7. மஹாஸகுலுதா³யிஸுத்தவண்ணனா

237. ஏவம் மே ஸுதந்தி மஹாஸகுலுதா³யிஸுத்தம். தத்த² மோரனிவாபேதி தஸ்மிம் டா²னே மோரானம் அப⁴யம் கோ⁴ஸேத்வா போ⁴ஜனம் அத³ம்ஸு. தஸ்மா தம் டா²னம் மோரனிவாபோதி ஸங்க²ம் க³தம். அன்னபா⁴ரோதி ஏகஸ்ஸ பரிப்³பா³ஜகஸ்ஸ நாமம். ததா² வரத⁴ரோதி. அஞ்ஞே சாதி ந கேவலம் இமே தயோ, அஞ்ஞேபி அபி⁴ஞ்ஞாதா ப³ஹூ பரிப்³பா³ஜகா. அப்பஸத்³த³ஸ்ஸ வண்ணவாதீ³தி இத⁴ அப்பஸத்³த³வினீதோதி அவத்வாவ இத³ம் வுத்தம். கஸ்மா? ந ஹி ப⁴க³வா அஞ்ஞேன வினீதோதி.

238. புரிமானீதி ஹிய்யோதி³வஸம் உபாதா³ய புரிமானி நாம ஹோந்தி, ததோ பரம் புரிமதரானி. குதூஹலஸாலாயந்தி குதூஹலஸாலா நாம பச்சேகஸாலா நத்தி², யத்த² பன நானாதித்தி²யா ஸமணப்³ராஹ்மணா நானாவித⁴ம் கத²ம் பவத்தேந்தி, ஸா ப³ஹூனம் – ‘‘அயம் கிம் வத³தி, அயம் கிம் வத³தீ’’தி குதூஹலுப்பத்திட்டா²னதோ ‘‘குதூஹலஸாலா’’தி வுச்சதி. ‘‘கோதூஹலஸாலா’’திபி பாடோ². லாபா⁴தி யே ஏவரூபே ஸமணப்³ராஹ்மணே த³ட்டு²ம் பஞ்ஹம் புச்சி²தும் த⁴ம்மகத²ம் வா நேஸம் ஸோதும் லப⁴ந்தி, தேஸம் அங்க³மக³தா⁴னம் இமே லாபா⁴தி அத்தோ².

ஸங்கி⁴னோதிஆதீ³ஸு பப்³ப³ஜிதஸமூஹஸங்கா²தோ ஸங்கோ⁴ ஏதேஸம் அத்தீ²தி ஸங்கி⁴னோ. ஸ்வேவ க³ணோ ஏதேஸம் அத்தீ²தி க³ணினோ. ஆசாரஸிக்கா²பனவஸேன தஸ்ஸ க³ணஸ்ஸ ஆசரியாதி க³ணாசரியா. ஞாதாதி பஞ்ஞாதா பாகடா. யதா²பு⁴ச்சகு³ணேஹி சேவ அயதா²பூ⁴தகு³ணேஹி ச ஸமுக்³க³தோ யஸோ ஏதேஸம் அத்தீ²தி யஸஸ்ஸினோ. பூரணாதீ³னஞ்ஹி ‘‘அப்பிச்சோ² ஸந்துட்டோ², அப்பிச்ச²தாய வத்த²ம்பி ந நிவாஸேதீ’’திஆதி³னா நயேன யஸோ ஸமுக்³க³தோ, ததா²க³தஸ்ஸ ‘‘இதிபி ஸோ ப⁴க³வா’’திஆதீ³ஹி யதா²பூ⁴தகு³ணேஹி. தித்த²கராதி லத்³தி⁴கரா. ஸாது⁴ஸம்மதாதி இமே ஸாதூ⁴ ஸுந்த³ரா ஸப்புரிஸாதி ஏவம் ஸம்மதா. ப³ஹுஜனஸ்ஸாதி அஸ்ஸுதவதோ சேவ அந்த⁴பா³லபுது²ஜ்ஜனஸ்ஸ விபா⁴வினோ ச பண்டி³தஜனஸ்ஸ. தத்த² தித்தி²யா பா³லஜனஸ்ஸ ஏவம் ஸம்மதா, ததா²க³தோ பண்டி³தஜனஸ்ஸ. இமினா நயேன பூரணோ கஸ்ஸபோ ஸங்கீ⁴திஆதீ³ஸு அத்தோ² வேதி³தப்³போ³. ப⁴க³வா பன யஸ்மா அட்ட²திம்ஸ ஆரம்மணானி விப⁴ஜந்தோ ப³ஹூனி நிப்³பா³னஓதரணதித்தா²னி அகாஸி, தஸ்மா ‘‘தித்த²கரோ’’தி வத்தும் வட்டதி.

கஸ்மா பனேதே ஸப்³பே³பி தத்த² ஓஸடாதி? உபட்டா²கரக்க²ணத்த²ஞ்சேவ லாப⁴ஸக்காரத்த²ஞ்ச. தேஸஞ்ஹி ஏவம் ஹோதி – ‘‘அம்ஹாகம் உபட்டா²கா ஸமணம் கோ³தமம் ஸரணம் க³ச்சே²ய்யும், தே ச ரக்கி²ஸ்ஸாம. ஸமணஸ்ஸ ச கோ³தமஸ்ஸ உபட்டா²கே ஸக்காரம் கரோந்தே தி³ஸ்வா அம்ஹாகம்பி உபட்டா²கா அம்ஹாகம் ஸக்காரம் கரிஸ்ஸந்தீ’’தி. தஸ்மா யத்த² யத்த² ப⁴க³வா ஓஸரதி, தத்த² தத்த² ஸப்³பே³ ஓஸரந்தி.

239. வாத³ம் ஆரோபேத்வாதி வாதே³ தோ³ஸம் ஆரோபேத்வா. அபக்கந்தாதி, அபக³தா, கேசி தி³ஸம் பக்கந்தா, கேசி கி³ஹிபா⁴வம் பத்தா, கேசி இமம் ஸாஸனம் ஆக³தா. ஸஹிதம் மேதி மய்ஹம் வசனம் ஸஹிதம் ஸிலிட்ட²ம், அத்த²யுத்தம் காரணயுத்தந்தி அத்தோ². அஸஹிதம் தேதி துய்ஹம் வசனம் அஸஹிதம். அதி⁴சிண்ணம் தே விபராவத்தந்தி யம் துய்ஹம் தீ³க⁴ரத்தாசிண்ணவஸேன ஸுப்பகு³ணம், தம் மய்ஹம் ஏகவசனேனேவ விபராவத்தம் விபரிவத்தித்வா டி²தம், ந கிஞ்சி ஜாதந்தி அத்தோ². ஆரோபிதோ தே வாதோ³தி மயா தவ வாதே³ தோ³ஸோ ஆரோபிதோ. சர வாத³ப்பமோக்கா²யாதி தோ³ஸமோசனத்த²ம் சர விசர, தத்த² தத்த² க³ந்த்வா ஸிக்கா²தி அத்தோ². நிப்³பே³டே²ஹி வா ஸசே பஹோஸீதி அத² ஸயம் பஹோஸி, இதா³னேவ நிப்³பே³டே²ஹி. த⁴ம்மக்கோஸேனாதி ஸபா⁴வக்கோஸேன.

240. தம் நோ ஸோஸ்ஸாமாதி தம் அம்ஹாகம் தே³ஸிதம் த⁴ம்மம் ஸுணிஸ்ஸாம. கு²த்³த³மது⁴ந்தி கு²த்³த³கமக்கி²காஹி கதம் த³ண்ட³கமது⁴ம். அனேலகந்தி நித்³தோ³ஸம் அபக³தமச்சி²கண்ட³கம். பீளேய்யாதி த³தே³ய்ய. பச்சாஸீஸமானரூபோதி பூரேத்வா நு கோ² நோ போ⁴ஜனம் த³ஸ்ஸதீதி பா⁴ஜனஹத்தோ² பச்சாஸீஸமானோ பச்சுபட்டி²தோ அஸ்ஸ. ஸம்பயோஜேத்வாதி அப்பமத்தகம் விவாத³ம் கத்வா.

241. இதரீதரேனாதி லாமகலாமகேன. பவிவித்தோதி இத³ம் பரிப்³பா³ஜகோ காயவிவேகமத்தம் ஸந்தா⁴ய வத³தி, ப⁴க³வா பன தீஹி விவேகேஹி விவித்தோவ.

242. கோஸகாஹாராபீதி தா³னபதீனம் க⁴ரே அக்³க³பி⁴க்கா²ட²பனத்த²ம் கு²த்³த³கஸராவா ஹோந்தி, தா³னபதினோ அக்³க³ப⁴த்தம் வா தத்த² ட²பேத்வா பு⁴ஞ்ஜந்தி, பப்³ப³ஜிதே ஸம்பத்தே தம் ப⁴த்தம் தஸ்ஸ தே³ந்தி. தம் ஸராவகம் கோஸகோதி வுச்சதி. தஸ்மா யே ச ஏகேனேவ ப⁴த்தகோஸகேன யாபேந்தி, தே கோஸகாஹாராதி. பே³லுவாஹாராதி பே³லுவமத்தப⁴த்தாஹாரா. ஸமதித்திகந்தி ஓட்ட²வட்டியா ஹேட்டி²மலேகா²ஸமம். இமினா த⁴ம்மேனாதி இமினா அப்பாஹாரதாத⁴ம்மேன. ஏத்த² பன ஸப்³பா³காரேனேவ ப⁴க³வா அனப்பாஹாரோதி ந வத்தப்³போ³. பதா⁴னபூ⁴மியம் ச²ப்³ப³ஸ்ஸானி அப்பாஹாரோவ அஹோஸி, வேரஞ்ஜாயம் தயோ மாஸே பத்தோ²த³னேனேவ யாபேஸி பாலிலேய்யகவனஸண்டே³ தயோ மாஸே பி⁴ஸமுளாலேஹேவ யாபேஸி. இத⁴ பன ஏதமத்த²ம் த³ஸ்ஸேதி – ‘‘அஹம் ஏகஸ்மிம் காலே அப்பாஹாரோ அஹோஸிம், மய்ஹம் பன ஸாவகா து⁴தங்க³ஸமாதா³னதோ பட்டா²ய யாவஜீவம் து⁴தங்க³ம் ந பி⁴ந்த³ந்தீ’’தி. தஸ்மா யதி³ தே இமினா த⁴ம்மேன ஸக்கரேய்யும், மயா ஹி தே விஸேஸதரா. அஞ்ஞோ சேவ பன த⁴ம்மோ அத்தி², யேன மம் தே ஸக்கரோந்தீதி த³ஸ்ஸேதி. இமினா நயேன ஸப்³ப³வாரேஸு யோஜனா வேதி³தப்³பா³.

பம்ஸுகூலிகாதி ஸமாதி³ன்னபம்ஸுகூலிகங்கா³. லூக²சீவரத⁴ராதி ஸத்த²ஸுத்தலூகா²னி சீவரானி தா⁴ரயமானா. நந்தகானீதி அந்தவிரஹிதானி வத்த²க²ண்டா³னி, யதி³ ஹி நேஸம் அந்தோ ப⁴வேய்ய, பிலோதிகாதி ஸங்க²ம் க³ச்சே²ய்யும். உச்சினித்வாதி பா²லேத்வா து³ப்³ப³லட்டா²னம் பஹாய தி²ரட்டா²னமேவ க³ஹேத்வா. அலாபு³லோமஸானீதி அலாபு³லோமஸதி³ஸஸுத்தானி ஸுகு²மானீதி தீ³பேதி. ஏத்தாவதா ச ஸத்தா² சீவரஸந்தோஸேன அஸந்துட்டோ²தி ந வத்தப்³போ³. அதிமுத்தகஸுஸானதோ ஹிஸ்ஸ புண்ணதா³ஸியா பாருபித்வா பாதிதஸாணபம்ஸுகூலம் க³ஹணதி³வஸே உத³கபரியந்தம் கத்வா மஹாபத²வீ அகம்பி. இத⁴ பன ஏதமத்த²ம் த³ஸ்ஸேதி – ‘‘அஹம் ஏகஸ்மிம்யேவ காலே பம்ஸுகூலம் க³ண்ஹிம், மய்ஹம் பன ஸாவகா து⁴தங்க³ஸமாதா³னதோ பட்டா²ய யாவஜீவம் து⁴தங்க³ம் ந பி⁴ந்த³ந்தீ’’தி.

பிண்ட³பாதிகாதி அதிரேகலாப⁴ம் படிக்கி²பித்வா ஸமாதி³ன்னபிண்ட³பாதிகங்கா³. ஸபதா³னசாரினோதி லோலுப்பசாரம் படிக்கி²பித்வா ஸமாதி³ன்னஸபதா³னசாரா. உஞ்சா²ஸகே வதே ரதாதி உஞ்சா²சரியஸங்கா²தே பி⁴க்கூ²னம் பகதிவதே ரதா, உச்சனீசக⁴ரத்³வாரட்டா²யினோ ஹுத்வா கப³ரமிஸ்ஸகம் ப⁴த்தம் ஸம்ஹரித்வா பரிபு⁴ஞ்ஜந்தீதி அத்தோ². அந்தரக⁴ரந்தி ப்³ரஹ்மாயுஸுத்தே உம்மாரதோ பட்டா²ய அந்தரக⁴ரம், இத⁴ இந்த³கீ²லதோ பட்டா²ய அதி⁴ப்பேதம். ஏத்தாவதா ச ஸத்தா² பிண்ட³பாதஸந்தோஸேன அஸந்துட்டோ²தி ந வத்தப்³போ³, அப்பாஹாரதாய வுத்தனியாமேனேவ பன ஸப்³ப³ம் வித்தா²ரேதப்³ப³ம். இத⁴ பன ஏதமத்த²ம் த³ஸ்ஸேதி – ‘‘அஹம் ஏகஸ்மிம்யேவ காலே நிமந்தனம் ந ஸாத³யிம், மய்ஹம் பன ஸாவகா து⁴தங்க³ஸமாதா³னதோ பட்டா²ய யாவஜீவம் து⁴தங்க³ம் ந பி⁴ந்த³ந்தீ’’தி.

ருக்க²மூலிகாதி ச²ன்னம் படிக்கி²பித்வா ஸமாதி³ன்னருக்க²மூலிகங்கா³. அப்³போ⁴காஸிகாதி ச²ன்னஞ்ச ருக்க²மூலஞ்ச படிக்கி²பித்வா ஸமாதி³ன்னஅப்³போ⁴காஸிகங்கா³. அட்ட²மாஸேதி ஹேமந்தகி³ம்ஹிகே மாஸே. அந்தோவஸ்ஸே பன சீவரானுக்³க³ஹத்த²ம் ச²ன்னம் பவிஸந்தி. ஏத்தாவதா ச ஸத்தா² ஸேனாஸனஸந்தோஸேன அஸந்துட்டோ²தி ந வத்தப்³போ³, ஸேனாஸனஸந்தோஸோ பனஸ்ஸ ச²ப்³ப³ஸ்ஸிகமஹாபதா⁴னேன ச பாலிலேய்யகவனஸண்டே³ன ச தீ³பேதப்³போ³. இத⁴ பன ஏதமத்த²ம் த³ஸ்ஸேதி – ‘‘அஹம் ஏகஸ்மிம்யேவ காலே ச²ன்னம் ந பாவிஸிம், மய்ஹம் பன ஸாவகா து⁴தங்க³ஸமாதா³னதோ பட்டா²ய யாவஜீவம் து⁴தங்க³ம் ந பி⁴ந்த³ந்தீ’’தி.

ஆரஞ்ஞிகாதி கா³மந்தஸேனாஸனம் படிக்கி²பித்வா ஸமாதி³ன்னஆரஞ்ஞிகங்கா³. ஸங்க⁴மஜ்ஜே² ஓஸரந்தீதி அப³த்³த⁴ஸீமாய கதி²தம், ப³த்³த⁴ஸீமாயம் பன வஸந்தா அத்தனோ வஸனட்டா²னேயேவ உபோஸத²ம் கரோந்தி. ஏத்தாவதா ச ஸத்தா² நோ பவிவித்தோதி ந வத்தப்³போ³, ‘‘இச்சா²மஹம், பி⁴க்க²வே, அட்³ட⁴மாஸம் படிஸல்லியிது’’ந்தி (பாரா. 162; 565) ஏவஞ்ஹிஸ்ஸ பவிவேகோ பஞ்ஞாயதி. இத⁴ பன ஏதமத்த²ம் த³ஸ்ஸேதி ‘‘அஹம் ஏகஸ்மிம்யேவ ததா²ரூபே காலே படிஸல்லியிம், மய்ஹம் பன ஸாவகா து⁴தங்க³ஸமாதா³னதோ பட்டா²ய யாவஜீவம் து⁴தங்க³ம் ந பி⁴ந்த³ந்தீ’’தி. மமம் ஸாவகாதி மம் ஸாவகா.

244. ஸனிதா³னந்தி ஸப்பச்சயம். கிம் பன அப்பச்சயம் நிப்³பா³னம் ந தே³ஸேதீதி. நோ ந தே³ஸேதி, ஸஹேதுகம் பன தம் தே³ஸனம் கத்வா தே³ஸேதி, நோ அஹேதுகந்தி. ஸப்பாடிஹாரியந்தி புரிமஸ்ஸேவேதம் வேவசனம், ஸகாரணந்தி அத்தோ². தம் வதாதி ஏத்த² வதாதி நிபாதமத்தம்.

245. அனாக³தம் வாத³பத²ந்தி அஜ்ஜ ட²பேத்வா ஸ்வே வா புனதி³வஸே வா அட்³ட⁴மாஸே வா மாஸே வா ஸம்வச்ச²ரே வா தஸ்ஸ தஸ்ஸ பஞ்ஹஸ்ஸ உபரி ஆக³மனவாத³பத²ம். ந த³க்க²தீதி யதா² ஸச்சகோ நிக³ண்டோ² அத்தனோ நிக்³க³ஹணத்த²ம் ஆக³தகாரணம் விஸேஸேத்வா வத³ந்தோ ந அத்³த³ஸ, ஏவம் ந த³க்க²தீதி நேதம் டா²னம் விஜ்ஜதி. ஸஹத⁴ம்மேனாதி ஸகாரணேன. அந்தரந்தரா கத²ம் ஓபாதேய்யுந்தி மம கதா²வாரம் பச்சி²ந்தி³த்வா அந்தரந்தரே அத்தனோ கத²ம் பவேஸேய்யுந்தி அத்தோ². ந கோ² பனாஹம், உதா³யீதி, உதா³யி, அஹம் அம்ப³ட்ட²ஸோணத³ண்ட³கூடத³ந்தஸச்சகனிக³ண்டா²தீ³ஹி ஸத்³தி⁴ம் மஹாவாதே³ வத்தமானேபி – ‘‘அஹோ வத மே ஏகஸாவகோபி உபமம் வா காரணம் வா ஆஹரித்வா த³தே³ய்யா’’தி ஏவம் ஸாவகேஸு அனுஸாஸனிம் ந பச்சாஸீஸாமி. மமயேவாதி ஏவரூபேஸு டா²னேஸு ஸாவகா மமயேவ அனுஸாஸனிம் ஓவாத³ம் பச்சாஸீஸந்தி.

246. தேஸாஹம் சித்தம் ஆராதே⁴மீதி தேஸம் அஹம் தஸ்ஸ பஞ்ஹஸ்ஸ வேய்யாகரணேன சித்தம் க³ண்ஹாமி ஸம்பாதே³மி பரிபூரேமி, அஞ்ஞம் புட்டோ² அஞ்ஞம் ந ப்³யாகரோமி, அம்ப³ம் புட்டோ² லபு³ஜம் விய லபு³ஜம் வா புட்டோ² அம்ப³ம் விய. ஏத்த² ச ‘‘அதி⁴ஸீலே ஸம்பா⁴வேந்தீ’’தி வுத்தட்டா²னே பு³த்³த⁴ஸீலம் நாம கதி²தம், ‘‘அபி⁴க்கந்தே ஞாணத³ஸ்ஸனே ஸம்பா⁴வேந்தீ’’தி வுத்தட்டா²னே ஸப்³ப³ஞ்ஞுதஞ்ஞாணம், ‘‘அதி⁴பஞ்ஞாய ஸம்பா⁴வேந்தீ’’தி வுத்தட்டா²னே டா²னுப்பத்திகபஞ்ஞா, ‘‘யேன து³க்கே²னா’’தி வுத்தட்டா²னே ஸச்சப்³யாகரணபஞ்ஞா. தத்த² ஸப்³ப³ஞ்ஞுதஞ்ஞாணஞ்ச ஸச்சப்³யாகரணபஞ்ஞஞ்ச ட²பேத்வா அவஸேஸா பஞ்ஞா அதி⁴பஞ்ஞம் ப⁴ஜதி.

247. இதா³னி தேஸம் தேஸம் விஸேஸாதி⁴க³மானம் படிபத³ம் ஆசிக்க²ந்தோ புன சபரம் உதா³யீதிஆதி³மாஹ. தத்த² அபி⁴ஞ்ஞாவோஸானபாரமிப்பத்தாதி அபி⁴ஞ்ஞாவோஸானஸங்கா²தஞ்சேவ அபி⁴ஞ்ஞாபாரமீஸங்கா²தஞ்ச அரஹத்தம் பத்தா.

ஸம்மப்பதா⁴னேதி உபாயபதா⁴னே. ச²ந்த³ம் ஜனேதீதி கத்துகம்யதாகுஸலச்ச²ந்த³ம் ஜனேதி. வாயமதீதி வாயாமம் கரோதி. வீரியம் ஆரப⁴தீதி வீரியம் பவத்தேதி. சித்தம் பக்³க³ண்ஹாதீதி சித்தம் உக்கி²பதி. பத³ஹதீதி உபாயபதா⁴னம் கரோதி. பா⁴வனாய பாரிபூரியாதி வட்³டி⁴யா பரிபூரணத்த²ம். அபிசேத்த² – ‘‘யா டி²தி, ஸோ அஸம்மோஸோ…பே… யம் வேபுல்லம், ஸா பா⁴வனாபாரிபூரீ’’தி (விப⁴. 406) ஏவம் புரிமம் புரிமஸ்ஸ பச்சி²மம் பச்சி²மஸ்ஸ அத்தோ²திபி வேதி³தப்³ப³ம்.

இமேஹி பன ஸம்மப்பதா⁴னேஹி கிம் கதி²தம்? கஸ்ஸபஸம்யுத்தபரியாயேன ஸாவகஸ்ஸ புப்³ப³பா⁴க³படிபதா³ கதி²தா. வுத்தஞ்ஹேதம் தத்த² –

‘‘சத்தாரோமே, ஆவுஸோ, ஸம்மப்பதா⁴னா. கதமே சத்தாரோ? இதா⁴வுஸோ, பி⁴க்கு², அனுப்பன்னா மே பாபகா அகுஸலா த⁴ம்மா உப்பஜ்ஜமானா அனத்தா²ய ஸம்வத்தேய்யுந்தி ஆதப்பம் கரோதி. உப்பன்னா மே பாபகா அகுஸலா த⁴ம்மா அப்பஹீயமானா அனத்தா²ய ஸம்வத்தேய்யுந்தி ஆதப்பம் கரோதி. அனுப்பன்னா மே குஸலா த⁴ம்மா அனுப்பஜ்ஜமானா அனத்தா²ய ஸம்வத்தேய்யுந்தி ஆதப்பம் கரோதி. உப்பன்னா மே குஸலா த⁴ம்மா நிருஜ்ஜ²மானா அனத்தா²ய ஸம்வத்தேய்யுந்தி ஆதப்பம் கரோதீ’’தி (ஸம். நி. 2.145).

ஏத்த² ச பாபகா அகுஸலாதி லோபா⁴த³யோ வேதி³தப்³பா³. அனுப்பன்னா குஸலா த⁴ம்மாதி ஸமத²விபஸ்ஸனா சேவ மக்³கோ³ ச, உப்பன்னா குஸலா நாம ஸமத²விபஸ்ஸனாவ. மக்³கோ³ பன ஸகிம் உப்பஜ்ஜித்வா நிருஜ்ஜ²மானோ அனத்தா²ய ஸம்வத்தனகோ நாம நத்தி². ஸோ ஹி ப²லஸ்ஸ பச்சயம் த³த்வாவ நிருஜ்ஜ²தி. புரிமஸ்மிம்பி வா ஸமத²விபஸ்ஸனாவ க³ஹேதப்³பா³தி வுத்தம், தம் பன ந யுத்தம்.

தத்த² ‘‘உப்பன்னா ஸமத²விபஸ்ஸனா நிருஜ்ஜ²மானா அனத்தா²ய ஸம்வத்தந்தீ’’தி அத்த²ஸ்ஸ ஆவிபா⁴வத்த²மித³ம் வத்து² – ஏகோ கிர கீ²ணாஸவத்தே²ரோ ‘‘மஹாசேதியஞ்ச மஹாபோ³தி⁴ஞ்ச வந்தி³ஸ்ஸாமீ’’தி ஸமாபத்திலாபி⁴னா ப⁴ண்ட³கா³ஹகஸாமணேரேன ஸத்³தி⁴ம் ஜனபத³தோ மஹாவிஹாரம் ஆக³ந்த்வா விஹாரபரிவேணம் பாவிஸி. ஸாயன்ஹஸமயே மஹாபி⁴க்கு²ஸங்கே⁴ சேதியம் வந்த³மானே சேதியம் வந்த³னத்தா²ய ந நிக்க²மி. கஸ்மா? கீ²ணாஸவானஞ்ஹி தீஸு ரதனேஸு மஹந்தம் கா³ரவம் ஹோதி. தஸ்மா பி⁴க்கு²ஸங்கே⁴ வந்தி³த்வா படிக்கமந்தே மனுஸ்ஸானம் ஸாயமாஸபு⁴த்தவேலாயம் ஸாமணேரம்பி அஜானாபேத்வா ‘‘சேதியம் வந்தி³ஸ்ஸாமீ’’தி ஏககோவ நிக்க²மி. ஸாமணேரோ – ‘‘கிம் நு கோ² தே²ரோ அவேலாய ஏககோவ க³ச்ச²தி, ஜானிஸ்ஸாமீ’’தி உபஜ்ஜா²யஸ்ஸ பதா³னுபதி³கோ நிக்க²மி. தே²ரோ அனாவஜ்ஜனேன தஸ்ஸ ஆக³மனம் அஜானந்தோ த³க்கி²ணத்³வாரேன சேதியங்க³ணம் ஆருஹி. ஸாமணேரோபி அனுபத³ம்யேவ ஆருள்ஹோ.

மஹாதே²ரோ மஹாசேதியம் உல்லோகேத்வா பு³த்³தா⁴ரம்மணம் பீதிம் க³ஹேத்வா ஸப்³ப³ம் சேதஸோ ஸமன்னாஹரித்வா ஹட்ட²பஹட்டோ² சேதியம் வந்த³தி. ஸாமணேரோ தே²ரஸ்ஸ வந்த³னாகாரம் தி³ஸ்வா ‘‘உபஜ்ஜா²யோ மே அதிவிய பஸன்னசித்தோ வந்த³தி, கிம் நு கோ² புப்பா²னி லபி⁴த்வா பூஜம் கரேய்யா’’தி சிந்தேஸி. தே²ரோ வந்தி³த்வா உட்டா²ய ஸிரஸி அஞ்ஜலிம் ட²பேத்வா மஹாசேதியம் உல்லோகேத்வா டி²தோ. ஸாமணேரோ உக்காஸித்வா அத்தனோ ஆக³தபா⁴வம் ஜானாபேஸி. தே²ரோ பரிவத்தேத்வா ஓலோகேந்தோ ‘‘கதா³ ஆக³தோஸீ’’தி புச்சி². தும்ஹாகம் சேதியம் வந்த³னகாலே, ப⁴ந்தே. அதிவிய பஸன்னா சேதியம் வந்தி³த்த² கிம் நு கோ² புப்பா²னி லபி⁴த்வா பூஜேய்யாதா²தி? ஆம ஸாமணேர இமஸ்மிம் சேதியே விய அஞ்ஞத்ர ஏத்தகம் தா⁴தூனம் நிதா⁴னம் நாம நத்தி², ஏவரூபம் அஸதி³ஸம் மஹாதூ²பம் புப்பா²னி லபி⁴த்வா கோ ந பூஜேய்யாதி. தேன ஹி, ப⁴ந்தே, அதி⁴வாஸேத², ஆஹரிஸ்ஸாமீதி தாவதே³வ ஜா²னம் ஸமாபஜ்ஜித்வா இத்³தி⁴யா ஹிமவந்தம் க³ந்த்வா வண்ணக³ந்த⁴ஸம்பன்னபுப்பா²னி பரிஸ்ஸாவனம் பூரேத்வா மஹாதே²ரே த³க்கி²ணமுக²தோ பச்சி²மம் முக²ம் அஸம்பத்தேயேவ ஆக³ந்த்வா புப்ப²பரிஸ்ஸாவனம் ஹத்தே² ட²பேத்வா ‘‘பூஜேத², ப⁴ந்தே,’’தி ஆஹ. தே²ரோ ‘‘அதிமந்தா³னி நோ ஸாமணேர புப்பா²னீ’’தி ஆஹ. க³ச்ச²த², ப⁴ந்தே, ப⁴க³வதோ கு³ணே ஆவஜ்ஜித்வா பூஜேதா²தி.

தே²ரோ பச்சி²மமுக²னிஸ்ஸிதேன ஸோபாணேன ஆருய்ஹ குச்சி²வேதி³காபூ⁴மியம் புப்ப²பூஜம் காதும் ஆரத்³தோ⁴. வேதி³காபூ⁴மியம் பரிபுண்ணானி புப்பா²னி பதித்வா து³தியபூ⁴மியம் ஜண்ணுபமாணேன ஓதி⁴னா பூரயிம்ஸு. ததோ ஓதரித்வா பாத³பிட்டி²கபந்திம் பூஜேஸி. ஸாபி பரிபூரி. பரிபுண்ணபா⁴வம் ஞத்வா ஹேட்டி²மதலே விகிரந்தோ அக³மாஸி. ஸப்³ப³ம் சேதியங்க³ணம் பரிபூரி. தஸ்மிம் பரிபுண்ணே ‘‘ஸாமணேர புப்பா²னி ந கீ²யந்தீ’’தி ஆஹ. பரிஸ்ஸாவனம், ப⁴ந்தே, அதோ⁴முக²ம் கரோதா²தி. அதோ⁴முக²ம் கத்வா சாலேஸி, ததா³ புப்பா²னி கீ²ணானி. பரிஸ்ஸாவனம் ஸாமணேரஸ்ஸ த³த்வா ஸத்³தி⁴ம் ஹத்தி²பாகாரேன சேதியம் திக்க²த்தும் பத³க்கி²ணம் கத்வா சதூஸு டா²னேஸு வந்தி³த்வா பரிவேணம் க³ச்ச²ந்தோ சிந்தேஸி – ‘‘யாவ மஹித்³தி⁴கோ வதாயம் ஸாமணேரோ, ஸக்கி²ஸ்ஸதி நு கோ² இமம் இத்³தா⁴னுபா⁴வம் ரக்கி²து’’ந்தி. ததோ ‘‘ந ஸக்கி²ஸ்ஸதீ’’தி தி³ஸ்வா ஸாமணேரமாஹ – ‘‘ஸாமணேர த்வம் இதா³னி மஹித்³தி⁴கோ, ஏவரூபம் பன இத்³தி⁴ம் நாஸேத்வா பச்சி²மகாலே காணபேஸகாரியா ஹத்தே²ன மத்³தி³தகஞ்ஜியம் பிவிஸ்ஸஸீ’’தி. த³ஹரகபா⁴வஸ்ஸ நாமேஸ தோ³ஸோயம், ஸோ உபஜ்ஜா²யஸ்ஸ கதா²யம் ஸம்விஜ்ஜித்வா – ‘‘கம்மட்டா²னம் மே, ப⁴ந்தே, ஆசிக்க²தா²’’தி ந யாசி, அம்ஹாகம் உபஜ்ஜா²யோ கிம் வத³தீதி தம் பன அஸுணந்தோ விய அக³மாஸி.

தே²ரோ மஹாசேதியஞ்ச மஹாபோ³தி⁴ஞ்ச வந்தி³த்வா ஸாமணேரம் பத்தசீவரம் கா³ஹாபேத்வா அனுபுப்³பே³ன குடேளிதிஸ்ஸமஹாவிஹாரம் அக³மாஸி. ஸாமணேரோ உபஜ்ஜா²யஸ்ஸ பதா³னுபதி³கோ ஹுத்வா பி⁴க்கா²சாரம் ந க³ச்ச²தி, ‘‘கதரம் கா³மம் பவிஸத², ப⁴ந்தே,’’தி புச்சி²த்வா பன ‘‘இதா³னி மே உபஜ்ஜா²யோ கா³மத்³வாரம் பத்தோ ப⁴விஸ்ஸதீ’’தி ஞத்வா அத்தனோ ச உபஜ்ஜா²யஸ்ஸ ச பத்தசீவரம் க³ஹேத்வா ஆகாஸேன க³ந்த்வா தே²ரஸ்ஸ பத்தசீவரம் த³த்வா பிண்டா³ய பவிஸதி. தே²ரோ ஸப்³ப³காலம் ஓவத³தி – ‘‘ஸாமணேர மா ஏவமகாஸி, புது²ஜ்ஜனித்³தி⁴ நாம சலா அனிப³த்³தா⁴, அஸப்பாயம் ரூபாதி³ஆரம்மணம் லபி⁴த்வா அப்பமத்தகேனேவ பி⁴ஜ்ஜதி, ஸந்தாய ஸமாபத்தியா பரிஹீனாய ப்³ரஹ்மசரியவாஸோ ஸந்த²ம்பி⁴தும் ந ஸக்கோதீ’’தி. ஸாமணேரோ ‘‘கிம் கதே²தி மய்ஹம் உபஜ்ஜா²யோ’’தி ஸோதும் ந இச்ச²தி, ததே²வ கரோதி. தே²ரோ அனுபுப்³பே³ன சேதியவந்த³னம் கரோந்தோ கம்முபி³ந்து³விஹாரம் நாம க³தோ. தத்த² வஸந்தேபி தே²ரே ஸாமணேரோ ததே²வ கரோதி.

அதே²கதி³வஸம் ஏகா பேஸகாரதீ⁴தா அபி⁴ரூபா பட²மவயே டி²தா கம்மபி³ந்து³கா³மதோ நிக்க²மித்வா பது³மஸ்ஸரம் ஓருய்ஹ கா³யமானா புப்பா²னி ப⁴ஞ்ஜதி. தஸ்மிம் ஸமயே ஸாமணேரோ பது³மஸ்ஸரமத்த²கேன க³ச்ச²தி, க³ச்ச²ந்தோ பன ஸிலேஸிகாய காணமச்சி²கா விய தஸ்ஸா கீ³தஸத்³தே³ ப³ஜ்ஜி². தாவதே³வஸ்ஸ இத்³தி⁴ அந்தரஹிதா, சி²ன்னபக்க²காகோ விய அஹோஸி. ஸந்தஸமாபத்திப³லேன பன தத்தே²வ உத³கபிட்டே² அபதித்வா ஸிம்ப³லிதூலம் விய பதமானம் அனுபுப்³பே³ன பது³மஸரதீரே அட்டா²ஸி. ஸோ வேகே³ன க³ந்த்வா உபஜ்ஜா²யஸ்ஸ பத்தசீவரம் த³த்வா நிவத்தி. மஹாதே²ரோ ‘‘பகே³வேதம் மயா தி³ட்ட²ம், நிவாரியமானோபி ந நிவத்திஸ்ஸதீ’’தி கிஞ்சி அவத்வா பிண்டா³ய பாவிஸி.

ஸாமணேரோ க³ந்த்வா பது³மஸரதீரே அட்டா²ஸி தஸ்ஸா பச்சுத்தரணம் ஆக³மயமானோ. ஸாபி ஸாமணேரம் ஆகாஸேன க³ச்ச²ந்தஞ்ச புன ஆக³ந்த்வா டி²தஞ்ச தி³ஸ்வா ‘‘அத்³தா⁴ ஏஸ மம் நிஸ்ஸாய உக்கண்டி²தோ’’தி ஞத்வா ‘‘படிக்கம ஸாமணேரா’’தி ஆஹ. ஸோ படிக்கமி. இதரா பச்சுத்தரித்வா ஸாடகம் நிவாஸேத்வா தம் உபஸங்கமித்வா ‘‘கிம், ப⁴ந்தே,’’தி புச்சி². ஸோ தமத்த²ம் ஆரோசேஸி. ஸா ப³ஹூஹி காரணேஹி க⁴ராவாஸே ஆதீ³னவம் ப்³ரஹ்மசரியவாஸே ஆனிஸம்ஸஞ்ச த³ஸ்ஸேத்வா ஓவத³மானாபி தஸ்ஸ உக்கண்ட²ம் வினோதே³தும் அஸக்கோந்தீ – ‘‘அயம் மம காரணா ஏவரூபாய இத்³தி⁴யா பரிஹீனோ, ந தா³னி யுத்தம் பரிச்சஜிது’’ந்தி இதே⁴வ திட்டா²தி வத்வா க⁴ரம் க³ந்த்வா மாதாபிதூனம் தம் பவத்திம் ஆரோசேஸி. தேபி ஆக³ந்த்வா நானப்பகாரம் ஓவத³மானா வசனம் அக்³க³ண்ஹந்தம் ஆஹம்ஸு – ‘‘த்வம் அம்ஹே உச்சகுலாதி ஸல்லக்கே²ஸி, மயம் பேஸகாரா. ஸக்கி²ஸ்ஸஸி பேஸகாரகம்மம் காது’’ந்தி ஸாமணேரோ ஆஹ – ‘‘உபாஸக கி³ஹிபூ⁴தோ நாம பேஸகாரகம்மம் வா கரேய்ய நளகாரகம்மம் வா, கிம் இமினா ஸாடகமத்தேன லோப⁴ம் கரோதா²’’தி. பேஸகாரோ உத³ரே ப³த்³த⁴ஸாடகம் த³த்வா க⁴ரம் நேத்வா தீ⁴தரம் அதா³ஸி.

ஸோ பேஸகாரகம்மம் உக்³க³ண்ஹித்வா பேஸகாரேஹி ஸத்³தி⁴ம் ஸாலாய கம்மம் கரோதி. அஞ்ஞேஸம் இத்தி²யோ பாதோவ ப⁴த்தம் ஸம்பாதே³த்வா ஆஹரிம்ஸு, தஸ்ஸ ப⁴ரியா ந தாவ ஆக³ச்ச²தி. ஸோ இதரேஸு கம்மம் விஸ்ஸஜ்ஜேத்வா பு⁴ஞ்ஜமானேஸு தஸரம் வட்டேந்தோ நிஸீதி³. ஸா பச்சா² அக³மாஸி. அத² நம் ஸோ ‘‘அதிசிரேன ஆக³தாஸீ’’தி தஜ்ஜேஸி. மாதுகா³மோ ச நாம அபி சக்கவத்திராஜானம் அத்தனி படிப³த்³த⁴சித்தம் ஞத்வா தா³ஸம் விய ஸல்லக்கே²தி. தஸ்மா ஸா ஏவமாஹ – ‘‘அஞ்ஞேஸம் க⁴ரே தா³ருபண்ணலோணாதீ³னி ஸன்னிஹிதானி, பா³ஹிரதோ ஆஹரித்வா தா³யகா பேஸனதகாரகாபி அத்தி², அஹம் பன ஏகிகாவ, த்வம்பி மய்ஹம் க⁴ரே இத³ம் அத்தி² இத³ம் நத்தீ²தி ந ஜானாஸி. ஸசே இச்ச²ஸி, பு⁴ஞ்ஜ, நோ சே இச்ச²ஸி, மா பு⁴ஞ்ஜா’’தி. ஸோ ‘‘ந கேவலஞ்ச உஸ்ஸூரே ப⁴த்தம் ஆஹரஸி, வாசாயபி மம் க⁴ட்டேஸீ’’தி குஜ்ஜி²த்வா அஞ்ஞம் பஹரணம் அபஸ்ஸந்தோ தமேவ தஸரத³ண்ட³கம் தஸரதோ லுஞ்சித்வா கி²பி. ஸா தம் ஆக³ச்ச²ந்தம் தி³ஸ்வா ஈஸகம் பரிவத்தி. தஸரத³ண்ட³கஸ்ஸ ச கோடி நாம திகி²ணா ஹோதி, ஸா தஸ்ஸா பரிவத்தமானாய அக்கி²கோடியம் பவிஸித்வா அட்டா²ஸி. ஸா உபோ⁴ஹி ஹத்தே²ஹி வேகே³ன அக்கி²ம் அக்³க³ஹேஸி, பி⁴ன்னட்டா²னதோ லோஹிதம் பக்³க⁴ரதி. ஸோ தஸ்மிம் காலே உபஜ்ஜா²யஸ்ஸ வசனம் அனுஸ்ஸரி – ‘‘இத³ம் ஸந்தா⁴ய மம் உபஜ்ஜா²யோ ‘அனாக³தே காலே காணபேஸகாரியா ஹத்தே²ஹி மத்³தி³தகஞ்ஜியம் பிவிஸ்ஸஸீ’தி ஆஹ, இத³ம் தே²ரேன தி³ட்ட²ம் ப⁴விஸ்ஸதி, அஹோ தீ³க⁴த³ஸ்ஸீ அய்யோ’’தி மஹாஸத்³தே³ன ரோதி³தும் ஆரபி⁴. தமேனம் அஞ்ஞே – ‘‘அலம், ஆவுஸோ, மா ரோதி³, அக்கி² நாம பி⁴ன்னம் ந ஸக்கா ரோத³னேன படிபாகதிகம் காது’’ந்தி ஆஹம்ஸு. ஸோ ‘‘நாஹமேதமத்த²ம் ரோதா³மி, அபிச கோ² இமம் ஸந்தா⁴ய ரோதா³மீ’’தி ஸப்³ப³ம் படிபாடியா கதே²ஸி. ஏவம் உப்பன்னா ஸமத²விபஸ்ஸனா நிருஜ்ஜ²மானா அனத்தா²ய ஸம்வத்தந்தி.

அபரம்பி வத்து² – திம்ஸமத்தா பி⁴க்கூ² கல்யாணிமஹாசேதியம் வந்தி³த்வா அடவிமக்³கே³ன மஹாமக்³க³ம் ஓதரமானா அந்தராமக்³கே³ ஜா²மகே²த்தே கம்மம் கத்வா ஆக³ச்ச²ந்தம் ஏகம் மனுஸ்ஸம் அத்³த³ஸம்ஸு. தஸ்ஸ ஸரீரம் மஸிமக்கி²தம் விய அஹோஸி. மஸிமக்கி²தம்யேவ ஏகம் காஸாவம் கச்ச²ம் பீளேத்வா நிவத்த²ம், ஓலோகியமானோ ஜா²மகா²ணுகோ விய கா²யதி. ஸோ தி³வஸபா⁴கே³ கம்மம் கத்வா உபட்³ட⁴ஜ்ஜா²யமானானம் தா³ரூனம் கலாபம் உக்கி²பித்வா பிட்டி²யம் விப்பகிண்ணேஹி கேஸேஹி கும்மக்³கே³ன ஆக³ந்த்வா பி⁴க்கூ²னம் ஸம்முகே² அட்டா²ஸி. ஸாமணேரா தி³ஸ்வா அஞ்ஞமஞ்ஞம் ஓலோகயமானா, – ‘‘ஆவுஸோ, துய்ஹம் பிதா துய்ஹம் மஹாபிதா துய்ஹம் மாதுலோ’’தி ஹஸமானா க³ந்த்வா ‘‘கோனாமோ த்வம் உபாஸகா’’தி நாமம் புச்சி²ம்ஸு. ஸோ நாமம் புச்சி²தோ விப்படிஸாரீ ஹுத்வா தா³ருகலாபம் ச²ட்³டே³த்வா வத்த²ம் ஸம்விதா⁴ய நிவாஸேத்வா மஹாதே²ரே வந்தி³த்வா ‘‘திட்ட²த² தாவ, ப⁴ந்தே,’’தி ஆஹ. மஹாதே²ரா அட்ட²ம்ஸு.

த³ஹரஸாமணேரா ஆக³ந்த்வா மஹாதே²ரானம் ஸம்முகா²பி பரிஹாஸம் கரோந்தி. உபாஸகோ ஆஹ – ‘‘ப⁴ந்தே, தும்ஹே மம் பஸ்ஸித்வா பரிஹஸத², ஏத்தகேனேவ மத்த²கம் பத்தம்ஹாதி மா ஸல்லக்கே²த². அஹம்பி புப்³பே³ தும்ஹாதி³ஸோவ ஸமணோ அஹோஸிம். தும்ஹாகம் பன சித்தேகக்³க³தாமத்தகம்பி நத்தி², அஹம் இமஸ்மிம் ஸாஸனே மஹித்³தி⁴கோ மஹானுபா⁴வோ அஹோஸிம், ஆகாஸம் க³ஹேத்வா பத²விம் கரோமி, பத²விம் ஆகாஸம். தூ³ரம் க³ண்ஹித்வா ஸந்திகம் கரோமி, ஸந்திகம் தூ³ரம். சக்கவாளஸதஸஹஸ்ஸம் க²ணேன வினிவிஜ்ஜா²மி. ஹத்தே² மே பஸ்ஸத², இதா³னி மக்கடஹத்த²ஸதி³ஸா, அஹம் இமேஹேவ ஹத்தே²ஹி இத⁴ நிஸின்னோவ சந்தி³மஸூரியே பராமஸிம். இமேஸம்யேவ பாதா³னம் சந்தி³மஸூரியே பாத³கத²லிகம் கத்வா நிஸீதி³ம். ஏவரூபா மே இத்³தி⁴ பமாதே³ன அந்தரஹிதா, தும்ஹே மா பமஜ்ஜித்த². பமாதே³ன ஹி ஏவரூபம் ப்³யஸனம் பாபுணந்தி. அப்பமத்தா விஹரந்தா ஜாதிஜராமரணஸ்ஸ அந்தம் கரோந்தி. தஸ்மா தும்ஹே மஞ்ஞேவ ஆரம்மணம் கரித்வா அப்பமத்தா ஹோத², ப⁴ந்தே,’’தி தஜ்ஜேத்வா ஓவாத³மதா³ஸி. தே தஸ்ஸ கதே²ந்தஸ்ஸேவ ஸம்வேக³ம் ஆபஜ்ஜித்வா விபஸ்ஸமானா திம்ஸஜனா தத்தே²வ அரஹத்தம் பாபுணிம்ஸூதி. ஏவம்பி உப்பன்னா ஸமத²விபஸ்ஸனா நிருஜ்ஜ²மானா அனத்தா²ய ஸம்வத்தந்தீதி வேதி³தப்³பா³.

அனுப்பன்னானம் பாபகானந்தி சேத்த² ‘‘அனுப்பன்னோ வா காமாஸவோ ந உப்பஜ்ஜதீ’’திஆதீ³ஸு வுத்தனயேன அத்தோ² வேதி³தப்³போ³. உப்பன்னானம் பாபகானந்தி ஏத்த² பன சதுப்³பி³த⁴ம் உப்பன்னம் வத்தமானுப்பன்னம் பு⁴த்வாவிக³துப்பன்னம், ஓகாஸகதுப்பன்னம், பூ⁴மிலத்³து⁴ப்பன்னந்தி. தத்த² யே கிலேஸா விஜ்ஜமானா உப்பாதா³தி³ஸமங்கி³னோ, இத³ம் வத்தமானுப்பன்னம் நாம. கம்மே பன ஜவிதே ஆரம்மணரஸம் அனுப⁴வித்வா நிருத்³த⁴விபாகோ பு⁴த்வா விக³தம் நாம. கம்மம் உப்பஜ்ஜித்வா நிருத்³த⁴ம் ப⁴வித்வா விக³தம் நாம. தது³ப⁴யம்பி பு⁴த்வாவிக³துப்பன்னந்தி ஸங்க²ம் க³ச்ச²தி. குஸலாகுஸலம் கம்மம் அஞ்ஞஸ்ஸ கம்மஸ்ஸ விபாகம் படிபா³ஹித்வா அத்தனோ விபாகஸ்ஸ ஓகாஸம் கரோதி, ஏவம் கதே ஓகாஸே விபாகோ உப்பஜ்ஜமானோ ஓகாஸகரணதோ பட்டா²ய உப்பன்னோதி ஸங்க²ம் க³ச்ச²தி. இத³ம் ஓகாஸகதுப்பன்னம் நாம. பஞ்சக்க²ந்தா⁴ பன விபஸ்ஸனாய பூ⁴மி நாம. தே அதீதாதி³பே⁴தா³ ஹோந்தி. தேஸு அனுஸயிதகிலேஸா பன அதீதா வா அனாக³தா வா பச்சுப்பன்னா வாதி ந வத்தப்³பா³. அதீதக²ந்தே⁴ஸு அனுஸயிதாபி ஹி அப்பஹீனாவ ஹோந்தி, அனாக³தக²ந்தே⁴ஸு, பச்சுப்பன்னக²ந்தே⁴ஸு அனுஸயிதாபி அப்பஹீனாவ ஹோந்தி. இத³ம் பூ⁴மிலத்³து⁴ப்பன்னம் நாம. தேனாஹு போராணா – ‘‘தாஸு தாஸு பூ⁴மீஸு அஸமுக்³கா⁴திதகிலேஸா பூ⁴மிலத்³து⁴ப்பன்னாதி ஸங்க²ம் க³ச்ச²ந்தீ’’தி.

அபரம்பி சதுப்³பி³த⁴ம் உப்பன்னம் ஸமுதா³சாருப்பன்னம், ஆரம்மணாதி⁴க³ஹிதுப்பன்னம், அவிக்க²ம்பி⁴துப்பன்னம் அஸமுக்³கா⁴திதுப்பன்னந்தி. தத்த² ஸம்பதி வத்தமானம்யேவ ஸமுதா³சாருப்பன்னம் நாம. ஸகிம் சக்கூ²னி உம்மீலேத்வா ஆரம்மணே நிமித்தே க³ஹிதே அனுஸ்ஸரிதானுஸ்ஸரிதக்க²ணே கிலேஸா நுப்பஜ்ஜிஸ்ஸந்தீதி ந வத்தப்³பா³. கஸ்மா? ஆரம்மணஸ்ஸ அதி⁴க³ஹிதத்தா. யதா² கிம்? யதா² கீ²ரருக்க²ஸ்ஸ குடா²ரியா ஆஹதாஹதட்டா²னே கீ²ரம் ந நிக்க²மிஸ்ஸதீதி ந வத்தப்³ப³ம், ஏவம். இத³ம் ஆரம்மணாதி⁴க³ஹிதுப்பன்னம் நாம. ஸமாபத்தியா அவிக்க²ம்பி⁴தா கிலேஸா பன இமஸ்மிம் நாம டா²னே நுப்பஜ்ஜிஸ்ஸந்தீதி ந வத்தப்³பா³. கஸ்மா? அவிக்க²ம்பி⁴தத்தா. யதா² கிம்? யதா² ஸசே கீ²ரருக்கே² குடா²ரியா ஆஹனேய்யும், இமஸ்மிம் நாம டா²னே கீ²ரம் ந நிக்க²மேய்யாதி ந வத்தப்³ப³ம், ஏவம். இத³ம் அவிக்க²ம்பி⁴துப்பன்னம் நாம. மக்³கே³ன அஸமுக்³கா⁴திதகிலேஸா பன ப⁴வக்³கே³ நிப்³ப³த்தஸ்ஸாபி உப்பஜ்ஜந்தீதி புரிமனயேனேவ வித்தா²ரேதப்³ப³ம். இத³ம் அஸமுக்³கா⁴திதுப்பன்னம் நாம.

இமேஸு உப்பன்னேஸு வத்தமானுப்பன்னம் பு⁴த்வாவிக³துப்பன்னம் ஓகாஸகதுப்பன்னம் ஸமுதா³சாருப்பன்னந்தி சதுப்³பி³த⁴ம் உப்பன்னம் ந மக்³க³வஜ்ஜ²ம், பூ⁴மிலத்³து⁴ப்பன்னம் ஆரம்மணாதி⁴க³ஹிதுப்பன்னம் அவிக்க²ம்பி⁴துப்பன்னம் அஸமுக்³கா⁴திதுப்பன்னந்தி சதுப்³பி³த⁴ம் மக்³க³வஜ்ஜ²ம். மக்³கோ³ ஹி உப்பஜ்ஜமானோ ஏதே கிலேஸே பஜஹதி. ஸோ யே கிலேஸே பஜஹதி, தே அதீதா வா அனாக³தா வா பச்சுப்பன்னா வாதி ந வத்தப்³பா³. வுத்தம்பி சேதம் –

‘‘ஹஞ்சி அதீதே கிலேஸே பஜஹதி, தேன ஹி கீ²ணம் கே²பேதி, நிருத்³த⁴ம் நிரோதே⁴தி, விக³தம் விக³மேதி அத்த²ங்க³தம் அத்த²ங்க³மேதி. அதீதம் யம் நத்தி², தம் பஜஹதி. ஹஞ்சி அனாக³தே கிலேஸே பஜஹதி, தேன ஹி அஜாதம் பஜஹதி, அனிப்³ப³த்தம், அனுப்பன்னம், அபாதுபூ⁴தம் பஜஹதி. அனாக³தம் யம் நத்தி², தம் பஜஹதி, ஹஞ்சி பச்சுப்பன்னே கிலேஸே பஜஹதி, தேன ஹி ரத்தோ ராக³ம் பஜஹதி, து³ட்டோ² தோ³ஸம், மூள்ஹோ மோஹம், வினிப³த்³தோ⁴ மானம், பராமட்டோ² தி³ட்டி²ம், விக்கே²பக³தோ உத்³த⁴ச்சம், அனிட்ட²ங்க³தோ விசிகிச்ச²ம், தா²மக³தோ அனுஸயம் பஜஹதி. கண்ஹஸுக்கத⁴ம்மா யுக³னத்³தா⁴ ஸமமேவ வத்தந்தி. ஸம்கிலேஸிகா மக்³க³பா⁴வனா ஹோதி…பே… தேன ஹி நத்தி² மக்³க³பா⁴வனா, நத்தி² ப²லஸச்சி²கிரியா, நத்தி² கிலேஸப்பஹானம், நத்தி² த⁴ம்மாபி⁴ஸமயோதி. அத்தி² மக்³க³பா⁴வனா…பே… அத்தி² த⁴ம்மாபி⁴ஸமயோதி. யதா² கத²ம் விய, ஸேய்யதா²பி தருணோ ருக்கோ² அஜாதப²லோ…பே… அபாதுபூ⁴தாயேவ ந பாதுப⁴வந்தீ’’தி.

இதி பாளியம் அஜாதப²லருக்கோ² ஆக³தோ, ஜாதப²லருக்கே²ன பன தீ³பேதப்³ப³ம். யதா² ஹி ஸப²லோ தருணம்ப³ருக்கோ², தஸ்ஸ ப²லானி மனுஸ்ஸா பரிபு⁴ஞ்ஜேய்யும், ஸேஸானி பாதேத்வா பச்சி²யோ பூரேய்யும். அத²ஞ்ஞோ புரிஸோ தம் ப²ரஸுனா சி²ந்தே³ய்ய, தேனஸ்ஸ நேவ அதீதானி ப²லானி நாஸிதானி ஹோந்தி, ந அனாக³தபச்சுப்பன்னானி நாஸிதானி. அதீதானி ஹி மனுஸ்ஸேஹி பரிபு⁴த்தானி, அனாக³தானி அனிப்³ப³த்தானி, ந ஸக்கா நாஸேதும். யஸ்மிம் பன ஸமயே ஸோ சி²ன்னோ, ததா³ ப²லானியேவ நத்தீ²தி பச்சுப்பன்னானிபி அனாஸிதானி. ஸசே பன ருக்கோ² அச்சி²ன்னோ, அத²ஸ்ஸ பத²வீரஸஞ்ச ஆபோரஸஞ்ச ஆக³ம்ம யானி ப²லானி நிப்³ப³த்தேய்யும், தானி நாஸிதானி ஹோந்தி. தானி ஹி அஜாதானேவ ந ஜாயந்தி, அனிப்³ப³த்தானேவ ந நிப்³ப³த்தந்தி, அபாதுபூ⁴தானேவ ந பாதுப⁴வந்தி, ஏவமேவ மக்³கோ³ நாபி அதீதாதி³பே⁴தே³ கிலேஸே பஜஹதி, நாபி ந பஜஹதி. யேஸஞ்ஹி கிலேஸானம் மக்³கே³ன க²ந்தே⁴ஸு அபரிஞ்ஞாதேஸு உப்பத்தி ஸியா, மக்³கே³ன உப்பஜ்ஜித்வா க²ந்தா⁴னம் பரிஞ்ஞாதத்தா தே கிலேஸா அஜாதாவ ந ஜாயந்தி, அனிப்³ப³த்தாவ ந நிப்³ப³த்தந்தி, அபாதுபூ⁴தாவ ந பாதுப⁴வந்தி, தருணபுத்தாய இத்தி²யா புன அவிஜாயனத்த²ம், ப்³யாதி⁴தானம் ரோக³வூபஸமனத்த²ம் பீதபே⁴ஸஜ்ஜேஹி சாபி அயமத்தோ² விபா⁴வேதப்³போ³. ஏவம் மக்³கோ³ யே கிலேஸே பஜஹதி, தே அதீதா வா அனாக³தா வா பச்சுப்பன்னா வாதி ந வத்தப்³பா³, ந ச மக்³கோ³ கிலேஸே ந பஜஹதி. யே பன மக்³கோ³ கிலேஸே பஜஹதி, தே ஸந்தா⁴ய ‘‘உப்பன்னானம் பாபகான’’ந்திஆதி³ வுத்தம்.

ந கேவலஞ்ச மக்³கோ³ கிலேஸேயேவ பஜஹதி, கிலேஸானம் பன அப்பஹீனத்தா யே ச உப்பஜ்ஜேய்யும் உபாதி³ன்னகக்க²ந்தா⁴, தேபி பஜஹதியேவ. வுத்தம்பி சேதம் – ‘‘ஸோதாபத்திமக்³க³ஞாணேன அபி⁴ஸங்கா²ரவிஞ்ஞாணஸ்ஸ நிரோதே⁴ன ஸத்த ப⁴வே ட²பேத்வா அனமதக்³கே³ ஸம்ஸாரே யே உப்பஜ்ஜேய்யும் நாமஞ்ச ரூபஞ்ச, ஏத்தே²தே நிருஜ்ஜ²ந்தீ’’தி (சூளனி. 6) வித்தா²ரோ. இதி மக்³கோ³ உபாதி³ன்னஅனுபாதி³ன்னதோ வுட்டா²தி. ப⁴வவஸேன பன ஸோதாபத்திமக்³கோ³ அபாயப⁴வதோ வுட்டா²தி, ஸகதா³கா³மிமக்³கோ³ ஸுக³திப⁴வேகதே³ஸதோ, அனாகா³மிமக்³கோ³ ஸுக³திகாமப⁴வதோ, அரஹத்தமக்³கோ³ ரூபாரூபப⁴வதோ வுட்டா²தி. ஸப்³ப³ப⁴வேஹி வுட்டா²தியேவாதிபி வத³ந்தி.

அத² மக்³க³க்க²ணே கத²ம் அனுப்பன்னானம் உப்பாதா³ய பா⁴வனா ஹோதி, கத²ம் வா உப்பன்னானம் டி²தியாதி. மக்³க³ப்பவத்தியாயேவ. மக்³கோ³ ஹி பவத்தமானோ புப்³பே³ அனுப்பன்னபுப்³ப³த்தா அனுப்பன்னோ நாம வுச்சதி. அனாக³தபுப்³ப³ஞ்ஹி டா²னம் ஆக³ந்த்வா அனனுபூ⁴தபுப்³ப³ம் வா ஆரம்மணம் அனுப⁴வித்வா வத்தாரோ ப⁴வந்தி ‘‘அனாக³தட்டா²னம் ஆக³தம்ஹா, அனனுபூ⁴தம் ஆரம்மணம் அனுப⁴வாமா’’தி. யா சஸ்ஸ பவத்தி, அயமேவ டி²தி நாமாதி டி²தியா பா⁴வேதீதிபி வத்தும் வட்டதி.

இத்³தி⁴பாதே³ஸு ஸங்கே²பகதா² சேதோகி²லஸுத்தே (ம. நி. 1.185 ஆத³யோ) வுத்தா. உபஸமமானம் க³ச்ச²தி, கிலேஸூபஸமத்த²ம் வா க³ச்ச²தீதி உபஸமகா³மீ. ஸம்பு³ஜ்ஜ²மானா க³ச்ச²தி, மக்³க³ஸம்போ³த⁴த்தா²ய வா க³ச்ச²தீதி ஸம்போ³த⁴கா³மீ.

விவேகனிஸ்ஸிதாதீ³னி ஸப்³பா³ஸவஸம்வரே வுத்தானி. அயமேத்த² ஸங்கே²போ, வித்தா²ரதோ பனாயம் போ³தி⁴பக்கி²யகதா² விஸுத்³தி⁴மக்³கே³ வுத்தா.

248. விமோக்க²கதா²யம் விமோக்கே²தி கேனட்டே²ன விமோக்கா², அதி⁴முச்சனட்டே²ன. கோ பனாயம் அதி⁴முச்சனட்டோ² நாம? பச்சனீகத⁴ம்மேஹி ச ஸுட்டு² முச்சனட்டோ², ஆரம்மணே ச அபி⁴ரதிவஸேன ஸுட்டு² முச்சனட்டோ², பிதுஅங்கே விஸ்ஸட்ட²ங்க³பச்சங்க³ஸ்ஸ தா³ரகஸ்ஸ ஸயனம் விய அனிக்³க³ஹிதபா⁴வேன நிராஸங்கதாய ஆரம்மணே பவத்தீதி வுத்தம் ஹோதி. அயம் பனத்தோ² பச்சி²மவிமோக்கே² நத்தி², புரிமேஸு ஸப்³பே³ஸு அத்தி². ரூபீ ரூபானி பஸ்ஸதீதி ஏத்த² அஜ்ஜ²த்தகேஸாதீ³ஸு நீலகஸிணாதி³வஸேன உப்பாதி³தம் ரூபஜ்ஜா²னம் ரூபம், தத³ஸ்ஸ அத்தீ²தி ரூபீ. ப³ஹித்³தா⁴ ரூபானி பஸ்ஸதீதி ப³ஹித்³தா⁴பி நீலகஸிணாதீ³னி ரூபானி ஜா²னசக்கு²னா பஸ்ஸதி. இமினா அஜ்ஜ²த்த ப³ஹித்³தா⁴வத்து²கேஸு கஸிணேஸு உப்பாதி³தஜ்ஜா²னஸ்ஸ புக்³க³லஸ்ஸ சத்தாரிபி ரூபாவசரஜ்ஜா²னானி த³ஸ்ஸிதானி.

அஜ்ஜ²த்தம் அரூபஸஞ்ஞீதி அஜ்ஜ²த்தம் ந ரூபஸஞ்ஞீ, அத்தனோ கேஸாதீ³ஸு அனுப்பாதி³தரூபாவசரஜ்ஜா²னோதி அத்தோ². இமினா ப³ஹித்³தா⁴ பரிகம்மம் கத்வா ப³ஹித்³தா⁴வ உப்பாதி³தஜ்ஜா²னஸ்ஸ ரூபாவசரஜ்ஜா²னானி த³ஸ்ஸிதானி. ஸுப⁴ந்தேவ அதி⁴முத்தோ ஹோதீதி இமினா ஸுவிஸுத்³தே⁴ஸு நீலாதீ³ஸு வண்ணகஸிணேஸு ஜா²னானி த³ஸ்ஸிதானி. தத்த² கிஞ்சாபி அந்தோஅப்பனாயம் ஸுப⁴ந்தி ஆபோ⁴கோ³ நத்தி², யோ பன ஸுவிஸுத்³த⁴ம் ஸுப⁴கஸிணம் ஆரம்மணம் கத்வா விஹரதி, ஸோ யஸ்மா ஸுப⁴ந்தி அதி⁴முத்தோ ஹோதீதி வத்தப்³ப³தம் ஆபஜ்ஜதி, தஸ்மா ஏவம் தே³ஸனா கதா. படிஸம்பி⁴தா³மக்³கே³ பன ‘‘கத²ம் ஸுப⁴ந்தேவ அதி⁴முத்தோ ஹோதீதி விமோக்கோ². இத⁴ பி⁴க்கு² மேத்தாஸஹக³தேன சேதஸா ஏகம் தி³ஸம் ப²ரித்வா விஹரதி…பே… மேத்தாய பா⁴விதத்தா ஸத்தா அப்படிகூலா ஹோந்தி. கருணாஸஹக³தேன, முதி³தாஸஹக³தேன, உபேக்கா²ஸஹக³தேன சேதஸா ஏகம் தி³ஸம் ப²ரித்வா விஹரதி…பே… உபேக்கா²ய பா⁴விதத்தா ஸத்தா அப்படிகூலா ஹோந்தி. ஏவம் ஸுப⁴ந்தேவ அதி⁴முத்தோ ஹோதீதி விமோக்கோ²’’தி (படி. ம. 1.212) வுத்தம்.

ஸப்³ப³ஸோ ரூபஸஞ்ஞானந்திஆதீ³ஸு யம் வத்தப்³ப³ம், தம் ஸப்³ப³ம் விஸுத்³தி⁴மக்³கே³ வுத்தமேவ. அயம் அட்ட²மோ விமோக்கோ²தி அயம் சதுன்னம் க²ந்தா⁴னம் ஸப்³ப³ஸோ விஸ்ஸட்ட²த்தா விமுத்தத்தா அட்ட²மோ உத்தமோ விமோக்கோ² நாம.

249. அபி⁴பா⁴யதனகதா²யம் அபி⁴பா⁴யதனானீதி அபி⁴ப⁴வனகாரணானி. கிம் அபி⁴ப⁴வந்தி? பச்சனீகத⁴ம்மேபி ஆரம்மணானிபி. தானி ஹி படிபக்க²பா⁴வேன பச்சனீகத⁴ம்மே அபி⁴ப⁴வந்தி, புக்³க³லஸ்ஸ ஞாணுத்தரிதாய ஆரம்மணானி. அஜ்ஜ²த்தம் ரூபஸஞ்ஞீதிஆதீ³ஸு பன அஜ்ஜ²த்தரூபே பரிகம்மவஸேன அஜ்ஜ²த்தம் ரூபஸஞ்ஞீ நாம ஹோதி. அஜ்ஜ²த்தஞ்ச நீலபரிகம்மம் கரோந்தோ கேஸே வா பித்தே வா அக்கி²தாரகாய வா கரோதி, பீதபரிகம்மம் கரோந்தோ மேதே³ வா ச²வியா வா ஹத்த²தலபாத³தலேஸு வா அக்கீ²னம் பீதட்டா²னே வா கரோதி, லோஹிதபரிகம்மம் கரோந்தோ மம்ஸே வா லோஹிதே வா ஜிவ்ஹாய வா அக்கீ²னம் ரத்தட்டா²னே வா கரோதி, ஓதா³தபரிகம்மம் கரோந்தோ அட்டி²ம்ஹி வா த³ந்தே வா நகே² வா அக்கீ²னம் ஸேதட்டா²னே வா கரோதி. தம் பன ஸுனீலம் ஸுபீதகம் ஸுலோஹிதகம் ஸுஓதா³தம் ந ஹோதி, அஸுவிஸுத்³த⁴மேவ ஹோதி.

ஏகோ ப³ஹித்³தா⁴ ரூபானி பஸ்ஸதீதி யஸ்ஸேதம் பரிகம்மம் அஜ்ஜ²த்தம் உப்பன்னம் ஹோதி, நிமித்தம் பன ப³ஹித்³தா⁴, ஸோ ஏவம் அஜ்ஜ²த்தம் பரிகம்மஸ்ஸ ப³ஹித்³தா⁴ ச அப்பனாய வஸேன – ‘‘அஜ்ஜ²த்தம் ரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதீ’’தி வுச்சதி. பரித்தானீதி அவட்³டி⁴தானி. ஸுவண்ணது³ப்³ப³ண்ணானீதி ஸுவண்ணானி வா ஹோந்து து³ப்³ப³ண்ணானி வா, பரித்தவஸேனேவ இத³மபி⁴பா⁴யதனம் வுத்தந்தி வேதி³தப்³ப³ம். தானி அபி⁴பு⁴ய்யாதி யதா² நாம ஸம்பன்னக³ஹணிகோ கடச்சு²மத்தம் ப⁴த்தம் லபி⁴த்வா ‘‘கிமேத்த² பு⁴ஞ்ஜிதப்³ப³ம் அத்தீ²’’தி ஸங்கட்³டி⁴த்வா ஏககப³ளமேவ கரோதி, ஏவமேவம் ஞாணுத்தரிகோ புக்³க³லோ விஸத³ஞாணோ – ‘‘கிமேத்த² பரித்தகே ஆரம்மணே ஸமாபஜ்ஜிதப்³ப³ம் அத்தி², நாயம் மம பா⁴ரோ’’தி தானி ரூபானி அபி⁴ப⁴வித்வா ஸமாபஜ்ஜதி, ஸஹ நிமித்துப்பாதே³னேவேத்த² அப்பனம் பாபேதீதி அத்தோ². ஜானாமி பஸ்ஸாமீதி இமினா பனஸ்ஸ ஆபோ⁴கோ³ கதி²தோ, ஸோ ச கோ² ஸமாபத்திதோ வுட்டி²தஸ்ஸ, ந அந்தோஸமாபத்தியம். ஏவம்ஸஞ்ஞீ ஹோதீதி ஆபோ⁴க³ஸஞ்ஞாயபி ஜா²னஸஞ்ஞாயபி ஏவம்ஸஞ்ஞீ ஹோதி. அபி⁴ப⁴வஸஞ்ஞா ஹிஸ்ஸ அந்தோஸமாபத்தியம் அத்தி², ஆபோ⁴க³ஸஞ்ஞா பன ஸமாபத்திதோ வுட்டி²தஸ்ஸேவ.

அப்பமாணானீதி வட்³டி⁴தப்பமாணானி, மஹந்தானீதி அத்தோ². அபி⁴பு⁴ய்யாதி ஏத்த² பன யதா² மஹக்³க⁴ஸோ புரிஸோ ஏகம் ப⁴த்தவட்³டி⁴தகம் லபி⁴த்வா ‘‘அஞ்ஞாபி ஹோது, அஞ்ஞாபி ஹோது, கிமேஸா மய்ஹம் கரிஸ்ஸதீ’’தி தம் ந மஹந்ததோ பஸ்ஸதி, ஏவமேவ ஞாணுத்தரோ புக்³க³லோ விஸத³ஞாணோ ‘‘கிமேத்த² ஸமாபஜ்ஜிதப்³ப³ம், நயித³ம் அப்பமாணம், ந மய்ஹம் சித்தேகக்³க³தாகரணே பா⁴ரோ அத்தீ²’’தி தானி அபி⁴ப⁴வித்வா ஸமாபஜ்ஜதி, ஸஹ நிமித்துப்பாதே³னேவேத்த² அப்பனம் பாபேதீதி அத்தோ².

அஜ்ஜ²த்தம் அரூபஸஞ்ஞீதி அலாபி⁴தாய வா அனத்தி²கதாய வா அஜ்ஜ²த்தரூபே பரிகம்மஸஞ்ஞாவிரஹிதோ. ஏகோ ப³ஹித்³தா⁴ ரூபானி பஸ்ஸதீதி யஸ்ஸ பரிகம்மம்பி நிமித்தம்பி ப³ஹித்³தா⁴வ உப்பன்னம், ஸோ ஏவம் ப³ஹித்³தா⁴ பரிகம்மஸ்ஸ சேவ அப்பனாய ச வஸேன – ‘‘அஜ்ஜ²த்தம் அரூபஸஞ்ஞீ ஏகோ ப³ஹித்³தா⁴ ரூபானி பஸ்ஸதீ’’தி வுச்சதி. ஸேஸமேத்த² சதுத்தா²பி⁴பா⁴யதனே வுத்தனயமேவ. இமேஸு பன சதூஸு பரித்தம் விதக்கசரிதவஸேன ஆக³தம், அப்பமாணம் மோஹசரிதவஸேன, ஸுவண்ணம் தோ³ஸசரிதவஸேன, து³ப்³ப³ண்ணம் ராக³சரிதவஸேன. ஏதேஸஞ்ஹி ஏதானி ஸப்பாயானி. ஸா ச நேஸம் ஸப்பாயதா வித்தா²ரதோ விஸுத்³தி⁴மக்³கே³சரியனித்³தே³ஸே வுத்தா.

பஞ்சமஅபி⁴பா⁴யதனாதீ³ஸு நீலானீதி ஸப்³ப³ஸங்கா³ஹிகவஸேன வுத்தம். நீலவண்ணானீதி வண்ணவஸேன. நீலனித³ஸ்ஸனானீதி நித³ஸ்ஸனவஸேன. அபஞ்ஞாயமானவிவரானி அஸம்பி⁴ன்னவண்ணானி ஏகனீலானேவ ஹுத்வா தி³ஸ்ஸந்தீதி வுத்தம் ஹோதி. நீலனிபா⁴ஸானீதி இத³ம் பன ஓபா⁴ஸவஸேன வுத்தம், நீலோபா⁴ஸானி நீலபபா⁴யுத்தானீதி அத்தோ². ஏதேன நேஸம் ஸுவிஸுத்³த⁴தம் த³ஸ்ஸேதி. விஸுத்³த⁴வண்ணவஸேனேவ ஹி இமானி சத்தாரி அபி⁴பா⁴யதனானி வுத்தானி. உமாபுப்ப²ந்தி ஏதஞ்ஹி புப்ப²ம் ஸினித்³த⁴ம் முது³ம் தி³ஸ்ஸமானம்பி நீலமேவ ஹோதி. கி³ரிகண்ணிகபுப்பா²தீ³னி பன தி³ஸ்ஸமானானி ஸேததா⁴துகானி ஹோந்தி. தஸ்மா இத³மேவ க³ஹிதம், ந தானி. பா³ராணஸேய்யகந்தி பா³ராணஸியம் ப⁴வம். தத்த² கிர கப்பாஸோபி முது³, ஸுத்தகந்திகாயோபி தந்தவாயாபி சே²கா, உத³கம்பி ஸுசி ஸினித்³த⁴ம், தஸ்மா வத்த²ம் உப⁴தோபா⁴க³விமட்ட²ம் ஹோதி, த்³வீஸு பஸ்ஸேஸு மட்ட²ம் முது³ ஸினித்³த⁴ம் கா²யதி. பீதானீதிஆதீ³ஸு இமினாவ நயேன அத்தோ² வேதி³தப்³போ³. ‘‘நீலகஸிணம் உக்³க³ண்ஹந்தோ நீலஸ்மிம் நிமித்தம் க³ண்ஹாதி புப்ப²ஸ்மிம் வா வத்த²ஸ்மிம் வா வண்ணதா⁴துயா வா’’திஆதி³கம் பனேத்த² கஸிணகரணஞ்சேவ பரிகம்மஞ்ச அப்பனாவிதா⁴னஞ்ச ஸப்³ப³ம் விஸுத்³தி⁴மக்³கே³ வித்தா²ரதோ வுத்தமேவ.

அபி⁴ஞ்ஞாவோஸானபாரமிப்பத்தாதி இதோ புப்³பே³ஸு ஸதிபட்டா²னாதீ³ஸு தே த⁴ம்மே பா⁴வேத்வா அரஹத்தப்பத்தாவ அபி⁴ஞ்ஞாவோஸானபாரமிப்பத்தா நாம ஹோந்தி, இமேஸு பன அட்ட²ஸு அபி⁴பா⁴யதனேஸு சிண்ணவஸீபா⁴வாயேவ அபி⁴ஞ்ஞாவோஸானபாரமிப்பத்தா நாம.

250. கஸிணகதா²யம் ஸகலட்டே²ன கஸிணானி, ததா³ரம்மணானம் த⁴ம்மானம் கே²த்தட்டே²ன அதி⁴ட்டா²னட்டே²ன வா ஆயதனானி. உத்³த⁴ந்தி உபரி க³க³னதலாபி⁴முக²ம். அதோ⁴தி ஹேட்டா² பூ⁴மிதலாபி⁴முக²ம். திரியந்தி கே²த்தமண்ட³லமிவ ஸமந்தா பரிச்சி²ந்தி³த்வா. ஏகச்சோ ஹி உத்³த⁴மேவ கஸிணம் வட்³டே⁴தி, ஏகச்சோ அதோ⁴, ஏகச்சோ ஸமந்ததோ. தேன தேன காரணேன ஏவம் பஸாரேதி ஆலோகமிவ ரூபத³ஸ்ஸனகாமோ. தேன வுத்தம் – ‘‘பத²வீகஸிணமேகோ ஸஞ்ஜானாதி உத்³த⁴ம்அதோ⁴திரிய’’ந்தி. அத்³வயந்தி தி³ஸாஅனுதி³ஸாஸு அத்³வயம். இத³ம் பன ஏகஸ்ஸ அஞ்ஞபா⁴வானுபக³மனத்த²ம் வுத்தம். யதா² ஹி உத³கம் பவிட்ட²ஸ்ஸ ஸப்³ப³தி³ஸாஸு உத³கமேவ ஹோதி அனஞ்ஞம், ஏவமேவம் பத²வீகஸிணம் பத²வீகஸிணமேவ ஹோதி, நத்தி² தஸ்ஸ அஞ்ஞோ கஸிணஸம்பே⁴தோ³தி. ஏஸ நயோ ஸப்³ப³த்த². அப்பமாணந்தி இத³ம் தஸ்ஸ தஸ்ஸ ப²ரணஅப்பமாணவஸேன வுத்தம். தஞ்ஹி சேதஸா ப²ரந்தோ ஸகலமேவ ப²ரதி, அயமஸ்ஸ ஆதி³, இத³ம் மஜ்ஜ²ந்தி பமாணம் க³ண்ஹாதீதி. விஞ்ஞாணகஸிணந்தி சேத்த² கஸிணுக்³கா⁴டிமாகாஸே பவத்தம் விஞ்ஞாணம். தத்த² கஸிணவஸேன கஸிணுக்³கா⁴டிமாகாஸே, கஸிணுக்³கா⁴டிமாகாஸவஸேன தத்த² பவத்தவிஞ்ஞாணே உத்³த⁴ம்அதோ⁴திரியதா வேதி³தப்³பா³. அயமேத்த² ஸங்கே²போ. கம்மட்டா²னபா⁴வனானயேன பனேதானி பத²வீகஸிணாதீ³னி வித்தா²ரதோ விஸுத்³தி⁴மக்³கே³ வுத்தானேவ. இதா⁴பி சிண்ணவஸிபா⁴வேனேவ அபி⁴ஞ்ஞாவோஸானபாரமிப்பத்தா ஹோந்தீதி வேதி³தப்³பா³. ததா² இதோ அனந்தரேஸு சதூஸு ஜா²னேஸு. யம் பனேத்த² வத்தப்³ப³ம், தம் மஹாஅஸ்ஸபுரஸுத்தே வுத்தமேவ.

252. விபஸ்ஸனாஞாணே பன ரூபீதிஆதீ³னமத்தோ² வுத்தோயேவ. ஏத்த² ஸிதமேத்த² படிப³த்³த⁴ந்தி ஏத்த² சாதுமஹாபூ⁴திகே காயே நிஸ்ஸிதஞ்ச படிப³த்³த⁴ஞ்ச. ஸுபோ⁴தி ஸுந்த³ரோ. ஜாதிமாதி ஸுபரிஸுத்³த⁴ஆகரஸமுட்டி²தோ. ஸுபரிகம்மகதோதி ஸுட்டு² கதபரிகம்மோ அபனீதபாஸாணஸக்க²ரோ. அச்சோ²தி தனுச்ச²வி. விப்பஸன்னோதி ஸுட்டு² விப்பஸன்னோ. ஸப்³பா³காரஸம்பன்னோதி தோ⁴வன வேத⁴னாதீ³ஹி ஸப்³பே³ஹி ஆகாரேஹி ஸம்பன்னோ. நீலந்திஆதீ³ஹி வண்ணஸம்பத்திம் த³ஸ்ஸேதி. தாதி³ஸஞ்ஹி ஆவுதம் பாகடம் ஹோதி.

ஏவமேவ கோ²தி ஏத்த² ஏவம் உபமாஸம்ஸந்த³னம் வேதி³தப்³ப³ம் – மணி விய ஹி கரஜகாயோ. ஆவுதஸுத்தம் விய விபஸ்ஸனாஞாணம். சக்கு²மா புரிஸோ விய விபஸ்ஸனாலாபீ⁴ பி⁴க்கு². ஹத்தே² கரித்வா பச்சவேக்க²தோ ‘‘அயம் கோ² மணீ’’தி மணினோ ஆவிபூ⁴தகாலோ விய விபஸ்ஸனாஞாணம் அபி⁴னீஹரித்வா நிஸின்னஸ்ஸ பி⁴க்கு²னோ சாதுமஹாபூ⁴திககாயஸ்ஸ ஆவிபூ⁴தகாலோ. ‘‘தத்ரித³ம் ஸுத்தம் ஆவுத’’ந்தி ஸுத்தஸ்ஸ ஆவிபூ⁴தகாலோ விய விபஸ்ஸனாஞாணம் அபி⁴னீஹரித்வா நிஸின்னஸ்ஸ பி⁴க்கு²னோ ததா³ரம்மணானம் ப²ஸ்ஸபஞ்சமகானம் வா ஸப்³ப³சித்தசேதஸிகானம் வா விபஸ்ஸனாஞாணஸ்ஸேவ வா ஆவிபூ⁴தகாலோதி.

கிம் பனேதம் ஞாணஸ்ஸ ஆவிபூ⁴தம், புக்³க³லஸ்ஸாதி. ஞாணஸ்ஸ, தஸ்ஸ பன ஆவிபா⁴வத்தா புக்³க³லஸ்ஸ ஆவிபூ⁴தாவ ஹோந்தி. இத³ஞ்ச விபஸ்ஸனாஞாணம் மக்³க³ஸ்ஸ அனந்தரம், ஏவம் ஸந்தேபி யஸ்மா அபி⁴ஞ்ஞாவாரே ஆரத்³தே⁴ ஏதஸ்ஸ அந்தராவாரோ நத்தி², தஸ்மா இதே⁴வ த³ஸ்ஸிதம். யஸ்மா ச அனிச்சாதி³வஸேன அகதஸம்மஸனஸ்ஸ தி³ப்³பா³ய ஸோததா⁴துயா பே⁴ரவஸத்³த³ம் ஸுணந்தோ புப்³பே³னிவாஸானுஸ்ஸதியா பே⁴ரவே க²ந்தே⁴ அனுஸ்ஸரதோ தி³ப்³பே³ன சக்கு²னா பே⁴ரவரூபம் பஸ்ஸதோ ப⁴யஸந்தாஸோ உப்பஜ்ஜதி, ந அனிச்சாதி³வஸேன கதஸம்மஸனஸ்ஸ, தஸ்மா அபி⁴ஞ்ஞாபத்தஸ்ஸ ப⁴யவினோத³கஹேதுஸம்பாத³னத்த²ம்பி இத³ம் இதே⁴வ த³ஸ்ஸிதம். இதா⁴பி அரஹத்தவஸேனேவ அபி⁴ஞ்ஞாவோஸானபாரமிப்பத்ததா வேதி³தப்³பா³.

253. மனோமயித்³தி⁴யம் சிண்ணவஸிதாய. தத்த² மனோமயந்தி மனேன நிப்³ப³த்தம். ஸப்³ப³ங்க³பச்சங்கி³ந்தி ஸப்³பே³ஹி அங்கே³ஹி ச பச்சங்கே³ஹி ச ஸமன்னாக³தம். அஹீனிந்த்³ரியந்தி ஸண்டா²னவஸேன அவிகலிந்த்³ரியம். இத்³தி⁴மதா நிம்மிதரூபஞ்ஹி ஸசே இத்³தி⁴மா ஓதா³தோ, தம்பி ஓதா³தம். ஸசே அவித்³த⁴கண்ணோ, தம்பி அவித்³த⁴கண்ணந்தி ஏவம் ஸப்³பா³காரேஹி தேன ஸதி³ஸமேவ ஹோதி. முஞ்ஜம்ஹா ஈஸிகந்திஆதி³ உபமத்தயம்பி தம் ஸதி³ஸபா⁴வத³ஸ்ஸனத்த²மேவ வுத்தம். முஞ்ஜஸதி³ஸா ஏவ ஹி தஸ்ஸ அந்தோ ஈஸிகா ஹோதி. கோஸஸதி³ஸோயேவ அஸி, வட்டாய கோஸியா வட்டம் அஸிமேவ பக்கி²பந்தி, பத்த²டாய பத்த²டம்.

கரண்டா³தி இத³ம்பி அஹிகஞ்சுகஸ்ஸ நாமம், ந விலீவகரண்ட³கஸ்ஸ. அஹிகஞ்சுகோ ஹி அஹினா ஸதி³ஸோவ ஹோதி. தத்த² கிஞ்சாபி ‘‘புரிஸோ அஹிம் கரண்டா³ உத்³த⁴ரேய்யா’’தி ஹத்தே²ன உத்³த⁴ரமானோ விய த³ஸ்ஸிதோ, அத² கோ² சித்தேனேவஸ்ஸ உத்³த⁴ரணம் வேதி³தப்³ப³ம். அயஞ்ஹி அஹி நாம ஸஜாதியம் டி²தோ, கட்ட²ந்தரம் வா ருக்க²ந்தரம் வா நிஸ்ஸாய, தசதோ ஸரீரனிக்கட்³ட⁴னபயோக³ஸங்கா²தேன தா²மேன, ஸரீரம் கா²த³மானம் விய புராணதசம் ஜிகு³ச்ச²ந்தோதி இமேஹி சதூஹி காரணேஹி ஸயமேவ கஞ்சுகம் ஜஹாதி, ந ஸக்கா ததோ அஞ்ஞேன உத்³த⁴ரிதும். தஸ்மா சித்தேன உத்³த⁴ரணம் ஸந்தா⁴ய இத³ம் வுத்தந்தி வேதி³தப்³ப³ம். இதி முஞ்ஜாதி³ஸதி³ஸம் இமஸ்ஸ பி⁴க்கு²னோ ஸரீரம், ஈஸிகாதி³ஸதி³ஸம் நிம்மிதரூபந்தி இத³மேத்த² ஓபம்மஸம்ஸந்த³னம். நிம்மானவிதா⁴னம் பனேத்த² பரதோ ச இத்³தி⁴விதா⁴தி³பஞ்சஅபி⁴ஞ்ஞாகதா² ஸப்³பா³காரேன விஸுத்³தி⁴மக்³கே³ வித்தா²ரிதாதி தத்த² வுத்தனயேனேவ வேதி³தப்³பா³. உபமாமத்தமேவ ஹி இத⁴ அதி⁴கம்.

தத்த² சே²ககும்ப⁴காராத³யோ விய இத்³தி⁴வித⁴ஞாணலாபீ⁴ பி⁴க்கு² த³ட்ட²ப்³போ³. ஸுபரிகம்மகதமத்திகாத³யோ விய இத்³தி⁴வித⁴ஞாணம் த³ட்ட²ப்³ப³ம். இச்சி²திச்சி²தபா⁴ஜனவிகதிஆதி³கரணம் விய தஸ்ஸ பி⁴க்கு²னோ விகுப்³ப³னம் த³ட்ட²ப்³ப³ம். இதா⁴பி சிண்ணவஸிதாவஸேனேவ அபி⁴ஞ்ஞாவோஸானபாரமிப்பத்ததா வேதி³தப்³பா³. ததா² இதோ பராஸு சதூஸு அபி⁴ஞ்ஞாஸு.

255. தத்த² தி³ப்³ப³ஸோததா⁴துஉபமாயம் ஸங்க²த⁴மோதி ஸங்க²த⁴மகோ. அப்பகஸிரேனேவாதி நித்³து³க்கே²னேவ. விஞ்ஞாபேய்யாதி ஜானாபேய்ய. தத்த² ஏவம் சாதுத்³தி³ஸா விஞ்ஞாபேந்தே ஸங்க²த⁴மகே ‘‘ஸங்க²ஸத்³தோ³ அய’’ந்தி வவத்தா²பேந்தானம் ஸத்தானம் தஸ்ஸ ஸங்க²ஸத்³த³ஸ்ஸ ஆவிபூ⁴தகாலோ விய யோகி³னோ தூ³ரஸந்திகபே⁴தா³னம் தி³ப்³பா³னஞ்சேவ மானுஸகானஞ்ச ஸத்³தா³னம் ஆவிபூ⁴தகாலோ த³ட்ட²ப்³போ³.

256. சேதோபரியஞாண-உபமாயம் த³ஹரோதி தருணோ. யுவாதி யோப்³ப³னேன ஸமன்னாக³தோ. மண்ட³னகஜாதிகோதி யுவாபி ஸமானோ ந அலஸியோ கிலிட்ட²வத்த²ஸரீரோ, அத² கோ² மண்ட³னகபகதிகோ, தி³வஸஸ்ஸ த்³வே தயோ வாரே ந்ஹாயித்வா ஸுத்³த⁴வத்த²-பரித³ஹன-அலங்காரகரணஸீலோதி அத்தோ². ஸகணிகந்தி காளதிலகவங்க-முக²தூ³ஸிபீளகாதீ³னம் அஞ்ஞதரேன ஸதோ³ஸம். தத்த² யதா² தஸ்ஸ முக²னிமித்தம் பச்சவேக்க²தோ முக²தோ³ஸோ பாகடோ ஹோதி, ஏவம் சேதோபரியஞாணாய சித்தம் அபி⁴னீஹரித்வா நிஸின்னஸ்ஸ பி⁴க்கு²னோ பரேஸம் ஸோளஸவித⁴ம் சித்தம் பாகடம் ஹோதீதி வேதி³தப்³ப³ம். புப்³பே³னிவாஸஉபமாதீ³ஸு யம் வத்தப்³ப³ம், தம் ஸப்³ப³ம் மஹாஅஸ்ஸபுரே வுத்தமேவ.

259. அயம் கோ² உதா³யி பஞ்சமோ த⁴ம்மோதி ஏகூனவீஸதி பப்³பா³னி படிபதா³வஸேன ஏகம் த⁴ம்மம் கத்வா பஞ்சமோ த⁴ம்மோதி வுத்தோ. யதா² ஹி அட்ட²கனாக³ரஸுத்தே (ம. நி. 2.17 ஆத³யோ) ஏகாத³ஸ பப்³பா³னி புச்சா²வஸேன ஏகத⁴ம்மோ கதோ, ஏவமித⁴ ஏகூனவீஸதி பப்³பா³னி படிபதா³வஸேன ஏகோ த⁴ம்மோ கதோதி வேதி³தப்³பா³னி. இமேஸு ச பன ஏகூனவீஸதியா பப்³பே³ஸு படிபாடியா அட்ட²ஸு கோட்டா²ஸேஸு விபஸ்ஸனாஞாணே ச ஆஸவக்க²யஞாணே ச அரஹத்தவஸேன அபி⁴ஞ்ஞாவோஸானபாரமிப்பத்ததா வேதி³தப்³பா³, ஸேஸேஸு சிண்ணவஸிபா⁴வவஸேன. ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

மஹாஸகுலுதா³யிஸுத்தவண்ணனா நிட்டி²தா.