10. மாரதஜ்ஜனீயஸுத்தவண்ணனா

506. ஏவம் மே ஸுதந்தி மாரதஜ்ஜனீயஸுத்தம். தத்த² கோட்ட²மனுபவிட்டோ²தி குச்சி²ம் பவிஸித்வா அந்தானம் அந்தோ அனுபவிட்டோ², பக்காஸயட்டா²னே நிஸின்னோ. க³ருக³ரோ வியாதி க³ருகக³ருகோ விய த²த்³தோ⁴ பாஸாணபுஞ்ஜஸதி³ஸோ. மாஸாசிதம் மஞ்ஞேதி மாஸப⁴த்தம் பு⁴த்தஸ்ஸ குச்சி² விய மாஸபூரிதபஸிப்³ப³கோ விய திந்தமாஸோ விய சாதி அத்தோ². விஹாரம் பவிஸித்வாதி ஸசே ஆஹாரதோ³ஸேன ஏஸ க³ருபா⁴வோ, அப்³போ⁴காஸே சங்கமிதும் ந ஸப்பாயந்தி சங்கமா ஓரோஹித்வா பண்ணஸாலம் பவிஸித்வா பகதிபஞ்ஞத்தே ஆஸனே நிஸீதி³. பச்சத்தம் யோனிஸோ மனஸாகாஸீதி, ‘‘கிம் நு கோ² ஏத’’ந்தி ஆவஜ்ஜமானோ அத்தனோயேவ உபாயேன மனஸி அகாஸி. ஸசே பன தே²ரோ அத்தனோ ஸீலம் ஆவஜ்ஜேத்வா, ‘‘யம் ஹிய்யோ வா பரே வா பரஸுவே வா பரிபு⁴த்தம் அவிபக்கமத்தி², அஞ்ஞோ வா கோசி விஸபா⁴க³தோ³ஸோ, ஸப்³ப³ம் ஜீரது பா²ஸுகம் ஹோதூ’’தி ஹத்தே²ன குச்சி²ம் பராமஸிஸ்ஸ, மாரோ பாபிமா விலீயித்வா அக³மிஸ்ஸ. தே²ரோ பன ததா² அகத்வா யோனிஸோ மனஸி அகாஸி. மா ததா²க³தம் விஹேஸேஸீதி யதா² ஹி புத்தேஸு விஹேஸிதேஸு மாதாபிதரோ விஹேஸிதாவ ஹோந்தி, ஸத்³தி⁴விஹாரிகஅந்தேவாஸிகேஸு விஹேஸிதேஸு ஆசரியுபஜ்ஜா²யா விஹேஸிதாவ, ஜனபதே³ விஹேஸிதே ராஜா விஹேஸிதோவ ஹோதி, ஏவம் ததா²க³தஸாவகே விஹேஸிதே ததா²க³தோ விஹேஸிதோவ ஹோதி. தேனாஹ – ‘‘மா ததா²க³தம் விஹேஸேஸீ’’தி.

பச்சக்³க³ளே அட்டா²ஸீதி பதிஅக்³க³ளேவ அட்டா²ஸி. அக்³க³ளம் வுச்சதி கவாடம், முகே²ன உக்³க³ந்த்வா பண்ணஸாலதோ நிக்க²மித்வா ப³ஹிபண்ணஸாலாய கவாடம் நிஸ்ஸாய அட்டா²ஸீதி அத்தோ².

507. பூ⁴தபுப்³பா³ஹம் பாபிமாதி கஸ்மா இத³ம் தே³ஸனம் ஆரபி⁴? தே²ரோ கிர சிந்தேஸி – ‘‘ஆகாஸட்ட²கதே³வதானம் தாவ மனுஸ்ஸக³ந்தோ⁴ யோஜனஸதே டி²தானம் ஆபா³த⁴ம் கரோதி. வுத்தஞ்ஹேதம் – ‘யோஜனஸதம் கோ² ராஜஞ்ஞ மனுஸ்ஸக³ந்தோ⁴ தே³வே உப்³பா³த⁴தீ’தி (தீ³. நி. 2.415). அயம் பன மாரோ நாக³ரிகோ பரிசோக்கோ² மஹேஸக்கோ² ஆனுபா⁴வஸம்பன்னோ தே³வராஜா ஸமானோ மம குச்சி²யம் பவிஸித்வா அந்தானம் அந்தோ பக்காஸயோகாஸே நிஸின்னோ அதிவிய பது³ட்டோ² ப⁴விஸ்ஸதி. ஏவரூபம் நாம ஜேகு³ச்ச²ம் படிகூலம் ஓகாஸம் பவிஸித்வா நிஸீதி³தும் ஸக்கோந்தஸ்ஸ கிமஞ்ஞம் அகரணீயம் ப⁴விஸ்ஸதி, கிம் அஞ்ஞம் லஜ்ஜிஸ்ஸதி, த்வம் மம ஞாதிகோதி பன வுத்தே முது³பா⁴வம் அனாபஜ்ஜமானோ நாம நத்தி², ஹந்த³ஸ்ஸ ஞாதிகோடிம் படிவிஜ்ஜி²த்வா முது³கேனேவ நம் உபாயேன விஸ்ஸஜ்ஜேஸ்ஸாமீ’’தி சிந்தேத்வா இமம் தே³ஸனமாரபி⁴.

ஸோ மே த்வம் பா⁴கி³னேய்யோ ஹோஸீதி ஸோ த்வம் தஸ்மிம் காலே மய்ஹம் பா⁴கி³னேய்யோ ஹோஸி. இத³ம் பவேணிவஸேன வுத்தம். தே³வலோகஸ்மிம் பன மாரஸ்ஸ பிது வம்ஸோ பிதாமஹஸ்ஸ வம்ஸோ ரஜ்ஜம் கரோந்தோ நாம நத்தி², புஞ்ஞவஸேன தே³வலோகே தே³வராஜா ஹுத்வா நிப்³ப³த்தோ, யாவதாயுகம் ட²த்வா சவதி. அஞ்ஞோ ஏகோ அத்தனா கதேன கம்மேன தஸ்மிம் டா²னே அதி⁴பதி ஹுத்வா நிப்³ப³த்ததி. இதி அயம் மாரோபி ததா³ ததோ சவித்வா புன குஸலம் கத்வா இமஸ்மிம் காலே தஸ்மிம் அதி⁴பதிட்டா²னே நிப்³ப³த்தோதி வேதி³தப்³போ³.

விது⁴ரோதி விக³தது⁴ரோ, அஞ்ஞேஹி ஸத்³தி⁴ம் அஸதி³ஸோதி அத்தோ². அப்பகஸிரேனாதி அப்பது³க்கே²ன. பஸுபாலகாதி அஜேளகபாலகா. பதா²வினோதி மக்³க³படிபன்னா. காயே உபசினித்வாதி ஸமந்ததோ சிதகம் ப³ந்தி⁴த்வா. அக்³கி³ம் த³த்வா பக்கமிம்ஸூதி ஏத்தகேன ஸரீரம் பரியாதா³னம் க³மிஸ்ஸதீதி சிதகஸ்ஸ பமாணம் ஸல்லக்கே²த்வா சதூஸு தி³ஸாஸு அக்³கி³ம் த³த்வா பக்கமிம்ஸு. சிதகோ பதீ³பஸிகா² விய பஜ்ஜலி, தே²ரஸ்ஸ உத³கலேணம் பவிஸித்வா நிஸின்னகாலோ விய அஹோஸி. சீவரானி பப்போ²டேத்வாதி ஸமாபத்திதோ வுட்டா²ய விக³ததூ⁴மே கிம்ஸுகவண்ணே அங்கா³ரே மத்³த³மானோ சீவரானி விது⁴னித்வா. ஸரீரே பனஸ்ஸ உஸுமமத்தம்பி நாஹோஸி, சீவரேஸு அம்ஸுமத்தம்பி நஜ்ஜா²யி, ஸமாபத்திப²லம் நாமேதம்.

508. அக்கோஸதா²தி த³ஸஹி அக்கோஸவத்தூ²ஹி அக்கோஸத². பரிபா⁴ஸதா²தி வாசாய பரிபா⁴ஸத². ரோஸேதா²தி க⁴ட்டேத². விஹேஸேதா²தி து³க்கா²பேத². ஸப்³ப³மேதம் வாசாய க⁴ட்டனஸ்ஸேவ அதி⁴வசனம். யதா² தம் தூ³ஸீ மாரோதி யதா² ஏதேஸம் தூ³ஸீ மாரோ. லபே⁴த² ஓதாரந்தி லபே⁴த² சி²த்³த³ம், கிலேஸுப்பத்தியா ஆரம்மணம் பச்சயம் லபே⁴ய்யாதி அத்தோ². முண்ட³காதிஆதீ³ஸு முண்டே³ முண்டா³தி ஸமணே ச ஸமணாதி வத்தும் வட்டேய்ய, இமே பன ஹீளேந்தா முண்ட³கா ஸமணகாதி ஆஹம்ஸு. இப்³பா⁴தி க³ஹபதிகா. கிண்ஹாதி கண்ஹா, காளகாதி அத்தோ². ப³ந்து⁴பாதா³பச்சாதி ஏத்த² ப³ந்தூ⁴தி ப்³ரஹ்மா அதி⁴ப்பேதோ. தஞ்ஹி ப்³ராஹ்மணா பிதாமஹோதி வோஹரந்தி. பாதா³னம் அபச்சா பாதா³பச்சா, ப்³ரஹ்முனோ பிட்டி²பாத³தோ ஜாதாதி அதி⁴ப்பாயோ. தேஸம் கிர அயம் லத்³தி⁴ – ‘‘ப்³ராஹ்மணா ப்³ரஹ்முனோ முக²தோ நிக்க²ந்தா, க²த்தியா உரதோ, வேஸ்ஸா நாபி⁴தோ, ஸுத்³தா³ ஜாணுதோ, ஸமணா பிட்டி²பாத³தோ’’தி.

ஜா²யினோஸ்மா ஜா²யினோஸ்மாதி ஜா²யினோ மயம் ஜா²யினோ மயந்தி. மது⁴ரகஜாதாதி ஆலஸியஜாதா. ஜா²யந்தீதி சிந்தயந்தி. பஜ்ஜா²யந்தீதிஆதீ³னி உபஸக்³க³வஸேன வட்³டி⁴தானி. மூஸிகம் மக்³க³யமானோதி ஸாயம் கோ³சரத்தா²ய ஸுஸிரருக்க²தோ நிக்க²ந்தம் ருக்க²ஸாகா²ய மூஸிகம் பரியேஸந்தோ. ஸோ கிர உபஸந்தூபஸந்தோ விய நிச்சலோவ திட்ட²தி, ஸம்பத்தகாலே மூஸிகம் ஸஹஸா க³ண்ஹாதி. கோத்தூ²தி ஸிங்கா³லோ, ஸோணோதிபி வத³ந்தி. ஸந்தி⁴ஸமலஸங்கடிரேதி ஸந்தி⁴ம்ஹி ச ஸமலே ச ஸங்கடிரே ச. தத்த² ஸந்தி⁴ நாம க⁴ரஸந்தி⁴. ஸமலோ நாம கூ³த²னித்³த⁴மனபனாளி. ஸங்கடிரம் நாம ஸங்காரட்டா²னம். வஹச்சி²ன்னோதி கந்தாரதோ நிக்க²ந்தோ சி²ன்னவஹோ. ஸந்தி⁴ஸமலஸங்கடிரேதி ஸந்தி⁴ம்ஹி வா ஸமலே வா ஸங்கடிரே வா. ஸோபி ஹி ப³த்³த⁴க³த்தோ விய நிச்சலோ ஜா²யதி.

நிரயம் உபபஜ்ஜந்தீதி ஸசே மாரோ மனுஸ்ஸானம் ஸரீரே அதி⁴முச்சித்வா ஏவம் கரேய்ய, மனுஸ்ஸானம் அகுஸலம் ந ப⁴வேய்ய, மாரஸ்ஸேவ ப⁴வேய்ய. ஸரீரே பன அனதி⁴முச்சித்வா விஸபா⁴க³வத்து²ம் விப்படிஸாராரம்மணம் த³ஸ்ஸேதி, ததா³ கிர ஸோ பி⁴க்கூ² கி²ப்பம் க³ஹேத்வா மச்சே² அஜ்ஜோ²த்த²ரந்தே விய, ஜாலம் க³ஹேத்வா மச்சே² க³ண்ஹந்தே விய, லேபயட்டி²ம் ஓட்³டே³த்வா ஸகுணே ப³ந்த⁴ந்தே விய, ஸுனகே²ஹி ஸத்³தி⁴ம் அரஞ்ஞே மிக³வம் சரந்தே விய, மாதுகா³மே க³ஹேத்வா ஆபானபூ⁴மியம் நிஸின்னே விய, நச்சந்தே விய, கா³யந்தே விய, பி⁴க்கு²னீனம் ரத்திட்டா²னதி³வாட்டா²னேஸு விஸபா⁴க³மனுஸ்ஸே நிஸின்னே விய, டி²தே விய ச கத்வா த³ஸ்ஸேஸி. மனுஸ்ஸா அரஞ்ஞக³தாபி வனக³தாபி விஹாரக³தாபி விப்படிஸாராரம்மணம் பஸ்ஸித்வா ஆக³ந்த்வா அஞ்ஞேஸம் கதே²ந்தி – ‘‘ஸமணா ஏவரூபம் அஸ்ஸமணகம் அனனுச்ச²விகம் கரோந்தி, ஏதேஸம் தி³ன்னே குதோ குஸலம், மா ஏதேஸம் கிஞ்சி அத³த்தா²’’தி. ஏவம் தே மனுஸ்ஸா தி³ட்ட²தி³ட்ட²ட்டா²னே ஸீலவந்தே அக்கோஸந்தா அபுஞ்ஞம் பஸவித்வா அபாயபூரகா அஹேஸும். தேன வுத்தம் ‘‘நிரயம் உபபஜ்ஜந்தீ’’தி.

509. அன்வாவிட்டா²தி ஆவட்டிதா. ப²ரித்வா விஹரிம்ஸூதி ந கேவலம் ப²ரித்வா விஹரிம்ஸு. ககுஸந்த⁴ஸ்ஸ பன ப⁴க³வதோ ஓவாதே³ ட²த்வா இமே சத்தாரோ ப்³ரஹ்மவிஹாரே நிப்³ப³த்தேத்வா ஜா²னபத³ட்டா²னம் விபஸ்ஸனம் வட்³டே⁴த்வா அரஹத்தே பதிட்ட²ஹிம்ஸு.

510. ஆக³திம் வா க³திம் வாதி படிஸந்தி⁴வஸேன ஆக³மனட்டா²னம் வா, சுதிவஸேன க³மனட்டா²னம் வா ந ஜானாமி. ஸியா சித்தஸ்ஸ அஞ்ஞத²த்தந்தி ஸோமனஸ்ஸவஸேன அஞ்ஞத²த்தம் ப⁴வேய்ய. ஸக்³க³ம் லோகம் உபபஜ்ஜந்தீதி இதா⁴பி புரிமனயேனேவ அத்தோ² வேதி³தப்³போ³. யதா² ஹி புப்³பே³ விப்படிஸாரகரம் ஆரம்மணம் த³ஸ்ஸேதி, ஏவமிதா⁴பி பஸாத³கரம். ஸோ கிர ததா³ மனுஸ்ஸானம் த³ஸ்ஸனட்டா²னே பி⁴க்கூ² ஆகாஸே க³ச்ச²ந்தே விய, டி²தே விய பல்லங்கேன நிஸின்னே விய, ஆகாஸே ஸூசிகம்மம் கரோந்தே விய, போத்த²கம் வாசேந்தே விய, ஆகாஸே சீவரம் பஸாரேத்வா காயம் உதும் க³ண்ஹாபேந்தே விய, நவபப்³ப³ஜிதே ஆகாஸேன சரந்தே விய, தருணஸாமணேரே ஆகாஸே ட²த்வா புப்பா²னி ஓசினந்தே விய கத்வா த³ஸ்ஸேஸி. மனுஸ்ஸா அரஞ்ஞக³தாபி வனக³தாபி விஹாரக³தாபி பப்³ப³ஜிதானம் தம் படிபத்திம் தி³ஸ்வா ஆக³ந்த்வா அஞ்ஞேஸம் கதே²ந்தி – ‘‘பி⁴க்கூ²ஸு அந்தமஸோ ஸாமணேராபி ஏவம்மஹித்³தி⁴கோ மஹானுபா⁴வா, ஏதேஸம் தி³ன்னம் மஹப்ப²லம் நாம ஹோதி, ஏதேஸம் தே³த² ஸக்கரோதா²’’தி. ததோ மனுஸ்ஸா பி⁴க்கு²ஸங்க⁴ம் சதூஹி பச்சயேஹி ஸக்கரோந்தா ப³ஹும் புஞ்ஞம் கத்வா ஸக்³க³பத²பூரகா அஹேஸும். தேன வுத்தம் ‘‘ஸக்³க³ம் லோகம் உபபஜ்ஜந்தீ’’தி.

511. ஏத² தும்ஹே, பி⁴க்க²வே, அஸுபா⁴னுபஸ்ஸினோ காயே விஹரதா²தி ப⁴க³வா ஸகலஜம்பு³தீ³பம் ஆஹிண்ட³ந்தோ அந்தமஸோ த்³வின்னம்பி திண்ணம்பி பி⁴க்கூ²னம் வஸனட்டா²னம் க³ந்த்வா –

‘‘அஸுப⁴ஸஞ்ஞாபரிசிதேன, பி⁴க்க²வே, பி⁴க்கு²னோ சேதஸா ப³ஹுலம் விஹரதோ மேது²னத⁴ம்மஸமாபத்தியா சித்தம் பதிலீயதி பதிகுடதி பதிவத்ததி ந ஸம்பஸாரியதி, உபேக்கா² வா பாடிகுல்யதா வா ஸண்டா²தி.

ஆஹாரே படிகூலஸஞ்ஞாபரிசிதேன, பி⁴க்க²வே, பி⁴க்கு²னோ சேதஸா ப³ஹுலம் விஹரதோ ரஸதண்ஹாய சித்தம் பதிலீயதி பதிகுடதி பதிவத்ததி ந ஸம்பஸாரியதி, உபேக்கா² வா பாடிகுல்யதா வா ஸண்டா²தி.

ஸப்³ப³லோகே அனபி⁴ரதிஸஞ்ஞாபரிசிதேன, பி⁴க்க²வே, பி⁴க்கு²னோ சேதஸா ப³ஹுலம் விஹரதோ லோகசித்ரேஸு சித்தம் பதிலீயதி பதிகுடதி பதிவத்ததி ந ஸம்பஸாரியதி, உபேக்கா² வா பாடிகுல்யதா வா ஸண்டா²தி.

அனிச்சஸஞ்ஞாபரிசிதேன, பி⁴க்க²வே, பி⁴க்கு²னோ சேதஸா ப³ஹுலம் விஹரதோ லாப⁴ஸக்காரஸிலோகே சித்தம் பதிலீயதி பதிகுடதி பதிவத்ததி ந ஸம்பஸாரியதி, உபேக்கா² வா பாடிகுல்யதா வா ஸண்டா²தீ’’தி (அ. நி. 7.49) ஏவம் ஆனிஸம்ஸம் த³ஸ்ஸேத்வா –

ஏத² தும்ஹே, பி⁴க்க²வே, அஸுபா⁴னுபஸ்ஸீ காயே விஹரத², ஆஹாரே படிகூலஸஞ்ஞினோ ஸப்³ப³லோகே அனபி⁴ரதிஸஞ்ஞினோ ஸப்³ப³ஸங்கா²ரேஸு அனிச்சானுபஸ்ஸினோதி. இமானி சத்தாரி கம்மட்டா²னானி கதே²ஸி. தேபி பி⁴க்கூ² இமேஸு சதூஸு கம்மட்டா²னேஸு கம்மம் கரோந்தா விபஸ்ஸனம் வட்³டே⁴த்வா ஸப்³பா³ஸவே கே²பேத்வா அரஹத்தே பதிட்ட²ஹிம்ஸு, இமானிபி சத்தாரி கம்மட்டா²னானி ராக³ஸந்தானி தோ³ஸமோஹஸந்தானி ராக³படிகா⁴தானி தோ³ஸமோஹபடிகா⁴தானி சாதி.

512. ஸக்க²ரம் க³ஹேத்வாதி அந்தோமுட்டி²யம் திட்ட²னபமாணம் பாஸாணம் க³ஹேத்வா. அயஞ்ஹி ப்³ராஹ்மணக³ஹபதிகேஹி பி⁴க்கூ² அக்கோஸாபேத்வாபி, ப்³ராஹ்மணக³ஹபதிகானம் வஸேன பி⁴க்கு²ஸங்க⁴ஸ்ஸ லாப⁴ஸக்காரம் உப்பாதா³பேத்வாபி, ஓதாரம் அலப⁴ந்தோ இதா³னி ஸஹத்தா² உபக்கமிதுகாமோ அஞ்ஞதரஸ்ஸ குமாரஸ்ஸ ஸரீரே அதி⁴முச்சித்வா ஏவரூபம் பாஸாணம் அக்³க³ஹேஸி. தம் ஸந்தா⁴ய வுத்தம் ‘‘ஸக்க²ரம் க³ஹேத்வா’’தி.

ஸீஸம் வோ பி⁴ந்தீ³தி ஸீஸம் பி⁴ந்தி³, மஹாசம்மம் சி²ஜ்ஜித்வா மம்ஸம் த்³வேதா⁴ அஹோஸி. ஸக்க²ரா பனஸ்ஸ ஸீஸகடாஹம் அபி⁴ந்தி³த்வா அட்டி²ம் ஆஹச்சேவ நிவத்தா. நாகா³பலோகிதம் அபலோகேஸீதி பஹாரஸத்³த³ம் ஸுத்வா யதா² நாம ஹத்தி²னாகோ³ இதோ வா ஏத்தோ வா அபலோகேதுகாமோ கீ³வம் அபரிவத்தேத்வா ஸகலஸரீரேனேவ நிவத்தித்வா அபலோகேதி. ஏவம் ஸகலஸரீரேனேவ நிவத்தித்வா அபலோகேஸி. யதா² ஹி மஹாஜனஸ்ஸ அட்டீ²னி கோடியா கோடிம் ஆஹச்ச டி²தானி, பச்சேகபு³த்³தா⁴னம் அங்குஸலக்³கா³னி, ந ஏவம் பு³த்³தா⁴னம். பு³த்³தா⁴னம் பன ஸங்க²லிகானி விய ஏகாப³த்³தா⁴னி ஹுத்வா டி²தானி, தஸ்மா பச்ச²தோ அபலோகனகாலே ந ஸக்கா ஹோதி கீ³வம் பரிவத்தேதும். யதா² பன ஹத்தி²னாகோ³ பச்சா²பா⁴க³ம் அபலோகேதுகாமோ ஸகலஸரீரேனேவ பரிவத்ததி, ஏவம் பரிவத்திதப்³ப³ம் ஹோதி. தஸ்மா ப⁴க³வா யந்தேன பரிவத்திதா ஸுவண்ணபடிமா விய ஸகலஸரீரேனேவ நிவத்தித்வா அபலோகேஸி, அபலோகேத்வா டி²தோ பன, ‘‘ந வாயம் தூ³ஸீ மாரோ மத்தமஞ்ஞாஸீ’’தி ஆஹ. தஸ்ஸத்தோ², அயம் தூ³ஸீ மாரோ பாபம் கரோந்தோ நேவ பமாணம் அஞ்ஞாஸி, பமாணாதிக்கந்தமகாஸீதி.

ஸஹாபலோகனாயாதி ககுஸந்த⁴ஸ்ஸ ப⁴க³வதோ அபலோகனேனேவ ஸஹ தங்க²ணஞ்ஞேவ. தம்ஹா ச டா²னா சவீதி தம்ஹா ச தே³வட்டா²னா சுதோ, மஹானிரயம் உபபன்னோதி அத்தோ². சவமானோ ஹி ந யத்த² கத்த²சி டி²தோ சவதி, தஸ்மா வஸவத்திதே³வலோகம் ஆக³ந்த்வா சுதோ, ‘‘ஸஹாபலோகனாயா’’தி ச வசனதோ ந ப⁴க³வதோ அபலோகிதத்தா சுதோதி வேதி³தப்³போ³, சுதிகாலத³ஸ்ஸனமத்தமேவ ஹேதம். உளாரே பன மஹாஸாவகே விரத்³த⁴த்தா குதா³ரியா பஹடம் வியஸ்ஸ ஆயு தத்தே²வ சி²ஜ்ஜித்வா க³தந்தி வேதி³தப்³ப³ம். தயோ நாமதே⁴ய்யா ஹோந்தீதி தீணி நாமானி ஹோந்தி. ச²ப²ஸ்ஸாயதனிகோதி ச²ஸு ப²ஸ்ஸாயதனேஸு பாடியேக்காய வேத³னாய பச்சயோ.

ஸங்குஸமாஹதோதி அயஸூலேஹி ஸமாஹதோ. பச்சத்தவேத³னியோதி ஸயமேவ வேத³னாஜனகோ. ஸங்குனா ஸங்கு ஹத³யே ஸமாக³ச்சே²ய்யாதி அயஸூலேன ஸத்³தி⁴ம் அயஸூலம் ஹத³யமஜ்ஜே² ஸமாக³ச்சே²ய்ய. தஸ்மிம் கிர நிரயே உபபன்னானம் திகா³வுதோ அத்தபா⁴வோ ஹோதி, தே²ரஸ்ஸாபி தாதி³ஸோ அஹோஸி. அத²ஸ்ஸ ஹி நிரயபாலா தாலக்க²ந்த⁴பமாணானி அயஸூலானி ஆதி³த்தானி ஸம்பஜ்ஜலிதானி ஸஜோதிபூ⁴தானி ஸயமேவ க³ஹேத்வா புனப்புனம் நிவத்தமானா, – ‘‘இமினா தே டா²னேன சிந்தேத்வா பாபம் கத’’ந்தி பூவதோ³ணியம் பூவம் கோட்டேந்தோ விய ஹத³யமஜ்ஜ²ம் கோட்டேத்வா, பண்ணாஸ ஜனா பாதா³பி⁴முகா² பண்ணாஸ ஜனா ஸீஸாபி⁴முகா² கோட்டேத்வா க³ச்ச²ந்தி, ஏவம் க³ச்ச²ந்தா பஞ்சஹி வஸ்ஸஸதேஹி உபோ⁴ அந்தே பத்வா புன நிவத்தமானா பஞ்சஹி வஸ்ஸஸதேஹி ஹத³யமஜ்ஜ²ம் ஆக³ச்ச²ந்தி. தம் ஸந்தா⁴ய ஏவம் வுத்தம்.

வுட்டா²னிமந்தி விபாகவுட்டா²னவேத³னம். ஸா கிர மஹானிரயே வேத³னாதோ து³க்க²தரா ஹோதி, யதா² ஹி ஸினேஹபானஸத்தாஹதோ பரிஹாரஸத்தாஹம் து³க்க²தரம், ஏவம் மஹானிரயது³க்க²தோ உஸ்ஸதே³ விபாகவுட்டா²னவேத³னா து³க்க²தராதி வத³ந்தி. ஸேய்யதா²பி மச்ச²ஸ்ஸாதி புரிஸஸீஸஞ்ஹி வட்டம் ஹோதி, ஸூலேன பஹரந்தஸ்ஸ பஹாரோ டா²னம் ந லப⁴தி பரிக³லதி, மச்ச²ஸீஸம் ஆயதம் புது²லம், பஹாரோ டா²னம் லப⁴தி, அவிரஜ்ஜி²த்வா கம்மகாரணா ஸுகரா ஹோதி, தஸ்மா ஏவரூபம் ஸீஸம் ஹோதி.

513. விது⁴ரம் ஸாவகமாஸஜ்ஜாதி விது⁴ரம் ஸாவகம் க⁴ட்டயித்வா. பச்சத்தவேத³னாதி ஸயமேவ பாடியேக்கவேத³னாஜனகா. ஈதி³ஸோ நிரயோ ஆஸீதி இமஸ்மிம் டா²னே நிரயோ தே³வதூ³தஸுத்தேன தீ³பேதப்³போ³. கண்ஹ-து³க்க²ம் நிக³ச்ச²ஸீதி காளக-மார, து³க்க²ம் விந்தி³ஸ்ஸஸி. மஜ்ஜே² ஸரஸ்ஸாதி மஹாஸமுத்³த³ஸ்ஸ மஜ்ஜே² உத³கம் வத்து²ம் கத்வா நிப்³ப³த்தவிமானானி கப்பட்டி²திகானி ஹோந்தி, தேஸம் வேளுரியஸ்ஸ விய வண்ணோ ஹோதி, பப்³ப³தமத்த²கே ஜலிதனளக்³கி³க்க²ந்தோ⁴ விய ச நேஸம் அச்சியோ ஜோதந்தி, பப⁴ஸ்ஸரா பபா⁴ஸம்பன்னா ஹோந்தி, தேஸு விமானேஸு நீலபே⁴தா³தி³வஸேன நானத்தவண்ணா அச்ச²ரா நச்சந்தி. யோ ஏதமபி⁴ஜானாதீதி யோ ஏதம் விமானவத்து²ம் ஜானாதீதி அத்தோ². ஏவமேத்த² விமானபேதவத்து²கேனேவ அத்தோ² வேதி³தப்³போ³. பாத³ங்கு³ட்டே²ன கம்பயீதி இத³ம் பாஸாத³கம்பனஸுத்தேன தீ³பேதப்³ப³ம். யோ வேஜயந்தம் பாஸாத³ந்தி இத³ம் சூளதண்ஹாஸங்க²யவிமுத்திஸுத்தேன தீ³பேதப்³ப³ம். ஸக்கம் ஸோ பரிபுச்ச²தீதி இத³ம்பி தேனேவ தீ³பேதப்³ப³ம். ஸுத⁴ம்மாயாபி⁴தோ ஸப⁴ந்தி ஸுத⁴ம்மஸபா⁴ய ஸமீபே, அயம் பன ப்³ரஹ்மலோகே ஸுத⁴ம்மஸபா⁴வ, ந தாவதிம்ஸப⁴வனே. ஸுத⁴ம்மஸபா⁴விரஹிதோ ஹி தே³வலோகோ நாம நத்தி².

ப்³ரஹ்மலோகே பப⁴ஸ்ஸரந்தி ப்³ரஹ்மலோகே மஹாமோக்³க³ல்லானமஹாகஸ்ஸபாதீ³ஹி ஸாவகேஹி ஸத்³தி⁴ம் தஸ்ஸ தேஜோதா⁴தும் ஸமாபஜ்ஜித்வா நிஸின்னஸ்ஸ ப⁴க³வதோ ஓபா⁴ஸம். ஏகஸ்மிஞ்ஹி ஸமயே ப⁴க³வா ப்³ரஹ்மலோகே ஸுத⁴ம்மாய தே³வஸபா⁴ய ஸன்னிபதித்வா, – ‘‘அத்தி² நு கோ² கோசி ஸமணோ வா ப்³ராஹ்மணோ வா ஏவம்மஹித்³தி⁴கோ. யோ இத⁴ ஆக³ந்தும் ஸக்குணேய்யா’’தி சிந்தேந்தஸ்ஸேவ ப்³ரஹ்மக³ணஸ்ஸ சித்தமஞ்ஞாய தத்த² க³ந்த்வா ப்³ரஹ்மக³ணஸ்ஸ மத்த²கே நிஸின்னோ தேஜோதா⁴தும் ஸமாபஜ்ஜித்வா மஹாமோக்³க³ல்லானாதீ³னம் ஆக³மனம் சிந்தேஸி. தேபி க³ந்த்வா ஸத்தா²ரம் வந்தி³த்வா தேஜோதா⁴தும் ஸமாபஜ்ஜித்வா பச்சேகம் தி³ஸாஸு நிஸீதி³ம்ஸு, ஸகலப்³ரஹ்மலோகோ ஏகோபா⁴ஸோ அஹோஸி. ஸத்தா² சதுஸச்சப்பகாஸனம் த⁴ம்மம் தே³ஸேஸி, தே³ஸனாபரியோஸானே அனேகானி ப்³ரஹ்மஸஹஸ்ஸானி மக்³க³ப²லேஸு பதிட்ட²ஹிம்ஸு. தம் ஸந்தா⁴யிமா கா³தா² வுத்தா, ஸோ பனாயமத்தோ² அஞ்ஞதரப்³ரஹ்மஸுத்தேன தீ³பேதப்³போ³.

விமோக்கே²ன அப²ஸ்ஸயீதி ஜா²னவிமோக்கே²ன பு²ஸி. வனந்தி ஜம்பு³தீ³பம். புப்³ப³விதே³ஹானந்தி புப்³ப³விதே³ஹானஞ்ச தீ³பம். யே ச பூ⁴மிஸயா நராதி பூ⁴மிஸயா நரா நாம அபரகோ³யானகா ச உத்தரகுருகா ச. தேபி ஸப்³பே³ பு²ஸீதி வுத்தம் ஹோதி. அயம் பன அத்தோ² நந்தோ³பனந்த³த³மனேன தீ³பேதப்³போ³. வத்து² விஸுத்³தி⁴மக்³கே³ இத்³தி⁴கதா²ய வித்தா²ரிதம். அபுஞ்ஞம் பஸவீதி அபுஞ்ஞம் படிலபி⁴. ஆஸம் மா அகாஸி பி⁴க்கூ²ஸூதி பி⁴க்கூ² விஹேஸேமீதி ஏதம் ஆஸம் மா அகாஸி. ஸேஸம் ஸப்³ப³த்த² உத்தானமேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

மாரதஜ்ஜனீயஸுத்தவண்ணனா நிட்டி²தா.

பஞ்சமவக்³க³வண்ணனா நிட்டி²தா.