3. ஓபம்மவக்³கோ³

1. ககசூபமஸுத்தவண்ணனா

222. ஏவம் மே ஸுதந்தி ககசூபமஸுத்தம். தத்த² மோளியப²க்³கு³னோதி மோளீதி சூளா வுச்சதி. யதா²ஹ –

‘‘சே²த்வான மோளிம் வரக³ந்த⁴வாஸிதம்,

வேஹாயஸம் உக்கி²பி ஸக்யபுங்க³வோ;

ரதனசங்கோடவரேன வாஸவோ,

ஸஹஸ்ஸனேத்தோ ஸிரஸா படிக்³க³ஹீ’’தி.

ஸா தஸ்ஸ கி³ஹிகாலே மஹதீ அஹோஸி, தேனஸ்ஸ மோளியப²க்³கு³னோதி ஸங்கா² உத³பாதி³. பப்³ப³ஜிதம்பி நம் தேனேவ நாமேன ஸஞ்ஜானந்தி. அதிவேலந்தி வேலம் அதிக்கமித்வா. தத்த² காலவேலா, ஸீமவேலா, ஸீலவேலாதி திவிதா⁴ வேலா. ‘‘தாயம் வேலாயம் இமம் உதா³னம் உதா³னேஸீ’’தி (த⁴ம்மபதே³ வக்³கா³னமுத்³தா³னம், கா³தா²னமுத்³தா³னம்; மஹாவ. 1-3) அயம் காலவேலா நாம. ‘‘டி²தத⁴ம்மோ வேலம் நாதிவத்ததீ’’தி (சூளவ. 384; உதா³. 45; அ. நி. 8.19) அயம் ஸீமவேலா நாம. ‘‘வேலாஅனதிக்கமோ ஸேதுகா⁴தோ’’தி (த⁴. ஸ. 299-301) ச, ‘‘வேலா சேஸா அவீதிக்கமனட்டே²னா’’தி ச, அயம் ஸீலவேலா நாம. தம் திவித⁴ம்பி ஸோ அதிக்கமியேவ. பி⁴க்கு²னியோ ஹி ஓவதி³தும் காலோ நாம அத்தி², ஸோ அத்த²ங்க³தேபி ஸூரியே ஓவத³ந்தோ தம் காலவேலம்பி அதிக்கமி. பி⁴க்கு²னீனம் ஓவாதே³ பமாணம் நாம அத்தி² ஸீமா மரியாதா³. ஸோ உத்தரிச²ப்பஞ்சவாசாஹி ஓவத³ந்தோ தம் ஸீமவேலம்பி அதிக்கமி. கதே²ந்தோ பன த³வஸஹக³தம் கத்வா து³ட்டு²ல்லாபத்திபஹோனகம் கதே²தி, ஏவம் ஸீலவேலம்பி அதிக்கமி.

ஸம்ஸட்டோ²தி மிஸ்ஸீபூ⁴தோ ஸமானஸுக²து³க்கோ² ஹுத்வா. ஸம்முகா²தி புரதோ. அவண்ணம் பா⁴ஸதீதி தா பன பசனகோட்டனாதீ³னி கரோந்தியோ தி³ஸ்வா நத்தி² இமாஸம் அனாபத்தி நாம, இமா பி⁴க்கு²னியோ அனாசாரா து³ப்³ப³சா பக³ப்³பா⁴தி அகு³ணம் கதே²தி. அதி⁴கரணம்பி கரோதீதி இமேஸம் பி⁴க்கூ²னம் இமா பி⁴க்கு²னியோ தி³ட்ட²காலதோ பட்டா²ய அக்கீ²னி த³ய்ஹந்தி, இமஸ்மிம் விஹாரே புப்ப²பூஜா வா ஆஸனதோ⁴வனபரிப⁴ண்ட³கரணாதீ³னி வா இமாஸம் வஸேன வத்தந்தி. குலதீ⁴தரோ ஏதா லஜ்ஜினியோ, தும்ஹே இமா இத³ஞ்சித³ஞ்ச வத³த², அயம் நாம தும்ஹாகம் ஆபத்தி ஹோதி, வினயத⁴ரானம் ஸந்திகம் ஆக³ந்த்வா வினிச்ச²யம் மே தே³தா²தி அதி⁴கரணம் ஆகட்³ட⁴தி.

மோளியப²க்³கு³னஸ்ஸ அவண்ணம் பா⁴ஸதீதி நத்தி² இமஸ்ஸ பி⁴க்கு²னோ அனாபத்தி நாம. நிச்சகாலம் இமஸ்ஸ பரிவேணத்³வாரம் அஸுஞ்ஞம் பி⁴க்கு²னீஹீதி அகு³ணம் கதே²தி. அதி⁴கரணம்பி கரோந்தீதி இமேஸம் பி⁴க்கூ²னம் மோளியப²க்³கு³னத்தே²ரஸ்ஸ தி³ட்ட²காலதோ பட்டா²ய அக்கீ²னி த³ய்ஹந்தி. இமஸ்மிம் விஹாரே அஞ்ஞேஸம் வஸனட்டா²னம் ஓலோகேதும்பி ந ஸக்கா. விஹாரம் ஆக³தபி⁴க்கு²னியோ ஓவாத³ம் வா படிஸந்தா²ரம் வா உத்³தே³ஸபத³ம் வா தே²ரமேவ நிஸ்ஸாய லப⁴ந்தி, குலபுத்தகோ லஜ்ஜீ குக்குச்சகோ, ஏவரூபம் நாம தும்ஹே இத³ஞ்சித³ஞ்ச வத³த², ஏத² வினயத⁴ரானம் ஸந்திகே வினிச்ச²யம் தே³தா²தி அதி⁴கரணம் ஆகட்³ட⁴ந்தி.

ஸோ பி⁴க்கு² ப⁴க³வந்தம் ஏதத³வோசாதி நேவ பியகம்யதாய ந பே⁴தா³தி⁴ப்பாயேன, அத்த²காமதாய அவோச. ஏகம் கிரஸ்ஸ அஹோஸி – ‘‘இமஸ்ஸ பி⁴க்கு²ஸ்ஸ ஏவம் ஸம்ஸட்ட²ஸ்ஸ விஹரதோ அயஸோ உப்பஜ்ஜிஸ்ஸதி. ஸோ ஸாஸனஸ்ஸாபி அவண்ணோயேவ. அஞ்ஞேன பன கதி²தோ அயம் ந ஓரமிஸ்ஸதி, ப⁴க³வதா த⁴ம்மம் தே³ஸேத்வா ஓவதி³தோ ஓரமிஸ்ஸதீ’’தி தஸ்ஸ அத்த²காமதாய ப⁴க³வந்தம் ஏதம், ‘‘ஆயஸ்மா, ப⁴ந்தே’’திஆதி³வசனம் அவோச.

223. ஆமந்தேஹீதி ஜானாபேஹி. ஆமந்தேதீதி பக்கோஸதி.

224. ஸத்³தா⁴தி ஸத்³தா⁴ய. தஸ்மாதி யஸ்மா த்வம் குலபுத்தோ சேவ ஸத்³தா⁴பப்³ப³ஜிதோ ச, யஸ்மா வா தே ஏதாஹி ஸத்³தி⁴ம் ஸம்ஸட்ட²ஸ்ஸ விஹரதோ யே தா அக்கோஸிஸ்ஸந்தி வா, பஹரிஸ்ஸந்தி வா, தேஸு தோ³மனஸ்ஸம் உப்பஜ்ஜிஸ்ஸதி, ஸம்ஸக்³கே³ பஹீனே நுப்பஜ்ஜிஸ்ஸதி, தஸ்மா. தத்ராதி தஸ்மிம் அவண்ணபா⁴ஸனே. கே³ஹஸிதாதி பஞ்சகாமகு³ணனிஸ்ஸிதா. ச²ந்தா³தி தண்ஹாச²ந்தா³பி படிக⁴ச²ந்தா³பி. விபரிணதந்தி ரத்தம்பி சித்தம் விபரிணதம். து³ட்ட²ம்பி, மூள்ஹம்பி சித்தம் விபரிணதம். இத⁴ பன தண்ஹாச²ந்த³வஸேன ரத்தம்பி வட்டதி, படிக⁴ச²ந்த³வஸேன து³ட்ட²ம்பி வட்டதி. ஹிதானுகம்பீதி ஹிதேன அனுகம்பமானோ ஹிதேன ப²ரமானோ. ந தோ³ஸந்தரோதி ந தோ³ஸசித்தோ ப⁴விஸ்ஸாமி.

225. அத² கோ² ப⁴க³வாதி கஸ்மா ஆரபி⁴? ப²க்³கு³னஸ்ஸ கிர ஏத்தகம் ஓவாத³ம் ஸுத்வாபி, ‘‘பி⁴க்கு²னிஸம்ஸக்³க³தோ ஓரமிஸ்ஸாமி விரமிஸ்ஸாமீ’’தி சித்தம்பி ந உப்பன்னம், ப⁴க³வதா பன ஸத்³தி⁴ம் படாணீ விய படிவிருத்³தோ⁴ அட்டா²ஸி, அத²ஸ்ஸ ப⁴க³வதோ யதா² நாம ஜிக⁴ச்சி²தஸ்ஸ போ⁴ஜனே, பிபாஸிதஸ்ஸ பானீயே, ஸீதேன பு²ட்ட²ஸ்ஸ உண்ஹே து³க்கி²தஸ்ஸ ஸுகே² பத்த²னா உப்பஜ்ஜதி. ஏவமேவ இமம் து³ப்³ப³சம் பி⁴க்கு²ம் தி³ஸ்வா பட²மபோ³தி⁴யம் ஸுப்³ப³சா பி⁴க்கூ² ஆபாத²ம் ஆக³மிம்ஸு. அத² தேஸம் வண்ணம் கதே²துகாமோ ஹுத்வா இமம் தே³ஸனம் ஆரபி⁴.

தத்த² ஆராத⁴யிம்ஸூதி க³ண்ஹிம்ஸு பூரயிம்ஸு. ஏகம் ஸமயந்தி ஏகஸ்மிம் ஸமயே. ஏகாஸனபோ⁴ஜனந்தி ஏகம் புரேப⁴த்தபோ⁴ஜனம். ஸூரியுக்³க³மனதோ ஹி யாவ மஜ்ஜ²ன்ஹிகா ஸத்தக்க²த்தும் பு⁴த்தபோ⁴ஜனம்பி இத⁴ ஏகாஸனபோ⁴ஜனந்தேவ அதி⁴ப்பேதம். அப்பாபா³த⁴தந்தி நிராபா³த⁴தம். அப்பாதங்கதந்தி நித்³து³க்க²தம். லஹுட்டா²னந்தி ஸரீரஸ்ஸ ஸல்லஹுகம் உட்டா²னம். ப³லந்தி காயப³லம். பா²ஸுவிஹாரந்தி காயஸ்ஸ ஸுக²விஹாரம். இமினா கிம் கதி²தம்? தி³வா விகாலபோ⁴ஜனம் பஜஹாபிதகாலோ கதி²தோ. ப⁴த்³தா³லிஸுத்தே பன ரத்திம் விகாலபோ⁴ஜனம் பஜஹாபிதகாலோ கதி²தோ. இமானி ஹி த்³வே போ⁴ஜனானி ப⁴க³வா ந ஏகப்பஹாரேன பஜஹாபேஸி. கஸ்மா? இமானேவ ஹி த்³வே போ⁴ஜனானி வட்டே ஸத்தானம் ஆசிண்ணானி. ஸந்தி குலபுத்தா ஸுகு²மாலா, தே ஏகதோ த்³வேபி போ⁴ஜனானி பஜஹந்தா கிலமந்தி. தஸ்மா ஏகதோ அபஜஹாபேத்வா ஏகஸ்மிம் காலே தி³வா விகாலபோ⁴ஜனம், ஏகஸ்மிம் ரத்திம் விகாலபோ⁴ஜனந்தி விஸும் பஜஹாபேஸி. தேஸு இத⁴ தி³வா விகாலபோ⁴ஜனம் பஜஹாபிதகாலோ கதி²தோ. தத்த² யஸ்மா பு³த்³தா⁴ ந ப⁴யம் த³ஸ்ஸேத்வா தஜ்ஜேத்வா பஜஹாபேந்தி, ஆனிஸம்ஸம் பன த³ஸ்ஸேத்வா பஜஹாபேந்தி, ஏவஞ்ஹி ஸத்தா ஸுகே²ன பஜஹந்தி. தஸ்மா ஆனிஸம்ஸம் த³ஸ்ஸேந்தோ இமே பஞ்ச கு³ணே த³ஸ்ஸேஸி. அனுஸாஸனீ கரணீயாதி புனப்புனம் ஸாஸனே கத்தப்³ப³ம் நாஹோஸி. ‘‘இத³ம் கரோத², இத³ம் மா கரோதா²’’தி ஸதுப்பாத³கரணீயமத்தமேவ அஹோஸி. தாவத்தகேனேவ தே கத்தப்³ப³ம் அகம்ஸு, பஹாதப்³ப³ம் பஜஹிம்ஸு, பட²மபோ³தி⁴யம், பி⁴க்க²வே, ஸுப்³ப³சா பி⁴க்கூ² அஹேஸும் அஸ்ஸவா ஓவாத³படிகராதி.

இதா³னி நேஸம் ஸுப்³ப³சபா⁴வதீ³பிகம் உபமம் ஆஹரந்தோ ஸேய்யதா²பீதிஆதி³மாஹ. தத்த² ஸுபூ⁴மியந்தி ஸமபூ⁴மியம். ‘‘ஸுபூ⁴ம்யம் ஸுகே²த்தே விஹதகா²ணுகே பீ³ஜானி பதிட்ட²பேய்யா’’தி (தீ³. நி. 2.438) ஏத்த² பன மண்ட³பூ⁴மி ஸுபூ⁴மீதி ஆக³தா. சதுமஹாபதே²தி த்³வின்னம் மஹாமக்³கா³னம் வினிவிஜ்ஜி²த்வா க³தட்டா²னே. ஆஜஞ்ஞரதோ²தி வினீதஅஸ்ஸரதோ². ஓத⁴ஸ்தபதோதோ³தி யதா² ரத²ம் அபி⁴ருஹித்வா டி²தேன ஸக்கா ஹோதி க³ண்ஹிதும், ஏவம் ஆலம்ப³னம் நிஸ்ஸாய திரியதோ ட²பிதபதோதோ³. யோக்³கா³சரியோதி அஸ்ஸாசரியோ. ஸ்வேவ அஸ்ஸத³ம்மே ஸாரேதீதி அஸ்ஸத³ம்மஸாரதி². யேனிச்ச²கந்தி யேன யேன மக்³கே³ன இச்ச²தி. யதி³ச்ச²கந்தி யம் யம் க³திம் இச்ச²தி. ஸாரேய்யாதி உஜுகம் புரதோ பேஸேய்ய. பச்சாஸாரேய்யாதி படினிவத்தேய்ய.

ஏவமேவ கோ²தி யதா² ஹி ஸோ யோக்³கா³சரியோ யேன யேன மக்³கே³ன க³மனம் இச்ச²தி, தம் தம் அஸ்ஸா ஆருள்ஹாவ ஹோந்தி. யாய யாய ச க³தியா இச்ச²தி, ஸா ஸா க³தி க³ஹிதாவ ஹோதி. ரத²ம் பேஸேத்வா அஸ்ஸா நேவ வாரேதப்³பா³ ந விஜ்ஜி²தப்³பா³ ஹோந்தி. கேவலம் தேஸம் ஸமே பூ⁴மிபா⁴கே³ கு²ரேஸு நிமித்தம் ட²பேத்வா க³மனமேவ பஸ்ஸிதப்³ப³ம் ஹோதி. ஏவம் மய்ஹம்பி தேஸு பி⁴க்கூ²ஸு புனப்புனம் வத்தப்³ப³ம் நாஹோஸி. இத³ம் கரோத² இத³ம் மா கரோதா²தி ஸதுப்பாத³னமத்தமேவ கத்தப்³ப³ம் ஹோதி. தேஹிபி தாவதே³வ கத்தப்³ப³ம் கதமேவ ஹோதி, அகத்தப்³ப³ம் ஜஹிதமேவ. தஸ்மாதி யஸ்மா ஸுப்³ப³சா யுத்தயானபடிபா⁴கா³ ஹுத்வா ஸதுப்பாத³னமத்தேனேவ பஜஹிம்ஸு, தஸ்மா தும்ஹேபி பஜஹதா²தி அத்தோ². ஏலண்டே³ஹீதி ஏலண்டா³ கிர ஸாலதூ³ஸனா ஹோந்தி, தஸ்மா ஏவமாஹ. விஸோதே⁴ய்யாதி ஏலண்டே³ சேவ அஞ்ஞா ச வல்லியோ சி²ந்தி³த்வா ப³ஹி நீஹரணேன ஸோதே⁴ய்ய. ஸுஜாதாதி ஸுஸண்டி²தா. ஸம்மா பரிஹரேய்யாதி மரியாத³ம் ப³ந்தி⁴த்வா உத³காஸிஞ்சனேனபி காலேனகாலம் மூலமூலே க²ணனேனபி வல்லிகு³ம்பா³தி³ச்சே²த³னேனபி கிபில்லபூடகஹரணேனபி மக்கடகஜாலஸுக்க²த³ண்ட³கஹரணேனபி ஸம்மா வட்³டே⁴த்வா போஸேய்ய. வுத்³தி⁴ஆதீ³னி வுத்தத்தா²னேவ.

226. இதா³னி அக்க²ந்தியா தோ³ஸம் த³ஸ்ஸேந்தோ பூ⁴தபுப்³ப³ந்திஆதி³மாஹ. தத்த² வேதே³ஹிகாதி விதே³ஹரட்ட²வாஸிகஸ்ஸ தீ⁴தா. அத² வா வேதோ³தி பஞ்ஞா வுச்சதி, வேதே³ன ஈஹதி இரியதீதி வேதே³ஹிகா, பண்டி³தாதி அத்தோ². க³ஹபதானீதி க⁴ரஸாமினீ. கித்திஸத்³தோ³தி கித்திகோ⁴ஸோ. ஸோரதாதி ஸோரச்சேன ஸமன்னாக³தா. நிவாதாதி நிவாதவுத்தி. உபஸந்தாதி நிப்³பு³தா. த³க்கா²தி ப⁴த்தபசனஸயனத்த²ரணதீ³புஜ்ஜலனாதி³கம்மேஸு சே²கா. அனலஸாதி உட்டா²ஹிகா, ஸுஸம்விஹிதகம்மந்தாதி ஸுட்டு² ஸம்விஹிதகம்மந்தா. ஏகா அனலஸா ஹோதி, யம் யம் பன பா⁴ஜனம் க³ண்ஹாதி, தம் தம் பி⁴ந்த³தி வா சி²த்³த³ம் வா கரோதி, அயம் ந தாதி³ஸாதி த³ஸ்ஸேதி.

தி³வா உட்டா²ஸீதி பாதோவ கத்தப்³பா³னி தே⁴னுது³ஹனாதி³கம்மானி அகத்வா உஸ்ஸூரே உட்டி²தா. ஹே ஜே காளீதி அரே காளி. கிம் ஜே தி³வா உட்டா²ஸீதி கிம் தே கிஞ்சி அபா²ஸுகம் அத்தி², கிம் தி³வா உட்டா²ஸீதி? நோ வத ரே கிஞ்சீதி அரே யதி³ தே ந கிஞ்சி அபா²ஸுகம் அத்தி², நேவ ஸீஸம் ருஜ்ஜ²தி, ந பிட்டி², அத² கஸ்மா பாபி தா³ஸி தி³வா உட்டா²ஸீதி குபிதா அனத்தமனா பா⁴குடிமகாஸி. தி³வாதரம் உட்டா²ஸீதி புனதி³வஸே உஸ்ஸூரதரம் உட்டா²ஸி. அனத்தமனவாசந்தி அரே பாபி தா³ஸி அத்தனோ பமாணம் ந ஜானாஸி; கிம் அக்³கி³ம் ஸீதோதி மஞ்ஞஸி, இதா³னி தம் ஸிக்கா²பேஸ்ஸாமீதிஆதீ³னி வத³மானா குபிதவசனம் நிச்சா²ரேஸி.

படிவிஸகானந்தி ஸாமந்தகே³ஹவாஸீனம். உஜ்ஜா²பேஸீதி அவஜானாபேஸி. சண்டீ³தி அஸோரதா கிப்³பி³ஸா. இதி யத்தகா கு³ணா, ததோ தி³கு³ணா தோ³ஸா உப்பஜ்ஜிம்ஸு. கு³ணா நாம ஸணிகம் ஸணிகம் ஆக³ச்ச²ந்தி; தோ³ஸா ஏகதி³வஸேனேவ பத்த²டா ஹோந்தி. ஸோரதஸோரதோதி அதிவிய ஸோரதோ, ஸோதாபன்னோ நு கோ², ஸகதா³கா³மீ அனாகா³மீ அரஹா நு கோ²தி வத்தப்³ப³தம் ஆபஜ்ஜதி. பு²ஸந்தீதி பு²ஸந்தா க⁴ட்டேந்தா ஆபாத²ம் ஆக³ச்ச²ந்தி.

அத² பி⁴க்கு² ஸோரதோதி வேதி³தப்³போ³தி அத² அதி⁴வாஸனக்க²ந்தியம் டி²தோ பி⁴க்கு² ஸோரதோதி வேதி³தப்³போ³. யோ சீவர…பே… பரிக்கா²ரஹேதூதி யோ ஏதானி சீவராதீ³னி பணீதபணீதானி லப⁴ந்தோ பாத³பரிகம்மபிட்டி²பரிகம்மாதீ³னி ஏகவசனேனேவ கரோதி. அலப⁴மானோதி யதா² புப்³பே³ லப⁴தி, ஏவம் அலப⁴ந்தோ. த⁴ம்மஞ்ஞேவ ஸக்கரோந்தோதி த⁴ம்மம்யேவ ஸக்காரம் ஸுகதகாரம் கரோந்தோ. க³ரும் கரோந்தோதி க³ருபா⁴ரியம் கரோந்தோ. மானேந்தோதி மனேன பியம் கரோந்தோ. பூஜேந்தோதி பச்சயபூஜாய பூஜேந்தோ. அபசாயமானோதி த⁴ம்மம்யேவ அபசாயமானோ அபசிதிம் நீசவுத்திம் த³ஸ்ஸேந்தோ.

227. ஏவம் அக்க²ந்தியா தோ³ஸம் த³ஸ்ஸேத்வா இதா³னி யே அதி⁴வாஸேந்தி, தே ஏவம் அதி⁴வாஸேந்தீதி பஞ்ச வசனபதே² த³ஸ்ஸேந்தோ பஞ்சிமே, பி⁴க்க²வேதிஆதி³மாஹ. தத்த² காலேனாதி யுத்தபத்தகாலேன. பூ⁴தேனாதி ஸதா விஜ்ஜமானேன. ஸண்ஹேனாதி ஸம்மட்டே²ன. அத்த²ஸஞ்ஹிதேனாதி அத்த²னிஸ்ஸிதேன காரணனிஸ்ஸிதேன. அகாலேனாதிஆதீ³னி தேஸம்யேவ படிபக்க²வஸேன வேதி³தப்³பா³னி. மேத்தசித்தாதி உப்பன்னமேத்தசித்தா ஹுத்வா. தோ³ஸந்தராதி து³ட்ட²சித்தா, அப்³ப⁴ந்தரே உப்பன்னதோ³ஸா ஹுத்வா. தத்ராதி தேஸு வசனபதே²ஸு. ப²ரித்வாதி அதி⁴முச்சித்வா. ததா³ரம்மணஞ்சாதி கத²ம் ததா³ரம்மணம் ஸப்³பா³வந்தம் லோகம் கரோதி? பஞ்ச வசனபதே² க³ஹேத்வா ஆக³தம் புக்³க³லம் மேத்தசித்தஸ்ஸ ஆரம்மணம் கத்வா புன தஸ்ஸேவ மேத்தசித்தஸ்ஸ அவஸேஸஸத்தே ஆரம்மணம் கரோந்தோ ஸப்³பா³வந்தம் லோகம் ததா³ரம்மணம் கரோதி நாம. தத்ராயம் வசனத்தோ². ததா³ரம்மணஞ்சாதி தஸ்ஸேவ மேத்தசித்தஸ்ஸ ஆரம்மணம் கத்வா. ஸப்³பா³வந்தந்தி ஸப்³ப³ஸத்தவந்தம். லோகந்தி ஸத்தலோகம். விபுலேனாதி அனேகஸத்தாரம்மணேன. மஹக்³க³தேனாதி மஹக்³க³தபூ⁴மிகேன. அப்பமாணேனாதி ஸுபா⁴விதேன. அவேரேனாதி நித்³தோ³ஸேன. அப்³யாப³ஜ்ஜே²னாதி நித்³து³க்கே²ன. ப²ரித்வா விஹரிஸ்ஸாமாதி ஏவரூபேன மேத்தாஸஹக³தேன சேதஸா தஞ்ச புக்³க³லம் ஸப்³ப³ஞ்ச லோகம் தஸ்ஸ சித்தஸ்ஸ ஆரம்மணம் கத்வா அதி⁴முச்சித்வா விஹரிஸ்ஸாம.

228. இதா³னி தத³த்த²தீ³பிகம் உபமம் ஆஹரந்தோ ஸேய்யதா²பீதிஆதி³மாஹ. தத்த² அபத²விந்தி நிப்பத²விம் கரிஸ்ஸாமீதி அத்தோ². தத்ர தத்ராதி தஸ்மிம் தஸ்மிம் டா²னே. விகிரேய்யாதி பச்சி²யா பம்ஸும் உத்³த⁴ரித்வா பீ³ஜானி விய விகிரேய்ய. ஓட்டு²பே⁴ய்யாதி கே²ளம் பாதேய்ய. அபத²விம் கரேய்யாதி ஏவம் காயேன ச வாசாய ச பயோக³ம் கத்வாபி ஸக்குணேய்ய அபத²விம் காதுந்தி? க³ம்பீ⁴ராதி ப³ஹலத்தேன த்³வியோஜனஸதஸஹஸ்ஸானி சத்தாரி ச நஹுதானி க³ம்பீ⁴ரா. அப்பமேய்யாதி திரியம் பன அபரிச்சி²ன்னா. ஏவமேவ கோ²தி ஏத்த² இத³ம் ஓபம்மஸம்ஸந்த³னம் – பத²வீ விய ஹி மேத்தசித்தம் த³ட்ட²ப்³ப³ம். குதா³லபிடகம் க³ஹேத்வா ஆக³தபுரிஸோ விய பஞ்ச வசனபதே² க³ஹேத்வா ஆக³தபுக்³க³லோ. யதா² ஸோ குதா³லபிடகேன மஹாபத²விம் அபத²விம் காதும் ந ஸக்கோதி, ஏவம் வோ பஞ்ச வசனபதே² க³ஹேத்வா ஆக³தபுக்³க³லோ மேத்தசித்தஸ்ஸ அஞ்ஞத²த்தம் காதும் ந ஸக்கி²ஸ்ஸதீதி.

229. து³தியஉபமாயம் ஹலித்³தி³ந்தி யம்கிஞ்சி பீதகவண்ணம். நீலந்தி கம்ஸனீலம் வா பலாஸனீலம் வா. அரூபீதி அரூபோ. நனு ச, த்³வின்னம் கட்டா²னம் வா த்³வின்னம் ருக்கா²னம் வா த்³வின்னம் ஸேய்யானம் வா த்³வின்னம் ஸேலானம் வா அந்தரம் பரிச்சி²ன்னாகாஸரூபந்தி ஆக³தம், கஸ்மா இத⁴ அரூபீதி வுத்தோதி? ஸனித³ஸ்ஸனபா⁴வபடிக்கே²பதோ. தேனேவாஹ ‘‘அனித³ஸ்ஸனோ’’தி. தஸ்மிஞ்ஹி ரூபம் லிகி²தும், ரூபபாதுபா⁴வம் த³ஸ்ஸேதும் ந ஸக்கா, தஸ்மா ‘‘அரூபீ’’தி வுத்தோ. அனித³ஸ்ஸனோதி த³ஸ்ஸனஸ்ஸ சக்கு²விஞ்ஞாணஸ்ஸ அனாபாதோ². உபமாஸம்ஸந்த³னே பனேத்த² ஆகாஸோ விய மேத்தசித்தம். துலிகபஞ்சமா சத்தாரோ ரங்க³ஜாதா விய பஞ்ச வசனபதா², துலிகபஞ்சமே ரங்கே³ க³ஹேத்வா ஆக³தபுரிஸோ விய பஞ்ச வசனபதே² க³ஹேத்வா ஆக³தபுக்³க³லோ. யதா² ஸோ துலிகபஞ்சமேஹி ரங்கே³ஹி ஆகாஸே ரூபபாதுபா⁴வம் காதும் ந ஸக்கோதி, ஏவம் வோ பஞ்ச வசனபதே² க³ஹேத்வா ஆக³தபுக்³க³லோ மேத்தசித்தஸ்ஸ அஞ்ஞத²த்தம் கத்வா தோ³ஸுப்பத்திம் த³ஸ்ஸேதும் ந ஸக்கி²ஸ்ஸதீதி.

230. ததியஉபமாயம் ஆதி³த்தந்தி பஜ்ஜலிதம். க³ம்பீ⁴ரா அப்பமேய்யாதி இமிஸ்ஸா க³ங்கா³ய க³ம்பீ⁴ரட்டா²னம் கா³வுதம்பி அத்தி², அட்³ட⁴யோஜனம்பி, யோஜனம்பி. புது²லம் பனஸ்ஸா ஏவரூபம்யேவ, தீ³க⁴தோ பன பஞ்சயோஜனஸதானி. ஸா கத²ம் க³ம்பீ⁴ரா அப்பமேய்யாதி? ஏதேன பயோகே³ன பரிவத்தேத்வா உத்³த⁴னே உத³கம் விய தாபேதும் அஸக்குணேய்யதோ. டி²தோத³கம் பன கேனசி உபாயேன அங்கு³லமத்தம் வா அட்³ட⁴ங்கு³லமத்தம் வா ஏவம் தாபேதும் ஸக்கா ப⁴வேய்ய, அயம் பன ந ஸக்கா, தஸ்மா ஏவம் வுத்தம். உபமாஸம்ஸந்த³னே பனேத்த² க³ங்கா³ விய மேத்தசித்தம், திணுக்கம் ஆதா³ய ஆக³தபுரிஸோ விய பஞ்ச வசனபதே² க³ஹேத்வா ஆக³தபுக்³க³லோ. யதா² ஸோ ஆதி³த்தாய திணுக்காய க³ங்க³ம் தாபேதும் ந ஸக்கோதி, ஏவம் வோ பஞ்ச வசனபதே² க³ஹேத்வா ஆக³தபுக்³க³லோ மேத்தசித்தஸ்ஸ அஞ்ஞத²த்தம் காதும் ந ஸக்கி²ஸ்ஸதீதி.

231. சதுத்த²உபமாயம் பி³ளாரப⁴ஸ்தாதி பி³ளாரசம்மபஸிப்³ப³கா. ஸுமத்³தி³தாதி ஸுட்டு² மத்³தி³தா. ஸுபரிமத்³தி³தாதி அந்தோ ச ப³ஹி ச ஸமந்ததோ ஸுபரிமத்³தி³தா. தூலினீதி ஸிம்ப³லிதூலலதாதூலஸமானா. சி²ன்னஸஸ்ஸராதி சி²ன்னஸஸ்ஸரஸத்³தா³. சி²ன்னப⁴ப்³ப⁴ராதி சி²ன்னப⁴ப்³ப⁴ரஸத்³தா³. உபமாஸம்ஸந்த³னே பனேத்த² பி³ளாரப⁴ஸ்தா விய மேத்தசித்தம், கட்ட²கட²லம் ஆதா³ய ஆக³தபுரிஸோ விய பஞ்ச வசனபதே² க³ஹேத்வா ஆக³தபுக்³க³லோ. யதா² ஸோ கட்டே²ன வா கட²லேன வா பி³ளாரப⁴ஸ்தம் ஸரஸரம் ப⁴ரப⁴ரம் ஸத்³த³ம் காதும் ந ஸக்கோதி, ஏவம் வோ பஞ்ச வசனபதே² க³ஹேத்வா ஆக³தபுக்³க³லோ மேத்தசித்தஸ்ஸ அஞ்ஞத²த்தம் கத்வா தோ³ஸானுக³தபா⁴வம் காதும் ந ஸக்கி²ஸ்ஸதீதி.

232. ஓசரகாதி அவசரகா ஹேட்டா²சரகா, நீசகம்மகாரகாதி அத்தோ². யோ மனோ பதூ³ஸேய்யாதி யோ பி⁴க்கு² வா பி⁴க்கு²னீ வா மனோ பதூ³ஸேய்ய, தம் ககசேன ஓகந்தனம் நாதி⁴வாஸேய்ய. ந மே ஸோ தேன ஸாஸனகரோதி ஸோ தேன அனதி⁴வாஸனேன மய்ஹம் ஓவாத³கரோ ந ஹோதி. ஆபத்தி பனேத்த² நத்தி².

233. அணும் வா தூ²லம் வாதி அப்பஸாவஜ்ஜம் வா மஹாஸாவஜ்ஜம் வா. யம் தும்ஹே நாதி⁴வாஸேய்யாதா²தி யோ தும்ஹேஹி அதி⁴வாஸேதப்³போ³ ந ப⁴வேய்யாதி அத்தோ². நோ ஹேதம், ப⁴ந்தேதி, ப⁴ந்தே, அனதி⁴வாஸேதப்³ப³ம் நாம வசனபத²ம் ந பஸ்ஸாமாதி அதி⁴ப்பாயோ. தீ³க⁴ரத்தம் ஹிதாய ஸுகா²யாதி இதி ப⁴க³வா அரஹத்தேன கூடம் க³ண்ஹந்தோ யதா²னுஸந்தி⁴னா தே³ஸனம் நிட்ட²பேஸீதி.

பபஞ்சஸூத³னியா மஜ்ஜி²மனிகாயட்ட²கதா²ய

ககசூபமஸுத்தவண்ணனா நிட்டி²தா.

2. அலக³த்³தூ³பமஸுத்தவண்ணனா

234. ஏவம் மே ஸுதந்தி அலக³த்³தூ³பமஸுத்தம். தத்த² க³த்³தே⁴ பா³த⁴யிம்ஸூதி க³த்³த⁴பா³தி⁴னோ, க³த்³த⁴பா³தி⁴னோ புப்³ப³புரிஸா அஸ்ஸாதி க³த்³த⁴பா³தி⁴புப்³போ³, தஸ்ஸ க³த்³த⁴பா³தி⁴புப்³ப³ஸ்ஸ, கி³ஜ்ஜ²கா⁴தககுலப்பஸுதஸ்ஸாதி அத்தோ². ஸக்³க³மோக்கா²னம் அந்தராயம் கரோந்தீதி அந்தராயிகா. தே கம்மகிலேஸவிபாகஉபவாத³ஆணாவீதிக்கமவஸேன பஞ்சவிதா⁴. தத்த² பஞ்சானந்தரியத⁴ம்மா கம்மந்தராயிகா நாம. ததா² பி⁴க்கு²னீதூ³ஸககம்மம், தம் பன மோக்க²ஸ்ஸேவ அந்தராயம் கரோதி, ந ஸக்³க³ஸ்ஸ. நியதமிச்சா²தி³ட்டி²த⁴ம்மா கிலேஸந்தராயிகா நாம. பண்ட³கதிரச்சா²னக³தஉப⁴தோப்³யஞ்ஜனகானம் படிஸந்தி⁴த⁴ம்மா விபாகந்தராயிகா நாம. அரியூபவாத³த⁴ம்மா உபவாத³ந்தராயிகா நாம, தே பன யாவ அரியே ந க²மாபேந்தி, தாவதே³வ, ந ததோ பரம். ஸஞ்சிச்ச வீதிக்கந்தா ஸத்த ஆபத்திக்க²ந்தா⁴ ஆணாவீதிக்கமந்தராயிகா நாம. தேபி யாவ பி⁴க்கு²பா⁴வம் வா படிஜானாதி, ந வுட்டா²தி வா, ந தே³ஸேதி வா, தாவதே³வ, ந ததோ பரம்.

தத்ராயம் பி⁴க்கு² ப³ஹுஸ்ஸுதோ த⁴ம்மகதி²கோ ஸேஸந்தராயிகே ஜானாதி, வினயே பன அகோவித³த்தா பண்ணத்திவீதிக்கமந்தராயிகே ந ஜானாதி, தஸ்மா ரஹோக³தோ ஏவம் சிந்தேஸி – இமே ஆகா³ரிகா பஞ்ச காமகு³ணே பரிபு⁴ஞ்ஜந்தா ஸோதாபன்னாபி ஸகதா³கா³மினோபி அனாகா³மினோபி ஹோந்தி. பி⁴க்கூ²பி மனாபிகானி சக்கு²விஞ்ஞேய்யானி ரூபானி பஸ்ஸந்தி…பே… காயவிஞ்ஞேய்யே போ²ட்ட²ப்³பே³ பு²ஸந்தி, முது³கானி அத்த²ரணபாவுரணாதீ³னி பரிபு⁴ஞ்ஜந்தி, ஏதம் ஸப்³ப³ம் வட்டதி. கஸ்மா இத்தீ²னம்யேவ ரூபஸத்³த³க³ந்த⁴ரஸபோ²ட்ட²ப்³பா³ ந வட்டந்தி? ஏதேபி வட்டந்தீதி. ஏவம் ரஸேன ரஸம் ஸம்ஸந்தே³த்வா ஸச்ச²ந்த³ராக³பரிபோ⁴க³ஞ்ச நிச்ச²ந்த³ராக³பரிபோ⁴க³ஞ்ச ஏகம் கத்வா தூ²லவாகேஹி ஸத்³தி⁴ம் அதிஸுகு²மஸுத்தம் உபனேந்தோ விய, ஸாஸபேன ஸத்³தி⁴ம் ஸினேரும் உபஸம்ஹரந்தோ விய, பாபகம் தி³ட்டி²க³தம் உப்பாதே³த்வா, ‘‘கிம் ப⁴க³வதா மஹாஸமுத்³த³ம் ப³ந்த⁴ந்தேன விய மஹதா உஸ்ஸாஹேன பட²மபாராஜிகம் பஞ்ஞத்தம், நத்தி² ஏத்த² தோ³ஸோ’’தி ஸப்³ப³ஞ்ஞுதஞ்ஞாணேன ஸத்³தி⁴ம் படிவிருஜ்ஜ²ந்தோ வேஸாரஜ்ஜஞாணம் படிபா³ஹந்தோ அரியமக்³கே³ கா²ணுகண்டகாதீ³னி பக்கி²பந்தோ மேது²னத⁴ம்மே தோ³ஸோ நத்தீ²தி ஜினஸ்ஸ ஆணாசக்கே பஹாரம் அதா³ஸி. தேனாஹ – ‘‘ததா²ஹம் ப⁴க³வதா த⁴ம்மம் தே³ஸிதம் ஆஜானாமீ’’திஆதி³.

ஏவம் ப்³யா கோ²தி ஏவம் விய கோ². ஸமனுயுஞ்ஜந்தீதிஆதீ³ஸு கிம் லத்³தி⁴கோ த்வம், லத்³தி⁴ம் வதே³ஹீதி புச்ச²மானா ஸமனுயுஞ்ஜந்தி நாம. தி³ட்டி²ம் பதிட்டா²பேந்தா ஸமனுக்³கா³ஹந்தி நாம. கேன காரணேன ஏவம் வத³ஸீதி காரணம் புச்ச²ந்தா ஸமனுபா⁴ஸந்தி நாம. அட்டி²கங்கலூபமாதிஆதீ³ஸு (ம. நி. 2.42-48) அட்டி²கங்கலூபமா அப்பஸ்ஸாத³ட்டே²ன. மம்ஸபேஸூபமா ப³ஹுஸாதா⁴ரணட்டே²ன. திணுக்கூபமா அனுத³ஹனட்டே²ன. அங்கா³ரகாஸூபமா மஹாபி⁴தாபனட்டே²ன. ஸுபினகூபமா இத்தரபச்சுபட்டா²னட்டே²ன. யாசிதகூபமா தாவகாலிகட்டே²ன. ருக்க²ப²லூபமா ஸப்³ப³ங்க³பச்சங்க³பலிப⁴ஞ்ஜனட்டே²ன. அஸிஸூனூபமா அதி⁴குட்டனட்டே²ன. ஸத்திஸூலூபமா வினிவிஜ்ஜ²னட்டே²ன. ஸப்பஸிரூபமா ஸாஸங்கஸப்படிப⁴யட்டே²ன. தா²மஸாதி தி³ட்டி²தா²மேன. பராமாஸாதி தி³ட்டி²பராமாஸேன. அபி⁴னிவிஸ்ஸ வோஹரதீதி அதி⁴ட்ட²ஹித்வா வோஹரதி தீ³பேதி வா.

235. யதோ கோ² தே பி⁴க்கூ²தி யதா³ தே பி⁴க்கூ². ஏவம் ப்³யா கோ² அஹம், ப⁴ந்தே, ப⁴க³வதாதி இத³ம் ஏஸ அத்தனோ அஜ்ஜா²ஸயேன நத்தீ²தி வத்துகாமோபி ப⁴க³வதோ ஆனுபா⁴வேன ஸம்படிச்ச²தி, பு³த்³தா⁴னம் கிர ஸம்முகா² த்³வே கதா² கதே²தும் ஸமத்தோ² நாம நத்தி².

236. கஸ்ஸ கோ² நாம த்வம் மோக⁴புரிஸாதி த்வம் மோக⁴புரிஸ கஸ்ஸ க²த்தியஸ்ஸ வா ப்³ராஹ்மணஸ்ஸ வா வேஸ்ஸஸ்ஸ வா ஸுத்³த³ஸ்ஸ வா க³ஹட்ட²ஸ்ஸ வா பப்³ப³ஜிதஸ்ஸ வா தே³வஸ்ஸ வா மனுஸ்ஸஸ்ஸ வா மயா ஏவம் த⁴ம்மம் தே³ஸிதம் ஆஜானாஸி. அத² கோ² ப⁴க³வா பி⁴க்கூ² ஆமந்தேஸீதி அயம் பாடியேக்கோ அனுஸந்தி⁴. அரிட்டோ² கிர சிந்தேஸி – ‘‘ப⁴க³வா மம் மோக⁴புரிஸோதி வத³தி, ந கோ² பன மோக⁴புரிஸாதி வுத்தமத்தகேன மக்³க³ப²லானம் உபனிஸ்ஸயோ ந ஹோதி. உபஸேனம்பி ஹி வங்க³ந்தபுத்தம், ‘அதிலஹும் கோ² த்வம், மோக⁴புரிஸ, பா³ஹுல்லாய ஆவத்தோ’தி (மஹாவ. 75) ப⁴க³வா மோக⁴புரிஸவாதே³ன ஓவதி³. தே²ரோ அபரபா⁴கே³ க⁴டேந்தோ வாயமந்தோ ச² அபி⁴ஞ்ஞா ஸச்சா²காஸி. அஹம்பி ததா²ரூபம் வீரியம் பக்³க³ண்ஹித்வா மக்³க³ப²லானி நிப்³ப³த்தேஸ்ஸாமீ’’தி. அத²ஸ்ஸ ப⁴க³வா ப³ந்த⁴னா பவுத்தஸ்ஸ பண்டு³பலாஸஸ்ஸ விய அவிருள்ஹிபா⁴வம் த³ஸ்ஸேந்தோ இமம் தே³ஸனம் ஆரபி⁴.

உஸ்மீகதோபீதி, பி⁴க்க²வே, தும்ஹே கிந்தி மஞ்ஞத², அயம் அரிட்டோ² ஏவம்லத்³தி⁴கோ ஸப்³ப³ஞ்ஞுதஞ்ஞாணேன படிவிருஜ்ஜி²த்வா வேஸாரஜ்ஜஞாணம் படிபா³ஹித்வா ததா²க³தஸ்ஸ ஆணாசக்கே பஹாரம் த³த³மானோ அபி நு இமஸ்மிம் த⁴ம்மவினயே உஸ்மீகதோபி? யதா² நிப்³பு³தேபி மஹந்தே அக்³கி³க்க²ந்தே⁴ க²ஜ்ஜுபனகமத்தாபி அக்³கி³பபடிகா ஹோதியேவ, யம் நிஸ்ஸாய புன மஹாஅக்³கி³க்க²ந்தோ⁴ ப⁴வேய்ய. கிம் நு கோ² ஏவம் இமஸ்ஸ அப்பமத்திகாபி ஞாணுஸ்மா அத்தி², யம் நிஸ்ஸாய வாயமந்தோ மக்³க³ப²லானி நிப்³ப³த்தேய்யாதி? நோ ஹேதம், ப⁴ந்தேதி, ப⁴ந்தே, ஏவம்லத்³தி⁴கஸ்ஸ குதோ ஏவரூபா ஞாணுஸ்மாதி? மக்³க³ப²லானம் பச்சயஸமத்தா²ய ஞாணுஸ்மாய உஸ்மீகதபா⁴வம் படிக்கி²பந்தா வத³ந்தி. மங்குபூ⁴தோதி நித்தேஜபூ⁴தோ. பத்தக்க²ந்தோ⁴தி பதிதக்க²ந்தோ⁴. அப்படிபா⁴னோதி கிஞ்சி படிபா⁴னம் அபஸ்ஸந்தோ பி⁴ன்னபடிபா⁴னோ ஏவரூபம்பி நாம நிய்யானிகஸாஸனம் லபி⁴த்வா அவிருள்ஹித⁴ம்மோ கிரம்ஹி ஸமுக்³கா⁴திதபச்சயோ ஜாதோதி அத்தனோ அப⁴ப்³ப³தம் பச்சவேக்க²ந்தோ பாத³ங்கு³ட்ட²கேன பூ⁴மிம் க²ணமானோ நிஸீதி³.

பஞ்ஞாயிஸ்ஸஸி கோ²தி அயம்பி பாடியேக்கோ அனுஸந்தி⁴. அரிட்டோ² கிர சிந்தேஸி – ‘‘ப⁴க³வா மய்ஹம் மக்³க³ப²லானம் உபனிஸ்ஸயோ பச்சி²ன்னோதி வத³தி, ந கோ² பன பு³த்³தா⁴ ஸஉபனிஸ்ஸயானம்யேவ த⁴ம்மம் தே³ஸேந்தி, அனுபனிஸ்ஸயானம்பி தே³ஸேந்தி, அஹம் ஸத்து² ஸந்திகா ஸுக³தோவாத³ம் லபி⁴த்வா அத்தனோ ஸம்பத்தூபக³ம் குஸலம் கரிஸ்ஸாமீ’’தி. அத²ஸ்ஸ ப⁴க³வா ஓவாத³ம் படிபஸ்ஸம்பே⁴ந்தோ ‘‘பஞ்ஞாயிஸ்ஸஸீ’’திஆதி³மாஹ. தஸ்ஸத்தோ², த்வம்யேவ, மோக⁴புரிஸ, இமினா பாபகேன தி³ட்டி²க³தேன நிரயாதீ³ஸு பஞ்ஞாயிஸ்ஸஸி, மம ஸந்திகா துய்ஹம் ஸுக³தோவாதோ³ நாம நத்தி², ந மே தயா அத்தோ², இதா⁴ஹம் பி⁴க்கூ² படிபுச்சி²ஸ்ஸாமீதி.

237. அத² கோ² ப⁴க³வாதி அயம்பி பாடியேக்கோ அனுஸந்தி⁴. இமஸ்மிஞ்ஹி டா²னே ப⁴க³வா பரிஸம் ஸோதே⁴தி, அரிட்ட²ம் க³ணதோ நிஸ்ஸாரேதி. ஸசே ஹி பரிஸக³தானம் கஸ்ஸசி ஏவம் ப⁴வேய்ய – ‘‘அயம் அரிட்டோ² ப⁴க³வதா அகதி²தம் கதே²தும் கிம் ஸக்கி²ஸ்ஸதி, கச்சி நு கோ² பரிஸமஜ்ஜே² ப⁴க³வதா கதா²ய ஸமாரத்³தா⁴ய ஸஹஸா கதி²த’’ந்தி. ஏவம் கதி²தம் பன ந அரிட்டோ²வ ஸுணாதி, அஞ்ஞேனபி ஸுதம் ப⁴விஸ்ஸதி. அதா²பிஸ்ஸ ஸியா ‘‘யதா² ஸத்தா² அரிட்ட²ம் நிக்³க³ண்ஹாதி, மம்பி ஏவம் நிக்³க³ண்ஹேய்யாதி ஸுத்வாபி துண்ஹீபா⁴வம் ஆபஜ்ஜேய்யா’’தி. ‘‘தம் ஸப்³ப³ம் ந கரிஸ்ஸந்தீ’’தி. மயாபி ந கதி²தம், அஞ்ஞேன ஸுதம்பி நத்தீ²தி ‘‘தும்ஹேபிமே, பி⁴க்க²வே’’திஆதி³னா பரிஸாய லத்³தி⁴ம் ஸோதே⁴தி. பரிஸாய பன லத்³தி⁴ஸோத⁴னேனேவ அரிட்டோ² க³ணதோ நிஸ்ஸாரிதோ நாம ஹோதி.

இதா³னி அரிட்ட²ஸ்ஸ லத்³தி⁴ம் பகாஸேந்தோ ஸோ வத, பி⁴க்க²வேதிஆதி³மாஹ. தத்த² அஞ்ஞத்ரேவ காமேஹீதிஆதீ³ஸு யோ ஸோ, பி⁴க்க²வே, பி⁴க்கு² ‘‘தே படிஸேவதோ நாலம் அந்தராயாயா’’தி ஏவம்லத்³தி⁴கோ, ஸோ வத கிலேஸகாமேஹி சேவ கிலேஸகாமஸம்பயுத்தேஹி ஸஞ்ஞாவிதக்கேஹி ச அஞ்ஞத்ர, ஏதே த⁴ம்மே பஹாய, வினா ஏதேஹி த⁴ம்மேஹி, வத்து²காமே படிஸேவிஸ்ஸதி, மேது²னஸமாசாரம் ஸமாசரிஸ்ஸதீதி நேதம் டா²னம் விஜ்ஜதி. இத³ம் காரணம் நாம நத்தி², அட்டா²னமேதம் அனவகாஸோதி.

238. ஏவம் ப⁴க³வா அயம் அரிட்டோ² யதா² நாம ரஜகோ ஸுக³ந்தா⁴னிபி து³க்³க³ந்தா⁴னிபி ஜிண்ணானிபி நவானிபி ஸுத்³தா⁴னிபி அஸுத்³தா⁴னிபி வத்தா²னி ஏகதோ ப⁴ண்டி³கம் கரோதி, ஏவமேவ பி⁴க்கூ²னம் நிச்ச²ந்த³ராக³பணீதசீவராதி³பரிபோ⁴க³ஞ்ச அனிப³த்³த⁴ஸீலானம் க³ஹட்டா²னம் அந்தராயகரம் ஸச்ச²ந்த³ராக³பரிபோ⁴க³ஞ்ச நிப³த்³த⁴ஸீலானம் பி⁴க்கூ²னம் ஆவரணகரம் ஸச்ச²ந்த³ராக³பரிபோ⁴க³ஞ்ச ஸப்³ப³ம் ஏகஸதி³ஸம் கரோதீதி அரிட்ட²ஸ்ஸ லத்³தி⁴ம் பகாஸேத்வா இதா³னி து³க்³க³ஹிதாய பரியத்தியா தோ³ஸம் த³ஸ்ஸேந்தோ இத⁴, பி⁴க்க²வே, ஏகச்சேதிஆதி³மாஹ. தத்த² பரியாபுணந்தீதி உக்³க³ண்ஹந்தி. ஸுத்தந்திஆதீ³ஸு உப⁴தோவிப⁴ங்க³னித்³தே³ஸக²ந்த⁴கபரிவாரா, ஸுத்தனிபாதே மங்க³லஸுத்தரதனஸுத்தனாலகஸுஆதுவட்டகஸுத்தானி, அஞ்ஞம்பி ச ஸுத்தனாமகம் ததா²க³தவசனம் ஸுத்தந்தி வேதி³தப்³ப³ம். ஸப்³ப³ம்பி ஸகா³த²கம் ஸுத்தம் கே³ய்யந்தி வேதி³தப்³ப³ம், விஸேஸேன ஸம்யுத்தகே ஸகலோபி ஸகா³தா²வக்³கோ³. ஸகலம் அபி⁴த⁴ம்மபிடகம், நிக்³கா³த²கம் ஸுத்தம், யஞ்ச அஞ்ஞம்பி அட்ட²ஹி அங்கே³ஹி அஸங்க³ஹிதம் பு³த்³த⁴வசனம், தம் வேய்யாகரணந்தி வேதி³தப்³ப³ம். த⁴ம்மபத³ம், தே²ரகா³தா², தே²ரிகா³தா², ஸுத்தனிபாதே நோஸுத்தனாமிகா ஸுத்³தி⁴ககா³தா² ச கா³தா²தி வேதி³தப்³பா³. ஸோமனஸ்ஸஞாணமயிககா³தா²படிஸம்யுத்தா த்³வேஅஸீதிஸுத்தந்தா உதா³னந்தி வேதி³தப்³பா³. ‘‘வுத்தஞ்ஹேதம் ப⁴க³வதா’’திஆதி³னயப்பவத்தா (இதிவு. 1,2) த³ஸுத்தரஸதஸுத்தந்தா இதிவுத்தகந்தி வேதி³தப்³பா³. அபண்ணகஜாதகாதீ³னி பண்ணாஸாதி⁴கானி பஞ்சஜாதகஸதானி ஜாதகந்தி வேதி³தப்³பா³னி. ‘‘சத்தாரோமே, பி⁴க்க²வே, அச்ச²ரியா அப்³பு⁴தா த⁴ம்மா ஆனந்தே³’’திஆதி³னயப்பவத்தா (அ. நி. 4.129) ஸப்³பே³பி அச்ச²ரியஅப்³பு⁴தத⁴ம்மப்படிஸம்யுத்தா ஸுத்தந்தா அப்³பு⁴தத⁴ம்மந்தி வேதி³தப்³பா³. சூளவேத³ல்லமஹாவேத³ல்லஸம்மாதி³ட்டி²ஸக்கபஞ்ஹஸங்கா²ரபா⁴ஜனியமஹாபுண்ணமஸுத்தாத³யோ ஸப்³பே³பி வேத³ஞ்ச துட்டி²ஞ்ச லத்³தா⁴ லத்³தா⁴ புச்சி²தஸுத்தந்தா வேத³ல்லந்தி வேதி³தப்³பா³.

அத்த²ம் ந உபபரிக்க²ந்தீதி அத்த²த்த²ம் காரணத்த²ம் ந பஸ்ஸந்தி ந பரிக்³க³ண்ஹந்தி. அனுபபரிக்க²தந்தி அனுபபரிக்க²ந்தானம். ந நிஜ்ஜா²னம் க²மந்தீதி ந உபட்ட²ஹந்தி ந ஆபாத²ம் ஆக³ச்ச²ந்தி, இமஸ்மிம் டா²னே ஸீலம் ஸமாதி⁴ விபஸ்ஸனா மக்³கோ³ ப²லம் வட்டம் விவட்டம் கதி²தந்தி ஏவம் ஜானிதும் ந ஸக்கா ஹோந்தீதி அத்தோ². தே உபாரம்பா⁴னிஸம்ஸா சேவாதி தே பரேஸம் வாதே³ தோ³ஸாரோபனானிஸம்ஸா ஹுத்வா பரியாபுணந்தீதி அத்தோ². இதிவாத³ப்பமோக்கா²னிஸம்ஸா சாதி ஏவம் வாத³பமோக்கா²னிஸம்ஸா, பரேஹி ஸகவாதே³ தோ³ஸே ஆரோபிதே தம் தோ³ஸம் ஏவம் மோசேஸ்ஸாமாதி இமினாவ காரணேன பரியாபுணந்தீதி அத்தோ². தஞ்சஸ்ஸ அத்த²ம் நானுபோ⁴ந்தீதி யஸ்ஸ ச மக்³க³ஸ்ஸ வா ப²லஸ்ஸ வா அத்தா²ய குலபுத்தா த⁴ம்மம் பரியாபுணந்தி, தஞ்சஸ்ஸ த⁴ம்மஸ்ஸ அத்த²ம் ஏதே து³க்³க³ஹிதக்³கா³ஹினோ நானுபோ⁴ந்தி. அபிச பரஸ்ஸ வாதே³ உபாரம்ப⁴ம் ஆரோபேதும் அத்தனோ வாத³ம் மோசேதும் அஸக்கோந்தாபி தஞ்ச அத்த²ம் நானுபோ⁴ந்தியேவ.

239. அலக³த்³த³த்தி²கோதி ஆஸிவிஸஅத்தி²கோ. க³தோ³தி ஹி விஸஸ்ஸ நாமம், தம் தஸ்ஸ அலம் பரிபுண்ணம் அத்தீ²தி அலக³த்³தோ³. போ⁴கே³தி ஸரீரே. இத⁴ பன, பி⁴க்க²வே, ஏகச்சே குலபுத்தா த⁴ம்மம் பரியாபுணந்தீதி நித்த²ரணபரியத்திவஸேன உக்³க³ண்ஹந்தி. திஸ்ஸோ ஹி பரியத்தியோ அலக³த்³த³பரியத்தி நித்த²ரணபரியத்தி ப⁴ண்டா³கா³ரிகபரியத்தீதி.

தத்த² யோ பு³த்³த⁴வசனம் உக்³க³ஹேத்வா ஏவம் சீவராதீ³னி வா லபி⁴ஸ்ஸாமி, சதுபரிஸமஜ்ஜே² வா மம் ஜானிஸ்ஸந்தீதி லாப⁴ஸக்காரஹேது பரியாபுணாதி, தஸ்ஸ ஸா பரியத்தி அலக³த்³த³பரியத்தி நாம. ஏவம் பரியாபுணதோ ஹி பு³த்³த⁴வசனம் அபரியாபுணித்வா நித்³தோ³க்கமனம் வரதரம்.

யோ பன பு³த்³த⁴வசனம் உக்³க³ண்ஹித்வா ஸீலஸ்ஸ ஆக³தட்டா²னே ஸீலம் பூரேத்வா ஸமாதி⁴ஸ்ஸ ஆக³தட்டா²னே ஸமாதி⁴க³ப்³ப⁴ம் க³ண்ஹாபேத்வா விபஸ்ஸனாய ஆக³தட்டா²னே விபஸ்ஸனம் பட்ட²பேத்வா மக்³க³ப²லானம் ஆக³தட்டா²னே மக்³க³ம் பா⁴வேஸ்ஸாமி ப²லம் ஸச்சி²கரிஸ்ஸாமீதி உக்³க³ண்ஹாதி, தஸ்ஸ ஸா பரியத்தி நித்த²ரணபரியத்தி நாம ஹோதி.

கீ²ணாஸவஸ்ஸ பன பரியத்தி ப⁴ண்டா³கா³ரிகபரியத்தி நாம. தஸ்ஸ ஹி அபரிஞ்ஞாதம் அப்பஹீனம் அபா⁴விதம் அஸச்சி²கதம் வா நத்தி². ஸோ ஹி பரிஞ்ஞாதக்க²ந்தோ⁴ பஹீனகிலேஸோ பா⁴விதமக்³கோ³ ஸச்சி²கதப²லோ, தஸ்மா பு³த்³த⁴வசனம் பரியாபுணந்தோ தந்திதா⁴ரகோ பவேணிபாலகோ வம்ஸானுரக்க²கோவ ஹுத்வா உக்³க³ண்ஹாதி. இதிஸ்ஸ ஸா பரியத்தி ப⁴ண்டா³கா³ரிகபரியத்தி நாம ஹோதி.

யோ பன புது²ஜ்ஜனோ சா²தப⁴யாதீ³ஸு க³ந்த²த⁴ரேஸு ஏகஸ்மிம் டா²னே வஸிதும் அஸக்கோந்தேஸு ஸயம் பி⁴க்கா²சாரேன அகிலமமானோ அதிமது⁴ரம் பு³த்³த⁴வசனம் மா நஸ்ஸது, தந்திம் தா⁴ரேஸ்ஸாமி, வம்ஸம் ட²பேஸ்ஸாமி, பவேணிம் பாலேஸ்ஸாமீதி பரியாபுணாதி, தஸ்ஸ பரியத்தி ப⁴ண்டா³கா³ரிகபரியத்தி ஹோதி, ந ஹோதீதி? ந ஹோதி. கஸ்மா? ந அத்தனோ டா²னே ட²த்வா பரியாபுதத்தா. புது²ஜ்ஜனஸ்ஸ ஹி பரியத்தி நாம அலக³த்³தா³ வா ஹோதி நித்த²ரணா வா, ஸத்தன்னம் ஸேக்கா²னம் நித்த²ரணாவ, கீ²ணாஸவஸ்ஸ ப⁴ண்டா³கா³ரிகபரியத்தியேவ. இமஸ்மிம் பன டா²னே நித்த²ரணபரியத்தி அதி⁴ப்பேதா.

நிஜ்ஜா²னம் க²மந்தீதி ஸீலாதீ³னம் ஆக³தட்டா²னேஸு இத⁴ ஸீலம் கதி²தம், இத⁴ ஸமாதி⁴, இத⁴ விபஸ்ஸனா, இத⁴ மக்³கோ³, இத⁴ ப²லம், இத⁴ வட்டம், இத⁴ விவட்டந்தி ஆபாத²ம் ஆக³ச்ச²ந்தி. தஞ்சஸ்ஸ அத்த²ம் அனுபோ⁴ந்தீதி யேஸம் மக்³க³ப²லானம் அத்தா²ய பரியாபுணந்தி. ஸுக்³க³ஹிதபரியத்திம் நிஸ்ஸாய மக்³க³ம் பா⁴வேத்வா ப²லம் ஸச்சி²கரோந்தா தஞ்சஸ்ஸ த⁴ம்மஸ்ஸ அத்த²ம் அனுப⁴வந்தி. பரவாதே³ உபாரம்ப⁴ம் ஆரோபேதும் ஸக்கோந்தாபி ஸகவாதே³ ஆரோபிதம் தோ³ஸம் இச்சி²திச்சி²தட்டா²னம் க³ஹேத்வா மோசேதும் ஸக்கோந்தாபி அனுபோ⁴ந்தியேவ. தீ³க⁴ரத்தம் ஹிதாய ஸுகா²ய ஸம்வத்தந்தீதி ஸீலாதீ³னம் ஆக³தட்டா²னே ஸீலாதீ³னி பூரேந்தானம்பி, பரேஸம் வாதே³ ஸஹத⁴ம்மேன உபாரம்ப⁴ம் ஆரோபேந்தானம்பி, ஸகவாத³தோ தோ³ஸம் ஹரந்தானம்பி, அரஹத்தம் பத்வா பரிஸமஜ்ஜே² த⁴ம்மம் தே³ஸேத்வா த⁴ம்மதே³ஸனாய பஸன்னேஹி உபனீதே சத்தாரோ பச்சயே பரிபு⁴ஞ்ஜந்தானம்பி தீ³க⁴ரத்தம் ஹிதாய ஸுகா²ய ஸம்வத்தந்தி.

ஏவம் ஸுக்³க³ஹிதே பு³த்³த⁴வசனே ஆனிஸம்ஸம் த³ஸ்ஸேத்வா இதா³னி தத்தே²வ நியோஜேந்தோ தஸ்மா திஹ, பி⁴க்க²வேதிஆதி³மாஹ. தத்த² தஸ்மாதி யஸ்மா து³க்³க³ஹிதபரியத்தி து³க்³க³ஹிதஅலக³த்³தோ³ விய தீ³க⁴ரத்தம் அஹிதாய து³க்கா²ய ஸம்வத்ததி, ஸுக்³க³ஹிதபரியத்தி ஸுக்³க³ஹிதஅலக³த்³தோ³ விய தீ³க⁴ரத்தம் ஹிதாய ஸுகா²ய ஸம்வத்ததி, தஸ்மாதி அத்தோ². ததா² நம் தா⁴ரேய்யாதா²தி ததே²வ நம் தா⁴ரேய்யாத², தேனேவ அத்தே²ன க³ண்ஹேய்யாத². யே வா பனாஸ்ஸு வியத்தா பி⁴க்கூ²தி யே வா பன அஞ்ஞே ஸாரிபுத்தமோக்³க³ல்லானமஹாகஸ்ஸபமஹாகச்சானாதி³கா ப்³யத்தா பண்டி³தா பி⁴க்கூ² அஸ்ஸு, தே புச்சி²தப்³பா³. அரிட்டே²ன விய பன மம ஸாஸனே ந கலலம் வா கசவரம் வா பக்கி²பிதப்³ப³ம்.

240. குல்லூபமந்தி குல்லஸதி³ஸம். நித்த²ரணத்தா²யாதி சதுரோக⁴னித்த²ரணத்தா²ய. உத³கண்ணவந்தி யஞ்ஹி உத³கம் க³ம்பீ⁴ரம் ந புது²லம். புது²லம் வா பன ந க³ம்பீ⁴ரம், ந தம் அண்ணவோதி வுச்சதி. யம் பன க³ம்பீ⁴ரஞ்சேவ புது²லஞ்ச, தம் அண்ணவோதி வுச்சதி. தஸ்மா மஹந்தம் உத³கண்ணவந்தி மஹந்தம் புது²லம் க³ம்பீ⁴ரம் உத³கந்தி அயமேத்த² அத்தோ². ஸாஸங்கம் நாம யத்த² சோரானம் நிவுத்தோ²காஸோ தி³ஸ்ஸதி. டி²தோகாஸோ, நிஸின்னோகாஸோ, நிபன்னோகாஸோ தி³ஸ்ஸதி. ஸப்படிப⁴யம் நாம யத்த² சோரேஹி மனுஸ்ஸா ஹதா தி³ஸ்ஸந்தி, விலுத்தா தி³ஸ்ஸந்தி, ஆகோடிதா தி³ஸ்ஸந்தி. உத்தரஸேதூதி உத³கண்ணவஸ்ஸ உபரி ப³த்³தோ⁴ ஸேது. குல்லம் ப³ந்தி⁴த்வாதி குல்லோ நாம தரணத்தா²ய கலாபம் கத்வா ப³த்³தோ⁴. பத்த²ரித்வா ப³த்³தா⁴ பன பத³ரசாடிஆத³யோ உளும்போதி வுச்சந்தி. உச்சாரேத்வாதி ட²பேத்வா. கிச்சகாரீதி பத்தகாரீ யுத்தகாரீ, பதிரூபகாரீதி அத்தோ². த⁴ம்மாபி வோ பஹாதப்³பா³தி ஏத்த² த⁴ம்மாதி ஸமத²விபஸ்ஸனா. ப⁴க³வா ஹி ஸமதே²பி ச²ந்த³ராக³ம் பஜஹாபேஸி, விபஸ்ஸனாயபி. ஸமதே² ச²ந்த³ராக³ம் கத்த² பஜஹாபேஸி? ‘‘இதி கோ², உதா³யி, நேவஸஞ்ஞானாஸஞ்ஞாயதனஸ்ஸபி பஹானம் வதா³மி, பஸ்ஸஸி நோ த்வம், உதா³யி, தம் ஸம்யோஜனம் அணும் வா தூ²லம் வா, யஸ்ஸாஹம் நோ பஹானம் வதா³மீ’’தி (ம. நி. 2.156) ஏத்த² ஸமதே² ச²ந்த³ராக³ம் பஜஹாபேஸி. ‘‘இமம் சே தும்ஹே, பி⁴க்க²வே, தி³ட்டி²ம் ஏவம் பரிஸுத்³த⁴ம் ஏவம் பரியோதா³தம் ந அல்லீயேத² ந கேலாயேத² ந த⁴னாயேதா²’’தி (ம. நி. 1.401) ஏத்த² விபஸ்ஸனாய ச²ந்த³ராக³ம் பஜஹாபேஸி. இத⁴ பன உப⁴யத்த² பஜஹாபேந்தோ ‘‘த⁴ம்மாபி வோ பஹாதப்³பா³, பகே³வ அத⁴ம்மா’’தி ஆஹ.

தத்ராயம் அதி⁴ப்பாயோ – பி⁴க்க²வே, அஹம் ஏவரூபேஸு ஸந்தப்பணீதேஸு த⁴ம்மேஸு ச²ந்த³ராக³ப்பஹானம் வதா³மி, கிம் பன இமஸ்மிம் அஸத்³த⁴ம்மே கா³மத⁴ம்மே வஸலத⁴ம்மே து³ட்டு²ல்லே ஓத³கந்திகே, யத்த² அயம் அரிட்டோ² மோக⁴புரிஸோ நித்³தோ³ஸஸஞ்ஞீ பஞ்சஸு காமகு³ணேஸு ச²ந்த³ராக³ம் நாலம் அந்தராயாயாதி வத³தி. அரிட்டே²ன விய ந தும்ஹேஹி மய்ஹம் ஸாஸனே கலலம் வா கசவரம் வா பக்கி²பிதப்³ப³ந்தி ஏவம் ப⁴க³வா இமினாபி ஓவாதே³ன அரிட்ட²ம்யேவ நிக்³க³ண்ஹாதி.

241. இதா³னி யோ பஞ்சஸு க²ந்தே⁴ஸு திவித⁴க்³கா³ஹவஸேன அஹம் மமந்தி க³ண்ஹாதி, ஸோ மய்ஹம் ஸாஸனே அயம் அரிட்டோ² விய கலலம் கசவரம் பக்கி²பதீதி த³ஸ்ஸேந்தோ ச²யிமானி, பி⁴க்க²வேதிஆதி³மாஹ. தத்த² தி³ட்டி²ட்டா²னானீதி தி³ட்டி²பி தி³ட்டி²ட்டா²னம், தி³ட்டி²யா ஆரம்மணம்பி தி³ட்டி²ட்டா²னம், தி³ட்டி²யா பச்சயோபி. ரூபம் ஏதம் மமாதிஆதீ³ஸு ஏதம் மமாதி தண்ஹாக்³கா³ஹோ. ஏஸோஹமஸ்மீதி மானக்³கா³ஹோ. ஏஸோ மே அத்தாதி தி³ட்டி²க்³கா³ஹோ. ஏவம் ரூபாரம்மணா தண்ஹாமானதி³ட்டி²யோ கதி²தா ஹோந்தி. ரூபம் பன அத்தாதி ந வத்தப்³ப³ம். வேத³னாதீ³ஸுபி ஏஸேவ நயோ. தி³ட்ட²ம் ரூபாயதனம், ஸுதம் ஸத்³தா³யதனம், முதம் க³ந்தா⁴யதனம் ரஸாயதனம் போ²ட்ட²ப்³பா³யதனம், தஞ்ஹி பத்வா க³ஹேதப்³ப³தோ முதந்தி வுத்தம். அவஸேஸானி ஸத்தாயதனானி விஞ்ஞாதம் நாம. பத்தந்தி பரியேஸித்வா வா அபரியேஸித்வா வா பத்தம். பரியேஸிதந்தி பத்தம் வா அப்பத்தம் வா பரியேஸிதம். அனுவிசரிதம் மனஸாதி சித்தேன அனுஸஞ்சரிதம். லோகஸ்மிஞ்ஹி பரியேஸித்வா பத்தம்பி அத்தி², பரியேஸித்வா நோபத்தம்பி. அபரியேஸித்வா பத்தம்பி அத்தி², அபரியேஸித்வா நோபத்தம்பி. தத்த² பரியேஸித்வா பத்தம் பத்தம் நாம. பரியேஸித்வா நோபத்தம் பரியேஸிதம் நாம. அபரியேஸித்வா பத்தஞ்ச, அபரியேஸித்வா நோபத்தஞ்ச மனஸானுவிசரிதம் நாம.

அத² வா பரியேஸித்வா பத்தம்பி அபரியேஸித்வா பத்தம்பி பத்தட்டே²ன பத்தம் நாம. பரியேஸித்வா நோபத்தம் பரியேஸிதம் நாம. அபரியேஸித்வா நோபத்தம் மனஸானுவிசரிதம் நாம. ஸப்³ப³ம் வா ஏதம் மனஸா அனுவிசரிதத்தா மனஸானுவிசரிதம் நாம. இமினா விஞ்ஞாணாரம்மணா தண்ஹாமானதி³ட்டி²யோ கதி²தா, தே³ஸனாவிலாஸேன ஹேட்டா² தி³ட்டா²தி³ஆரம்மணவஸேன விஞ்ஞாணம் த³ஸ்ஸிதம். யம்பி தம் தி³ட்டி²ட்டா²னந்தி யம்பி ஏதம் ஸோ லோகோதிஆதி³னா நயேன பவத்தம் தி³ட்டி²ட்டா²னம்.

ஸோ லோகோ ஸோ அத்தாதி யா ஏஸா ‘‘ரூபம் அத்ததோ ஸமனுபஸ்ஸதீ’’திஆதி³னா நயேன பவத்தா தி³ட்டி² லோகோ ச அத்தா சாதி க³ண்ஹாதி, தம் ஸந்தா⁴ய வுத்தம். ஸோ பேச்ச ப⁴விஸ்ஸாமீதி ஸோ அஹம் பரலோகம் க³ந்த்வா நிச்சோ ப⁴விஸ்ஸாமி, து⁴வோ ஸஸ்ஸதோ அவிபரிணாமத⁴ம்மோ ப⁴விஸ்ஸாமி, ஸினேருமஹாபத²வீமஹாஸமுத்³தா³தீ³ஹி ஸஸ்ஸதீஹி ஸமம் ததே²வ ட²ஸ்ஸாமி. தம்பி ஏதம் மமாதி தம்பி த³ஸ்ஸனம் ஏதம் மம, ஏஸோஹமஸ்மி, ஏஸோ மே அத்தாதி ஸமனுபஸ்ஸதி. இமினா தி³ட்டா²ரம்மணா தண்ஹாமானதி³ட்டி²யோ கதி²தா. விபஸ்ஸனாய படிவிபஸ்ஸனாகாலே விய பச்சி²மதி³ட்டி²யா புரிமதி³ட்டி²க்³க³ஹணகாலே ஏவம் ஹோதி.

ஸுக்கபக்கே² ரூபம் நேதம் மமாதி ரூபே தண்ஹாமானதி³ட்டி²க்³கா³ஹா படிக்கி²த்தா. வேத³னாதீ³ஸுபி ஏஸேவ நயோ. ஸமனுபஸ்ஸதீதி இமஸ்ஸ பன பத³ஸ்ஸ தண்ஹாஸமனுபஸ்ஸனா மானஸமனுபஸ்ஸனா தி³ட்டி²ஸமனுபஸ்ஸனா ஞாணஸமனுபஸ்ஸனாதி சதஸ்ஸோ ஸமனுபஸ்ஸனாதி அத்தோ². தா கண்ஹபக்கே² திஸ்ஸன்னம் ஸமனுபஸ்ஸனானம், ஸுக்கபக்கே² ஞாணஸமனுபஸ்ஸனாய வஸேன வேதி³தப்³பா³. அஸதி ந பரிதஸ்ஸதீதி அவிஜ்ஜமானே ப⁴யபரிதஸ்ஸனாய தண்ஹாபரிதஸ்ஸனாய வா ந பரிதஸ்ஸதி. இமினா ப⁴க³வா அஜ்ஜ²த்தக்க²ந்த⁴வினாஸே அபரிதஸ்ஸமானம் கீ²ணாஸவம் த³ஸ்ஸேந்தோ தே³ஸனம் மத்த²கம் பாபேஸி.

242. ஏவம் வுத்தே அஞ்ஞதரோ பி⁴க்கூ²தி ஏவம் ப⁴க³வதா வுத்தே அஞ்ஞதரோ அனுஸந்தி⁴குஸலோ பி⁴க்கு² – ‘‘ப⁴க³வதா அஜ்ஜ²த்தக்க²ந்த⁴வினாஸே அபரிதஸ்ஸந்தம் கீ²ணாஸவம் த³ஸ்ஸேத்வா தே³ஸனா நிட்டா²பிதா, அஜ்ஜ²த்தம் அபரிதஸ்ஸந்தே கோ² பன ஸதி அஜ்ஜ²த்தம் பரிதஸ்ஸகேன ப³ஹித்³தா⁴ பரிக்கா²ரவினாஸே பரிதஸ்ஸகேன அபரிதஸ்ஸகேன சாபி ப⁴விதப்³ப³ம். இதி இமேஹி சதூஹி காரணேஹி அயம் பஞ்ஹோ புச்சி²தப்³போ³’’தி சிந்தேத்வா ஏகம்ஸம் சீவரம் கத்வா அஞ்ஜலிம் பக்³க³ய்ஹ ப⁴க³வந்தம் ஏதத³வோச. ப³ஹித்³தா⁴ அஸதீதி ப³ஹித்³தா⁴ பரிக்கா²ரவினாஸே. அஹு வத மேதி அஹோஸி வத மே ப⁴த்³த³கம் யானம் வாஹனம் ஹிரஞ்ஞம் ஸுவண்ணந்தி அத்தோ². தம் வத மே நத்தீ²தி தம் வத இதா³னி மய்ஹம் நத்தி², ராஜூஹி வா சோரேஹி வா ஹடம், அக்³கி³னா வா த³ட்³ட⁴ம், உத³கேன வா வுள்ஹம், பரிபோ⁴கே³ன வா ஜிண்ணம். ஸியா வத மேதி ப⁴வேய்ய வத மய்ஹம் யானம் வாஹனம் ஹிரஞ்ஞம் ஸுவண்ணம் ஸாலி வீஹி யவோ கோ³து⁴மோ. தம் வதாஹம் ந லபா⁴மீதி தமஹம் அலப⁴மானோ தத³னுச்ச²விகம் கம்மம் அகத்வா நிஸின்னத்தா இதா³னி ந லபா⁴மீதி ஸோசதி, அயம் அகா³ரியஸோசனா, அனகா³ரியஸ்ஸ பத்தசீவராதீ³னம் வஸேன வேதி³தப்³பா³.

அபரிதஸ்ஸனாவாரே ந ஏவம் ஹோதீதி யேஹி கிலேஸேஹி ஏவம் ப⁴வேய்ய, தேஸம் பஹீனத்தா ந ஏவம் ஹோதி. தி³ட்டி²ட்டா²னாதி⁴ட்டா²னபரியுட்டா²னாபி⁴னிவேஸானுஸயானந்தி தி³ட்டீ²னஞ்ச தி³ட்டி²ட்டா²னானஞ்ச தி³ட்டா²தி⁴ட்டா²னானஞ்ச தி³ட்டி²பரியுட்டா²னானஞ்ச அபி⁴னிவேஸானுஸயானஞ்ச. ஸப்³ப³ஸங்கா²ரஸமதா²யாதி நிப்³பா³னத்தா²ய. நிப்³பா³னஞ்ஹி ஆக³ம்ம ஸப்³ப³ஸங்கா²ராஇஞ்ஜிதானி, ஸப்³ப³ஸங்கா²ரசலனானி ஸப்³ப³ஸங்கா²ரவிப்ப²ந்தி³தானி ஸம்மந்தி வூபஸம்மந்தி, தஸ்மா தம், ‘‘ஸப்³ப³ஸங்கா²ரஸமதோ²’’தி வுச்சதி. ததே³வ ச ஆக³ம்ம க²ந்தூ⁴பதி⁴ கிலேஸூபதி⁴ அபி⁴ஸங்கா²ரூபதி⁴, பஞ்சகாமகு³ணூபதீ⁴தி இமே உபத⁴யோ படினிஸ்ஸஜ்ஜியந்தி, தண்ஹா கீ²யதி விரஜ்ஜதி நிருஜ்ஜ²தி, தஸ்மா தம், ‘‘ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴’’தி வுச்சதி. நிப்³பா³னாயாதி அயம் பனஸ்ஸ ஸரூபனித்³தே³ஸோ, இதி ஸப்³பே³ஹேவ இமேஹி பதே³ஹி நிப்³பா³னஸ்ஸ ஸச்சி²கிரியத்தா²ய த⁴ம்மம் தே³ஸேந்தஸ்ஸாதி அயமத்தோ² தீ³பிதோ. தஸ்ஸேவம் ஹோதீதி தஸ்ஸ தி³ட்டி²க³திகஸ்ஸ உச்சி²ஜ்ஜிஸ்ஸாமி நாமஸ்ஸு, வினஸ்ஸிஸ்ஸாமி நாமஸ்ஸு, நாஸ்ஸு நாம ப⁴விஸ்ஸாமீதி ஏவம் ஹோதி. தி³ட்டி²க³திகஸ்ஸ ஹி திலக்க²ணம் ஆரோபேத்வா ஸுஞ்ஞதாபடிஸம்யுத்தம் கத்வா தே³ஸியமானம் த⁴ம்மம் ஸுணந்தஸ்ஸ தாஸோ உப்பஜ்ஜதி. வுத்தஞ்ஹேதம் – ‘‘தாஸோ ஹேஸோ, பி⁴க்க²வே, அஸுதவதோ புது²ஜ்ஜனஸ்ஸ நோ சஸ்ஸம், நோ ச மே ஸியா’’தி (ஸம். நி. 3.55).

243. ஏத்தாவதா ப³ஹித்³தா⁴பரிக்கா²ரவினாஸே தஸ்ஸனகஸ்ஸ ச நோதஸ்ஸனகஸ்ஸ ச அஜ்ஜ²த்தக்க²ந்த⁴வினாஸே தஸ்ஸனகஸ்ஸ ச நோதஸ்ஸனகஸ்ஸ சாதி இமேஸம் வஸேன சதுக்கோடிகா ஸுஞ்ஞதா கதி²தா. இதா³னி ப³ஹித்³தா⁴ பரிக்கா²ரம் பரிக்³க³ஹம் நாம கத்வா, வீஸதிவத்து²கம் ஸக்காயதி³ட்டி²ம் அத்தவாது³பாதா³னம் நாம கத்வா, ஸக்காயதி³ட்டி²பமுகா² த்³வாஸட்டி² தி³ட்டி²யோ தி³ட்டி²னிஸ்ஸயம் நாம கத்வா திகோடிகம் ஸுஞ்ஞதம் த³ஸ்ஸேதும் தம், பி⁴க்க²வே, பரிக்³க³ஹந்திஆதி³மாஹ. தத்த² பரிக்³க³ஹந்தி ப³ஹித்³தா⁴ பரிக்கா²ரம். பரிக்³க³ண்ஹேய்யாதா²தி யதா² விஞ்ஞூ மனுஸ்ஸோ பரிக்³க³ண்ஹேய்ய. அஹம்பி கோ² தம், பி⁴க்க²வேதி, பி⁴க்க²வே, தும்ஹேபி ந பஸ்ஸத², அஹம்பி ந பஸ்ஸாமி, இதி ஏவரூபோ பரிக்³க³ஹோ நத்தீ²தி த³ஸ்ஸேதி. ஏவம் ஸப்³ப³த்த² அத்தோ² வேதி³தப்³போ³.

244. ஏவம் திகோடிகம் ஸுஞ்ஞதம் த³ஸ்ஸேத்வா இதா³னி அஜ்ஜ²த்தக்க²ந்தே⁴ அத்தாதி ப³ஹித்³தா⁴ பரிக்கா²ரே அத்தனியந்தி கத்வா த்³விகோடிகம் த³ஸ்ஸேந்தோ அத்தனி வா, பி⁴க்க²வே, ஸதீதிஆதி³மாஹ. தத்த² அயம் ஸங்கே²பத்தோ², பி⁴க்க²வே, அத்தனி வா ஸதி இத³ம் மே பரிக்கா²ரஜாதம் அத்தனியந்தி அஸ்ஸ, அத்தனியேவ வா பரிக்கா²ரே ஸதி அயம் மே அத்தா இமஸ்ஸ பரிக்கா²ரஸ்ஸ ஸாமீதி, ஏவம் அஹந்தி. ஸதி மமாதி, மமாதி ஸதி அஹந்தி யுத்தம் ப⁴வேய்ய. ஸச்சதோதி பூ⁴ததோ, தே²ததோதி தத²தோ தி²ரதோ வா.

இதா³னி இமே பஞ்சக்க²ந்தே⁴ அனிச்சம் து³க்க²ம் அனத்தாதி ஏவம் திபரிவட்டவஸேன அக்³க³ண்ஹந்தோ அயம் அரிட்டோ² விய மய்ஹம் ஸாஸனே கலலம் கசவரம் பக்கி²பதீதி த³ஸ்ஸேந்தோ தம் கிம் மஞ்ஞத², பி⁴க்க²வே, ரூபம் நிச்சம் வாதிஆதி³மாஹ. தத்த² அனிச்சம், ப⁴ந்தேதி, ப⁴ந்தே, யஸ்மா ஹுத்வா ந ஹோதி, தஸ்மா அனிச்சம். உப்பாத³வயவத்திதோ விபரிணாமதாவகாலிகனிச்சபடிக்கே²பட்டே²ன வாதி சதூஹி காரணேஹி அனிச்சம். து³க்க²ம், ப⁴ந்தேதி, ப⁴ந்தே, படிபீளனாகாரேன து³க்க²ம், ஸந்தாபது³க்க²மது³க்க²வத்து²கஸுக²படிக்கே²பட்டே²ன வாதி சதூஹி காரணேஹி து³க்க²ம். விபரிணாமத⁴ம்மந்தி ப⁴வஸங்கந்திஉபக³மனஸபா⁴வம் பகதிபா⁴வவிஜஹனஸபா⁴வம். கல்லம் நு தம் ஸமனுபஸ்ஸிதும் ஏதம் மம, ஏஸோஹமஸ்மி, ஏஸோ மே அத்தாதி யுத்தம் நு கோ² தம் இமேஸம் திண்ணம் தண்ஹாமானதி³ட்டி²க்³கா³ஹானம் வஸேன அஹம் மமாதி ஏவம் க³ஹேதும். நோ ஹேதம், ப⁴ந்தேதி இமினா தே பி⁴க்கூ² அவஸவத்தனாகாரேன ரூபம், ப⁴ந்தே, அனத்தாதி படிஜானந்தி. ஸுஞ்ஞஅஸ்ஸாமிகஅனிஸ்ஸரஅத்தபடிக்கே²பட்டே²ன வாதி சதூஹி காரணேஹி அனத்தா.

ப⁴க³வா ஹி கத்த²சி அனிச்சவஸேன அனத்தத்தம் த³ஸ்ஸேதி, கத்த²சி து³க்க²வஸேன, கத்த²சி உப⁴யவஸேன. ‘‘சக்கு² அத்தாதி யோ வதே³ய்ய, தம் ந உபபஜ்ஜதி, சக்கு²ஸ்ஸ உப்பாதோ³பி வயோபி பஞ்ஞாயதி. யஸ்ஸ கோ² பன உப்பாதோ³பி வயோபி பஞ்ஞாயதி, அத்தா மே உப்பஜ்ஜதி ச வேதி சாதி இச்சஸ்ஸ ஏவமாக³தம் ஹோதி, தஸ்மா தம் ந உபபஜ்ஜதி சக்கு² அத்தாதி யோ வதே³ய்ய, இதி சக்கு² அனத்தா’’தி (ம. நி. 3.422) இமஸ்மிஞ்ஹி ச²ச²க்கஸுத்தே அனிச்சவஸேன அனத்ததம் த³ஸ்ஸேதி. ‘‘ரூபஞ்ச ஹித³ம், பி⁴க்க²வே, அத்தா அப⁴விஸ்ஸ, நயித³ம் ரூபம் ஆபா³தா⁴ய ஸம்வத்தேய்ய, லப்³பே⁴த² ச ரூபே ‘ஏவம் மே ரூபம் ஹோது, ஏவம் மே ரூபம் மா அஹோஸீ’தி. யஸ்மா ச கோ², பி⁴க்க²வே, ரூபம் அனத்தா, தஸ்மா ரூபம் ஆபா³தா⁴ய ஸம்வத்ததி, ந ச லப்³ப⁴தி ரூபே ‘ஏவம் மே ரூபம் ஹோது, ஏவம் மே ரூபம் மா அஹோஸீ’’’தி (மஹாவ. 20; ஸம். நி. 3.59) இமஸ்மிம் அனத்தலக்க²ணஸுத்தே து³க்க²வஸேன அனத்ததம் த³ஸ்ஸேதி. ‘‘ரூபம், பி⁴க்க²வே, அனிச்சம், யத³னிச்சம் தம் து³க்க²ம், யம் து³க்க²ம் தத³னத்தா, யத³னத்தா தம் ‘நேதம் மம, நேஸோஹமஸ்மி, ந மேஸோ அத்தா’தி ஏவமேதம் யதா²பூ⁴தம் ஸம்மப்பஞ்ஞாய த³ட்ட²ப்³ப³’’ந்தி (ஸம். நி. 3.76) இமஸ்மிம் அரஹத்தஸுத்தே உப⁴யவஸேன அனத்ததம் த³ஸ்ஸேதி. கஸ்மா? அனிச்சம் து³க்க²ஞ்ச பாகடம். அனத்தாதி ந பாகடம்.

பரிபோ⁴க³பா⁴ஜனாதீ³ஸு ஹி பி⁴ன்னேஸு அஹோ அனிச்சந்தி வத³ந்தி, அஹோ அனத்தாதி வத்தா நாம நத்தி². ஸரீரே க³ண்ட³பிளகாதீ³ஸு வா உட்டி²தாஸு கண்டகேன வா வித்³தா⁴ அஹோ து³க்க²ந்தி வத³ந்தி, அஹோ அனத்தாதி பன வத்தா நாம நத்தி². கஸ்மா? இத³ஞ்ஹி அனத்தலக்க²ணம் நாம அவிபூ⁴தம் து³த்³த³ஸம் து³ப்பஞ்ஞாபனம். தேன தம் ப⁴க³வா அனிச்சவஸேன வா து³க்க²வஸேன வா உப⁴யவஸேன வா த³ஸ்ஸேதி. தயித³ம் இமஸ்மிம்பி தேபரிவட்டே அனிச்சது³க்க²வஸேனேவ த³ஸ்ஸிதம். வேத³னாதீ³ஸுபி ஏஸேவ நயோ.

தஸ்மா திஹ, பி⁴க்க²வேதி, பி⁴க்க²வே, யஸ்மா ஏதரஹி அஞ்ஞதா³பி ரூபம் அனிச்சம் து³க்க²ம் அனத்தா, தஸ்மாதி அத்தோ². யம்கிஞ்சி ரூபந்திஆதீ³னி விஸுத்³தி⁴மக்³கே³ க²ந்த⁴னித்³தே³ஸே வித்தா²ரிதானேவ.

245. நிப்³பி³ந்த³தீதி உக்கண்ட²தி. ஏத்த² ச நிப்³பி³தா³தி வுட்டா²னகா³மினீவிபஸ்ஸனா அதி⁴ப்பேதா. வுட்டா²னகா³மினீவிபஸ்ஸனாய ஹி ப³ஹூனி நாமானி. ஏஸா ஹி கத்த²சி ஸஞ்ஞக்³க³ந்தி வுத்தா. கத்த²சி த⁴ம்மட்டி²திஞாணந்தி. கத்த²சி பாரிஸுத்³தி⁴பதா⁴னியங்க³ந்தி. கத்த²சி படிபதா³ஞாணத³ஸ்ஸனவிஸுத்³தீ⁴தி. கத்த²சி தம்மயதாபரியாதா³னந்தி. கத்த²சி தீஹி நாமேஹி. கத்த²சி த்³வீஹீதி.

தத்த² போட்ட²பாத³ஸுத்தே தாவ ‘‘ஸஞ்ஞா கோ², போட்ட²பாத³, பட²மம் உப்பஜ்ஜதி, பச்சா² ஞாண’’ந்தி (தீ³. நி. 1.416) ஏவம் ஸஞ்ஞக்³க³ந்தி வுத்தா. ஸுஸிமஸுத்தே ‘‘புப்³பே³ கோ², ஸுஸிம, த⁴ம்மட்டி²திஞாணம், பச்சா² நிப்³பா³னே ஞாண’’ந்தி (ஸம். நி. 2.70) ஏவம் த⁴ம்மட்டி²திஞாணந்தி வுத்தா. த³ஸுத்தரஸுத்தே ‘‘படிபதா³ஞாணத³ஸ்ஸனவிஸுத்³தி⁴பதா⁴னியங்க³’’ந்தி (தீ³. நி. 3.359) ஏவம் பாரிஸுத்³தி⁴பதா³னியங்க³ந்தி வுத்தா. ரத²வினீதே ‘‘கிம் நு கோ², ஆவுஸோ, படிபதா³ஞாணத³ஸ்ஸனவிஸுத்³த⁴த்த²ம் ப⁴க³வதி ப்³ரஹ்மசரியம் வுஸ்ஸதீ’’தி (ம. நி. 1.257) ஏவம் படிபதா³ஞாணத³ஸ்ஸனவிஸுத்³தீ⁴தி வுத்தா. ஸளாயதனவிப⁴ங்கே³ ‘‘அதம்மயதம், பி⁴க்க²வே, நிஸ்ஸாய அதம்மயதம் ஆக³ம்ம யாயம் உபேக்கா² நானத்தா நானத்தஸிதா, தம் அபி⁴னிவஜ்ஜேத்வா யாயம் உபேக்கா² ஏகத்தா ஏகத்தஸிதா, தம் நிஸ்ஸாய தம் ஆக³ம்ம ஏவமேதிஸ்ஸா பஹானம் ஹோதி, ஏவமேதிஸ்ஸா ஸமதிக்கமோ ஹோதீ’’தி (தீ³. நி. 3.310) ஏவம் தம்மயதாபரியாதா³னந்தி வுத்தா. படிஸம்பி⁴தா³மக்³கே³ ‘‘யா ச முஞ்சிதுகம்யதா, யா ச படிஸங்கா²னுபஸ்ஸனா, யா ச ஸங்கா²ருபேக்கா², இமே த⁴ம்மா ஏகத்தா² ப்³யஞ்ஜனமேவ நான’’ந்தி (படி. ம. 1.54) ஏவம் தீஹி நாமேஹி வுத்தா. பட்டா²னே ‘‘அனுலோமம் கோ³த்ரபு⁴ஸ்ஸ அனந்தரபச்சயேன பச்சயோ, அனுலோமம் வோதா³னஸ்ஸ அனந்தரபச்சயேன பச்சயோ’’தி (பட்டா². 1.1.417) ஏவம் த்³வீஹி நாமேஹி வுத்தா. இமஸ்மிம் பன அலக³த்³த³ஸுத்தே நிப்³பி³ந்த³தீதி நிப்³பி³தா³னாமேன ஆக³தா.

நிப்³பி³தா³ விரஜ்ஜதீதி ஏத்த² விராகோ³தி மக்³கோ³ விராகா³ விமுச்சதீதி ஏத்த² விராகே³ன மக்³கே³ன விமுச்சதீதி ப²லம் கதி²தம். விமுத்தஸ்மிம் விமுத்தமிதி ஞாணம் ஹோதீதி இத⁴ பச்சவேக்க²ணா கதி²தா.

ஏவம் விமுத்தசித்தம் மஹாகீ²ணாஸவம் த³ஸ்ஸேத்வா இதா³னி தஸ்ஸ யதா²பூ⁴தேஹி பஞ்சஹி காரணேஹி நாமம் க³ண்ஹந்தோ அயம் வுச்சதி, பி⁴க்க²வேதிஆதி³மாஹ. அவிஜ்ஜாதி வட்டமூலிகா அவிஜ்ஜா. அயஞ்ஹி து³ருக்கி²பனட்டே²ன பலிகோ⁴தி வுச்சதி. தேனேஸ தஸ்ஸ உக்கி²த்தத்தா உக்கி²த்தபலிகோ⁴தி வுத்தோ. தாலாவத்து²கதாதி ஸீஸச்சி²ன்னதாலோ விய கதா, ஸமூலம் வா தாலம் உத்³த⁴ரித்வா தாலஸ்ஸ வத்து² விய கதா, யதா² தஸ்மிம் வத்து²ஸ்மிம் புன ஸோ தாலோ ந பஞ்ஞாயதி, ஏவம் புன அபஞ்ஞத்திபா⁴வம் நீதாதி அத்தோ². போனோப்³ப⁴விகோதி புனப்³ப⁴வதா³யகோ. ஜாதிஸம்ஸாரோதிஆதீ³ஸு ஜாயனவஸேன சேவ ஸம்ஸரணவஸேன ச ஏவம் லத்³த⁴னாமானம் புனப்³ப⁴வக²ந்தா⁴னம் பச்சயோ கம்மாபி⁴ஸங்கா²ரோ. ஸோ ஹி புனப்புனம் உப்பத்திகரணவஸேன பரிக்கி²பித்வா டி²தத்தா பரிக்கா²தி வுச்சதி, தேனேஸ தஸ்ஸா ஸம்கிண்ணத்தா விகிண்ணத்தா ஸம்கிண்ணபரிக்கோ²தி வுத்தோ. தண்ஹாதி வட்டமூலிகா தண்ஹா. அயஞ்ஹி க³ம்பீ⁴ரானுக³தட்டே²ன ஏஸிகாதி வுச்சதி. தேனேஸ தஸ்ஸா அப்³பூ³ள்ஹத்தா லுஞ்சித்வா ச²ட்³டி³தத்தா அப்³பூ³ள்ஹேஸிகோதி வுத்தோ. ஓரம்பா⁴கி³யானீதி ஓரம் ப⁴ஜனகானி காமப⁴வே உபபத்திபச்சயானி. ஏதானி ஹி கவாடம் விய நக³ரத்³வாரம் சித்தம் பித³ஹித்வா டி²தத்தா அக்³க³ளாதி வுச்சந்தி. தேனேஸ தேஸம் நிராகதத்தா பி⁴ன்னத்தா நிரக்³க³ளோதி வுத்தோ. அரியோதி நிக்கிலேஸோ பரிஸுத்³தோ⁴. பன்னத்³த⁴ஜோதி பதிதமானத்³த⁴ஜோ. பன்னபா⁴ரோதி க²ந்த⁴பா⁴ரகிலேஸபா⁴ரஅபி⁴ஸங்கா²ரபா⁴ரபஞ்சகாமகு³ணபா⁴ரா பன்னா ஓரோஹிதா அஸ்ஸாதி பன்னபா⁴ரோ. அபிச இத⁴ மானபா⁴ரஸ்ஸேவ ஓரோபிதத்தா பன்னபா⁴ரோதி அதி⁴ப்பேதோ. விஸம்யுத்தோதி சதூஹி யோகே³ஹி ஸப்³ப³கிலேஸேஹி ச விஸம்யுத்தோ. இத⁴ பன மானஸம்யோகே³னேவ விஸம்யுத்தத்தா விஸம்யுத்தோதி அதி⁴ப்பேதோ. அஸ்மிமானோதி ரூபே அஸ்மீதி மானோ, வேத³னாய… ஸஞ்ஞாய… ஸங்கா²ரேஸு… விஞ்ஞாணே அஸ்மீதி மானோ.

ஏத்தாவதா ப⁴க³வதா மக்³கே³ன கிலேஸே கே²பேத்வா நிரோத⁴ஸயனவரக³தஸ்ஸ நிப்³பா³னாரம்மணம் ப²லஸமாபத்திம் அப்பேத்வா விஹரதோ கீ²ணாஸவஸ்ஸ காலோ த³ஸ்ஸிதோ. யதா² ஹி த்³வே நக³ரானி ஏகம் சோரனக³ரம், ஏகம் கே²மனக³ரம். அத² ஏகஸ்ஸ மஹாயோத⁴ஸ்ஸ ஏவம் ப⁴வேய்ய – ‘‘யாவிமம் சோரனக³ரம் திட்ட²தி, தாவ கே²மனக³ரம் ப⁴யதோ ந முச்சதி, சோரனக³ரம் அனக³ரம் கரிஸ்ஸாமீ’’தி ஸன்னாஹம் கத்வா க²க்³க³ம் க³ஹேத்வா சோரனக³ரம் உபஸங்கமித்வா நக³ரத்³வாரே உஸ்ஸாபிதே ஏஸிகத்த²ம்பே⁴ க²க்³கே³ன சி²ந்தி³த்வா ஸத்³வாரபா³ஹகம் கவாடம் சி²ந்தி³த்வா பலிக⁴ம் உக்கி²பித்வா பாகாரம் பி⁴ந்த³ந்தோ பரிக்க²ம் ஸம்கிரித்வா நக³ரஸோப⁴னத்தா²ய உஸ்ஸிதே த⁴ஜே பாதேத்வா நக³ரம் அக்³கி³னா ஜா²பேத்வா கே²மனக³ரம் பவிஸித்வா பாஸாத³ம் அபி⁴ருய்ஹ ஞாதிக³ணபரிவுதோ ஸுரஸபோ⁴ஜனம் பு⁴ஞ்ஜேய்ய, ஏவம் சோரனக³ரம் விய ஸக்காயோ, கே²மனக³ரம் விய நிப்³பா³னம், மஹாயோதோ⁴ விய யோகா³வசரோ. தஸ்ஸேவம் ஹோதி, ‘‘யாவ ஸக்காயவட்டம் வத்ததி, தாவ த்³வத்திம்ஸகம்மகாரணஅட்ட²னவுதிரோக³பஞ்சவீஸதிமஹாப⁴யேஹி பரிமுச்சனம் நத்தீ²’’தி. ஸோ மஹாயோதோ⁴ விய ஸன்னாஹம் ஸீலஸன்னாஹம் கத்வா, பஞ்ஞாக²க்³க³ம் க³ஹேத்வா க²க்³கே³ன ஏஸிகத்த²ம்பே⁴ விய அரஹத்தமக்³கே³ன தண்ஹேஸிகம் லுஞ்சித்வா, ஸோ யோதோ⁴ ஸத்³வாரபா³ஹகம் நக³ரகவாடம் விய பஞ்சோரம்பா⁴கி³யஸம்யோஜனக்³க³ளம் உக்³கா⁴டேத்வா, ஸோ யோதோ⁴ பலிக⁴ம் விய, அவிஜ்ஜாபலிக⁴ம் உக்கி²பித்வா, ஸோ யோதோ⁴ பாகாரம் பி⁴ந்த³ந்தோ பரிக்க²ம் விய கம்மாபி⁴ஸங்கா²ரம் பி⁴ந்த³ந்தோ ஜாதிஸம்ஸாரபரிக்க²ம் ஸம்கிரித்வா, ஸோ யோதோ⁴ நக³ரஸோப⁴னத்தா²ய உஸ்ஸாபிதே த⁴ஜே விய மானத்³த⁴ஜே பாதேத்வா ஸக்காயனக³ரம் ஜா²பேத்வா, ஸோ யோதோ⁴ கே²மனக³ரே உபரிபாஸாதே³ ஸுரஸபோ⁴ஜனம் விய கிலேஸனிப்³பா³னம் நக³ரம் பவிஸித்வா அமதனிரோதா⁴ரம்மணம் ப²லஸமாபத்திஸுக²ம் அனுப⁴வமானோ காலம் வீதினாமேதி.

246. இதா³னி ஏவம் விமுத்தசித்தஸ்ஸ கீ²ணாஸவஸ்ஸ பரேஹி அனதி⁴க³மனீயவிஞ்ஞாணதம் த³ஸ்ஸேந்தோ ஏவம் விமுத்தசித்தம் கோ²திஆதி³மாஹ. தத்த² அன்வேஸந்தி அன்வேஸந்தா க³வேஸந்தா. இத³ம் நிஸ்ஸிதந்தி இத³ம் நாம நிஸ்ஸிதம். ததா²க³தஸ்ஸாதி ஏத்த² ஸத்தோபி ததா²க³தோதி அதி⁴ப்பேதோ, உத்தமபுக்³க³லோ கீ²ணாஸவோபி. அனனுவிஜ்ஜோதி அஸம்விஜ்ஜமானோ வா அவிந்தே³ய்யோ வா. ததா²க³தோதி ஹி ஸத்தே க³ஹிதே அஸம்விஜ்ஜமானோதி அத்தோ² வட்டதி, கீ²ணாஸவே க³ஹிதே அவிந்தே³ய்யோதி அத்தோ² வட்டதி.

தத்த² புரிமனயே அயமதி⁴ப்பாயோ – பி⁴க்க²வே, அஹம் தி³ட்டே²வ த⁴ம்மே த⁴ரமானகம்யேவ கீ²ணாஸவம் ததா²க³தோ ஸத்தோ புக்³க³லோதி ந பஞ்ஞபேமி. அப்படிஸந்தி⁴கம் பன பரினிப்³பு³தம் கீ²ணாஸவம் ஸத்தோதி வா புக்³க³லோதி வா கிம் பஞ்ஞபேஸ்ஸாமி? அனனுவிஜ்ஜோ ததா²க³தோ. ந ஹி பரமத்த²தோ ஸத்தோ நாம கோசி அத்தி², தஸ்ஸ அவிஜ்ஜமானஸ்ஸ இத³ம் நிஸ்ஸிதம் விஞ்ஞாணந்தி அன்வேஸந்தாபி கிம் அதி⁴க³ச்சி²ஸ்ஸந்தி? கத²ம் படிலபி⁴ஸ்ஸந்தீதி அத்தோ². து³தியனயே அயமதி⁴ப்பாயோ – பி⁴க்க²வே, அஹம் தி³ட்டே²வ த⁴ம்மே த⁴ரமானகம்யேவ கீ²ணாஸவம் விஞ்ஞாணவஸேன இந்தா³தீ³ஹி அவிந்தி³யம் வதா³மி. ந ஹி ஸஇந்தா³ தே³வா ஸப்³ரஹ்மகா ஸபஜாபதிகா அன்வேஸந்தாபி கீ²ணாஸவஸ்ஸ விபஸ்ஸனாசித்தம் வா மக்³க³சித்தம் வா ப²லசித்தம் வா, இத³ம் நாம ஆரம்மணம் நிஸ்ஸாய வத்ததீதி ஜானிதும் ஸக்கோந்தி. தே அப்படிஸந்தி⁴கஸ்ஸ பரினிப்³பு³தஸ்ஸ கிம் ஜானிஸ்ஸந்தீதி?

அஸதாதி அஸந்தேன. துச்சா²தி துச்ச²கேன. முஸாதி முஸாவாதே³ன. அபூ⁴தேனாதி யம் நத்தி², தேன. அப்³பா⁴சிக்க²ந்தீதி அபி⁴ஆசிக்க²ந்தி, அபி⁴ப⁴வித்வா வத³ந்தி. வேனயிகோதி வினயதி வினாஸேதீதி வினயோ, ஸோ ஏவ வேனயிகோ, ஸத்தவினாஸகோதி அதி⁴ப்பாயோ. யதா² சாஹம் ந, பி⁴க்க²வேதி, பி⁴க்க²வே, யேன வாகாரேன அஹம் ந ஸத்தவினாஸகோ. யதா² சாஹம் ந வதா³மீதி யேன வா காரணேன அஹம் ஸத்தவினாஸம் ந பஞ்ஞபேமி. இத³ம் வுத்தம் ஹோதி – யதா²ஹம் ந ஸத்தவினாஸகோ, யதா² ச ந ஸத்தவினாஸம் பஞ்ஞபேமி, ததா² மம் தே போ⁴ந்தோ ஸமணப்³ராஹ்மணா ‘‘வேனயிகோ ஸமணோ கோ³தமோ’’தி வத³ந்தா ஸத்தவினாஸகோ ஸமணோ கோ³தமோதி ச, ‘‘ஸதோ ஸத்தஸ்ஸ உச்சே²த³ம் வினாஸம் விப⁴வம் பஞ்ஞபேதீ’’தி வத³ந்தா ஸத்தவினாஸம் பஞ்ஞபேதீதி ச அஸதா துச்சா² முஸா அபூ⁴தேன அப்³பா⁴சிக்க²ந்தீதி.

புப்³பே³ சாதி புப்³பே³ மஹாபோ³தி⁴மண்ட³ம்ஹியேவ ச. ஏதரஹி சாதி ஏதரஹி த⁴ம்மதே³ஸனாயஞ்ச. து³க்க²ஞ்சேவ பஞ்ஞபேமி, து³க்க²ஸ்ஸ ச நிரோத⁴ந்தி த⁴ம்மசக்கம் அப்பவத்தேத்வா போ³தி⁴மண்டே³ விஹரந்தோபி த⁴ம்மசக்கப்பவத்தனதோ பட்டா²ய த⁴ம்மம் தே³ஸேந்தோபி சதுஸச்சமேவ பஞ்ஞபேமீதி அத்தோ². ஏத்த² ஹி து³க்க²க்³க³ஹணேன தஸ்ஸ மூலபூ⁴தோ ஸமுத³யோ, நிரோத⁴க்³க³ஹணேன தம்ஸம்பாபகோ மக்³கோ³ க³ஹிதோவ ஹோதீதி வேதி³தப்³போ³. தத்ர சேதி தஸ்மிம் சதுஸச்சப்பகாஸனே. பரேதி ஸச்சானி ஆஜானிதும் படிவிஜ்ஜி²தும் அஸமத்த²புக்³க³லா. அக்கோஸந்தீதி த³ஸஹி அக்கோஸவத்தூ²ஹி அக்கோஸந்தி. பரிபா⁴ஸந்தீதி வாசாய பரிபா⁴ஸந்தி. ரோஸேந்தி விஹேஸேந்தீதி ரோஸேஸ்ஸாம விஹேஸேஸ்ஸாமாதி அதி⁴ப்பாயேன க⁴ட்டேந்தி து³க்கா²பேந்தி. தத்ராதி தேஸு அக்கோஸாதீ³ஸு, தேஸு வா பரபுக்³க³லேஸு. ஆகா⁴தோதி கோபோ. அப்பச்சயோதி தோ³மனஸ்ஸம். அனபி⁴ரத்³தீ⁴தி அதுட்டி².

தத்ர சேதி சதுஸச்சப்பகாஸனேயேவ. பரேதி சதுஸச்சப்பகாஸனம் ஆஜானிதும் படிவிஜ்ஜி²தும் ஸமத்த²புக்³க³லா. ஆனந்தோ³தி ஆனந்த³பீதி. உப்பிலாவிதத்தந்தி உப்பிலாபனபீதி. தத்ர சேதி சதுஸச்சப்பகாஸனம்ஹியேவ. தத்ராதி ஸக்காராதீ³ஸு. யம் கோ² இத³ம் புப்³பே³ பரிஞ்ஞாதந்தி இத³ம் க²ந்த⁴பஞ்சகம் புப்³பே³ போ³தி⁴மண்டே³ தீஹி பரிஞ்ஞாஹி பரிஞ்ஞாதம். தத்த²மேதி தஸ்மிம் க²ந்த⁴பஞ்சகே இமே. கிம் வுத்தம் ஹோதி? தத்ராபி ததா²க³தஸ்ஸ இமே ஸக்காரா மயி கரீயந்தீதி வா அஹம் ஏதே அனுப⁴வாமீதி வா ந ஹோதி. புப்³பே³ பரிஞ்ஞாதக்க²ந்த⁴பஞ்சகம்யேவ ஏதே ஸக்காரே அனுபோ⁴தீதி ஏத்தகமேவ ஹோதீதி. தஸ்மாதி யஸ்மா ஸச்சானி படிவிஜ்ஜி²தும் அஸமத்தா² ததா²க³தம்பி அக்கோஸந்தி, தஸ்மா. ஸேஸம் வுத்தனயேனேவ வேதி³தப்³ப³ம்.

247. தஸ்மா திஹ, பி⁴க்க²வே, யம் ந தும்ஹாகந்தி யஸ்மா அத்தனியேபி ச²ந்த³ராக³ப்பஹானம் தீ³க⁴ரத்தம் ஹிதாய ஸுகா²ய ஸம்வத்ததி, தஸ்மா யம் ந தும்ஹாகம், தம் பஜஹதா²தி அத்தோ². யதா²பச்சயம் வா கரேய்யாதி யதா² யதா² இச்சே²ய்ய ததா² ததா² கரேய்ய. ந ஹி நோ ஏதம், ப⁴ந்தே, அத்தா வாதி, ப⁴ந்தே, ஏதம் திணகட்ட²ஸாகா²பலாஸம் அம்ஹாகம் நேவ அத்தா ந அம்ஹாகம் ரூபம் ந விஞ்ஞாணந்தி வத³ந்தி. அத்தனியம் வாதி அம்ஹாகம் சீவராதி³பரிக்கா²ரோபி ந ஹோதீதி அத்தோ². ஏவமேவ கோ², பி⁴க்க²வே, யம் ந தும்ஹாகம் தம் பஜஹதா²தி ப⁴க³வா, க²ந்த⁴பஞ்சகம்யேவ ந தும்ஹாகந்தி த³ஸ்ஸேத்வா பஜஹாபேதி, தஞ்ச கோ² ந உப்பாடேத்வா, லுஞ்சித்வா வா. ச²ந்த³ராக³வினயேன பனேதம் பஜஹாபேதி.

248. ஏவம் ஸ்வாக்கா²தோதி ஏத்த² திபரிவட்டதோ பட்டா²ய யாவ இமம் டா²னம் ஆஹரிதும்பி வட்டதி, படிலோமேன பேமமத்தகேன ஸக்³க³பராயணதோ பட்டா²ய யாவ இமம் டா²னம் ஆஹரிதும்பி வட்டதி. ஸ்வாக்கா²தோதி ஸுகதி²தோ. ஸுகதி²தத்தா ஏவ உத்தானோ விவடோ பகாஸிதோ. சி²ன்னபிலோதிகோதி பிலோதிகா வுச்சதி சி²ன்னம் பி⁴ன்னம் தத்த² தத்த² ஸிப்³பி³தம் க³ண்டி²கதம் ஜிண்ணம் வத்த²ம், தம் யஸ்ஸ நத்தி², அட்ட²ஹத்த²ம் வா நவஹத்த²ம் வா அஹதஸாடகம் நிவத்தோ², ஸோ சி²ன்னபிலோதிகோ நாம. அயம்பி த⁴ம்மோ தாதி³ஸோ, ந ஹேத்த² கோஹஞ்ஞாதி³வஸேன சி²ன்னபி⁴ன்னஸிப்³பி³தக³ண்டி²கதபா⁴வோ அத்தி². அபிச கசவரோ பிலோதிகோதி வுச்சதி. இமஸ்மிஞ்ச ஸாஸனே ஸமணகசவரம் நாம பதிட்டா²தும் ந லப⁴தி. தேனேவாஹ –

‘‘காரண்ட³வம் நித்³த⁴மத², கஸம்பு³ஞ்சாபகஸ்ஸத²;

ததோ பலாபே வாஹேத², அஸ்ஸமணே ஸமணமானினே.

நித்³த⁴மித்வான பாபிச்சே², பாபஆசாரகோ³சரே;

ஸுத்³தா⁴ ஸுத்³தே⁴ஹி ஸம்வாஸம், கப்பயவ்ஹோ பதிஸ்ஸதா;

ததோ ஸமக்³கா³ நிபகா, து³க்க²ஸ்ஸந்தம் கரிஸ்ஸதா²’’தி. (ஸு. நி. 283-285);

இதி ஸமணகசவரஸ்ஸ சி²ன்னத்தாபி அயம் த⁴ம்மோ சி²ன்னபிலோதிகோ நாம ஹோதி. வட்டம் தேஸம் நத்தி² பஞ்ஞாபனாயாதி தேஸம் வட்டம் அபஞ்ஞத்திபா⁴வம் க³தம் நிப்பஞ்ஞத்திகம் ஜாதம். ஏவரூபோ மஹாகீ²ணாஸவோ ஏவம் ஸ்வாக்கா²தே ஸாஸனேயேவ உப்பஜ்ஜதி. யதா² ச கீ²ணாஸவோ, ஏவம் அனாகா³மிஆத³யோபி.

தத்த² த⁴ம்மானுஸாரினோ ஸத்³தா⁴னுஸாரினோதி இமே த்³வே ஸோதாபத்திமக்³க³ட்டா² ஹோந்தி. யதா²ஹ – ‘‘கதமோ ச புக்³க³லோ த⁴ம்மானுஸாரீ? யஸ்ஸ புக்³க³லஸ்ஸ ஸோதாபத்திப²லஸச்சி²கிரியாய படிபன்னஸ்ஸ பஞ்ஞிந்த்³ரியம் அதி⁴மத்தம் ஹோதி, பஞ்ஞாவாஹிம் பஞ்ஞாபுப்³ப³ங்க³மம் அரியமக்³க³ம் பா⁴வேதி. அயம் வுச்சதி புக்³க³லோ த⁴ம்மானுஸாரீ. ஸோதாபத்திப²லஸச்சி²கிரியாய படிபன்னோ புக்³க³லோ த⁴ம்மானுஸாரீ, ப²லே டி²தோ தி³ட்டி²ப்பத்தோ. கதமோ ச புக்³க³லோ ஸத்³தா⁴னுஸாரீ? யஸ்ஸ புக்³க³லஸ்ஸ ஸோதாபத்திப²லஸச்சி²கிரியாய படிபன்னஸ்ஸ ஸத்³தி⁴ந்த்³ரியம் அதி⁴மத்தம் ஹோதி, ஸத்³தா⁴வாஹிம் ஸத்³தா⁴புப்³ப³ங்க³மம் அரியமக்³க³ம் பா⁴வேதி. அயம் வுச்சதி புக்³க³லோ ஸத்³தா⁴னுஸாரீ. ஸோதாபத்திப²லஸச்சி²கிரியாய படிபன்னோ புக்³க³லோ ஸத்³தா⁴னுஸாரீ, ப²லே டி²தோ ஸத்³தா⁴விமுத்தோ’’தி (பு. ப. 30). யேஸம் மயி ஸத்³தா⁴மத்தம் பேமமத்தந்தி இமினா யேஸம் அஞ்ஞோ அரியத⁴ம்மோ நத்தி², ததா²க³தே பன ஸத்³தா⁴மத்தம் பேமமத்தமேவ ஹோதி. தே விபஸ்ஸகபுக்³க³லா அதி⁴ப்பேதா. விபஸ்ஸகபி⁴க்கூ²னஞ்ஹி ஏவம் விபஸ்ஸனம் பட்ட²பேத்வா நிஸின்னானம் த³ஸப³லே ஏகா ஸத்³தா⁴ ஏகம் பேமம் உப்பஜ்ஜதி. தாய ஸத்³தா⁴ய தேன பேமேன ஹத்தே² க³ஹேத்வா ஸக்³கே³ ட²பிதா விய ஹோந்தி, நியதக³திகா கிர ஏதே. போராணகத்தே²ரா பன ஏவரூபம் பி⁴க்கு²ம் சூளஸோதாபன்னோதி வத³ந்தி. ஸேஸம் ஸப்³ப³த்த² உத்தானத்த²மேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

அலக³த்³தூ³பமஸுத்தவண்ணனா நிட்டி²தா.

3. வம்மிகஸுத்தவண்ணனா

249. ஏவம் மே ஸுதந்தி வம்மிகஸுத்தம். தத்த² ஆயஸ்மாதி பியவசனமேதம். குமாரகஸ்ஸபோதி தஸ்ஸ நாமம். குமாரகாலே பப்³ப³ஜிதத்தா பன ப⁴க³வதா, ‘‘கஸ்ஸபம் பக்கோஸத², இத³ம் ப²லம் வா கா²த³னீயம் வா கஸ்ஸபஸ்ஸ தே³தா²’’தி வுத்தே, கதரஸ்ஸ கஸ்ஸபஸ்ஸாதி குமாரகஸ்ஸபஸ்ஸாதி ஏவம் க³ஹிதனாமத்தா ததோ பட்டா²ய வுட்³ட⁴காலேபி ‘‘குமாரகஸ்ஸபோ’’ த்வேவ வுச்சதி. அபிச ரஞ்ஞா போஸாவனிகபுத்தத்தாபி தம் ‘‘குமாரகஸ்ஸபோ’’தி ஸஞ்ஜானிம்ஸு. அயம் பனஸ்ஸ புப்³ப³யோக³தோ பட்டா²ய ஆவிபா⁴வகதா² –

தே²ரோ கிர பது³முத்தரஸ்ஸ ப⁴க³வதோ காலே ஸேட்டி²புத்தோ அஹோஸி. அதே²கதி³வஸம் ப⁴க³வந்தம் சித்ரகதி²ம் ஏகம் அத்தனோ ஸாவகம் டா²னந்தரே ட²பேந்தம் தி³ஸ்வா ப⁴க³வதோ ஸத்தாஹம் தா³னம் த³த்வா, ‘‘அஹம்பி ப⁴க³வா அனாக³தே ஏகஸ்ஸ பு³த்³த⁴ஸ்ஸ அயம் தே²ரோ விய சித்ரகதீ² ஸாவகோ ப⁴வேய்ய’’ந்தி பத்த²னம் கத்வா புஞ்ஞானி கரோந்தோ கஸ்ஸபஸ்ஸ ப⁴க³வதோ ஸாஸனே பப்³ப³ஜித்வா விஸேஸம் நிப்³ப³த்தேதும் நாஸக்கி².

ததா³ கிர பரினிப்³பு³தஸ்ஸ ப⁴க³வதோ ஸாஸனே ஓஸக்கந்தே பஞ்ச பி⁴க்கூ² நிஸ்ஸேணிம் ப³ந்தி⁴த்வா பப்³ப³தம் அபி⁴ருய்ஹ ஸமணத⁴ம்மம் அகம்ஸு. ஸங்க⁴த்தே²ரோ ததியதி³வஸே அரஹத்தம் பத்தோ. அனுதே²ரோ சதுத்த²தி³வஸே அனாகா³மீ அஹோஸி. இதரே தயோ விஸேஸம் நிப்³ப³த்தேதும் அஸக்கோந்தா தே³வலோகே நிப்³ப³த்திம்ஸு. தேஸம் ஏகம் பு³த்³த⁴ந்தரம் தே³வேஸு ச மனுஸ்ஸேஸு ச ஸம்பத்திம் அனுபோ⁴ந்தானம் ஏகோ தக்கஸிலாயம் ராஜகுலே நிப்³ப³த்தித்வா புக்குஸாதி நாம ராஜா ஹுத்வா ப⁴க³வந்தம் உத்³தி³ஸ்ஸ பப்³ப³ஜித்வா ராஜக³ஹம் க³ச்ச²ந்தோ கும்ப⁴காரஸாலாயம் ப⁴க³வதோ த⁴ம்மதே³ஸனம் ஸுத்வா அனாகா³மிப²லம் பத்தோ. ஏகோ ஏகஸ்மிம் ஸமுத்³த³பட்டனே குலக⁴ரே நிப்³ப³த்தித்வா நாவம் ஆருய்ஹ பி⁴ன்னனாவோ தா³ருசீரானி நிவாஸேத்வா லாப⁴ஸம்பத்திம் பத்தோ, ‘‘அஹம் அரஹா’’தி சித்தம் உப்பாதே³த்வா, ‘‘ந த்வம் அரஹா, க³ச்ச² ஸத்தா²ரம் பஞ்ஹம் புச்சா²’’தி அத்த²காமாய தே³வதாய சோதி³தோ ததா² கத்வா அரஹத்தப²லம் பத்தோ.

ஏகோ ராஜக³ஹே ஏகிஸ்ஸா குலதா³ரிகாய குச்சி²ம்ஹி உப்பன்னோ. ஸா ச பட²மம் மாதாபிதரோ யாசித்வா பப்³ப³ஜ்ஜம் அலப⁴மானா குலக⁴ரம் க³தா க³ப்³ப⁴ஸண்டி²தம்பி அஜானந்தீ ஸாமிகம் ஆராதே⁴த்வா தேன அனுஞ்ஞாதா பி⁴க்கு²னீஸு பப்³ப³ஜிதா. தஸ்ஸா க³ப்³பி⁴னினிமித்தம் தி³ஸ்வா பி⁴க்கு²னியோ தே³வத³த்தம் புச்சி²ம்ஸு, ஸோ ‘‘அஸ்ஸமணீ’’தி ஆஹ. த³ஸப³லம் புச்சி²ம்ஸு, ஸத்தா² உபாலித்தே²ரம் படிச்சா²பேஸி. தே²ரோ ஸாவத்தி²னக³ரவாஸீனி குலானி விஸாக²ஞ்ச உபாஸிகம் பக்கோஸாபேத்வா ஸோதே⁴ந்தோ, – ‘‘புரே லத்³தோ⁴ க³ப்³போ⁴, பப்³ப³ஜ்ஜா அரோகா³’’தி ஆஹ. ஸத்தா² ‘‘ஸுவினிச்சி²தம் அதி⁴கரண’’ந்தி தே²ரஸ்ஸ ஸாது⁴காரம் அதா³ஸி. ஸா பி⁴க்கு²னீ ஸுவண்ணபி³ம்ப³ஸதி³ஸம் புத்தம் விஜாயி, தம் க³ஹேத்வா ராஜா பஸேனதி³ கோஸலோ போஸாபேஸி. ‘‘கஸ்ஸபோ’’தி சஸ்ஸ நாமம் கத்வா அபரபா⁴கே³ அலங்கரித்வா ஸத்து² ஸந்திகம் நேத்வா பப்³பா³ஜேஸி. இதி ரஞ்ஞோ போஸாவனிகபுத்தத்தாபி தம் ‘‘குமாரகஸ்ஸபோ’’தி ஸஞ்ஜானிம்ஸூதி.

அந்த⁴வனேதி ஏவம்னாமகே வனே. தம் கிர வனம் த்³வின்னம் பு³த்³தா⁴னம் காலே அவிஜஹிதனாமம் அந்த⁴வனம்த்வேவ பஞ்ஞாயதி. தத்ராயம் பஞ்ஞத்திவிபா⁴வனா – அப்பாயுகபு³த்³தா⁴னஞ்ஹி ஸரீரதா⁴து ந ஏகக்³க⁴னா ஹோதி. அதி⁴ட்டா²னானுபா⁴வேன விப்பகிரியதி. தேனேவ அம்ஹாகம்பி ப⁴க³வா, – ‘‘அஹம் ந சிரட்டி²திகோ, அப்பகேஹி ஸத்தேஹி அஹம் தி³ட்டோ², யேஹி ந தி³ட்டோ², தேவ ப³ஹுதரா, தே மே தா⁴துயோ ஆதா³ய தத்த² தத்த² பூஜேந்தா ஸக்³க³பராயணா ப⁴விஸ்ஸந்தீ’’தி பரினிப்³பா³னகாலே, ‘‘அத்தனோ ஸரீரம் விப்பகிரியதூ’’தி அதி⁴ட்டா²ஸி. தீ³கா⁴யுகபு³த்³தா⁴னம் பன ஸுவண்ணக்க²ந்தோ⁴ விய ஏகக்³க⁴னம் தா⁴துஸரீரம் திட்ட²தி.

கஸ்ஸபஸ்ஸாபி ப⁴க³வதோ ததே²வ அட்டா²ஸி. ததோ மஹாஜனா ஸன்னிபதித்வா, ‘‘தா⁴துயோ ஏகக்³க⁴னா ந ஸக்கா வியோஜேதும், கிம் கரிஸ்ஸாமா’’தி ஸம்மந்தயித்வா ஏகக்³க⁴னமேவ சேதியம் கரிஸ்ஸாம, கித்தகம் பன ஹோது தந்தி ஆஹம்ஸு. ஏகே ஸத்தயோஜனியந்தி ஆஹம்ஸு. ஏதம் அதிமஹந்தம், அனாக³தே ஜக்³கி³தும் ந ஸக்கா, ச²யோஜனம் ஹோது, பஞ்சயோஜனம்… சதுயோஜனம்… தியோஜனம்… த்³வியோஜனம்… ஏகயோஜனம் ஹோதூதி ஸன்னிட்டா²னம் கத்வா இட்ட²கா கீதி³ஸா ஹோந்தூதி பா³ஹிரந்தே இட்ட²கா ரத்தஸுவண்ணமயா ஏகக்³க⁴னா ஸதஸஹஸ்ஸக்³க⁴னிகா ஹோந்து, அப்³ப⁴ந்தரிமந்தே பஞ்ஞாஸஸஹஸ்ஸக்³க⁴னிகா. ஹரிதாலமனோஸிலாஹி மத்திகாகிச்சம் கயிரது, தேலேன உத³ககிச்சந்தி நிட்ட²ம் க³ந்த்வா சத்தாரி முகா²னி சதுதா⁴ விப⁴ஜிம்ஸு. ராஜா ஏகம் முக²ம் க³ண்ஹி, ராஜபுத்தோ பத²விந்த³ரகுமாரோ ஏகம், அமச்சானம் ஜேட்ட²கோ ஹுத்வா ஸேனாபதி ஏகம், ஜனபதா³னம் ஜேட்ட²கோ ஹுத்வா ஸேட்டி² ஏகம்.

தத்த² த⁴னஸம்பன்னதாய ராஜாபி ஸுவண்ணம் நீஹராபேத்வா அத்தனா க³ஹிதமுகே² கம்மம் ஆரபி⁴, உபராஜாபி, ஸேனாபதிபி. ஸேட்டி²னா க³ஹிதமுகே² பன கம்மம் ஓலீயதி. ததோ யஸோரதோ நாம ஏகோ உபாஸகோ தேபிடகோ பா⁴ணகோ அனாகா³மீ அரியஸாவகோ, ஸோ கம்மம் ஓலீயதீதி ஞத்வா பஞ்ச ஸகடஸதானி யோஜாபேத்வா ஜனபத³ம் க³ந்த்வா ‘‘கஸ்ஸபஸம்மாஸம்பு³த்³தோ⁴ வீஸதிவஸ்ஸஸஹஸ்ஸானி ட²த்வா பரினிப்³பு³தோ. தஸ்ஸ யோஜனிகம் ரதனசேதியம் கயிரதி, யோ யம் தா³தும் உஸ்ஸஹதி ஸுவண்ணம் வா ஹிரஞ்ஞம் வா ஸத்தரதனம் வா ஹரிதாலம் வா மனோஸிலம் வா, ஸோ தம் தே³தூ’’தி ஸமாத³பேஸி. மனுஸ்ஸா அத்தனோ அத்தனோ தா²மேன ஹிரஞ்ஞஸுவண்ணாதீ³னி அத³ம்ஸு. அஸக்கோந்தா தேலதண்டு³லாதீ³னி தே³ந்தியேவ. உபாஸகோ தேலதண்டு³லாதீ³னி கம்மகாரானம் ப⁴த்தவேதனத்த²ம் பஹிணாதி, அவஸேஸேஹி ஸுவண்ணம் சேதாபேத்வா பஹிணாதி, ஏவம் ஸகலஜம்பு³தீ³பம் அசரி.

சேதியே கம்மம் நிட்டி²தந்தி சேதியட்டா²னதோ பண்ணம் பஹிணிம்ஸு – ‘‘நிட்டி²தம் கம்மம் ஆசரியோ ஆக³ந்த்வா சேதியம் வந்த³தூ’’தி. ஸோபி பண்ணம் பஹிணி – ‘‘மயா ஸகலஜம்பு³தீ³போ ஸமாத³பிதோ, யம் அத்தி², தம் க³ஹேத்வா கம்மம் நிட்டா²பேந்தூ’’தி. த்³வேபி பண்ணானி அந்தராமக்³கே³ ஸமாக³மிம்ஸு. ஆசரியஸ்ஸ பண்ணதோ பன சேதியட்டா²னதோ பண்ணம் பட²மதரம் ஆசரியஸ்ஸ ஹத்த²ம் அக³மாஸி. ஸோ பண்ணம் வாசேத்வா சேதியம் வந்தி³ஸ்ஸாமீதி ஏககோவ நிக்க²மி. அந்தராமக்³கே³ அடவியம் பஞ்ச சோரஸதானி உட்ட²ஹிம்ஸு. தத்ரேகச்சே தம் தி³ஸ்வா இமினா ஸகலஜம்பு³தீ³பதோ ஹிரஞ்ஞஸுவண்ணம் ஸம்பிண்டி³தம், நிதி⁴கும்பீ⁴ நோ பவட்டமானா ஆக³தாதி அவஸேஸானம் ஆரோசேத்வா தம் அக்³க³ஹேஸும். கஸ்மா தாதா, மம் க³ண்ஹதா²தி? தயா ஸகலஜம்பு³தீ³பதோ ஸப்³ப³ம் ஹிரஞ்ஞஸுவண்ணம் ஸம்பிண்டி³தம், அம்ஹாகம்பி தோ²கம் தோ²கம் தே³ஹீதி. கிம் தும்ஹே ந ஜானாத², கஸ்ஸபோ ப⁴க³வா பரினிப்³பு³தோ, தஸ்ஸ யோஜனிகம் ரதனசேதியம் கயிரதி, தத³த்தா²ய மயா ஸமாத³பிதம், நோ அத்தனோ அத்தா²ய. தம் தம் லத்³த⁴லத்³த⁴ட்டா²னதோ தத்தே²வ பேஸிதம், மய்ஹம் பன நிவத்த²ஸாடகமத்தம் ட²பேத்வா அஞ்ஞம் வித்தம் காகணிகம்பி நத்தீ²தி.

ஏகே, ‘‘ஏவமேதம் விஸ்ஸஜேத² ஆசரிய’’ந்தி ஆஹம்ஸு. ஏகே, ‘‘அயம் ராஜபூஜிதோ அமச்சபூஜிதோ, அம்ஹேஸு கஞ்சிதே³வ நக³ரவீதி²யம் தி³ஸ்வா ராஜராஜமஹாமத்தாதீ³னம் ஆரோசேத்வா அனயவ்யஸனம் பாபுணாபேய்யா’’தி ஆஹம்ஸு. உபாஸகோ, ‘‘தாதா, நாஹம் ஏவம் கரிஸ்ஸாமீ’’தி ஆஹ. தஞ்ச கோ² தேஸு காருஞ்ஞேன, ந அத்தனோ ஜீவிதனிகந்தியா. அத² தேஸு க³ஹேதப்³போ³ விஸ்ஸஜ்ஜேதப்³போ³தி விவத³ந்தேஸு க³ஹேதப்³போ³தி லத்³தி⁴கா ஏவ ப³ஹுதரா ஹுத்வா ஜீவிதா வோரோபயிம்ஸு.

தேஸம் ப³லவகு³ணே அரியஸாவகே அபராதே⁴ன நிப்³பு³ததீ³பஸிகா² விய அக்கீ²னி அந்தரதா⁴யிம்ஸு. தே, ‘‘கஹம் போ⁴ சக்கு², கஹம் போ⁴ சக்கூ²’’தி விப்பலபந்தா ஏகச்சே ஞாதகேஹி கே³ஹம் நீதா. ஏகச்சே நோஞாதகா அனாதா²தி தத்தே²வ அடவியம் ருக்க²மூலே பண்ணஸாலாயம் வஸிம்ஸு. அடவிம் ஆக³தமனுஸ்ஸா காருஞ்ஞேன தேஸம் தண்டு³லம் வா புடப⁴த்தம் வா பரிப்³ப³யம் வா தே³ந்தி. தா³ருபண்ணாதீ³னம் அத்தா²ய க³ந்த்வா ஆக³தா மனுஸ்ஸா குஹிம் க³தத்தா²தி வுத்தே அந்த⁴வனம் க³தம்ஹாதி வத³ந்தி. ஏவம் த்³வின்னம்பி பு³த்³தா⁴னம் காலே தம் வனம் அந்த⁴வனம்த்வேவ பஞ்ஞாயதி. கஸ்ஸபபு³த்³த⁴காலே பனேதம் ச²ட்³டி³தஜனபதே³ அடவி அஹோஸி. அம்ஹாகம் ப⁴க³வதோ காலே ஸாவத்தி²யா அவிதூ³ரே ஜேதவனஸ்ஸ பிட்டி²பா⁴கே³ பவிவேககாமானம் குலபுத்தானம் வஸனட்டா²னம் பதா⁴னக⁴ரம் அஹோஸி, தத்த² ஆயஸ்மா குமாரகஸ்ஸபோ தேன ஸமயேன ஸேக²படிபத³ம் பூரயமானோ விஹரதி. தேன வுத்தம் ‘‘அந்த⁴வனே விஹரதீ’’தி.

அஞ்ஞதரா தே³வதாதி நாமகோ³த்தவஸேன அபாகடா ஏகா தே³வதாதி அத்தோ². ‘‘அபி⁴ஜானாதி நோ, ப⁴ந்தே, ப⁴க³வா அஹுஞாதஞ்ஞதரஸ்ஸ மஹேஸக்க²ஸ்ஸ ஸம்கி²த்தேன தண்ஹாஸங்க²யவிமுத்திம் பா⁴ஸிதா’’தி (ம. நி. 1.365) ஏத்த² பன அபி⁴ஞ்ஞாதோ ஸக்கோபி தே³வராஜா அஞ்ஞதரோதி வுத்தோ. தே³வதாதி ச இத³ம் தே³வானம்பி தே³வதீ⁴தானம்பி ஸாதா⁴ரணவசனம். இமஸ்மிம் பனத்தே² தே³வோ அதி⁴ப்பேதோ. அபி⁴க்கந்தாய ரத்தியாதி ஏத்த² அபி⁴க்கந்தஸத்³தோ³ க²யஸுந்த³ராபி⁴ரூபஅப்³ப⁴னுமோத³னாதீ³ஸு தி³ஸ்ஸதி. தத்த² – ‘‘அபி⁴க்கந்தா, ப⁴ந்தே, ரத்தி, நிக்க²ந்தோ பட²மோ யாமோ, சிரனிஸின்னோ பி⁴க்கு²ஸங்கோ⁴, உத்³தி³ஸது, ப⁴ந்தே, ப⁴க³வா பி⁴க்கூ²னம் பாதிமோக்க²’’ந்தி ஏவமாதீ³ஸு (அ. நி. 8.20) க²யே தி³ஸ்ஸதி. ‘‘அயம் இமேஸம் சதுன்னம் புக்³க³லானம் அபி⁴க்கந்ததரோ ச பணீததரோ சா’’தி (அ. நி. 4.100) ஏவமாதீ³ஸு ஸுந்த³ரே.

‘‘கோ மே வந்த³தி பாதா³னி, இத்³தி⁴யா யஸஸா ஜலம்;

அபி⁴க்கந்தேன வண்ணேன, ஸப்³பா³ ஓபா⁴ஸயம் தி³ஸா’’தி. (வி. வ. 857) –

ஏவமாதீ³ஸு அபி⁴ரூபே. ‘‘அபி⁴க்கந்தம், போ⁴ கோ³தமா’’தி ஏவமாதீ³ஸு (பாரா. 15) அப்³ப⁴னுமோத³னே. இத⁴ பன க²யே. தேன அபி⁴க்கந்தாய ரத்தியாதி பரிக்கீ²ணாய ரத்தியாதி வுத்தம் ஹோதி. தத்தா²யம் தே³வபுத்தோ மஜ்ஜி²மயாமஸமனந்தரே ஆக³தோதி வேதி³தப்³போ³. அபி⁴க்கந்தவண்ணாதி இத⁴ அபி⁴க்கந்தஸத்³தோ³ அபி⁴ரூபே. வண்ணஸத்³தோ³ பன ச²வி-து²தி-குலவக்³க³காரண-ஸண்டா²னபமாணரூபாயதனாதீ³ஸு தி³ஸ்ஸதி. தத்த², ‘‘ஸுவண்ணவண்ணோஸி ப⁴க³வா’’தி ஏவமாதீ³ஸு ச²வியா. ‘‘கதா³ ஸஞ்ஞூள்ஹா பன தே க³ஹபதி ஸமணஸ்ஸ கோ³தமஸ்ஸ வண்ணா’’தி (ம. நி. 2.77) ஏவமாதீ³ஸு து²தியம். ‘‘சத்தாரோமே, போ⁴ கோ³தம, வண்ணா’’தி ஏவமாதீ³ஸு (தீ³. நி. 3.115) குலவக்³கே³. ‘‘அத² கேன நு வண்ணேன, க³ந்த⁴தே²னோதி வுச்சதீ’’தி ஏவமாதீ³ஸு (ஸம். நி. 1.234) காரணே. ‘‘மஹந்தம் ஹத்தி²ராஜவண்ணம் அபி⁴னிம்மினித்வா’’தி ஏவமாதீ³ஸு (ஸம். நி. 1.138) ஸண்டா²னே. ‘‘தயோ பத்தஸ்ஸ வண்ணா’’தி ஏவமாதீ³ஸு (பாரா. 602) பமாணே. ‘‘வண்ணோ க³ந்தோ⁴ ரஸோ ஓஜா’’தி ஏவமாதீ³ஸு ரூபாயதனே. ஸோ இத⁴ ச²வியம் த³ட்ட²ப்³போ³. தேன அபி⁴க்கந்தவண்ணாதி அபி⁴ரூபச²விஇட்ட²வண்ணா, மனாபவண்ணாதி வுத்தம் ஹோதி. தே³வதா ஹி மனுஸ்ஸலோகம் ஆக³ச்ச²மானா பகதிவண்ணம் பகதிஇத்³தி⁴ம் பஜஹித்வா ஓளாரிகம் அத்தபா⁴வம் கத்வா அதிரேகவண்ணம் அதிரேகஇத்³தி⁴ம் மாபேத்வா நடஸமஜ்ஜாதீ³னி க³ச்ச²ந்தா மனுஸ்ஸா விய அபி⁴ஸங்க²தேன காயேன ஆக³ச்ச²ந்தி. அயம்பி தே³வபுத்தோ ததே²வ ஆக³தோ. தேன வுத்தம் ‘‘அபி⁴க்கந்தவண்ணா’’தி.

கேவலகப்பந்தி ஏத்த² கேவலஸத்³தோ³ அனவஸேஸ-யேபூ⁴ய்ய-அப்³யாமிஸ்ஸானதிரேகத³ள்ஹத்த²-விஸம்யோகா³தி³அனேகத்தோ². ததா² ஹிஸ்ஸ, ‘‘கேவலபரிபுண்ணம் பரிஸுத்³த⁴ம் ப்³ரஹ்மசரிய’’ந்தி (பாரா. 1) ஏவமாதீ³ஸு அனவஸேஸத்தமத்தோ². ‘‘கேவலகப்பா ச அங்க³மக³தா⁴ பஹூதம் கா²த³னீயம் போ⁴ஜனீயம் ஆதா³ய உபஸங்கமிஸ்ஸந்தீ’’தி ஏவமாதீ³ஸு யேபு⁴ய்யதா. ‘‘கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதீ’’தி (விப⁴. 225) ஏவமாதீ³ஸு அப்³யாமிஸ்ஸதா. ‘‘கேவலம் ஸத்³தா⁴மத்தகம் நூன அயமாயஸ்மா’’தி (மஹாவ. 244) ஏவமாதீ³ஸு அனதிரேகதா. ‘‘ஆயஸ்மதோ அனுருத்³த⁴ஸ்ஸ பா³ஹியோ நாம ஸத்³தி⁴விஹாரிகோ கேவலகப்பம் ஸங்க⁴பே⁴தா³ய டி²தோ’’தி (அ. நி. 4.243) ஏவமாதீ³ஸு த³ள்ஹத்த²தா. ‘‘கேவலீ வுஸிதவா உத்தமபுரிஸோதி வுச்சதீ’’தி (ஸம். நி. 3.57) ஏவமாதீ³ஸு விஸம்யோகோ³. இத⁴ பனஸ்ஸ அனவஸேஸத்தமத்தோ²தி அதி⁴ப்பேதோ.

கப்பஸத்³தோ³ பனாயம் அபி⁴ஸத்³த³ஹன-வோஹார-கால-பஞ்ஞத்தி- சே²த³ன-விகப்ப-லேஸ-ஸமந்தபா⁴வாதி³-அனேகத்தோ². ததா² ஹிஸ்ஸ, ‘‘ஓகப்பனியமேதம் போ⁴தோ கோ³தமஸ்ஸ, யதா² தம் அரஹதோ ஸம்மாஸம்பு³த்³த⁴ஸ்ஸா’’தி (ம. நி. 1.387) ஏவமாதீ³ஸு அபி⁴ஸத்³த³ஹனமத்தோ². ‘‘அனுஜானாமி, பி⁴க்க²வே, பஞ்சஹி ஸமணகப்பேஹி ப²லம் பரிபு⁴ஞ்ஜிது’’ந்தி (சூளவ. 250) ஏவமாதீ³ஸு வோஹாரோ. ‘‘யேன ஸுத³ம் நிச்சகப்பம் விஹராமீ’’தி ஏவமாதீ³ஸு (ம. நி. 1.387) காலோ. ‘‘இச்சாயஸ்மா கப்போ’’தி (ஸம். நி. 3.124) ஏவமாதீ³ஸு பஞ்ஞத்தி. ‘‘அலங்கதா கப்பிதகேஸமஸ்ஸூ’’தி (ஸம். நி. 4.365) ஏவமாதீ³ஸு சே²த³னம். ‘‘கப்பதி த்³வங்கு³லகப்போ’’தி (சூளவ. 446) ஏவமாதீ³ஸு விகப்போ. ‘‘அத்தி² கப்போ நிபஜ்ஜிது’’ந்தி (அ. நி. 8.80) ஏவமாதீ³ஸு லேஸோ. ‘‘கேவலகப்பம் வேளுவனம் ஓபா⁴ஸேத்வா’’தி (ஸம். நி. 1.94) ஏவமாதீ³ஸு ஸமந்தபா⁴வோ. இத⁴ பனஸ்ஸ ஸமந்தபா⁴வோ அத்தோ² அதி⁴ப்பேதோ. தஸ்மா கேவலகப்பம் அந்த⁴வனந்தி ஏத்த² அனவஸேஸம் ஸமந்ததோ அந்த⁴வனந்தி ஏவமத்தோ² த³ட்ட²ப்³போ³.

ஓபா⁴ஸேத்வாதி வத்தா²லங்காரஸரீரஸமுட்டி²தாய ஆபா⁴ய ப²ரித்வா, சந்தி³மா விய ச ஸூரியோ விய ச ஏகோபா⁴ஸம் ஏகபஜ்ஜோதம் கரித்வாதி அத்தோ². ஏகமந்தம் அட்டா²ஸீதி ஏகஸ்மிம் அந்தே, ஏகஸ்மிம் ஓகாஸே அட்டா²ஸி. ஏதத³வோசாதி ஏதம் ‘‘பி⁴க்கு² பி⁴க்கூ²’’திஆதி³வசனமவோச. கஸ்மா பனாயம் அவந்தி³த்வா ஸமணவோஹாரேனேவ கதே²தீதி? ஸமணஸஞ்ஞாஸமுதா³சாரேனேவ. ஏவம் கிரஸ்ஸ அஹோஸி – ‘‘அயம் அந்தரா காமாவசரே வஸி. அஹம் பன அஸ்மி ததோ காலதோ பட்டா²ய ப்³ரஹ்மசாரீ’’தி ஸமணஸஞ்ஞாவஸ்ஸ ஸமுதா³சரதி, தஸ்மா அவந்தி³த்வா ஸமணவோஹாரேனேவ கதே²தி. புப்³ப³ஸஹாயோ கிரேஸோ தே³வபுத்தோ தே²ரஸ்ஸ. குதோ பட்டா²யாதி? கஸ்ஸபஸம்மாஸம்பு³த்³த⁴காலதோ பட்டா²ய. யோ ஹி புப்³ப³யோகே³ ஆக³தேஸு பஞ்சஸு ஸஹாயேஸு அனுதே²ரோ சதுத்த²தி³வஸே அனாகா³மீ அஹோஸீதி வுத்தோ, அயம் ஸோ. ததா³ கிர தேஸு ஸங்க⁴த்தே²ரஸ்ஸ அரஹத்தேனேவ ஸத்³தி⁴ம் அபி⁴ஞ்ஞா ஆக³மிம்ஸு. ஸோ, ‘‘மய்ஹம் கிச்சம் மத்த²கம் பத்த’’ந்தி வேஹாஸம் உப்பதித்வா அனோதத்தத³ஹே முக²ம் தோ⁴வித்வா உத்தரகுருதோ பிண்ட³பாதம் ஆதா³ய ஆக³ந்த்வா, ‘‘இமம், ஆவுஸோ, பிண்ட³பாதம் பு⁴ஞ்ஜித்வா அப்பமத்தா ஸமணத⁴ம்மம் கரோதா²’’தி ஆஹ. இதரே ஆஹம்ஸு – ‘‘ந, ஆவுஸோ, அம்ஹாகம் ஏவம் கதிகா அத்தி² – ‘யோ பட²மம் விஸேஸம் நிப்³ப³த்தேத்வா பிண்ட³பாதம் ஆஹரதி, தேனாப⁴தம் பு⁴ஞ்ஜித்வா ஸேஸேஹி ஸமணத⁴ம்மோ காதப்³போ³’தி. தும்ஹே அத்தனோ உபனிஸ்ஸயேன கிச்சம் மத்த²கம் பாபயித்த². மயம்பி ஸசே நோ உபனிஸ்ஸயோ ப⁴விஸ்ஸதி, கிச்சம் மத்த²கம் பாபேஸ்ஸாம. பபஞ்சோ ஏஸ அம்ஹாகம், க³ச்ச²த² தும்ஹே’’தி. ஸோ யதா²பா²ஸுகம் க³ந்த்வா ஆயுபரியோஸானே பரினிப்³பா³யி.

புனதி³வஸே அனுதே²ரோ அனாகா³மிப²லம் ஸச்ச²காஸி, தஸ்ஸ அபி⁴ஞ்ஞாயோ ஆக³மிம்ஸு. ஸோபி ததே²வ பிண்ட³பாதம் ஆஹரித்வா தேஹி படிக்கி²த்தோ யதா²பா²ஸுகம் க³ந்த்வா ஆயுபரியோஸானே ஸுத்³தா⁴வாஸே நிப்³ப³த்தி. ஸோ ஸுத்³தா⁴வாஸே ட²த்வா தே ஸஹாயே ஓலோகேந்தோ, ஏகோ ததா³வ பரினிப்³பு³தோ, ஏகோ அது⁴னா ப⁴க³வதோ ஸந்திகே அரியபூ⁴மிம் பத்தோ, ஏகோ லாப⁴ஸக்காரம் நிஸ்ஸாய, ‘‘அஹம் அரஹா’’தி சித்தம் உப்பாதே³த்வா ஸுப்பாரகபட்டனே வஸதீதி தி³ஸ்வா தம் உபஸங்கமித்வா, ‘‘ந த்வம் அரஹா, ந அரஹத்தமக்³க³ம் படிபன்னோ, க³ச்ச² ப⁴க³வந்தம் உபஸங்கமித்வா த⁴ம்மம் ஸுணாஹீ’’தி உய்யோஜேஸி. ஸோபி அந்தரக⁴ரே ப⁴க³வந்தம் ஓவாத³ம் யாசித்வா, ‘‘தஸ்மா திஹ தே பா³ஹிய ஏவம் ஸிக்கி²தப்³ப³ம் தி³ட்டே² தி³ட்ட²மத்தம் ஹோதூ’’தி (உதா³. 10) ப⁴க³வதா ஸம்கி²த்தேன ஓவதி³தோ அரியபூ⁴மிம் ஸம்பாபுணி.

ததோ அஞ்ஞோ ஏகோ அத்தி², ஸோ குஹிந்தி ஓலோகேந்தோ அந்த⁴வனே ஸேக்க²படிபத³ம் பூரயமானோ விஹரதீதி தி³ஸ்வா சிந்தேஸி – ‘‘ஸஹாயகஸ்ஸ ஸந்திகே க³மிஸ்ஸாமீதி, க³ச்ச²ந்தேன பன துச்ச²ஹத்தே²ன அக³ந்த்வா கிஞ்சி பண்ணாகாரம் க³ஹேத்வா க³ந்தும் வட்டதி, ஸஹாயோ கோ² பன மே நிராமிஸோ பப்³ப³தமத்த²கே வஸந்தோ மயா ஆகாஸே ட²த்வா தி³ன்னம் பிண்ட³பாதம்பி அபரிபு⁴ஞ்ஜித்வா ஸமணத⁴ம்மம் அகாஸி, இதா³னி ஆமிஸபண்ணாகாரம் கிம் க³ண்ஹிஸ்ஸதி? த⁴ம்மபண்ணாகாரம் க³ஹேத்வா க³மிஸ்ஸாமீ’’தி ப்³ரஹ்மலோகே டி²தோவ ரதனாவளிம் க³ந்தே²ந்தோ விய பன்னரஸ பஞ்ஹே விப⁴ஜித்வா தம் த⁴ம்மபண்ணாகாரம் ஆதா³ய ஆக³ந்த்வா ஸஹாயஸ்ஸ அவிதூ³ரே ட²த்வா அத்தனோ ஸமணஸஞ்ஞாஸமுதா³சாரவஸேன தம் அனபி⁴வாதே³த்வாவ, ‘‘பி⁴க்கு² பி⁴க்கூ²’’தி ஆலபித்வா அயம் வம்மிகோதிஆதி³மாஹ. தத்த² துரிதாலபனவஸேன பி⁴க்கு² பி⁴க்கூ²தி ஆமேடி³தம் வேதி³தப்³ப³ம். யதா² வா ஏகனேவ திலகேன நலாடம் ந ஸோப⁴தி, தம் பரிவாரேத்வா அஞ்ஞேஸுபி தி³ன்னேஸு பு²ல்லிதமண்டி³தம் விய ஸோப⁴தி, ஏவம் ஏகேனேவ பதே³ன வசனம் ந ஸோப⁴தி, பரிவாரிகபதே³ன ஸத்³தி⁴ம் பு²ல்லிதமண்டி³தம் விய ஸோப⁴தீதி தம் பரிவாரிகபத³வஸேன வசனம் பு²ல்லிதமண்டி³தம் விய கரோந்தோபி ஏவமாஹ.

அயம் வம்மிகோதி புரதோ டி²தோ வம்மிகோ நாம நத்தி², தே³ஸனாவஸேன பன புரதோ டி²தம் த³ஸ்ஸேந்தோ விய அயந்தி ஆஹ. லங்கி³ந்தி ஸத்த²ம் ஆதா³ய க²ணந்தோ பலிக⁴ம் அத்³த³ஸ. உக்கி²ப லங்கி³ம் அபி⁴க்க²ண ஸுமேதா⁴தி தாத, பண்டி³த, லங்கீ³ நாம ரத்திம் தூ⁴மாயதி தி³வா பஜ்ஜலதி. உக்கி²பேத பரம் பரதோ க²ணாதி. ஏவம் ஸப்³ப³பதே³ஸு அத்தோ² த³ட்ட²ப்³போ³. உத்³து⁴மாயிகந்தி மண்டூ³கம். சங்கவாரந்தி கா²ரபரிஸ்ஸாவனம். கும்மந்தி கச்ச²பம். அஸிஸூனந்தி மம்ஸச்சே²த³கம் அஸிஞ்சேவ அதி⁴குட்டனஞ்ச. மம்ஸபேஸிந்தி நிஸத³போதப்பமாணம் அல்லமம்ஸபிண்ட³ம். நாக³ந்தி ஸுமனபுப்ப²கலாபஸதி³ஸம் மஹாப²ணம் திவித⁴ஸோவத்தி²கபரிக்கி²த்தம் அஹினாக³ம் அத்³த³ஸ. மா நாக³ம் க⁴ட்டேஸீதி த³ண்ட³ககோடியா வா வல்லிகோடியா வா பம்ஸுசுண்ணம் வா பன கி²பமானோ மா நாக³ம் க⁴ட்டயி. நமோ கரோஹி நாக³ஸ்ஸாதி உபரிவாததோ அபக³ம்ம ஸுத்³த⁴வத்த²ம் நிவாஸேத்வா நாக³ஸ்ஸ நமக்காரம் கரோஹி. நாகே³ன அதி⁴ஸயிதம் த⁴னம் நாம யாவ ஸத்தமா குலபரிவட்டா கா²த³தோ ந கீ²யதி, நாகோ³ தே அதி⁴ஸயிதம் த⁴னம் த³ஸ்ஸதி, தஸ்மா நமோ கரோஹி நாக³ஸ்ஸாதி. இதோ வா பன ஸுத்வாதி யதா² து³க்க²க்க²ந்தே⁴ இதோதி ஸாஸனே நிஸ்ஸகம், ந ததா² இத⁴. இத⁴ பன தே³வபுத்தே நிஸ்ஸக்கம், தஸ்மா இதோ வா பனாதி மம வா பன ஸந்திகா ஸுத்வாதி அயமேத்த² அத்தோ².

251. சாதும்மஹாபூ⁴திகஸ்ஸாதி சதுமஹாபூ⁴தமயஸ்ஸ. காயஸ்ஸேதம் அதி⁴வசனந்தி ஸரீரஸ்ஸ நாமம். யதே²வ ஹி பா³ஹிரகோ வம்மிகோ, வமதீதி வந்தகோதி வந்துஸ்ஸயோதி வந்தஸினேஹஸம்ப³ந்தோ⁴தி சதூஹி காரணேஹி வம்மிகோதி வுச்சதி. ஸோ ஹி அஹிமங்கு³ஸஉந்தூ³ரக⁴ரகோ³ளிகாத³யோ நானப்பகாரே பாணகே வமதீதி வம்மிகோ. உபசிகாஹி வந்தகோதி வம்மிகோ. உபசிகாஹி வமித்வா முக²துண்ட³கேன உக்கி²த்தபம்ஸுசுண்ணேன கடிப்பமாணேனபி போரிஸப்பமாணேனபி உஸ்ஸிதோதி வம்மிகோ. உபசிகாஹி வந்தகே²ளஸினேஹேன ஆப³த்³த⁴தாய ஸத்தஸத்தாஹம் தே³வே வஸ்ஸந்தேபி ந விப்பகிரியதி, நிதா³கே⁴பி ததோ பம்ஸுமுட்டி²ம் க³ஹேத்வா தஸ்மிம் முட்டி²னா பீளியமானே ஸினேஹோ நிக்க²மதி, ஏவம் வந்தஸினேஹேன ஸம்ப³த்³தோ⁴தி வம்மிகோ. ஏவமயம் காயோபி, ‘‘அக்கி²ம்ஹா அக்கி²கூ³த²கோ’’திஆதி³னா நயேன நானப்பகாரகம் அஸுசிகலிமலம் வமதீதி வம்மிகோ. பு³த்³த⁴பச்சேகபு³த்³த⁴கீ²ணாஸவா இமஸ்மிம் அத்தபா⁴வே நிகந்திபரியாதா³னேன அத்தபா⁴வம் ச²ட்³டே³த்வா க³தாதி அரியேஹி வந்தகோதிபி வம்மிகோ. யேஹி சாயம் தீஹி அட்டி²ஸதேஹி உஸ்ஸிதோ ந்ஹாருஸம்ப³த்³தோ⁴ மம்ஸாவலேபனோ அல்லசம்மபரியோனத்³தோ⁴ ச²விரஞ்ஜிதோ ஸத்தே வஞ்சேதி, தம் ஸப்³ப³ம் அரியேஹி வந்தமேவாதி வந்துஸ்ஸயோதிபி வம்மிகோ. ‘‘தண்ஹா ஜனேதி புரிஸம், சித்தமஸ்ஸ விதா⁴வதீ’’தி (ஸம். நி. 1.55) ஏவம் தண்ஹாய ஜனிதத்தா அரியேஹி வந்தேனேவ தண்ஹாஸினேஹேன ஸம்ப³த்³தோ⁴ அயந்தி வந்தஸினேஹேன ஸம்ப³த்³தோ⁴திபி வம்மிகோ. யதா² ச வம்மிகஸ்ஸ அந்தோ நானப்பகாரா பாணகா தத்தே²வ ஜாயந்தி, உச்சாரபஸ்ஸாவம் கரோந்தி, கி³லானா ஸயந்தி, மதா பதந்தி. இதி ஸோ தேஸம் ஸூதிக⁴ரம் வச்சகுடி கி³லானஸாலா ஸுஸானஞ்ச ஹோதி. ஏவம் க²த்தியமஹாஸாலாதீ³னம்பி காயோ அயம் கோ³பிதரக்கி²தோ மண்டி³தப்பஸாதி⁴தோ மஹானுபா⁴வானம் காயோதி அசிந்தேத்வா ச²வினிஸ்ஸிதா பாணா சம்மனிஸ்ஸிதா பாணா மம்ஸனிஸ்ஸிதா பாணா ந்ஹாருனிஸ்ஸிதா பாணா அட்டி²னிஸ்ஸிதா பாணா அட்டி²மிஞ்ஜனிஸ்ஸிதா பாணாதி ஏவம் குலக³ணனாய அஸீதிமத்தானி கிமிகுலஸஹஸ்ஸானி அந்தோகாயஸ்மிம்யேவ ஜாயந்தி, உச்சாரபஸ்ஸாவம் கரோந்தி, கே³லஞ்ஞேன ஆதுரிதானி ஸயந்தி, மதானி பதந்தி, இதி அயம்பி தேஸம் பாணானம் ஸூதிக⁴ரம் வச்சகுடி கி³லானஸாலா ஸுஸானஞ்ச ஹோதீதி ‘‘வம்மிகோ’’ த்வேவ ஸங்க²ம் க³தோ. தேனாஹ ப⁴க³வா – ‘‘வம்மிகோதி கோ², பி⁴க்கு², இமஸ்ஸ சாதுமஹாபூ⁴திகஸ்ஸ காயஸ்ஸேதம் அதி⁴வசன’’ந்தி.

மாதாபேத்திகஸம்ப⁴வஸ்ஸாதி மாதிதோ ச பிதிதோ ச நிப்³ப³த்தேன மாதாபேத்திகேன ஸுக்கஸோணிதேன ஸம்பூ⁴தஸ்ஸ. ஓத³னகும்மாஸூபசயஸ்ஸாதி ஓத³னேன சேவ கும்மாஸேன ச உபசிதஸ்ஸ வட்³டி⁴தஸ்ஸ. அனிச்சுச்சா²த³னபரிமத்³த³னபே⁴த³னவித்³த⁴ம்ஸனத⁴ம்மஸ்ஸாதி ஏத்த² அயம் காயோ ஹுத்வா அபா⁴வட்டே²ன அனிச்சத⁴ம்மோ. து³க்³க³ந்த⁴விகா⁴தத்தா²ய தனுவிலேபனேன உச்சா²த³னத⁴ம்மோ. அங்க³பச்சங்கா³பா³த⁴வினோத³னத்தா²ய கு²த்³த³கஸம்பா³ஹனேன பரிமத்³த³னத⁴ம்மோ. த³ஹரகாலே வா ஊரூஸு ஸயாபேத்வா க³ப்³ப⁴வாஸேன து³ஸ்ஸண்டி²தானம் தேஸம் தேஸம் அங்கா³னம் ஸண்டா²னஸம்பாத³னத்த²ம் அஞ்ச²னபீளனாதி³வஸேன பரிமத்³த³னத⁴ம்மோ. ஏவம் பரிஹரதோபி ச பே⁴த³னவித்³த⁴ம்ஸனத⁴ம்மோ பி⁴ஜ்ஜதி சேவ விகிரதி ச, ஏவம் ஸபா⁴வோதி அத்தோ². தத்த² மாதாபேத்திகஸம்ப⁴வஓத³னகும்மாஸூபசயஉச்சா²த³னபரிமத்³த³னபதே³ஹி ஸமுத³யோ கதி²தோ, அனிச்சபே⁴த³வித்³த⁴ம்ஸனபதே³ஹி அத்த²ங்க³மோ. ஏவம் ஸத்தஹிபி பதே³ஹி சாதுமஹாபூ⁴திகஸ்ஸ காயஸ்ஸ உச்சாவசபா⁴வோ வட்³டி⁴பரிஹானி ஸமுத³யத்த²ங்க³மோ கதி²தோதி வேதி³தப்³போ³.

தி³வா கம்மந்தேதி தி³வா கத்தப்³ப³கம்மந்தே. தூ⁴மாயனாதி ஏத்த² அயம் தூ⁴மஸத்³தோ³ கோதே⁴ தண்ஹாய விதக்கே பஞ்சஸு காமகு³ணேஸு த⁴ம்மதே³ஸனாய பகதிதூ⁴மேதி இமேஸு அத்தே²ஸு வத்ததி. ‘‘கோதோ⁴ தூ⁴மோ ப⁴ஸ்மனிமோஸவஜ்ஜ’’ந்தி (ஸம். நி. 1.165) ஏத்த² ஹி கோதே⁴ வத்ததி. ‘‘இச்சா²தூ⁴மாயிதா ஸத்தா’’தி ஏத்த² தண்ஹாய. ‘‘தேன கோ² பன ஸமயேன அஞ்ஞதரோ பி⁴க்கு² ப⁴க³வதோ அவிதூ³ரே தூ⁴மாயந்தோ நிஸின்னோ ஹோதீ’’தி ஏத்த² விதக்கே.

‘‘பங்கோ ச காமா பலிபோ ச காமா,

ப⁴யஞ்ச மேதம் திமூலம் பவுத்தம்;

ரஜோ ச தூ⁴மோ ச மயா பகாஸிதா;

ஹித்வா துவம் பப்³ப³ஜ ப்³ரஹ்மத³த்தா’’தி. (ஜா. 1.6.14) –

ஏத்த² பஞ்சகாமகு³ணேஸு. ‘‘தூ⁴மம் கத்தா ஹோதீ’’தி (ம. நி. 1.349) ஏத்த² த⁴ம்மதே³ஸனாய. ‘‘த⁴ஜோ ரத²ஸ்ஸ பஞ்ஞாணம், தூ⁴மோ பஞ்ஞாணமக்³கி³னோ’’தி (ஸம். நி. 1.72) ஏத்த² பகதிதூ⁴மே. இத⁴ பனாயம் விதக்கே அதி⁴ப்பேதோ. தேனாஹ ‘‘அயம் ரத்திம் தூ⁴மாயனா’’தி.

ததா²க³தஸ்ஸேதம் அதி⁴வசனந்தி ததா²க³தோ ஹி ஸத்தன்னம் த⁴ம்மானம் பா³ஹிதத்தா ப்³ராஹ்மணோ நாம. யதா²ஹ – ‘‘ஸத்தன்னம் கோ², பி⁴க்கு², த⁴ம்மானம் பா³ஹிதத்தா ப்³ராஹ்மணோ. கதமேஸம் ஸத்தன்னம்? ராகோ³ பா³ஹிதோ ஹோதி, தோ³ஸோ… மோஹோ… மானோ… ஸக்காயதி³ட்டி²… விசிகிச்சா²… ஸீலப்³ப³தபராமாஸோ பா³ஹிதோ ஹோதி. இமேஸம் பி⁴க்கு² ஸத்தன்னம் த⁴ம்மானம் பா³ஹிதத்தா ப்³ராஹ்மணோ’’தி (சூளனி. மேத்தகூ³மாணவபுச்சா²னித்³தே³ஸ 28). ஸுமேதோ⁴தி ஸுந்த³ரபஞ்ஞோ. ஸேக்க²ஸ்ஸாதி ஏத்த² ஸிக்க²தீதி ஸேக்கோ². யதா²ஹ – ‘‘ஸிக்க²தீதி கோ², பி⁴க்கு², தஸ்மா ஸேக்கோ²தி வுச்சதி. கிஞ்ச ஸிக்க²தி? அதி⁴ஸீலம்பி ஸிக்க²தி, அதி⁴சித்தம்பி ஸிக்க²தி, அதி⁴பஞ்ஞம்பி ஸிக்க²தீ’’தி (அ. நி. 3.86).

பஞ்ஞாய அதி⁴வசனந்தி லோகியலோகுத்தராய பஞ்ஞாய ஏதம் அதி⁴வசனம், ந ஆவுத⁴ஸத்த²ஸ்ஸ. வீரியாரம்ப⁴ஸ்ஸாதி காயிகசேதஸிகவீரியஸ்ஸ. தம் பஞ்ஞாக³திகமேவ ஹோதி. லோகியாய பஞ்ஞாய லோகியம், லோகுத்தராய பஞ்ஞாய லோகுத்தரம். ஏத்த² பனாயம் அத்த²தீ³பனா –

ஏகோ கிர ஜானபதோ³ ப்³ராஹ்மணோ பாதோவ மாணவகேஹி ஸத்³தி⁴ம் கா³மதோ நிக்க²ம்ம தி³வஸம் அரஞ்ஞே மந்தே வாசேத்வா ஸாயம் கா³மம் ஆக³ச்ச²தி. அந்தராமக்³கே³ ச ஏகோ வம்மிகோ அத்தி². ஸோ ரத்திம் தூ⁴மாயதி, தி³வா பஜ்ஜலதி. ப்³ராஹ்மணோ அந்தேவாஸிம் ஸுமேத⁴ம் மாணவம் ஆஹ – ‘‘தாத, அயம் வம்மிகோ ரத்திம் தூ⁴மாயதி, தி³வா பஜ்ஜலதி, விகாரமஸ்ஸ பஸ்ஸிஸ்ஸாம, பி⁴ந்தி³த்வா நம் சத்தாரோ கோட்டா²ஸே கத்வா கி²பாஹீ’’தி. ஸோ ஸாதூ⁴தி குதா³லம் க³ஹேத்வா ஸமேஹி பாதே³ஹி பத²வியம் பதிட்டா²ய ததா² அகாஸி. தத்ர ஆசரியப்³ராஹ்மணோ விய ப⁴க³வா. ஸுமேத⁴மாணவகோ விய ஸேக்கோ² பி⁴க்கு². வம்மிகோ விய காயோ. ‘‘தாத, அயம் வம்மிகோ ரத்திம் தூ⁴மாயதி, தி³வா பஜ்ஜலதி, விகாரமஸ்ஸ பஸ்ஸிஸ்ஸாம, பி⁴ந்தி³த்வா நம் சத்தாரோ கோட்டா²ஸே கத்வா கி²பாஹீ’’தி ப்³ராஹ்மணேன வுத்தகாலோ விய, ‘‘பி⁴க்கு² சாதுமஹாபூ⁴திகம் காயம் சத்தாரோ கோட்டா²ஸே கத்வா பரிக்³க³ண்ஹாஹீ’’தி ப⁴க³வதா வுத்தகாலோ. தஸ்ஸ ஸாதூ⁴தி குதா³லம் க³ஹேத்வா ததா²கரணம் விய ஸேக்க²ஸ்ஸ பி⁴க்கு²னோ, ‘‘யோ வீஸதியா கோட்டா²ஸேஸு த²த்³த⁴பா⁴வோ, அயம் பத²வீதா⁴து. யோ த்³வாத³ஸஸு கோட்டா²ஸேஸு ஆப³ந்த⁴னபா⁴வோ, அயம் ஆபோதா⁴து. யோ சதூஸு கோட்டா²ஸேஸு பரிபாசனபா⁴வோ, அயம் தேஜோதா⁴து. யோ ச²ஸு கோட்டா²ஸேஸு வித்த²ம்ப⁴னபா⁴வோ, அயம் வாயோதா⁴தூ’’தி ஏவம் சதுதா⁴துவவத்தா²னவஸேன காயபரிக்³க³ஹோ வேதி³தப்³போ³.

லங்கீ³தி கோ², பி⁴க்கூ²தி கஸ்மா ப⁴க³வா அவிஜ்ஜம் லங்கீ³தி கத்வா த³ஸ்ஸேஸீதி? யதா² ஹி நக³ரஸ்ஸ த்³வாரம் பிதா⁴ய பலிகே⁴ யோஜிதே மஹாஜனஸ்ஸ க³மனம் பச்சி²ஜ்ஜதி, யே நக³ரஸ்ஸ அந்தோ, தே அந்தோயேவ ஹோந்தி. யே ப³ஹி, தே ப³ஹியேவ. ஏவமேவ யஸ்ஸ ஞாணமுகே² அவிஜ்ஜாலங்கீ³ பததி, தஸ்ஸ நிப்³பா³னஸம்பாபகம் ஞாணக³மனம் பச்சி²ஜ்ஜதி, தஸ்மா அவிஜ்ஜம் லங்கீ³தி கத்வா த³ஸ்ஸேஸி. பஜஹ அவிஜ்ஜந்தி ஏத்த² கம்மட்டா²னஉக்³க³ஹபரிபுச்சா²வஸேன அவிஜ்ஜாபஹானம் கதி²தம்.

உத்³து⁴மாயிகாதி கோ², பி⁴க்கூ²தி ஏத்த² உத்³து⁴மாயிகமண்டூ³கோ நாம நோ மஹந்தோ, நக²பிட்டி²ப்பமாணோ ஹோதி, புராணபண்ணந்தரே வா க³ச்ச²ந்தரே வா வல்லிஅந்தரே வா வஸதி. ஸோ த³ண்ட³கோடியா வா வல்லிகோடியா வா பம்ஸுசுண்ணகேன வா க⁴ட்டிதோ ஆயமித்வா மஹந்தோ பரிமண்ட³லோ பே³லுவபக்கப்பமாணோ ஹுத்வா சத்தாரோ பாதே³ ஆகாஸக³தே கத்வா பச்சி²ன்னக³மனோ ஹுத்வா அமித்தவஸம் யாதி, காககுலலாதி³ப⁴த்தமேவ ஹோதி. ஏவமேவ அயம் கோதோ⁴ பட²மம் உப்பஜ்ஜந்தோ சித்தாவிலமத்தகோவ ஹோதி. தஸ்மிம் க²ணே அனிக்³க³ஹிதோ வட்³டி⁴த்வா முக²விகுலனம் பாபேதி. ததா³ அனிக்³க³ஹிதோ ஹனுஸஞ்சோபனம் பாபேதி. ததா³ அனிக்³க³ஹிதோ ப²ருஸவாசானிச்சா²ரணம் பாபேதி. ததா³ அனிக்³க³ஹிதோ தி³ஸாவிலோகனம் பாபேதி. ததா³ அனிக்³க³ஹிதோ ஆகட்³ட⁴னபரிகட்³ட⁴னம் பாபேதி. ததா³ அனிக்³க³ஹிதோ பாணினா லேட்³டு³த³ண்ட³ஸத்த²பராமஸனம் பாபேதி. ததா³ அனிக்³க³ஹிதோ த³ண்ட³ஸத்தா²பி⁴னிபாதம் பாபேதி. ததா³ அனிக்³க³ஹிதோ பரகா⁴தனம்பி அத்தகா⁴தனம்பி பாபேதி. வுத்தம்பி ஹேதம் – ‘‘யதோ அயம் கோதோ⁴ பரம் கா⁴தேத்வா அத்தானம் கா⁴தேதி, ஏத்தாவதாயம் கோதோ⁴ பரமுஸ்ஸத³க³தோ ஹோதி பரமவேபுல்லப்பத்தோ’’தி. தத்த² யதா² உத்³து⁴மாயிகாய சதூஸு பாதே³ஸு ஆகாஸக³தேஸு க³மனம் பச்சி²ஜ்ஜதி, உத்³து⁴மாயிகா அமித்தவஸம் க³ந்த்வா காகாதி³ப⁴த்தம் ஹோதி, ஏவமேவ கோத⁴ஸமங்கீ³புக்³க³லோ கம்மட்டா²னம் க³ஹேத்வா வட்³டே⁴தும் ந ஸக்கோதி, அமித்தவஸம் யாதி, ஸப்³பே³ஸம் மாரானம் யதா²காமகரணீயோ ஹோதி. தேனாஹ ப⁴க³வா – ‘‘உத்³து⁴மாயிகாதி கோ², பி⁴க்கு², கோதூ⁴பாயாஸஸ்ஸேதம் அதி⁴வசன’’ந்தி. தத்த² ப³லவப்பத்தோ கோதோ⁴வ கோதூ⁴பாயாஸோ. பஜஹ கோதூ⁴பாயாஸந்தி ஏத்த² படிஸங்கா²னப்பஹானம் கதி²தம்.

த்³விதா⁴பதோ²தி ஏத்த², யதா² புரிஸோ ஸத⁴னோ ஸபோ⁴கோ³ கந்தாரத்³தா⁴னமக்³க³ப்படிபன்னோ த்³வேதா⁴பத²ம் பத்வா, ‘‘இமினா நு கோ² க³ந்தப்³ப³ம், இமினா க³ந்தப்³ப³’’ந்தி நிச்சே²தும் அஸக்கோந்தோ தத்தே²வ திட்ட²தி, அத² நம் சோரா உட்ட²ஹித்வா அனயப்³யஸனம் பாபேந்தி, ஏவமேவ கோ² மூலகம்மட்டா²னம் க³ஹேத்வா நிஸின்னோ பி⁴க்கு² பு³த்³தா⁴தீ³ஸு கங்கா²ய உப்பன்னாய கம்மட்டா²னம் வட்³டே⁴தும் ந ஸக்கோதி, அத² நம் கிலேஸமாராத³யோ ஸப்³பே³ மாரா அனயப்³யஸனம் பாபேந்தி, இதி விசிகிச்சா² த்³வேதா⁴பத²ஸமா ஹோதி. தேனாஹ ப⁴க³வா – ‘‘த்³விதா⁴பதோ²தி கோ², பி⁴க்கு², விசிகிச்சா²யேதம் அதி⁴வசன’’ந்தி. பஜஹ விசிகிச்ச²ந்தி ஏத்த² கம்மட்டா²னஉக்³க³ஹபரிபுச்சா²வஸேன விசிகிச்சா²பஹானம் கதி²தம்.

சங்க³வாரந்தி ஏத்த², யதா² ரஜகேஹி கா²ரபரிஸ்ஸாவனம்ஹி உத³கே பக்கி²த்தே ஏகோ உத³கக⁴டோ த்³வேபி த³ஸபி வீஸதிபி க⁴டஸதம்பி பக்³க⁴ரதியேவ, பஸடமத்தம்பி உத³கம் ந திட்ட²தி, ஏவமேவ நீவரணஸமங்கி³னோ புக்³க³லஸ்ஸ அப்³ப⁴ந்தரே குஸலத⁴ம்மோ ந திட்ட²தி. தேனாஹ ப⁴க³வா – ‘‘சங்க³வாரந்தி கோ², பி⁴க்கு², பஞ்சன்னேதம் நீவரணானம் அதி⁴வசன’’ந்தி. பஜஹ பஞ்சனீவரணேதி ஏத்த² விக்க²ம்ப⁴னதத³ங்க³வஸேன நீவரணப்பஹானம் கதி²தம்.

கும்மோதி ஏத்த², யதா² கச்ச²பஸ்ஸ சத்தாரோ பாதா³ ஸீஸந்தி பஞ்சேவ அங்கா³னி ஹோந்தி, ஏவமேவ ஸப்³பே³பி ஸங்க²தா த⁴ம்மா க³ய்ஹமானா பஞ்சேவ க²ந்தா⁴ ப⁴வந்தி. தேனாஹ ப⁴க³வா – ‘‘கும்மோதி கோ², பி⁴க்கு², பஞ்சன்னேதம் உபாதா³னக்க²ந்தா⁴னம் அதி⁴வசன’’ந்தி. பஜஹ பஞ்சுபாதா³னக்க²ந்தே⁴தி ஏத்த² பஞ்சஸு க²ந்தே⁴ஸு ச²ந்த³ராக³ப்பஹானம் கதி²தம்.

அஸிஸூனாதி ஏத்த², யதா² ஸூனாய உபரி மம்ஸம் ட²பேத்வா அஸினா கோட்டேந்தி, ஏவமிமே ஸத்தா வத்து²காமத்தா²ய கிலேஸகாமேஹி கா⁴தயமானா வத்து²காமானம் உபரி கத்வா கிலேஸகாமேஹி கந்திதா கோட்டிதா ச ஹோந்தி. தேனாஹ ப⁴க³வா – ‘‘அஸிஸூனாதி கோ², பி⁴க்கு², பஞ்சன்னேதம் காமகு³ணானம் அதி⁴வசன’’ந்தி. பஜஹ பஞ்ச காமகு³ணேதி ஏத்த² பஞ்சஸு காமகு³ணேஸு ச²ந்த³ராக³ப்பஹானம் கதி²தம்.

மம்ஸபேஸீதி கோ², பி⁴க்கூ²தி ஏத்த² அயம் மம்ஸபேஸி நாம ப³ஹுஜனபத்தி²தா க²த்தியாத³யோ மனுஸ்ஸாபி நம் பத்தே²ந்தி காகாத³யோ திரச்சா²னாபி. இமே ஹி ஸத்தா அவிஜ்ஜாய ஸம்மத்தா நந்தி³ராக³ம் உபக³ம்ம வட்டம் வட்³டே⁴ந்தி. யதா² வா மம்ஸபேஸி ட²பிதட²பிதட்டா²னே லக்³க³தி, ஏவமிமே ஸத்தா நந்தி³ராக³ப³த்³தா⁴ வட்டே லக்³க³ந்தி, து³க்க²ம் பத்வாபி ந உக்கண்ட²ந்தி, இதி நந்தி³ராகோ³ மம்ஸபேஸிஸதி³ஸோ ஹோதி. தேனாஹ ப⁴க³வா – ‘‘மம்ஸபேஸீதி கோ², பி⁴க்கு², நந்தி³ராக³ஸ்ஸேதம் அதி⁴வசன’’ந்தி. பஜஹ நந்தீ³ராக³ந்தி ஏத்த² சதுத்த²மக்³கே³ன நந்தீ³ராக³ப்பஹானம் கதி²தம்.

நாகோ³தி கோ², பி⁴க்கு², கீ²ணாஸவஸ்ஸேதம் பி⁴க்கு²னோ அதி⁴வசனந்தி ஏத்த² யேனத்தே²ன கீ²ணாஸவோ நாகோ³தி வுச்சதி, ஸோ அனங்க³ணஸுத்தே (ம. நி. அட்ட². 1.63) பகாஸிதோ ஏவ. நமோ கரோஹி நாக³ஸ்ஸாதி கீ²ணாஸவஸ்ஸ பு³த்³த⁴னாக³ஸ்ஸ, ‘‘பு³த்³தோ⁴ ஸோ ப⁴க³வா போ³தா⁴ய த⁴ம்மம் தே³ஸேதி, த³ந்தோ ஸோ ப⁴க³வா த³மதா²ய த⁴ம்மம் தே³ஸேதி, ஸந்தோ ஸோ ப⁴க³வா ஸமதா²ய த⁴ம்மம் தே³ஸேதி, திண்ணோ ஸோ ப⁴க³வா தரணாய த⁴ம்மம் தே³ஸேதி, பரினிப்³பு³தோ ஸோ ப⁴க³வா பரினிப்³பா³னாய த⁴ம்மம் தே³ஸேதீ’’தி (ம. நி. 1.361) ஏவம் நமக்காரம் கரோஹீதி அயமேத்த² அத்தோ². இதி இத³ம் ஸுத்தம் தே²ரஸ்ஸ கம்மட்டா²னம் அஹோஸி. தே²ரோபி இத³மேவ ஸுத்தம் கம்மட்டா²னம் கத்வா விபஸ்ஸனம் வட்³டே⁴த்வா அரஹத்தம் பத்தோ. அயமேதஸ்ஸ அத்தோ²தி அயம் ஏதஸ்ஸ பஞ்ஹஸ்ஸ அத்தோ². இதி ப⁴க³வா ரதனராஸிம்ஹி மணிகூடம் க³ண்ஹந்தோ விய யதா²னுஸந்தி⁴னாவ தே³ஸனம் நிட்ட²பேஸீதி.

பபஞ்சஸூத³னியா மஜ்ஜி²மனிகாயட்ட²கதா²ய

வம்மிகஸுத்தவண்ணனா நிட்டி²தா.

4. ரத²வினீதஸுத்தவண்ணனா

252. ஏவம் மே ஸுதந்தி ரத²வினீதஸுத்தம். தத்த² ராஜக³ஹேதி ஏவம்னாமகே நக³ரே, தஞ்ஹி மந்தா⁴துமஹாகோ³விந்தா³தீ³ஹி பரிக்³க³ஹிதத்தா ராஜக³ஹந்தி வுச்சதி. அஞ்ஞேபேத்த² பகாரே வண்ணயந்தி. கிம் தேஹி? நாமமேதம் தஸ்ஸ நக³ரஸ்ஸ. தம் பனேதம் பு³த்³த⁴காலே ச சக்கவத்திகாலே ச நக³ரம் ஹோதி, ஸேஸகாலே ஸுஞ்ஞம் ஹோதி யக்க²பரிக்³க³ஹிதம், தேஸம் வஸந்தவனம் ஹுத்வா திட்ட²தி. வேளுவனே கலந்த³கனிவாபேதி வேளுவனந்தி தஸ்ஸ உய்யானஸ்ஸ நாமம், தம் கிர வேளூஹி பரிக்கி²த்தம் அஹோஸி அட்டா²ரஸஹத்தே²ன ச பாகாரேன, கோ³புரட்டாலகயுத்தம் நீலோபா⁴ஸம் மனோரமம், தேன வேளுவனந்தி வுச்சதி. கலந்த³கானஞ்சேத்த² நிவாபம் அத³ம்ஸு, தேன கலந்த³கனிவாபோதி வுச்சதி.

புப்³பே³ கிர அஞ்ஞதரோ ராஜா தத்த² உய்யானகீளனத்த²ம் ஆக³தோ ஸுராமதே³ன மத்தோ தி³வாஸேய்யம் உபக³தோ ஸுபி. பரிஜனோபிஸ்ஸ, ‘‘ஸுத்தோ ராஜா’’தி புப்ப²ப²லாதீ³ஹி பலோபி⁴யமானோ இதோ சிதோ ச பக்காமி, அத² ஸுராக³ந்தே⁴ன அஞ்ஞதரஸ்மா ஸுஸிரருக்கா² கண்ஹஸப்போ நிக்க²மித்வா ரஞ்ஞாபி⁴முகோ² ஆக³ச்ச²தி. தம் தி³ஸ்வா ருக்க²தே³வதா, ‘‘ரஞ்ஞோ ஜீவிதம் த³ம்மீ’’தி காளகவேஸேன ஆக³ந்த்வா கண்ணமூலே ஸத்³த³மகாஸி. ராஜா படிபு³ஜ்ஜி², கண்ஹஸப்போ நிவத்தோ. ஸோ தம் தி³ஸ்வா, ‘‘இமாய மம ஜீவிதம் தி³ன்ன’’ந்தி காளகானம் தத்த² நிவாபம் பட்ட²பேஸி, அப⁴யகோ⁴ஸனஞ்ச கோ⁴ஸாபேஸி. தஸ்மா தம் ததோ பபு⁴தி கலந்த³கனிவாபந்தி ஸங்க்²யம் க³தம். கலந்த³காதி காளகானம் நாமம்.

ஜாதிபூ⁴மிகாதி ஜாதிபூ⁴மிவாஸினோ. தத்த² ஜாதிபூ⁴மீதி ஜாதட்டா²னம். தம் கோ² பனேதம் நேவ கோஸலமஹாராஜாதீ³னம் ந சங்கீப்³ராஹமணாதீ³னம் ந ஸக்கஸுயாமஸந்துஸிதாதீ³னம் ந அஸீதிமஹாஸாவகாதீ³னம் ந அஞ்ஞேஸம் ஸத்தானம் ஜாதட்டா²னம் ‘‘ஜாதிபூ⁴மீ’’தி வுச்சதி. யஸ்ஸ பன ஜாததி³வஸே த³ஸஸஹஸ்ஸிலோகதா⁴து ஏகத்³த⁴ஜமாலாவிப்பகிண்ணகுஸுமவாஸசுண்ணக³ந்த⁴ஸுக³ந்தா⁴ ஸப்³ப³பாலிபு²ல்லமிவ நந்த³னவனம் விரோசமானா பது³மினிபண்ணே உத³கபி³ந்து³ விய அகம்பித்த², ஜச்சந்தா⁴தீ³னஞ்ச ரூபத³ஸ்ஸனாதீ³னி அனேகானி பாடிஹாரியானி பவத்திம்ஸு, தஸ்ஸ ஸப்³ப³ஞ்ஞுபோ³தி⁴ஸத்தஸ்ஸ ஜாதட்டா²னஸாகியஜனபதோ³ கபிலவத்தா²ஹாரோ, ஸா ‘‘ஜாதிபூ⁴மீ’’தி வுச்சதி.

த⁴ம்மக³ருபா⁴வவண்ணனா

வஸ்ஸம்வுட்டா²தி தேமாஸம் வஸ்ஸம்வுட்டா² பவாரிதபவாரணா ஹுத்வா. ப⁴க³வா ஏதத³வோசாதி ‘‘கச்சி, பி⁴க்க²வே, க²மனீய’’ந்திஆதீ³ஹி வசனேஹி ஆக³ந்துகபடிஸந்தா²ரம் கத்வா ஏதம், ‘‘கோ நு கோ², பி⁴க்க²வே’’திஆதி³வசனமவோச. தே கிர பி⁴க்கு², – ‘‘கச்சி, பி⁴க்க²வே, க²மனீயம் கச்சி யாபனீயம், கச்சித்த² அப்பகிலமதே²ன அத்³தா⁴னம் ஆக³தா, ந ச பிண்ட³கேன கிலமித்த², குதோ ச தும்ஹே, பி⁴க்க²வே, ஆக³ச்ச²தா²’’தி படிஸந்தா²ரவஸேன புச்சி²தா – ‘‘ப⁴க³வா ஸாகியஜனபதே³ கபிலவத்தா²ஹாரதோ ஜாதிபூ⁴மிதோ ஆக³ச்சா²மா’’தி ஆஹம்ஸு. அத² ப⁴க³வா நேவ ஸுத்³தோ⁴த³னமஹாராஜஸ்ஸ, ந ஸக்கோத³னஸ்ஸ, ந ஸுக்கோத³னஸ்ஸ, ந தோ⁴தோத³னஸ்ஸ, ந அமிதோத³னஸ்ஸ, ந அமித்தாய தே³வியா, ந மஹாபஜாபதியா, ந ஸகலஸ்ஸ ஸாகியமண்ட³லஸ்ஸ ஆரோக்³யம் புச்சி². அத² கோ² அத்தனா ச த³ஸகதா²வத்து²லாபி⁴ம் பரஞ்ச தத்த² ஸமாத³பேதாரம் படிபத்திஸம்பன்னம் பி⁴க்கு²ம் புச்ச²ந்தோ இத³ம் – ‘‘கோ நு கோ², பி⁴க்க²வே’’திஆதி³வசனம் அவோச.

கஸ்மா பன ப⁴க³வா ஸுத்³தோ⁴த³னாதீ³னம் ஆரோக்³யம் அபுச்சி²த்வா ஏவரூபம் பி⁴க்கு²மேவ புச்ச²தி? பியதாய. பு³த்³தா⁴னஞ்ஹி படிபன்னகா பி⁴க்கூ² பி⁴க்கு²னியோ உபாஸகா உபாஸிகாயோ ச பியா ஹோந்தி மனாபா. கிம் காரணா? த⁴ம்மக³ருதாய. த⁴ம்மக³ருனோ ஹி ததா²க³தா, ஸோ ச நேஸம் த⁴ம்மக³ருபா⁴வோ, ‘‘து³க்க²ம் கோ² அகா³ரவோ விஹரதி, அப்பதிஸ்ஸோ’’தி (அ. நி. 4.21) இமினா அஜபாலனிக்³ரோத⁴மூலே உப்பன்னஜ்ஜா²ஸயேன வேதி³தப்³போ³. த⁴ம்மக³ருதாயேவ ஹி ப⁴க³வா மஹாகஸ்ஸபத்தே²ரஸ்ஸ அபி⁴னிக்க²மனதி³வஸே பச்சுக்³க³மனம் கரோந்தோ திகா³வுதம் மக்³க³ம் அக³மாஸி. அதிரேகதியோஜனஸதம் மக்³க³ம் க³ந்த்வா க³ங்கா³தீரே த⁴ம்மம் தே³ஸேத்வா மஹாகப்பினம் ஸபரிஸம் அரஹத்தே பதிட்ட²பேஸி. ஏகஸ்மிம் பச்சா²ப⁴த்தே பஞ்சசத்தாலீஸயோஜனம் மக்³க³ம் க³ந்த்வா கும்ப⁴காரஸ்ஸ நிவேஸனே தியாமரத்திம் த⁴ம்மகத²ம் கத்வா புக்குஸாதிகுலபுத்தம் அனாகா³மிப²லே பதிட்ட²பேஸி. வீஸயோஜனஸதம் க³ந்த்வா வனவாஸிஸாமணேரஸ்ஸ அனுக்³க³ஹம் அகாஸி. ஸட்டி²யோஜனமக்³க³ம் க³ந்த்வா க²தி³ரவனியத்தே²ரஸ்ஸ த⁴ம்மம் தே³ஸேஸி. அனுருத்³த⁴த்தே²ரோ பாசீனவம்ஸதா³யே நிஸின்னோ மஹாபுரிஸவிதக்கம் விதக்கேதீதி ஞத்வா தத்த² ஆகாஸேன க³ந்த்வா தே²ரஸ்ஸ புரதோ ஓருய்ஹ ஸாது⁴காரமதா³ஸி. கோடிகண்ணஸோணத்தே²ரஸ்ஸ ஏகக³ந்த⁴குடியம் ஸேனாஸனம் பஞ்ஞபாபேத்வா பச்சூஸகாலே த⁴ம்மதே³ஸனம் அஜ்ஜே²ஸித்வா ஸரப⁴ஞ்ஞபரியோஸானே ஸாது⁴காரமதா³ஸி. திகா³வுதம் மக்³க³ம் க³ந்த்வா திண்ணம் குலபுத்தானம் வஸனட்டா²னே கோ³ஸிங்க³ஸாலவனே ஸாமக்³கி³ரஸானிஸம்ஸம் கதே²ஸி. கஸ்ஸபோபி ப⁴க³வா – ‘‘அனாகா³மிப²லே பதிட்டி²தோ அரியஸாவகோ அய’’ந்தி விஸ்ஸாஸம் உப்பாதே³த்வா க⁴டிகாரஸ்ஸ கும்ப⁴காரஸ்ஸ நிவேஸனம் க³ந்த்வா ஸஹத்தா² ஆமிஸம் க³ஹேத்வா பரிபு⁴ஞ்ஜி.

அம்ஹாகம்யேவ ப⁴க³வா உபகட்டா²ய வஸ்ஸூபனாயிகாய ஜேதவனதோ பி⁴க்கு²ஸங்க⁴பரிவுதோ சாரிகம் நிக்க²மி. கோஸலமஹாராஜஅனாத²பிண்டி³காத³யோ நிவத்தேதும் நாஸக்கி²ம்ஸு. அனாத²பிண்டி³கோ க⁴ரம் ஆக³ந்த்வா தோ³மனஸ்ஸப்பத்தோ நிஸீதி³. அத² நம் புண்ணா நாம தா³ஸீ தோ³மனஸ்ஸப்பத்தோஸி ஸாமீதி ஆஹ. ‘‘ஆம ஜே, ஸத்தா²ரம் நிவத்தேதும் நாஸக்கி²ம், அத² மே இமம் தேமாஸம் த⁴ம்மம் வா ஸோதும், யதா²தி⁴ப்பாயம் வா தா³னம் தா³தும் ந லபி⁴ஸ்ஸாமீ’’தி சிந்தா உப்பன்னாதி. அஹம்பி ஸாமி ஸத்தா²ரம் நிவத்தேஸ்ஸாமீதி. ஸசே நிவத்தேதும் ஸக்கோஸி, பு⁴ஜிஸ்ஸாயேவ த்வந்தி. ஸா க³ந்த்வா த³ஸப³லஸ்ஸ பாத³மூலே நிபஜ்ஜித்வா ‘‘நிவத்தத² ப⁴க³வா’’தி ஆஹ. புண்ணே த்வம் பரபடிப³த்³த⁴ஜீவிகா கிம் மே கரிஸ்ஸஸீதி. ப⁴க³வா மய்ஹம் தே³ய்யத⁴ம்மோ நத்தீ²தி தும்ஹேபி ஜானாத², தும்ஹாகம் நிவத்தனபச்சயா பனாஹம் தீஸு ஸரணேஸு பஞ்சஸு ஸீலேஸு பதிட்ட²ஹிஸ்ஸாமீதி. ப⁴க³வா ஸாது⁴ ஸாது⁴ புண்ணேதி ஸாது⁴காரம் கத்வா நிவத்தேத்வா ஜேதவனமேவ பவிட்டோ². அயம் கதா² பாகடா அஹோஸி. ஸேட்டி² ஸுத்வா புண்ணாய கிர ப⁴க³வா நிவத்திதோதி தம் பு⁴ஜிஸ்ஸம் கத்வா தீ⁴துட்டா²னே ட²பேஸி. ஸா பப்³ப³ஜ்ஜம் யாசித்வா பப்³ப³ஜி, பப்³ப³ஜித்வா விபஸ்ஸனம் ஆரபி⁴. அத²ஸ்ஸா ஸத்தா² ஆரத்³த⁴விபஸ்ஸகபா⁴வம் ஞத்வா இமம் ஓபா⁴ஸகா³த²ம் விஸ்ஸஜ்ஜேஸி –

‘‘புண்ணே பூரேஸி ஸத்³த⁴ம்மம், சந்தோ³ பன்னரஸோ யதா²;

பரிபுண்ணாய பஞ்ஞாய, து³க்க²ஸ்ஸந்தம் கரிஸ்ஸஸீ’’தி. (தே²ரீகா³. 3);

கா³தா²பரியோஸானே அரஹத்தம் பத்வா அபி⁴ஞ்ஞாதா ஸாவிகா அஹோஸீதி. ஏவம் த⁴ம்மக³ருனோ ததா²க³தா.

நந்த³கத்தே²ரே உபட்டா²னஸாலாயம் த⁴ம்மம் தே³ஸேந்தேபி ப⁴க³வா அனஹாதோவ க³ந்த்வா தியாமரத்திம் டி²தகோவ த⁴ம்மகத²ம் ஸுத்வா தே³ஸனாபரியோஸானே ஸாது⁴காரமதா³ஸி. தே²ரோ ஆக³ந்த்வா வந்தி³த்வா, ‘‘காய வேலாய, ப⁴ந்தே, ஆக³தத்தா²’’தி புச்சி². தயா ஸுத்தந்தே ஆரத்³த⁴மத்தேதி. து³க்கரம் கரித்த², ப⁴ந்தே, பு³த்³த⁴ஸுகு²மாலா தும்ஹேதி. ஸசே த்வம், நந்த³, கப்பம் தே³ஸேதும் ஸக்குணேய்யாஸி, கப்பமத்தம்பாஹம் டி²தகோவ ஸுணேய்யந்தி ப⁴க³வா அவோச. ஏவம் த⁴ம்மக³ருனோ ததா²க³தா. தேஸம் த⁴ம்மக³ருதாய படிபன்னகா பியா ஹோந்தி, தஸ்மா படிபன்னகே புச்சி². படிபன்னகோ ச நாம அத்தஹிதாய படிபன்னோ நோ பரஹிதாய, பரஹிதாய படிபன்னோ நோ அத்தஹிதாய, நோ அத்தஹிதாய ச படிபன்னோ நோ பரஹிதாய ச, அத்தஹிதாய ச படிபன்னோ பரஹிதாய சாதி சதுப்³பி³தோ⁴ ஹோதி.

தத்த² யோ ஸயம் த³ஸன்னம் கதா²வத்தூ²னம் லாபீ⁴ ஹோதி, பரம் தத்த² ந ஓவத³தி ந அனுஸாஸதி ஆயஸ்மா பா³குலோ விய. அயம் அத்தஹிதாய படிபன்னோ நாம நோ பரஹிதாய படிபன்னோ, ஏவரூபம் பி⁴க்கு²ம் ப⁴க³வா ந புச்ச²தி. கஸ்மா? ந மய்ஹம் ஸாஸனஸ்ஸ வட்³டி⁴பக்கே² டி²தோதி.

யோ பன த³ஸன்னம் கதா²வத்தூ²னம் அலாபீ⁴, பரம் தேஹி ஓவத³தி தேன கதவத்தஸாதி³யனத்த²ம் உபனந்தோ³ ஸக்யபுத்தோ விய, அயம் பரஹிதாய படிபன்னோ நாம நோ அத்தஹிதாய, ஏவரூபம்பி ந புச்ச²தி. கஸ்மா? அஸ்ஸ தண்ஹா மஹாபச்சி² விய அப்பஹீனாதி.

யோ அத்தனாபி த³ஸன்னம் கதா²வத்தூ²னம் அலாபீ⁴, பரம்பி தேஹி ந ஓவத³தி, லாளுதா³யீ விய, அயம் நேவ அத்தஹிதாய படிபன்னோ ந பரஹிதாய, ஏவரூபம்பி ந புச்ச²தி. கஸ்மா? அஸ்ஸ அந்தோ கிலேஸா ப²ரஸுசே²ஜ்ஜா விய மஹந்தாதி.

யோ பன ஸயம் த³ஸன்னம் கதா²வத்தூ²னம் லாபீ⁴, பரம்பி தேஹி ஓவத³தி, அயம் அத்தஹிதாய சேவ பரஹிதாய ச படிபன்னோ நாம ஸாரிபுத்தமோக்³க³ல்லானமஹாகஸ்ஸபாத³யோ அஸீதிமஹாதே²ரா விய, ஏவரூபம் பி⁴க்கு²ம் புச்ச²தி. கஸ்மா? மய்ஹம் ஸாஸனஸ்ஸ வுட்³டி⁴பக்கே² டி²தோதி. இதா⁴பி ஏவரூபமேவ புச்ச²ந்தோ – ‘‘கோ நு கோ², பி⁴க்க²வே’’திஆதி³மாஹ.

ஏவம் ப⁴க³வதா புட்டா²னம் பன தேஸம் பி⁴க்கூ²னம் ப⁴க³வா அத்தனோ ஜாதிபூ⁴மியம் உப⁴யஹிதாய படிபன்னம் த³ஸகதா²வத்து²லாபி⁴ம் பி⁴க்கு²ம் புச்ச²தி, கோ நு கோ² தத்த² ஏவரூபோதி ந அஞ்ஞமஞ்ஞம் சிந்தனா வா ஸமந்தனா வா அஹோஸி. கஸ்மா? ஆயஸ்மா ஹி மந்தாணிபுத்தோ தஸ்மிம் ஜனபதே³ ஆகாஸமஜ்ஜே² டி²தோ சந்தோ³ விய ஸூரியோ விய ச பாகடோ பஞ்ஞாதோ. தஸ்மா தே பி⁴க்கூ² மேக⁴ஸத்³த³ம் ஸுத்வா ஏகஜ்ஜ²ம் ஸன்னிபதிதமோரக⁴டா விய க⁴னஸஜ்ஜா²யம் காதும், ஆரத்³த⁴பி⁴க்கூ² விய ச அத்தனோ ஆசரியம் புண்ணத்தே²ரம் ப⁴க³வதோ ஆரோசேந்தா தே²ரஸ்ஸ ச கு³ணம் பா⁴ஸிதும் அப்பஹோந்தேஹி முகே²ஹி ஏகப்பஹாரேனேவ புண்ணோ நாம, ப⁴ந்தே, ஆயஸ்மாதிஆதி³மாஹம்ஸு. தத்த² புண்ணோதி தஸ்ஸ தே²ரஸ்ஸ நாமம். மந்தாணியா பன ஸோ புத்தோ, தஸ்மா மந்தாணிபுத்தோதி வுச்சதி. ஸம்பா⁴விதோதி கு³ணஸம்பா⁴வனாய ஸம்பா⁴விதோ.

அப்பிச்ச²தாதி³வண்ணனா

அப்பிச்சோ²தி இச்சா²விரஹிதோ நிஇச்சோ² நித்தண்ஹோ. ஏத்த² ஹி ப்³யஞ்ஜனம் ஸாவஸேஸம் விய, அத்தோ² பன நிரவஸேஸோ. ந ஹி தஸ்ஸ அந்தோ அணுமத்தாபி பாபிகா இச்சா² நாம அத்தி². கீ²ணாஸவோ ஹேஸ ஸப்³ப³ஸோ பஹீனதண்ஹோ. அபிசேத்த² அத்ரிச்ச²தா பாபிச்ச²தா மஹிச்ச²தா அப்பிச்ச²தாதி அயம் பே⁴தோ³ வேதி³தப்³போ³.

தத்த² ஸகலாபே⁴ அதித்தஸ்ஸ பரலாபே⁴ பத்த²னா அத்ரிச்ச²தா நாம. தாய ஸமன்னாக³தஸ்ஸ ஏகபா⁴ஜேன பக்கபூவோபி அத்தனோ பத்தே பதிதோ ந ஸுபக்கோ விய கு²த்³த³கோ விய ச கா²யதி. ஸ்வேவ பரஸ்ஸ பத்தே பக்கி²த்தோ ஸுபக்கோ விய மஹந்தோ விய ச கா²யதி. அஸந்தகு³ணஸம்பா⁴வனதா பன படிக்³க³ஹணே ச அமத்தஞ்ஞுதா பாபிச்ச²தா நாம, ஸா, ‘‘இதே⁴கச்சோ அஸ்ஸத்³தோ⁴ ஸமானோ ஸத்³தோ⁴தி மம் ஜனோ ஜானாதூ’’திஆதி³னா நயேன அபி⁴த⁴ம்மே ஆக³தாயேவ, தாய ஸமன்னாக³தோ புக்³க³லோ கோஹஞ்ஞே பதிட்டா²தி. ஸந்தகு³ணஸம்பா⁴வனா பன படிக்³க³ஹணே ச அமத்தஞ்ஞுதா மஹிச்ச²தா நாம. ஸாபி, ‘‘இதே⁴கச்சோ ஸத்³தோ⁴ ஸமானோ ஸத்³தோ⁴தி மம் ஜனோ ஜானாதூதி இச்ச²தி, ஸீலவா ஸமானோ ஸீலவாதி மம் ஜனோ ஜானாதூ’’தி (விப⁴. 851) இமினா நயேன ஆக³தாயேவ, தாய ஸமன்னாக³தோ புக்³க³லோ து³ஸ்ஸந்தப்பயோ ஹோதி, விஜாதமாதாபிஸ்ஸ சித்தம் க³ஹேதும் ந ஸக்கோதி. தேனேதம் வுச்சதி –

‘‘அக்³கி³க்க²ந்தோ⁴ ஸமுத்³தோ³ ச, மஹிச்சோ² சாபி புக்³க³லோ;

ஸகடேன பச்சயம் தே³து, தயோபேதே அதப்பயா’’தி.

ஸந்தகு³ணனிகூ³ஹனதா பன படிக்³க³ஹணே ச மத்தஞ்ஞுதா அப்பிச்ச²தா நாம, தாய ஸமன்னாக³தோ புக்³க³லோ அத்தனி விஜ்ஜமானம்பி கு³ணம் படிச்சா²தே³துகாமதாய, ‘‘ஸத்³தோ⁴ ஸமானோ ஸத்³தோ⁴தி மம் ஜனோ ஜானாதூதி ந இச்ச²தி. ஸீலவா, பவிவித்தோ, ப³ஹுஸ்ஸுதோ, ஆரத்³த⁴வீரியோ, ஸமாதி⁴ஸம்பன்னோ, பஞ்ஞவா, கீ²ணாஸவோ ஸமானோ கீ²ணாஸவோதி மம் ஜனோ ஜானாதூ’’தி ந இச்ச²தி, ஸேய்யதா²பி மஜ்ஜ²ந்திகத்தே²ரோ.

தே²ரோ கிர மஹாகீ²ணாஸவோ அஹோஸி, பத்தசீவரம் பனஸ்ஸ பாத³மத்தமேவ அக்³க⁴தி, ஸோ அஸோகஸ்ஸ த⁴ம்மரஞ்ஞோ விஹாரமஹதி³வஸே ஸங்க⁴த்தே²ரோ அஹோஸி. அத²ஸ்ஸ அதிலூக²பா⁴வம் தி³ஸ்வா மனுஸ்ஸா, ‘‘ப⁴ந்தே, தோ²கம் ப³ஹி ஹோதா²’’தி ஆஹம்ஸு. தே²ரோ, ‘‘மாதி³ஸே கீ²ணாஸவே ரஞ்ஞோ ஸங்க³ஹம் அகரோந்தே அஞ்ஞோ கோ கரிஸ்ஸதீ’’தி பத²வியம் நிமுஜ்ஜித்வா ஸங்க⁴த்தே²ரஸ்ஸ உக்கி²த்தபிண்ட³ம் க³ண்ஹந்தோயேவ உம்முஜ்ஜி. ஏவம் கீ²ணாஸவோ ஸமானோ, ‘‘கீ²ணாஸவோதி மம் ஜனோ ஜானாதூ’’தி ந இச்ச²தி. ஏவம் அப்பிச்சோ² பன பி⁴க்கு² அனுப்பன்னம் லாப⁴ம் உப்பாதே³தி, உப்பன்னம் லாப⁴ம் தா²வரம் கரோதி, தா³யகானம் சித்தம் ஆராதே⁴தி, யதா² யதா² ஹி ஸோ அத்தனோ அப்பிச்ச²தாய அப்பம் க³ண்ஹாதி, ததா² ததா² தஸ்ஸ வத்தே பஸன்னா மனுஸ்ஸா ப³ஹூ தே³ந்தி.