7. சாதுமஸுத்தவண்ணனா

157. ஏவம் மே ஸுதந்தி சாதுமஸுத்தம். தத்த² சாதுமாயந்தி ஏவம்னாமகே கா³மே. பஞ்சமத்தானி பி⁴க்கு²ஸதானீதி அது⁴னா பப்³ப³ஜிதானம் பி⁴க்கூ²னம் பஞ்ச ஸதானி. தே²ரா கிர சிந்தேஸும் – ‘‘இமே குலபுத்தா த³ஸப³லம் அதி³ஸ்வாவ பப்³ப³ஜிதா, ஏதேஸம் ப⁴க³வந்தம் த³ஸ்ஸேஸ்ஸாம, ப⁴க³வதோ ஸந்திகே த⁴ம்மம் ஸுத்வா அத்தனோ அத்தனோ யதா²உபனிஸ்ஸயேன பதிட்ட²ஹிஸ்ஸந்தீ’’தி. தஸ்மா தே பி⁴க்கூ² க³ஹேத்வா ஆக³தா. படிஸம்மோத³மானாதி ‘‘கச்சாவுஸோ, க²மனீய’’ந்திஆதி³ம் படிஸந்தா²ரகத²ம் குருமானா. ஸேனாஸனானி பஞ்ஞாபயமானாதி அத்தனோ அத்தனோ ஆசரியுபஜ்ஜா²யானம் வஸனட்டா²னானி புச்சி²த்வா த்³வாரவாதபானானி விவரித்வா மஞ்சபீட²கடஸாரகாதீ³னி நீஹரித்வா பப்போ²டேத்வா யதா²ட்டா²னே ஸண்டா²பயமானா. பத்தசீவரானி படிஸாமயமானாதி, ப⁴ந்தே, இத³ம் மே பத்தம் ட²பேத², இத³ம் சீவரம், இத³ம் தா²லகம், இத³ம் உத³கதும்ப³ம், இமம் கத்தரயட்டி²ந்தி ஏவம் ஸமணபரிக்கா²ரே ஸங்கோ³பயமானா.

உச்சாஸத்³தா³ மஹாஸத்³தா³தி உத்³த⁴ம் உக்³க³தத்தா உச்சம், பத்த²டத்தா மஹந்தம் அவினிப்³போ⁴க³ஸத்³த³ம் கரோந்தா. கேவட்டா மஞ்ஞே மச்ச²விலோபேதி கேவட்டானம் மச்ச²பச்சி²ட²பிதட்டா²னே மஹாஜனோ ஸன்னிபதித்வா – ‘‘இத⁴ அஞ்ஞம் ஏகம் மச்ச²ம் தே³ஹி, ஏகம் மச்ச²பா²லம் தே³ஹி, ஏதஸ்ஸ தே மஹா தி³ன்னோ, மய்ஹம் கு²த்³த³கோ’’தி ஏவம் உச்சாஸத்³த³ம் மஹாஸத்³த³ம் கரோந்தி. தம் ஸந்தா⁴யேதம் வுத்தம். மச்ச²க³ஹணத்த²ம் ஜாலே பக்கி²த்தேபி தஸ்மிம் டா²னே கேவட்டா சேவ அஞ்ஞே ச ‘‘பவிட்டோ² ந பவிட்டோ², க³ஹிதோ ந க³ஹிதோ’’தி மஹாஸத்³த³ம் கரோந்தி. தம்பி ஸந்தா⁴யேதம் வுத்தம். பணாமேமீதி நீஹராமி. ந வோ மம ஸந்திகே வத்த²ப்³ப³ந்தி தும்ஹே மாதி³ஸஸ்ஸ பு³த்³த⁴ஸ்ஸ வஸனட்டா²னம் ஆக³ந்த்வா ஏவம் மஹாஸத்³த³ம் கரோத², அத்தனோ த⁴ம்மதாய வஸந்தா கிம் நாம ஸாருப்பம் கரிஸ்ஸத², தும்ஹாதி³ஸானம் மம ஸந்திகே வஸனகிச்சம் நத்தீ²தி தீ³பேதி. தேஸு ஏகபி⁴க்கு²பி ‘‘ப⁴க³வா தும்ஹே மஹாஸத்³த³மத்தகேன அம்ஹே பணாமேதா²’’தி வா அஞ்ஞம் வா கிஞ்சி வத்தும் நாஸக்கி², ஸப்³பே³ ப⁴க³வதோ வசனம் ஸம்படிச்ச²ந்தா ‘‘ஏவம், ப⁴ந்தே,’’தி வத்வா நிக்க²மிம்ஸு. ஏவம் பன தேஸம் அஹோஸி ‘‘மயம் ஸத்தா²ரம் பஸ்ஸிஸ்ஸாம, த⁴ம்மகத²ம் ஸோஸ்ஸாம, ஸத்து² ஸந்திகே வஸிஸ்ஸாமாதி ஆக³தா. ஏவரூபஸ்ஸ பன க³ருனோ ஸத்து² ஸந்திகம் ஆக³ந்த்வா மஹாஸத்³த³ம் கரிம்ஹா, அம்ஹாகமேவ தோ³ஸோயம், பணாமிதம்ஹா, ந நோ லத்³த⁴ம் ப⁴க³வதோ ஸந்திகே வத்து²ம், ந ஸுவண்ணவண்ணஸரீரம் ஓலோகேதும், ந மது⁴ரஸ்ஸரேன த⁴ம்மம் ஸோது’’ந்தி. தே ப³லவதோ³மனஸ்ஸஜாதா ஹுத்வா பக்கமிம்ஸு.

158. தேனுபஸங்கமிம்ஸூதி தே கிர ஸக்யா ஆக³மனஸமயேபி தே பி⁴க்கூ² தத்தே²வ நிஸின்னா பஸ்ஸிம்ஸு. அத² நேஸம் ஏதத³ஹோஸி – ‘‘கிம் நு கோ² ஏதே பி⁴க்கூ² பவிஸித்வாவ படினிவத்தா, ஜானிஸ்ஸாம தம் காரண’’ந்தி சிந்தேத்வா யேன தே பி⁴க்கூ² தேனுபஸங்கமிம்ஸு. ஹந்தா³தி வவஸ்ஸக்³க³த்தே² நிபாதோ. கஹம் பன தும்ஹேதி தும்ஹே இதா³னேவ ஆக³ந்த்வா கஹம் க³ச்ச²த², கிம் தும்ஹாகம் கோசி உபத்³த³வோ, உதா³ஹு த³ஸப³லஸ்ஸாதி? தேஸம் பன பி⁴க்கூ²னம், – ‘‘ஆவுஸோ, மயம் ப⁴க³வந்தம் த³ஸ்ஸனாய ஆக³தா, தி³ட்டோ² நோ ப⁴க³வா, இதா³னி அத்தனோ வஸனட்டா²னம் க³ச்சா²மா’’தி கிஞ்சாபி ஏவம் வசனபரிஹாரோ அத்தி², ஏவரூபம் பன லேஸகப்பம் அகத்வா யதா²பூ⁴தமேவ ஆரோசேத்வா ப⁴க³வதா கோ², ஆவுஸோ, பி⁴க்கு²ஸங்கோ⁴ பணாமிதோதி ஆஹம்ஸு. தே பன ராஜானோ ஸாஸனே து⁴ரவஹா, தஸ்மா சிந்தேஸும் – ‘‘த்³வீஹி அக்³க³ஸாவகேஹி ஸத்³தி⁴ம் பஞ்சஸு பி⁴க்கு²ஸதேஸு க³ச்ச²ந்தேஸு ப⁴க³வதோ பாத³மூலம் விக³ச்சி²ஸ்ஸதி, இமேஸம் நிவத்தனாகாரம் கரிஸ்ஸாமா’’தி. ஏவம் சிந்தேத்வா தேன ஹாயஸ்மந்தோதிஆதி³மாஹம்ஸு. தேஸுபி பி⁴க்கூ²ஸு ‘‘மயம் மஹாஸத்³த³மத்தகேன பணாமிதா, ந மயம் ஜீவிதும் அஸக்கோந்தா பப்³ப³ஜிதா’’தி ஏகபி⁴க்கு²பி படிப்ப²ரிதோ நாம நாஹோஸி, ஸப்³பே³ பன ஸமகம்யேவ, ‘‘ஏவமாவுஸோ,’’தி ஸம்படிச்சி²ம்ஸு.

159. அபி⁴னந்த³தூதி பி⁴க்கு²ஸங்க⁴ஸ்ஸ ஆக³மனம் இச்ச²ந்தோ அபி⁴னந்த³து. அபி⁴வத³தூதி ஏது பி⁴க்கு²ஸங்கோ⁴தி ஏவம் சித்தம் உப்பாதே³ந்தோ அபி⁴வத³து. அனுக்³க³ஹிதோதி ஆமிஸானுக்³க³ஹேன ச த⁴ம்மானுக்³க³ஹேன ச அனுக்³க³ஹிதோ. அஞ்ஞத²த்தந்தி த³ஸப³லஸ்ஸ த³ஸ்ஸனம் ந லபா⁴மாதி பஸாத³ஞ்ஞத²த்தம் ப⁴வேய்ய. விபரிணாமோதி பஸாத³ஞ்ஞத²த்தேன விப்³ப⁴மந்தானம் விபரிணாமஞ்ஞத²த்தம் ப⁴வேய்ய. பீ³ஜானம் தருணானந்தி தருணஸஸ்ஸானம். ஸியா அஞ்ஞத²த்தந்தி உத³கவாரகாலே உத³கம் அலப⁴ந்தானம் மிலாதபா⁴வேன அஞ்ஞத²த்தம் ப⁴வேய்ய, ஸுஸ்ஸித்வா மிலாதபா⁴வம் ஆபஜ்ஜனேன விபரிணாமோ ப⁴வேய்ய. வச்ச²கஸ்ஸ பன கீ²ரபிபாஸாய ஸுஸ்ஸனம் அஞ்ஞத²த்தம் நாம, ஸுஸ்ஸித்வா காலகிரியா விபரிணாமோ நாம.

160. பஸாதி³தோ ப⁴க³வாதி தே²ரோ கிர தத்த² நிஸின்னோவ தி³ப்³ப³சக்கு²னா ப்³ரஹ்மானம் ஆக³தம் அத்³த³ஸ, தி³ப்³பா³ய ஸோததா⁴துயா ச ஆயாசனஸத்³த³ம் ஸுணி, சேதோபரியஞாணேன ப⁴க³வதோ பஸன்னபா⁴வம் அஞ்ஞாஸி. தஸ்மா – ‘‘கஞ்சி பி⁴க்கு²ம் பேஸேத்வா பக்கோஸியமானானம் க³மனம் நாம ந பா²ஸுகம், யாவ ஸத்தா² ந பேஸேதி, தாவதே³வ க³மிஸ்ஸாமா’’தி மஞ்ஞமானோ ஏவமாஹ. அப்போஸ்ஸுக்கோதி அஞ்ஞேஸு கிச்சேஸு அனுஸ்ஸுக்கோ ஹுத்வா. தி³ட்ட²த⁴ம்மஸுக²விஹாரந்தி ப²லஸமாபத்திவிஹாரம் அனுயுத்தோ மஞ்ஞே ப⁴க³வா விஹரிதுகாமோ, ஸோ இதா³னி யதா²ருசியா விஹரிஸ்ஸதீதி ஏவம் மே அஹோஸீதி வத³தி. மயம்பி தா³னீதி மயம் பரம் ஓவத³மானா விஹாரதோ நிக்கட்³டி⁴தா, கிம் அம்ஹாகம் பரோவாதே³ன. இதா³னி மயம்பி தி³ட்ட²த⁴ம்மஸுக²விஹாரேனேவ விஹரிஸ்ஸாமாதி தீ³பேதி. தே²ரோ இமஸ்மிம் டா²னே விரத்³தோ⁴ அத்தனோ பா⁴ரபா⁴வம் ந அஞ்ஞாஸி. அயஞ்ஹி பி⁴க்கு²ஸங்கோ⁴ த்³வின்னம்பி மஹாதே²ரானம் பா⁴ரோ, தேன நம் படிஸேதே⁴ந்தோ ப⁴க³வா ஆக³மேஹீதிஆதி³மாஹ. மஹாமோக்³க³ல்லானத்தே²ரோ பன அத்தனோ பா⁴ரபா⁴வம் அஞ்ஞாஸி. தேனஸ்ஸ ப⁴க³வா ஸாது⁴காரம் அதா³ஸி.

161. சத்தாரிமானி, பி⁴க்க²வேதி கஸ்மா ஆரபி⁴? இமஸ்மிம் ஸாஸனே சத்தாரி ப⁴யானி. யோ தானி அபீ⁴தோ ஹோதி, ஸோ இமஸ்மிம் ஸாஸனே பதிட்டா²தும் ஸக்கோதி. இதரோ பன ந ஸக்கோதீதி த³ஸ்ஸேதும் இமம் தே³ஸனம் ஆரபி⁴. தத்த² உத³கோரோஹந்தேதி உத³கம் ஓரோஹந்தே புக்³க³லே. கும்பீ⁴லப⁴யந்தி ஸும்ஸுமாரப⁴யம். ஸுஸுகாப⁴யந்தி சண்ட³மச்ச²ப⁴யம்.

162. கோது⁴பாயாஸஸ்ஸேதம் அதி⁴வசனந்தி யதா² ஹி பா³ஹிரம் உத³கம் ஓதிண்ணோ ஊமீஸு ஓஸீதி³த்வா மரதி, ஏவம் இமஸ்மிம் ஸாஸனே கோது⁴பாயாஸே ஓஸீதி³த்வா விப்³ப⁴மதி. தஸ்மா கோது⁴பாயாஸோ ‘‘ஊமிப⁴ய’’ந்தி வுத்தோ.

163. ஓத³ரிகத்தஸ்ஸேதம் அதி⁴வசனந்தி யதா² ஹி பா³ஹிரம் உத³கம் ஓதிண்ணோ கும்பீ⁴லேன கா²தி³தோ மரதி, ஏவம் இமஸ்மிம் ஸாஸனே ஓத³ரிகத்தேன கா²தி³தோ விப்³ப⁴மதி. தஸ்மா ஓத³ரிகத்தம் ‘‘கும்பீ⁴லப⁴ய’’ந்தி வுத்தம்.

164. அரக்கி²தேனேவ காயேனாதி ஸீஸப்பசாலகாதி³கரணேன அரக்கி²தகாயோ ஹுத்வா. அரக்கி²தாய வாசாயாதி து³ட்டு²ல்லபா⁴ஸனாதி³வஸேன அரக்கி²தவாசோ ஹுத்வா. அனுபட்டி²தாய ஸதியாதி காயக³தாஸதிம் அனுபட்டா²பேத்வா. அஸம்வுதேஹீதி அபிஹிதேஹி. பஞ்சன்னேதம்காமகு³ணானம் அதி⁴வசனந்தி யதா² ஹி பா³ஹிரம் உத³கம் ஓதிண்ணோ ஆவட்டே நிமுஜ்ஜித்வா மரதி, ஏவம் இமஸ்மிம் ஸாஸனே பப்³ப³ஜிதோ பஞ்சகாமகு³ணாவட்டே நிமுஜ்ஜித்வா விப்³ப⁴மதி. தஸ்மா பஞ்ச காமகு³ணா ‘‘ஆவட்டப⁴ய’’ந்தி வுத்தா.

165. அனுத்³த⁴ம்ஸேதீதி கிலமேதி மிலாபேதி. ராகா³னுத்³த⁴ம்ஸேனாதி ராகா³னுத்³த⁴ம்ஸிதேன. மாதுகா³மஸ்ஸேதம் அதி⁴வசனந்தி யதா² ஹி பா³ஹிரம் உத³கம் ஓதிண்ணோ சண்ட³மச்ச²ம் ஆக³ம்ம லத்³த⁴ப்பஹாரோ மரதி, ஏவம் இமஸ்மிம் ஸாஸனே மாதுகா³மம் ஆக³ம்ம உப்பன்னகாமராகோ³ விப்³ப⁴மதி. தஸ்மா மாதுகா³மோ ‘‘ஸுஸுகாப⁴ய’’ந்தி வுத்தோ.

இமானி பன சத்தாரி ப⁴யானி பா⁴யித்வா யதா² உத³கம் அனோரோஹந்தஸ்ஸ உத³கம் நிஸ்ஸாய ஆனிஸம்ஸோ நத்தி², உத³கபிபாஸாய பிபாஸிதோ ச ஹோதி ரஜோஜல்லேன கிலிட்ட²ஸரீரோ ச, ஏவமேவம் இமானி சத்தாரி ப⁴யானி பா⁴யித்வா ஸாஸனே அபப்³ப³ஜந்தஸ்ஸாபி இமம் ஸாஸனம் நிஸ்ஸாய ஆனிஸம்ஸோ நத்தி², தண்ஹாபிபாஸாய பிபாஸிதோ ச ஹோதி கிலேஸரஜேன ஸம்கிலிட்ட²சித்தோ ச. யதா² பன இமானி சத்தாரி ப⁴யானி அபா⁴யித்வா உத³கம் ஓரோஹந்தஸ்ஸ வுத்தப்பகாரோ ஆனிஸம்ஸோ ஹோதி, ஏவம் இமானி அபா⁴யித்வா ஸாஸனே பப்³ப³ஜிதஸ்ஸாபி வுத்தப்பகாரோ ஆனிஸம்ஸோ ஹோதி. தே²ரோ பனாஹ – ‘‘சத்தாரி ப⁴யானி பா⁴யித்வா உத³கம் அனோதரந்தோ ஸோதம் சி²ந்தி³த்வா பரதீரம் பாபுணிதும் ந ஸக்கோதி, அபா⁴யித்வா ஓதரந்தோ ஸக்கோதி, ஏவமேவம் பா⁴யித்வா ஸாஸனே அபப்³ப³ஜந்தோபி தண்ஹாஸோதம் சி²ந்தி³த்வா நிப்³பா³னபாரம் த³ட்டு²ம் ந ஸக்கோதி, அபா⁴யித்வா பப்³ப³ஜந்தோ பன ஸக்கோதீ’’தி. ஸேஸம் ஸப்³ப³த்த² உத்தானமேவ. அயம் பன தே³ஸனா நேய்யபுக்³க³லஸ்ஸ வஸேன நிட்டா²பிதாதி.

பபஞ்சஸூத³னியா மஜ்ஜி²மனிகாயட்ட²கதா²ய

சாதுமஸுத்தவண்ணனா நிட்டி²தா.