6. பாஸராஸிஸுத்தவண்ணனா

272. ஏவம் மே ஸுதந்தி பாஸராஸிஸுத்தம். தத்த² ஸாது⁴ மயம், ஆவுஸோதி ஆயாசந்தா ப⁴ணந்தி. ஏதே கிர பஞ்சஸதா பி⁴க்கூ² ஜனபத³வாஸினோ ‘‘த³ஸப³லம் பஸ்ஸிஸ்ஸாமா’’தி ஸாவத்தி²ம் அனுப்பத்தா. ஸத்து²த³ஸ்ஸனம் பன ஏதேஹி லத்³த⁴ம், த⁴ம்மிம் கத²ம் ந தாவ ஸுணந்தி. தே ஸத்து²கா³ரவேன ‘‘அம்ஹாகம், ப⁴ந்தே, த⁴ம்மகத²ம் கதே²தா²’’தி வத்தும் ந ஸக்கோந்தி. பு³த்³தா⁴ ஹி க³ரூ ஹோந்தி, ஏகசாரிகோ ஸீஹோ மிக³ராஜா விய, பபி⁴ன்னகுஞ்ஜரோ விய, ப²ணகதஆஸீவிஸோ விய, மஹாஅக்³கி³க்க²ந்தோ⁴ விய ச து³ராஸதா³ வுத்தம்பி சேதம் –

‘‘ஆஸீவிஸோ யதா² கோ⁴ரோ, மிக³ராஜாவ கேஸரீ;

நாகோ³வ குஞ்ஜரோ த³ந்தீ, ஏவம் பு³த்³தா⁴ து³ராஸதா³’’தி.

ஏவம் து³ராஸத³ம் ஸத்தா²ரம் தே பி⁴க்கூ² ஸயம் யாசிதும் அஸக்கோந்தா ஆயஸ்மந்தம் ஆனந்த³ம் யாசமானா ‘‘ஸாது⁴ மயம், ஆவுஸோ’’தி ஆஹம்ஸு.

அப்பேவ நாமாதி அபி நாம லபே⁴ய்யாத². கஸ்மா பன தே²ரோ தே பி⁴க்கூ² ‘‘ரம்மகஸ்ஸ ப்³ராஹ்மணஸ்ஸ அஸ்ஸமம் உபஸங்கமேய்யாதா²’’தி ஆஹ? பாகடகிரியதாய. த³ஸப³லஸ்ஸ ஹி கிரியா தே²ரஸ்ஸ பாகடா ஹோதி; ஜானாதி தே²ரோ, ‘‘அஜ்ஜ ஸத்தா² ஜேதவனே வஸித்வா புப்³பா³ராமே தி³வாவிஹாரம் கரிஸ்ஸதி; அஜ்ஜ புப்³பா³ராமே வஸித்வா ஜேதவனே தி³வாவிஹாரம் கரிஸ்ஸதி; அஜ்ஜ ஏககோவ பிண்டா³ய பவிஸிஸ்ஸதி; அஜ்ஜ பி⁴க்கு²ஸங்க⁴பரிவுதோ இமஸ்மிம் காலே ஜனபத³சாரிகம் நிக்க²மிஸ்ஸதீ’’தி. கிம் பனஸ்ஸ ஏவம் ஜானனத்த²ம் சேதோபரியஞாணம் அத்தீ²தி? நத்தி². அனுமானபு³த்³தி⁴யா பன கதகிரியாய நயக்³கா³ஹேன ஜானாதி. யஞ்ஹி தி³வஸம் ப⁴க³வா ஜேதவனே வஸித்வா புப்³பா³ராமே தி³வாவிஹாரம் காதுகாமோ ஹோதி, ததா³ ஸேனாஸனபரிக்கா²ரப⁴ண்டா³னம் படிஸாமனாகாரம் த³ஸ்ஸேதி, தே²ரோ ஸம்மஜ்ஜனிஸங்காரச²ட்³ட³னகாதீ³னி படிஸாமேதி. புப்³பா³ராமே வஸித்வா ஜேதவனம் தி³வாவிஹாராய ஆக³மனகாலேபி ஏஸேவ நயோ.

யதா³ பன ஏககோ பிண்டா³ய பவிஸிதுகாமோ ஹோதி, ததா³ பாதோவ ஸரீரபடிஜக்³க³னம் கத்வா க³ந்த⁴குடிம் பவிஸித்வா த்³வாரம் பிதா⁴ய ப²லஸமாபத்திம் அப்பேத்வா நிஸீத³தி. தே²ரோ ‘‘அஜ்ஜ ப⁴க³வா போ³த⁴னேய்யப³ந்த⁴வம் தி³ஸ்வா நிஸின்னோ’’தி தாய ஸஞ்ஞாய ஞத்வா ‘‘அஜ்ஜ, ஆவுஸோ, ப⁴க³வா ஏககோ பவிஸிதுகாமோ, தும்ஹே பி⁴க்கா²சாரஸஜ்ஜா ஹோதா²’’தி பி⁴க்கூ²னம் ஸஞ்ஞம் தே³தி. யதா³ பன பி⁴க்கு²ஸங்க⁴பரிவாரோ பவிஸிதுகாமோ ஹோதி, ததா³ க³ந்த⁴குடித்³வாரம் உபட்³ட⁴பித³ஹிதம் கத்வா ப²லஸமாபத்திம் அப்பேத்வா நிஸீத³தி, தே²ரோ தாய ஸஞ்ஞாய ஞத்வா பத்தசீவரக்³க³ஹணத்தா²ய பி⁴க்கூ²னம் ஸஞ்ஞம் தே³தி. யதா³ ஜனபத³சாரிகம் நிக்க²மிதுகாமோ ஹோதி, ததா³ ஏகம் த்³வே ஆலோபே அதிரேகம் பு⁴ஞ்ஜதி, ஸப்³ப³காலம் சங்கமனஞ்சாருய்ஹ அபராபரம் சங்கமதி, தே²ரோ தாய ஸஞ்ஞாய ஞத்வா ‘‘ப⁴க³வா, ஆவுஸோ, ஜனபத³சாரிகம் சரிதுகாமோ, தும்ஹாகம் கத்தப்³ப³ம் கரோதா²’’தி பி⁴க்கூ²னம் ஸஞ்ஞம் தே³தி.

ப⁴க³வா பட²மபோ³தி⁴யம் வீஸதி வஸ்ஸானி அனிப³த்³த⁴வாஸோ அஹோஸி, பச்சா² பஞ்சவீஸதி வஸ்ஸானி அப்³போ³கிண்ணம் ஸாவத்தி²ம்யேவ உபனிஸ்ஸாய வஸந்தோ ஏகதி³வஸே த்³வே டா²னானி பரிபு⁴ஞ்ஜதி. ஜேதவனே ரத்திம் வஸித்வா புனதி³வஸே பி⁴க்கு²ஸங்க⁴பரிவுதோ த³க்கி²ணத்³வாரேன ஸாவத்தி²ம் பிண்டா³ய பவிஸித்வா பாசீனத்³வாரேன நிக்க²மித்வா புப்³பா³ராமே தி³வாவிஹாரம் கரோதி. புப்³பா³ராமே ரத்திம் வஸித்வா புனதி³வஸே பாசீனத்³வாரேன ஸாவத்தி²ம் பிண்டா³ய பவிஸித்வா த³க்கி²ணத்³வாரேன நிக்க²மித்வா ஜேதவனே தி³வாவிஹாரம் கரோதி. கஸ்மா? த்³வின்னம் குலானம் அனுகம்பாய. மனுஸ்ஸத்தபா⁴வே டி²தேன ஹி அனாத²பிண்டி³கேன விய அஞ்ஞேன கேனசி, மாதுகா³மத்தபா⁴வே டி²தாய ச விஸாகா²ய விய அஞ்ஞாய இத்தி²யா ததா²க³தம் உத்³தி³ஸ்ஸ த⁴னபரிச்சாகோ³ கதோ நாம நத்தி², தஸ்மா ப⁴க³வா தேஸம் அனுகம்பாய ஏகதி³வஸே இமானி த்³வே டா²னானி பரிபு⁴ஞ்ஜதி. தஸ்மிம் பன தி³வஸே ஜேதவனே வஸி, தஸ்மா தே²ரோ – ‘‘அஜ்ஜ ப⁴க³வா ஸாவத்தி²யம் பிண்டா³ய சரித்வா ஸாயன்ஹகாலே க³த்தானி பரிஸிஞ்சனத்தா²ய புப்³ப³கோட்ட²கம் க³மிஸ்ஸதி; அதா²ஹம் க³த்தானி பரிஸிஞ்சித்வா டி²தம் ப⁴க³வந்தம் யாசித்வா ரம்மகஸ்ஸ ப்³ராஹ்மணஸ்ஸ அஸ்ஸமம் க³ஹேத்வா க³மிஸ்ஸாமி. ஏவமிமே பி⁴க்கூ² ப⁴க³வதோ ஸம்முகா² லபி⁴ஸ்ஸந்தி த⁴ம்மகத²ம் ஸவனாயா’’தி சிந்தேத்வா தே பி⁴க்கூ² ஏவமாஹ.

மிகா³ரமாதுபாஸாதோ³தி விஸாகா²ய பாஸாதோ³. ஸா ஹி மிகா³ரேன ஸேட்டி²னா மாதுட்டா²னே ட²பிதத்தா மிகா³ரமாதாதி வுச்சதி. படிஸல்லானா வுட்டி²தோதி தஸ்மிம் கிர பாஸாதே³ த்³வின்னம் மஹாஸாவகானம் ஸிரிக³ப்³பா⁴னம் மஜ்ஜே² ப⁴க³வதோ ஸிரிக³ப்³போ⁴ அஹோஸி. தே²ரோ த்³வாரம் விவரித்வா அந்தோக³ப்³ப⁴ம் ஸம்மஜ்ஜித்வா மாலாகசவரம் நீஹரித்வா மஞ்சபீட²ம் பஞ்ஞபேத்வா ஸத்து² ஸஞ்ஞம் அதா³ஸி. ஸத்தா² ஸிரிக³ப்³ப⁴ம் பவிஸித்வா த³க்கி²ணேன பஸ்ஸேன ஸதோ ஸம்பஜானோ ஸீஹஸேய்யம் உபக³ம்ம த³ரத²ம் படிப்பஸ்ஸம்பே⁴த்வா உட்டா²ய ப²லஸமாபத்திம் அப்பேத்வா நிஸீதி³த்வா ஸாயன்ஹஸமயே ததோ வுட்டா²ஸி. தம் ஸந்தா⁴ய வுத்தம் ‘‘படிஸல்லானா வுட்டி²தோ’’தி.

பரிஸிஞ்சிதுந்தி யோ ஹி சுண்ணமத்திகாதீ³ஹி க³த்தானி உப்³ப³ட்டேந்தோ மல்லகமுட்டா²தீ³ஹி வா க⁴ம்ஸந்தோ ந்ஹாயதி, ஸோ ந்ஹாயதீதி வுச்சதி. யோ ததா² அகத்வா பகதியாவ ந்ஹாயதி, ஸோ பரிஸிஞ்சதீதி வுச்சதி. ப⁴க³வதோபி ஸரீரே ததா² ஹரிதப்³ப³ம் ரஜோஜல்லம் நாம ந உபலிம்பதி, உதுக்³க³ஹணத்த²ம் பன ப⁴க³வா கேவலம் உத³கம் ஓதரதி. தேனாஹ – ‘‘க³த்தானி பரிஸிஞ்சிது’’ந்தி. புப்³ப³கோட்ட²கோதி பாசீனகோட்ட²கோ.

ஸாவத்தி²யம் கிர விஹாரோ கதா³சி மஹா ஹோதி கதா³சி கு²த்³த³கோ. ததா² ஹி ஸோ விபஸ்ஸிஸ்ஸ ப⁴க³வதோ காலே யோஜனிகோ அஹோஸி, ஸிகி²ஸ்ஸ திகா³வுதோ, வேஸ்ஸபு⁴ஸ்ஸ அட்³ட⁴யோஜனிகோ, ககுஸந்த⁴ஸ்ஸ கா³வுதப்பமாணோ, கோணாக³மனஸ்ஸ அட்³ட⁴கா³வுதப்பமாணோ, கஸ்ஸபஸ்ஸ வீஸதிஉஸப⁴ப்பமாணோ, அம்ஹாகம் ப⁴க³வதோ காலே அட்ட²கரீஸப்பமாணோ ஜாதோ. தம்பி நக³ரம் தஸ்ஸ விஹாரஸ்ஸ கதா³சி பாசீனதோ ஹோதி, கதா³சி த³க்கி²ணதோ, கதா³சி பச்சி²மதோ, கதா³சி உத்தரதோ. ஜேதவனே க³ந்த⁴குடியம் பன சதுன்னம் மஞ்சபாதா³னம் பதிட்டி²தட்டா²னம் அசலமேவ.

சத்தாரி ஹி அசலசேதியட்டா²னானி நாம மஹாபோ³தி⁴பல்லங்கட்டா²னம் இஸிபதனே த⁴ம்மசக்கப்பவத்தனட்டா²னம் ஸங்கஸ்ஸனக³ரத்³வாரே தே³வோரோஹணகாலே ஸோபானஸ்ஸ பதிட்ட²ட்டா²னம் மஞ்சபாத³ட்டா²னந்தி. அயம் பன புப்³ப³கோட்ட²கோ கஸ்ஸபத³ஸப³லஸ்ஸ வீஸதிஉஸப⁴விஹாரகாலே பாசீனத்³வாரே கோட்ட²கோ அஹோஸி. ஸோ இதா³னிபி புப்³ப³கோட்ட²கோத்வேவ பஞ்ஞாயதி. கஸ்ஸபத³ஸப³லஸ்ஸ காலே அசிரவதீ நக³ரம் பரிக்கி²பித்வா ஸந்த³மானா புப்³ப³கோட்ட²கம் பத்வா உத³கேன பி⁴ந்தி³த்வா மஹந்தம் உத³கரஹத³ம் மாபேஸி ஸமதித்த²ம் அனுபுப்³ப³க³ம்பீ⁴ரம். தத்த² ஏகம் ரஞ்ஞோ ந்ஹானதித்த²ம், ஏகம் நாக³ரானம், ஏகம் பி⁴க்கு²ஸங்க⁴ஸ்ஸ, ஏகம் பு³த்³தா⁴னந்தி ஏவம் பாடியேக்கானி ந்ஹானதித்தா²னி ஹோந்தி ரமணீயானி விப்பகிண்ணரஜதபட்டஸதி³ஸவாலிகானி. இதி ப⁴க³வா ஆயஸ்மதா ஆனந்தே³ன ஸத்³தி⁴ம் யேன அயம் ஏவரூபோ புப்³ப³கோட்ட²கோ தேனுபஸங்கமி க³த்தானி பரிஸிஞ்சிதும். அதா²யஸ்மா ஆனந்தோ³ உத³கஸாடிகம் உபனேஸி. ப⁴க³வா ரத்தது³பட்டம் அபனேத்வா உத³கஸாடிகம் நிவாஸேஸி. தே²ரோ து³பட்டேன ஸத்³தி⁴ம் மஹாசீவரம் அத்தனோ ஹத்த²க³தமகாஸி. ப⁴க³வா உத³கம் ஓதரி. ஸஹோதரணேனேவஸ்ஸ உத³கே மச்ச²கச்ச²பா ஸப்³பே³ ஸுவண்ணவண்ணா அஹேஸும். யந்தனாலிகாஹி ஸுவண்ணரஸதா⁴ரானிஸிஞ்சமானகாலோ விய ஸுவண்ணபடபஸாரணகாலோ விய ச அஹோஸி. அத² ப⁴க³வதோ ந்ஹானவத்தம் த³ஸ்ஸேத்வா ந்ஹத்வா பச்சுத்திண்ணஸ்ஸ தே²ரோ ரத்தது³பட்டம் உபனேஸி. ப⁴க³வா தம் நிவாஸேத்வா விஜ்ஜுலதாஸதி³ஸம் காயப³ந்த⁴னம் ப³ந்தி⁴த்வா மஹாசீவரம் அந்தந்தேன ஸம்ஹரித்வா பது³மக³ப்³ப⁴ஸதி³ஸம் கத்வா உபனீதம் த்³வீஸு கண்ணேஸு க³ஹேத்வா அட்டா²ஸி. தேன வுத்தம் – ‘‘புப்³ப³கோட்ட²கே க³த்தானி பரிஸிஞ்சித்வா பச்சுத்தரித்வா ஏகசீவரோ அட்டா²ஸீ’’தி.

ஏவம் டி²தஸ்ஸ பன ப⁴க³வதோ ஸரீரம் விகஸிதகமலுப்பலஸரம் ஸப்³ப³பாலிபு²ல்லம் பாரிச்ச²த்தகம் தாராமரீசிவிகஸிதம் ச க³க³னதலம் ஸிரியா அவஹஸமானம் விய விரோசித்த². ப்³யாமப்பபா⁴பரிக்கே²பவிலாஸினீ சஸ்ஸ த்³வத்திம்ஸவரலக்க²ணமாலா க³ந்தே²த்வா ட²பிதா த்³வத்திம்ஸசந்த³மாலா விய, த்³வத்திம்ஸஸூரியமாலா விய, படிபாடியா ட²பிதா த்³வத்திம்ஸசக்கவத்தி த்³வத்திம்ஸதே³வராஜா த்³வத்திம்ஸமஹாப்³ரஹ்மானோ விய ச அதிவிய விரோசித்த², வண்ணபூ⁴மினாமேஸா. ஏவரூபேஸு டா²னேஸு பு³த்³தா⁴னம் ஸரீரவண்ணம் வா கு³ணவண்ணம் வா சுண்ணியபதே³ஹி வா கா³தா²ஹி வா அத்த²ஞ்ச உபமாயோ ச காரணானி ச ஆஹரித்வா படிப³லேன த⁴ம்மகதி²கேன பூரேத்வா கதே²தும் வட்டதீதி ஏவரூபேஸு டா²னேஸு த⁴ம்மகதி²கஸ்ஸ தா²மோ வேதி³தப்³போ³.

273. க³த்தானி புப்³பா³பயமானோதி பகதிபா⁴வம் க³மயமானோ நிருத³கானி குருமானோ, ஸுக்கா²பயமானோதி அத்தோ². ஸோத³கேன க³த்தேன சீவரம் பாருபந்தஸ்ஸ ஹி சீவரே கண்ணிகா உட்ட²ஹந்தி, பரிக்கா²ரப⁴ண்ட³ம் து³ஸ்ஸதி. பு³த்³தா⁴னம் பன ஸரீரே ரஜோஜல்லம் ந உபலிம்பதி; பது³மபத்தே பக்கி²த்தஉத³கபி³ந்து³ விய உத³கம் வினிவத்தேத்வா க³ச்ச²தி, ஏவம் ஸந்தேபி ஸிக்கா²கா³ரவதாய ப⁴க³வா, ‘‘பப்³ப³ஜிதவத்தம் நாமேத’’ந்தி மஹாசீவரம் உபோ⁴ஸு கண்ணேஸு க³ஹேத்வா புரதோ காயம் படிச்சா²தே³த்வா அட்டா²ஸி. தஸ்மிம் க²ணே தே²ரோ சிந்தேஸி – ‘‘ப⁴க³வா மஹாசீவரம் பாருபித்வா மிகா³ரமாதுபாஸாத³ம் ஆரப்³ப⁴ க³மனாபி⁴ஹாரதோ பட்டா²ய து³ன்னிவத்தியோ ப⁴விஸ்ஸதி; பு³த்³தா⁴னஞ்ஹி அதி⁴ப்பாயகோபனம் நாம ஏகசாரிகஸீஹஸ்ஸ க³ஹணத்த²ம் ஹத்த²ப்பஸாரணம் விய; பபி⁴ன்னவரவாரணஸ்ஸ ஸோண்டா³ய பராமஸனம் விய; உக்³க³தேஜஸ்ஸ ஆஸீவிஸஸ்ஸ கீ³வாய க³ஹணம் விய ச பா⁴ரியம் ஹோதி. இதே⁴வ ரம்மகஸ்ஸ ப்³ராஹ்மணஸ்ஸ அஸ்ஸமஸ்ஸ வண்ணம் கதே²த்வா தத்த² க³மனத்தா²ய ப⁴க³வந்தம் யாசிஸ்ஸாமீ’’தி. ஸோ ததா² அகாஸி. தேன வுத்தம் – ‘‘அத² கோ² ஆயஸ்மா ஆனந்தோ³…பே… அனுகம்பம் உபாதா³யா’’தி.

தத்த² அனுகம்பம் உபாதா³யாதி ப⁴க³வதோ ஸம்முகா² த⁴ம்மிம் கத²ம் ஸோஸ்ஸாமாதி தம் அஸ்ஸமம் க³தானம் பஞ்சன்னம் பி⁴க்கு²ஸதானம் அனுகம்பம் படிச்ச, தேஸு காருஞ்ஞம் கத்வாதி அத்தோ². த⁴ம்மியா கதா²யாதி த³ஸஸு பாரமிதாஸு அஞ்ஞதராய பாரமியா சேவ மஹாபி⁴னிக்க²மனஸ்ஸ ச வண்ணம் கத²யமானா ஸன்னிஸின்னா ஹோந்தி. ஆக³மயமானோதி ஓலோகயமானோ. அஹம் பு³த்³தோ⁴தி ஸஹஸா அப்பவிஸித்வா யாவ ஸா கதா² நிட்டா²தி, தாவ அட்டா²ஸீதி அத்தோ². அக்³க³ளம் ஆகோடேஸீதி அக்³க³னகே²ன கவாடே ஸஞ்ஞம் அதா³ஸி. விவரிம்ஸூதி ஸோதம் ஓத³ஹித்வாவ நிஸின்னத்தா தங்க²ணம்யேவ ஆக³ந்த்வா விவரிம்ஸு.

பஞ்ஞத்தே ஆஸனேதி பு³த்³த⁴காலே கிர யத்த² யத்த² ஏகோபி பி⁴க்கு² விஹரதி, ஸப்³ப³த்த² பு³த்³தா⁴ஸனம் பஞ்ஞத்தமேவ ஹோதி. கஸ்மா? ப⁴க³வா கிர அத்தனோ ஸந்திகே கம்மட்டா²னம் க³ஹேத்வா பா²ஸுகட்டா²னே விஹரந்தே மனஸி கரோதி ‘‘அஸுகோ மய்ஹம் ஸந்திகே கம்மட்டா²னம் க³ஹேத்வா க³தோ, ஸக்கி²ஸ்ஸதி நு கோ² விஸேஸம் நிப்³ப³த்தேதும் நோ வா’’தி. அத² நம் பஸ்ஸதி கம்மட்டா²னம் விஸ்ஸஜ்ஜேத்வா அகுஸலவிதக்கே விதக்கயமானம், ததோ ‘‘கத²ஞ்ஹி நாம மாதி³ஸஸ்ஸ ஸத்து² ஸந்திகே கம்மட்டா²னம் க³ஹேத்வா விஹரந்தம் இமம் குலபுத்தம் அகுஸலவிதக்கா அபி⁴ப⁴வித்வா அனமதக்³கே³ வட்டது³க்கே² ஸம்ஸாரேஸ்ஸந்தீ’’தி தஸ்ஸ அனுக்³க³ஹத்த²ம் தத்தே²வ அத்தானம் த³ஸ்ஸேத்வா தம் குலபுத்தம் ஓவதி³த்வா ஆகாஸம் உப்பதித்வா புன அத்தனோ வஸனட்டா²னமேவ க³ச்ச²தி. அதே²வம் ஓவதி³யமானா தே பி⁴க்கூ² சிந்தயிம்ஸு – ‘‘ஸத்தா² அம்ஹாகம் மனம் ஜானித்வா ஆக³ந்த்வா அம்ஹாகம் ஸமீபே டி²தம்யேவ அத்தானம் த³ஸ்ஸேதி; தஸ்மிம் க²ணே, ‘ப⁴ந்தே, இத⁴ நிஸீத³த², இத⁴ நிஸீத³தா²’தி ஆஸனபரியேஸனம் நாம பா⁴ரோ’’தி. தே ஆஸனம் பஞ்ஞபேத்வாவ விஹரந்தி. யஸ்ஸ பீட²ம் அத்தி², ஸோ தம் பஞ்ஞபேதி. யஸ்ஸ நத்தி², ஸோ மஞ்சம் வா ப²லகம் வா கட்ட²ம் வா பாஸாணம் வா வாலிகபுஞ்ஜம் வா பஞ்ஞபேதி. தம் அலப⁴மானா புராணபண்ணானிபி ஸங்கட்³டி⁴த்வா தத்த² பம்ஸுகூலம் பத்த²ரித்வா ட²பேந்தி. இத⁴ பன பகதிபஞ்ஞத்தமேவ ஆஸனம் அஹோஸி, தம் ஸந்தா⁴ய வுத்தம் – ‘‘பஞ்ஞத்தே ஆஸனே நிஸீதீ³’’தி.

காய நுத்தா²தி கதமாய நு கதா²ய ஸன்னிஸின்னா ப⁴வதா²தி அத்தோ². ‘‘காய நேத்தா²’’திபி பாளி, தஸ்ஸா கதமாய நு ஏத்தா²தி அத்தோ². ‘‘காய நோத்தா²’’திபி பாளி, தஸ்ஸாபி புரிமோயேவ அத்தோ². அந்தரா கதா²தி கம்மட்டா²னமனஸிகாரஉத்³தே³ஸபரிபுச்சா²தீ³னம் அந்தரா அஞ்ஞா ஏகா கதா². விப்பகதாதி மம ஆக³மனபச்சயா அபரினிட்டி²தா ஸிக²ம் அப்பத்தா. அத² ப⁴க³வா அனுப்பத்தோதி அத² ஏதஸ்மிம் காலே ப⁴க³வா ஆக³தோ. த⁴ம்மீ வா கதா²தி த³ஸகதா²வத்து²னிஸ்ஸிதா வா த⁴ம்மீ கதா². அரியோ வா துண்ஹீபா⁴வோதி ஏத்த² பன து³தியஜ்ஜா²னம்பி அரியோ துண்ஹீபா⁴வோ மூலகம்மட்டா²னம்பி. தஸ்மா தம் ஜா²னம் அப்பேத்வா நிஸின்னோபி, மூலகம்மட்டா²னம் க³ஹேத்வா நிஸின்னோபி பி⁴க்கு² அரியேன துண்ஹீபா⁴வேன நிஸின்னோதி வேதி³தப்³போ³.

274. த்³வேமா, பி⁴க்க²வே, பரியேஸனாதி கோ அனுஸந்தி⁴? தே பி⁴க்கூ² ஸம்முகா² த⁴ம்மிம் கத²ம் ஸோஸ்ஸாமாதி தே²ரஸ்ஸ பா⁴ரம் அகம்ஸு, தே²ரோ தேஸம் அஸ்ஸமக³மனமகாஸி. தே தத்த² நிஸீதி³த்வா அதிரச்சா²னகதி²கா ஹுத்வா த⁴ம்மியா கதா²ய நிஸீதி³ம்ஸு. அத² ப⁴க³வா ‘‘அயம் தும்ஹாகம் பரியேஸனா அரியபரியேஸனா நாமா’’தி த³ஸ்ஸேதும் இமம் தே³ஸனம் ஆரபி⁴. தத்த² கதமா ச, பி⁴க்க²வே, அனரியபரியேஸனாதி ஏத்த² யதா² மக்³க³குஸலோ புரிஸோ பட²மம் வஜ்ஜேதப்³ப³ம் அபாயமக்³க³ம் த³ஸ்ஸேந்தோ ‘‘வாமம் முஞ்சித்வா த³க்கி²ணம் க³ண்ஹா’’தி வத³தி. ஏவம் ப⁴க³வா தே³ஸனாகுஸலதாய பட²மம் வஜ்ஜேதப்³ப³ம் அனரியபரியேஸனம் ஆசிக்கி²த்வா பச்சா² இதரம் ஆசிக்கி²ஸ்ஸாமீதி உத்³தே³ஸானுக்கமம் பி⁴ந்தி³த்வா ஏவமாஹ. ஜாதித⁴ம்மோதி ஜாயனஸபா⁴வோ. ஜராத⁴ம்மோதி ஜீரணஸபா⁴வோ. ப்³யாதி⁴த⁴ம்மோதி ப்³யாதி⁴ஸபா⁴வோ. மரணத⁴ம்மோதி மரணஸபா⁴வோ. ஸோகத⁴ம்மோதி ஸோசனகஸபா⁴வோ. ஸம்கிலேஸத⁴ம்மோதி ஸம்கிலிஸ்ஸனஸபா⁴வோ.

புத்தப⁴ரியந்தி புத்தா ச ப⁴ரியா ச. ஏஸ நயோ ஸப்³ப³த்த². ஜாதரூபரஜதந்தி ஏத்த² பன ஜாதரூபந்தி ஸுவண்ணம். ரஜதந்தி யம்கிஞ்சி வோஹாரூபக³ம் லோஹமாஸகாதி³. ஜாதித⁴ம்மா ஹேதே, பி⁴க்க²வே, உபத⁴யோதி ஏதே பஞ்சகாமகு³ணூபத⁴யோ நாம ஹோந்தி, தே ஸப்³பே³பி ஜாதித⁴ம்மாதி த³ஸ்ஸேதி. ப்³யாதி⁴த⁴ம்மவாராதீ³ஸு ஜாதரூபரஜதம் ந க³ஹிதம், ந ஹேதஸ்ஸ ஸீஸரோகா³த³யோ ப்³யாத⁴யோ நாம ஹோந்தி, ந ஸத்தானம் விய சுதிஸங்கா²தம் மரணம், ந ஸோகோ உப்பஜ்ஜதி. அயாதீ³ஹி பன ஸம்கிலேஸேஹி ஸம்கிலிஸ்ஸதீதி ஸம்கிலேஸத⁴ம்மவாரே க³ஹிதம். ததா² உதுஸமுட்டா²னத்தா ஜாதித⁴ம்மவாரே. மலம் க³ஹேத்வா ஜீரணதோ ஜராத⁴ம்மவாரே ச.

275. அயம் , பி⁴க்க²வே, அரியா பரியேஸனாதி, பி⁴க்க²வே, அயம் நித்³தோ³ஸதாயபி அரியேஹி பரியேஸிதப்³ப³தாயபி அரியபரியேஸனாதி வேதி³தப்³பா³.

276. அஹம்பி ஸுத³ம், பி⁴க்க²வேதி கஸ்மா ஆரபி⁴? மூலதோ பட்டா²ய மஹாபி⁴னிக்க²மனம் த³ஸ்ஸேதும். ஏவம் கிரஸ்ஸ அஹோஸி – ‘‘பி⁴க்க²வே, அஹம்பி புப்³பே³ அனரியபரியேஸனம் பரியேஸிம். ஸ்வாஹம் தம் பஹாய அரியபரியேஸனம் பரியேஸித்வா ஸப்³ப³ஞ்ஞுதம் பத்தோ. பஞ்சவக்³கி³யாபி அனரியபரியேஸனம் பரியேஸிம்ஸு. தே தம் பஹாய அரியபரியேஸனம் பரியேஸித்வா கீ²ணாஸவபூ⁴மிம் பத்தா. தும்ஹேபி மம சேவ பஞ்சவக்³கி³யானஞ்ச மக்³க³ம் ஆருள்ஹா. அரியபரியேஸனா தும்ஹாகம் பரியேஸனா’’தி மூலதோ பட்டா²ய அத்தனோ மஹாபி⁴னிக்க²மனம் த³ஸ்ஸேதும் இமம் தே³ஸனம் ஆரபி⁴.

277. தத்த² த³ஹரோவ ஸமானோதி தருணோவ ஸமானோ. ஸுஸுகாளகேஸோதி ஸுட்டு² காளகேஸோ, அஞ்ஜனவண்ணகேஸோவ ஹுத்வாதி அத்தோ². ப⁴த்³ரேனாதி ப⁴த்³த³கேன. பட²மேன வயஸாதி திண்ணம் வயானம் பட²மவயேன. அகாமகானந்தி அனிச்ச²மானானம், அனாத³ரத்தே² ஸாமிவசனம். அஸ்ஸூனி முகே² ஏதேஸந்தி அஸ்ஸுமுகா²; தேஸம் அஸ்ஸுமுகா²னம், அஸ்ஸுகிலின்னமுகா²னந்தி அத்தோ². ருத³ந்தானந்தி கந்தி³த்வா ரோத³மானானம். கிம் குஸலக³வேஸீதி கிம் குஸலந்தி க³வேஸமானோ. அனுத்தரம் ஸந்திவரபத³ந்தி உத்தமம் ஸந்திஸங்கா²தம் வரபத³ம், நிப்³பா³னம் பரியேஸமானோதி அத்தோ². யேன ஆளாரோ காலாமோதி ஏத்த² ஆளாரோதி தஸ்ஸ நாமம், தீ³க⁴பிங்க³லோ கிரேஸோ. தேனஸ்ஸ ஆளாரோதி நாமம் அஹோஸி. காலாமோதி கோ³த்தம். விஹரதாயஸ்மாதி விஹரது ஆயஸ்மா. யத்த² விஞ்ஞூ புரிஸோதி யஸ்மிம் த⁴ம்மே பண்டி³தோ புரிஸோ. ஸகம் ஆசரியகந்தி அத்தனோ ஆசரியஸமயம். உபஸம்பஜ்ஜ விஹரேய்யாதி படிலபி⁴த்வா விஹரேய்ய. ஏத்தாவதா தேன ஓகாஸோ கதோ ஹோதி. தம் த⁴ம்மந்தி தம் தேஸம் ஸமயம் தந்திம். பரியாபுணிந்தி ஸுத்வாவ உக்³க³ண்ஹிம்.

ஓட்ட²பஹதமத்தேனாதி தேன வுத்தஸ்ஸ படிக்³க³ஹணத்த²ம் ஓட்ட²பஹரணமத்தேன; அபராபரம் கத்வா ஓட்ட²ஸஞ்சரணமத்தகேனாதி அத்தோ². லபிதலாபனமத்தேனாதி தேன லபிதஸ்ஸ படிலாபனமத்தகேன. ஞாணவாத³ந்தி ஜானாமீதி வாத³ம். தே²ரவாத³ந்தி தி²ரபா⁴வவாத³ம், தே²ரோ அஹமேத்தா²தி ஏதம் வசனம். அஹஞ்சேவ அஞ்ஞே சாதி ந கேவலம் அஹம், அஞ்ஞேபி ப³ஹூ ஏவம் வத³ந்தி. கேவலம் ஸத்³தா⁴மத்தகேனாதி பஞ்ஞாய அஸச்சி²கத்வா ஸுத்³தே⁴ன ஸத்³தா⁴மத்தகேனேவ. போ³தி⁴ஸத்தோ கிர வாசாய த⁴ம்மம் உக்³க³ண்ஹந்தோயேவ, ‘‘ந காலாமஸ்ஸ வாசாய பரியத்திமத்தமேவ அஸ்மிம் த⁴ம்மே, அத்³தா⁴ ஏஸ ஸத்தன்னம் ஸமாபத்தீனம் லாபீ⁴’’தி அஞ்ஞாஸி, தேனஸ்ஸ ஏதத³ஹோஸி.

ஆகிஞ்சஞ்ஞாயதனம் பவேதே³ஸீதி ஆகிஞ்சஞ்ஞாயதனபரியோஸானா ஸத்த ஸமாபத்தியோ மம் ஜானாபேஸி. ஸத்³தா⁴தி இமாஸம் ஸத்தன்னம் ஸமாபத்தீனம் நிப்³ப³த்தனத்தா²ய ஸத்³தா⁴. வீரியாதீ³ஸுபி ஏஸேவ நயோ. பத³ஹேய்யந்தி பயோக³ம் கரேய்யம். நசிரஸ்ஸேவ தம் த⁴ம்மம் ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹாஸிந்தி போ³தி⁴ஸத்தோ கிர வீரியம் பக்³க³ஹேத்வா கதிபாஹஞ்ஞேவ ஸத்த ஸுவண்ணனிஸ்ஸேணியோ பஸாரேந்தோ விய ஸத்த ஸமாபத்தியோ நிப்³ப³த்தேஸி; தஸ்மா ஏவமாஹ.

லாபா⁴ நோ, ஆவுஸோதி அனுஸூயகோ கிரேஸ காலாமோ. தஸ்மா ‘‘அயம் அது⁴னாக³தோ, கிந்தி கத்வா இமம் த⁴ம்மம் நிப்³ப³த்தேஸீ’’தி உஸூயம் அகத்வா பஸன்னோ பஸாத³ம் பவேதே³ந்தோ ஏவமாஹ. உபோ⁴வ ஸந்தா இமம் க³ணம் பரிஹராமாதி ‘‘மஹா அயம் க³ணோ, த்³வேபி ஜனா பரிஹராமா’’தி வத்வா க³ணஸ்ஸ ஸஞ்ஞம் அதா³ஸி, ‘‘அஹம்பி ஸத்தன்னம் ஸமாபத்தீனம் லாபீ⁴, மஹாபுரிஸோபி ஸத்தன்னமேவ, ஏத்தகா ஜனா மஹாபுரிஸஸ்ஸ ஸந்திகே பரிகம்மம் உக்³க³ண்ஹத², ஏத்தகா மய்ஹ’’ந்தி மஜ்ஜே² பி⁴ந்தி³த்வா அதா³ஸி. உளாராயாதி உத்தமாய. பூஜாயாதி காலாமஸ்ஸ கிர உபட்டா²கா இத்தி²யோபி புரிஸாபி க³ந்த⁴மாலாதீ³னி க³ஹேத்வா ஆக³ச்ச²ந்தி. காலாமோ – ‘‘க³ச்ச²த², மஹாபுரிஸம் பூஜேதா²’’தி வத³தி. தே தம் பூஜேத்வா யம் அவஸிட்ட²ம் ஹோதி, தேன காலாமம் பூஜேந்தி. மஹக்³கா⁴னி மஞ்சபீடா²னி ஆஹரந்தி; தானிபி மஹாபுரிஸஸ்ஸ தா³பேத்வா யதி³ அவஸிட்ட²ம் ஹோதி, அத்தனா க³ண்ஹாதி. க³தக³தட்டா²னே வரஸேனாஸனம் போ³தி⁴ஸத்தஸ்ஸ ஜக்³கா³பேத்வா ஸேஸகம் அத்தனா க³ண்ஹாதி. ஏவம் உளாராய பூஜாய பூஜேஸி. நாயம் த⁴ம்மோ நிப்³பி³தா³யாதிஆதீ³ஸு அயம் ஸத்தஸமாபத்தித⁴ம்மோ நேவ வட்டே நிப்³பி³ந்த³னத்தா²ய, ந விரஜ்ஜனத்தா²ய, ந ராகா³தி³னிரோத⁴த்தா²ய, ந உபஸமத்தா²ய, ந அபி⁴ஞ்ஞேய்யத⁴ம்மம் அபி⁴ஜானனத்தா²ய, ந சதுமக்³க³ஸம்போ³தா⁴ய, ந நிப்³பா³னஸச்சி²கிரியாய ஸம்வத்ததீதி அத்தோ².

யாவதே³வ ஆகிஞ்சஞ்ஞாயதனூபபத்தியாதி யாவ ஸட்டி²கப்பஸஹஸ்ஸாயுபரிமாணே ஆகிஞ்சஞ்ஞாயதனப⁴வே உபபத்தி, தாவதே³வ ஸம்வத்ததி, ந ததோ உத்³த⁴ம். ஏவமயம் புனராவத்தனத⁴ம்மோயேவ; யஞ்ச டா²னம் பாபேதி, தம் ஜாதிஜராமரணேஹி அபரிமுத்தமேவ மச்சுபாஸபரிக்கி²த்தமேவாதி. ததோ பட்டா²ய ச பன மஹாஸத்தோ யதா² நாம சா²தஜ்ஜ²த்தபுரிஸோ மனுஞ்ஞபோ⁴ஜனம் லபி⁴த்வா ஸம்பியாயமானோபி பு⁴ஞ்ஜித்வா பித்தவஸேன வா ஸேம்ஹவஸேன வா மக்கி²காவஸேன வா ச²ட்³டே³த்வா புன ஏகம் பிண்ட³ம்பி பு⁴ஞ்ஜிஸ்ஸாமீதி மனம் ந உப்பாதே³தி; ஏவமேவ இமா ஸத்த ஸமாபத்தியோ மஹந்தேன உஸ்ஸாஹேன நிப்³ப³த்தேத்வாபி, தாஸு இமம் புனராவத்திகாதி³பே⁴த³ம் ஆதீ³னவம் தி³ஸ்வா, புன இமம் த⁴ம்மம் ஆவஜ்ஜிஸ்ஸாமி வா ஸமாபஜ்ஜிஸ்ஸாமி வா அதி⁴ட்ட²ஹிஸ்ஸாமி வா வுட்ட²ஹிஸ்ஸாமி வா பச்சவேக்கி²ஸ்ஸாமி வாதி சித்தமேவ ந உப்பாதே³ஸி. அனலங்கரித்வாதி அலம் இமினா, அலம் இமினாதி புனப்புனம் அலங்கரித்வா. நிப்³பி³ஜ்ஜாதி நிப்³பி³ந்தி³த்வா. அபக்கமிந்தி அக³மாஸிம்.

278. ந கோ² ராமோ இமம் த⁴ம்மந்தி இதா⁴பி போ³தி⁴ஸத்தோ தம் த⁴ம்மம் உக்³க³ண்ஹந்தோயேவ அஞ்ஞாஸி – ‘‘நாயம் அட்ட²ஸமாபத்தித⁴ம்மோ உத³கஸ்ஸ வாசாய உக்³க³ஹிதமத்தோவ, அத்³தா⁴ பனேஸ அட்ட²ஸமாபத்திலாபீ⁴’’தி. தேனஸ்ஸ ஏதத³ஹோஸி – ‘‘ந கோ² ராமோ…பே… ஜானம் பஸ்ஸம் விஹாஸீ’’தி. ஸேஸமேத்த² புரிமவாரே வுத்தனயேனேவ வேதி³தப்³ப³ம்.

279. யேன உருவேலா ஸேனானிக³மோதி ஏத்த² உருவேலாதி மஹாவேலா, மஹாவாலிகராஸீதி அத்தோ². அத² வா உரூதி வாலிகா வுச்சதி; வேலாதி மரியாதா³, வேலாதிக்கமனஹேது ஆஹடா உரு உருவேலாதி ஏவமேத்த² அத்தோ² த³ட்ட²ப்³போ³. அதீதே கிர அனுப்பன்னே பு³த்³தே⁴ த³ஸஸஹஸ்ஸா குலபுத்தா தாபஸபப்³ப³ஜ்ஜம் பப்³ப³ஜித்வா தஸ்மிம் பதே³ஸே விஹரந்தா ஏகதி³வஸம் ஸன்னிபதித்வா கதிகவத்தம் அகம்ஸு – ‘‘காயகம்மவசீகம்மானி நாம பரேஸம்பி பாகடானி ஹோந்தி, மனோகம்மம் பன அபாகடம். தஸ்மா யோ காமவிதக்கம் வா ப்³யாபாத³விதக்கம் வா விஹிம்ஸாவிதக்கம் வா விதக்கேதி, தஸ்ஸ அஞ்ஞோ சோத³கோ நாம நத்தி²; ஸோ அத்தனாவ அத்தானம் சோதே³த்வா பத்தபுடேன வாலிகம் ஆஹரித்வா இமஸ்மிம் டா²னே ஆகிரது, இத³மஸ்ஸ த³ண்ட³கம்ம’’ந்தி. ததோ பட்டா²ய யோ தாதி³ஸம் விதக்கம் விதக்கேதி, ஸோ தத்த² பத்தபுடேன வாலிகம் ஆகிரதி, ஏவம் தத்த² அனுக்கமேன மஹாவாலிகராஸி ஜாதோ. ததோ தம் பச்சி²மா ஜனதா பரிக்கி²பித்வா சேதியட்டா²னமகாஸி; தம் ஸந்தா⁴ய வுத்தம் – ‘‘உருவேலாதி மஹாவேலா, மஹாவாலிகராஸீதி அத்தோ²’’தி. தமேவ ஸந்தா⁴ய வுத்தம் – ‘‘அத² வா உரூதி வாலிகா வுச்சதி, வேலாதி மரியாதா³. வேலாதிக்கமனஹேது ஆஹடா உரு உருவேலாதி ஏவமேத்த² அத்தோ² த³ட்ட²ப்³போ³’’தி.

ஸேனானிக³மோதி ஸேனாய நிக³மோ. பட²மகப்பிகானம் கிர தஸ்மிம் டா²னே ஸேனானிவேஸோ அஹோஸி; தஸ்மா ஸோ பதே³ஸோ ஸேனானிக³மோதி வுச்சதி. ‘‘ஸேனானி-கா³மோ’’திபி பாடோ². ஸேனானீ நாம ஸுஜாதாய பிதா, தஸ்ஸ கா³மோதி அத்தோ². தத³வஸரிந்தி தத்த² ஓஸரிம். ரமணீயம் பூ⁴மிபா⁴க³ந்தி ஸுபுப்பி²தனானப்பகாரஜலஜத²லஜபுப்ப²விசித்தம் மனோரம்மம் பூ⁴மிபா⁴க³ம். பாஸாதி³கஞ்ச வனஸண்ட³ந்தி மோரபிஞ்ச²கலாபஸதி³ஸம் பஸாத³ஜனனவனஸண்ட³ஞ்ச அத்³த³ஸம். நதி³ஞ்ச ஸந்த³ந்திந்தி ஸந்த³மானஞ்ச மணிக்க²ந்த⁴ஸதி³ஸம் விமலனீலஸீதலஸலிலம் நேரஞ்ஜரம் நதி³ம் அத்³த³ஸம். ஸேதகந்தி பரிஸுத்³த⁴ம் நிக்கத்³த³மம். ஸுபதித்த²ந்தி அனுபுப்³ப³க³ம்பீ⁴ரேஹி ஸுந்த³ரேஹி தித்தே²ஹி உபேதம். ரமணீயந்தி ரஜதபட்டஸதி³ஸம் விப்பகிண்ணவாலிகம் பஹூதமச்ச²கச்ச²பம் அபி⁴ராமத³ஸ்ஸனம். ஸமந்தா ச கோ³சரகா³மந்தி தஸ்ஸ பதே³ஸஸ்ஸ ஸமந்தா அவிதூ³ரே க³மனாக³மனஸம்பன்னம் ஸம்பத்தபப்³ப³ஜிதானம் ஸுலப⁴பிண்ட³ம் கோ³சரகா³மஞ்ச அத்³த³ஸம். அலம் வதாதி ஸமத்த²ம் வத. தத்தே²வ நிஸீதி³ந்தி போ³தி⁴பல்லங்கே நிஸஜ்ஜம் ஸந்தா⁴யாஹ. உபரிஸுத்தஸ்மிஞ்ஹி தத்தே²வாதி து³க்கரகாரிகட்டா²னம் அதி⁴ப்பேதம், இத⁴ பன போ³தி⁴பல்லங்கோ. தேனாஹ – ‘‘தத்தே²வ நிஸீதி³’’ந்தி. அலமித³ம் பதா⁴னாயாதி இத³ம் டா²னம் பதா⁴னத்தா²ய ஸமத்த²ந்தி ஏவம் சிந்தேத்வா நிஸீதி³ந்தி அத்தோ².

280. அஜ்ஜ²க³மந்தி அதி⁴க³ச்சி²ம் படிலபி⁴ம். ஞாணஞ்ச பன மே த³ஸ்ஸனந்தி ஸப்³ப³த⁴ம்மத³ஸ்ஸனஸமத்த²ஞ்ச மே ஸப்³ப³ஞ்ஞுதஞ்ஞாணம் உத³பாதி³. அகுப்பா மே விமுத்தீதி மய்ஹம் அரஹத்தப²லவிமுத்தி அகுப்பதாய ச அகுப்பாரம்மணதாய ச அகுப்பா, ஸா ஹி ராகா³தீ³ஹி ந குப்பதீதி அகுப்பதாயபி அகுப்பா, அகுப்பம் நிப்³பா³னமஸ்ஸாரம்மணந்திபி அகுப்பா. அயமந்திமா ஜாதீதி அயம் ஸப்³ப³பச்சி²மா ஜாதி. நத்தி² தா³னி புனப்³ப⁴வோதி இதா³னி மே புன படிஸந்தி⁴ நாம நத்தீ²தி ஏவம் பச்சவேக்க²ணஞாணம்பி மே உப்பன்னந்தி த³ஸ்ஸேதி.

281. அதி⁴க³தோதி படிவித்³தோ⁴. த⁴ம்மோதி சதுஸச்சத⁴ம்மோ. க³ம்பீ⁴ரோதி உத்தானபா⁴வபடிக்கே²பவசனமேதம். து³த்³த³ஸோதி க³ம்பீ⁴ரத்தாவ து³த்³த³ஸோ து³க்கே²ன த³ட்ட²ப்³போ³, ந ஸக்கா ஸுகே²ன த³ட்டு²ம். து³த்³த³ஸத்தாவ து³ரனுபோ³தோ⁴, து³க்கே²ன அவபு³ஜ்ஜி²தப்³போ³, ந ஸக்கா ஸுகே²ன அவபு³ஜ்ஜி²தும். ஸந்தோதி நிப்³பு³தோ. பணீதோதி அதப்பகோ. இத³ம் த்³வயம் லோகுத்தரமேவ ஸந்தா⁴ய வுத்தம். அதக்காவசரோதி தக்கேன அவசரிதப்³போ³ ஓகா³ஹிதப்³போ³ ந ஹோதி, ஞாணேனேவ அவசரிதப்³போ³. நிபுணோதி ஸண்ஹோ. பண்டி³தவேத³னீயோதி ஸம்மாபடிபத³ம் படிபன்னேஹி பண்டி³தேஹி வேதி³தப்³போ³. ஆலயராமாதி ஸத்தா பஞ்சஸு காமகு³ணேஸு அல்லீயந்தி. தஸ்மா தே ஆலயாதி வுச்சந்தி. அட்ட²ஸததண்ஹாவிசரிதானி ஆலயந்தி, தஸ்மா ஆலயாதி வுச்சந்தி. தேஹி ஆலயேஹி ரமந்தீதி ஆலயராமா. ஆலயேஸு ரதாதி ஆலயரதா. ஆலயேஸு ஸுட்டு² முதி³தாதி ஆலயஸம்முதி³தா. யதே²வ ஹி ஸுஸஜ்ஜிதம் புப்ப²ப²லப⁴ரிதருக்கா²தி³ஸம்பன்னம் உய்யானம் பவிட்டோ² ராஜா தாய தாய ஸம்பத்தியா ரமதி, ஸம்முதி³தோ ஆமோதி³தபமோதி³தோ ஹோதி, ந உக்கண்ட²தி, ஸாயம்பி நிக்க²மிதும் ந இச்ச²தி; ஏவமிமேஹிபி காமாலயதண்ஹாலயேஹி ஸத்தா ரமந்தி, ஸம்ஸாரவட்டே ஸம்முதி³தா அனுக்கண்டி²தா வஸந்தி. தேன நேஸம் ப⁴க³வா து³வித⁴ம்பி ஆலயம் உய்யானபூ⁴மிம் விய த³ஸ்ஸேந்தோ ‘‘ஆலயராமா’’திஆதி³மாஹ.

யதி³த³ந்தி நிபாதோ, தஸ்ஸ டா²னம் ஸந்தா⁴ய ‘‘யம் இத³’’ந்தி, படிச்சஸமுப்பாத³ம் ஸந்தா⁴ய ‘‘யோ அய’’ந்தி ஏவமத்தோ² த³ட்ட²ப்³போ³. இத³ப்பச்சயதாபடிச்சஸமுப்பாதோ³தி இமேஸம் பச்சயா இத³ப்பச்சயா; இத³ப்பச்சயா ஏவ இத³ப்பச்சயதா; இத³ப்பச்சயதா ச ஸா படிச்சஸமுப்பாதோ³ சாதி இத³ப்பச்சயதாபடிச்சஸமுப்பாதோ³. ஸங்கா²ராதி³பச்சயானமேதம் அதி⁴வசனம். ஸப்³ப³ஸங்கா²ரஸமதோ²திஆதி³ ஸப்³ப³ம் நிப்³பா³னமேவ. யஸ்மா ஹி தம் ஆக³ம்ம ஸப்³ப³ஸங்கா²ரவிப்ப²ந்தி³தானி ஸம்மந்தி வூபஸம்மந்தி, தஸ்மா ஸப்³ப³ஸங்கா²ரஸமதோ²தி வுச்சதி. யஸ்மா ச தம் ஆக³ம்ம ஸப்³பே³ உபத⁴யோ படினிஸ்ஸட்டா² ஹோந்தி, ஸப்³பா³ தண்ஹா கீ²யந்தி, ஸப்³பே³ கிலேஸராகா³ விரஜ்ஜந்தி, ஸப்³ப³ம் து³க்க²ம் நிருஜ்ஜ²தி; தஸ்மா ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴தி வுச்சதி. ஸா பனேஸா தண்ஹா ப⁴வேன ப⁴வம், ப²லேன வா ஸத்³தி⁴ம் கம்மம் வினதி ஸம்ஸிப்³ப³தீதி கத்வா வானந்தி வுச்சதி, ததோ நிக்க²ந்தம் வானதோதி நிப்³பா³னம். ஸோ மமஸ்ஸ கிலமதோ²தி யா அஜானந்தானம் தே³ஸனா நாம, ஸோ மம கிலமதோ² அஸ்ஸ, ஸா மம விஹேஸா அஸ்ஸாதி அத்தோ². காயகிலமதோ² சேவ காயவிஹேஸா ச அஸ்ஸாதி வுத்தம் ஹோதி. சித்தே பன உப⁴யம்பேதம் பு³த்³தா⁴னம் நத்தி². அபிஸ்ஸூதி அனுப்³ரூஹனத்தே² நிபாதோ, ஸோ ‘‘ந கேவலம் ஏதத³ஹோஸி, இமாபி கா³தா² படிப⁴ம்ஸூ’’தி தீ³பேதி. மந்தி மம. அனச்ச²ரியாதி அனுஅச்ச²ரியா. படிப⁴ம்ஸூதி படிபா⁴னஸங்கா²தஸ்ஸ ஞாணஸ்ஸ கோ³சரா அஹேஸும்; பரிவிதக்கயிதப்³ப³தம் பாபுணிம்ஸு.

கிச்சே²னாதி து³க்கே²ன, ந து³க்கா²ய படிபதா³ய. பு³த்³தா⁴னஞ்ஹி சத்தாரோபி மக்³கா³ ஸுக²ப்படிபதா³வ ஹோந்தி. பாரமீபூரணகாலே பன ஸராக³ஸதோ³ஸஸமோஹஸ்ஸேவ ஸதோ ஆக³தாக³தானம் யாசகானம், அலங்கதப்படியத்தம் ஸீஸம் கந்தித்வா, க³லலோஹிதம் நீஹரித்வா, ஸுஅஞ்ஜிதானி அக்கீ²னி உப்பாடேத்வா, குலவம்ஸப்பதீ³பம் புத்தம் மனாபசாரினிம் ப⁴ரியந்தி ஏவமாதீ³னி தே³ந்தஸ்ஸ, அஞ்ஞானி ச க²ந்திவாதி³ஸதி³ஸேஸு அத்தபா⁴வேஸு சே²ஜ்ஜபே⁴ஜ்ஜாதீ³னி பாபுணந்தஸ்ஸ ஆக³மனியபடிபத³ம் ஸந்தா⁴யேதம் வுத்தம். ஹலந்தி ஏத்த² ஹ-காரோ நிபாதமத்தோ, அலந்தி அத்தோ². பகாஸிதுந்தி தே³ஸிதும், ஏவம் கிச்சே²ன அதி⁴க³தஸ்ஸ த⁴ம்மஸ்ஸ அலம் தே³ஸிதும், பரியத்தம் தே³ஸிதும், கோ அத்தோ² தே³ஸிதேனாதி வுத்தம் ஹோதி. ராக³தோ³ஸபரேதேஹீதி ராக³தோ³ஸபரிபு²ட்டே²ஹி ராக³தோ³ஸானுக³தேஹி வா.

படிஸோதகா³மிந்தி நிச்சாதீ³னம் படிஸோதம் அனிச்சம் து³க்க²மனத்தா அஸுப⁴ந்தி ஏவம் க³தம் சதுஸச்சத⁴ம்மம். ராக³ரத்தாதி காமராகே³ன ப⁴வராகே³ன தி³ட்டி²ராகே³ன ச ரத்தா. ந த³க்க²ந்தீதி அனிச்சம் து³க்க²மனத்தா அஸுப⁴ந்தி இமினா ஸபா⁴வேன ந பஸ்ஸிஸ்ஸந்தி, தே அபஸ்ஸந்தே கோ ஸக்கி²ஸ்ஸதி ஏவம் கா³ஹாபேதும். தமோக²ந்தே⁴ன ஆவுடாதி அவிஜ்ஜாராஸினா அஜ்ஜோ²த்த²தா.

282. அப்போஸ்ஸுக்கதாயாதி நிருஸ்ஸுக்கபா⁴வேன, அதே³ஸேதுகாமதாயாதி அத்தோ². கஸ்மா பனஸ்ஸ ஏவம் சித்தம் நமி, நனு ஏஸ முத்தோ மோசேஸ்ஸாமி, திண்ணோ தாரேஸ்ஸாமி.

‘‘கிம் மே அஞ்ஞாதவேஸேன, த⁴ம்மம் ஸச்சி²கதேனித⁴;

ஸப்³ப³ஞ்ஞுதம் பாபுணித்வா, தாரயிஸ்ஸம் ஸதே³வக’’ந்தி. (பு³. வம். 2.56) –

பத்த²னம் கத்வா பாரமியோ பூரேத்வா ஸப்³ப³ஞ்ஞுதம் பத்தோதி. ஸச்சமேதம், ததே³வம் பச்சவேக்க²ணானுபா⁴வேன பனஸ்ஸ ஏவம் சித்தம் நமி. தஸ்ஸ ஹி ஸப்³ப³ஞ்ஞுதம் பத்வா ஸத்தானம் கிலேஸக³ஹனதம், த⁴ம்மஸ்ஸ ச க³ம்பீ⁴ரதம் பச்சவேக்க²ந்தஸ்ஸ ஸத்தானம் கிலேஸக³ஹனதா ச த⁴ம்மக³ம்பீ⁴ரதா ச ஸப்³பா³காரேன பாகடா ஜாதா. அத²ஸ்ஸ ‘‘இமே ஸத்தா கஞ்ஜிகபுண்ணா லாபு³ விய, தக்கப⁴ரிதா சாடி விய, வஸாதேலபீதபிலோதிகா விய, அஞ்ஜனமக்கி²தஹத்தோ² விய ச கிலேஸப⁴ரிதா அதிஸம்கிலிட்டா² ராக³ரத்தா தோ³ஸது³ட்டா² மோஹமூள்ஹா, தே கிம் நாம படிவிஜ்ஜி²ஸ்ஸந்தீ’’தி சிந்தயதோ கிலேஸக³ஹனபச்சவேக்க²ணானுபா⁴வேனாபி ஏவம் சித்தம் நமி.

‘‘அயஞ்ச த⁴ம்மோ பத²வீஸந்தா⁴ரகஉத³கக்க²ந்தோ⁴ விய க³ம்பீ⁴ரோ, பப்³ப³தேன படிச்சா²தே³த்வா ட²பிதோ ஸாஸபோ விய து³த்³த³ஸோ, ஸததா⁴ பி⁴ன்னஸ்ஸ வாலஸ்ஸ கோடியா கோடிபடிபாத³னம் விய து³ரனுபோ³தோ⁴. நனு மயா ஹி இமம் த⁴ம்மம் படிவிஜ்ஜி²தும் வாயமந்தேன அதி³ன்னம் தா³னம் நாம நத்தி², அரக்கி²தம் ஸீலம் நாம நத்தி², அபரிபூரிதா காசி பாரமீ நாம நத்தி²? தஸ்ஸ மே நிருஸ்ஸாஹம் விய மாரப³லம் வித⁴மந்தஸ்ஸாபி பத²வீ ந கம்பித்த², பட²மயாமே புப்³பே³னிவாஸம் அனுஸ்ஸரந்தஸ்ஸாபி ந கம்பித்த², மஜ்ஜி²மயாமே தி³ப்³ப³சக்கு²ம் ஸோதே⁴ந்தஸ்ஸாபி ந கம்பித்த², பச்சி²மயாமே பன படிச்சஸமுப்பாத³ம் படிவிஜ்ஜ²ந்தஸ்ஸேவ மே த³ஸஸஹஸ்ஸிலோகதா⁴து கம்பித்த². இதி மாதி³ஸேனாபி திக்க²ஞாணேன கிச்சே²னேவாயம் த⁴ம்மோ படிவித்³தோ⁴, தம் லோகியமஹாஜனா கத²ம் படிவிஜ்ஜி²ஸ்ஸந்தீ’’தி த⁴ம்மக³ம்பீ⁴ரதாபச்சவேக்க²ணானுபா⁴வேனாபி ஏவம் சித்தம் நமீதி வேதி³தப்³ப³ம்.

அபிச ப்³ரஹ்முனா யாசிதே தே³ஸேதுகாமதாயபிஸ்ஸ ஏவம் சித்தம் நமி. ஜானாதி ஹி ப⁴க³வா – ‘‘மம அப்போஸ்ஸுக்கதாய சித்தே நமமானே மம் மஹாப்³ரஹ்மா த⁴ம்மதே³ஸனம் யாசிஸ்ஸதி, இமே ச ஸத்தா ப்³ரஹ்மக³ருகா, தே ‘ஸத்தா² கிர த⁴ம்மம் ந தே³ஸேதுகாமோ அஹோஸி, அத² நம் மஹாப்³ரஹ்மா யாசித்வா தே³ஸாபேஸி, ஸந்தோ வத, போ⁴, த⁴ம்மோ பணீதோ வத, போ⁴, த⁴ம்மோ’தி மஞ்ஞமானா ஸுஸ்ஸூஸிஸ்ஸந்தீ’’தி. இத³ம்பிஸ்ஸ காரணம் படிச்ச அப்போஸ்ஸுக்கதாய சித்தம் நமி, நோ த⁴ம்மதே³ஸனாயாதி வேதி³தப்³ப³ம்.

ஸஹம்பதிஸ்ஸாதி ஸோ கிர கஸ்ஸபஸ்ஸ ப⁴க³வதோ ஸாஸனே ஸஹகோ நாம தே²ரோ பட²மஜ்ஜா²னம் நிப்³ப³த்தேத்வா பட²மஜ்ஜா²னபூ⁴மியம் கப்பாயுகப்³ரஹ்மா ஹுத்வா நிப்³ப³த்தோ. தத்ர நம் ஸஹம்பதிப்³ரஹ்மாதி படிஸஞ்ஜானந்தி, தம் ஸந்தா⁴யாஹ – ‘‘ப்³ரஹ்முனோ ஸஹம்பதிஸ்ஸா’’தி. நஸ்ஸதி வத, போ⁴தி ஸோ கிர இமம் ஸத்³த³ம் ததா² நிச்சா²ரேஸி, யதா² த³ஸஸஹஸ்ஸிலோகதா⁴துப்³ரஹ்மானோ ஸுத்வா ஸப்³பே³ ஸன்னிபதிம்ஸு. யத்ர ஹி நாமாதி யஸ்மிம் நாம லோகே. புரதோ பாதுரஹோஸீதி தேஹி த³ஸஹி ப்³ரஹ்மஸஹஸ்ஸேஹி ஸத்³தி⁴ம் பாதுரஹோஸி. அப்பரஜக்க²ஜாதிகாதி பஞ்ஞாமயே அக்கி²ம்ஹி அப்பம் பரித்தம் ராக³தோ³ஸமோஹரஜம் ஏதேஸம், ஏவம்ஸபா⁴வாதி அப்பரஜக்க²ஜாதிகா. அஸ்ஸவனதாதி அஸ்ஸவனதாய. ப⁴விஸ்ஸந்தீதி புரிமபு³த்³தே⁴ஸு த³ஸபுஞ்ஞகிரியவஸேன கதாதி⁴காரா பரிபாகக³தபது³மானி விய ஸூரியரஸ்மிஸம்ப²ஸ்ஸம், த⁴ம்மதே³ஸனம்யேவ ஆகங்க²மானா சதுப்பதி³ககா³தா²வஸானே அரியபூ⁴மிம் ஓக்கமனாரஹா ந ஏகோ, ந த்³வே, அனேகஸதஸஹஸ்ஸா த⁴ம்மஸ்ஸ அஞ்ஞாதாரோ ப⁴விஸ்ஸந்தீதி த³ஸ்ஸேதி.

பாதுரஹோஸீதி பாதுப⁴வி. ஸமலேஹி சிந்திதோதி ஸமலேஹி ச²ஹி ஸத்தா²ரேஹி சிந்திதோ. தே ஹி புரேதரம் உப்பஜ்ஜித்வா ஸகலஜம்பு³தீ³பே கண்டகே பத்த²ரமானா விய, விஸம் ஸிஞ்சமானா விய ச ஸமலம் மிச்சா²தி³ட்டி²த⁴ம்மம் தே³ஸயிம்ஸு. அபாபுரேதந்தி விவர ஏதம். அமதஸ்ஸ த்³வாரந்தி அமதஸ்ஸ நிப்³பா³னஸ்ஸ த்³வாரபூ⁴தம் அரியமக்³க³ம். ஸுணந்து த⁴ம்மம் விமலேனானுபு³த்³த⁴ந்தி இமே ஸத்தா ராகா³தி³மலானம் அபா⁴வதோ விமலேன ஸம்மாஸம்பு³த்³தே⁴ன அனுபு³த்³த⁴ம் சதுஸச்சத⁴ம்மம் ஸுணந்து தாவ ப⁴க³வாதி யாசதி.

ஸேலே யதா² பப்³ப³தமுத்³த⁴னிட்டி²தோதி ஸேலமயே ஏகக்³க⁴னே பப்³ப³தமுத்³த⁴னி யதா² டி²தோவ. ந ஹி தஸ்ஸ டி²தஸ்ஸ த³ஸ்ஸனத்த²ம் கீ³வுக்கி²பனபஸாரணாதி³கிச்சம் அத்தி². ததூ²பமந்தி தப்படிபா⁴க³ம் ஸேலபப்³ப³தூபமம். அயம் பனேத்த² ஸங்கே²பத்தோ² – யதா² ஸேலபப்³ப³தமுத்³த⁴னி டி²தோவ சக்கு²மா புரிஸோ ஸமந்ததோ ஜனதம் பஸ்ஸேய்ய, ததா² த்வம்பி, ஸுமேத⁴, ஸுந்த³ரபஞ்ஞ-ஸப்³ப³ஞ்ஞுதஞ்ஞாணேன ஸமந்தசக்கு² ப⁴க³வா த⁴ம்மமயம் பாஸாத³மாருய்ஹ ஸயம் அபேதஸோகோ ஸோகாவதிண்ணம் ஜாதிஜராபி⁴பூ⁴தம் ஜனதம் அவேக்க²ஸ்ஸு உபதா⁴ரய உபபரிக்க². அயம் பனேத்த² அதி⁴ப்பாயோ – யதா² ஹி பப்³ப³தபாதே³ ஸமந்தா மஹந்தம் கே²த்தம் கத்வா தத்த² கேதா³ரபாளீஸு குடிகாயோ கத்வா ரத்திம் அக்³கி³ம் ஜாலேய்யும். சதுரங்க³ஸமன்னாக³தஞ்ச அந்த⁴காரம் அஸ்ஸ, அத² தஸ்ஸ பப்³ப³தஸ்ஸ மத்த²கே ட²த்வா சக்கு²மதோ புரிஸஸ்ஸ பூ⁴மிம் ஓலோகயதோ நேவ கே²த்தம், ந கேதா³ரபாளியோ, ந குடியோ, ந தத்த² ஸயிதமனுஸ்ஸா பஞ்ஞாயேய்யும். குடிகாஸு பன அக்³கி³ஜாலாமத்தகமேவ பஞ்ஞாயேய்ய. ஏவம் த⁴ம்மபாஸாத³ம் ஆருய்ஹ ஸத்தனிகாயம் ஓலோகயதோ ததா²க³தஸ்ஸ, யே தே அகதகல்யாணா ஸத்தா, தே ஏகவிஹாரே த³க்கி²ணஜாணுபஸ்ஸே நிஸின்னாபி பு³த்³த⁴சக்கு²ஸ்ஸ ஆபாத²ம் நாக³ச்ச²ந்தி, ரத்திம் கி²த்தா ஸரா விய ஹோந்தி. யே பன கதகல்யாணா வேனேய்யபுக்³க³லா, தே ஏவஸ்ஸ தூ³ரேபி டி²தா ஆபாத²ம் ஆக³ச்ச²ந்தி, ஸோ அக்³கி³ விய ஹிமவந்தபப்³ப³தோ விய ச. வுத்தம்பி சேதம் –

‘‘தூ³ரே ஸந்தோ பகாஸேந்தி, ஹிமவந்தோவ பப்³ப³தோ;

அஸந்தேத்த² ந தி³ஸ்ஸந்தி, ரத்திம் கி²த்தா யதா² ஸரா’’தி. (த⁴. ப. 304);

உட்டே²ஹீதி ப⁴க³வதோ த⁴ம்மதே³ஸனத்த²ம் சாரிகசரணம் யாசந்தோ ப⁴ணதி. வீராதிஆதீ³ஸு ப⁴க³வா வீரியவந்ததாய வீரோ. தே³வபுத்தமச்சுகிலேஸமாரானம் விஜிதத்தா விஜிதஸங்கா³மோ. ஜாதிகந்தாராதி³னித்த²ரணத்தா²ய வேனேய்யஸத்த²வாஹனஸமத்த²தாய ஸத்த²வாஹோ. காமச்ச²ந்த³இணஸ்ஸ அபா⁴வதோ அணணோதி வேதி³தப்³போ³.

283. அஜ்ஜே²ஸனந்தி யாசனம். பு³த்³த⁴சக்கு²னாதி இந்த்³ரியபரோபரியத்தஞாணேன ச ஆஸயானுஸயஞாணேன ச. இமேஸஞ்ஹி த்³வின்னம் ஞாணானம் பு³த்³த⁴சக்கூ²தி நாமம், ஸப்³ப³ஞ்ஞுதஞ்ஞாணஸ்ஸ ஸமந்தசக்கூ²தி, திண்ணம் மக்³க³ஞாணானம் த⁴ம்மசக்கூ²தி. அப்பரஜக்கே²திஆதீ³ஸு யேஸம் வுத்தனயேனேவ பஞ்ஞாசக்கு²ம்ஹி ராகா³தி³ரஜம் அப்பம், தே அப்பரஜக்கா². யேஸம் தம் மஹந்தம், தே மஹாரஜக்கா². யேஸம் ஸத்³தா⁴தீ³னி இந்த்³ரியானி திக்கா²னி, தே திக்கி²ந்த்³ரியா. யேஸம் தானி முதூ³னி, தே முதி³ந்த்³ரியா. யேஸம் தேயேவ ஸத்³தா⁴த³யோ ஆகாரா ஸுந்த³ரா, தே ஸ்வாகாரா. யே கதி²தகாரணம் ஸல்லக்கே²ந்தி, ஸுகே²ன ஸக்கா ஹோந்தி விஞ்ஞாபேதும், தே ஸுவிஞ்ஞாபயா. யே பரலோகஞ்சேவ வஜ்ஜஞ்ச ப⁴யதோ பஸ்ஸந்தி, தே பரலோகவஜ்ஜப⁴யத³ஸ்ஸாவினோ நாம.

அயம் பனேத்த² பாளி – ‘‘ஸத்³தோ⁴ புக்³க³லோ அப்பரஜக்கோ², அஸ்ஸத்³தோ⁴ புக்³க³லோ மஹாரஜக்கோ². ஆரத்³த⁴வீரியோ…, குஸிதோ…, உபட்டி²தஸ்ஸதி…, முட்ட²ஸ்ஸதி…, ஸமாஹிதோ…, அஸமாஹிதோ…, பஞ்ஞவா…, து³ப்பஞ்ஞோ புக்³க³லோ மஹாரஜக்கோ². ததா² ஸத்³தோ⁴ புக்³க³லோ திக்கி²ந்த்³ரியோ…பே… பஞ்ஞவா புக்³க³லோ பரலோகவஜ்ஜப⁴யத³ஸ்ஸாவீ, து³ப்பஞ்ஞோ புக்³க³லோ ந பரலோகவஜ்ஜப⁴யத³ஸ்ஸாவீ. லோகோதி க²ந்த⁴லோகோ, ஆயதனலோகோ, தா⁴துலோகோ, ஸம்பத்திப⁴வலோகோ, ஸம்பத்திஸம்ப⁴வலோகோ, விபத்திப⁴வலோகோ, விபத்திஸம்ப⁴வலோகோ, ஏகோ லோகோ ஸப்³பே³ ஸத்தா ஆஹாரட்டி²திகா. த்³வே லோகா – நாமஞ்ச ரூபஞ்ச. தயோ லோகா – திஸ்ஸோ வேத³னா. சத்தாரோ லோகா – சத்தாரோ ஆஹாரா. பஞ்ச லோகா – பஞ்சுபாதா³னக்க²ந்தா⁴. ச² லோகா – ச² அஜ்ஜ²த்திகானி ஆயதனானி. ஸத்த லோகா – ஸத்த விஞ்ஞாணட்டி²தியோ. அட்ட² லோகா – அட்ட² லோகத⁴ம்மா. நவ லோகா – நவ ஸத்தாவாஸா. த³ஸ லோகா – த³ஸாயதனானி. த்³வாத³ஸ லோகா – த்³வாத³ஸாயதனானி. அட்டா²ரஸ லோகா – அட்டா²ரஸ்ஸ தா⁴துயோ. வஜ்ஜந்தி ஸப்³பே³ கிலேஸா வஜ்ஜா, ஸப்³பே³ து³ச்சரிதா வஜ்ஜா, ஸப்³பே³ அபி⁴ஸங்கா²ரா வஜ்ஜா, ஸப்³பே³ ப⁴வகா³மிகம்மா வஜ்ஜா. இதி இமஸ்மிஞ்ச லோகே இமஸ்மிஞ்ச வஜ்ஜே திப்³பா³ ப⁴யஸஞ்ஞா பச்சுபட்டி²தா ஹோதி, ஸேய்யதா²பி உக்கி²த்தாஸிகே வத⁴கே. இமேஹி பஞ்ஞாஸாய ஆகாரேஹி இமானி பஞ்சிந்த்³ரியானி ஜானாதி பஸ்ஸதி அஞ்ஞாஸி படிவிஜ்ஜி². இத³ம் ததா²க³தஸ்ஸ இந்த்³ரியபரோபரியத்தே ஞாண’’ந்தி (படி. ம. 1.112).

உப்பலினியந்தி உப்பலவனே. இதரேஸுபி ஏஸேவ நயோ. அந்தோனிமுக்³க³போஸீனீதி யானி அந்தோ நிமுக்³கா³னேவ போஸியந்தி. உத³கம் அச்சுக்³க³ம்ம டி²தானீதி உத³கம் அதிக்கமித்வா டி²தானி. தத்த² யானி அச்சுக்³க³ம்ம டி²தானி, தானி ஸூரியரஸ்மிஸம்ப²ஸ்ஸம் ஆக³மயமானானி டி²தானி அஜ்ஜ புப்ப²னகானி. யானி ஸமோத³கம் டி²தானி, தானி ஸ்வே புப்ப²னகானி. யானி உத³கானுக்³க³தானி அந்தோனிமுக்³க³போஸீனி, தானி ததியதி³வஸே புப்ப²னகானி. உத³கா பன அனுக்³க³தானி அஞ்ஞானிபி ஸரோக³உப்பலாதீ³னி நாம அத்தி², யானி நேவ புப்பி²ஸ்ஸந்தி, மச்ச²கச்ச²பப⁴க்கா²னேவ ப⁴விஸ்ஸந்தி. தானி பாளிம் நாருள்ஹானி. ஆஹரித்வா பன தீ³பேதப்³பா³னீதி தீ³பிதானி.

யதே²வ ஹி தானி சதுப்³பி³தா⁴னி புப்பா²னி, ஏவமேவ உக்³க⁴டிதஞ்ஞூ விபஞ்சிதஞ்ஞூ நேய்யோ பத³பரமோதி சத்தாரோ புக்³க³லா. தத்த² ‘‘யஸ்ஸ புக்³க³லஸ்ஸ ஸஹ உதா³ஹடவேலாய த⁴ம்மாபி⁴ஸமயோ ஹோதி, அயம் வுச்சதி புக்³க³லோ உக்³க⁴டிதஞ்ஞூ. யஸ்ஸ புக்³க³லஸ்ஸ ஸம்கி²த்தேன பா⁴ஸிதஸ்ஸ வித்தா²ரேன அத்தே² விப⁴ஜியமானே த⁴ம்மாபி⁴ஸமயோ ஹோதி, அயம் வுச்சதி புக்³க³லோ விபஞ்சிதஞ்ஞூ. யஸ்ஸ புக்³க³லஸ்ஸ உத்³தே³ஸதோ பரிபுச்ச²தோ யோனிஸோ மனஸிகரோதோ கல்யாணமித்தே ஸேவதோ ப⁴ஜதோ பயிருபாஸதோ அனுபுப்³பே³ன த⁴ம்மாபி⁴ஸமயோ ஹோதி, அயம் வுச்சதி புக்³க³லோ நேய்யோ. யஸ்ஸ புக்³க³லஸ்ஸ ப³ஹும்பி ஸுணதோ ப³ஹும்பி ப⁴ணதோ ப³ஹும்பி தா⁴ரயதோ ப³ஹும்பி வாசயதோ ந தாய ஜாதியா த⁴ம்மாபி⁴ஸமயோ ஹோதி, அயம் வுச்சதி புக்³க³லோ பத³பரமோ’’ (பு. ப. 151). தத்த² ப⁴க³வா உப்பலவனாதி³ஸதி³ஸம் த³ஸஸஹஸ்ஸிலோகதா⁴தும் ஓலோகேந்தோ ‘‘அஜ்ஜ புப்ப²னகானி விய உக்³க⁴டிதஞ்ஞூ, ஸ்வே புப்ப²னகானி விய விபஞ்சிதஞ்ஞூ, ததியதி³வஸே புப்ப²னகானி விய நேய்யோ, மச்ச²கச்ச²பப⁴க்கா²னி புப்பா²னி விய பத³பரமோ’’தி அத்³த³ஸ. பஸ்ஸந்தோ ச ‘‘ஏத்தகா அப்பரஜக்கா², ஏத்தகா மஹாரஜக்கா², தத்ராபி ஏத்தகா உக்³க⁴டிதஞ்ஞூ’’தி ஏவம் ஸப்³பா³காரதோவ அத்³த³ஸ.

தத்த² திண்ணம் புக்³க³லானம் இமஸ்மிம்யேவ அத்தபா⁴வே ப⁴க³வதோ த⁴ம்மதே³ஸனா அத்த²ம் ஸாதே⁴தி. பத³பரமானம் அனாக³தே வாஸனத்தா²ய ஹோதி. அத² ப⁴க³வா இமேஸம் சதுன்னம் புக்³க³லானம் அத்தா²வஹம் த⁴ம்மதே³ஸனம் விதி³த்வா தே³ஸேதுகம்யதம் உப்பாதே³த்வா புன ஸப்³பே³பி தீஸு ப⁴வேஸு ஸத்தே ப⁴ப்³பா³ப⁴ப்³ப³வஸேன த்³வே கோட்டா²ஸே அகாஸி. யே ஸந்தா⁴ய வுத்தம் – ‘‘கதமே தே ஸத்தா அப⁴ப்³பா³, யே தே ஸத்தா கம்மாவரணேன ஸமன்னாக³தா கிலேஸாவரணேன ஸமன்னாக³தா விபாகாவரணேன ஸமன்னாக³தா அஸ்ஸத்³தா⁴ அச்ச²ந்தி³கா து³ப்பஞ்ஞா அப⁴ப்³பா³ நியாமம் ஓக்கமிதும் குஸலேஸு த⁴ம்மேஸு ஸம்மத்தம், இமே தே ஸத்தா அப⁴ப்³பா³. கதமே தே ஸத்தா ப⁴ப்³பா³? யே தே ஸத்தா ந கம்மாவரணேன…பே… இமே தே ஸத்தா ப⁴ப்³பா³’’தி (விப⁴. 827; படி. ம. 1.115). தத்த² ஸப்³பே³பி அப⁴ப்³ப³புக்³க³லே பஹாய ப⁴ப்³ப³புக்³க³லேயேவ ஞாணேன பரிக்³க³ஹேத்வா ‘‘ஏத்தகா ராக³சரிதா, ஏத்தகா தோ³ஸமோஹசரிதா விதக்கஸத்³தா⁴பு³த்³தி⁴சரிதா’’தி ச² கோட்டா²ஸே அகாஸி; ஏவம் கத்வா த⁴ம்மம் தே³ஸிஸ்ஸாமீதி சிந்தேஸி.

பச்சபா⁴ஸிந்தி பதிஅபா⁴ஸிம். அபாருதாதி விவடா. அமதஸ்ஸ த்³வாராதி அரியமக்³கோ³. ஸோ ஹி அமதஸங்கா²தஸ்ஸ நிப்³பா³னஸ்ஸ த்³வாரம், ஸோ மயா விவரித்வா ட²பிதோதி த³ஸ்ஸேதி. பமுஞ்சந்து ஸத்³த⁴ந்தி ஸப்³பே³ அத்தனோ ஸத்³த⁴ம் பமுஞ்சந்து, விஸ்ஸஜ்ஜேந்து. பச்சி²மபத³த்³வயே அயமத்தோ², அஹஞ்ஹி அத்தனோ பகு³ணம் ஸுப்பவத்திதம்பி இமம் பணீதம் உத்தமம் த⁴ம்மம் காயவாசாகிலமத²ஸஞ்ஞீ ஹுத்வா ந பா⁴ஸிம். இதா³னி பன ஸப்³போ³ ஜனோ ஸத்³தா⁴பா⁴ஜனம் உபனேது, பூரேஸ்ஸாமி நேஸம் ஸங்கப்பந்தி.

284. தஸ்ஸ மய்ஹம், பி⁴க்க²வே, ஏதத³ஹோஸீதி ஏதம் அஹோஸி – கஸ்ஸ நு கோ² அஹம் பட²மம் த⁴ம்மம் தே³ஸேய்யந்தி அயம் த⁴ம்மதே³ஸனாபடிஸம்யுத்தோ விதக்கோ உத³பாதீ³தி அத்தோ². கதா³ பனேஸ உத³பாதீ³தி? பு³த்³த⁴பூ⁴தஸ்ஸ அட்ட²மே ஸத்தாஹே.

தத்ராயம் அனுபுப்³பி³கதா² – போ³தி⁴ஸத்தோ கிர மஹாபி⁴னிக்க²மனதி³வஸே விவடம் இத்தா²கா³ரம் தி³ஸ்வா ஸம்விக்³க³ஹத³யோ, ‘‘கண்ட³கம் ஆஹரா’’தி ச²ன்னம் ஆமந்தேத்வா ச²ன்னஸஹாயோ அஸ்ஸராஜபிட்டி²க³தோ நக³ரதோ நிக்க²மித்வா கண்ட³கனிவத்தனசேதியட்டா²னம் நாம த³ஸ்ஸேத்வா தீணி ரஜ்ஜானி அதிக்கம்ம அனோமானதீ³தீரே பப்³ப³ஜித்வா அனுபுப்³பே³ன சாரிகம் சரமானோ ராஜக³ஹே பிண்டா³ய சரித்வா பண்ட³வபப்³ப³தே நிஸின்னோ மக³தி⁴ஸ்ஸரேன ரஞ்ஞா நாமகோ³த்தம் புச்சி²த்வா, ‘‘இமம் ரஜ்ஜம் ஸம்படிச்சா²ஹீ’’தி வுத்தோ, ‘‘அலம் மஹாராஜ, ந மய்ஹம் ரஜ்ஜேன அத்தோ², அஹம் ரஜ்ஜம் பஹாய லோகஹிதத்தா²ய பதா⁴னம் அனுயுஞ்ஜித்வா லோகே விவடச்ச²தோ³ ப⁴விஸ்ஸாமீதி நிக்க²ந்தோ’’தி வத்வா, ‘‘தேன ஹி பு³த்³தோ⁴ ஹுத்வா பட²மம் மய்ஹம் விஜிதம் ஓஸரேய்யாஸீ’’தி படிஞ்ஞம் க³ஹிதோ காலாமஞ்ச உத³கஞ்ச உபஸங்கமித்வா தேஸம் த⁴ம்மதே³ஸனாய ஸாரம் அவிந்த³ந்தோ ததோ பக்கமித்வா உருவேளாய ச²ப்³ப³ஸ்ஸானி து³க்கரகாரிகம் கரோந்தோபி அமதம் படிவிஜ்ஜி²தும் அஸக்கோந்தோ ஓளாரிகாஹாரபடிஸேவனேன காயம் ஸந்தப்பேஸி.

ததா³ ச உருவேலகா³மே ஸுஜாதா நாம குடும்பி³யதீ⁴தா ஏகஸ்மிம் நிக்³ரோத⁴ருக்கே² பத்த²னமகாஸி – ‘‘ஸசாஹம் ஸமானஜாதிகம் குலக⁴ரம் க³ந்த்வா பட²மக³ப்³பே⁴ புத்தம் லபி⁴ஸ்ஸாமி, ப³லிகம்மம் கரிஸ்ஸாமீ’’தி. தஸ்ஸா ஸா பத்த²னா ஸமிஜ்ஜி². ஸா விஸாக²புண்ணமதி³வஸே பாதோவ ப³லிகம்மம் கரிஸ்ஸாமீதி ரத்தியா பச்சூஸஸமயே ஏவ பாயஸம் படியாதே³ஸி. தஸ்மிம் பாயஸே பச்சமானே மஹந்தமஹந்தா புப்பு²ளா உட்ட²ஹித்வா த³க்கி²ணாவட்டா ஹுத்வா ஸஞ்சரந்தி. ஏகபு²ஸிதம்பி ப³ஹி ந க³ச்ச²தி. மஹாப்³ரஹ்மா ச²த்தம் தா⁴ரேஸி. சத்தாரோ லோகபாலா க²க்³க³ஹத்தா² ஆரக்க²ம் க³ண்ஹிம்ஸு. ஸக்கோ அலாதானி ஸமானேந்தோ அக்³கி³ம் ஜாலேஸி. தே³வதா சதூஸு தீ³பேஸு ஓஜம் ஸம்ஹரித்வா தத்த² பக்கி²பிம்ஸு. போ³தி⁴ஸத்தோ பி⁴க்கா²சாரகாலம் ஆக³மயமானோ பாதோவ க³ந்த்வா ருக்க²மூலே நிஸீதி³. ருக்க²மூலே ஸோத⁴னத்தா²ய க³தா தா⁴தீ ஆக³ந்த்வா ஸுஜாதாய ஆரோசேஸி – ‘‘தே³வதா ருக்க²மூலே நிஸின்னா’’தி. ஸுஜாதா, ஸப்³ப³ம் பஸாத⁴னம் பஸாதே⁴த்வா ஸதஸஹஸ்ஸக்³க⁴னிகே ஸுவண்ணதா²லே பாயஸம் வட்³டே⁴த்வா அபராய ஸுவண்ணபாதியா பித³ஹித்வா உக்கி²பித்வா க³தா மஹாபுரிஸம் தி³ஸ்வா ஸஹேவ பாதியா ஹத்தே² ட²பேத்வா வந்தி³த்வா ‘‘யதா² மய்ஹம் மனோரதோ² நிப்ப²ன்னோ, ஏவம் தும்ஹாகம்பி நிப்ப²ஜ்ஜதூ’’தி வத்வா பக்காமி.

போ³தி⁴ஸத்தோ நேரஞ்ஜராய தீரம் க³ந்த்வா ஸுவண்ணதா²லம் தீரே ட²பேத்வா ந்ஹத்வா பச்சுத்தரித்வா ஏகூனபண்ணாஸபிண்டே³ கரோந்தோ பாயஸம் பரிபு⁴ஞ்ஜித்வா ‘‘ஸசாஹம் அஜ்ஜ பு³த்³தோ⁴ ப⁴வாமி, தா²லம் படிஸோதம் க³ச்ச²தூ’’தி கி²பி. தா²லம் படிஸோதம் க³ந்த்வா தோ²கம் ட²த்வா காலனாக³ராஜஸ்ஸ ப⁴வனம் பவிஸித்வா திண்ணம் பு³த்³தா⁴னம் தா²லானி உக்கி²பித்வா அட்டா²ஸி.

மஹாஸத்தோ வனஸண்டே³ தி³வாவிஹாரம் கத்வா ஸாயன்ஹஸமயே ஸோத்தியேன தி³ன்னா அட்ட² திணமுட்டி²யோ க³ஹேத்வா போ³தி⁴மண்ட³ம் ஆருய்ஹ த³க்கி²ணதி³ஸாபா⁴கே³ அட்டா²ஸி. ஸோ பதே³ஸோ பது³மினிபத்தே உத³கபி³ந்து³ விய அகம்பித்த². மஹாஸத்தோ, ‘‘அயம் மம கு³ணம் தா⁴ரேதும் ந ஸக்கோதீ’’தி பச்சி²மதி³ஸாபா⁴க³ம் அக³மாஸி, ஸோபி ததே²வ அகம்பித்த². உத்தரதி³ஸாபா⁴க³ம் அக³மாஸி, ஸோபி ததே²வ அகம்பித்த². புரத்தி²மதி³ஸாபா⁴க³ம் அக³மாஸி, தத்த² பல்லங்கப்பமாணம் டா²னம் ஸுனிகா²தஇந்த³கி²லோ விய நிச்சலமஹோஸி. மஹாஸத்தோ ‘‘இத³ம் டா²னம் ஸப்³ப³பு³த்³தா⁴னம் கிலேஸப⁴ஞ்ஜனவித்³த⁴ம்ஸனட்டா²ன’’ந்தி தானி திணானி அக்³கே³ க³ஹேத்வா சாலேஸி. தானி சித்தகாரேன தூலிகக்³கே³ன பரிச்சி²ன்னானி விய அஹேஸும். போ³தி⁴ஸத்தோ, ‘‘போ³தி⁴ம் அப்பத்வா இமம் பல்லங்கம் ந பி⁴ந்தி³ஸ்ஸாமீ’’தி சதுரங்க³வீரியம் அதி⁴ட்ட²ஹித்வா பல்லங்கம் ஆபு⁴ஜித்வா நிஸீதி³.

தங்க²ணஞ்ஞேவ மாரோ பா³ஹுஸஹஸ்ஸம் மாபேத்வா தி³யட்³ட⁴யோஜனஸதிகம் கி³ரிமேக²லம் நாம ஹத்தி²ம் ஆருய்ஹ நவயோஜனம் மாரப³லம் க³ஹேத்வா அத்³த⁴க்கி²கேன ஓலோகயமானோ பப்³ப³தோ விய அஜ்ஜோ²த்த²ரந்தோ உபஸங்கமி. மஹாஸத்தோ, ‘‘மய்ஹம் த³ஸ பாரமியோ பூரேந்தஸ்ஸ அஞ்ஞோ ஸமணோ வா ப்³ராஹ்மணோ வா தே³வோ வா மாரோ வா ப்³ரஹ்மா வா ஸக்கி² நத்தி², வேஸ்ஸந்தரத்தபா⁴வே பன மய்ஹம் ஸத்தஸு வாரேஸு மஹாபத²வீ ஸக்கி² அஹோஸி; இதா³னிபி மே அயமேவ அசேதனா கட்ட²கலிங்க³ரூபமா மஹாபத²வீ ஸக்கீ²’’தி ஹத்த²ம் பஸாரேதி. மஹாபத²வீ தாவதே³வ அயத³ண்டே³ன பஹதம் கம்ஸதா²லம் விய ரவஸதம் ரவஸஹஸ்ஸம் முஞ்சமானா விரவித்வா பரிவத்தமானா மாரப³லம் சக்கவாளமுக²வட்டியம் முஞ்சனமகாஸி. மஹாஸத்தோ ஸூரியே த⁴ரமானேயேவ மாரப³லம் வித⁴மித்வா பட²மயாமே புப்³பே³னிவாஸஞாணம், மஜ்ஜி²மயாமே தி³ப்³ப³சக்கு²ம் விஸோதே⁴த்வா பச்சி²மயாமே படிச்சஸமுப்பாதே³ ஞாணம் ஓதாரேத்வா வட்டவிவட்டம் ஸம்மஸித்வா அருணோத³யே பு³த்³தோ⁴ ஹுத்வா, ‘‘மயா அனேககப்பகோடிஸதஸஹஸ்ஸம் அத்³தா⁴னம் இமஸ்ஸ பல்லங்கஸ்ஸ அத்தா²ய வாயாமோ கதோ’’தி ஸத்தாஹம் ஏகபல்லங்கேன நிஸீதி³. அதே²கச்சானம் தே³வதானம், ‘‘கிம் நு கோ² அஞ்ஞேபி பு³த்³த⁴த்தகரா த⁴ம்மா அத்தீ²’’தி கங்கா² உத³பாதி³.

அத² ப⁴க³வா அட்ட²மே தி³வஸே ஸமாபத்திதோ வுட்டா²ய தே³வதானம் கங்க²ம் ஞத்வா கங்கா²வித⁴மனத்த²ம் ஆகாஸே உப்பதித்வா யமகபாடிஹாரியம் த³ஸ்ஸேத்வா தாஸம் கங்க²ம் வித⁴மித்வா பல்லங்கதோ ஈஸகம் பாசீனனிஸ்ஸிதே உத்தரதி³ஸாபா⁴கே³ ட²த்வா சத்தாரி அஸங்க்²யேய்யானி கப்பஸதஸஹஸ்ஸஞ்ச பூரிதானம் பாரமீனம் ப²லாதி⁴க³மட்டா²னம் பல்லங்கஞ்சேவ போ³தி⁴ருக்க²ஞ்ச அனிமிஸேஹி அக்கீ²ஹி ஓலோகயமானோ ஸத்தாஹம் வீதினாமேஸி, தம் டா²னம் அனிமிஸசேதியம் நாம ஜாதம்.

அத² பல்லங்கஸ்ஸ ச டி²தட்டா²னஸ்ஸ ச அந்தரா புரத்தி²மபச்சி²மதோ ஆயதே ரதனசங்கமே சங்கமந்தோ ஸத்தாஹம் வீதினாமேஸி, தம் டா²னம் ரதனசங்கமசேதியம் நாம ஜாதம். ததோ பச்சி²மதி³ஸாபா⁴கே³ தே³வதா ரதனக⁴ரம் மாபயிம்ஸு, தத்த² பல்லங்கேன நிஸீதி³த்வா அபி⁴த⁴ம்மபிடகம் விஸேஸதோ சேத்த² அனந்தனயஸமந்தபட்டா²னம் விசினந்தோ ஸத்தாஹம் வீதினாமேஸி, தம் டா²னம் ரதனக⁴ரசேதியம் நாம ஜாதம். ஏவம் போ³தி⁴ஸமீபேயேவ சத்தாரி ஸத்தாஹானி வீதினாமேத்வா பஞ்சமே ஸத்தாஹே போ³தி⁴ருக்க²மூலா யேன அஜபாலனிக்³ரோதோ⁴ தேனுபஸங்கமி, தத்ராபி த⁴ம்மம் விசினந்தோயேவ விமுத்திஸுக²ஞ்ச படிஸம்வேதே³ந்தோ நிஸீதி³, த⁴ம்மம் விசினந்தோ சேத்த² ஏவம் அபி⁴த⁴ம்மே நயமக்³க³ம் ஸம்மஸி – பட²மம் த⁴ம்மஸங்க³ணீபகரணம் நாம, ததோ விப⁴ங்க³பகரணம், தா⁴துகதா²பகரணம், புக்³க³லபஞ்ஞத்திபகரணம், கதா²வத்து² நாம பகரணம், யமகம் நாம பகரணம், ததோ மஹாபகரணம் பட்டா²னம் நாமாதி.

தத்த²ஸ்ஸ ஸண்ஹஸுகு²மபட்டா²னம்ஹி சித்தே ஓதிண்ணே பீதி உப்பஜ்ஜி; பீதியா உப்பன்னாய லோஹிதம் பஸீதி³, லோஹிதே பஸன்னே ச²வி பஸீதி³. ச²வியா பஸன்னாய புரத்தி²மகாயதோ கூடாகா³ராதி³ப்பமாணா ரஸ்மியோ உட்ட²ஹித்வா ஆகாஸே பக்க²ந்த³ச²த்³த³ந்தனாக³குலம் விய பாசீனதி³ஸாய அனந்தானி சக்கவாளானி பக்க²ந்தா³, பச்சி²மகாயதோ உட்ட²ஹித்வா பச்சி²மதி³ஸாய, த³க்கி²ணம்ஸகூடதோ உட்ட²ஹித்வா த³க்கி²ணதி³ஸாய, வாமம்ஸகூடதோ உட்ட²ஹித்வா உத்தரதி³ஸாய அனந்தானி சக்கவாளானி பக்க²ந்தா³, பாத³தலேஹி பவாளங்குரவண்ணா ரஸ்மியோ நிக்க²மித்வா மஹாபத²விம் வினிவிஜ்ஜி²த்வா உத³கம் த்³விதா⁴ பி⁴ந்தி³த்வா வாதக்க²ந்த⁴ம் பதா³லேத்வா அஜடாகாஸம் பக்க²ந்தா³, ஸீஸதோ ஸம்பரிவத்தியமானம் மணிதா³மம் விய நீலவண்ணா ரஸ்மிவட்டி உட்ட²ஹித்வா ச² தே³வலோகே வினிவிஜ்ஜி²த்வா நவ ப்³ரஹ்மலோகே வேஹப்ப²லே பஞ்ச ஸுத்³தா⁴வாஸே ச வினிவிஜ்ஜி²த்வா சத்தாரோ ஆருப்பே அதிக்கம்ம அஜடாகாஸம் பக்க²ந்தா³. தஸ்மிம் தி³வஸே அபரிமாணேஸு சக்கவாளேஸு அபரிமாணா ஸத்தா ஸப்³பே³ ஸுவண்ணவண்ணாவ அஹேஸும். தம் தி³வஸஞ்ச பன ப⁴க³வதோ ஸரீரா நிக்க²ந்தா யாவஜ்ஜதி³வஸாபி தா ரஸ்மியோ அனந்தா லோகதா⁴துயோ க³ச்ச²ந்தியேவ.

ஏவம் ப⁴க³வா அஜபாலனிக்³ரோதே⁴ ஸத்தாஹம் வீதினாமேத்வா ததோ அபரம் ஸத்தாஹம் முசலிந்தே³ நிஸீதி³, நிஸின்னமத்தஸ்ஸேவ சஸ்ஸ ஸகலம் சக்கவாளக³ப்³ப⁴ம் பூரேந்தோ மஹாஅகாலமேகோ⁴ உத³பாதி³. ஏவரூபோ கிர மஹாமேகோ⁴ த்³வீஸுயேவ காலேஸு வஸ்ஸதி சக்கவத்திம்ஹி வா உப்பன்னே பு³த்³தே⁴ வா. இத⁴ பு³த்³த⁴காலே உத³பாதி³. தஸ்மிம் பன உப்பன்னே முசலிந்தோ³ நாக³ராஜா சிந்தேஸி – ‘‘அயம் மேகோ⁴ ஸத்த²ரி மய்ஹம் ப⁴வனம் பவிட்ட²மத்தேவ உப்பன்னோ, வாஸாகா³ரமஸ்ஸ லத்³து⁴ம் வட்டதீ’’தி. ஸோ ஸத்தரதனமயம் பாஸாத³ம் நிம்மினிதும் ஸக்கோந்தோபி ஏவம் கதே மய்ஹம் மஹப்ப²லம் ந ப⁴விஸ்ஸதி, த³ஸப³லஸ்ஸ காயவேய்யாவச்சம் கரிஸ்ஸாமீதி மஹந்தம் அத்தபா⁴வம் கத்வா ஸத்தா²ரம் ஸத்தக்க²த்தும் போ⁴கே³ஹி பரிக்கி²பித்வா உபரி ப²ணம் தா⁴ரேஸி. பரிக்கே²பஸ்ஸ அந்தோ ஓகாஸோ ஹேட்டா² லோஹபாஸாத³ப்பமாணோ அஹோஸி. இச்சி²திச்சி²தேன இரியாபதே²ன ஸத்தா² விஹரிஸ்ஸதீதி நாக³ராஜஸ்ஸ அஜ்ஜா²ஸயோ அஹோஸி. தஸ்மா ஏவம் மஹந்தம் ஓகாஸம் பரிக்கி²பி. மஜ்ஜே² ரதனபல்லங்கோ பஞ்ஞத்தோ ஹோதி, உபரி ஸுவண்ணதாரகவிசித்தம் ஸமோஸரிதக³ந்த⁴தா³மகுஸுமதா³மசேலவிதானம் அஹோஸி. சதூஸு கோணேஸு க³ந்த⁴தேலேன தீ³பா ஜலிதா, சதூஸு தி³ஸாஸு விவரித்வா சந்த³னகரண்ட³கா ட²பிதா. ஏவம் ப⁴க³வா தம் ஸத்தாஹம் தத்த² வீதினாமேத்வா ததோ அபரம் ஸத்தாஹம் ராஜாயதனே நிஸீதி³.

அட்ட²மே ஸத்தாஹே ஸக்கேன தே³வானமிந்தே³ன ஆப⁴தம் த³ந்தகட்ட²ஞ்ச ஓஸத⁴ஹரீதகஞ்ச கா²தி³த்வா முக²ம் தோ⁴வித்வா சதூஹி லோகபாலேஹி உபனீதே பச்சக்³கே⁴ ஸேலமயே பத்தே தபுஸ்ஸப⁴ல்லிகானம் பிண்ட³பாதம் பரிபு⁴ஞ்ஜித்வா புன பச்சாக³ந்த்வா அஜபாலனிக்³ரோதே⁴ நிஸின்னஸ்ஸ ஸப்³ப³பு³த்³தா⁴னம் ஆசிண்ணோ அயம் விதக்கோ உத³பாதி³.

தத்த² பண்டி³தோதி பண்டி³ச்சேன ஸமன்னாக³தோ. வியத்தோதி வேய்யத்தியேன ஸமன்னாக³தோ. மேதா⁴வீதி டா²னுப்பத்தியா பஞ்ஞாய ஸமன்னாக³தோ. அப்பரஜக்க²ஜாதிகோதி ஸமாபத்தியா விக்க²ம்பி⁴தத்தா நிக்கிலேஸஜாதிகோ விஸுத்³த⁴ஸத்தோ. ஆஜானிஸ்ஸதீதி ஸல்லக்கே²ஸ்ஸதி படிவிஜ்ஜி²ஸ்ஸதி. ஞாணஞ்ச பன மேதி மய்ஹம்பி ஸப்³ப³ஞ்ஞுதஞ்ஞாணம் உப்பஜ்ஜி. ப⁴க³வா கிர தே³வதாய கதி²தேனேவ நிட்ட²ம் அக³ந்த்வா ஸயம்பி ஸப்³ப³ஞ்ஞுதஞ்ஞாணேன ஓலோகேந்தோ இதோ ஸத்தமதி³வஸமத்த²கே காலம் கத்வா ஆகிஞ்சஞ்ஞாயதனே நிப்³ப³த்தோதி அத்³த³ஸ. தம் ஸந்தா⁴யாஹ – ‘‘ஞாணஞ்ச பன மே த³ஸ்ஸனம் உத³பாதீ³’’தி. மஹாஜானியோதி ஸத்ததி³வஸப்³ப⁴ந்தரே பத்தப்³ப³மக்³க³ப²லதோ பரிஹீனத்தா மஹதீ ஜானி அஸ்ஸாதி மஹாஜானியோ. அக்க²ணே நிப்³ப³த்தத்தா க³ந்த்வா தே³ஸியமானம் த⁴ம்மம்பிஸ்ஸ ஸோதும் ஸோதப்பஸாதோ³ நத்தி², இத⁴ த⁴ம்மதே³ஸனட்டா²னம் ஆக³மனபாதா³பி நத்தி², ஏவம் மஹாஜானியோ ஜாதோதி த³ஸ்ஸேதி. அபி⁴தோ³ஸகாலங்கதோதி அட்³ட⁴ரத்தே காலங்கதோ. ஞாணஞ்ச பன மேதி மய்ஹம்பி ஸப்³ப³ஞ்ஞுதஞ்ஞாணம் உத³பாதி³. இதா⁴பி கிர ப⁴க³வா தே³வதாய வசனேன ஸன்னிட்டா²னம் அகத்வா ஸப்³ப³ஞ்ஞுதஞ்ஞாணேன ஓலோகேந்தோ ‘‘ஹிய்யோ அட்³ட⁴ரத்தே காலங்கத்வா உத³கோ ராமபுத்தோ நேவஸஞ்ஞானாஸஞ்ஞாயதனே நிப்³ப³த்தோ’’தி அத்³த³ஸ. தஸ்மா ஏவமாஹ. ஸேஸம் புரிமனயஸதி³ஸமேவ. ப³ஹுகாராதி ப³ஹூபகாரா. பதா⁴னபஹிதத்தம் உபட்ட²ஹிம்ஸூதி பதா⁴னத்தா²ய பேஸிதத்தபா⁴வம் வஸனட்டா²னே பரிவேணஸம்மஜ்ஜனேன பத்தசீவரம் க³ஹேத்வா அனுப³ந்த⁴னேன முகோ²த³கத³ந்தகட்ட²தா³னாதி³னா ச உபட்ட²ஹிம்ஸு. கே பன தே பஞ்சவக்³கி³யா நாம? யேதே –

ராமோ த⁴ஜோ லக்க²ணோ ஜோதிமந்தி,

யஞ்ஞோ ஸுபோ⁴ஜோ ஸுயாமோ ஸுத³த்தோ;

ஏதே ததா³ அட்ட² அஹேஸும் ப்³ராஹ்மணா,

ச²ளங்க³வா மந்தம் வியாகரிம்ஸூதி.

போ³தி⁴ஸத்தஸ்ஸ ஜாதகாலே ஸுபினபடிக்³கா³ஹகா சேவ லக்க²ணபடிக்³கா³ஹகா ச அட்ட² ப்³ராஹ்மணா. தேஸு தயோ த்³வேதா⁴ ப்³யாகரிம்ஸு – ‘‘இமேஹி லக்க²ணேஹி ஸமன்னாக³தோ அகா³ரம் அஜ்ஜா²வஸமானோ ராஜா ஹோதி சக்கவத்தீ, பப்³ப³ஜமானோ பு³த்³தோ⁴’’தி. பஞ்ச ப்³ராஹ்மணா ஏகம்ஸப்³யாகரணா அஹேஸும் – ‘‘இமேஹி லக்க²ணேஹி ஸமன்னாக³தோ அகா³ரே ந திட்ட²தி, பு³த்³தோ⁴வ ஹோதீ’’தி. தேஸு புரிமா தயோ யதா²மந்தபத³ம் க³தா, இமே பன பஞ்ச மந்தபத³ம் அதிக்கந்தா. தே அத்தனா லத்³த⁴ம் புண்ணபத்தம் ஞாதகானம் விஸ்ஸஜ்ஜேத்வா ‘‘அயம் மஹாபுரிஸோ அகா³ரம் ந அஜ்ஜா²வஸிஸ்ஸதி, ஏகந்தேன பு³த்³தோ⁴ ப⁴விஸ்ஸதீ’’தி நிப்³பி³தக்கா போ³தி⁴ஸத்தம் உத்³தி³ஸ்ஸ ஸமணபப்³ப³ஜ்ஜம் பப்³ப³ஜிதா. தேஸம் புத்தாதிபி வத³ந்தி. தம் அட்ட²கதா²ய படிக்கி²த்தம்.

ஏதே கிர த³ஹரகாலேயேவ ப³ஹூ மந்தே ஜானிம்ஸு, தஸ்மா தே ப்³ராஹ்மணா ஆசரியட்டா²னே ட²பயிம்ஸு. தே பச்சா² அம்ஹேஹி புத்ததா³ரஜடம் ச²ட்³டே³த்வா ந ஸக்கா ப⁴விஸ்ஸதி பப்³ப³ஜிதுந்தி த³ஹரகாலேயேவ பப்³ப³ஜித்வா ரமணீயானி ஸேனாஸனானி பரிபு⁴ஞ்ஜந்தா விசரிம்ஸு. காலேன காலம் பன ‘‘கிம், போ⁴, மஹாபுரிஸோ மஹாபி⁴னிக்க²மனம் நிக்க²ந்தோ’’தி புச்ச²ந்தி. மனுஸ்ஸா, ‘‘குஹிம் தும்ஹே மஹாபுரிஸம் பஸ்ஸிஸ்ஸத², தீஸு பாஸாதே³ஸு திவித⁴னாடகமஜ்ஜே² தே³வோ விய ஸம்பத்திம் அனுபோ⁴தீ’’தி வத³ந்தி. தே ஸுத்வா, ‘‘ந தாவ மஹாபுரிஸஸ்ஸ ஞாணம் பரிபாகம் க³ச்ச²தீ’’தி அப்போஸ்ஸுக்கா விஹரிம்ஸுயேவ. கஸ்மா பனேத்த² ப⁴க³வா, ‘‘ப³ஹுகாரா கோ² இமே பஞ்சவக்³கி³யா’’தி ஆஹ? கிம் உபகாரகானம்யேவ ஏஸ த⁴ம்மம் தே³ஸேதி, அனுபகாரகானம் ந தே³ஸேதீதி? நோ ந தே³ஸேதி. பரிசயவஸேன ஹேஸ ஆளாரஞ்சேவ காலாமம் உத³கஞ்ச ராமபுத்தம் ஓலோகேஸி. ஏதஸ்மிம் பன பு³த்³த⁴க்கே²த்தே ட²பேத்வா அஞ்ஞாஸிகோண்ட³ஞ்ஞம் பட²மம் த⁴ம்மம் ஸச்சி²காதும் ஸமத்தோ² நாம நத்தி². கஸ்மா? ததா²வித⁴உபனிஸ்ஸயத்தா.

புப்³பே³ கிர புஞ்ஞகரணகாலே த்³வே பா⁴தரோ அஹேஸும். தே ஏகதோவ ஸஸ்ஸம் அகம்ஸு. தத்த² ஜேட்ட²கஸ்ஸ ‘‘ஏகஸ்மிம் ஸஸ்ஸே நவவாரே அக்³க³ஸஸ்ஸதா³னம் மயா தா³தப்³ப³’’ந்தி அஹோஸி. ஸோ வப்பகாலே பீ³ஜக்³க³ம் நாம த³த்வா க³ப்³ப⁴காலே கனிட்டே²ன ஸத்³தி⁴ம் மந்தேஸி – ‘‘க³ப்³ப⁴காலே க³ப்³ப⁴ம் பா²லேத்வா த³ஸ்ஸாமா’’தி. கனிட்டோ² ‘‘தருணஸஸ்ஸம் நாஸேதுகாமோஸீ’’தி ஆஹ. ஜேட்டோ² கனிட்ட²ஸ்ஸ அனனுவத்தனபா⁴வம் ஞத்வா கே²த்தம் விப⁴ஜித்வா அத்தனோ கோட்டா²ஸதோ க³ப்³ப⁴ம் பா²லேத்வா கீ²ரம் நீஹரித்வா ஸப்பிபா²ணிதேஹி யோஜேத்வா அதா³ஸி, புது²ககாலே புது²கம் காரேத்வா அதா³ஸி, லாயனே லாயனக்³க³ம் வேணிகரணே வேணக்³க³ம் கலாபாதீ³ஸு கலாபக்³க³ம் க²ளக்³க³ம் ப⁴ண்ட³க்³க³ம் கோட்ட²க்³க³ந்தி ஏவம் ஏகஸஸ்ஸே நவவாரே அக்³க³தா³னம் அதா³ஸி. கனிட்டோ² பனஸ்ஸ உத்³த⁴ரித்வா அதா³ஸி, தேஸு ஜேட்டோ² அஞ்ஞாஸிகோண்ட³ஞ்ஞத்தே²ரோ ஜாதோ, கனிட்டோ² ஸுப⁴த்³த³பரிப்³பா³ஜகோ. இதி ஏகஸ்மிம் ஸஸ்ஸே நவன்னம் அக்³க³தா³னானம் தி³ன்னத்தா ட²பேத்வா தே²ரம் அஞ்ஞோ பட²மம் த⁴ம்மம் ஸச்சி²காதும் ஸமத்தோ² நாம நத்தி². ‘‘ப³ஹுகாரா கோ² இமே பஞ்சவக்³கி³யா’’தி இத³ம் பன உபகாரானுஸ்ஸரணமத்தகேனேவ வுத்தம்.

இஸிபதனே மிக³தா³யேதி தஸ்மிம் கிர பதே³ஸே அனுப்பன்னே பு³த்³தே⁴ பச்சேகஸம்பு³த்³தா⁴ க³ந்த⁴மாத³னபப்³ப³தே ஸத்தாஹம் நிரோத⁴ஸமாபத்தியா வீதினாமேத்வா நிரோதா⁴ வுட்டா²ய நாக³லதாத³ந்தகட்ட²ம் கா²தி³த்வா அனோதத்தத³ஹே முக²ம் தோ⁴வித்வா பத்தசீவரமாதா³ய ஆகாஸேன ஆக³ந்த்வா நிபதந்தி. தத்த² சீவரம் பாருபித்வா நக³ரே பிண்டா³ய சரித்வா கதப⁴த்தகிச்சா க³மனகாலேபி ததோயேவ உப்பதித்வா க³ச்ச²ந்தி. இதி இஸயோ ஏத்த² நிபதந்தி உப்பதந்தி சாதி தம் டா²னம் இஸிபதனந்தி ஸங்க²ம் க³தம். மிகா³னம் பன அப⁴யத்தா²ய தி³ன்னத்தா மிக³தா³யோதி வுச்சதி. தேன வுத்தம் ‘‘இஸிபதனே மிக³தா³யே’’தி.

285. அந்தரா ச க³யம் அந்தரா ச போ³தி⁴ந்தி க³யாய ச போ³தி⁴ஸ்ஸ ச விவரே திகா³வுதந்தரே டா²னே. போ³தி⁴மண்ட³தோ ஹி க³யா தீணி கா³வுதானி. பா³ராணஸீ அட்டா²ரஸ யோஜனானி. உபகோ போ³தி⁴மண்ட³ஸ்ஸ ச க³யாய ச அந்தரே ப⁴க³வந்தம் அத்³த³ஸ. அந்தராஸத்³தே³ன பன யுத்தத்தா உபயோக³வசனம் கதம். ஈதி³ஸேஸு ச டா²னேஸு அக்க²ரசிந்தகா ‘‘அந்தரா கா³மஞ்ச நதி³ஞ்ச யாதீ’’தி ஏவம் ஏகமேவ அந்தராஸத்³த³ம் பயுஜ்ஜந்தி. ஸோ து³தியபதே³னபி யோஜேதப்³போ³ ஹோதி. அயோஜியமானே உபயோக³வசனம் ந பாபுணாதி. இத⁴ பன யோஜேத்வா ஏவ வுத்தோதி. அத்³தா⁴னமக்³க³படிபன்னந்தி அத்³தா⁴னஸங்கா²தம் மக்³க³ம் படிபன்னம், தீ³க⁴மக்³க³படிபன்னந்தி அத்தோ². அத்³தா⁴னமக்³க³க³மனஸமயஸ்ஸ ஹி விப⁴ங்கே³ ‘‘அத்³த⁴யோஜனம் க³ச்சி²ஸ்ஸாமீதி பு⁴ஞ்ஜிதப்³ப³’’ந்திஆதி³வசனதோ (பாசி. 218) அத்³த⁴யோஜனம்பி அத்³தா⁴னமக்³கோ³ ஹோதி. போ³தி⁴மண்ட³தோ பன க³யா திகா³வுதம்.

ஸப்³பா³பி⁴பூ⁴தி ஸப்³ப³ம் தேபூ⁴மகத⁴ம்மம் அபி⁴ப⁴வித்வா டி²தோ. ஸப்³ப³விதூ³தி ஸப்³ப³ம் சதுபூ⁴மகத⁴ம்மம் அவேதி³ம் அஞ்ஞாஸிம். ஸப்³பே³ஸு த⁴ம்மேஸு அனுபலித்தோதி ஸப்³பே³ஸு தேபூ⁴மகத⁴ம்மேஸு கிலேஸலேபனேன அனுபலித்தோ. ஸப்³ப³ம் ஜஹோதி ஸப்³ப³ம் தேபூ⁴மகத⁴ம்மம் ஜஹித்வா டி²தோ. தண்ஹாக்க²யே விமுத்தோதி தண்ஹாக்க²யே நிப்³பா³னே ஆரம்மணதோ விமுத்தோ. ஸயம் அபி⁴ஞ்ஞாயாதி ஸப்³ப³ம் சதுபூ⁴மகத⁴ம்மம் அத்தனாவ ஜானித்வா. கமுத்³தி³ஸேய்யந்தி கம் அஞ்ஞம் ‘‘அயம் மே ஆசரியோ’’தி உத்³தி³ஸேய்யம்.

ந மே ஆசரியோ அத்தீ²தி லோகுத்தரத⁴ம்மே மய்ஹம் ஆசரியோ நாம நத்தி². நத்தி² மே படிபுக்³க³லோதி மய்ஹம் படிபா⁴க³புக்³க³லோ நாம நத்தி². ஸம்மாஸம்பு³த்³தோ⁴தி ஸஹேதுனா நயேன சத்தாரி ஸச்சானி ஸயம் பு³த்³தோ⁴. ஸீதிபூ⁴தோதி ஸப்³ப³கிலேஸக்³கி³னிப்³பா³பனேன ஸீதிபூ⁴தோ. கிலேஸானம்யேவ நிப்³பு³தத்தா நிப்³பு³தோ. காஸினம் புரந்தி காஸிரட்டே² நக³ரம். ஆஹஞ்ச²ம் அமதது³ந்து³பி⁴ந்தி த⁴ம்மசக்கபடிலாபா⁴ய அமதபே⁴ரிம் பஹரிஸ்ஸாமீதி க³ச்சா²மி. அரஹஸி அனந்தஜினோதி அனந்தஜினோதி ப⁴விதும் யுத்தோ. ஹுபேய்ய பாவுஸோதி, ஆவுஸோ, ஏவம்பி நாம ப⁴வேய்ய. பக்காமீதி வங்கஹாரஜனபத³ம் நாம அக³மாஸி.

தத்தே²கம் மிக³லுத்³த³ககா³மகம் நிஸ்ஸாய வாஸம் கப்பேஸி. ஜேட்ட²கலுத்³த³கோ தம் உபட்டா²ஸி. தஸ்மிஞ்ச ஜனபதே³ சண்டா³ மக்கி²கா ஹோந்தி. அத² நம் ஏகாய சாடியா வஸாபேஸும், மிக³லுத்³த³கோ தூ³ரே மிக³வம் க³ச்ச²ந்தோ ‘‘அம்ஹாகம் அரஹந்தே மா பமஜ்ஜீ’’தி சா²வம் நாம தீ⁴தரம் ஆணாபேத்வா அக³மாஸி ஸத்³தி⁴ம் புத்தபா⁴துகேஹி. ஸா சஸ்ஸ தீ⁴தா த³ஸ்ஸனீயா ஹோதி கோட்டா²ஸஸம்பன்னா. து³தியதி³வஸே உபகோ க⁴ரம் ஆக³தோ தம் தா³ரிகம் ஸப்³ப³ம் உபசாரம் கத்வா பரிவிஸிதும் உபக³தம் தி³ஸ்வா ராகே³ன அபி⁴பூ⁴தோ பு⁴ஞ்ஜிதும்பி அஸக்கோந்தோ பா⁴ஜனேன ப⁴த்தம் ஆதா³ய வஸனட்டா²னம் க³ந்த்வா ப⁴த்தம் ஏகமந்தே நிக்கி²பித்வா ஸசே சா²வம் லபா⁴மி, ஜீவாமி, நோ சே, மராமீதி நிராஹாரோ ஸயி. ஸத்தமே தி³வஸே மாக³விகோ ஆக³ந்த்வா தீ⁴தரம் உபகஸ்ஸ பவத்திம் புச்சி². ஸா ‘‘ஏகதி³வஸமேவ ஆக³ந்த்வா புன நாக³தபுப்³போ³’’தி ஆஹ. மாக³விகோ ஆக³தவேஸேனேவ நம் உபஸங்கமித்வா புச்சி²ஸ்ஸாமீதி தம்க²ணம்யேவ க³ந்த்வா ‘‘கிம், ப⁴ந்தே, அப்பா²ஸுக’’ந்தி பாதே³ பராமஸந்தோ புச்சி². உபகோ நித்து²னந்தோ பரிவத்ததியேவ. ஸோ ‘‘வத³த² ப⁴ந்தே, யம் மயா ஸக்கா காதும், தம் ஸப்³ப³ம் கரிஸ்ஸாமீ’’தி ஆஹ. உபகோ, ‘‘ஸசே சா²வம் லபா⁴மி, ஜீவாமி, நோ சே, இதே⁴வ மரணம் ஸேய்யோ’’தி ஆஹ. ஜானாஸி பன, ப⁴ந்தே, கிஞ்சி ஸிப்பந்தி. ந ஜானாமீதி. ந, ப⁴ந்தே, கிஞ்சி ஸிப்பம் அஜானந்தேன ஸக்கா க⁴ராவாஸம் அதி⁴ட்டா²துந்தி.

ஸோ ஆஹ – ‘‘நாஹம் கிஞ்சி ஸிப்பம் ஜானாமி, அபிச தும்ஹாகம் மம்ஸஹாரகோ ப⁴விஸ்ஸாமி, மம்ஸஞ்ச விக்கீணிஸ்ஸாமீ’’தி. மாக³விகோ, ‘‘அம்ஹாகம்பி ஏததே³வ ருச்சதீ’’தி உத்தரஸாடகம் த³த்வா க⁴ரம் ஆனேத்வா தீ⁴தரம் அதா³ஸி. தேஸம் ஸம்வாஸமன்வாய புத்தோ விஜாயி. ஸுப⁴த்³தோ³திஸ்ஸ நாமம் அகம்ஸு. சா²வா தஸ்ஸ ரோத³னகாலே ‘‘மம்ஸஹாரகஸ்ஸ புத்த, மிக³லுத்³த³கஸ்ஸ புத்த மா ரோதீ³’’திஆதீ³னி வத³மானா புத்ததோஸனகீ³தேன உபகம் உப்பண்டே³ஸி. ப⁴த்³தே³ த்வம் மம் அனாதோ²தி மஞ்ஞஸி. அத்தி² மே அனந்தஜினோ நாம ஸஹாயோ. தஸ்ஸாஹம் ஸந்திகே க³மிஸ்ஸாமீதி ஆஹ. சா²வா ஏவமயம் அட்டீயதீதி ஞத்வா புனப்புனம் கதே²தி. ஸோ ஏகதி³வஸம் அனாரோசேத்வாவ மஜ்ஜி²மதே³ஸாபி⁴முகோ² பக்காமி.

ப⁴க³வா ச தேன ஸமயேன ஸாவத்தி²யம் விஹரதி ஜேதவனே மஹாவிஹாரே. அத² கோ² ப⁴க³வா படிகச்சேவ பி⁴க்கூ² ஆணாபேஸி – ‘‘யோ, பி⁴க்க²வே, ‘அனந்தஜினோ’தி புச்ச²மானோ ஆக³ச்ச²தி, தஸ்ஸ மம் த³ஸ்ஸேய்யாதா²’’தி. உபகோபி கோ² ‘‘குஹிம் அனந்தஜினோ வஸதீ’’தி புச்ச²ந்தோ அனுபுப்³பே³ன ஸாவத்தி²ம் ஆக³ந்த்வா விஹாரமஜ்ஜே² ட²த்வா குஹிம் அனந்தஜினோதி புச்சி². தம் பி⁴க்கூ² ப⁴க³வதோ ஸந்திகம் நயிம்ஸு. ஸோ ப⁴க³வந்தம் தி³ஸ்வா – ‘‘ஸஞ்ஜானாத² மம் ப⁴க³வா’’தி ஆஹ. ஆம, உபக, ஸஞ்ஜானாமி, குஹிம் பன த்வம் வஸித்தா²தி. வங்கஹாரஜனபதே³, ப⁴ந்தேதி. உபக, மஹல்லகோஸி ஜாதோ பப்³ப³ஜிதும் ஸக்கி²ஸ்ஸஸீதி. பப்³ப³ஜிஸ்ஸாமி, ப⁴ந்தேதி. ப⁴க³வா பப்³பா³ஜேத்வா தஸ்ஸ கம்மட்டா²னம் அதா³ஸி. ஸோ கம்மட்டா²னே கம்மம் கரோந்தோ அனாகா³மிப²லே பதிட்டா²ய காலம் கத்வா அவிஹேஸு நிப்³ப³த்தோ. நிப்³ப³த்தக்க²ணேயேவ அரஹத்தம் பாபுணீதி. அவிஹேஸு நிப்³ப³த்தமத்தா ஹி ஸத்த ஜனா அரஹத்தம் பாபுணிம்ஸு, தேஸம் ஸோ அஞ்ஞதரோ.

வுத்தஞ்ஹேதம் –

‘‘அவிஹம் உபபன்னாஸே, விமுத்தா ஸத்த பி⁴க்க²வோ;

ராக³தோ³ஸபரிக்கீ²ணா, திண்ணா லோகே விஸத்திகம்.

உபகோ பலக³ண்டோ³ ச, புக்குஸாதி ச தே தயோ;

ப⁴த்³தி³யோ க²ண்ட³தே³வோ ச, ப³ஹுரக்³கி³ ச ஸங்கி³யோ;

தே ஹித்வா மானுஸம் தே³ஹம், தி³ப்³ப³யோக³ம் உபஜ்ஜ²கு³’’ந்தி. (ஸம். நி. 1.105);

286. ஸண்ட²பேஸுந்தி கதிகம் அகம்ஸு. பா³ஹுல்லிகோதி சீவரபா³ஹுல்லாதீ³னம் அத்தா²ய படிபன்னோ. பதா⁴னவிப்³ப⁴ந்தோதி பதா⁴னதோ விப்³ப⁴ந்தோ ப⁴ட்டோ² பரிஹீனோ. ஆவத்தோ பா³ஹுல்லாயாதி சீவராதீ³னம் ப³ஹுலபா⁴வத்தா²ய ஆவத்தோ. அபிச கோ² ஆஸனம் ட²பேதப்³ப³ந்தி அபிச கோ² பனஸ்ஸ உச்சகுலே நிப்³ப³த்தஸ்ஸ ஆஸனமத்தம் ட²பேதப்³ப³ந்தி வதி³ம்ஸு. நாஸக்கி²ம்ஸூதி பு³த்³தா⁴னுபா⁴வேன பு³த்³த⁴தேஜஸா அபி⁴பூ⁴தா அத்தனோ கதிகாய டா²தும் நாஸக்கி²ம்ஸு. நாமேன ச ஆவுஸோவாதே³ன ச ஸமுதா³சரந்தீதி கோ³தமாதி, ஆவுஸோதி ச வத³ந்தி. ஆவுஸோ கோ³தம, மயம் உருவேலாயம் பதா⁴னகாலே துய்ஹம் பத்தசீவரம் க³ஹேத்வா விசரிம்ஹா, முகோ²த³கம் த³ந்தகட்ட²ம் அத³ம்ஹா, வுத்த²பரிவேணம் ஸம்மஜ்ஜிம்ஹா, பச்சா² கோ தே வத்தப்படிபத்திமகாஸி, கச்சி அம்ஹேஸு பக்கந்தேஸு ந சிந்தயித்தா²தி ஏவரூபிம் கத²ம் கதே²ந்தீதி அத்தோ². இரியாயாதி து³க்கரஇரியாய. படிபதா³யாதி து³க்கரபடிபத்தியா. து³க்கரகாரிகாயாதி பஸதபஸத-முக்³க³யூஸாதி³ஆஹரகரணாதி³னா து³க்கரகரணேன. அபி⁴ஜானாத² மே நோதி அபி⁴ஜானாத² நு மம. ஏவரூபம் பபா⁴விதமேதந்தி ஏதம் ஏவரூபம் வாக்யபே⁴த³ந்தி அத்தோ². அபி நு அஹம் உருவேலாய பதா⁴னே தும்ஹாகம் ஸங்க³ண்ஹனத்த²ம் அனுக்கண்ட²னத்த²ம் ரத்திம் வா தி³வா வா ஆக³ந்த்வா, – ‘‘ஆவுஸோ, மா விதக்கயித்த², மய்ஹம் ஓபா⁴ஸோ வா நிமித்தம் வா பஞ்ஞாயதீ’’தி ஏவரூபம் கஞ்சி வசனபே⁴த³ம் அகாஸிந்தி அதி⁴ப்பாயோ. தே ஏகபதே³னேவ ஸதிம் லபி⁴த்வா உப்பன்னகா³ரவா, ‘‘ஹந்த³ அத்³தா⁴ ஏஸ பு³த்³தோ⁴ ஜாதோ’’தி ஸத்³த³ஹித்வா நோ ஹேதம், ப⁴ந்தேதி ஆஹம்ஸு. அஸக்கி²ம் கோ² அஹம், பி⁴க்க²வே, பஞ்சவக்³கி³யே பி⁴க்கூ² ஸஞ்ஞாபேதுந்தி அஹம், பி⁴க்க²வே, பஞ்சவக்³கி³யே பி⁴க்கூ² பு³த்³தோ⁴ அஹந்தி ஜானாபேதும் அஸக்கி²ம். ததா³ பன ப⁴க³வா உபோஸத²தி³வஸேயேவ ஆக³ச்சி². அத்தனோ பு³த்³த⁴பா⁴வம் ஜானாபேத்வா கோண்ட³ஞ்ஞத்தே²ரம் காயஸக்கி²ம் கத்வா த⁴ம்மசக்கப்பவத்தனஸுத்தம் கதே²ஸி. ஸுத்தபரியோஸானே தே²ரோ அட்டா²ரஸஹி ப்³ரஹ்மகோடீஹி ஸத்³தி⁴ம் ஸோதாபத்திப²லே பதிட்டா²ஸி. ஸூரியே த⁴ரமானேயேவ தே³ஸனா நிட்டா²ஸி. ப⁴க³வா தத்தே²வ வஸ்ஸம் உபக³ச்சி².

த்³வேபி ஸுத³ம், பி⁴க்க²வே, பி⁴க்கூ² ஓவதா³மீதிஆதி³ பாடிபத³தி³வஸதோ பட்டா²ய பிண்ட³பாதத்தா²யபி கா³மம் அப்பவிஸனதீ³பனத்த²ம் வுத்தம். தேஸஞ்ஹி பி⁴க்கூ²னம் கம்மட்டா²னேஸு உப்பன்னமலவிஸோத⁴னத்த²ம் ப⁴க³வா அந்தோவிஹாரேயேவ அஹோஸி. உப்பன்னே உப்பன்னே கம்மட்டா²னமலே தேபி பி⁴க்கூ² ப⁴க³வதோ ஸந்திகம் க³ந்த்வா புச்ச²ந்தி. ப⁴க³வாபி தேஸம் நிஸின்னட்டா²னம் க³ந்த்வா மலம் வினோதே³தி. அத² நேஸம் ப⁴க³வதா ஏவம் நீஹடப⁴த்தேன ஓவதி³யமானானம் வப்பத்தே²ரோ பாடிபத³தி³வஸே ஸோதாபன்னோ அஹோஸி. ப⁴த்³தி³யத்தே²ரோ து³தியாயம், மஹானாமத்தே²ரோ ததியாயம், அஸ்ஸஜித்தே²ரோ சதுத்தி²யம். பக்க²ஸ்ஸ பன பஞ்சமியம் ஸப்³பே³வ தே ஏகதோ ஸன்னிபாதேத்வா அனத்தலக்க²ணஸுத்தம் கதே²ஸி, ஸுத்தபரியோஸானே ஸப்³பே³பி அரஹத்தப²லே பதிட்ட²ஹிம்ஸு. தேனாஹ – ‘‘அத² கோ², பி⁴க்க²வே, பஞ்சவக்³கி³யா பி⁴க்கூ² மயா ஏவம் ஓவதி³யமானா…பே… அனுத்தரம் யோக³க்கே²மம் நிப்³பா³னம் அஜ்ஜ²க³மம்ஸு…பே… நத்தி² தா³னி புனப்³ப⁴வோ’’தி. ஏத்தகம் கதா²மக்³க³ம் ப⁴க³வா யம் புப்³பே³ அவச – ‘‘தும்ஹேபி மமஞ்சேவ பஞ்சவக்³கி³யானஞ்ச மக்³க³ம் ஆருள்ஹா, அரியபரியேஸனா தும்ஹாகம் பரியேஸனா’’தி இமம் ஏகமேவ அனுஸந்தி⁴ம் த³ஸ்ஸேந்தோ ஆஹரி.

287. இதா³னி யஸ்மா ந அகா³ரியானம்யேவ பஞ்சகாமகு³ணபரியேஸனா ஹோதி, அனகா³ரியானம்பி சத்தாரோ பச்சயே அப்பச்சவேக்கி²த்வா பரிபு⁴ஞ்ஜந்தானம் பஞ்சகாமகு³ணவஸேன அனரியபரியேஸனா ஹோதி, தஸ்மா தம் த³ஸ்ஸேதும் பஞ்சிமே, பி⁴க்க²வே, காமகு³ணாதிஆதி³மாஹ. தத்த² நவரத்தேஸு பத்தசீவராதீ³ஸு சக்கு²விஞ்ஞேய்யா ரூபாதிஆத³யோ சத்தாரோ காமகு³ணா லப்³ப⁴ந்தி. ரஸோ பனேத்த² பரிபோ⁴க³ரஸோ ஹோதி. மனுஞ்ஞே பிண்ட³பாதே பே⁴ஸஜ்ஜே ச பஞ்சபி லப்³ப⁴ந்தி. ஸேனாஸனம்ஹி சீவரே விய சத்தாரோ. ரஸோ பன ஏத்தா²பி பரிபோ⁴க³ரஸோவ. யே ஹி கேசி, பி⁴க்க²வேதி கஸ்மா ஆரபி⁴? ஏவம் பஞ்ச காமகு³ணே த³ஸ்ஸேத்வா இதா³னி யே ஏவம் வதே³ய்யும், ‘‘பப்³ப³ஜிதகாலதோ பட்டா²ய அனரியபரியேஸனா நாம குதோ, அரியபரியேஸனாவ பப்³ப³ஜிதான’’ந்தி, தேஸம் படிஸேத⁴னத்தா²ய ‘‘பப்³ப³ஜிதானம்பி சதூஸு பச்சயேஸு அப்பச்சவேக்க²ணபரிபோ⁴கோ³ அனரியபரியேஸனா ஏவா’’தி த³ஸ்ஸேதும் இமம் தே³ஸனம் ஆரபி⁴. தத்த² க³தி⁴தாதி தண்ஹாகே³தே⁴ன க³தி⁴தா. முச்சி²தாதி தண்ஹாமுச்சா²ய முச்சி²தா. அஜ்ஜோ²பன்னாதி தண்ஹாய அஜ்ஜோ²கா³ள்ஹா. அனாதீ³னவத³ஸ்ஸாவினோதி ஆதீ³னவம் அபஸ்ஸந்தா. அனிஸ்ஸரணபஞ்ஞாதி நிஸ்ஸரணம் வுச்சதி பச்சவேக்க²ணஞாணம். தே தேன விரஹிதா.

இதா³னி தஸ்ஸத்த²ஸ்ஸ ஸாத⁴கம் உபமம் த³ஸ்ஸேந்தோ ஸேய்யதா²பி, பி⁴க்க²வேதிஆதி³மாஹ. தத்ரேவம் ஓபம்மஸம்ஸந்த³னம் வேதி³தப்³ப³ம் – ஆரஞ்ஞகமகோ³ விய ஹி ஸமணப்³ராஹ்மணா, லுத்³த³கேன அரஞ்ஞே ட²பிதபாஸோ விய சத்தாரோ பச்சயா, தஸ்ஸ லுத்³த³ஸ்ஸ பாஸராஸிம் அஜ்ஜோ²த்த²ரித்வா ஸயனகாலோ விய தேஸம் சத்தாரோ பச்சயே அப்பச்சவேக்கி²த்வா பரிபோ⁴க³காலோ. லுத்³த³கே ஆக³ச்ச²ந்தே மக³ஸ்ஸ யேன காமம் அக³மனகாலோ விய ஸமணப்³ராஹ்மணானம் மாரஸ்ஸ யதா²காமகரணீயகாலோ, மாரவஸம் உபக³தபா⁴வோதி அத்தோ². மக³ஸ்ஸ பன அப³த்³த⁴ஸ்ஸ பாஸராஸிம் அதி⁴ஸயிதகாலோ விய ஸமணப்³ராஹ்மணானம் சதூஸு பச்சயேஸு பச்சவேக்க²ணபரிபோ⁴கோ³, லுத்³த³கே ஆக³ச்ச²ந்தே மக³ஸ்ஸ யேன காமம் க³மனம் விய ஸமணப்³ராஹ்மணானம் மாரவஸம் அனுபக³மனம் வேதி³தப்³ப³ம். விஸ்ஸத்தோ²தி நிப்³ப⁴யோ நிராஸங்கோ. ஸேஸம் ஸப்³ப³த்த² உத்தானத்த²மேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

பாஸராஸிஸுத்தவண்ணனா நிட்டி²தா.

அரியபரியேஸனாதிபி ஏதஸ்ஸேவ நாமம்.