5. நிவாபஸுத்தவண்ணனா

261. ஏவம் மே ஸுதந்தி நிவாபஸுத்தம். தத்த² நேவாபிகோதி யோ மிகா³னம் க³ஹணத்தா²ய அரஞ்ஞே திணபீ³ஜானி வபதி ‘‘இத³ம் திணம் கா²தி³தும் ஆக³தே மிகே³ ஸுக²ம் க³ண்ஹிஸ்ஸாமீ’’தி. நிவாபந்தி வப்பம். நிவுத்தந்தி வபிதம். மிக³ஜாதாதி மிக³க⁴டா. அனுபக²ஜ்ஜாதி அனுபவிஸித்வா. முச்சி²தாதி தண்ஹாமுச்ச²னாய முச்சி²தா, தண்ஹாய ஹத³யம் பவிஸித்வா முச்ச²னாகாரம் பாபிதாதி அத்தோ². மத³ம் ஆபஜ்ஜிஸ்ஸந்தீதி மானமத³ம் ஆபஜ்ஜிஸ்ஸந்தி. பமாத³ந்தி விஸ்ஸட்ட²ஸதிபா⁴வம். யதா²காமகரணீயா ப⁴விஸ்ஸந்தீதி யதா² இச்சி²ஸ்ஸாம, ததா² காதப்³பா³ ப⁴விஸ்ஸந்தி. இமஸ்மிம் நிவாபேதி இமஸ்மிம் நிவாபட்டா²னே. ஏகம் கிர நிவாபதிணம் நாம அத்தி² நிதா³க⁴ப⁴த்³த³கம், தம் யதா² யதா² நிதா³கோ⁴ ஹோதி, ததா² ததா² நீவாரவனம் விய மேக⁴மாலா விய ச ஏகக்³க⁴னம் ஹோதி, தம் லுத்³த³கா ஏகஸ்மிம் உத³கபா²ஸுகட்டா²னே கஸித்வா வபித்வா வதிம் கத்வா த்³வாரம் யோஜேத்வா ரக்க²ந்தி. அத² யதா³ மஹானிதா³கே⁴ ஸப்³ப³திணானி ஸுக்கா²னி ஹோந்தி, ஜிவ்ஹாதேமனமத்தம்பி உத³கம் து³ல்லப⁴ம் ஹோதி, ததா³ மிக³ஜாதா ஸுக்க²திணானி சேவ புராணபண்ணானி ச கா²த³ந்தா கம்பமானா விய விசரந்தா நிவாபதிணஸ்ஸ க³ந்த⁴ம் கா⁴யித்வா வத⁴ப³ந்த⁴னாதீ³னி அக³ணயித்வா வதிம் அஜ்ஜோ²த்த²ரந்தா பவிஸந்தி. தேஸஞ்ஹி நிவாபதிணம் அதிவிய பியம் ஹோதி மனாபம். நேவாபிகோ தே தி³ஸ்வா த்³வே தீணி தி³வஸானி பமத்தோ விய ஹோதி, த்³வாரம் விவரித்வா திட்ட²தி. அந்தோனிவாபட்டா²னே தஹிம் தஹிம் உத³கஆவாடகாபி ஹோந்தி, மிகா³ விவடத்³வாரேன பவிஸித்வா கா²தி³தமத்தகம் பிவிதமத்தகமேவ கத்வா பக்கமந்தி, புனதி³வஸே கிஞ்சி ந கரோந்தீதி கண்ணே சாலயமானா கா²தி³த்வா பிவித்வா அதரமானா க³ச்ச²ந்தி, புனதி³வஸே கோசி கிஞ்சி கத்தா நத்தீ²தி யாவத³த்த²ம் கா²தி³த்வா பிவித்வா மண்ட³லகு³ம்ப³ம் பவிஸித்வா நிபஜ்ஜந்தி. லுத்³த³கா தேஸம் பமத்தபா⁴வம் ஜானித்வா த்³வாரம் பிதா⁴ய ஸம்பரிவாரேத்வா கோடிதோ பட்டா²ய கோட்டேத்வா க³ச்ச²ந்தி, ஏவம் தே தஸ்மிம் நிவாபே நேவாபிகஸ்ஸ யதா²காமகரணீயா ப⁴வந்தி.

262. தத்ர, பி⁴க்க²வேதி, பி⁴க்க²வே, தேஸு மிக³ஜாதேஸு. பட²மா மிக³ஜாதாதி, மிக³ஜாதா பட²மது³தியா நாம நத்தி². ப⁴க³வா பன ஆக³தபடிபாடிவஸேன கப்பேத்வா பட²மா, து³தியா, ததியா, சதுத்தா²தி நாமம் ஆரோபேத்வா த³ஸ்ஸேஸி. இத்³தா⁴னுபா⁴வாதி யதா²காமம் கத்தப்³ப³பா⁴வதோ; வஸீபா⁴வோயேவ ஹி ஏத்த² இத்³தீ⁴தி ச ஆனுபா⁴வோதி ச அதி⁴ப்பேதோ.

263. ப⁴யபோ⁴கா³தி ப⁴யேன போ⁴க³தோ. ப³லவீரியந்தி அபராபரம் ஸஞ்சரணவாயோதா⁴து, ஸா பரிஹாயீதி அத்தோ².

264. உபனிஸ்ஸாய ஆஸயம் கப்பேய்யாமாதி அந்தோ நிபஜ்ஜித்வா கா²த³ந்தானம்பி ப⁴யமேவ, பா³ஹிரதோ ஆக³ந்த்வா கா²த³ந்தானம்பி ப⁴யமேவ, மயம் பன அமும் நிவாபட்டா²னம் நிஸ்ஸாய ஏகமந்தே ஆஸயம் கப்பேய்யாமாதி சிந்தயிம்ஸு. உபனிஸ்ஸாய ஆஸயம் கப்பயிம்ஸூதி லுத்³த³கா நாம ந ஸப்³ப³காலம் அப்பமத்தா ஹோந்தி. மயம் தத்த² தத்த² மண்ட³லகு³ம்பே³ஸு சேவ வதிபாதே³ஸு ச நிபஜ்ஜித்வா ஏதேஸு முக²தோ⁴வனத்த²ம் வா ஆஹாரகிச்சகரணத்த²ம் வா பக்கந்தேஸு நிவாபவத்து²ம் பவிஸித்வா கா²தி³தமத்தம் கத்வா அம்ஹாகம் வஸனட்டா²னம் பவிஸிஸ்ஸாமாதி நிவாபவத்து²ம் உபனிஸ்ஸாய க³ஹனேஸு கு³ம்ப³வதிபாதா³தீ³ஸு ஆஸயம் கப்பயிம்ஸு. பு⁴ஞ்ஜிம்ஸூதி வுத்தனயேன லுத்³த³கானம் பமாத³காலம் ஞத்வா ஸீக⁴ம் ஸீக⁴ம் பவிஸித்வா பு⁴ஞ்ஜிம்ஸு. கேதபி³னோதி ஸிக்கி²தகேராடிகா. இத்³தி⁴மந்தாதி இத்³தி⁴மந்தோ விய. பரஜனாதி யக்கா². இமே ந மிக³ஜாதாதி. ஆக³திம் வா க³திம் வாதி இமினா நாம டா²னேன ஆக³ச்ச²ந்தி, அமுத்ர க³ச்ச²ந்தீதி இத³ம் நேஸம் ந ஜானாம. த³ண்ட³வாகராஹீதி த³ண்ட³வாகரஜாலேஹி. ஸமந்தா ஸப்பதே³ஸம் அனுபரிவாரேஸுந்தி அதிமாயாவினோ ஏதே, ந தூ³ரம் க³மிஸ்ஸந்தி, ஸந்திகேயேவ நிபன்னா ப⁴விஸ்ஸந்தீதி நிவாபக்கே²த்தஸ்ஸ ஸமந்தா ஸப்பதே³ஸம் மஹந்தம் ஓகாஸம் அனுபரிவாரேஸும். அத்³த³ஸம்ஸூதி ஏவம் பரிவாரேத்வா வாகரஜாலம் ஸமந்ததோ சாலேத்வா ஓலோகேந்தா அத்³த³ஸம்ஸு. யத்த² தேதி யஸ்மிம் டா²னே தே கா³ஹம் அக³மம்ஸு, தம் டா²னம் அத்³த³ஸம்ஸூதி அத்தோ².

265. யம்னூன மயம் யத்த² அக³தீதி தே கிர ஏவம் சிந்தயிம்ஸு – ‘‘அந்தோ நிபஜ்ஜித்வா அந்தோ கா²த³ந்தானம்பி ப⁴யமேவ, பா³ஹிரதோ ஆக³ந்த்வா கா²த³ந்தானம்பி ஸந்திகே வஸித்வா கா²த³ந்தானம்பி ப⁴யமேவ, தேபி ஹி வாகரஜாலேன பரிக்கி²பித்வா க³ஹிதாயேவா’’தி, தேன தேஸம் ஏதத³ஹோஸி – ‘‘யம்னூன மயம் யத்த² நேவாபிகஸ்ஸ ச நேவாபிகபரிஸாய ச அக³தி அவிஸயோ, தத்த² தத்த² ஸேய்யம் கப்பேய்யாமா’’தி. அஞ்ஞே க⁴ட்டேஸ்ஸந்தீதி ததோ ததோ தூ³ரதரவாஸினோ அஞ்ஞே க⁴ட்டேஸ்ஸந்தி. தே க⁴ட்டிதா அஞ்ஞேதி தேபி க⁴ட்டிதா அஞ்ஞே ததோ தூ³ரதரவாஸினோ க⁴ட்டேஸ்ஸந்தி. ஏவம் இமம் நிவாபம் நிவுத்தம் ஸப்³ப³ஸோ மிக³ஜாதா பரிமுச்சிஸ்ஸந்தீதி ஏவம் இமம் அம்ஹேஹி நிவுத்தம் நிவாபம் ஸப்³பே³ மிக³க⁴டா மிக³ஸங்கா⁴ விஸ்ஸஜ்ஜேஸ்ஸந்தி பரிச்சஜிஸ்ஸந்தி. அஜ்ஜு²பேக்கே²ய்யாமாதி தேஸம் க³ஹணே அப்³யாவடா ப⁴வேய்யாமாதி; யதா² ததா² ஆக³ச்ச²ந்தேஸு ஹி தருணபோதகோ வா மஹல்லகோ வா து³ப்³ப³லோ வா யூத²பரிஹீனோ வா ஸக்கா ஹோந்தி லத்³து⁴ம், அனாக³ச்ச²ந்தேஸு கிஞ்சி நத்தி². அஜ்ஜு²பேக்கி²ம்ஸு கோ², பி⁴க்க²வேதி ஏவம் சிந்தேத்வா அப்³யாவடாவ அஹேஸும்.

267. அமும் நிவாபம் நிவுத்தம் மாரஸ்ஸ அமூனி ச லோகாமிஸானீதி ஏத்த² நிவாபோதி வா லோகாமிஸானீதி வா வட்டாமிஸபூ⁴தானம் பஞ்சன்னம் காமகு³ணானமேதம் அதி⁴வசனம். மாரோ ந ச பீ³ஜானி விய காமகு³ணே வபேந்தோ ஆஹிண்ட³தி, காமகு³ணகி³த்³தா⁴னம் பன உபரி வஸம் வத்தேதி, தஸ்மா காமகு³ணா மாரஸ்ஸ நிவாபா நாம ஹோந்தி. தேன வுத்தம் – ‘‘அமும் நிவாபம் நிவுத்தம் மாரஸ்ஸா’’தி. ந பரிமுச்சிம்ஸு மாரஸ்ஸ இத்³தா⁴னுபா⁴வாதி மாரஸ்ஸ வஸம் க³தா அஹேஸும், யதா²காமகரணீயா. அயம் ஸபுத்தப⁴ரியபப்³ப³ஜ்ஜாய ஆக³தஉபமா.

268. சேதோவிமுத்தி பரிஹாயீதி ஏத்த² சேதோவிமுத்தி நாம அரஞ்ஞே வஸிஸ்ஸாமாதி உப்பன்னஅஜ்ஜா²ஸயோ; ஸோ பரிஹாயீதி அத்தோ². ததூ²பமே அஹம் இமே து³தியேதி அயம் ப்³ராஹ்மணத⁴ம்மிகபப்³ப³ஜ்ஜாய உபமா. ப்³ராஹ்மணா ஹி அட்ட²சத்தாலீஸவஸ்ஸானி கோமாரப்³ரஹ்மசரியம் சரித்வா வட்டுபச்சே²த³ப⁴யேன பவேணிம் க⁴டயிஸ்ஸாமாதி த⁴னம் பரியேஸித்வா ப⁴ரியம் க³ஹேத்வா அகா³ரமஜ்ஜே² வஸந்தா ஏகஸ்மிம் புத்தே ஜாதே ‘‘அம்ஹாகம் புத்தோ ஜாதோ வட்டம் ந உச்சி²ன்னம் பவேணி க⁴டிதா’’தி புன நிக்க²மித்வா பப்³ப³ஜந்தி வா தமேவ வா ஸ’கலத்தவாஸம் வஸந்தி.

269. ஏவஞ்ஹி தே, பி⁴க்க²வே, ததியாபி ஸமணப்³ராஹ்மணா ந பரிமுச்சிம்ஸூதி புரிமா விய தேபி மாரஸ்ஸ இத்³தா⁴னுபா⁴வா ந முச்சிம்ஸு; யதா²காமகரணீயாவ அஹேஸும். கிம் பன தே அகம்ஸூதி? கா³மனிக³மராஜதா⁴னியோ ஓஸரித்வா தேஸு தேஸு ஆராமஉய்யானட்டா²னேஸு அஸ்ஸமம் மாபேத்வா நிவஸந்தா குலதா³ரகே ஹத்தி²அஸ்ஸரத²ஸிப்பாதீ³னி நானப்பகாரானி ஸிப்பானி ஸிக்கா²பேஸும். இதி தே வாகரஜாலேன ததியா மிக³ஜாதா விய மாரஸ்ஸ பாபிமதோ தி³ட்டி²ஜாலேன பரிக்கி²பித்வா யதா²காமகரணீயா அஹேஸும்.

270. ததூ²பமே அஹம் இமே சதுத்தே²தி அயம் இமஸ்ஸ ஸாஸனஸ்ஸ உபமா ஆஹடா.

271. அந்த⁴மகாஸி மாரந்தி ந மாரஸ்ஸ அக்கீ²னி பி⁴ந்தி³. விபஸ்ஸனாபாத³கஜ்ஜா²னம் ஸமாபன்னஸ்ஸ பன பி⁴க்கு²னோ இமம் நாம ஆரம்மணம் நிஸ்ஸாய சித்தம் வத்ததீதி மாரோ பஸ்ஸிதும் ந ஸக்கோதி. தேன வுத்தம் – ‘‘அந்த⁴மகாஸி மார’’ந்தி. அபத³ம் வதி⁴த்வா மாரசக்கு²ந்தி தேனேவ பரியாயேன யதா² மாரஸ்ஸ சக்கு² அபத³ம் ஹோதி நிப்பத³ம், அப்பதிட்ட²ம், நிராரம்மணம், ஏவம் வதி⁴த்வாதி அத்தோ². அத³ஸ்ஸனம் க³தோ பாபிமதோதி தேனேவ பரியாயேன மாரஸ்ஸ பாபிமதோ அத³ஸ்ஸனம் க³தோ. ந ஹி ஸோ அத்தனோ மம்ஸசக்கு²னா தஸ்ஸ விபஸ்ஸனாபாத³கஜ்ஜா²னம் ஸமாபன்னஸ்ஸ பி⁴க்கு²னோ ஞாணஸரீரம் த³ட்டு²ம் ஸக்கோதி. பஞ்ஞாய சஸ்ஸ தி³ஸ்வா ஆஸவா பரிக்கீ²ணா ஹோந்தீதி மக்³க³பஞ்ஞாய சத்தாரி அரியஸச்சானி தி³ஸ்வா சத்தாரோ ஆஸவா பரிக்கீ²ணா ஹோந்தி. திண்ணோ லோகே விஸத்திகந்தி லோகே ஸத்தவிஸத்தபா⁴வேன விஸத்திகாதி ஏவம் ஸங்க²ம் க³தம். அத² வா ‘‘விஸத்திகாதி கேனட்டே²ன விஸத்திகா? விஸதாதி விஸத்திகா விஸடாதி விஸத்திகா, விபுலாதி விஸத்திகா, விஸாலாதி விஸத்திகா, விஸமாதி விஸத்திகா, விஸக்கதீதி விஸத்திகா, விஸம் ஹரதீதி விஸத்திகா, விஸம்வாதி³காதி விஸத்திகா, விஸமூலாதி விஸத்திகா, விஸப²லாதி விஸத்திகா, விஸபரிபோ⁴கா³தி விஸத்திகா, விஸாலா வா பன ஸா தண்ஹா ரூபே ஸத்³தே³ க³ந்தே⁴ ரஸே போ²ட்ட²ப்³பே³’’தி (மஹானி. 3; சூளனி. மேத்தகூ³மாணவபுச்சா²னித்³தே³ஸ 22, க²க்³க³விஸாணஸுத்தனித்³தே³ஸ 124) விஸத்திகா. ஏவம் விஸத்திகாதி ஸங்க²ம் க³தம் தண்ஹம் திண்ணோ நித்திண்ணோ உத்திண்ணோ. தேன வுச்சதி – ‘‘திண்ணோ லோகே விஸத்திக’’ந்தி.

பபஞ்சஸூத³னியா மஜ்ஜி²மனிகாயட்ட²கதா²ய

நிவாபஸுத்தவண்ணனா நிட்டி²தா.