் உப்பா²லேஸீதி தேனேவ அஸினா அத்தனோ உத³ரம் பா²லேஸி. யதி³ ஹி தஸ்ஸ ஸா அப்பியா ப⁴வேய்ய, இதா³னி அஞ்ஞம் மாதுகா³மம் க³ண்ஹிஸ்ஸாமீதி அத்தானம் ந கா⁴தேய்ய. யஸ்மா பனஸ்ஸ ஸா பியா அஹோஸி, தஸ்மா பரலோகேபி தாய ஸத்³தி⁴ம் ஸமங்கி³பா⁴வம் பத்த²யமானோ ஏவமகாஸி.

357. பியா தே வஜிரீதி ஏவம் கிரஸ்ஸா அஹோஸி – ‘‘ஸசாஹம், ‘பூ⁴தபுப்³ப³ம், மஹாராஜ, இமிஸ்ஸாயேவ ஸாவத்தி²யம் அஞ்ஞதரிஸ்ஸா இத்தி²யா’திஆதி³கத²ம் கதே²ய்யம், ‘கோ தே ஏவம் அகாஸி, அபேஹி நத்தி² ஏத’ந்தி மம் படிஸேதே⁴ய்ய, வத்தமானேனேவ நம் ஸஞ்ஞாபேஸ்ஸாமீ’’தி சிந்தேத்வா ஏவமாஹ. விபரிணாமஞ்ஞதா²பா⁴வாதி ஏத்த² மரணவஸேன விபரிணாமோ, கேனசி ஸத்³தி⁴ம் பலாயித்வா க³மனவஸேன அஞ்ஞதா²பா⁴வோ வேதி³தப்³போ³.

வாஸபா⁴யாதி வாஸபா⁴ நாம ரஞ்ஞோ ஏகா தே³வீ, தம் ஸந்தா⁴யாஹ.

பியா தே அஹந்தி கஸ்மா ஸப்³ப³பச்சா² ஆஹ? ஏவம் கிரஸ்ஸா அஹோஸி – ‘‘அயம் ராஜா மய்ஹம் குபிதோ, ஸசாஹம் ஸப்³ப³பட²மம் ‘பியா தே அஹ’ந்தி புச்சே²ய்யம், ‘ந மே த்வம் பியா, சர பிரே’தி வதே³ய்ய, ஏவம் ஸந்தே கதா² பதிட்டா²னம் ந லபி⁴ஸ்ஸதீ’’தி கதா²ய பதிட்டா²னத்த²ம் ஸப்³ப³பச்சா² புச்சி². காஸிகோஸலேஸு ச²ட்³டி³தபா⁴வேன விபரிணாமோ, படிராஜூனம் ஹத்த²க³மனவஸேன அஞ்ஞதா²பா⁴வோ வேதி³தப்³போ³.

ஆசமேஹீதி ஆசமனோத³கம் தே³ஹி. ஆசமித்வா ஹத்த²பாதே³ தோ⁴வித்வா முக²ம் விக்கா²லேத்வா ஸத்தா²ரம் நமஸ்ஸிதுகாமோ ஏவமாஹ. ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

பியஜாதிகஸுத்தவண்ணனா நிட்டி²தா.