2. ரட்ட²பாலஸுத்தவண்ணனா

293. ஏவம் மே ஸுதந்தி ரட்ட²பாலஸுத்தம். தத்த² து²ல்லகோட்டி²கந்தி து²ல்லகோட்ட²ம் பரிபுண்ணகோட்டா²கா³ரம். ஸோ கிர ஜனபதோ³ நிச்சஸஸ்ஸோ ஸதா³ பீ³ஜப⁴ண்ட³ம் நிக்க²மதி, க²லப⁴ண்ட³ம் பவிஸதி. தேன தஸ்மிம் நிக³மே கோட்டா² நிச்சபூராவ ஹோந்தி. தஸ்மா ஸோ து²ல்லகோட்டி²கந்தேவ ஸங்க²ம் க³தோ.

294. ரட்ட²பாலோதி கஸ்மா ரட்ட²பாலோ? பி⁴ன்னம் ரட்ட²ம் ஸந்தா⁴ரேதும் பாலேதும் ஸமத்தோ²தி ரட்ட²பாலோ. கதா³ பனஸ்ஸேதம் நாமம் உப்பன்னந்தி. பது³முத்தரஸம்மாஸம்பு³த்³த⁴காலே. இதோ ஹி புப்³பே³ ஸதஸஹஸ்ஸகப்பமத்த²கே வஸ்ஸஸதஸஹஸ்ஸாயுகேஸு மனுஸ்ஸேஸு பது³முத்தரோ நாம ஸத்தா² உப்பஜ்ஜித்வா பி⁴க்கு²ஸதஸஹஸ்ஸபரிவாரோ லோகஹிதாய சாரிகம் சரி, யம் ஸந்தா⁴ய வுத்தம் –

‘‘நக³ரம் ஹம்ஸவதீ நாம, ஆனந்தோ³ நாம க²த்தியோ;

ஸுஜாதா நாம ஜனிகா, பது³முத்தரஸ்ஸ ஸத்து²னோ’’தி. (பு³. வம். 12.19);

பது³முத்தரே பன அனுப்பன்னே ஏவ ஹம்ஸவதியா த்³வே குடும்பி³கா ஸத்³தா⁴ பஸன்னா கபணத்³தி⁴கயாசகாதீ³னம் தா³னம் பட்ட²பயிம்ஸு. ததா³ பப்³ப³தவாஸினோ பஞ்சஸதா தாபஸா ஹம்ஸவதிம் அனுப்பத்தா. தே த்³வேபி ஜனா தாபஸக³ணம் மஜ்ஜே² பி⁴ந்தி³த்வா உபட்ட²ஹிம்ஸு. தாபஸா கிஞ்சிகாலம் வஸித்வா பப்³ப³தபாத³மேவ க³தா. த்³வே ஸங்க⁴த்தே²ரா ஓஹீயிம்ஸு. ததா³ தேஸம் தே யாவஜீவம் உபட்டா²னம் அகம்ஸு. தாபஸேஸு பு⁴ஞ்ஜித்வா அனுமோத³னம் கரோந்தேஸு ஏகோ ஸக்கப⁴வனஸ்ஸ வண்ணம் கதே²ஸி, ஏகோ பூ⁴மிந்த⁴ரனாக³ராஜப⁴வனஸ்ஸ.

குடும்பி³கேஸு ஏகோ ஸக்கப⁴வனம் பத்த²னம் கத்வா ஸக்கோ ஹுத்வா நிப்³ப³த்தோ, ஏகோ நாக³ப⁴வனே பாலிதனாக³ராஜா நாம. தம் ஸக்கோ அத்தனோ உபட்டா²னம் ஆக³தம் தி³ஸ்வா நாக³யோனியம் அபி⁴ரமஸீதி புச்சி². ஸோ நாபி⁴ரமாமீதி ஆஹ. தேன ஹி பது³முத்தரஸ்ஸ ப⁴க³வதோ தா³னம் த³த்வா இமஸ்மிம் டா²னே பத்த²னம் கரோஹி, உபோ⁴ ஸுக²ம் வஸிஸ்ஸாமாதி. நாக³ராஜா ஸத்தா²ரம் நிமந்தேத்வா பி⁴க்கு²ஸதஸஹஸ்ஸபரிவாரஸ்ஸ ப⁴க³வதோ ஸத்தாஹம் மஹாதா³னம் த³த³மானோ பது³முத்தரஸ்ஸ த³ஸப³லஸ்ஸ புத்தம் உபரேவதம் நாம ஸாமணேரம் தி³ஸ்வா ஸத்தமே தி³வஸே பு³த்³த⁴ப்பமுக²ஸ்ஸ ஸங்க⁴ஸ்ஸ தி³ப்³ப³வத்தா²னி த³த்வா ஸாமணேரஸ்ஸ டா²னந்தரம் பத்தே²ஸி. ப⁴க³வா அனாக³தம் ஓலோகேத்வா – ‘‘அனாக³தே கோ³தமஸ்ஸ நாம பு³த்³த⁴ஸ்ஸ புத்தோ ராஹுலகுமாரோ ப⁴விஸ்ஸதீ’’தி தி³ஸ்வா ‘‘ஸமிஜ்ஜி²ஸ்ஸதி தே பத்த²னா’’தி கதே²ஸி. நாக³ராஜா தமத்த²ம் ஸக்கஸ்ஸ கதே²ஸி. ஸக்கோ தஸ்ஸ வசனம் ஸுத்வா ததே²வ ஸத்தாஹம் தா³னம் த³த்வா பி⁴ன்னம் ரட்ட²ம் ஸந்தா⁴ரேதும் பாலேதும் ஸமத்த²குலே நிப்³ப³த்தித்வா ஸத்³தா⁴பப்³ப³ஜிதம் ரட்ட²பாலம் நாம குலபுத்தம் தி³ஸ்வா – ‘‘அஹம்பி அனாக³தே லோகஸ்மிம் தும்ஹாதி³ஸே பு³த்³தே⁴ உப்பன்னே பி⁴ன்னம் ரட்ட²ம் ஸந்தா⁴ரேதும் பாலேதும் ஸமத்த²குலே நிப்³ப³த்தித்வா அயம் குலபுத்தோ விய ஸத்³தா⁴பப்³ப³ஜிதோ ரட்ட²பாலோ நாம ப⁴வேய்ய’’ந்தி பத்த²னமகாஸி. ஸத்தா² ஸமிஜ்ஜ²னகபா⁴வம் ஞத்வா இமம் கா³த²மாஹ –

‘‘ஸராஜிகம் சாதுவண்ணம், போஸேதும் யம் பஹோஸ்ஸதி;

ரட்ட²பாலகுலம் நாம, தத்த² ஜாயிஸ்ஸதே அய’’ந்தி. –

ஏவம் பது³முத்தரஸம்மாஸம்பு³த்³த⁴காலே தஸ்ஸேதம் நாமம் உப்பன்னந்தி வேதி³தப்³ப³ம்.

ஏதத³ஹோஸீதி கிம் அஹோஸி? யதா² யதா² கோ²திஆதி³. தத்ராயம் ஸங்கே²பகதா² – அஹம் கோ² யேன யேன காரணேன ப⁴க³வதா த⁴ம்மம் தே³ஸிதம் ஆஜானாமி, தேன தேன மே உபபரிக்க²தோ ஏவம் ஹோதி – ‘‘யதே³தம் ஸிக்க²த்தயப்³ரஹ்மசரியம் ஏகதி³வஸம்பி அக²ண்ட³ம் கத்வா சரிமகசித்தம் பாபேதப்³ப³தாய ஏகந்தபரிபுண்ணம் சரிதப்³ப³ம், ஏகதி³வஸம்பி ச கிலேஸமலேன அமலீனம் கத்வா சரிமகசித்தம் பாபேதப்³ப³தாய ஏகந்தபரிஸுத்³த⁴ம், ஸங்க²லிகி²தம் விலிகி²தஸங்க²ஸதி³ஸம் தோ⁴தஸங்க²ஸப்படிபா⁴க³ம் கத்வா சரிதப்³ப³ம், நயித³ம் ஸுகரம் அகா³ரம் அஜ்ஜா²வஸதா அகா³ரமஜ்ஜே² வஸந்தேன ஏகந்தபரிபுண்ணம்…பே… சரிதும், யம்னூனாஹம் கேஸஞ்ச மஸ்ஸுஞ்ச ஓஹாரேத்வா காஸாயரஸபீததாய காஸாயானி ப்³ரஹ்மசரியம் சரந்தானம் அனுச்ச²விகானி வத்தா²னி அச்சா²தே³த்வா அகா³ரஸ்மா நிக்க²மித்வா அனகா³ரியம் பப்³ப³ஜேய்ய’’ந்தி.

அசிரபக்கந்தேஸு து²ல்லகோட்டி²கேஸு ப்³ராஹ்மணக³ஹபதிகேஸு யேன ப⁴க³வா தேனுபஸங்கமீதி ரட்ட²பாலோ அனுட்டி²தேஸு தேஸு ந ப⁴க³வந்தம் பப்³ப³ஜ்ஜம் யாசி. கஸ்மா? தத்த²ஸ்ஸ ப³ஹூ ஞாதிஸாலோஹிதா மித்தாமச்சா ஸந்தி, தே – ‘‘த்வம் மாதாபிதூனம் ஏகபுத்தகோ, ந லப்³பா⁴ தயா பப்³ப³ஜிது’’ந்தி பா³ஹாயம்பி க³ஹேத்வா ஆகட்³டே⁴ய்யும், ததோ பப்³ப³ஜ்ஜாய அந்தராயோ ப⁴விஸ்ஸதீதி ஸஹேவ பரிஸாய உட்ட²ஹித்வா தோ²கம் க³ந்த்வா புன கேனசி ஸரீரகிச்சலேஸேன நிவத்தித்வா ப⁴க³வந்தம் உபஸங்கம்ம பப்³ப³ஜ்ஜம் யாசி. தேன வுத்தம் – ‘‘அத² கோ² ரட்ட²பாலோ குலபுத்தோ அசிரபக்கந்தேஸு து²ல்லகோட்டி²கேஸு…பே… பப்³பா³ஜேது மம் ப⁴க³வா’’தி. ப⁴க³வா பன யஸ்மா ராஹுலகுமாரஸ்ஸ பப்³ப³ஜிததோ பபு⁴தி மாதாபிதூஹி அனனுஞ்ஞாதம் புத்தம் ந பப்³பா³ஜேதி, தஸ்மா நம் புச்சி² அனுஞ்ஞாதோஸி பன த்வம், ரட்ட²பால, மாதாபிதூஹி…பே… பப்³ப³ஜ்ஜாயாதி.

295. அம்மதாதாதி ஏத்த² அம்மாதி மாதரம் ஆலபதி, தாதாதி பிதரம். ஏகபுத்தகோதி ஏகோவ புத்தகோ, அஞ்ஞோ கோசி ஜேட்டோ² வா கனிட்டோ² வா நத்தி². ஏத்த² ச ஏகபுத்தோதி வத்தப்³பே³ அனுகம்பாவஸேன ஏகபுத்தகோதி வுத்தம். பியோதி பீதிஜனகோ. மனாபோதி மனவட்³ட⁴னகோ. ஸுகே²தி⁴தோதி ஸுகே²ன ஏதி⁴தோ, ஸுக²ஸம்வட்³டி⁴தோதி அத்தோ². ஸுக²பரிப⁴தோதி ஸுகே²ன பரிப⁴தோ, ஜாதகாலதோ பபு⁴தி தா⁴தீஹி அங்கதோ அங்கம் ஆஹரித்வா தா⁴ரியமானோ அஸ்ஸகரத²காதீ³ஹி பா³லகீளனகேஹி கீளயமானோ ஸாது³ரஸபோ⁴ஜனம் போ⁴ஜயமானோ ஸுகே²ன பரிஹடோ. ந த்வம், தாத ரட்ட²பால, கஸ்ஸசி து³க்க²ஸ்ஸ ஜானாஸீதி த்வம், தாத ரட்ட²பால அப்பமத்தகம்பி கலபா⁴க³ம் து³க்க²ஸ்ஸ ந ஜானாஸி ந ஸரஸீதி அத்தோ². மரணேனபி தே மயம் அகாமகா வினா ப⁴விஸ்ஸாமாதி ஸசேபி தவ அம்ஹேஸு ஜீவமானேஸு மரணம் ப⁴வேய்ய, தேன தே மரணேனபி மயம் அகாமகா அனிச்ச²கா ந அத்தனோ ருசியா வினா ப⁴விஸ்ஸாம, தயா வியோக³ம் பாபுணிஸ்ஸாமாதி அத்தோ². கிம் பன மயம் தந்தி ஏவம் ஸந்தே கிம் பன கிம் நாம தம் காரணம், யேன மயம் தம் ஜீவந்தம் அனுஜானிஸ்ஸாம. அத² வா கிம் பன மயம் தந்தி கேன பன காரணேன மயம் தம் ஜீவந்தம் அனுஜானிஸ்ஸாமாதி ஏவமேத்த² அத்தோ² த³ட்ட²ப்³போ³.

296. தத்தே²வாதி யத்த² நம் டி²தம் மாதாபிதரோ நானுஜானிம்ஸு, தத்தே²வ டா²னே. அனந்தரஹிதாயாதி கேனசி அத்த²ரணேன அனத்த²தாய. பரிசாரேஹீதி க³ந்த⁴ப்³ப³னடனாடகாதீ³னி பச்சுபட்ட²பேத்வா தத்த² ஸஹாயகேஹி ஸத்³தி⁴ம் யதா²ஸுக²ம் இந்த்³ரியானி சாரேஹி ஸஞ்சாரேஹி, இதோ சிதோ ச உபனேஹீதி வுத்தம் ஹோதி. அத² வா பரிசாரேஹீதி க³ந்த⁴ப்³ப³னடனாடகாதீ³னி பச்சுபட்ட²பேத்வா ஸஹாயகேஹி ஸத்³தி⁴ம் லள உபலள ரம, கீளஸ்ஸூதிபி வுத்தம் ஹோதி. காமே பரிபு⁴ஞ்ஜந்தோதி அத்தனோ புத்ததா³ரேஹி ஸத்³தி⁴ம் போ⁴கே³ பு⁴ஞ்ஜந்தோ. புஞ்ஞானி கரோந்தோதி பு³த்³த⁴ஞ்ச த⁴ம்மஞ்ச ஸங்க⁴ஞ்ச ஆரப்³ப⁴ தா³னப்பதா³னாதீ³னி ஸுக³திமக்³க³ஸம்ஸோத⁴கானி குஸலகம்மானி கரோந்தோ. துண்ஹீ அஹோஸீதி கதா²னுப்பப³ந்த⁴விச்சே²த³னத்த²ம் நிராலாபஸல்லாபோ அஹோஸி.

அத²ஸ்ஸ மாதாபிதரோ திக்க²த்தும் வத்வா படிவசனம்பி அலப⁴மானா ஸஹாயகே பக்கோஸாபேத்வா ‘‘ஏஸ வோ ஸஹாயகோ பப்³ப³ஜிதுகாமோ, நிவாரேத² ந’’ந்தி ஆஹம்ஸு. தேபி தம் உபஸங்கமித்வா திக்க²த்தும் அவோசும், தேஸம்பி துண்ஹீ அஹோஸி. தேன வுத்தம் – அத² கோ² ரட்ட²பாலஸ்ஸ குலபுத்தஸ்ஸ ஸஹாயகா…பே… துண்ஹீ அஹோஸீதி. அத²ஸ்ஸ ஸஹாயகானம் திக்க²த்தும் வத்வா ஏதத³ஹோஸி – ‘‘ஸசே அயம் பப்³ப³ஜ்ஜம் அலப⁴மானோ மரிஸ்ஸதி, ந கோசி கு³ணோ லப்³ப⁴தி. பப்³ப³ஜிதம் பன நம் மாதாபிதரோபி காலேன காலம் பஸ்ஸிஸ்ஸந்தி, மயம்பி பஸ்ஸிஸ்ஸாம, பப்³ப³ஜ்ஜாபி ச நாமேஸா பா⁴ரியா, தி³வஸே தி³வஸே மத்திகாபத்தம் க³ஹேத்வா பிண்டா³ய சரிதப்³ப³ம், ஏகஸேய்யம் ஏகப⁴த்தம் ப்³ரஹ்மசரியம் அதிது³க்கரம், அயஞ்ச ஸுகு²மாலோ நாக³ரிகஜாதியோ, ஸோ தம் சரிதும் அஸக்கோந்தோ புன இதே⁴வ ஆக³மிஸ்ஸதி, ஹந்த³ஸ்ஸ மாதாபிதரோ அனுஜானாபேஸ்ஸாமா’’தி. தே ததா² அகம்ஸு. மாதாபிதரோபி நம் ‘‘பப்³ப³ஜிதேன ச பன தே மாதாபிதரோ உத்³த³ஸ்ஸேதப்³பா³’’தி இமம் கதிகம் கத்வா அனுஜானிம்ஸு. தேன வுத்தம் – ‘‘அத² கோ² ரட்ட²பாலஸ்ஸ குலபுத்தஸ்ஸ ஸஹாயகா யேன ரட்ட²பாலஸ்ஸ குலபுத்தஸ்ஸ மாதாபிதரோ…பே… அனுஞ்ஞாதோஸி மாதாபிதூஹி…பே… உத்³த³ஸ்ஸேதப்³பா³’’தி. தத்த² உத்³த³ஸ்ஸேதப்³பா³தி உத்³த⁴ம் த³ஸ்ஸேதப்³பா³, யதா² தம் காலேன காலம் பஸ்ஸந்தி, ஏவம் ஆக³ந்த்வா அத்தானம் த³ஸ்ஸேதப்³பா³.

299. ப³லம் க³ஹேத்வாதி ஸப்பாயபோ⁴ஜனானி பு⁴ஞ்ஜந்தோ உச்சா²த³னாதீ³ஹி ச காயம் பரிஹரந்தோ காயப³லம் ஜனேத்வா மாதாபிதரோ வந்தி³த்வா அஸ்ஸுமுக²ம் ஞாதிபரிவட்டம் பஹாய யேன ப⁴க³வா தேனுபஸங்கமி…பே… பப்³பா³ஜேது மம், ப⁴ந்தே, ப⁴க³வாதி. ப⁴க³வா ஸமீபே டி²தம் அஞ்ஞதரம் பி⁴க்கு²ம் ஆமந்தேஸி – ‘‘தேன ஹி பி⁴க்கு² ரட்ட²பாலம் பப்³பா³ஜேஹி சேவ உபஸம்பாதே³ஹி சா’’தி. ஸாது⁴, ப⁴ந்தேதி கோ² ஸோ பி⁴க்கு² ப⁴க³வதோ படிஸ்ஸுத்வா ரட்ட²பாலம் குலபுத்தம் ஜினத³த்தியம் ஸத்³தி⁴விஹாரிகம் லத்³தா⁴ பப்³பா³ஜேஸி சேவ உபஸம்பாதே³ஸி ச. தேன வுத்தம் – ‘‘அலத்த² கோ² ரட்ட²பாலோ குலபுத்தோ ப⁴க³வதோ ஸந்திகே பப்³ப³ஜ்ஜம், அலத்த² உபஸம்பத³’’ந்தி.

பஹிதத்தோ விஹரந்தோதி த்³வாத³ஸ ஸம்வச்ச²ரானி ஏவம் விஹரந்தோ. நேய்யபுக்³க³லோ ஹி அயமாயஸ்மா, தஸ்மா புஞ்ஞவா அபி⁴னீஹாரஸம்பன்னோபி ஸமானோ ‘‘அஜ்ஜ அஜ்ஜேவ அரஹத்த’’ந்தி ஸமணத⁴ம்மம் கரோந்தோபி த்³வாத³ஸமே வஸ்ஸே அரஹத்தம் பாபுணி.

யேன ப⁴க³வா தேனுபஸங்கமீதி மய்ஹம் மாதாபிதரோ பப்³ப³ஜ்ஜம் அனுஜானமானா – ‘‘தயா காலேன காலம் ஆக³ந்த்வா அம்ஹாகம் த³ஸ்ஸனம் தா³தப்³ப³’’ந்தி வத்வா அனுஜானிம்ஸு, து³க்கரகாரிகா கோ² பன மாதாபிதரோ, அஹஞ்ச யேனஜ்ஜா²ஸயேன பப்³ப³ஜிதோ, ஸோ மே மத்த²கம் பத்தோ, இதா³னி ப⁴க³வந்தம் ஆபுச்சி²த்வா அத்தானம் மாதாபிதூனம் த³ஸ்ஸேஸ்ஸாமீதி சிந்தேத்வா ஆபுச்சி²துகாமோ உபஸங்கமி. மனஸாகாஸீதி ‘‘கிம் நு கோ² ரட்ட²பாலே க³தே கோசி உபத்³த³வோ ப⁴விஸ்ஸதீ’’தி மனஸி அகாஸி. ததோ ‘‘ப⁴விஸ்ஸதீ’’தி ஞத்வா ‘‘ஸக்கி²ஸ்ஸதி நு கோ² ரட்ட²பாலோ தம் மத்³தி³து’’ந்தி ஓலோகேந்தோ தஸ்ஸ அரஹத்தஸம்பத்திம் தி³ஸ்வா ‘‘ஸக்கி²ஸ்ஸதீ’’தி அஞ்ஞாஸி. தேன வுத்தம் – யதா² ப⁴க³வா அஞ்ஞாஸி…பே… காலம் மஞ்ஞஸீதி.

மிக³சீரேதி ஏவம்னாமகே உய்யானே. தஞ்ஹி ரஞ்ஞா – ‘‘அகாலே ஸம்பத்தபப்³ப³ஜிதானம் தி³ன்னமேவ இத³ம், யதா²ஸுக²ம் பரிபு⁴ஞ்ஜந்தூ’’தி ஏவமனுஞ்ஞாதமேவ அஹோஸி, தஸ்மா தே²ரோ – ‘‘மம ஆக³தபா⁴வம் மாதாபிதூனம் ஆரோசேஸ்ஸாமி, தே மே பாத³தோ⁴வனஉண்ஹோத³கபாத³மக்க²னதேலாதீ³னி பேஸிஸ்ஸந்தீ’’தி சித்தம்பி அனுப்பாதே³த்வா உய்யானமேவ பாவிஸி. பிண்டா³ய பாவிஸீதி து³தியதி³வஸே பாவிஸி.

மஜ்ஜி²மாயாதி ஸத்தத்³வாரகோட்ட²கஸ்ஸ க⁴ரஸ்ஸ மஜ்ஜி²மே த்³வாரகோட்ட²கே. உல்லிகா²பேதீதி கப்பகேன கேஸே பஹராபேதி. ஏதத³வோசாதி – ‘‘இமே ஸமணகா அம்ஹாகம் பியபுத்தகம் பப்³பா³ஜேத்வா சோரானம் ஹத்தே² நிக்கி²பித்வா விய ஏகதி³வஸம்பி ந த³ஸ்ஸாபேந்தி, ஏவம் ப²ருஸகாரகா ஏதே புன இமம் டா²னம் உபஸங்கமிதப்³ப³ம் மஞ்ஞந்தி, ஏத்தோவ நிகட்³டி⁴தப்³பா³ ஏதே’’தி சிந்தேத்வா ஏதம் ‘‘இமேஹி முண்ட³கேஹீ’’திஆதி³வசனம் அவோச. ஞாதிதா³ஸீதி ஞாதகானம் தா³ஸீ. ஆபி⁴தோ³ஸிகந்தி பாரிவாஸிகம் ஏகரத்தாதிக்கந்தம் பூதிபூ⁴தம். தத்தா²யம் பத³த்தோ² – பூதிபா⁴வதோ³ஸேன அபி⁴பூ⁴தோதி அபி⁴தோ³ஸோ, அபி⁴தோ³ஸோவ ஆபி⁴தோ³ஸிகோ. ஏகரத்தாதிக்கந்தஸ்ஸேவ நாமஸஞ்ஞா ஏஸா யதி³த³ம் ஆபி⁴தோ³ஸிகோதி, தம் ஆபி⁴தோ³ஸிகம். கும்மாஸந்தி யவகும்மாஸம். ச²ட்³டே³துகாமா ஹோதீதி யஸ்மா அந்தமஸோ தா³ஸகம்மகாரானம் கோ³ரூபானம்பி அபரிபோ⁴கா³ரஹோ, தஸ்மா நம் கசவரம் விய ப³ஹி ச²ட்³டே³துகாமா ஹோதி. ஸசேதந்தி ஸசே ஏதம். ப⁴கி³னீதி அரியவோஹாரேன அத்தனோ தா⁴திம் ஞாதிதா³ஸிம் ஆலபதி. ச²ட்³ட³னீயத⁴ம்மந்தி ச²ட்³டே³தப்³ப³ஸபா⁴வம். இத³ம் வுத்தம் ஹோதி – ‘‘ப⁴கி³னி ஏதம் ஸசே ப³ஹி ச²ட்³ட³னீயத⁴ம்மம் நிஸ்ஸட்ட²பரிக்³க³ஹம், இத⁴ மே பத்தே ஆகிராஹீ’’தி. கிம் பன ஏவம் வத்தும் லப்³ப⁴தி, விஞ்ஞத்தி வா பயுத்தவாசா வா ந ஹோதீதி. ந ஹோதி. கஸ்மா? நிஸ்ஸட்ட²பரிக்³க³ஹத்தா. யஞ்ஹி ச²ட்³ட³னீயத⁴ம்மம் நிஸ்ஸட்ட²பரிக்³க³ஹம், யத்த² ஸாமிகா அனாலயா ஹோந்தி, தம் ஸப்³ப³ம் ‘‘தே³த² ஆஹரத² ஆகிரதா²’’தி வத்தும் வட்டதி. தேனேவ ஹி அயமாயஸ்மா அக்³க³அரியவம்ஸிகோ ஸமானோபி ஏவமாஹ.

ஹத்தா²னந்தி பி⁴க்கா²க³ஹணத்த²ம் பத்தம் உபனாமயதோ மணிப³ந்த⁴தோ பபு⁴தி த்³வின்னம்பி ஹத்தா²னம். பாதா³னந்தி நிவாஸனந்ததோ பட்டா²ய த்³வின்னம்பி பாதா³னம். ஸரஸ்ஸாதி ஸசே தம் ப⁴கி³னீதி வாசம் நிச்சா²ரயதோ ஸரஸ்ஸ ச. நிமித்தம் அக்³க³ஹேஸீதி ஹத்த²பிட்டி²ஆதீ³னி ஓலோகயமானா – ‘‘புத்தஸ்ஸ மே ரட்ட²பாலஸ்ஸ விய ஸுவண்ணகச்ச²பபிட்டி²ஸதி³ஸா இமா ஹத்த²பாத³பிட்டி²யோ, ஹரிதாலவட்டியோ விய ஸுவட்டிதா அங்கு³லியோ, மது⁴ரோ ஸரோ’’தி கி³ஹிகாலே ஸல்லக்கி²தபுப்³ப³ம் ஆகாரம் அக்³க³ஹேஸி ஸஞ்ஜானி ஸல்லக்கே²ஸி. தஸ்ஸ ஹாயஸ்மதோ த்³வாத³ஸவஸ்ஸானி அரஞ்ஞாவாஸஞ்சேவ பிண்டி³யாலோபபோ⁴ஜனஞ்ச பரிபு⁴ஞ்ஜந்தஸ்ஸ அஞ்ஞாதி³ஸோ ஸரீரவண்ணோ அஹோஸி, தேன நம் ஸா ஞாதிதா³ஸீ தி³ஸ்வாவ ந ஸஞ்ஜானி, நிமித்தம் பன அக்³க³ஹேஸீதி.

300. ரட்ட²பாலஸ்ஸ மாதரம் ஏதத³வோசாதி தே²ரஸ்ஸ அங்க³பச்சங்கா³னி ஸண்டா²பேத்வா த²ஞ்ஞம் பாயேத்வா ஸம்வட்³டி⁴ததா⁴தீபி ஸமானா பப்³ப³ஜித்வா மஹாகீ²ணாஸவபா⁴வப்பத்தேன ஸாமிபுத்தேன ஸத்³தி⁴ம் – ‘‘த்வம் நு கோ², மே ப⁴ந்தே, புத்தோ ரட்ட²பாலோ’’திஆதி³வசனம் வத்தும் அவிஸஹந்தீ வேகே³ன க⁴ரம் பவிஸித்வா ரட்ட²பாலஸ்ஸ மாதரம் ஏதத³வோச. யக்³கே⁴தி ஆரோசனத்தே² நிபாதோ. ஸசே ஜே ஸச்சந்தி ஏத்த² ஜேதி ஆலபனே நிபாதோ. ஏவஞ்ஹி தஸ்மிம் தே³ஸே தா³ஸிஜனம் ஆலபந்தி, தஸ்மா ‘‘த்வஞ்ஹி, போ⁴தி தா³ஸி, ஸசே ஸச்சம் ப⁴ணஸீ’’தி ஏவமேத்த² அத்தோ² த³ட்ட²ப்³போ³.

உபஸங்கமீதி கஸ்மா உபஸங்கமி? மஹாகுலே இத்தி²யோ ப³ஹி நிக்க²மந்தா க³ரஹம் பாபுணந்தி, இத³ஞ்ச அச்சாயிககிச்சம், ஸேட்டி²ஸ்ஸ நம் ஆரோசேஸ்ஸாமீதி சிந்தேதி. தஸ்மா உபஸங்கமி. அஞ்ஞதரம் குட்டமூலந்தி தஸ்மிம் கிர தே³ஸே தா³னபதீனம் க⁴ரேஸு ஸாலா ஹோந்தி, ஆஸனானி சேத்த² பஞ்ஞத்தானி ஹோந்தி, உபட்டா²பிதம் உத³ககஞ்ஜியம். தத்த² பப்³ப³ஜிதா பிண்டா³ய சரித்வா நிஸீதி³த்வா பு⁴ஞ்ஜந்தி. ஸசே இச்ச²ந்தி, தா³னபதீனம்பி ஸந்தகம் க³ண்ஹந்தி. தஸ்மா தம்பி அஞ்ஞதரஸ்ஸ குலஸ்ஸ ஈதி³ஸாய ஸாலாய அஞ்ஞதரம் குட்டமூலந்தி வேதி³தப்³ப³ம். ந ஹி பப்³ப³ஜிதா கபணமனுஸ்ஸா விய அஸாருப்பே டா²னே நிஸீதி³த்வா பு⁴ஞ்ஜந்தீதி.

அத்தி² நாம தாதாதி ஏத்த² அத்தீ²தி விஜ்ஜமானத்தே², நாமாதி புச்ச²னத்தே² மஞ்ஞனத்தே² வா நிபாதோ. இத³ஞ்ஹி வுத்தம் ஹோதி – அத்தி² நு கோ², தாத ரட்ட²பால, அம்ஹாகம் த⁴னம், நனு மயம் நித்³த⁴னாதி வத்தப்³பா³, யேஸம் நோ த்வம் ஈதி³ஸே டா²னே நிஸீதி³த்வா ஆபி⁴தோ³ஸிகம் கும்மாஸம் பரிபு⁴ஞ்ஜிஸ்ஸஸி. ததா² அத்தி² நு கோ², தாத ரட்ட²பால, அம்ஹாகம் ஜீவிதம், நனு மயம் மதாதி வத்தப்³பா³, யேஸம் நோ த்வம் ஈதி³ஸே டா²னே நிஸீதி³த்வா ஆபி⁴தோ³ஸிகம் கும்மாஸம் பரிபு⁴ஞ்ஜிஸ்ஸஸி. ததா² அத்தி² மஞ்ஞே, தாத ரட்ட²பால, தவ அப்³ப⁴ந்தரே ஸாஸனம் நிஸ்ஸாய படிலத்³தோ⁴ ஸமணகு³ணோ, யம் த்வம் ஸுபோ⁴ஜனரஸஸம்வட்³டி⁴தோபி இமம் ஜிகு³ச்ச²னேய்யம் ஆபி⁴தோ³ஸிகம் கும்மாஸம் அமதமிவ நிப்³பி³காரோ பரிபு⁴ஞ்ஜிஸ்ஸஸீதி. ஸோ பன க³ஹபதி து³க்கா²பி⁴துன்னதாய ஏதமத்த²ம் பரிபுண்ணம் கத்வா வத்துமஸக்கோந்தோ – ‘‘அத்தி² நாம, தாத ரட்ட²பால, ஆபி⁴தோ³ஸிகம் கும்மாஸம் பரிபு⁴ஞ்ஜிஸ்ஸஸீ’’தி ஏத்தகமேவ அவச. அக்க²ரசிந்தகா பனேத்த² இத³ம் லக்க²ணம் வத³ந்தி – அனோகப்பனாமரிஸனத்த²வஸேனேதம் அத்தி²ஸத்³தே³ உபபதே³ ‘‘பரிபு⁴ஞ்ஜிஸ்ஸஸீ’’தி அனாக³தவசனம் கதம். தஸ்ஸாயமத்தோ² – ‘‘அத்தி² நாம…பே… பரிபு⁴ஞ்ஜிஸ்ஸஸி, இத³ம் பச்சக்க²ம்பி அஹம் ந ஸத்³த³ஹாமி ந மரிஸயாமீ’’தி. இத³ம் ஏத்தகம் வசனம் க³ஹபதி தே²ரஸ்ஸ பத்தமுக²வட்டியம் க³ஹேத்வா டி²தகோவ கதே²ஸி. தே²ரோபி பிதரி பத்தமுக²வட்டியம் க³ஹேத்வா டி²தேயேவ தம் பூதிகும்மாஸம் பரிபு⁴ஞ்ஜி ஸுனக²வந்தஸதி³ஸம் பூதிகுக்குடண்ட³மிவ பி⁴ன்னட்டா²னே பூதிகம் வாயந்தம். புது²ஜ்ஜனேன கிர ததா²ரூபம் கும்மாஸம் பரிபு⁴ஞ்ஜிதும் ந ஸக்கா. தே²ரோ பன அரியித்³தி⁴யம் ட²த்வா தி³ப்³போ³ஜம் அமதரஸம் பரிபு⁴ஞ்ஜமானோ விய பரிபு⁴ஞ்ஜித்வா த⁴மகரணேன உத³கம் க³ஹேத்வா பத்தஞ்ச முக²ஞ்ச ஹத்த²பாதே³ ச தோ⁴வித்வா குதோ நோ க³ஹபதீதிஆதி³மாஹ.

தத்த² குதோ நோதி குதோ நு. நேவ தா³னந்தி தே³ய்யத⁴ம்மவஸேன நேவ தா³னம் அலத்த²ம்ஹ. ந பச்சக்கா²னந்தி ‘‘கிம், தாத ரட்ட²பால, கச்சி தே க²மனீயம், கச்சிஸி அப்பகிலமதே²ன ஆக³தோ, ந தாவ தாத கே³ஹே ப⁴த்தம் ஸம்பாதி³யதீ’’தி ஏவம் படிஸந்தா²ரவஸேன பச்சக்கா²னம்பி ந அலத்த²ம்ஹ. கஸ்மா பன தே²ரோ ஏவமாஹ? பிது அனுக்³க³ஹேன. ஏவம் கிரஸ்ஸ அஹோஸி – ‘‘யதா² ஏஸ மம் வத³தி, அஞ்ஞேபி பப்³ப³ஜிதே ஏவம் வத³தி மஞ்ஞே. பு³த்³த⁴ஸாஸனே ச பத்தந்தரே பது³மம் விய ப⁴ஸ்மாச²ன்னோ அக்³கி³ விய பே²க்³கு³படிச்ச²ன்னோ சந்த³னஸாரோ விய ஸுத்திகாபடிச்ச²ன்னம் முத்தரதனம் விய வலாஹகபடிச்ச²ன்னோ சந்தி³மா விய மாதி³ஸானம் படிச்ச²ன்னகு³ணானம் பி⁴க்கூ²னம் அந்தோ நத்தி², தேஸுபி ந ஏவரூபம் வசனம் பவத்தேஸ்ஸதி, ஸம்வரே ட²ஸ்ஸதீ’’தி அனுக்³க³ஹேன ஏவமாஹ.

ஏஹி தாதாதி தாத துய்ஹம் க⁴ரம் மா ஹோது, ஏஹி க⁴ரம் க³மிஸ்ஸாமாதி வத³தி. அலந்தி தே²ரோ உக்கட்ட²ஏகாஸனிகதாய படிக்கி²பந்தோ ஏவமாஹ. அதி⁴வாஸேஸீதி தே²ரோ பன பகதியா உக்கட்ட²ஸபதா³னசாரிகோ ஸ்வாதனாயபி⁴க்க²ம் நாம நாதி⁴வாஸேதி, மாது அனுக்³க³ஹேன பன அதி⁴வாஸேஸி. மாது கிரஸ்ஸ தே²ரம் அனுஸ்ஸரித்வா மஹாஸோகோ உப்பஜ்ஜி, ரோத³னேனேவ பக்கக்கி² விய ஜாதா, தஸ்மா தே²ரோ ‘‘ஸசாஹம் தம் அபஸ்ஸித்வா க³மிஸ்ஸாமி, ஹத³யம்பிஸ்ஸா பா²லேய்யா’’தி அனுக்³க³ஹேன அதி⁴வாஸேஸி. காராபேத்வாதி ஏகம் ஹிரஞ்ஞஸ்ஸ, ஏகம் ஸுவண்ணஸ்ஸாதி த்³வே புஞ்ஜே காராபேத்வா. கீவமஹந்தா பன புஞ்ஜா அஹேஸுந்தி. யதா² ஓரதோ டி²தோ புரிஸோ பாரதோ டி²தம் மஜ்ஜி²மப்பமாணம் புரிஸம் ந பஸ்ஸதி, ஏவம்மஹந்தா.

301. இத³ம் தே தாதாதி கஹாபணபுஞ்ஜஞ்ச ஸுவண்ணபுஞ்ஜஞ்ச த³ஸ்ஸேந்தோ ஆஹ. மத்திகந்தி மாதிதோ ஆக³தம், இத³ம் தே மாதாமஹியா மாது இமம் கே³ஹம் ஆக³ச்ச²ந்தியா க³ந்த⁴மாலாதீ³னம் அத்தா²ய தி³ன்னம் த⁴னந்தி அத்தோ². அஞ்ஞம் பேத்திகம் அஞ்ஞம் பிதாமஹந்தி யம் பன தே பிது ச பிதாமஹானஞ்ச ஸந்தகம், தம் அஞ்ஞம்யேவ, நிஹிதஞ்ச பயுத்தஞ்ச அதிவிய ப³ஹு. ஏத்த² ச ‘‘பிதாமஹ’’ந்தி தத்³தி⁴தலோபம் கத்வா வுத்தந்தி வேதி³தப்³ப³ம். ‘‘பேதாமஹ’’ந்தி வா பாடோ². ஸக்கா ததோனிதா³னந்தி த⁴னஹேது த⁴னபச்சயா. தம் தம் த⁴னம் ரக்க²ந்தஸ்ஸ ச ராஜாதீ³னம் வஸேன த⁴னபரிக்க²யம் பாபுணந்தஸ்ஸ கஸ்ஸசி உப்பஜ்ஜமானஸோகாத³யோ ஸந்தா⁴ய ஏவமாஹ. ஏவம் வுத்தே ஸேட்டி² க³ஹபதி – ‘‘அஹம் இமம் உப்பப்³பா³ஜேஸ்ஸாமீதி ஆனேஸிம், ஸோ தா³னி மே த⁴ம்மகத²ம் காதும் ஆரத்³தோ⁴, அயம் ந மே வசனம் கரிஸ்ஸதீ’’தி உட்டா²ய க³ந்த்வா அஸ்ஸ ஓரோதா⁴னம் த்³வாரம் விவராபேத்வா – ‘‘அயம் வோ ஸாமிகோ, க³ச்ச²த² யம் கிஞ்சி கத்வா நம் க³ண்ஹிதும் வாயமதா²’’தி உய்யோஜேஸி. ஸுவயே டி²தா நாடகித்தி²யோ நிக்க²மித்வா தே²ரம் பரிவாரயிம்ஸு, தாஸு த்³வே ஜேட்ட²கித்தி²யோ ஸந்தா⁴ய புராணது³தியிகாதிஆதி³ வுத்தம். பச்சேகம் பாதே³ஸு க³ஹேத்வாதி ஏகேகம்ஹி பாதே³ நம் க³ஹேத்வா.

கீதி³ஸா நாம தா அய்யபுத்த அச்ச²ராயோதி கஸ்மா ஏவமாஹம்ஸு? ததா³ கிர ஸம்ப³ஹுலே க²த்தியகுமாரேபி ப்³ராஹ்மணகுமாரேபி ஸேட்டி²புத்தேபி மஹாஸம்பத்தியோ பஹாய பப்³ப³ஜந்தே தி³ஸ்வா பப்³ப³ஜ்ஜாகு³ணம் அஜானந்தா கத²ம் ஸமுட்டா²பேந்தி ‘‘கஸ்மா ஏதே பப்³ப³ஜந்தீ’’தி. அத²ஞ்ஞே வத³ந்தி ‘‘தே³வச்ச²ராதே³வனாடகானம் காரணா’’தி. ஸா கதா² வித்தா²ரிகா அஹோஸி. தம் க³ஹேத்வா ஸப்³பா³ ஏவமாஹம்ஸு. அத² தே²ரோ படிக்கி²பந்தோ ந கோ² மயம் ப⁴கி³னீதிஆதி³மாஹ. ஸமுதா³சரதீதி வோஹரதி வத³தி. தத்தே²வ முச்சி²தா பபதிம்ஸூதி தம் ப⁴கி³னிவாதே³ன ஸமுதா³சரந்தம் தி³ஸ்வா ‘‘மயம் அஜ்ஜ ஆக³மிஸ்ஸதி, அஜ்ஜ ஆக³மிஸ்ஸதீ’’தி த்³வாத³ஸ வஸ்ஸானி ப³ஹி ந நிக்க²ந்தா, ஏதம் நிஸ்ஸாய நோ தா³ரகா ந லத்³தா⁴, யேஸம் ஆனுபா⁴வேன ஜீவேய்யாம, இதோ சம்ஹா பரிஹீனா அஞ்ஞதோ ச. அயம் லோகோ நாம அத்தனோவ சிந்தேஸி, தஸ்மா தாபி ‘‘இதா³னி மயம் அனாதா² ஜாதா’’தி அத்தனோவ சிந்தயமானா – ‘‘அனத்தி²கோ தா³னி அம்ஹேஹி அயம், ஸோ அம்ஹே பஜாபதியோ ஸமானா அத்தனா ஸத்³தி⁴ம் ஏகமாதுகுச்சி²யா ஸயிததா³ரிகா விய மஞ்ஞதீ’’தி ஸமுப்பன்னப³லவஸோகா ஹுத்வா தஸ்மிம்யேவ பதே³ஸே முச்சி²தா பபதிம்ஸு, பதிதாதி அத்தோ².

மா நோ விஹேடே²தா²தி மா அம்ஹே த⁴னம் த³ஸ்ஸேத்வா மாதுகா³மே ச உய்யோஜேத்வா விஹேட²யித்த², விஹேஸா ஹேஸா பப்³ப³ஜிதானந்தி. கஸ்மா ஏவமாஹ? மாதாபிதூனம் அனுக்³க³ஹேன. ஸோ கிர ஸேட்டி² – ‘‘பப்³ப³ஜிதலிங்க³ம் நாம கிலிட்ட²ம், பப்³ப³ஜ்ஜாவேஸம் ஹாரேத்வா ந்ஹாயித்வா தயோ ஜனா ஏகதோ பு⁴ஞ்ஜிஸ்ஸாமா’’தி மஞ்ஞமானோ தே²ரஸ்ஸ பி⁴க்க²ம் ந தே³தி. தே²ரோ – ‘‘மாதி³ஸஸ்ஸ கீ²ணாஸவஸ்ஸ ஆஹாரந்தராயம் கத்வா ஏதே ப³ஹும் அபுஞ்ஞம் பஸவேய்யு’’ந்தி தேஸம் அனுக்³க³ஹேன ஏவமாஹ.

302. கா³தா² அபா⁴ஸீதி கா³தா²யோ அபா⁴ஸி. தத்த² பஸ்ஸாதி ஸந்திகே டி²தஜனம் ஸந்தா⁴ய வத³தி. சித்தந்தி சித்தவிசித்தம். பி³ம்ப³ந்தி அத்தபா⁴வம். அருகாயந்தி நவன்னம் வணமுகா²னம் வஸேன வணகாயம். ஸமுஸ்ஸிதந்தி தீணி அட்டி²ஸதானி நவஹி ந்ஹாருஸதேஹி ப³ந்தி⁴த்வா நவஹி மம்ஸபேஸிஸதேஹி லிம்பித்வா ஸமந்ததோ உஸ்ஸிதம். ஆதுரந்தி ஜராதுரதாய ரோகா³துரதாய கிலேஸாதுரதாய ச நிச்சாதுரம். ப³ஹுஸங்கப்பந்தி பரேஸம் உப்பன்னபத்த²னாஸங்கப்பேஹி ப³ஹுஸங்கப்பம். இத்தீ²னஞ்ஹி காயே புரிஸானம் ஸங்கப்பா உப்பஜ்ஜந்தி, தேஸம் காயே இத்தீ²னம். ஸுஸானே ச²ட்³டி³தகளேவரபூ⁴தம்பி சேதம் காககுலலாத³யோ பத்த²யந்தியேவாதி ப³ஹுஸங்கப்போ நாம ஹோதி. யஸ்ஸ நத்தி² து⁴வம் டி²தீதி யஸ்ஸ காயஸ்ஸ மாயாமரீசிபே²ணபிண்ட³ உத³கபுப்பு²ளாதீ³னம் விய ஏகம்ஸேனேவ டி²தி நாம நத்தி², பி⁴ஜ்ஜனத⁴ம்மதாவ நியதா.

தசேன ஓனத்³த⁴ந்தி அல்லமனுஸ்ஸசம்மேன ஓனத்³த⁴ம். ஸஹ வத்தே²பி⁴ ஸோப⁴தீதி க³ந்தா⁴தீ³ஹி மணிகுண்ட³லேஹி ச சித்தகதம்பி ரூபம் வத்தே²ஹி ஸஹேவ ஸோப⁴தி, வினா வத்தே²ஹி ஜேகு³ச்ச²ம் ஹோதி அனோலோகனக்க²மம்.

அலத்தககதாதி அலத்தகேன ரஞ்ஜிதா. சுண்ணகமக்கி²தந்தி ஸாஸபகக்கேன முக²பீளகாதீ³னி நீஹரித்வா லோணமத்திகாய து³ட்ட²லோஹிதம் விலியாபேத்வா திலபிட்டே²ன லோஹிதம் பஸாதே³த்வா ஹலித்³தி³யா வண்ணம் ஸம்பாதே³த்வா சுண்ணகக³ண்டி³காய முக²ம் பஹரந்தி, தேனேஸ அதிவிய விரோசதி. தம் ஸந்தா⁴யேதம் வுத்தம்.

அட்டா²பத³கதாதி ரஸோத³கேன மக்கி²த்வா நலாடபரியந்தே ஆவத்தனபரிவத்தே கத்வா அட்ட²பத³கரசனாய ரசிதா. அஞ்ஜனீதி அஞ்ஜனனாளிகா.

ஓத³ஹீதி ட²பேஸி. பாஸந்தி வாகராஜாலம். நாஸதா³தி ந க⁴ட்டயி. நிவாபந்தி நிவாபஸுத்தே வுத்தனிவாபதிணஸதி³ஸபோ⁴ஜனம். கந்த³ந்தேதி விரவமானே பரிதே³வமானே. இமாய ஹி கா³தா²ய தே²ரோ மாதாபிதரோ மிக³லுத்³த³கே விய கத்வா த³ஸ்ஸேஸி, அவஸேஸஞாதகே மிக³லுத்³த³கபரிஸம் விய, ஹிரஞ்ஞஸுவண்ணம் வாகராஜாலம் விய, அத்தனா பு⁴த்தபோ⁴ஜனம் நிவாபதிணம் விய, அத்தானம் மஹாமிக³ம் விய கத்வா த³ஸ்ஸேஸி. யதா² ஹி மஹாமிகோ³ யாவத³த்த²ம் நிவாபதிணம் கா²தி³த்வா பானீயம் பிவித்வா கீ³வம் உக்கி²பித்வா தி³ஸம் ஓலோகேத்வா ‘‘இமம் நாம டா²னம் க³தஸ்ஸ ஸோத்தி² ப⁴விஸ்ஸதீ’’தி மிக³லுத்³த³கானம் பரிதே³வந்தானம்யேவ வாகரம் அக⁴ட்டயமானோவ உப்பதித்வா அரஞ்ஞம் பவிஸித்வா க⁴னச்சா²யஸ்ஸ ச²த்தஸ்ஸ விய கு³ம்ப³ஸ்ஸ ஹேட்டா² மந்த³மந்தே³ன வாதேன பீ³ஜயமானோ ஆக³தமக்³க³ம் ஓலோகேந்தோ திட்ட²தி, ஏவமேவ தே²ரோ இமா கா³தா² பா⁴ஸித்வா ஆகாஸேனேவ க³ந்த்வா மிக³சீரே பச்சுபட்டா²ஸி.

கஸ்மா பன தே²ரோ ஆகாஸேன க³தோதி. பிதா கிரஸ்ஸ ஸேட்டி² ஸத்தஸு த்³வாரகோட்ட²கேஸு அக்³க³ளம் தா³பேத்வா மல்லே ஆணாபேஸி – ‘‘ஸசே நிக்க²மித்வா க³ச்ச²தி, ஹத்த²பாதே³ஸு நம் க³ஹேத்வா காஸாயானி ஹரித்வா கி³ஹிவேஸம் க³ண்ஹாபேதா²’’தி. தஸ்மா தே²ரோ – ‘‘ஏதே மாதி³ஸம் மஹாகீ²ணாஸவம் ஹத்தே² வா பாதே³ வா க³ஹேத்வா அபுஞ்ஞம் பஸவேய்யும், தம் நேஸம் மா அஹோஸீ’’தி சிந்தேத்வா ஆகாஸேன அக³மாஸி. பரஸமுத்³த³வாஸித்தே²ரானம் பன – ‘‘டி²தகோவ இமா கா³தா² பா⁴ஸித்வா வேஹாஸம் அப்³பு⁴க்³க³ந்த்வா ரஞ்ஞோ கோரப்³யஸ்ஸ மிக³சீரே பச்சுபட்டா²ஸீ’’தி அயம் வாசனாமக்³கோ³யேவ.

303. மிக³வோதி தஸ்ஸ உய்யானபாலஸ்ஸ நாமம். ஸோதே⁴ந்தோதி உய்யானமக்³க³ம் ஸமம் காரேத்வா அந்தோஉய்யானே தச்சி²தப்³ப³யுத்தட்டா²னானி தச்சா²பேந்தோ ஸம்மஜ்ஜிதப்³ப³யுத்தானி டா²னானி ஸம்மஜ்ஜாபேந்தோ வாலுகாஓகிரண-புப்ப²விகிரண-புண்ணக⁴டட்ட²பன-கத³லிக்க²ந்த⁴ட²பனாதீ³னி ச கரோந்தோதி அத்தோ². யேன ராஜா கோரப்³யோ தேனுபஸங்கமீதி அம்ஹாகம் ராஜா ஸதா³ இமஸ்ஸ குலபுத்தஸ்ஸ வண்ணம் கதே²ஸி, பஸ்ஸிதுகாமோ ஏதம், ஆக³தபா⁴வம் பனஸ்ஸ ந ஜானாதி, மஹா கோ² பனாயம் பண்ணாகாரோ, க³ந்த்வா ரஞ்ஞோ ஆரோசேஸ்ஸாமீதி சிந்தேத்வா யேன ராஜா கோரப்³யோ தேனுபஸங்கமி.

கித்தயமானோ அஹோஸீதி ஸோ கிர ராஜா தே²ரம் அனுஸ்ஸரித்வா ப³லமஜ்ஜே²பி நாடகமஜ்ஜே²பி – ‘‘து³க்கரம் கதம் குலபுத்தேன தாவ மஹந்தம் ஸம்பத்திம் பஹாய பப்³ப³ஜித்வா புனனிவத்தித்வா அனபலோகேந்தேனா’’தி கு³ணம் கதே²ஸி, தம் க³ஹேத்வா அயம் ஏவமாஹ. விஸ்ஸஜ்ஜேதா²தி வத்வாதி ஓரோத⁴மஹாமத்தப³லகாயாதீ³ஸு யஸ்ஸ யம் அனுச்ச²விகம், தஸ்ஸ தம் தா³பேத்வாதி அத்தோ². உஸ்ஸடாய உஸ்ஸடாயாதி உஸ்ஸிதாய உஸ்ஸிதாய, மஹாமத்தமஹாரட்டி²காதீ³னம் வஸேன உக்³க³துக்³க³தமேவ பரிஸம் க³ஹேத்வா உபஸங்கமீதி அத்தோ². இத⁴ ப⁴வம் ரட்ட²பாலோ ஹத்த²த்த²ரே நிஸீத³தூதி ஹத்த²த்த²ரோ தனுகோ ப³ஹலபுப்பா²தி³கு³ணம் கத்வா அத்த²தோ அபி⁴லக்கி²தோ ஹோதி, தாதி³ஸே அனாபுச்சி²த்வா நிஸீதி³தும் ந யுத்தந்தி மஞ்ஞமானோ ஏவமாஹ.

304. பாரிஜுஞ்ஞானீதி பாரிஜுஞ்ஞபா⁴வா பரிக்க²யா. ஜிண்ணோதி ஜராஜிண்ணோ. வுட்³டோ⁴தி வயோவுட்³டோ⁴. மஹல்லகோதி ஜாதிமஹல்லகோ. அத்³த⁴க³தோதி அத்³தா⁴னம் அதிக்கந்தோ. வயோஅனுப்பத்தோதி பச்சி²மவயம் அனுப்பத்தோ. பப்³ப³ஜதீதி து⁴ரவிஹாரம் க³ந்த்வா பி⁴க்கூ² வந்தி³த்வா, – ‘‘ப⁴ந்தே, மயா த³ஹரகாலே ப³ஹும் குஸலம் கதம், இதா³னி மஹல்லகோம்ஹி, மஹல்லகஸ்ஸ சேஸா பப்³ப³ஜ்ஜா நாம, சேதியங்க³ணம் ஸம்மஜ்ஜித்வா அப்பஹரிதம் கத்வா ஜீவிஸ்ஸாமி, பப்³பா³ஜேத² மம், ப⁴ந்தே,’’தி காருஞ்ஞம் உப்பாதே³ந்தோ யாசதி, தே²ரா அனுகம்பாய பப்³பா³ஜேந்தி. தம் ஸந்தா⁴யேதம் வுத்தம். து³தியவாரேபி ஏஸேவ நயோ.

அப்பாபா³தோ⁴தி அரோகோ³. அப்பாதங்கோதி நித்³து³க்கோ². ஸமவேபாகினியாதி ஸமவிபாசனியா. க³ஹணியாதி கம்மஜதேஜோதா⁴துயா. தத்த² யஸ்ஸ பு⁴த்தபு⁴த்தோ ஆஹாரோ ஜீரதி, யஸ்ஸ வா பன புடப⁴த்தம் விய ததே²வ திட்ட²தி, உபோ⁴பேதே ந ஸமவேபாகினியா க³ஹணியா ஸமன்னாக³தா. யஸ்ஸ பன பு⁴த்தகாலே ப⁴த்தச்ச²ந்தோ³ உப்பஜ்ஜதேவ, அயம் ஸமவேபாகினியா ஸமன்னாக³தோ. நாதிஸீதாய நச்சுண்ஹாயாதி தேனேவ காரணேன நாதிஸீதாய நச்சுண்ஹாய. அனுபுப்³பே³னாதி ராஜானோ வா ஹரந்தீதிஆதி³னா அனுக்கமேன. து³தியவாரே ராஜப⁴யசோரப⁴யசா²தகப⁴யாதி³னா அனுக்கமேன.

305. த⁴ம்முத்³தே³ஸா உத்³தி³ட்டா²தி த⁴ம்மனித்³தே³ஸா உத்³தி³ட்டா². உபனிய்யதீதி ஜராமரணஸந்திகம் க³ச்ச²தி, ஆயுக்க²யேன வா தத்த² நிய்யதி. அத்³து⁴வோதி து⁴வட்டா²னவிரஹிதோ. அதாணோதி தாயிதும் ஸமத்தே²ன விரஹிதோ. அனபி⁴ஸ்ஸரோதி அஸரணோ அபி⁴ஸரித்வா அபி⁴க³ந்த்வா அஸ்ஸாஸேதும் ஸமத்தே²ன விரஹிதோ. அஸ்ஸகோதி நிஸ்ஸகோ ஸகப⁴ண்ட³விரஹிதோ. ஸப்³ப³ம் பஹாய க³மனீயந்தி ஸகப⁴ண்ட³ந்தி ஸல்லக்கி²தம் ஸப்³ப³ம் பஹாய லோகேன க³ந்தப்³ப³ம். தண்ஹாதா³ஸோதி தண்ஹாய தா³ஸோ.

306. ஹத்தி²ஸ்மிந்தி ஹத்தி²ஸிப்பே. கதாவீதி கதகரணீயோ, ஸிக்கி²தஸிக்கோ² பகு³ணஸிப்போதி அத்தோ². ஏஸ நயோ ஸப்³ப³த்த². ஊருப³லீதி ஊருப³லஸம்பன்னோ. யஸ்ஸ ஹி ப²லகஞ்ச ஆவுத⁴ஞ்ச க³ஹேத்வா பரஸேனம் பவிஸித்வா அபி⁴ன்னம் பி⁴ந்த³தோ பி⁴ன்னம் ஸந்தா⁴ரயதோ பரஹத்த²க³தம் ரஜ்ஜம் ஆஹரிதும் ஊருப³லம் அத்தி², அயம் ஊருப³லீ நாம. பா³ஹுப³லீதி பா³ஹுப³லஸம்பன்னோ. ஸேஸம் புரிமஸதி³ஸமேவ. அலமத்தோதி ஸமத்த²அத்தபா⁴வோ.

பரியோதா⁴ய வத்திஸ்ஸந்தீதி உப்பன்னம் உப்பத்³த³வம் ஓதா⁴ய அவத்த²ரித்வா வத்திஸ்ஸந்தீதி ஸல்லக்கே²த்வா க³ஹிதா.

ஸம்விஜ்ஜதி கோ², போ⁴ ரட்ட²பால, இமஸ்மிம் ராஜகுலே பஹூதம் ஹிரஞ்ஞஸுவண்ணந்தி இத³ம் ஸோ ராஜா உபரி த⁴ம்முத்³தே³ஸஸ்ஸ காரணம் ஆஹரந்தோ ஆஹ.

அதா²பரம் ஏதத³வோசாதி ஏதம் ‘‘பஸ்ஸாமி லோகே’’திஆதி³னா நயேன சதுன்னம் த⁴ம்முத்³தே³ஸானம் அனுகீ³திம் அவோச.

307. தத்த² பி⁴ய்யோவ காமே அபி⁴பத்த²யந்தீதி ஏகம் லபி⁴த்வா த்³வே பத்த²யந்தி, த்³வே லபி⁴த்வா சத்தாரோதி ஏவம் உத்தருத்தரி வத்து²காமகிலேஸகாமே பத்த²யந்தியேவ.

பஸய்ஹாதி ஸபத்தக³ணம் அபி⁴ப⁴வித்வா. ஸஸாக³ரந்தந்தி ஸத்³தி⁴ம் ஸாக³ரந்தேன. ஓரம் ஸமுத்³த³ஸ்ஸாதி யம் ஸமுத்³த³ஸ்ஸ ஓரதோ ஸகரட்ட²ம், தேன அதித்தரூபோதி அத்தோ². ந ஹத்தீ²தி ந ஹி அத்தி².

அஹோ வதா நோதி அஹோ வத நு, அயமேவ வா பாடோ². அமராதி சாஹூதி அமரம் இதி ச ஆஹு. இத³ம் வுத்தம் ஹோதி – யம் மதம் ஞாதீ பரிவாரேத்வா கந்த³ந்தி, தம் – ‘‘அஹோ வத அம்ஹாகம் பா⁴தா மதோ, புத்தோ மதோ’’திஆதீ³னிபி வத³ந்தி.

பு²ஸந்தி ப²ஸ்ஸந்தி மரணப²ஸ்ஸம் பு²ஸந்தி. ததே²வ பு²ட்டோ²தி யதா² பா³லோ, தீ⁴ரோபி ததே²வ மரணப²ஸ்ஸேன பு²ட்டோ², அபு²ட்டோ² நாம நத்தி², அயம் பன விஸேஸோ. பா³லோ ச பா³ல்யா வதி⁴தோவ ஸேதீதி பா³லோ பா³லபா⁴வேன மரணப²ஸ்ஸம் ஆக³ம்ம வதி⁴தோவ ஸேதி அபி⁴ஹதோவ ஸயதி. அகதம் வத மே கல்யாணந்திஆதி³விப்படிஸாரவஸேன சலதி வேத⁴தி விப்ப²ந்த³தி. தீ⁴ரோ ச ந வேத⁴தீதி தீ⁴ரோ ஸுக³தினிமித்தம் பஸ்ஸந்தோ ந வேத⁴தி ந சலதி.

யாய வோஸானம் இதா⁴தி⁴க³ச்ச²தீதி யாய பஞ்ஞாய இமஸ்மிம் லோகே ஸப்³ப³கிச்சவோஸானம் அரஹத்தம் அதி⁴க³ச்ச²தி, ஸாவ த⁴னதோ உத்தமதரா. அப்³யோஸிதத்தாதி அபரியோஸிதத்தா, அரஹத்தபத்தியா, அபா⁴வேனாதி அத்தோ². ப⁴வாப⁴வேஸூதி ஹீனப்பணீதேஸு ப⁴வேஸு.

உபேதி க³ப்³ப⁴ஞ்ச பரஞ்ச லோகந்தி தேஸு பாபம் கரோந்தேஸு யோ கோசி ஸத்தோ பரம்பராய ஸம்ஸாரம் ஆபஜ்ஜித்வா க³ப்³ப⁴ஞ்ச பரஞ்ச லோகம் உபேதி. தஸ்ஸப்பபஞ்ஞோதி தஸ்ஸ தாதி³ஸஸ்ஸ அப்பபஞ்ஞஸ்ஸ அஞ்ஞோ அப்பபஞ்ஞோ அபி⁴ஸத்³த³ஹந்தோ.

ஸகம்முனா ஹஞ்ஞதீதி அத்தனா கதகம்மவஸேன ‘‘கஸாஹிபி தாலேதீ’’திஆதீ³ஹி கம்மகாரணாஹி ஹஞ்ஞதி. பேச்ச பரம்ஹி லோகேதி இதோ க³ந்த்வா பரம்ஹி அபாயலோகே.

விரூபரூபேனாதி விவித⁴ரூபேன, நானாஸபா⁴வேனாதி அத்தோ². காமகு³ணேஸூதி தி³ட்ட²த⁴ம்மிகஸம்பராயிகேஸு ஸப்³ப³காமகு³ணேஸு ஆதீ³னவம் தி³ஸ்வா. த³ஹராதி அந்தமஸோ கலலமத்தபா⁴வம் உபாதா³ய தருணா. வுட்³டா⁴தி வஸ்ஸஸதாதிக்கந்தா. அபண்ணகம் ஸாமஞ்ஞமேவ ஸேய்யோதி அவிருத்³த⁴ம் அத்³வஜ்ஜ²கா³மிம் ஏகந்தனிய்யானிகம் ஸாமஞ்ஞமேவ ‘‘ஸேய்யோ, உத்தரிதரஞ்ச பணீததரஞ்சா’’தி உபதா⁴ரேத்வா பப்³ப³ஜிதோஸ்மி மஹாராஜாதி. தஸ்மா யம் த்வம் வத³ஸி – ‘‘கிம் தி³ஸ்வா வா ஸுத்வா வா’’தி, இத³ம் தி³ஸ்வா ச ஸுத்வா ச பப்³ப³ஜிதோஸ்மீதி மம் தா⁴ரேஹீதி தே³ஸனம் நிட்டா²பேஸீதி.

பபஞ்சஸூத³னியா மஜ்ஜி²மனிகாயட்ட²கதா²ய

ரட்ட²பாலஸுத்தவண்ணனா நிட்டி²தா.