9. கோ³லியானிஸுத்தவண்ணனா

173. ஏவம் மே ஸுதந்தி கோ³லியானிஸுத்தம். தத்த² பத³ஸமாசாரோதி து³ப்³ப³லஸமாசாரோ ஓளாரிகாசாரோ, பச்சயேஸு ஸாபேக்கோ² மஹாரக்கி²தத்தே²ரோ விய. தம் கிர உபட்டா²ககுலே நிஸின்னம் உபட்டா²கோ ஆஹ ‘‘அஸுகத்தே²ரஸ்ஸ மே, ப⁴ந்தே, சீவரம் தி³ன்ன’’ந்தி. ஸாது⁴ தே கதம் தம்யேவ தக்கேத்வா விஹரந்தஸ்ஸ சீவரம் தே³ந்தேனாதி. தும்ஹாகம்பி, ப⁴ந்தே, த³ஸ்ஸாமீதி. ஸாது⁴ கரிஸ்ஸஸி தம்யேவ தக்கேந்தஸ்ஸாதி ஆஹ. அயம்பி ஏவரூபோ ஓளாரிகாசாரோ அஹோஸி. ஸப்பதிஸ்ஸேனாதி ஸஜேட்ட²கேன, ந அத்தானம் ஜேட்ட²கம் கத்வா விஹரிதப்³ப³ம். ஸேரிவிஹாரேனாதி ஸச்ச²ந்த³விஹாரேன நிரங்குஸவிஹாரேன.

நானூபக²ஜ்ஜாதி ந அனுபக²ஜ்ஜ ந அனுபவிஸித்வா. தத்த² யோ த்³வீஸு மஹாதே²ரேஸு உப⁴தோ நிஸின்னேஸு தே அனாபுச்சி²த்வாவ சீவரேன வா ஜாணுனா வா க⁴ட்டேந்தோ நிஸீத³தி, அயம் அனுபக²ஜ்ஜ நிஸீத³தி நாம. ஏவம் அகத்வா பன அத்தனோ பத்தஆஸனஸந்திகே ட²த்வா நிஸீதா³வுஸோதி வுத்தே நிஸீதி³தப்³ப³ம். ஸசே ந வத³ந்தி, நிஸீதா³மி, ப⁴ந்தேதி ஆபுச்சி²த்வா நிஸீதி³தப்³ப³ம் ஆபுச்சி²தகாலதோ பட்டா²ய நிஸீதா³தி வுத்தேபி அவுத்தேபி நிஸீதி³தும் வட்டதியேவ. ந படிபா³ஹிஸ்ஸாமீதி ஏத்த² யோ அத்தனோ பத்தாஸனம் அதிக்கமித்வா நவகானம் பாபுணனட்டா²னே நிஸீத³தி, அயம் நவே பி⁴க்கூ² ஆஸனேன படிபா³ஹதி நாம. தஸ்மிஞ்ஹி ததா² நிஸின்னே நவா பி⁴க்கூ² ‘‘அம்ஹாகம் நிஸீதி³தும் ந தே³தீ’’தி உஜ்ஜா²யந்தா திட்ட²ந்தி வா ஆஸனம் வா பரியேஸந்தா ஆஹிண்ட³ந்தி. தஸ்மா அத்தனோ பத்தாஸனேயேவ நிஸீதி³தப்³ப³ம். ஏவம் ந படிபா³ஹதி நாம.

ஆபி⁴ஸமாசாரிகம்பி த⁴ம்மந்தி அபி⁴ஸமாசாரிகம் வத்தபடிபத்திமத்தம்பி. நாதிகாலேனாதி ந அதிபாதோ பவிஸிதப்³ப³ம், ந அதிதி³வா படிக்கமிதப்³ப³ம், பி⁴க்கு²ஸங்கே⁴ன ஸத்³தி⁴ம்யேவ பவிஸிதப்³ப³ஞ்ச நிக்க²மிதப்³ப³ஞ்ச. அதிபாதோ பவிஸித்வா அதிதி³வா நிக்க²மந்தஸ்ஸ ஹி சேதியங்க³ணபோ³தி⁴யங்க³ணவத்தாதீ³னி பரிஹாயந்தி. காலஸ்ஸேவ முக²ம் தோ⁴வித்வா மக்கடகஸுத்தானி சி²ந்த³ந்தேன உஸ்ஸாவபி³ந்தூ³ நிபாதேந்தேன கா³மம் பவிஸித்வா யாகு³ம் பரியேஸித்வா யாவ பி⁴க்கா²காலா அந்தோகா³மேயேவ நானப்பகாரம் திரச்சா²னகத²ம் கதே²ந்தேன நிஸீதி³த்வா ப⁴த்தகிச்சம் கத்வா தி³வா நிக்க²ம்ம பி⁴க்கூ²னம் பாத³தோ⁴வனவேலாய விஹாரம் பச்சாக³ந்தப்³ப³ம் ஹோதி. ந புரேப⁴த்தம் பச்சா²ப⁴த்தம் குலேஸு சாரித்தம் ஆபஜ்ஜிதப்³ப³ந்தி ‘‘யோ பன பி⁴க்கு² நிமந்திதோ ஸப⁴த்தோ ஸமானோ ஸந்தம் பி⁴க்கு²ம் அனாபுச்சா² புரேப⁴த்தம் வா பச்சா²ப⁴த்தம் வா குலேஸு சாரித்தம் ஆபஜ்ஜேய்ய, அஞ்ஞத்ர ஸமயா பாசித்திய’’ந்தி (பாசி. 299) இமம் ஸிக்கா²பத³ம் ரக்க²ந்தேன தஸ்ஸ விப⁴ங்கே³ வுத்தம் புரேப⁴த்தஞ்ச பச்சா²ப⁴த்தஞ்ச சாரித்தம் ந ஆபஜ்ஜிதப்³ப³ம். உத்³த⁴தோ ஹோதி சபலோதி உத்³த⁴ச்சபகதிகோ சேவ ஹோதி சீவரமண்ட³ன-பத்தமண்ட³ன-ஸேனாஸனமண்ட³னா இமஸ்ஸ வா பூதிகாயஸ்ஸ கேலாயனா மண்ட³னாதி ஏவம் வுத்தேன ச தருணதா³ரகாவசாபல்யேன ஸமன்னாக³தோ.

பஞ்ஞவதா ப⁴விதப்³ப³ந்தி சீவரகம்மாதீ³ஸு இதிகத்தப்³பே³ஸு உபாயபஞ்ஞாய ஸமன்னாக³தேன ப⁴விதப்³ப³ம். அபி⁴த⁴ம்மே அபி⁴வினயேதி அபி⁴த⁴ம்மபிடகே சேவ வினயபிடகே ச பாளிவஸேன சேவ அட்ட²கதா²வஸேன ச யோகோ³ கரணீயோ. ஸப்³ப³ந்திமேன ஹி பரிச்சே²தே³ன அபி⁴த⁴ம்மே து³கதிகமாதிகாஹி ஸத்³தி⁴ம் த⁴ம்மஹத³யவிப⁴ங்க³ம் வினா ந வட்டதி. வினயே பன கம்மாகம்மவினிச்ச²யேன ஸத்³தி⁴ம் ஸுவினிச்சி²தானி த்³வே பாதிமோக்கா²னி வினா ந வட்டதி.

ஆருப்பாதி ஏத்தாவதா அட்ட²பி ஸமாபத்தியோ வுத்தா ஹோந்தி. தா பன ஸப்³பே³ன ஸப்³ப³ம் அஸக்கோந்தேன ஸத்தஸுபி யோகோ³ கரணீயோ, ச²ஸுபி…பே… பஞ்சஸுபி. ஸப்³ப³ந்திமேன பரிச்சே²தே³ன ஏகம் கஸிணே பரிகம்மகம்மட்டா²னம் பகு³ணம் கத்வா ஆதா³ய விசரிதப்³ப³ம், ஏத்தகம் வினா ந வட்டதி. உத்தரிமனுஸ்ஸத⁴ம்மேதி இமினா ஸப்³பே³பி லோகுத்தரத⁴ம்மே த³ஸ்ஸேதி. தஸ்மா அரஹந்தேன ஹுத்வா விஹாதப்³ப³ம், அரஹத்தம் அனபி⁴ஸம்பு⁴ணந்தேன அனாகா³மிப²லே ஸகதா³கா³மிப²லே ஸோதாபத்திப²லே வா பதிட்டா²தப்³ப³ம். ஸப்³ப³ந்திமேன பரியாயேன ஏகம் விபஸ்ஸனாமுக²ம் யாவ அரஹத்தா பகு³ணம் கத்வா ஆதா³ய விசரிதப்³ப³ம். ஸேஸம் ஸப்³ப³த்த² உத்தானமேவ. இமம் பன தே³ஸனம் ஆயஸ்மா ஸாரிபுத்தோ நேய்யபுக்³க³லஸ்ஸ வஸேன ஆபி⁴ஸமாசாரிகவத்ததோ பட்டா²ய அனுபுப்³பே³ன அரஹத்தம் பாபேத்வா நிட்டா²பேஸீதி.

பபஞ்சஸூத³னியா மஜ்ஜி²மனிகாயட்ட²கதா²ய

கோ³லியானிஸுத்தவண்ணனா நிட்டி²தா.