1. அம்ப³லட்டி²கராஹுலோவாத³ஸுத்தவண்ணனா

107. ஏவம் மே ஸுதந்தி அம்ப³லட்டி²கராஹுலோவாத³ஸுத்தம். தத்த² அம்ப³லட்டி²காயம் விஹரதீதி வேளுவனவிஹாரஸ்ஸ பச்சந்தே பதா⁴னக⁴ரஸங்கே²பே விவேககாமானம் வஸனத்தா²ய கதே அம்ப³லட்டி²காதி ஏவம்னாமகே பாஸாதே³ பவிவேகம் ப்³ரூஹயந்தோ விஹரதி. கண்டகோ நாம ஜாதகாலதோ பட்டா²ய திகி²ணோவ ஹோதி, ஏவமேவம் அயம்பி ஆயஸ்மா ஸத்தவஸ்ஸிகஸாமணேரகாலேயேவ பவிவேகம் ப்³ரூஹயமானோ தத்த² விஹாஸி. படிஸல்லானா வுட்டி²தோதி ப²லஸமாபத்திதோ வுட்டா²ய. ஆஸனந்தி பகதிபஞ்ஞத்தமேவேத்த² ஆஸனம் அத்தி², தம் பப்போ²டேத்வா ட²பேஸி. உத³காதா⁴னேதி உத³கபா⁴ஜனே. ‘‘உத³கட்டா²னே’’திபி பாடோ².

ஆயஸ்மந்தம் ராஹுலம் ஆமந்தேஸீதி ஓவாத³தா³னத்த²ம் ஆமந்தேஸி. ப⁴க³வதா ஹி ராஹுலத்தே²ரஸ்ஸ ஸம்ப³ஹுலா த⁴ம்மதே³ஸனா கதா. ஸாமணேரபஞ்ஹம் தே²ரஸ்ஸேவ வுத்தம். ததா² ராஹுலஸம்யுத்தம் மஹாராஹுலோவாத³ஸுத்தம் சூளராஹுலோவாத³ஸுத்தமித³ம் அம்ப³லட்டி²கராஹுலோவாத³ஸுத்தந்தி.

அயஞ்ஹி ஆயஸ்மா ஸத்தவஸ்ஸிககாலே ப⁴க³வந்தம் சீவரகண்ணே க³ஹேத்வா ‘‘தா³யஜ்ஜம் மே ஸமண தே³ஹீ’’தி தா³யஜ்ஜம் யாசமானோ ப⁴க³வதா த⁴ம்மஸேனாபதிஸாரிபுத்தத்தே²ரஸ்ஸ நிய்யாதே³த்வா பப்³பா³ஜிதோ. அத² ப⁴க³வா த³ஹரகுமாரா நாம யுத்தாயுத்தம் கத²ம் கதே²ந்தி, ஓவாத³மஸ்ஸ தே³மீதி ராஹுலகுமாரம் ஆமந்தேத்வா ‘‘ஸாமணேரேன நாம, ராஹுல, திரச்சா²னகத²ம் கதே²தும் ந வட்டதி, த்வம் கத²யமானோ ஏவரூபம் கத²ம் கதே²ய்யாஸீ’’தி ஸப்³ப³பு³த்³தே⁴ஹி அவிஜஹிதம் த³ஸபுச்ச²ம் பஞ்சபண்ணாஸவிஸ்ஸஜ்ஜனம் – ‘‘ஏகோ பஞ்ஹோ ஏகோ உத்³தே³ஸோ ஏகம் வேய்யாகரணம் த்³வே பஞ்ஹா…பே… த³ஸ பஞ்ஹா த³ஸ உத்³தே³ஸா த³ஸ வேய்யாகரணாதி. ஏகம் நாம கிம்? ஸப்³பே³ ஸத்தா ஆஹாரட்டி²திகா…பே… த³ஸ நாம கிம்? த³ஸஹங்கே³ஹி ஸமன்னாக³தோ அரஹாதி வுச்சதீ’’தி (கு². பா. 4.10) இமம் ஸாமணேரபஞ்ஹம் கதே²ஸி. புன சிந்தேஸி ‘‘த³ஹரகுமாரா நாம பியமுஸாவாதா³ ஹோந்தி, அதி³ட்ட²மேவ தி³ட்ட²ம் அம்ஹேஹி, தி³ட்ட²மேவ ந தி³ட்ட²ம் அம்ஹேஹீதி வத³ந்தி ஓவாத³மஸ்ஸ தே³மீ’’தி அக்கீ²ஹி ஓலோகேத்வாபி ஸுக²ஸஞ்ஜானனத்த²ம் பட²மமேவ சதஸ்ஸோ உத³காதா⁴னூபமாயோ, ததோ த்³வே ஹத்தி²உபமாயோ ஏகம் ஆதா³ஸூபமஞ்ச த³ஸ்ஸேத்வா இமம் ஸுத்தம் கதே²ஸி. சதூஸு பன பச்சயேஸு தண்ஹாவிவட்டனம் பஞ்சஸு காமகு³ணேஸு ச²ந்த³ராக³ப்பஹானம் கல்யாணமித்துபனிஸ்ஸயஸ்ஸ மஹந்தபா⁴வஞ்ச த³ஸ்ஸேத்வா ராஹுலஸுத்தம் (ஸு. நி. ராஹுலஸுத்த) கதே²ஸி. ஆக³தாக³தட்டா²னே ப⁴வேஸு ச²ந்த³ராகோ³ ந கத்தப்³போ³தி த³ஸ்ஸேதும் ராஹுலஸம்யுத்தம் (ஸம். நி. 2.188 ஆத³யோ) கதே²ஸி. ‘‘அஹம் ஸோபா⁴மி, மம வண்ணாயதனம் பஸன்ன’’ந்தி அத்தபா⁴வம் நிஸ்ஸாய கே³ஹஸ்ஸிதச²ந்த³ராகோ³ ந கத்தப்³போ³தி மஹாராஹுலோவாத³ஸுத்தம் கதே²ஸி.

தத்த² ராஹுலஸுத்தம் இமஸ்மிம் நாம காலே வுத்தந்தி ந வத்தப்³ப³ம். தஞ்ஹி அபி⁴ண்ஹோவாத³வஸேன வுத்தம். ராஹுலஸம்யுத்தம் ஸத்தவஸ்ஸிககாலதோ பட்டா²ய யாவ அவஸ்ஸிகபி⁴க்கு²காலா வுத்தம். மஹாராஹுலோவாத³ஸுத்தம் அட்டா²ரஸ வஸ்ஸஸாமணேரகாலே வுத்தம். சூளராஹுலோவாத³ஸுத்தம் அவஸ்ஸிகபி⁴க்கு²காலே வுத்தம். குமாரகபஞ்ஹஞ்ச இத³ஞ்ச அம்ப³லட்டி²கராஹுலோவாத³ஸுத்தம் ஸத்தவஸ்ஸிகஸாமணேரகாலே வுத்தம். தேஸு ராஹுலஸுத்தம் அபி⁴ண்ஹோவாத³த்த²ம், ராஹுலஸம்யுத்தம், தே²ரஸ்ஸ விபஸ்ஸனாக³ப்³ப⁴க³ஹணத்த²ம், மஹாராஹுலோவாத³ம் கே³ஹஸ்ஸிதச²ந்த³ராக³வினோத³னத்த²ம், சூளராஹுலோவாத³ம் தே²ரஸ்ஸ பஞ்சத³ஸ-விமுத்திபரிபாசனீய-த⁴ம்மபரிபாககாலே அரஹத்தகா³ஹாபனத்த²ம் வுத்தம். இத³ஞ்ச பன ஸந்தா⁴ய ராஹுலத்தே²ரோ பி⁴க்கு²ஸங்க⁴மஜ்ஜே² ததா²க³தஸ்ஸ கு³ணம் கதே²ந்தோ இத³மாஹ –

‘‘கிகீவ பீ³ஜம் ரக்கே²ய்ய, சாமரீ வாலமுத்தமம்;

நிபகோ ஸீலஸம்பன்னோ, மமம் ரக்கி² ததா²க³தோ’’தி. (அப. 1.2.83);

ஸாமணேரபஞ்ஹம் அயுத்தவசனபஹானத்த²ம், இத³ம் அம்ப³லட்டி²கராஹுலோவாத³ஸுத்தம் ஸம்பஜானமுஸாவாத³ஸ்ஸ அகரணத்த²ம் வுத்தம்.

தத்த² பஸ்ஸஸி நோதி பஸ்ஸஸி நு. பரித்தந்தி தோ²கம். ஸாமஞ்ஞந்தி ஸமணத⁴ம்மோ. நிக்குஜ்ஜித்வாதி அதோ⁴முக²ம் கத்வா. உக்குஜ்ஜித்வாதி உத்தானம் கத்வா.

108. ஸேய்யதா²பி, ராஹுல, ரஞ்ஞோ நாகோ³தி அயம் உபமா ஸம்பஜானமுஸாவாதே³ ஸம்வரரஹிதஸ்ஸ ஓபம்மத³ஸ்ஸனத்த²ம் வுத்தா. தத்த² ஈஸாத³ந்தோதி ரதீ²ஸாஸதி³ஸத³ந்தோ. உருள்ஹவாதி அபி⁴வட்³டி⁴தோ ஆரோஹஸம்பன்னோ. அபி⁴ஜாதோதி ஸுஜாதோ ஜாதிஸம்பன்னோ. ஸங்கா³மாவசரோதி ஸங்கா³மம் ஓதிண்ணபுப்³போ³. கம்மம் கரோதீதி ஆக³தாக³தே பவட்டேந்தோ கா⁴தேதி. புரத்தி²மகாயாதீ³ஸு பன புரத்தி²மகாயேன தாவ படிஸேனாய ப²லககோட்ட²கமுண்ட³பாகாராத³யோ பாதேதி, ததா² பச்சி²மகாயேன. ஸீஸேன கம்மம் நாம நியமேத்வா ஏதம் பதே³ஸம் மத்³தி³ஸ்ஸாமீதி நிவத்தித்வா ஓலோகேதி, ஏத்தகேன ஸதம்பி ஸஹஸ்ஸம்பி த்³வேதா⁴ பி⁴ஜ்ஜதி. கண்ணேஹி கம்மம் நாம ஆக³தாக³தே ஸரே கண்ணேஹி பஹரித்வா பாதனம். த³ந்தேஹி கம்மம் நாம படிஹத்தி²அஸ்ஸஹத்தா²ரோஹஅஸ்ஸாரோஹபதா³தீ³னம் விஜ்ஜ²னம். நங்கு³ட்டே²ன கம்மம் நாம நங்கு³ட்டே² ப³ந்தா⁴ய தீ³கா⁴ஸிலட்டி²யா வா அயமுஸலேன வா சே²த³னபே⁴த³னம். ரக்க²தேவ ஸோண்ட³ந்தி ஸோண்ட³ம் பன முகே² பக்கி²பித்வா ரக்க²தி.

தத்தா²தி தஸ்மிம் தஸ்ஸ ஹத்தி²னோ கரணே. அபரிச்சத்தந்தி அனிஸ்ஸட்ட²ம், பரேஸம் ஜயம் அம்ஹாகஞ்ச பராஜயம் பஸ்ஸீதி மஞ்ஞதி. ஸோண்டா³யபி கம்மம் கரோதீதி அயமுக்³க³ரம் வா க²தி³ரமுஸலம் வா க³ஹேத்வா ஸமந்தா அட்டா²ரஸஹத்த²ட்டா²னம் மத்³த³தி. பரிச்சத்தந்தி விஸ்ஸட்ட²ம், இதா³னி ஹத்தி²யோதா⁴தீ³ஸு ந குதோசி பா⁴யதி, அம்ஹாகம் ஜயம் பரேஸஞ்ச பராஜயம் பஸ்ஸீதி மஞ்ஞதி. நாஹம் தஸ்ஸ கிஞ்சி பாபந்தி தஸ்ஸ து³க்கடாதி³ஆபத்திவீதிக்கமே வா மாதுகா⁴தகாதி³கம்மேஸு வா கிஞ்சி பாபம் அகத்தப்³ப³ம் நாம நத்தி². தஸ்மா திஹ தேதி யஸ்மா ஸம்பஜானமுஸாவாதி³னோ அகத்தப்³ப³ம் பாபம் நாம நத்தி², தஸ்மா தயா ஹஸாயபி த³வகம்யதாயபி முஸா ந ப⁴ணிஸ்ஸாமீதி ஸிக்கி²தப்³ப³ம். பச்சவேக்க²ணத்தோ²தி ஓலோகனத்தோ², யம் முகே² வஜ்ஜம் ஹோதி, தஸ்ஸ த³ஸ்ஸனத்தோ²தி வுத்தம் ஹோதி. பச்சவேக்கி²த்வா பச்சவேக்கி²த்வாதி ஓலோகேத்வா ஓலோகேத்வா.

109. ஸஸக்கம் ந கரணீயந்தி ஏகம்ஸேனேவ ந காதப்³ப³ம். படிஸம்ஹரேய்யாஸீதி நிவத்தேய்யாஸி மா கரேய்யாஸி. அனுபத³ஜ்ஜேய்யாஸீதி அனுபதே³ய்யாஸி உபத்த²ம்பே⁴ய்யாஸி புனப்புனம் கரேய்யாஸி. அஹோரத்தானுஸிக்கீ²தி ரத்திஞ்ச தி³வஞ்ச ஸிக்க²மானோ.

111. அட்டீயிதப்³ப³ந்தி அட்டேன பீளிதேன ப⁴விதப்³ப³ம். ஹராயிதப்³ப³ந்தி லஜ்ஜிதப்³ப³ம். ஜிகு³ச்சி²தப்³ப³ந்தி கூ³த²ம் தி³ஸ்வா விய ஜிகு³ச்சா² உப்பாதே³தப்³பா³. மனோகம்மஸ்ஸ பன அதே³ஸனாவத்து²கத்தா இத⁴ தே³ஸேதப்³ப³ந்தி ந வுத்தம். கித்தகே பன டா²னே காயகம்மவசீகம்மானி ஸோதே⁴தப்³பா³னி, கித்தகே மனோகம்மந்தி. காயகம்மவசீகம்மானி தாவ ஏகஸ்மிம் புரேப⁴த்தேயேவ ஸோதே⁴தப்³பா³னி. ப⁴த்தகிச்சம் கத்வா தி³வாட்டா²னே நிஸின்னேன ஹி பச்சவேக்கி²தப்³ப³ம் ‘‘அருணுக்³க³மனதோ பட்டா²ய யாவ இமஸ்மிம் டா²னே நிஸஜ்ஜா அத்தி² நு கோ² மே இமஸ்மிம் அந்தரே பரேஸம் அப்பியம் காயகம்மம் வா வசீகம்மம் வா’’தி. ஸசே அத்தீ²தி ஜானாதி, தே³ஸனாயுத்தம் தே³ஸேதப்³ப³ம், ஆவிகரணயுத்தம் ஆவிகாதப்³ப³ம். ஸசே நத்தி², தேனேவ பீதிபாமோஜ்ஜேன விஹாதப்³ப³ம். மனோகம்மம் பன ஏதஸ்மிம் பிண்ட³பாதபரியேஸனட்டா²னே ஸோதே⁴தப்³ப³ம். கத²ம்? ‘‘அத்தி² நு கோ² மே அஜ்ஜ பிண்ட³பாதபரியேஸனட்டா²னே ரூபாதீ³ஸு ச²ந்தோ³ வா ராகோ³ வா படிக⁴ம் வா’’தி? ஸசே அத்தி², ‘‘புன ந ஏவம் கரிஸ்ஸாமீ’’தி சித்தேனேவ அதி⁴ட்டா²தப்³ப³ம். ஸசே நத்தி², தேனேவ பீதிபாமோஜ்ஜேன விஹாதப்³ப³ம்.

112. ஸமணா வா ப்³ராஹ்மணா வாதி பு³த்³தா⁴ வா பச்சேகபு³த்³தா⁴ வா ததா²க³தஸாவகா வா. தஸ்மாதிஹாதி யஸ்மா அதீதேபி ஏவம் பரிஸோதே⁴ஸும், அனாக³தேபி பரிஸோதே⁴ஸ்ஸந்தி, ஏதரஹிபி பரிஸோதே⁴ந்தி, தஸ்மா தும்ஹேஹிபி தேஸம் அனுஸிக்க²ந்தேஹி ஏவம் ஸிக்கி²தப்³ப³ந்தி அத்தோ². ஸேஸம் ஸப்³ப³த்த² உத்தானமேவ. இமம் பன தே³ஸனம் ப⁴க³வா யாவ ப⁴வக்³கா³ உஸ்ஸிதஸ்ஸ ரதனராஸினோ யோஜனியமணிக்க²ந்தே⁴ன கூடம் க³ண்ஹந்தோ விய நேய்யபுக்³க³லவஸேன பரினிட்டா²பேஸீதி.

பபஞ்சஸூத³னியா மஜ்ஜி²மனிகாயட்ட²கதா²ய

அம்ப³லட்டி²கராஹுலோவாத³ஸுத்தவண்ணனா நிட்டி²தா.