8. ஸமணமுண்டி³கஸுத்தவண்ணனா

260. ஏவம் மே ஸுதந்தி ஸமணமுண்டி³கஸுத்தம். தத்த² உக்³கா³ஹமானோதி தஸ்ஸ பரிப்³பா³ஜகஸ்ஸ நாமம். ஸுமனோதி பகதினாமம். கிஞ்சி கிஞ்சி பன உக்³க³ஹிதும் உக்³கா³ஹேதும் ஸமத்த²தாய உக்³கா³ஹமானோதி நம் ஸஞ்ஜானந்தி. ஸமயம் பவத³ந்தி ஏத்தா²தி ஸமயப்பவாத³கம். தஸ்மிம் கிர டா²னே சங்கீதாருக்க²போக்க²ரஸாதிப்பபு⁴தயோ ப்³ராஹ்மணா நிக³ண்டா²சேலகபரிப்³பா³ஜகாத³யோ ச பப்³ப³ஜிதா ஸன்னிபதித்வா அத்தனோ அத்தனோ ஸமயம் பவத³ந்தி கதே²ந்தி தீ³பேந்தி, தஸ்மா ஸோ ஆராமோ ஸமயப்பவாத³கோதி வுச்சதி. ஸ்வேவ திந்து³காசீரஸங்கா²தாய திம்ப³ரூஸகருக்க²பந்தியா பரிக்கி²த்தத்தா திந்து³காசீரம். யஸ்மா பனேத்த² பட²மம் ஏகா ஸாலா அஹோஸி, பச்சா² மஹாபுஞ்ஞம் போட்ட²பாத³பரிப்³பா³ஜகம் நிஸ்ஸாய ப³ஹூ ஸாலா கதா, தஸ்மா தமேவ ஏகம் ஸாலம் உபாதா³ய லத்³த⁴னாமவஸேன ஏகஸாலகோதி வுச்சதி. மல்லிகாய பன பஸேனதி³ரஞ்ஞோ தே³வியா உய்யானபூ⁴தோ ஸோ புப்ப²ப²லஸஞ்ச²ன்னோ ஆராமோதி கத்வா மல்லிகாய ஆராமோதி ஸங்க²ம் க³தோ. தஸ்மிம் ஸமயப்பவாத³கே திந்து³காசீரே ஏகஸாலகே மல்லிகாய ஆராமே. படிவஸதீதி வாஸபா²ஸுதாய வஸதி. தி³வா தி³வஸ்ஸாதி தி³வஸஸ்ஸ தி³வா நாம மஜ்ஜ²ன்ஹாதிக்கமோ, தஸ்மிம் தி³வஸஸ்ஸபி தி³வாபூ⁴தே அதிக்கந்தமத்தே மஜ்ஜ²ன்ஹிகே நிக்க²மீதி அத்தோ². படிஸல்லீனோதி ததோ ததோ ரூபாதி³கோ³சரதோ சித்தம் படிஸம்ஹரித்வா லீனோ, ஜா²னரதிஸேவனவஸேன ஏகீபா⁴வம் க³தோ. மனோபா⁴வனீயானந்தி மனவட்³ட⁴னகானம், யே ஆவஜ்ஜதோ மனஸிகரோதோ சித்தம் வினீவரணம் ஹோதி உன்னமதி வட்³ட⁴தி. யாவதாதி யத்தகா. அயம் தேஸம் அஞ்ஞதரோதி அயம் தேஸம் அப்³ப⁴ந்தரோ ஏகோ ஸாவகோ. அப்பேவ நாமாதி தஸ்ஸ உபஸங்கமனம் பத்த²யமானோ ஆஹ. பத்த²னாகாரணம் பன ஸந்த³கஸுத்தே வுத்தமேவ.

261. ஏதத³வோசாதி த³ந்த³பஞ்ஞோ அயம் க³ஹபதி, த⁴ம்மகதா²ய நம் ஸங்க³ண்ஹித்வா அத்தனோ ஸாவகம் கரிஸ்ஸாமீதி மஞ்ஞமானோ ஏதம் ‘‘சதூஹி கோ²’’திஆதி³வசனம் அவோச. தத்த² பஞ்ஞபேமீதி த³ஸ்ஸேமி ட²பேமி. ஸம்பன்னகுஸலந்தி பரிபுண்ணகுஸலம். பரமகுஸலந்தி உத்தமகுஸலம். அயோஜ்ஜ²ந்தி வாத³யுத்³தே⁴ன யுஜ்ஜி²த்வா சாலேதும் அஸக்குணேய்யம் அசலம் நிக்கம்பம் தி²ரம். ந கரோதீதி அகரணமத்தமேவ வத³தி, ஏத்த² பன ஸம்வரப்பஹானம் வா படிஸேவனப்பஹானம் வா ந வத³தி. ஸேஸபதே³ஸுபி ஏஸேவ நயோ.

நேவ அபி⁴னந்தீ³தி தித்தி²யா நாம ஜானித்வாபி அஜானித்வாபி யம் வா தம் வா வத³ந்தீதி மஞ்ஞமானோ நாபி⁴னந்தி³. ந படிக்கோஸீதி ஸாஸனஸ்ஸ அனுலோமம் விய பஸன்னாகாரம் விய வத³தீதி மஞ்ஞமானோ ந படிஸேதே⁴தி.

262. யதா² உக்³கா³ஹமானஸ்ஸாதி யதா² தஸ்ஸ வசனம், ஏவம் ஸந்தே உத்தானஸேய்யகோ குமாரோ அயோஜ்ஜ²ஸமணோ தி²ரஸமணோ ப⁴விஸ்ஸதி, மயம் பன ஏவம் ந வதா³மாதி தீ³பேதி. காயோதிபி ந ஹோதீதி ஸககாயோ பரகாயோதிபி விஸேஸஞாணம் ந ஹோதி. அஞ்ஞத்ர ப²ந்தி³தமத்தாதி பச்சத்த²ரணே வலிஸம்ப²ஸ்ஸேன வா மங்கு³லத³ட்டே²ன வா காயப²ந்த³னமத்தம் நாம ஹோதி. தம் ட²பேத்வா அஞ்ஞம் காயேன கரணகம்மம் நாம நத்தி². தம்பி ச கிலேஸஸஹக³தசித்தேனேவ ஹோதி. வாசாதிபி ந ஹோதீதி மிச்சா²வாசா ஸம்மாவாசாதிபி நானத்தம் ந ஹோதி. ரோதி³தமத்தாதி ஜிக⁴ச்சா²பிபாஸாபரேதஸ்ஸ பன ரோதி³தமத்தம் ஹோதி. தம்பி கிலேஸஸஹக³தசித்தேனேவ. ஸங்கப்போதி மிச்சா²ஸங்கப்போ ஸம்மாஸங்கப்போதிபி நானத்தம் ந ஹோதி. விகூஜிதமத்தாதி விகூஜிதமத்தம் ரோத³னஹஸிதமத்தம் ஹோதி. த³ஹரகுமாரகானஞ்ஹி சித்தம் அதீதாரம்மணம் பவத்ததி, நிரயதோ ஆக³தா நிரயது³க்க²ம் ஸரித்வா ரோத³ந்தி, தே³வலோகதோ ஆக³தா ஹஸந்தி, தம்பி கிலேஸஸஹக³தசித்தேனேவ ஹோதி. ஆஜீவோதி மிச்சா²ஜீவோ ஸம்மாஜீவோதிபி நானத்தம் ந ஹோதி. அஞ்ஞத்ர மாதுத²ஞ்ஞாதி த²ஞ்ஞசோரதா³ரகா நாம ஹோந்தி, மாதரி கீ²ரம் பாயந்தியா அபிவித்வா அஞ்ஞவிஹிதகாலே பிட்டி²பஸ்ஸேன ஆக³ந்த்வா த²ஞ்ஞம் பிவந்தி. ஏத்தகம் முஞ்சித்வா அஞ்ஞோ மிச்சா²ஜீவோ நத்தி². அயம்பி கிலேஸஸஹக³தசித்தேனேவ ஹோதீதி த³ஸ்ஸேதி.

263. ஏவம் பரிப்³பா³ஜகவாத³ம் படிக்கி²பித்வா இதா³னி ஸயம் ஸேக்க²பூ⁴மியம் மாதிகம் ட²பேந்தோ சதூஹி கோ² அஹந்திஆதி³மாஹ. தத்த² ஸமதி⁴க³ய்ஹ திட்ட²தீதி விஸேஸேத்வா திட்ட²தி. ந காயேன பாப கம்மந்திஆதீ³ஸு ந கேவலம் அகரணமத்தமேவ, ப⁴க³வா பன ஏத்த² ஸம்வரப்பஹானபடிஸங்கா² பஞ்ஞபேதி. தம் ஸந்தா⁴யேவமாஹ. ந சேவ ஸம்பன்னகுஸலந்திஆதி³ பன கீ²ணாஸவம் ஸந்தா⁴ய வுத்தம்.

இதா³னி அஸேக்க²பூ⁴மியம் மாதிகம் ட²பேந்தோ த³ஸஹி கோ² அஹந்திஆதி³மாஹ. தத்த² தீணி பதா³னி நிஸ்ஸாய த்³வே பட²மசதுக்கா ட²பிதா, ஏகம் பத³ம் நிஸ்ஸாய த்³வே பச்சி²மசதுக்கா. அயம் ஸேக்க²பூ⁴மியம் மாதிகா.

264. இதா³னி தம் விப⁴ஜந்தோ கதமே ச த²பதி அகுஸலஸீலாதிஆதி³மாஹ. தத்த² ஸராக³ந்தி அட்ட²வித⁴ம் லோப⁴ஸஹக³தசித்தம். ஸதோ³ஸந்தி படிக⁴ஸம்பயுத்தசித்தத்³வயம். ஸமோஹந்தி விசிகிச்சு²த்³த⁴ச்சஸஹக³தசித்தத்³வயம்பி வட்டதி, ஸப்³பா³குஸலசித்தானிபி. மோஹோ ஸப்³பா³குஸலே உப்பஜ்ஜதீதி ஹி வுத்தம். இதோஸமுட்டா²னாதி இதோ ஸராகா³தி³சித்ததோ ஸமுட்டா²னம் உப்பத்தி ஏதேஸந்தி இதோஸமுட்டா²னா.

குஹிந்தி கதரம் டா²னம் பாபுணித்வா அபரிஸேஸா நிருஜ்ஜ²ந்தி. ஏத்தே²தேதி ஸோதாபத்திப²லே பு⁴ம்மம். பாதிமோக்க²ஸம்வரஸீலஞ்ஹி ஸோதாபத்திப²லே பரிபுண்ணம் ஹோதி, தம் டா²னம் பத்வா அகுஸலஸீலம் அஸேஸம் நிருஜ்ஜ²தி. அகுஸலஸீலந்தி ச து³ஸ்ஸீலஸ்ஸேதம் அதி⁴வசனந்தி வேதி³தப்³ப³ம்.

அகுஸலானம் ஸீலானம் நிரோதா⁴ய படிபன்னோதி ஏத்த² யாவ ஸோதாபத்திமக்³கா³ நிரோதா⁴ய படிபன்னோ நாம ஹோதி, ப²லபத்தே பன தே நிரோதி⁴தா நாம ஹோந்தி.

265. வீதராக³ந்திஆதீ³ஹி அட்ட²வித⁴ம் காமாவசரகுஸலசித்தமேவ வுத்தம். ஏதேன ஹி குஸலஸீலம் ஸமுட்டா²தி.

ஸீலவா ஹோதீதி ஸீலஸம்பன்னோ ஹோதி கு³ணஸம்பன்னோ ச. நோ ச ஸீலமயோதி அலமேத்தாவதா, நத்தி² இதோ கிஞ்சி உத்தரி கரணீயந்தி ஏவம் ஸீலமயோ ந ஹோதி. யத்த²ஸ்ஸ தேதி அரஹத்தப²லே பு⁴ம்மம். அரஹத்தப²லஞ்ஹி பத்வா அகுஸலஸீலம் அஸேஸம் நிருஜ்ஜ²தி.

நிரோதா⁴ய படிபன்னோதி ஏத்த² யாவ அரஹத்தமக்³கா³ நிரோதா⁴ய படிபன்னோ நாம ஹோதி, ப²லபத்தே பன தே நிரோதி⁴தா நாம ஹோந்தி.

266. காமஸஞ்ஞாதீ³ஸு காமஸஞ்ஞா அட்ட²லோப⁴ஸஹக³தசித்தஸஹஜாதா, இதரா த்³வே தோ³மனஸ்ஸஸஹக³தசித்தத்³வயேன ஸஹஜாதா.

பட²மம் ஜா²னந்தி அனாகா³மிப²லபட²மஜ்ஜா²னம். ஏத்தே²தேதி அனாகா³மிப²லே பு⁴ம்மம். அனாகா³மிப²லஞ்ஹி பத்வா அகுஸலஸங்கப்பா அபரிஸேஸா நிருஜ்ஜ²ந்தி.

நிரோதா⁴ய படிபன்னோதி ஏத்த² யாவ அனாகா³மிமக்³கா³ நிரோதா⁴ய படிபன்னோ நாம ஹோதி, ப²லபத்தே பன தே நிரோதி⁴தா நாம ஹோந்தி. நேக்க²ம்மஸஞ்ஞாத³யோ ஹி திஸ்ஸோபி அட்ட²காமாவசரகுஸலஸஹஜாதஸஞ்ஞாவ.

267. ஏத்தே²தேதி அரஹத்தப²லே பு⁴ம்மம். து³தியஜ்ஜா²னிகம் அரஹத்தப²லஞ்ஹி பாபுணித்வா குஸலஸங்கப்பா அபரிஸேஸா நிருஜ்ஜ²ந்தி. நிரோதா⁴ய படிபன்னோதி ஏத்த² யாவ அரஹத்தமக்³கா³ நிரோதா⁴ய படிபன்னோ நாம ஹோதி, ப²லபத்தே பன தே நிரோதி⁴தா நாம ஹோந்தி. ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

ஸமணமுண்டி³கஸுத்தவண்ணனா நிட்டி²தா.