6. ஸந்த³கஸுத்தவண்ணனா

223. ஏவம் மே ஸுதந்தி ஸந்த³கஸுத்தம். தத்த² பிலக்க²கு³ஹாயந்தி தஸ்ஸா கு³ஹாய த்³வாரே பிலக்க²ருக்கோ² அஹோஸி, தஸ்மா பிலக்க²கு³ஹாத்வேவ ஸங்க²ம் க³தா. படிஸல்லானா வுட்டி²தோதி விவேகதோ வுட்டி²தோ. தே³வகதஸோப்³போ⁴தி வஸ்ஸோத³கேனேவ தின்னட்டா²னே ஜாதோ மஹாஉத³கரஹதோ³. கு³ஹாத³ஸ்ஸனாயாதி ஏத்த² கு³ஹாதி பம்ஸுகு³ஹா. ஸா உன்னமே உத³கமுத்தட்டா²னே அஹோஸி, ஏகதோ உமங்க³ம் கத்வா கா²ணுகே ச பம்ஸுஞ்ச நீஹரித்வா அந்தோ த²ம்பே⁴ உஸ்ஸாபேத்வா மத்த²கே பத³ரச்ச²ன்னகே³ஹஸங்கே²பேன கதா, தத்த² தே பரிப்³பா³ஜகா வஸந்தி. ஸா வஸ்ஸானே உத³கபுண்ணா திட்ட²தி, நிதா³கே⁴ தத்த² வஸந்தி. தம் ஸந்தா⁴ய ‘‘கு³ஹாத³ஸ்ஸனாயா’’தி ஆஹ. விஹாரத³ஸ்ஸனத்த²ஞ்ஹி அனமதக்³கி³யம் பச்சவேக்கி²த்வா ஸமுத்³த³பப்³ப³தத³ஸ்ஸனத்த²ம் வாபி க³ந்தும் வட்டதீதி.

உன்னாதி³னியாதி உச்சம் நத³மானாய. ஏவம் நத³மானாய சஸ்ஸா உத்³த⁴ங்க³மனவஸேன உச்சோ, தி³ஸாஸு பத்த²டவஸேன மஹாஸத்³தோ³தி உச்சாஸத்³த³மஹாஸத்³தோ³, தாய உச்சாஸத்³த³மஹாஸத்³தா³ய. தேஸம் பரிப்³பா³ஜகானம் பாதோவ உட்டா²ய கத்தப்³ப³ம் நாம சேதியவத்தம் வா போ³தி⁴வத்தம் வா ஆசரியுபஜ்ஜா²யவத்தம் வா யோனிஸோமனஸிகாரோ வா நத்தி². தேன தே பாதோவ உட்டா²ய பா³லாதபே நிஸின்னா, ஸாயம் வா கதா²ய பா²ஸுகத்தா²ய ஸன்னிபதிதா ‘‘இமஸ்ஸ ஹத்தோ² ஸோப⁴ணோ இமஸ்ஸ பாதோ³’’தி ஏவம் அஞ்ஞமஞ்ஞஸ்ஸ ஹத்த²பாதா³தீ³னி வா ஆரப்³ப⁴ இத்தி²புரிஸதா³ரகதா³ரிகாவண்ணே வா அஞ்ஞம் வா காமஸ்ஸாத³ப⁴வஸ்ஸாதா³தி³வத்து²ம் ஆரப்³ப⁴ கத²ம் பட்ட²பேத்வா அனுபுப்³பே³ன ராஜகதா²தி³அனேகவித⁴ம் திரச்சா²னகத²ம் கதே²ந்தி. ஸா ஹி அனிய்யானிகத்தா ஸக்³க³மோக்க²மக்³கா³னம் திரச்சா²னபூ⁴தா கதா²தி திரச்சா²னகதா². தத்த² ராஜானம் ஆரப்³ப⁴ ‘‘மஹாஸம்மதோ மந்தா⁴தா த⁴ம்மாஸோகோ ஏவம்மஹானுபா⁴வோ’’திஆதி³னா நயேன பவத்தா கதா² ராஜகதா². ஏஸ நயோ சோரகதா²தீ³ஸு.

தேஸு ‘‘அஸுகோ ராஜா அபி⁴ரூபோ த³ஸ்ஸனீயோ’’திஆதி³னா நயேன கே³ஹஸ்ஸிதகதா²வ திரச்சா²னகதா² ஹோதி. ‘‘ஸோபி நாம ஏவம் மஹானுபா⁴வோ க²யம் க³தோ’’தி ஏவம் பவத்தா பன கம்மட்டா²னபா⁴வே திட்ட²தி. சோரேஸுபி ‘‘மூலதே³வோ ஏவம்மஹானுபா⁴வோ, மேக⁴மாலோ ஏவம்மஹானுபா⁴வோ’’தி தேஸம் கம்மம் படிச்ச அஹோ ஸூராதி கே³ஹஸ்ஸிதகதா²வ திரச்சா²னகதா². யுத்³தே⁴பி பா⁴ரதயுத்³தா⁴தீ³ஸு ‘‘அஸுகேன அஸுகோ ஏவம் மாரிதோ ஏவம் வித்³தோ⁴’’தி காமஸ்ஸாத³வஸேனேவ கதா² திரச்சா²னகதா². ‘‘தேபி நாம க²யம் க³தா’’தி ஏவம் பவத்தா பன ஸப்³ப³த்த² கதா² கம்மட்டா²னமேவ ஹோதி. அபிச அன்னாதீ³ஸு ‘‘ஏவம் வண்ணவந்தம் க³ந்த⁴வந்தம் ரஸவந்தம் ப²ஸ்ஸஸம்பன்னம் கா²தி³ம்ஹ பு⁴ஞ்ஜிம்ஹ பிவிம்ஹ பரிபு⁴ஞ்ஜிம்ஹா’’தி காமஸ்ஸாத³வஸேன கதே²தும் ந வட்டதி, ஸாத்த²கம் பன கத்வா – ‘‘புப்³பே³ ஏவம் வண்ணாதி³ஸம்பன்னம் அன்னம் பானம் வத்த²ம் ஸயனம் மாலம் க³ந்த⁴ம் ஸீலவந்தானம் அத³ம்ஹ, சேதியே பூஜம் அகரிம்ஹா’’தி கதே²தும் வட்டதி.

ஞாதிகதா²தீ³ஸுபி ‘‘அம்ஹாகம் ஞாதகா ஸூரா ஸமத்தா²’’தி வா ‘‘புப்³பே³ மயம் ஏவம் விசித்ரேஹி யானேஹி சரிம்ஹா’’தி வா அஸ்ஸாத³வஸேன வத்தும் ந வட்டதி, ஸாத்த²கம் பன கத்வா ‘‘தேபி நோ ஞாதகா க²யம் க³தா’’தி வா ‘‘புப்³பே³ மயம் ஏவரூபா உபாஹனா ஸங்க⁴ஸ்ஸ அத³ம்ஹா’’தி வா கதே²தப்³பா³. கா³மகதா²பி ஸுனிவிட்ட²து³ன்னிவிட்ட²ஸுபி⁴க்க²து³ப்³பி⁴க்கா²தி³வஸேன வா ‘‘அஸுககா³மவாஸினோ ஸூரா ஸமத்தா²’’தி வா ஏவம் அஸ்ஸாத³வஸேன ந வட்டதி, ஸாத்த²கம் பன கத்வா ஸத்³தா⁴ பஸன்னாதி வா க²யவயம் க³தாதி வா வத்தும் வட்டதி. நிக³மனக³ரஜனபத³கதா²ஸுபி ஏஸேவ நயோ. இத்தி²கதா²பி வண்ணஸண்டா²னாதீ³னி படிச்ச அஸ்ஸாத³வஸேன ந வட்டதி, ஸத்³தா⁴ பஸன்னா க²யம் க³தாதி ஏவமேவ வட்டதி. ஸூரகதா²பி நந்தி³மித்தோ நாம யோதோ⁴ ஸூரோ அஹோஸீதி அஸ்ஸாத³வஸேனேவ ந வட்டதி, ஸத்³தோ⁴ பஸன்னோ அஹோஸி க²யம் க³தோதி ஏவமேவ வட்டதி. விஸிகா²கதா²பி அஸுகா விஸிகா² ஸுனிவிட்டா² து³ன்னிவிட்டா² ஸூரா ஸமத்தா²தி அஸ்ஸாத³வஸேனேவ ந வட்டதி, ஸத்³தா⁴ பஸன்னா க²யம் க³தா இச்சேவம் வட்டதி.

கும்ப⁴ட்டா²னகதா²தி கும்ப⁴ட்டா²னஉத³கதித்த²கதா² வா வுச்சதி கும்ப⁴தா³ஸிகதா² வா. ஸாபி ‘‘பாஸாதி³கா நச்சிதும் கா³யிதும் சே²கா’’தி அஸ்ஸாத³வஸேன ந வட்டதி, ஸத்³தா⁴ பஸன்னாதிஆதி³னா நயேனேவ வட்டதி. புப்³ப³பேதகதா²தி அதீதஞாதிகதா². தத்த² வத்தமானஞாதிகதா²ஸதி³ஸோவ வினிச்ச²யோ.

நானத்தகதா²தி புரிமபச்சி²மகதா²விமுத்தா அவஸேஸா நானாஸபா⁴வா நிரத்த²ககதா². லோகக்கா²யிகாதி அயம் லோகோ கேன நிம்மிதோ, அஸுகேன நாம நிம்மிதோ, காகா ஸேதா அட்டீ²னம் ஸேதத்தா, ப³கா ரத்தா லோஹிதஸ்ஸ ரத்தத்தாதி ஏவமாதி³கா லோகாயதவிதண்ட³ஸல்லாபகதா².

ஸமுத்³த³க்கா²யிகா நாம கஸ்மா ஸமுத்³தோ³ ஸாக³ரோ, ஸாக³ரதே³வேன க²ணிதத்தா ஸாக³ரோ, க²தோ மேதி ஹத்த²முத்³தா³ய நிவேதி³தத்தா ஸமுத்³தோ³தி ஏவமாதி³கா நிரத்த²கா ஸமுத்³த³க்கா²யிககதா². இதி ப⁴வோ, இதி அப⁴வோதி யம் வா தம் வா நிரத்த²ககாரணம் வத்வா பவத்திதகதா² இதிப⁴வாப⁴வகதா². ஏத்த² ச ப⁴வோதி ஸஸ்ஸதம், அப⁴வோதி உச்சே²த³ம். ப⁴வோதி வட்³டி⁴, அப⁴வோதி ஹானி. ப⁴வோதி காமஸுக²ம், அப⁴வோதி அத்தகிலமதோ². இதி இமாய ச²ப்³பி³தா⁴ய இதிப⁴வாப⁴வகதா²ய ஸத்³தி⁴ம் பா³த்திம்ஸதிரச்சா²னகதா² நாம ஹோதி. ஏவரூபிம் திரச்சா²னகத²ம் கதே²ந்தியா நிஸின்னோ ஹோதி.

ததோ ஸந்த³கோ பரிப்³பா³ஜகோ தே பரிப்³பா³ஜகே ஓலோகேத்வா – ‘‘இமே பரிப்³பா³ஜகா அதிவிய அஞ்ஞமஞ்ஞம் அகா³ரவா அப்பதிஸ்ஸா, மயஞ்ச ஸமணஸ்ஸ கோ³தமஸ்ஸ பாதுபா⁴வதோ பட்டா²ய ஸூரியுக்³க³மனே க²ஜ்ஜோபனகூபமா ஜாதா, லாப⁴ஸக்காரோபி நோ பரிஹீனோ. ஸசே பன இமம் டா²னம் ஸமணோ கோ³தமோ கோ³தமஸாவகோ வா கி³ஹிஉபட்டா²கோபி வாஸ்ஸ ஆக³ச்சே²ய்ய, அதிவிய லஜ்ஜனீயம் ப⁴விஸ்ஸதி. பரிஸதோ³ஸோ கோ² பன பரிஸஜேட்ட²கஸ்ஸேவ உபரி ஆரோஹதீ’’தி இதோ சிதோ ச விலோகேந்தோ தே²ரம் அத்³த³ஸ. தேன வுத்தம் அத்³த³ஸா கோ² ஸந்த³கோ பரிப்³பா³ஜகோ…பே… துண்ஹீ அஹேஸுந்தி.

தத்த² ஸண்ட²பேஸீதி ஸிக்கா²பேஸி, வஜ்ஜமஸ்ஸா படிச்சா²தே³ஸி. யதா² ஸுட்ட²பிதா ஹோதி, ததா² நம் ட²பேஸி. யதா² நாம பரிஸமஜ்ஜ²ம் பவிஸந்தோ புரிஸோ வஜ்ஜபடிச்சா²த³னத்த²ம் நிவாஸனம் ஸண்ட²பேதி, பாருபனம் ஸண்ட²பேதி, ரஜோகிண்ணட்டா²னம் புஞ்ச²தி, ஏவமஸ்ஸா வஜ்ஜபடிச்சா²த³னத்த²ம் ‘‘அப்பஸத்³தா³ போ⁴ந்தோ’’தி ஸிக்கா²பேந்தோ யதா² ஸுட்ட²பிதா ஹோதி, ததா² நம் ட²பேஸீதி அத்தோ². அப்பஸத்³த³காமாதி அப்பஸத்³த³ம் இச்ச²ந்தி, ஏககா நிஸீத³ந்தி, ஏககா திட்ட²ந்தி, ந க³ணஸங்க³ணிகாய யாபேந்தி. அப்பஸத்³த³வினீதாதி அப்பஸத்³தே³ன நிரவேன பு³த்³தே⁴ன வினீதா. அப்பஸத்³த³ஸ்ஸ வண்ணவாதி³னோதி யம் டா²னம் அப்பஸத்³த³ம் நிஸ்ஸத்³த³ம். தஸ்ஸ வண்ணவாதி³னோ. உபஸங்கமிதப்³ப³ம் மஞ்ஞேய்யாதி இதா⁴க³ந்தப்³ப³ம் மஞ்ஞேய்ய.

கஸ்மா பனேஸ தே²ரஸ்ஸ உபஸங்கமனம் பச்சாஸீஸதீதி. அத்தனோ வுத்³தி⁴ம் பத்த²யமானோ. பரிப்³பா³ஜகா கிர பு³த்³தே⁴ஸு வா பு³த்³த⁴ஸாவகேஸு வா அத்தனோ ஸந்திகம் ஆக³தேஸு – ‘‘அஜ்ஜ அம்ஹாகம் ஸந்திகம் ஸமணோ கோ³தமோ ஆக³தோ, ஸாரிபுத்தோ ஆக³தோ, ந கோ² பனேதே யஸ்ஸ வா தஸ்ஸ வா ஸந்திகம் க³ச்ச²ந்தி, பஸ்ஸத² அம்ஹாகம் உத்தமபா⁴வ’’ந்தி அத்தனோ உபட்டா²கானம் ஸந்திகே அத்தானம் உக்கி²பந்தி உச்சே டா²னே ட²பேந்தி. ப⁴க³வதோபி உபட்டா²கே க³ண்ஹிதும் வாயமந்தி. தே கிர ப⁴க³வதோ உபட்டா²கே தி³ஸ்வா ஏவம் வத³ந்தி – ‘‘தும்ஹாகம் ஸத்தா² ப⁴வம் கோ³தமோபி கோ³தமஸ்ஸ ஸாவகாபி அம்ஹாகம் ஸந்திகம் ஆக³ச்ச²ந்தி, மயம் அஞ்ஞமஞ்ஞம் ஸமக்³கா³. தும்ஹே பன அம்ஹே அக்கீ²ஹி பஸ்ஸிதும் ந இச்ச²த², ஸாமீசிகம்மம் ந கரோத², கிம் வோ அம்ஹேஹி அபரத்³த⁴’’ந்தி. அப்பேகச்சே மனுஸ்ஸா – ‘‘பு³த்³தா⁴பி ஏதேஸம் ஸந்திகம் க³ச்ச²ந்தி, கிம் அம்ஹாக’’ந்தி ததோ பட்டா²ய தே தி³ஸ்வா நப்பமஜ்ஜந்தி. துண்ஹீ அஹேஸுந்தி ஸந்த³கம் பரிவாரேத்வா நிஸ்ஸத்³தா³ நிஸீதி³ம்ஸு.

224. ஸ்வாக³தம் போ⁴தோ ஆனந்த³ஸ்ஸாதி ஸுஆக³மனம் போ⁴தோ ஆனந்த³ஸ்ஸ. ப⁴வந்தே ஹி நோ ஆக³தே ஆனந்தோ³ ஹோதி, க³தே ஸோகோதி தீ³பேதி. சிரஸ்ஸம் கோ²தி பியஸமுதா³சாரவசனமேதம். தே²ரோ பன காலேன காலம் பரிப்³பா³ஜகாராமம் சாரிகத்தா²ய க³ச்ச²தீதி புரிமக³மனம் க³ஹேத்வா ஏவமாஹ. ஏவஞ்ச பன வத்வா ந மானத்த²த்³தோ⁴ ஹுத்வா நிஸீதி³, அத்தனோ பன ஆஸனா வுட்டா²ய தம் ஆஸனம் பப்போ²டேத்வா தே²ரம் ஆஸனேன நிமந்தேந்தோ நிஸீத³து ப⁴வம் ஆனந்தோ³, இத³மாஸனம் பஞ்ஞத்தந்தி ஆஹ.

அந்தராகதா² விப்பகதாதி நிஸின்னானம் வோ ஆரம்ப⁴தோ பட்டா²ய யாவ மமாக³மனம் ஏதஸ்மிம் அந்தரே கா நாம கதா² விப்பகதா, மமாக³மனபச்சயா கதமா கதா² பரியந்தம் ந க³தாதி புச்ச²தி.

அத² பரிப்³பா³ஜகோ ‘‘நிரத்த²ககதா²வ ஏஸா நிஸ்ஸாரா வட்டஸன்னிஸ்ஸிதா, ந தும்ஹாகம் புரதோ வத்தப்³ப³தம் அரஹதீ’’தி தீ³பேந்தோ திட்ட²தேஸா, போ⁴திஆதி³மாஹ. நேஸா போ⁴தோதி ஸசே ப⁴வம் ஸோதுகாமோ ப⁴விஸ்ஸதி, பச்சா²பேஸா கதா² ந து³ல்லபா⁴ ப⁴விஸ்ஸதி, அம்ஹாகம் பனிமாய அத்தோ² நத்தி². போ⁴தோ பன ஆக³மனம் லபி⁴த்வா அஞ்ஞதே³வ ஸுகாரணம் கத²ம் ஸோதுகாமம்ஹாதி தீ³பேதி. ததோ த⁴ம்மதே³ஸனம் யாசந்தோ ஸாது⁴ வத ப⁴வந்தம் யே வாதிஆதி³மாஹ. தத்த² ஆசரியகேதி ஆசரியஸமயே. அனஸ்ஸாஸிகானீதி அஸ்ஸாஸவிரஹிதானி. ஸஸக்கந்தி ஏகம்ஸத்தே² நிபாதோ, விஞ்ஞூ புரிஸோ ஏகம்ஸேனேவ ந வஸேய்யாதி அத்தோ². வஸந்தோ ச நாராதே⁴ய்யாதி ந ஸம்பாதே³ய்ய, ந பரிபூரேய்யாதி வுத்தம் ஹோதி. ஞாயம் த⁴ம்மம் குஸலந்தி காரணபூ⁴தம் அனவஜ்ஜட்டே²ன குஸலம் த⁴ம்மம்.

225. இதா⁴தி இமஸ்மிம் லோகே. நத்தி² தி³ன்னந்திஆதீ³னி ஸாலேய்யகஸுத்தே (ம. நி. 1.440) வுத்தானி. சாதுமஹாபூ⁴திகோதி சதுமஹாபூ⁴தமயோ. பத²வீ பத²வீகாயந்தி அஜ்ஜ²த்திகா பத²வீதா⁴து பா³ஹிரபத²வீதா⁴தும். அனுபேதீதி அனுயாதி. அனுபக³ச்ச²தீதி தஸ்ஸேவ வேவசனம், அனுக³ச்ச²தீதிபி அத்தோ², உப⁴யேனாபி உபேதி உபக³ச்ச²தீதி த³ஸ்ஸேதி. ஆபாதீ³ஸுபி ஏஸேவ நயோ. இந்த்³ரியானீதி மனச்ச²ட்டா²னி இந்த்³ரியானி ஆகாஸம் பக்க²ந்த³ந்தி. ஆஸந்தி³பஞ்சமாதி நிபன்னமஞ்சேன பஞ்சமா, மஞ்சோ சேவ, சத்தாரோ மஞ்சபாதே³ க³ஹேத்வா டி²தா சத்தாரோ புரிஸா சாதி அத்தோ². யாவாளாஹனாதி யாவ ஸுஸானா. பதா³னீதி அயம் ஏவம் ஸீலவா அஹோஸி, ஏவம் து³ஸ்ஸீலோதிஆதி³னா நயேன பவத்தானி கு³ணபதா³னி. ஸரீரமேவ வா ஏத்த² பதா³னீதி அதி⁴ப்பேதம். காபோதகானீதி கபோதகவண்ணானி, பாராவதபக்க²வண்ணானீதி அத்தோ².

ப⁴ஸ்ஸந்தாதி ப⁴ஸ்மந்தா, அயமேவ வா பாளி. ஆஹுதியோதி யம் பஹேணகஸக்காராதி³பே⁴த³ம் தி³ன்னதா³னம், ஸப்³ப³ம் தம் சா²ரிகாவஸானமேவ ஹோதி, ந ததோ பரம் ப²லதா³யகம் ஹுத்வா க³ச்ச²தீதி அத்தோ². த³த்துபஞ்ஞத்தந்தி த³த்தூஹி பா³லமனுஸ்ஸேஹி பஞ்ஞத்தம். இத³ம் வுத்தம் ஹோதி – பா³லேஹி அபு³த்³தீ⁴ஹி பஞ்ஞத்தமித³ம் தா³னம், ந பண்டி³தேஹி. பா³லா தே³ந்தி, பண்டி³தா க³ண்ஹந்தீதி த³ஸ்ஸேதி. அத்தி²கவாத³ந்தி அத்தி² தி³ன்னம் தி³ன்னப²லந்தி இமம் அத்தி²கவாத³ம்யேவ வத³ந்தி தேஸம் துச்ச²ம் வசனம் முஸாவிலாபோ. பா³லே ச பண்டி³தே சாதி பா³லா ச பண்டி³தா ச.

அகதேன மே ஏத்த² கதந்தி மய்ஹம் அகதேனேவ ஸமணகம்மேன ஏத்த² ஏதஸ்ஸ ஸமயே கம்மம் கதம் நாம ஹோதி, அவுஸிதேனேவ ப்³ரஹ்மசரியேன வுஸிதம் நாம ஹோதி. ஏத்தா²தி ஏதஸ்மிம் ஸமணத⁴ம்மே. ஸமஸமாதி அதிவிய ஸமா, ஸமேன வா கு³ணேன ஸமா. ஸாமஞ்ஞம் பத்தாதி ஸமானபா⁴வம் பத்தா.

226. கரதோதிஆதீ³னி அபண்ணகஸுத்தே வுத்தானி. ததா² நத்தி² ஹேதூதிஆதீ³னி.

228. சதுத்த²ப்³ரஹ்மசரியவாஸே அகடாதி அகதா. அகடவிதா⁴தி அகதவிதா⁴னா, ஏவம் கரோஹீதி கேனசி காராபிதா ந ஹோந்தீதி அத்தோ². அனிம்மிதாதி இத்³தி⁴யாபி ந நிம்மிதா. அனிம்மாதாதி அனிம்மாபிதா. கேசி அனிம்மிதப்³பா³தி பத³ம் வத³ந்தி, தம் நேவ பாளியம், ந அட்ட²கதா²யம் ஸந்தி³ஸ்ஸதி. வஞ்ஜா²தி வஞ்ஜ²பஸுவஞ்ஜ²தாலாத³யோ விய அப²லா, கஸ்ஸசி அஜனகாதி அத்தோ². ஏதேன பத²வீகாயாதீ³னம் ரூபாதி³ஜனகபா⁴வம் படிக்கி²பதி. பப்³ப³தகூடா விய டி²தாதி கூடட்டா². ஈஸிகட்டா²யிட்டி²தாதி முஞ்ஜே ஈஸிகா விய டி²தா. தத்ராயமதி⁴ப்பாயோ – யமித³ம் ஜாயதீதி வுச்சதி, தம் முஞ்ஜதோ ஈஸிகா விய விஜ்ஜமானமேவ நிக்க²மதீதி. ‘‘ஏஸிகட்டா²யிட்டி²தா’’திபி பாடோ², ஸுனிகா²தோ ஏஸிகத்த²ம்போ⁴ நிச்சலோ திட்ட²தி, ஏவம் டி²தாதி அத்தோ². உப⁴யேனபி தேஸம் வினாஸாபா⁴வம் தீ³பேதி. ந இஞ்ஜந்தீதி ஏஸிகத்த²ம்போ⁴ விய டி²தத்தா ந சலந்தி. ந விபரிணாமேந்தீதி பகதிம் ந ஜஹந்தி. ந அஞ்ஞமஞ்ஞம் ப்³யாபா³தே⁴ந்தீதி அஞ்ஞமஞ்ஞம் ந உபஹனந்தி. நாலந்தி ந ஸமத்தா².

பத²வீகாயோதிஆதீ³ஸு பத²வீயேவ பத²வீகாயோ, பத²வீஸமூஹோ வா. தத்தா²தி தேஸு ஜீவஸத்தமேஸு காயேஸு. நத்தி² ஹந்தா வாதி ஹந்தும் வா கா⁴தேதும் வா ஸோதும் வா ஸாவேதும் வா ஜானிதும் வா ஜானாபேதும் வா ஸமத்தோ² நாம நத்தீ²தி தீ³பேதி. ஸத்தன்னம்த்வேவ காயானந்தி யதா² முக்³க³ராஸிஆதீ³ஸு பஹடம் ஸத்த²ம் முக்³க³ராஸிஆதீ³னம் அந்தரேன பவிஸதி, ஏவம் ஸத்தன்னம் காயானம் அந்தரேன சி²த்³தே³ன விவரேன ஸத்த²ம் பவிஸதி. தத்த² ‘‘அஹம் இமம் ஜீவிதா வோரோபேமீ’’தி கேவலம் ஸஞ்ஞாமத்தமேவ ஹோதீதி த³ஸ்ஸேதி. யோனிபமுக²ஸதஸஹஸ்ஸானீதி பமுக²யோனீனம் உத்தமயோனீனம் சுத்³த³ஸஸதஸஹஸ்ஸானி அஞ்ஞானி ச ஸட்டி²ஸதானி அஞ்ஞானி ச ச²ஸதானி. பஞ்ச ச கம்முனோ ஸதானீதி பஞ்ச கம்மஸதானி ச, கேவலம் தக்கமத்தகேன நிரத்த²கம் தி³ட்டி²ம் தீ³பேதி. பஞ்ச ச கம்மானி தீணி ச கம்மானீதிஆதீ³ஸுபி ஏஸேவ நயோ. கேசி பனாஹு பஞ்ச கம்மானீதி பஞ்சிந்த்³ரியவஸேன ப⁴ணதி. தீணீதி காயகம்மாதி³வஸேனாதி. கம்மே ச அட்³ட⁴கம்மே சாதி ஏத்த² பனஸ்ஸ காயகம்மஞ்ச வசீகம்மஞ்ச கம்மந்தி லத்³தி⁴, மனோகம்மம் உபட்³ட⁴கம்மந்தி. த்³வட்டி²படிபதா³தி த்³வாஸட்டி² படிபதா³தி வத³தி. த்³வட்ட²ந்தரகப்பாதி ஏகஸ்மிம் கப்பே சதுஸட்டி² அந்தரகப்பா நாம ஹோந்தி, அயம் பன அஞ்ஞே த்³வே அஜானந்தோ ஏவமாஹ. ச²ளாபி⁴ஜாதியோ அபண்ணகஸுத்தே வித்தா²ரிதா.

அட்ட² புரிஸபூ⁴மியோதி மந்த³பூ⁴மி கி²ட்³டா³பூ⁴மி வீமம்ஸகபூ⁴மி உஜுக³தபூ⁴மி ஸேக்க²பூ⁴மி ஸமணபூ⁴மி ஜினபூ⁴மி பன்னபூ⁴மீதி இமா அட்ட² புரிஸபூ⁴மியோதி வத³தி. தத்த² ஜாததி³வஸதோ பட்டா²ய ஸத்ததி³வஸே ஸம்பா³த⁴ட்டா²னதோ நிக்க²ந்தத்தா ஸத்தா மந்தா³ ஹோந்தி மோமூஹா. அயம் மந்த³பூ⁴மீதி வத³தி. யே பன து³க்³க³திதோ ஆக³தா ஹோந்தி, தே அபி⁴ண்ஹம் ரோத³ந்தி சேவ விரவந்தி ச. ஸுக³திதோ ஆக³தா தம் அனுஸ்ஸரித்வா அனுஸ்ஸரித்வா ஹஸந்தி. அயம் கி²ட்³டா³பூ⁴மி நாம. மாதாபிதூனம் ஹத்த²ம் வா பாத³ம் வா மஞ்சம் வா பீட²ம் வா க³ஹேத்வா பூ⁴மியம் பத³னிக்கி²பனம் வீமம்ஸகபூ⁴மி நாம. பத³ஸாவ க³ந்தும் ஸமத்த²காலோ உஜுக³தபூ⁴மி நாம. ஸிப்பானம் ஸிக்க²னகாலோ ஸேக்க²பூ⁴மி நாம. க⁴ரா நிக்க²ம்ம பப்³ப³ஜனகாலோ ஸமணபூ⁴மி நாம. ஆசரியம் ஸேவித்வா ஜானனகாலோ ஜினபூ⁴மி நாம. பி⁴க்கு² ச பன்னகோ ஜினோ ந கிஞ்சி ஆஹாதி ஏவம் அலாபி⁴ம் ஸமணம் பன்னபூ⁴மீதி வத³தி.

ஏகூனபஞ்ஞாஸ ஆஜீவஸதேதி ஏகூனபஞ்ஞாஸ ஆஜீவவுத்திஸதானி. பரிப்³பா³ஜகஸதேதி பரிப்³பா³ஜகபப்³ப³ஜ்ஜஸதானி. நாகா³வாஸஸதேதி நாக³மண்ட³லஸதானி. வீஸே இந்த்³ரியஸதேதி வீஸ இந்த்³ரியஸதானி. திம்ஸே நிரயஸதேதி திம்ஸ நிரயஸதானி. ரஜோதா⁴துயோதி ரஜஓகிரணட்டா²னானி. ஹத்த²பிட்டி²பாத³பிட்டா²தீ³னி ஸந்தா⁴ய வத³தி. ஸத்த ஸஞ்ஞீக³ப்³பா⁴தி ஓட்ட²கோ³ணக³த்³ரப⁴அஜபஸுமிக³மஹிம்ஸே ஸந்தா⁴ய வத³தி. அஸஞ்ஞீக³ப்³பா⁴தி ஸாலியவகோ³து⁴மமுக்³க³கங்கு³வரககுத்³ரூஸகே ஸந்தா⁴ய வத³தி. நிக³ண்டி²க³ப்³பா⁴தி நிக³ண்டி²ம்ஹி ஜாதக³ப்³பா⁴, உச்சு²வேளுனளாத³யோ ஸந்தா⁴ய வத³தி. ஸத்த தே³வாதி ப³ஹூ தே³வா, ஸோ பன ஸத்தாதி வத³தி. மானுஸாபி அனந்தா, ஸோ ஸத்தாதி வத³தி. ஸத்த பிஸாசாதி பிஸாசா மஹந்தா, ஸத்தாதி வத³தி.

ஸராதி மஹாஸரா. கண்ணமுண்ட³-ரத²கார-அனோதத்த-ஸீஹபபாதகுளிர-முசலிந்த³-குணாலத³ஹே க³ஹேத்வா வத³தி. பவுடாதி க³ண்டி²கா. பபாதாதி மஹாபபாதா. பபாதஸதானீதி கு²த்³த³கபபாதஸதானி. ஸுபினாதி மஹாஸுபினா. ஸுபினஸதானீதி கு²த்³த³கஸுபினஸதானி. மஹாகப்பினோதி மஹாகப்பானம். ஏத்த² ஏகம்ஹா ஸரா வஸ்ஸஸதே வஸ்ஸஸதே குஸக்³கே³ன ஏகம் உத³கபி³ந்து³ம் நீஹரித்வா நீஹரித்வா ஸத்தக்க²த்தும் தம்ஹி ஸரே நிருத³கே கதே ஏகோ மஹாகப்போதி வத³தி. ஏவரூபானம் மஹாகப்பானம் சதுராஸீதிஸதஸஹஸ்ஸானி கே²பேத்வா பா³லா ச பண்டி³தா ச து³க்க²ஸ்ஸந்தம் கரோந்தீதி அயமஸ்ஸ லத்³தி⁴. பண்டி³தோபி கிர அந்தரா ஸுஜ்ஜி²தும் ந ஸக்கோதி, பா³லோபி ததோ உத்³த⁴ம் ந க³ச்ச²தி.

ஸீலேனாதி அசேலகஸீலேன வா அஞ்ஞேன வா யேன கேனசி. வதேனாதி தாதி³ஸேன வதேன. தபேனாதி தபோகம்மேன. அபரிபக்கம் பரிபாசேதி நாம யோ ‘‘அஹம் பண்டி³தோ’’தி அந்தரா விஸுஜ்ஜ²தி. பரிபக்கம் பு²ஸ்ஸ பு²ஸ்ஸ ப்³யந்திம் கரோதி நாம யோ ‘‘அஹம் பா³லோ’’தி வுத்தபரிமாணம் காலம் அதிக்கமித்வா யாதி. ஹேவம் நத்தீ²தி ஏவம் நத்தி². தஞ்ஹி உப⁴யம்பி ந ஸக்கா காதுந்தி தீ³பேதி. தோ³ணமிதேதி தோ³ணேன மிதம் விய. ஸுக²து³க்கே²தி ஸுக²து³க்க²ம். பரியந்தகதேதி வுத்தபரிமாணேன காலேன கதபரியந்தோ. நத்தி² ஹாயனவட்³ட⁴னேதி நத்தி² ஹாயனவட்³ட⁴னானி. ந ஸம்ஸாரோ பண்டி³தஸ்ஸ ஹாயதி, ந பா³லஸ்ஸ வட்³ட⁴தீதி அத்தோ². உக்கம்ஸாவகம்ஸேதி உக்கம்ஸாவகம்ஸா, ஹாபனவட்³ட⁴னானமேவேதம் வேவசனம். இதா³னி தமத்த²ம் உபமாய ஸாதே⁴ந்தோ ஸேய்யதா²பி நாமாதிஆதி³மாஹ. தத்த² ஸுத்தகு³ளேதி வேடே²த்வா கதஸுத்தகு³ளம். நிப்³பே³டி²யமானமேவ பலேதீதி பப்³ப³தே வா ருக்க²க்³கே³ வா ட²த்வா கி²த்தம் ஸுத்தபமாணேன நிப்³பே³டி²யமானம் க³ச்ச²தி, ஸுத்தே கீ²ணே தத்த² திட்ட²தி ந க³ச்ச²தி. ஏவமேவம் வுத்தகாலதோ உத்³த⁴ம் ந க³ச்ச²தீதி த³ஸ்ஸேதி.

229. கிமித³ந்தி கிமித³ம் தவ அஞ்ஞாணம், கிம் ஸப்³ப³ஞ்ஞு நாம த்வந்தி ஏவம் புட்டோ² ஸமானோ நியதிவாதே³ பக்கி²பந்தோ ஸுஞ்ஞம் மே அகா³ரந்திஆதி³மாஹ.

230. அனுஸ்ஸவிகோ ஹோதீதி அனுஸ்ஸவனிஸ்ஸிதோ ஹோதி. அனுஸ்ஸவஸச்சோதி ஸவனம் ஸச்சதோ க³ஹேத்வா டி²தோ. பிடகஸம்பதா³யாதி வக்³க³பண்ணாஸகாய பிடகக³ந்த²ஸம்பத்தியா.

232. மந்தோ³தி மந்த³பஞ்ஞோ. மோமூஹோதி அதிமூள்ஹோ. வாசாவிக்கே²பம் ஆபஜ்ஜதீதி வாசாய விக்கே²பம் ஆபஜ்ஜதி. கீதி³ஸம்? அமராவிக்கே²பம், அபரியந்தவிக்கே²பந்தி அத்தோ². அத² வா அமரா நாம மச்ச²ஜாதி. ஸா உம்முஜ்ஜனனிம்முஜ்ஜனாதி³வஸேன உத³கே ஸந்தா⁴வமானா க³ஹேதும் ந ஸக்காதி ஏவமேவ அயம்பி வாதோ³ இதோ சிதோ ச ஸந்தா⁴வதி, கா³ஹம் ந உபக³ச்ச²தீதி அமராவிக்கே²போதி வுச்சதி. தம் அமராவிக்கே²பம்.

ஏவந்திபி மே நோதிஆதீ³ஸு இத³ம் குஸலந்தி புட்டோ² ‘‘ஏவந்திபி மே நோ’’தி வத³தி, ததோ கிம் அகுஸலந்தி வுத்தே ‘‘ததா²திபி மே நோ’’தி வத³தி, கிம் உப⁴யதோ அஞ்ஞதா²தி வுத்தே ‘‘அஞ்ஞதா²திபி மே நோ’’தி வத³தி, ததோ திவிதே⁴னாபி ந ஹோதீதி தே லத்³தீ⁴தி வுத்தே ‘‘நோதிபி மே நோ’’தி வத³தி, ததோ கிம் நோ நோதி தே லத்³தீ⁴தி வுத்தே ‘‘நோ நோதிபி மே நோ’’தி விக்கே²பமாபஜ்ஜதி, ஏகஸ்மிம்பி பக்கே² ந திட்ட²தி. நிப்³பி³ஜ்ஜ பக்கமதீதி அத்தனோபி ஏஸ ஸத்தா² அவஸ்ஸயோ ப⁴விதும் ந ஸக்கோதி, மய்ஹம் கிம் ஸக்கி²ஸ்ஸதீதி நிப்³பி³ந்தி³த்வா பக்கமதி. புரிமேஸுபி அனஸ்ஸாஸிகேஸு ஏஸேவ நயோ.

234. ஸன்னிதி⁴காரகம் காமே பரிபு⁴ஞ்ஜிதுந்தி யதா² புப்³பே³ கி³ஹிபூ⁴தோ ஸன்னிதி⁴ம் கத்வா வத்து²காமே பரிபு⁴ஞ்ஜதி, ஏவம் திலதண்டு³லஸப்பினவனீதாதீ³னி ஸன்னிதி⁴ம் கத்வா இதா³னி பரிபு⁴ஞ்ஜிதும் அப⁴ப்³போ³தி அத்தோ². நனு ச கீ²ணாஸவஸ்ஸ வஸனட்டா²னே திலதண்டு³லாத³யோ பஞ்ஞாயந்தீதி. நோ ந பஞ்ஞாயந்தி, ந பனேஸ தே அத்தனோ அத்தா²ய ட²பேதி, அபா²ஸுகபப்³ப³ஜிதாதீ³னம் அத்தா²ய ட²பேதி. அனாகா³மிஸ்ஸ கத²ந்தி. தஸ்ஸாபி பஞ்ச காமகு³ணா ஸப்³ப³ஸோவ பஹீனா, த⁴ம்மேன பன லத்³த⁴ம் விசாரேத்வா பரிபு⁴ஞ்ஜதி.

236. புத்தமதாய புத்தாதி ஸோ கிர இமம் த⁴ம்மம் ஸுத்வா ஆஜீவகா மதா நாமாதி ஸஞ்ஞீ ஹுத்வா ஏவமாஹ. அயஞ்ஹேத்த² அத்தோ² – ஆஜீவகா மதா நாம, தேஸம் மாதா புத்தமதா ஹோதி, இதி ஆஜீவகா புத்தமதாய புத்தா நாம ஹோந்தி. ஸமணே கோ³தமேதி ஸமணே கோ³தமே ப்³ரஹ்மசரியவாஸோ அத்தி², அஞ்ஞத்த² நத்தீ²தி தீ³பேதி. ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

ஸந்த³கஸுத்தவண்ணனா நிட்டி²தா.