10. கீடாகி³ரிஸுத்தவண்ணனா

174. ஏவம் மே ஸுதந்தி கீடாகி³ரிஸுத்தம். தத்த² காஸீஸூதி ஏவம்னாமகே ஜனபதே³. ஏத² தும்ஹேபி, பி⁴க்க²வேதி ஏத² தும்ஹேபி, பி⁴க்க²வே, இமே பஞ்ச ஆனிஸம்ஸே ஸம்பஸ்ஸமானா அஞ்ஞத்ரேவ ரத்திபோ⁴ஜனா பு⁴ஞ்ஜத². இதி ப⁴க³வா ரத்திம் விகாலபோ⁴ஜனம், தி³வா விகாலபோ⁴ஜனந்தி இமானி த்³வே போ⁴ஜனானி ஏகப்பஹாரேன அஜஹாபேத்வா ஏகஸ்மிம் ஸமயே தி³வா விகாலபோ⁴ஜனமேவ ஜஹாபேஸி, புன காலம் அதினாமேத்வா ரத்திம் விகாலபோ⁴ஜனம் ஜஹாபேந்தோ ஏவமாஹ. கஸ்மா? இமானி ஹி த்³வே போ⁴ஜனானி வத்தமானானி வட்டே ஆசிண்ணானி ஸமாசிண்ணானி நதி³ம் ஓதிண்ணஉத³கம் விய அனுபக்க²ந்தா³னி, நிவாதேஸு ச க⁴ரேஸு ஸுபோ⁴ஜனானி பு⁴ஞ்ஜித்வா வட்³டி⁴தா ஸுகு²மாலா குலபுத்தா த்³வே போ⁴ஜனானி ஏகப்பஹாரேன பஜஹந்தா கிலமந்தி. தஸ்மா ஏகப்பஹாரேன அஜஹாபேத்வா ப⁴த்³தா³லிஸுத்தே தி³வா விகாலபோ⁴ஜனம் ஜஹாபேஸி, இத⁴ ரத்திம் விகாலபோ⁴ஜனம். ஜஹாபேந்தோ பன ந தஜ்ஜித்வா வா நிக்³க³ண்ஹித்வா வா, தேஸம் பஹானபச்சயா பன அப்பாபா³த⁴தஞ்ச ஸஞ்ஜானிஸ்ஸதா²தி ஏவம் ஆனிஸம்ஸம் த³ஸ்ஸேத்வாவ ஜஹாபேஸி. கீடாகி³ரீதி தஸ்ஸ நிக³மஸ்ஸ நாமம்.

175. அஸ்ஸஜிபுனப்³ப³ஸுகாதி அஸ்ஸஜி ச புனப்³ப³ஸுகோ ச ச²ஸு ச²ப்³ப³க்³கி³யேஸு த்³வே க³ணாசரியா. பண்டு³கோ லோஹிதகோ மேத்தியோ பு⁴ம்மஜகோ அஸ்ஸஜி புனப்³ப³ஸுகோதி இமே ச² ஜனா ச²ப்³ப³க்³கி³யா நாம. தேஸு பண்டு³கலோஹிதகா அத்தனோ பரிஸம் க³ஹேத்வா ஸாவத்தி²யம் வஸந்தி, மேத்தியபு⁴ம்மஜகா ராஜக³ஹே, இமே த்³வே ஜனா கீடாகி³ரிஸ்மிம் ஆவாஸிகா ஹோந்தி. ஆவாஸிகாதி நிப³த்³த⁴வாஸினோ, தம்னிப³ந்தா⁴ அகதம் ஸேனாஸனம் கரோந்தி, ஜிண்ணம் படிஸங்க²ரோந்தி, கதே இஸ்ஸரா ஹோந்தி. காலிகந்தி அனாக³தே காலே பத்தப்³ப³ம் ஆனிஸம்ஸம்.

178. மயா சேதம், பி⁴க்க²வேதி இத⁴ கிம் த³ஸ்ஸேதி? பி⁴க்க²வே, தி³வஸஸ்ஸ தயோ வாரே பு⁴ஞ்ஜித்வா ஸுக²வேத³னம்யேவ உப்பாதே³ந்தோ ந இமஸ்மிம் ஸாஸனே கிச்சகாரீ நாம ஹோதி, ஏத்தகா பன வேத³னா ஸேவிதப்³பா³, ஏத்தகா ந ஸேவிதப்³பா³தி ஏதமத்த²ம் த³ஸ்ஸேதும் இமம் தே³ஸனம் ஆரபி⁴. ஏவரூபம் ஸுக²வேத³னம் பஜஹதா²தி இத³ஞ்ச கே³ஹஸ்ஸிதஸோமனஸ்ஸவஸேன வுத்தம், உபஸம்பஜ்ஜ விஹரதா²தி இத³ஞ்ச நேக்க²ம்மஸிதஸோமனஸ்ஸவஸேன. இதோ பரேஸுபி த்³வீஸு வாரேஸு கே³ஹஸ்ஸிதனேக்க²ம்மஸிதானம்யேவ தோ³மனஸ்ஸானஞ்ச உபேக்கா²னஞ்ச வஸேன அத்தோ² வேதி³தப்³போ³.

181. ஏவம் ஸேவிதப்³பா³ஸேவிதப்³ப³வேத³னம் த³ஸ்ஸேத்வா இதா³னி யேஸம் அப்பமாதே³ன கிச்சம் கத்தப்³ப³ம், யேஸஞ்ச ந கத்தப்³ப³ம், தே த³ஸ்ஸேதும் நாஹம், பி⁴க்க²வே, ஸப்³பே³ஸம்யேவாதிஆதி³மாஹ. தத்த² கதம் தேஸம் அப்பமாதே³னாதி தேஸம் யம் அப்பமாதே³ன கத்தப்³ப³ம், தம் கதம். அனுலோமிகானீதி படிபத்திஅனுலோமானி கம்மட்டா²னஸப்பாயானி, யத்த² வஸந்தேன ஸக்கா ஹோந்தி மக்³க³ப²லானி பாபுணிதும். இந்த்³ரியானி ஸமன்னானயமானாதி ஸத்³தா⁴தீ³னி இந்த்³ரியானி ஸமானம் குருமானா.

182. ஸத்திமே, பி⁴க்க²வே, புக்³க³லாதி இத⁴ கிம் த³ஸ்ஸேதி? யேஸம் அப்பமாதே³ன கரணீயம் நத்தி², தே த்³வே ஹோந்தி. யேஸம் அத்தி², தே பஞ்சாதி ஏவம் ஸப்³பே³பி இமே ஸத்த புக்³க³லா ஹோந்தீதி இமமத்த²ம் த³ஸ்ஸேதி.

தத்த² உப⁴தோபா⁴க³விமுத்தோதி த்³வீஹி பா⁴கே³ஹி விமுத்தோ. அரூபஸமாபத்தியா ரூபகாயதோ விமுத்தோ, மக்³கே³ன நாமகாயதோ. ஸோ சதுன்னம் அரூபஸமாபத்தீனம் ஏகேகதோ வுட்டா²ய ஸங்கா²ரே ஸம்மஸித்வா அரஹத்தம் பத்தானம் சதுன்னம், நிரோதா⁴ வுட்டா²ய அரஹத்தம் பத்தஅனாகா³மினோ ச வஸேன பஞ்சவிதோ⁴ ஹோதி. பாளி பனேத்த² – ‘‘கதமோ ச புக்³க³லோ உப⁴தோபா⁴க³விமுத்தோ, இதே⁴கச்சோ புக்³க³லோ அட்ட² விமோக்கே² காயேன பு²ஸித்வா விஹரதி, பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹோந்தீ’’தி (பு. ப. 208) ஏவம் அபி⁴த⁴ம்மே அட்ட²விமோக்க²லாபி⁴னோ வஸேன ஆக³தா.

பஞ்ஞாவிமுத்தோதி பஞ்ஞாய விமுத்தோ. ஸோ ஸுக்க²விபஸ்ஸகோ, சதூஹி ஜா²னேஹி வுட்டா²ய அரஹத்தம் பத்தா சத்தாரோ சாதி இமேஸம் வஸேன பஞ்சவிதோ⁴வ ஹோதி. பாளி பனேத்த² அட்ட²விமோக்க²படிக்கே²பவஸேனேவ ஆக³தா. யதா²ஹ – ‘‘ந ஹேவ கோ² அட்ட² விமோக்கே² காயேன பு²ஸித்வா விஹரதி, பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹோந்தி. அயம் வுச்சதி புக்³க³லோ பஞ்ஞாவிமுத்தோ’’தி.

பு²ட்ட²ந்தம் ஸச்சி²கரோதீதி காயஸக்கீ². யோ ஜா²னப²ஸ்ஸம் பட²மம் பு²ஸதி, பச்சா² நிரோத⁴ம் நிப்³பா³னம் ஸச்சி²கரோதி, ஸோ ஸோதாபத்திப²லட்ட²ம் ஆதி³ம் கத்வா யாவ அரஹத்தமக்³க³ட்டா² ச²ப்³பி³தோ⁴ ஹோந்தீதி வேதி³தப்³போ³. தேனேவாஹ – ‘‘இதே⁴கச்சோ புக்³க³லோ அட்ட² விமோக்கே² காயேன பு²ஸித்வா விஹரதி, பஞ்ஞாய சஸ்ஸ தி³ஸ்வா ஏகச்சே ஆஸவா பரிக்கீ²ணா ஹோந்தி. அயம் வுச்சதி புக்³க³லோ காயஸக்கீ²’’தி.

தி³ட்ட²ந்தம் பத்தோதி தி³ட்டி²ப்பத்தோ. தத்ரித³ம் ஸங்கே²பலக்க²ணம் – து³க்கா² ஸங்கா²ரா, ஸுகோ² நிரோதோ⁴தி ஞாதம் ஹோதி தி³ட்ட²ம் விதி³தம் ஸச்சி²கதம் பு²ஸிதம் பஞ்ஞாயாதி தி³ட்டி²ப்பத்தோ. வித்தா²ரதோ பனேஸோபி காயஸக்கி² விய ச²ப்³பி³தோ⁴ ஹோதி. தேனேவாஹ – ‘‘இதே⁴கச்சோ புக்³க³லோ இத³ம் து³க்க²ந்தி யதா²பூ⁴தம் பஜானாதி…பே… அயம் து³க்க²னிரோத⁴கா³மினீ படிபதா³தி யதா²பூ⁴தம் பஜானாதி, ததா²க³தப்பவேதி³தா சஸ்ஸ த⁴ம்மா பஞ்ஞாய வோதி³ட்டா² ஹோந்தி வோசரிதா…பே… அயம் வுச்சதி புக்³க³லோ தி³ட்டி²ப்பத்தோ’’தி (பு. ப. 208).

ஸத்³தா⁴விமுத்தோதி ஸத்³தா⁴ய விமுத்தோ. ஸோபி வுத்தனயேனேவ ச²ப்³பி³தோ⁴ ஹோதி. தேனேவாஹ – ‘‘இதே⁴கச்சோ புக்³க³லோ இத³ம் து³க்க²ந்தி – யதா²பூ⁴தம் பஜானாதி…பே… அயம் து³க்க²னிரோத⁴கா³மினீ படிபதா³தி யதா²பூ⁴தம் பஜானாதி. ததா²க³தப்பவேதி³தா சஸ்ஸ த⁴ம்மா பஞ்ஞாய வோதி³ட்டா² ஹோந்தி வோசரிதா…பே… நோ ச கோ² யதா² தி³ட்டி²ப்பத்தஸ்ஸ. அயம் வுச்சதி புக்³க³லோ ஸத்³தா⁴விமுத்தோ’’தி (பு. ப. 208). ஏதேஸு ஹி ஸத்³தா⁴விமுத்தஸ்ஸ புப்³ப³பா⁴க³மக்³க³க்க²ணே ஸத்³த³ஹந்தஸ்ஸ விய ஓகப்பேந்தஸ்ஸ விய அதி⁴முச்சந்தஸ்ஸ விய ச கிலேஸக்க²யோ ஹோதி, தி³ட்டி²ப்பத்தஸ்ஸ புப்³ப³பா⁴க³மக்³க³க்க²ணே கிலேஸச்சே²த³கஞாணம் அத³ந்த⁴ம் திகி²ணம் ஸூரம் ஹுத்வா வஹதி. தஸ்மா யதா² நாம நாதிதிகி²ணேன அஸினா கத³லிம் சி²ந்த³ந்தஸ்ஸ சி²ன்னட்டா²னம் ந மட்ட²ம் ஹோதி, அஸி ந ஸீக⁴ம் வஹதி, ஸத்³தோ³ ஸுய்யதி, ப³லவதரோ வாயாமோ காதப்³போ³ ஹோதி, ஏவரூபா ஸத்³தா⁴விமுத்தஸ்ஸ புப்³ப³பா⁴க³மக்³க³பா⁴வனா. யதா² பன நிஸிதஅஸினா கத³லிம் சி²ந்த³ந்தஸ்ஸ சி²ன்னட்டா²னம் மட்ட²ம் ஹோதி, அஸி ஸீக⁴ம் வஹதி, ஸத்³தோ³ ந ஸுய்யதி, ப³லவவாயாமகிச்சம் ந ஹோதி, ஏவரூபா பஞ்ஞாவிமுத்தஸ்ஸ புப்³ப³பா⁴க³மக்³க³பா⁴வனா வேதி³தப்³பா³.

த⁴ம்மம் அனுஸ்ஸரதீதி த⁴ம்மானுஸாரீ. த⁴ம்மோதி பஞ்ஞா, பஞ்ஞாபுப்³ப³ங்க³மம் மக்³க³ம் பா⁴வேதீதி அத்தோ². ஸத்³தா⁴னுஸாரிம்ஹி ச ஏஸேவ நயோ. உபோ⁴ பனேதே ஸோதாபத்திமக்³க³ட்டா²யேவ. வுத்தம்பி சேதம் – ‘‘யஸ்ஸ புக்³க³லஸ்ஸ ஸோதாபத்திப²லஸச்சி²கிரியாய படிபன்னஸ்ஸ பஞ்ஞிந்த்³ரியம் அதி⁴மத்தம் ஹோதி, பஞ்ஞாவாஹிம் பஞ்ஞாபுப்³ப³ங்க³மம் அரியமக்³க³ம் பா⁴வேதி. அயம் வுச்சதி புக்³க³லோ த⁴ம்மானுஸாரீ’’தி (பு. ப. 208). ததா² – ‘‘யஸ்ஸ புக்³க³லஸ்ஸ ஸோதாபத்திப²லஸச்சி²கிரியாய படிபன்னஸ்ஸ ஸத்³தி⁴ந்த்³ரியம் அதி⁴மத்தம் ஹோதி, ஸத்³தா⁴வாஹிம் ஸத்³தா⁴புப்³ப³ங்க³மம் அரியமக்³க³ம் பா⁴வேதி. அயம் வுச்சதி புக்³க³லோ ஸத்³தா⁴னுஸாரீ’’தி. அயமேத்த² ஸங்கே²போ. வித்தா²ரதோ பனேஸா உப⁴தோபா⁴க³விமுத்தாதி³கதா² விஸுத்³தி⁴மக்³கே³ பஞ்ஞாபா⁴வனாதி⁴காரே வுத்தா. தஸ்மா தத்த² வுத்தனயேனேவ வேதி³தப்³பா³. யா பனேஸா ஏதேஸம் விபா⁴க³த³ஸ்ஸனத்த²ம் இத⁴ பாளி ஆக³தா, தத்த² யஸ்மா ரூபஸமாபத்தியா வினா அரூபஸமாபத்தியோ நாம நத்தி², தஸ்மா ஆருப்பாதி வுத்தேபி அட்ட² விமோக்கா² வுத்தாவ ஹோந்தீதி வேதி³தப்³பா³.

காயேன பு²ஸித்வாதி ஸஹஜாதனாமகாயேன பு²ஸித்வா. பஞ்ஞாய சஸ்ஸ தி³ஸ்வாதி பஞ்ஞாய ச ஏதஸ்ஸ அரியஸச்சத⁴ம்மே தி³ஸ்வா. ஏகச்சே ஆஸவாதி பட²மமக்³கா³தீ³ஹி பஹாதப்³பா³ ஏகதே³ஸஆஸவா. ததா²க³தப்பவேதி³தாதி ததா²க³தேன பவேதி³தா சதுஸச்சத⁴ம்மா. பஞ்ஞாய வோதி³ட்டா² ஹோந்தீதி இமஸ்மிம் டா²னே ஸீலம் கதி²தம், இமஸ்மிம் ஸமாதி⁴, இமஸ்மிம் விபஸ்ஸனா, இமஸ்மிம் மக்³கோ³, இமஸ்மிம் ப²லந்தி ஏவம் அத்தே²ன அத்தே² காரணேன காரணே சிண்ணசரிதத்தா மக்³க³பஞ்ஞாய ஸுதி³ட்டா² ஹோந்தி. வோசரிதாதி விசரிதா. ஸத்³தா⁴ நிவிட்டா² ஹோதீதி ஓகப்பனஸத்³தா⁴ பதிட்டி²தா ஹோதி. மத்தஸோ நிஜ்ஜா²னம் க²மந்தீதி மத்தாய ஓலோகனம் க²மந்தி. ஸத்³தா⁴மத்தந்தி ஸத்³தா⁴யேவ, இதரம் தஸ்ஸேவ வேவசனம்

இதி இமேஸு அப்பமாதே³ன கரணீயேஸு புக்³க³லேஸு தயோ படிவித்³த⁴மக்³க³ப²லா ஸேகா². தேஸு அனுலோமஸேனாஸனம் ஸேவமானா கல்யாணமித்தே ப⁴ஜமானா இந்த்³ரியானி ஸமன்னானயமானா அனுபுப்³பே³ன அரஹத்தம் க³ண்ஹந்தி. தஸ்மா தேஸம் யதா²டி²தோவ பாளிஅத்தோ². அவஸானே பன த்³வே ஸோதாபத்திமக்³க³ஸமங்கி³னோ. தேஹி தஸ்ஸ மக்³க³ஸ்ஸ அனுலோமஸேனாஸனம் ஸேவிதம், கல்யாணமித்தா ப⁴ஜிதா, இந்த்³ரியானி ஸமன்னானீதானி. உபரி பன திண்ணம் மக்³கா³னம் அத்தா²ய ஸேவமானா ப⁴ஜமானா ஸமன்னானயமானா அனுபுப்³பே³ன அரஹத்தம் பாபுணிஸ்ஸந்தீதி அயமேத்த² பாளிஅத்தோ².

விதண்ட³வாதீ³ பன இமமேவ பாளிம் க³ஹேத்வா – ‘‘லோகுத்தரமக்³கோ³ ந ஏகசித்தக்க²ணிகோ, ப³ஹுசித்தக்க²ணிகோ’’தி வத³தி. ஸோ வத்தப்³போ³ – ‘‘யதி³ அஞ்ஞேன சித்தேன ஸேனாஸனம் படிஸேவதி, அஞ்ஞேன கல்யாணமித்தே ப⁴ஜதி, அஞ்ஞேன இந்த்³ரியானி ஸமன்னானேதி, அஞ்ஞம் மக்³க³சித்தந்தி ஸந்தா⁴ய த்வம் ‘ந ஏகசித்தக்க²ணிகோ மக்³கோ³, ப³ஹுசித்தக்க²ணிகோ’தி வத³ஸி, ஏவம் ஸந்தே ஸேனாஸனம் ஸேவமானோ நீலோபா⁴ஸம் பப்³ப³தம் பஸ்ஸதி, வனம் பஸ்ஸதி, மிக³பக்கீ²னம் ஸத்³த³ம் ஸுணாதி, புப்ப²ப²லானம் க³ந்த⁴ம் கா⁴யதி, பானீயம் பிவந்தோ ரஸம் ஸாயதி, நிஸீத³ந்தோ நிபஜ்ஜந்தோ ப²ஸ்ஸம் பு²ஸதி. ஏவம் தே பஞ்சவிஞ்ஞாணஸமங்கீ³பி லோகுத்தரத⁴ம்மஸமங்கீ³யேவ ப⁴விஸ்ஸதி. ஸசே பனேதம் ஸம்படிச்ச²ஸி, ஸத்தா²ரா ஸத்³தி⁴ம் படிவிருஜ்ஜ²ஸி. ஸத்தா²ரா ஹி பஞ்சவிஞ்ஞாணகாயா ஏகந்தம் அப்³யாகதாவ வுத்தா, தம்ஸமங்கி³ஸ்ஸ குஸலாகுஸலம் படிக்கி²த்தம், லோகுத்தரமக்³கோ³ ச ஏகந்தகுஸலோ. தஸ்மா பஜஹேதம் வாத³’’ந்தி பஞ்ஞபேதப்³போ³. ஸசே பஞ்ஞத்திம் ந உபக³ச்ச²தி, ‘‘க³ச்ச² பாதோவ விஹாரம் பவிஸித்வா யாகு³ம் பிவாஹீ’’தி உய்யோஜேதப்³போ³.

183. நாஹம், பி⁴க்க²வே, ஆதி³கேனேவாதி அஹம், பி⁴க்க²வே, பட²மமேவ மண்டூ³கஸ்ஸ உப்பதித்வா க³மனம் விய அஞ்ஞாராத⁴னம் அரஹத்தே பதிட்டா²னம் ந வதா³மி. அனுபுப்³ப³ஸிக்கா²தி கரணத்தே² பச்சத்தவசனம். பரதோ பத³த்³வயேபி ஏஸேவ நயோ. ஸத்³தா⁴ஜாதோதி ஓகப்பனியஸத்³தா⁴ய ஜாதஸத்³தோ⁴. உபஸங்கமதீதி க³ரூனம் ஸமீபம் க³ச்ச²தி. பயிருபாஸதீதி ஸந்திகே நிஸீத³தி. தா⁴ரேதீதி ஸாது⁴கம் கத்வா தா⁴ரேதி. ச²ந்தோ³ ஜாயதீதி கத்துகம்யதாகுஸலச்ச²ந்தோ³ ஜாயதி. உஸ்ஸஹதீதி வீரியம் கரோதி. துலேதீதி அனிச்சம் து³க்க²ம் அனத்தாதி துலயதி. துலயித்வா பத³ஹதீதி ஏவம் தீரணவிபஸ்ஸனாய துலயந்தோ மக்³க³பதா⁴னம் பத³ஹதி. பஹிதத்தோதி பேஸிதசித்தோ. காயேன சேவ பரமஸச்சந்தி நாமகாயேன நிப்³பா³னஸச்சம் ஸச்சி²கரோதி. பஞ்ஞாய சாதி நாமகாயஸம்பயுத்தாய மக்³க³பஞ்ஞாய படிவிஜ்ஜ²தி பஸ்ஸதி.

இதா³னி யஸ்மா தே ஸத்து² ஆக³மனம் ஸுத்வா பச்சுக்³க³மனமத்தம்பி ந அகம்ஸு, தஸ்மா தேஸம் சரியம் க³ரஹந்தோ ஸாபி நாம, பி⁴க்க²வே, ஸத்³தா⁴ நாஹோஸீதிஆதி³மாஹ. தத்த² கீவதூ³ரேவிமேதி கித்தகம் தூ³ரே டா²னே. யோஜனஸதம்பி யோஜனஸஹஸ்ஸம்பி அபக்கந்தாதி வத்தும் வட்டதி, ந பன கிஞ்சி ஆஹ. சதுப்பத³ம் வேய்யாகரணந்தி சதுஸச்சப்³யாகரணம் ஸந்தா⁴ய வுத்தம்.

184. யஸ்ஸுத்³தி³ட்ட²ஸ்ஸாதி யஸ்ஸ உத்³தி³ட்ட²ஸ்ஸ. யோபி ஸோ, பி⁴க்க²வே, ஸத்தா²தி பா³ஹிரகஸத்தா²ரம் த³ஸ்ஸேதி. ஏவரூபீதி ஏவம்ஜாதிகா. பணோபணவியாதி பணவியா ச ஓபணவியா ச. ந உபேதீதி ந ஹோதி. கயவிக்கயகாலே விய அக்³க⁴வட்³ட⁴னஹாபனம் ந ஹோதீதி அத்தோ². அயம் கோ³ணோ கிம் அக்³க⁴தி, வீஸதி அக்³க⁴தீதி ப⁴ணந்தோ பணதி நாம. ந வீஸதி அக்³க⁴தி, த³ஸ அக்³க⁴தீதி ப⁴ணந்தோ ஓபணதி நாம. இத³ம் படிஸேதே⁴ந்தோ ஆஹ ‘‘பணோபணவியா ந உபேதீ’’தி. இதா³னி தம் பணோபணவியம் த³ஸ்ஸேதும் ஏவஞ்ச நோ அஸ்ஸ, அத² நம் கரேய்யாம, ந ச நோ ஏவமஸ்ஸ, ந நம் கரேய்யாமாதி ஆஹ.

கிம் பன, பி⁴க்க²வேதி, பி⁴க்க²வே, யம் ததா²க³தோ ஸப்³ப³ஸோ ஆமிஸேஹி விஸம்ஸட்டோ² விஹரதி, ஏவம் விஸம்ஸட்ட²ஸ்ஸ ஸத்து²னோ ஏவரூபா பணோபணவியா கிம் யுஜ்ஜிஸ்ஸதி? பரியோகா³ஹிய வத்ததோதி பரியோகா³ஹித்வா உக்கி²பித்வா க³ஹேத்வா வத்தந்தஸ்ஸ. அயமனுத⁴ம்மோதி அயம் ஸபா⁴வோ. ஜானாதி ப⁴க³வா, நாஹம் ஜானாமீதி ப⁴க³வா ஏகாஸனபோ⁴ஜனே ஆனிஸம்ஸம் ஜானாதி, அஹம் ந ஜானாமீதி மயி ஸத்³தா⁴ய தி³வஸஸ்ஸ தயோ வாரே போ⁴ஜனம் பஹாய ஏகாஸனபோ⁴ஜனம் பு⁴ஞ்ஜதி. ருளஹனீயந்தி ரோஹனீயம். ஓஜவந்தந்தி ஸினேஹவந்தம். காமம் தசோ சாதி இமினா சதுரங்க³வீரியம் த³ஸ்ஸேதி. ஏத்த² ஹி தசோ ஏகம் அங்க³ம், ந்ஹாரு ஏகம், அட்டி² ஏகம், மம்ஸலோஹிதம் ஏகந்தி ஏவம் சதுரங்க³ஸமன்னாக³தம் வீரியம் அதி⁴ட்ட²ஹித்வா அரஹத்தம் அப்பத்வா ந வுட்ட²ஹிஸ்ஸாமீதி ஏவம் படிபஜ்ஜதீதி த³ஸ்ஸேதி. ஸேஸம் ஸப்³ப³த்த² உத்தானமேவ. தே³ஸனம் பன ப⁴க³வா நேய்யபுக்³க³லஸ்ஸ வஸேன அரஹத்தனிகூடேன நிட்டா²பேஸீதி.

பபஞ்சஸூத³னியா மஜ்ஜி²மனிகாயட்ட²கதா²ய

கீடாகி³ரிஸுத்தவண்ணனா நிட்டி²தா.

து³தியவக்³க³வண்ணனா நிட்டி²தா.