8. நளகபானஸுத்தவண்ணனா

166. ஏவம் மே ஸுதந்தி நளகபானஸுத்தம். தத்த² நளகபானேதி ஏவம்னாமகே கா³மே. புப்³பே³ கிர அம்ஹாகம் போ³தி⁴ஸத்தோ வானரயோனியம் நிப்³ப³த்தோ, மஹாகாயோ கபிராஜா அனேகவானரஸஹஸ்ஸபரிவுதோ பப்³ப³தபாதே³ விசரதி. பஞ்ஞவா கோ² பன ஹோதி மஹாபுஞ்ஞோ. ஸோ பரிஸம் ஏவம் ஓவத³தி – ‘‘இமஸ்மிம் பப்³ப³தபாதே³ தாதா, விஸப²லானி நாம ஹோந்தி, அமனுஸ்ஸபரிக்³க³ஹிதா போக்க²ரணியோ நாம ஹோந்தி, தும்ஹே புப்³பே³ கா²தி³தபுப்³பா³னேவ ப²லானி கா²த³த², பீதபுப்³பா³னேவ பானீயானி ச பிவத², ஏத்த² வோ மம் படிபுச்சி²தப்³ப³கிச்சம் நத்தி², அகா²தி³தபுப்³பா³னி பன ப²லானி அபீதபுப்³பா³னி ச பானீயானி மம் அபுச்சி²த்வா மா கா²தி³த்த² மா பிவித்தா²’’தி.

தே ஏகதி³வஸம் சரமானா அஞ்ஞம் பப்³ப³தபாத³ம் க³ந்த்வா கோ³சரம் க³ஹேத்வா பானீயம் ஓலோகேந்தா ஏகம் அமனுஸ்ஸபரிக்³க³ஹிதம் போக்க²ரணிம் தி³ஸ்வா ஸஹஸா அபிவித்வா ஸமந்தா பரிவாரேத்வா மஹாஸத்தஸ்ஸ ஆக³மனம் ஓலோகயமானா நிஸீதி³ம்ஸு. மஹாஸத்தோ ஆக³ந்த்வா ‘‘கிம் தாதா பானீயம் ந பிவதா²’’தி ஆஹ. தும்ஹாகம் ஆக³மனம் ஓலோகேமாதி. ஸாது⁴ தாதாதி ஸமந்தா பத³ம் பரியேஸமானோ ஓதிண்ணபத³ம்யேவ அத்³த³ஸ, ந உத்திண்ணபத³ம், தி³ஸ்வா ஸபரிஸ்ஸயாதி அஞ்ஞாஸி. தாவதே³வ ச தத்த² அபி⁴னிப்³ப³த்தஅமனுஸ்ஸோ உத³கம் த்³வேதா⁴ கத்வா உட்டா²ஸி ஸேதமுகோ² நீலகுச்சி² ரத்தஹத்த²பாதோ³ மஹாதா³டி²கோ வங்கதா³டோ² விரூபோ பீ³ப⁴ச்சோ² உத³கரக்க²ஸோ. ஸோ ஏவமாஹ – ‘‘கஸ்மா பானீயம் ந பிவத², மது⁴ரம் உத³கம் பிவத², கிம் தும்ஹே ஏதஸ்ஸ வசனம் ஸுணாதா²’’தி? மஹாஸத்தோ ஆஹ – ‘‘த்வம் இத⁴ அதி⁴வத்தோ² அமனுஸ்ஸோ’’தி? ஆமாஹந்தி. த்வம் இத⁴ ஓதிண்ணே லப⁴ஸீதி? ஆம லபா⁴மி, தும்ஹே பன ஸப்³பே³ கா²தி³ஸ்ஸாமீதி. ந ஸக்கி²ஸ்ஸஸி, யக்கா²தி. பானீயம் பன பிவிஸ்ஸதா²தி? ஆம பிவிஸ்ஸாமாதி. ஏவம் ஸந்தே ஏகோபி வோ ந முச்சிஸ்ஸதீதி. பானீயஞ்ச பிவிஸ்ஸாம, ந ச தே வஸம் க³மிஸ்ஸாமாதி ஏகனளம் ஆஹராபேத்வா கோடியம் க³ஹேத்வா த⁴மி, ஸப்³போ³ ஏகச்சி²த்³தோ³ அஹோஸி, தீரே நிஸீதி³த்வாவ பானீயம் பிவி, ஸேஸவானரானம் பாடியேக்கே நளே ஆஹராபேத்வா த⁴மித்வா அதா³ஸி. ஸப்³பே³ யக்க²ஸ்ஸ பஸ்ஸந்தஸ்ஸேவ பானீயம் பிவிம்ஸு. வுத்தம்பி சேதம் –

‘‘தி³ஸ்வா பத³மனுத்திண்ணம், தி³ஸ்வானோ’ தரிதம் பத³ம்;

நளேன வாரிம் பிஸ்ஸாம, நேவ மம் த்வம் வதி⁴ஸ்ஸஸீ’’தி. (ஜா. 1.1.20);

ததோ பட்டா²ய யாவ அஜ்ஜதி³வஸா தஸ்மிம் டா²னே நளா ஏகச்சி²த்³தா³வ ஹோந்தி. இமினா ஹி ஸத்³தி⁴ம் இமஸ்மிம் கப்பே சத்தாரி கப்பட்டி²யபாடிஹாரியானி நாம – சந்தே³ ஸஸபி³ம்ப³ம், வட்டகஜாதகம்ஹி ஸச்சகிரியட்டா²னே அக்³கி³ஸ்ஸ க³மனுபச்சே²தோ³, க⁴டிகாரகும்ப⁴காரஸ்ஸ மாதாபிதூனம் வஸனட்டா²னே தே³வஸ்ஸ அவஸ்ஸனம், தஸ்ஸா போக்க²ரணியா தீரே நளானம் ஏகச்சி²த்³த³பா⁴வோதி. இதி ஸா போக்க²ரணீ நளேன பானீயஸ்ஸ பீதத்தா நளகபானாதி நாமம் லபி⁴. அபரபா⁴கே³ தம் போக்க²ரணிம் நிஸ்ஸாய கா³மோ பதிட்டா²ஸி, தஸ்ஸாபி நளகபானந்தேவ நாமம் ஜாதம். தம் ஸந்தா⁴ய வுத்தம் ‘‘நளகபானே’’தி. பலாஸவனேதி கிம்ஸுகவனே.

167. தக்³க⁴ மயம், ப⁴ந்தேதி ஏகம்ஸேனேவ மயம், ப⁴ந்தே, அபி⁴ரதா. அஞ்ஞேபி யே தும்ஹாகம் ஸாஸனே அபி⁴ரமந்தி, தே அம்ஹேஹி ஸதி³ஸாவ ஹுத்வா அபி⁴ரமந்தீதி தீ³பேந்தி.

நேவ ராஜாபி⁴னீதாதிஆதீ³ஸு ஏகோ ரஞ்ஞோ அபராத⁴ம் கத்வா பலாயதி. ராஜா குஹிம், போ⁴, அஸுகோதி? பலாதோ தே³வாதி. பலாதட்டா²னேபி மே ந முச்சிஸ்ஸதி, ஸசே பன பப்³ப³ஜேய்ய, முச்சேய்யாதி வத³தி. தஸ்ஸ கோசிதே³வ ஸுஹதோ³ க³ந்த்வா தம் பவத்திம் ஆரோசேத்வா த்வம் ஸசே ஜீவிதுமிச்ச²ஸி, பப்³ப³ஜாஹீதி. ஸோ பப்³ப³ஜித்வா ஜீவிதம் ரக்க²மானோ சரதி. அயம் ராஜாபி⁴னீதோ நாம.

ஏகோ பன சோரானம் மூலம் சி²ந்த³ந்தோ சரதி. சோரா ஸுத்வா ‘‘புரிஸானம் அத்தி²கபா⁴வம் ந ஜானாதி, ஜானாபேஸ்ஸாம ந’’ந்தி வத³ந்தி. ஸோ தம் பவத்திம் ஸுத்வா பலாயதி. சோரா பலாதோதி ஸுத்வா ‘‘பலாதட்டா²னேபி நோ ந முச்சிஸ்ஸதி, ஸசே பன பப்³ப³ஜேய்ய, முச்சேய்யா’’தி வத³ந்தி. ஸோ தம் பவத்திம் ஸுத்வா பப்³ப³ஜதி. அயம் சோராபி⁴னீதோ நாம.

ஏகோ பன ப³ஹும் இணம் கா²தி³த்வா தேன இணேன அட்டோ பீளிதோ தம்ஹா கா³மா பலாயதி. இணஸாமிகா ஸுத்வா ‘‘பலாதட்டா²னேபி நோ ந முச்சிஸ்ஸதி, ஸசே பன பப்³ப³ஜேய்ய, முச்சேய்யா’’தி வத³ந்தி. ஸோ தம் பவத்திம் ஸுத்வா பப்³ப³ஜதி. அயம் இணட்டோ நாம.

ராஜப⁴யாதீ³னம் பன அஞ்ஞதரேன ப⁴யேன பீ⁴தோ அட்டோ ஆதுரோ ஹுத்வா நிக்க²ம்ம பப்³ப³ஜிதோ ப⁴யட்டோ நாம. து³ப்³பி⁴க்கா²தீ³ஸு ஜீவிதும் அஸக்கோந்தோ பப்³ப³ஜிதோ ஆஜீவிகாபகதோ நாம, ஆஜீவிகாய பகதோ அபி⁴பூ⁴தோதி அத்தோ². இமேஸு பன ஏகோபி இமேஹி காரணேஹி பப்³ப³ஜிதோ நாம நத்தி², தஸ்மா ‘‘நேவ ராஜாபி⁴னீதோ’’திஆதி³மாஹ.

விவேகந்தி விவிச்ச விவித்தோ ஹுத்வா. இத³ம் வுத்தம் ஹோதி – யம் காமேஹி ச அகுஸலத⁴ம்மேஹி ச விவித்தேன பட²மது³தியஜ்ஜா²னஸங்கா²தம் பீதிஸுக²ம் அதி⁴க³ந்தப்³ப³ம், ஸசே தம் விவிச்ச காமேஹி விவிச்ச அகுஸலேஹி த⁴ம்மேஹி பீதிஸுக²ம் நாதி⁴க³ச்ச²தி, அஞ்ஞம் வா உபரி த்³வின்னம் ஜா²னானம் சதுன்னஞ்ச மக்³கா³னம் வஸேன ஸந்ததரம் ஸுக²ம் நாதி⁴க³ச்ச²தி, தஸ்ஸ இமே அபி⁴ஜ்ஜா²த³யோ சித்தம் பரியாதா³ய திட்ட²ந்தீதி. தத்த² அரதீதி அதி⁴குஸலேஸு த⁴ம்மேஸு உக்கண்டி²ததா. தந்தீ³தி ஆலஸியபா⁴வோ. ஏவம் யோ பப்³ப³ஜித்வா பப்³ப³ஜிதகிச்சம் காதும் ந ஸக்கோதி, தஸ்ஸ இமே ஸத்த பாபத⁴ம்மா உப்பஜ்ஜித்வா சித்தம் பரியாதி³யந்தீதி த³ஸ்ஸேத்வா இதா³னி யஸ்ஸ தே த⁴ம்மா சித்தம் பரியாதா³ய திட்ட²ந்தி, ஸோயேவ ஸமணகிச்சம்பி காதும் ந ஸக்கோதீதி புன விவேகம் அனுருத்³தா⁴…பே… அஞ்ஞம் வா ததோ ஸந்ததரந்தி ஆஹ.

ஏவம் கண்ஹபக்க²ம் த³ஸ்ஸேத்வா இதா³னி தேனேவ நயேன ஸுக்கபக்க²ம் த³ஸ்ஸேதும் புன விவேகந்திஆதி³மாஹ. தஸ்ஸத்தோ² வுத்தனயேனேவ வேதி³தப்³போ³.

168. ஸங்கா²யாதி ஜானித்வா. ஏகந்தி ஏகச்சம். படிஸேவதீதி ஸேவிதப்³ப³யுத்தகம் ஸேவதி. ஸேஸபதே³ஸுபி ஏஸேவ நயோ. உபபத்தீஸு ப்³யாகரோதீதி ஸப்படிஸந்தி⁴கே தாவ ப்³யாகரோது, அப்படிஸந்தி⁴கே கத²ம் ப்³யாகரோதீதி. அப்படிஸந்தி⁴கஸ்ஸ புன ப⁴வே படிஸந்தி⁴ நத்தீ²தி வத³ந்தோ உபபத்தீஸு ப்³யாகரோதி நாம.

ஜனகுஹனத்த²ந்தி ஜனவிம்ஹாபனத்த²ம். ஜனலபனத்த²ந்தி மஹாஜனஸ்ஸ உபலாபனத்த²ம். ந இதி மம் ஜனோ ஜானாதூதி ஏவம் மம் மஹாஜனோ ஜானிஸ்ஸதி, ஏவம் மே மஹாஜனஸ்ஸ அந்தரே கித்திஸத்³தோ³ உக்³க³ச்சி²ஸ்ஸதீதி இமினாபி காரணேன ந ப்³யாகரோதீதி அத்தோ². உளாரவேதா³தி மஹந்ததுட்டி²னோ.

169. ஸோ கோ² பனஸ்ஸ ஆயஸ்மாதி ஸோ பரினிப்³பு³தோ ஆயஸ்மா இமஸ்ஸ டி²தஸ்ஸ ஆயஸ்மதோ. ஏவம்ஸீலோதிஆதீ³ஸு லோகியலோகுத்தரமிஸ்ஸகாவ ஸீலாத³யோ வேதி³தப்³போ³. ஏவம்த⁴ம்மோதி ஏத்த² பன ஸமாதி⁴பக்கி²கா த⁴ம்மா த⁴ம்மாதி அதி⁴ப்பேதா. பா²ஸுவிஹாரோ ஹோதீதி தேன பி⁴க்கு²னா பூரிதபடிபத்திம் பூரேந்தஸ்ஸ அரஹத்தப²லம் ஸச்சி²கத்வா ப²லஸமாபத்திவிஹாரேன பா²ஸுவிஹாரோ ஹோதி, அரஹத்தம் பத்துமஸக்கோந்தஸ்ஸ படிபத்திம் பூரயமானஸ்ஸ சரதோபி பா²ஸுவிஹாரோயேவ நாம ஹோதி. இமினா நயேன ஸப்³ப³வாரேஸு அத்தோ² வேதி³தப்³போ³தி.

பபஞ்சஸூத³னியா மஜ்ஜி²மனிகாயட்ட²கதா²ய

நளகபானஸுத்தவண்ணனா நிட்டி²தா.