9. மஹாஸாரோபமஸுத்தவண்ணனா

307. ஏவம் மே ஸுதந்தி மஹாஸாரோபமஸுத்தம். தத்த² அசிரபக்கந்தேதி ஸங்க⁴ம் பி⁴ந்தி³த்வா ருஹிருப்பாத³கம்மம் கத்வா நசிரபக்கந்தே ஸலிங்கே³னேவ பாடியேக்கே ஜாதே.

இத⁴, பி⁴க்க²வே, ஏகச்சோ குலபுத்தோதி கிஞ்சாபி அஸுககுலபுத்தோதி ந நியாமிதோ, தே³வத³த்தம்யேவ பன ஸந்தா⁴ய இத³ம் வுத்தந்தி வேதி³தப்³ப³ம். ஸோ ஹி அஸம்பி⁴ன்னாய மஹாஸம்மதபவேணியா ஓக்காகவம்ஸே ஜாதத்தா ஜாதிகுலபுத்தோ. ஓதிண்ணோதி யஸ்ஸ ஜாதி அந்தோ அனுபவிட்டா², ஸோ ஜாதியா ஓதிண்ணோ நாம. ஜராதீ³ஸுபி ஏஸேவ நயோ. லாப⁴ஸக்காராதீ³ஸுபி லாபோ⁴தி சத்தாரோ பச்சயா. ஸக்காரோதி தேஸம்யேவ ஸுகதபா⁴வோ. ஸிலோகோதி வண்ணப⁴ணனம். அபி⁴னிப்³ப³த்தேதீதி உப்பாதே³தி. அபஞ்ஞாதாதி த்³வின்னம் ஜனானம் டி²தட்டா²னே ந பஞ்ஞாயந்தி, கா⁴ஸச்சா²த³னமத்தம்பி ந லப⁴ந்தி. அப்பேஸக்கா²தி அப்பபரிவாரா, புரதோ வா பச்ச²தோ வா க³ச்ச²ந்தம் ந லப⁴ந்தி.

ஸாரேன ஸாரகரணீயந்தி ருக்க²ஸாரேன கத்தப்³ப³ம் அக்க²சக்கயுக³னங்க³லாதி³கம் யம்கிஞ்சி. ஸாகா²பலாஸம் அக்³க³ஹேஸி ப்³ரஹ்மசரியஸ்ஸாதி மக்³க³ப²லஸாரஸ்ஸ ஸாஸனப்³ரஹ்மசரியஸ்ஸ சத்தாரோ பச்சயா ஸாகா²பலாஸம் நாம, தம் அக்³க³ஹேஸி. தேன ச வோஸானம் ஆபாதீ³தி தேனேவ ச அலமேத்தாவதா ஸாரோ மே பத்தோதி வோஸானம் ஆபன்னோ.

310. ஞாணத³ஸ்ஸனம் ஆராதே⁴தீதி தே³வத³த்தோ பஞ்சாபி⁴ஞ்ஞோ, தி³ப்³ப³சக்கு² ச பஞ்சன்னம் அபி⁴ஞ்ஞானம் மத்த²கே டி²தம், தம் இமஸ்மிம் ஸுத்தே ‘‘ஞாணத³ஸ்ஸன’’ந்தி வுத்தம். அஜானம் அபஸ்ஸம் விஹரந்தீதி கிஞ்சி ஸுகு²மம் ரூபம் அஜானந்தா அந்தமஸோ பம்ஸுபிஸாசகம்பி அபஸ்ஸந்தா விஹரந்தி.

311. அஸமயவிமோக்க²ம் ஆராதே⁴தீதி, ‘‘கதமோ அஸமயவிமோக்கோ²? சத்தாரோ ச அரியமக்³கா³ சத்தாரி ச ஸாமஞ்ஞப²லானி, நிப்³பா³னஞ்ச, அயம் அஸமயவிமோக்கோ²’’தி (படி. ம. 1.213) ஏவம் வுத்தே நவலோகுத்தரத⁴ம்மே ஆராதே⁴தி ஸம்பாதே³தி படிலப⁴தி. லோகியஸமாபத்தியோ ஹி அப்பிதப்பிதக்க²ணேயேவ பச்சனீகத⁴ம்மேஹி விமுச்சந்தி, தஸ்மா, ‘‘கதமோ ஸமயவிமோக்கோ²? சத்தாரி ச ஜா²னானி சதஸ்ஸோ ச அரூபாவசரஸமாபத்தியோ, அயம் ஸமயவிமோக்கோ²’’தி ஏவம் ஸமயவிமோக்கோ²தி வுத்தா. லோகுத்தரத⁴ம்மா பன காலேன காலம் விமுச்சந்தி, ஸகிம் விமுத்தானி ஹி மக்³க³ப²லானி விமுத்தானேவ ஹோந்தி. நிப்³பா³னம் ஸப்³ப³கிலேஸேஹி அச்சந்தம் விமுத்தமேவாதி இமே நவ த⁴ம்மா அஸமயவிமோக்கோ²தி வுத்தா.

அகுப்பா சேதோவிமுத்தீதி அரஹத்தப²லவிமுத்தி. அயமத்தோ² ஏதஸ்ஸாதி ஏதத³த்த²ம், அரஹத்தப²லத்த²மித³ம் ப்³ரஹ்மசரியம். அயம் ஏதஸ்ஸ அத்தோ²தி வுத்தம் ஹோதி. ஏதம் ஸாரந்தி ஏதம் அரஹத்தப²லம் ப்³ரஹ்மசரியஸ்ஸ ஸாரம். ஏதம் பரியோஸானந்தி ஏதம் அரஹத்தப²லம் ப்³ரஹ்மசரியஸ்ஸ பரியோஸானம், ஏஸா கோடி, ந இதோ பரம் பத்தப்³ப³ம் அத்தீ²தி யதா²னுஸந்தி⁴னாவ தே³ஸனம் நிட்ட²பேஸீதி.

பபஞ்சஸூத³னியா மஜ்ஜி²மனிகாயட்ட²கதா²ய

மஹாஸாரோபமஸுத்தவண்ணனா நிட்டி²தா.