4. சூளகோ³பாலகஸுத்தவண்ணனா

350. ஏவம் மே ஸுதந்தி சூளகோ³பாலகஸுத்தம். தத்த² உக்கசேலாயந்தி ஏவம்னாமகே நக³ரே. தஸ்மிம் கிர மாபியமானே ரத்திம் க³ங்கா³ஸோததோ மச்சோ² த²லம் பத்தோ. மனுஸ்ஸா சேலானி தேலபாதியம் தேமேத்வா உக்கா கத்வா மச்ச²ம் க³ண்ஹிம்ஸு. நக³ரே நிட்டி²தே தஸ்ஸ நாமம் கரோந்தே அம்ஹேஹி நக³ரட்டா²னஸ்ஸ க³ஹிததி³வஸே சேலுக்காஹி மச்சோ² க³ஹிதோதி உக்கசேலா-த்வேவஸ்ஸ நாமம் அகம்ஸு. பி⁴க்கூ² ஆமந்தேஸீதி யஸ்மிம் டா²னே நிஸின்னஸ்ஸ ஸப்³பா³ க³ங்கா³ பாகடா ஹுத்வா பஞ்ஞாயதி, தாதி³ஸே வாலிகுஸ்ஸதே³ க³ங்கா³தித்தே² ஸாயன்ஹஸமயே மஹாபி⁴க்கு²ஸங்க⁴பரிவுதோ நிஸீதி³த்வா மஹாக³ங்க³ம் பரிபுண்ணம் ஸந்த³மானம் ஓலோகேந்தோ, – ‘‘அத்தி² நு கோ² இமம் க³ங்க³ம் நிஸ்ஸாய கோசி புப்³பே³ வட்³டி⁴பரிஹானிம் பத்தோ’’தி ஆவஜ்ஜித்வா, புப்³பே³ ஏகம் பா³லகோ³பாலகம் நிஸ்ஸாய அனேகஸதஸஹஸ்ஸா கோ³க³ணா இமிஸ்ஸா க³ங்கா³ய ஆவட்டே பதித்வா ஸமுத்³த³மேவ பவிட்டா², அபரம் பன பண்டி³தகோ³பாலகம் நிஸ்ஸாய அனேகஸதஸஹஸ்ஸகோ³க³ணஸ்ஸ ஸோத்தி² ஜாதா வட்³டி⁴ ஜாதா ஆரோக்³யம் ஜாதந்தி அத்³த³ஸ. தி³ஸ்வா இமம் காரணம் நிஸ்ஸாய பி⁴க்கூ²னம் த⁴ம்மம் தே³ஸேஸ்ஸாமீதி சிந்தேத்வா பி⁴க்கூ² ஆமந்தேஸி.

மாக³த⁴கோதி மக³த⁴ரட்ட²வாஸீ. து³ப்பஞ்ஞஜாதிகோதி நிப்பஞ்ஞஸபா⁴வோ த³ந்தோ⁴ மஹாஜளோ. அஸமவேக்கி²த்வாதி அஸல்லக்கே²த்வா அனுபதா⁴ரேத்வா. பதாரேஸீதி தாரேதும் ஆரபி⁴. உத்தரம் தீரம் ஸுவிதே³ஹானந்தி க³ங்கா³ய ஓரிமே தீரே மக³த⁴ரட்ட²ம், பாரிமே தீரே விதே³ஹரட்ட²ம், கா³வோ மக³த⁴ரட்ட²தோ விதே³ஹரட்ட²ம் நேத்வா ரக்கி²ஸ்ஸாமீதி உத்தரம் தீரம் பதாரேஸி. தம் ஸந்தா⁴ய வுத்தம் – ‘‘உத்தரம் தீரம் ஸுவிதே³ஹான’’ந்தி. ஆமண்ட³லிகம் கரித்வாதி மண்ட³லிகம் கத்வா. அனயப்³யஸனம் ஆபஜ்ஜிம்ஸூதி அவட்³டி⁴ம் வினாஸம் பாபுணிம்ஸு, மஹாஸமுத்³த³மேவ பவிஸிம்ஸு. தேன ஹி கோ³பாலகேன கா³வோ ஓதாரேந்தேன க³ங்கா³ய ஓரிமதீரே ஸமதித்த²ஞ்ச விஸமதித்த²ஞ்ச ஓலோகேதப்³ப³ம் அஸ்ஸ, மஜ்ஜே² க³ங்கா³ய கு³ன்னம் விஸ்ஸமட்டா²னத்த²ம் த்³வே தீணி வாலிகத்த²லானி ஸல்லக்கே²தப்³பா³னி அஸ்ஸு. ததா² பாரிமதீரே தீணி சத்தாரி தித்தா²னி, இமஸ்மா தித்தா² ப⁴ட்டா² இமம் தித்த²ம் க³ண்ஹிஸ்ஸந்தி, இமஸ்மா ப⁴ட்டா² இமந்தி. அயம் பன பா³லகோ³பாலகோ ஓரிமதீரே கு³ன்னம் ஓதரணதித்த²ம் ஸமம் வா விஸமம் வா அனோலோகேத்வாவ மஜ்ஜே² க³ங்கா³ய கு³ன்னம் விஸ்ஸமட்டா²னத்த²ம் த்³வே தீணி வாலிகத்த²லானிபி அஸல்லக்கே²த்வாவ பரதீரே சத்தாரி பஞ்ச உத்தரணதித்தா²னி அஸமவேக்கி²த்வாவ அதித்தே²னேவ கா³வோ ஓதாரேஸி. அத²ஸ்ஸ மஹாஉஸபோ⁴ ஜவனஸம்பன்னதாய சேவ தா²மஸம்பன்னதாய ச திரியம் க³ங்கா³ய ஸோதம் சே²த்வா பாரிமம் தீரம் பத்வா சி²ன்னதடஞ்சேவ கண்டககு³ம்ப³க³ஹனஞ்ச தி³ஸ்வா, ‘‘து³ப்³பி³னிவிட்ட²மேத’’ந்தி ஞத்வா து⁴ரக்³க³-பதிட்டா²னோகாஸம்பி அலபி⁴த்வா படினிவத்தி. கா³வோ மஹாஉஸபோ⁴ நிவத்தோ மயம்பி நிவத்திஸ்ஸாமாதி நிவத்தா. மஹதோ கோ³க³ணஸ்ஸ நிவத்தட்டா²னே உத³கம் சி²ஜ்ஜித்வா மஜ்ஜே² க³ங்கா³ய ஆவட்டம் உட்ட²பேஸி. கோ³க³ணோ ஆவட்டம் பவிஸித்வா ஸமுத்³த³மேவ பத்தோ. ஏகோபி கோ³ணோ அரோகோ³ நாம நாஹோஸி. தேனாஹ – ‘‘தத்தே²வ அனயப்³யஸனம் ஆபஜ்ஜிம்ஸூ’’தி.

அகுஸலா இமஸ்ஸ லோகஸ்ஸாதி இத⁴ லோகே க²ந்த⁴தா⁴தாயதனேஸு அகுஸலா அசே²கா, பரலோகேபி ஏஸேவ நயோ. மாரதே⁴ய்யம் வுச்சதி தேபூ⁴மகத⁴ம்மா. அமாரதே⁴ய்யம் நவ லோகுத்தரத⁴ம்மா. மச்சுதே⁴ய்யம்பி தேபூ⁴மகத⁴ம்மாவ. அமச்சுதே⁴ய்யம் நவ லோகுத்தரத⁴ம்மா. தத்த² அகுஸலா அசே²கா. வசனத்த²தோ பன மாரஸ்ஸ தே⁴ய்யம் மாரதே⁴ய்யம். தே⁴ய்யந்தி டா²னம் வத்து² நிவாஸோ கோ³சரோ. மச்சுதே⁴ய்யேபி ஏஸேவ நயோ. தேஸந்தி தேஸம் ஏவரூபானம் ஸமணப்³ராஹ்மணானம், இமினா ச² ஸத்தா²ரோ த³ஸ்ஸிதாதி வேதி³தப்³பா³.

351. ஏவம் கண்ஹபக்க²ம் நிட்ட²பேத்வா ஸுக்கபக்க²ம் த³ஸ்ஸேந்தோ பூ⁴தபுப்³ப³ம், பி⁴க்க²வேதிஆதி³மாஹ. தத்த² ப³லவகா³வோதி த³ந்தகோ³ணே சேவ தே⁴னுயோ ச. த³ம்மகா³வோதி த³மேதப்³ப³கோ³ணே சேவ அவிஜாதகா³வோ ச. வச்ச²தரேதி வச்ச²பா⁴வம் தரித்வா டி²தே ப³லவவச்சே². வச்ச²கேதி தே⁴னுபகே தருணவச்ச²கே. கிஸாப³லகேதி அப்பமம்ஸலோஹிதே மந்த³தா²மே. தாவதே³வ ஜாதகோதி தம்தி³வஸே ஜாதகோ. மாதுகோ³ரவகேன வுய்ஹமானோதி மாதா புரதோ புரதோ ஹும்ஹுந்தி கோ³ரவம் கத்வா ஸஞ்ஞம் த³த³மானா உரேன உத³கம் சி²ந்த³மானா க³ச்ச²தி, வச்ச²கோ தாய கோ³ரவஸஞ்ஞாய தே⁴னுயா வா உரேன சி²ன்னோத³கேன க³ச்ச²மானோ ‘‘மாதுகோ³ரவகேன வுய்ஹமானோ’’தி வுச்சதி.

352. மாரஸ்ஸ ஸோதம் சே²த்வாதி அரஹத்தமக்³கே³ன மாரஸ்ஸ தண்ஹாஸோதம் சே²த்வா. பாரம் க³தாதி மஹாஉஸபா⁴ நதீ³பாரம் விய ஸம்ஸாரபாரம் நிப்³பா³னம் க³தா. பாரம் அக³மம்ஸூதி மஹாஉஸபா⁴னம் பாரங்க³தக்க²ணே க³ங்கா³ய ஸோதஸ்ஸ தயோ கோட்டா²ஸே அதிக்கம்ம டி²தா மஹாஉஸபே⁴ பாரம் பத்தே தி³ஸ்வா தேஸம் க³தமக்³க³ம் படிபஜ்ஜித்வா பாரம் அக³மம்ஸு. பாரம் க³மிஸ்ஸந்தீதி சதுமக்³க³வஜ்ஜா²னம் கிலேஸானம் தயோ கோட்டா²ஸே கே²பேத்வா டி²தா இதா³னி அரஹத்தமக்³கே³ன அவஸேஸம் தண்ஹாஸோதம் சே²த்வா ப³லவகா³வோ விய நதீ³பாரம் ஸம்ஸாரபாரம் நிப்³பா³னம் க³மிஸ்ஸந்தீதி. இமினா நயேன ஸப்³ப³வாரேஸு அத்தோ² வேதி³தப்³போ³. த⁴ம்மானுஸாரினோ, ஸத்³தா⁴னுஸாரினோதி இமே த்³வே பட²மமக்³க³ஸமங்கி³னோ.

ஜானதாதி ஸப்³ப³த⁴ம்மே ஜானந்தேன பு³த்³தே⁴ன. ஸுப்பகாஸிதோதி ஸுகதி²தோ. விவடந்தி விவரிதம். அமதத்³வாரந்தி அரியமக்³கோ³. நிப்³பா³னபத்தியாதி தத³த்தா²ய விவடம். வினளீகதந்தி விக³தமானனளம் கதம். கே²மம் பத்தே²தா²தி கத்துகம்யதாச²ந்தே³ன அரஹத்தம் பத்தே²த², கத்துகாமா நிப்³ப³த்தேதுகாமா ஹோதா²தி அத்தோ². ‘‘பத்த’த்தா²’’திபி பாடோ². ஏவரூபம் ஸத்தா²ரம் லபி⁴த்வா தும்ஹே பத்தாயேவ நாமாதி அத்தோ². ஸேஸம் ஸப்³ப³த்த² உத்தானமேவ. ப⁴க³வா பன யதா²னுஸந்தி⁴னாவ தே³ஸனம் நிட்ட²பேஸீதி.

பபஞ்சஸூத³னியா மஜ்ஜி²மனிகாயட்ட²கதா²ய

சூளகோ³பாலகஸுத்தவண்ணனா நிட்டி²தா.