3. வம்மிகஸுத்தவண்ணனா

249. ஏவம் மே ஸுதந்தி வம்மிகஸுத்தம். தத்த² ஆயஸ்மாதி பியவசனமேதம். குமாரகஸ்ஸபோதி தஸ்ஸ நாமம். குமாரகாலே பப்³ப³ஜிதத்தா பன ப⁴க³வதா, ‘‘கஸ்ஸபம் பக்கோஸத², இத³ம் ப²லம் வா கா²த³னீயம் வா கஸ்ஸபஸ்ஸ தே³தா²’’தி வுத்தே, கதரஸ்ஸ கஸ்ஸபஸ்ஸாதி குமாரகஸ்ஸபஸ்ஸாதி ஏவம் க³ஹிதனாமத்தா ததோ பட்டா²ய வுட்³ட⁴காலேபி ‘‘குமாரகஸ்ஸபோ’’ த்வேவ வுச்சதி. அபிச ரஞ்ஞா போஸாவனிகபுத்தத்தாபி தம் ‘‘குமாரகஸ்ஸபோ’’தி ஸஞ்ஜானிம்ஸு. அயம் பனஸ்ஸ புப்³ப³யோக³தோ பட்டா²ய ஆவிபா⁴வகதா² –

தே²ரோ கிர பது³முத்தரஸ்ஸ ப⁴க³வதோ காலே ஸேட்டி²புத்தோ அஹோஸி. அதே²கதி³வஸம் ப⁴க³வந்தம் சித்ரகதி²ம் ஏகம் அத்தனோ ஸாவகம் டா²னந்தரே ட²பேந்தம் தி³ஸ்வா ப⁴க³வதோ ஸத்தாஹம் தா³னம் த³த்வா, ‘‘அஹம்பி ப⁴க³வா அனாக³தே ஏகஸ்ஸ பு³த்³த⁴ஸ்ஸ அயம் தே²ரோ விய சித்ரகதீ² ஸாவகோ ப⁴வேய்ய’’ந்தி பத்த²னம் கத்வா புஞ்ஞானி கரோந்தோ கஸ்ஸபஸ்ஸ ப⁴க³வதோ ஸாஸனே பப்³ப³ஜித்வா விஸேஸம் நிப்³ப³த்தேதும் நாஸக்கி².

ததா³ கிர பரினிப்³பு³தஸ்ஸ ப⁴க³வதோ ஸாஸனே ஓஸக்கந்தே பஞ்ச பி⁴க்கூ² நிஸ்ஸேணிம் ப³ந்தி⁴த்வா பப்³ப³தம் அபி⁴ருய்ஹ ஸமணத⁴ம்மம் அகம்ஸு. ஸங்க⁴த்தே²ரோ ததியதி³வஸே அரஹத்தம் பத்தோ. அனுதே²ரோ சதுத்த²தி³வஸே அனாகா³மீ அஹோஸி. இதரே தயோ விஸேஸம் நிப்³ப³த்தேதும் அஸக்கோந்தா தே³வலோகே நிப்³ப³த்திம்ஸு. தேஸம் ஏகம் பு³த்³த⁴ந்தரம் தே³வேஸு ச மனுஸ்ஸேஸு ச ஸம்பத்திம் அனுபோ⁴ந்தானம் ஏகோ தக்கஸிலாயம் ராஜகுலே நிப்³ப³த்தித்வா புக்குஸாதி நாம ராஜா ஹுத்வா ப⁴க³வந்தம் உத்³தி³ஸ்ஸ பப்³ப³ஜித்வா ராஜக³ஹம் க³ச்ச²ந்தோ கும்ப⁴காரஸாலாயம் ப⁴க³வதோ த⁴ம்மதே³ஸனம் ஸுத்வா அனாகா³மிப²லம் பத்தோ. ஏகோ ஏகஸ்மிம் ஸமுத்³த³பட்டனே குலக⁴ரே நிப்³ப³த்தித்வா நாவம் ஆருய்ஹ பி⁴ன்னனாவோ தா³ருசீரானி நிவாஸேத்வா லாப⁴ஸம்பத்திம் பத்தோ, ‘‘அஹம் அரஹா’’தி சித்தம் உப்பாதே³த்வா, ‘‘ந த்வம் அரஹா, க³ச்ச² ஸத்தா²ரம் பஞ்ஹம் புச்சா²’’தி அத்த²காமாய தே³வதாய சோதி³தோ ததா² கத்வா அரஹத்தப²லம் பத்தோ.

ஏகோ ராஜக³ஹே ஏகிஸ்ஸா குலதா³ரிகாய குச்சி²ம்ஹி உப்பன்னோ. ஸா ச பட²மம் மாதாபிதரோ யாசித்வா பப்³ப³ஜ்ஜம் அலப⁴மானா குலக⁴ரம் க³தா க³ப்³ப⁴ஸண்டி²தம்பி அஜானந்தீ ஸாமிகம் ஆராதே⁴த்வா தேன அனுஞ்ஞாதா பி⁴க்கு²னீஸு பப்³ப³ஜிதா. தஸ்ஸா க³ப்³பி⁴னினிமித்தம் தி³ஸ்வா பி⁴க்கு²னியோ தே³வத³த்தம் புச்சி²ம்ஸு, ஸோ ‘‘அஸ்ஸமணீ’’தி ஆஹ. த³ஸப³லம் புச்சி²ம்ஸு, ஸத்தா² உபாலித்தே²ரம் படிச்சா²பேஸி. தே²ரோ ஸாவத்தி²னக³ரவாஸீனி குலானி விஸாக²ஞ்ச உபாஸிகம் பக்கோஸாபேத்வா ஸோதே⁴ந்தோ, – ‘‘புரே லத்³தோ⁴ க³ப்³போ⁴, பப்³ப³ஜ்ஜா அரோகா³’’தி ஆஹ. ஸத்தா² ‘‘ஸுவினிச்சி²தம் அதி⁴கரண’’ந்தி தே²ரஸ்ஸ ஸாது⁴காரம் அதா³ஸி. ஸா பி⁴க்கு²னீ ஸுவண்ணபி³ம்ப³ஸதி³ஸம் புத்தம் விஜாயி, தம் க³ஹேத்வா ராஜா பஸேனதி³ கோஸலோ போஸாபேஸி. ‘‘கஸ்ஸபோ’’தி சஸ்ஸ நாமம் கத்வா அபரபா⁴கே³ அலங்கரித்வா ஸத்து² ஸந்திகம் நேத்வா பப்³பா³ஜேஸி. இதி ரஞ்ஞோ போஸாவனிகபுத்தத்தாபி தம் ‘‘குமாரகஸ்ஸபோ’’தி ஸஞ்ஜானிம்ஸூதி.

அந்த⁴வனேதி ஏவம்னாமகே வனே. தம் கிர வனம் த்³வின்னம் பு³த்³தா⁴னம் காலே அவிஜஹிதனாமம் அந்த⁴வனம்த்வேவ பஞ்ஞாயதி. தத்ராயம் பஞ்ஞத்திவிபா⁴வனா – அப்பாயுகபு³த்³தா⁴னஞ்ஹி ஸரீரதா⁴து ந ஏகக்³க⁴னா ஹோதி. அதி⁴ட்டா²னானுபா⁴வேன விப்பகிரியதி. தேனேவ அம்ஹாகம்பி ப⁴க³வா, – ‘‘அஹம் ந சிரட்டி²திகோ, அப்பகேஹி ஸத்தேஹி அஹம் தி³ட்டோ², யேஹி ந தி³ட்டோ², தேவ ப³ஹுதரா, தே மே தா⁴துயோ ஆதா³ய தத்த² தத்த² பூஜேந்தா ஸக்³க³பராயணா ப⁴விஸ்ஸந்தீ’’தி பரினிப்³பா³னகாலே, ‘‘அத்தனோ ஸரீரம் விப்பகிரியதூ’’தி அதி⁴ட்டா²ஸி. தீ³கா⁴யுகபு³த்³தா⁴னம் பன ஸுவண்ணக்க²ந்தோ⁴ விய ஏகக்³க⁴னம் தா⁴துஸரீரம் திட்ட²தி.

கஸ்ஸபஸ்ஸாபி ப⁴க³வதோ ததே²வ அட்டா²ஸி. ததோ மஹாஜனா ஸன்னிபதித்வா, ‘‘தா⁴துயோ ஏகக்³க⁴னா ந ஸக்கா வியோஜேதும், கிம் கரிஸ்ஸாமா’’தி ஸம்மந்தயித்வா ஏகக்³க⁴னமேவ சேதியம் கரிஸ்ஸாம, கித்தகம் பன ஹோது தந்தி ஆஹம்ஸு. ஏகே ஸத்தயோஜனியந்தி ஆஹம்ஸு. ஏதம் அதிமஹந்தம், அனாக³தே ஜக்³கி³தும் ந ஸக்கா, ச²யோஜனம் ஹோது, பஞ்சயோஜனம்… சதுயோஜனம்… தியோஜனம்… த்³வியோஜனம்… ஏகயோஜனம் ஹோதூதி ஸன்னிட்டா²னம் கத்வா இட்ட²கா கீதி³ஸா ஹோந்தூதி பா³ஹிரந்தே இட்ட²கா ரத்தஸுவண்ணமயா ஏகக்³க⁴னா ஸதஸஹஸ்ஸக்³க⁴னிகா ஹோந்து, அப்³ப⁴ந்தரிமந்தே பஞ்ஞாஸஸஹஸ்ஸக்³க⁴னிகா. ஹரிதாலமனோஸிலாஹி மத்திகாகிச்சம் கயிரது, தேலேன உத³ககிச்சந்தி நிட்ட²ம் க³ந்த்வா சத்தாரி முகா²னி சதுதா⁴ விப⁴ஜிம்ஸு. ராஜா ஏகம் முக²ம் க³ண்ஹி, ராஜபுத்தோ பத²விந்த³ரகுமாரோ ஏகம், அமச்சானம் ஜேட்ட²கோ ஹுத்வா ஸேனாபதி ஏகம், ஜனபதா³னம் ஜேட்ட²கோ ஹுத்வா ஸேட்டி² ஏகம்.

தத்த² த⁴னஸம்பன்னதாய ராஜாபி ஸுவண்ணம் நீஹராபேத்வா அத்தனா க³ஹிதமுகே² கம்மம் ஆரபி⁴, உபராஜாபி, ஸேனாபதிபி. ஸேட்டி²னா க³ஹிதமுகே² பன கம்மம் ஓலீயதி. ததோ யஸோரதோ நாம ஏகோ உபாஸகோ தேபிடகோ பா⁴ணகோ அனாகா³மீ அரியஸாவகோ, ஸோ கம்மம் ஓலீயதீதி ஞத்வா பஞ்ச ஸகடஸதானி யோஜாபேத்வா ஜனபத³ம் க³ந்த்வா ‘‘கஸ்ஸபஸம்மாஸம்பு³த்³தோ⁴ வீஸதிவஸ்ஸஸஹஸ்ஸானி ட²த்வா பரினிப்³பு³தோ. தஸ்ஸ யோஜனிகம் ரதனசேதியம் கயிரதி, யோ யம் தா³தும் உஸ்ஸஹதி ஸுவண்ணம் வா ஹிரஞ்ஞம் வா ஸத்தரதனம் வா ஹரிதாலம் வா மனோஸிலம் வா, ஸோ தம் தே³தூ’’தி ஸமாத³பேஸி. மனுஸ்ஸா அத்தனோ அத்தனோ தா²மேன ஹிரஞ்ஞஸுவண்ணாதீ³னி அத³ம்ஸு. அஸக்கோந்தா தேலதண்டு³லாதீ³னி தே³ந்தியேவ. உபாஸகோ தேலதண்டு³லாதீ³னி கம்மகாரானம் ப⁴த்தவேதனத்த²ம் பஹிணாதி, அவஸேஸேஹி ஸுவண்ணம் சேதாபேத்வா பஹிணாதி, ஏவம் ஸகலஜம்பு³தீ³பம் அசரி.

சேதியே கம்மம் நிட்டி²தந்தி சேதியட்டா²னதோ பண்ணம் பஹிணிம்ஸு – ‘‘நிட்டி²தம் கம்மம் ஆசரியோ ஆக³ந்த்வா சேதியம் வந்த³தூ’’தி. ஸோபி பண்ணம் பஹிணி – ‘‘மயா ஸகலஜம்பு³தீ³போ ஸமாத³பிதோ, யம் அத்தி², தம் க³ஹேத்வா கம்மம் நிட்டா²பேந்தூ’’தி. த்³வேபி பண்ணானி அந்தராமக்³கே³ ஸமாக³மிம்ஸு. ஆசரியஸ்ஸ பண்ணதோ பன சேதியட்டா²னதோ பண்ணம் பட²மதரம் ஆசரியஸ்ஸ ஹத்த²ம் அக³மாஸி. ஸோ பண்ணம் வாசேத்வா சேதியம் வந்தி³ஸ்ஸாமீதி ஏககோவ நிக்க²மி. அந்தராமக்³கே³ அடவியம் பஞ்ச சோரஸதானி உட்ட²ஹிம்ஸு. தத்ரேகச்சே தம் தி³ஸ்வா இமினா ஸகலஜம்பு³தீ³பதோ ஹிரஞ்ஞஸுவண்ணம் ஸம்பிண்டி³தம், நிதி⁴கும்பீ⁴ நோ பவட்டமானா ஆக³தாதி அவஸேஸானம் ஆரோசேத்வா தம் அக்³க³ஹேஸும். கஸ்மா தாதா, மம் க³ண்ஹதா²தி? தயா ஸகலஜம்பு³தீ³பதோ ஸப்³ப³ம் ஹிரஞ்ஞஸுவண்ணம் ஸம்பிண்டி³தம், அம்ஹாகம்பி தோ²கம் தோ²கம் தே³ஹீதி. கிம் தும்ஹே ந ஜானாத², கஸ்ஸபோ ப⁴க³வா பரினிப்³பு³தோ, தஸ்ஸ யோஜனிகம் ரதனசேதியம் கயிரதி, தத³த்தா²ய மயா ஸமாத³பிதம், நோ அத்தனோ அத்தா²ய. தம் தம் லத்³த⁴லத்³த⁴ட்டா²னதோ தத்தே²வ பேஸிதம், மய்ஹம் பன நிவத்த²ஸாடகமத்தம் ட²பேத்வா அஞ்ஞம் வித்தம் காகணிகம்பி நத்தீ²தி.

ஏகே, ‘‘ஏவமேதம் விஸ்ஸஜேத² ஆசரிய’’ந்தி ஆஹம்ஸு. ஏகே, ‘‘அயம் ராஜபூஜிதோ அமச்சபூஜிதோ, அம்ஹேஸு கஞ்சிதே³வ நக³ரவீதி²யம் தி³ஸ்வா ராஜராஜமஹாமத்தாதீ³னம் ஆரோசேத்வா அனயவ்யஸனம் பாபுணாபேய்யா’’தி ஆஹம்ஸு. உபாஸகோ, ‘‘தாதா, நாஹம் ஏவம் கரிஸ்ஸாமீ’’தி ஆஹ. தஞ்ச கோ² தேஸு காருஞ்ஞேன, ந அத்தனோ ஜீவிதனிகந்தியா. அத² தேஸு க³ஹேதப்³போ³ விஸ்ஸஜ்ஜேதப்³போ³தி விவத³ந்தேஸு க³ஹேதப்³போ³தி லத்³தி⁴கா ஏவ ப³ஹுதரா ஹுத்வா ஜீவிதா வோரோபயிம்ஸு.

தேஸம் ப³லவகு³ணே அரியஸாவகே அபராதே⁴ன நிப்³பு³ததீ³பஸிகா² விய அக்கீ²னி அந்தரதா⁴யிம்ஸு. தே, ‘‘கஹம் போ⁴ சக்கு², கஹம் போ⁴ சக்கூ²’’தி விப்பலபந்தா ஏகச்சே ஞாதகேஹி கே³ஹம் நீதா. ஏகச்சே நோஞாதகா அனாதா²தி தத்தே²வ அடவியம் ருக்க²மூலே பண்ணஸாலாயம் வஸிம்ஸு. அடவிம் ஆக³தமனுஸ்ஸா காருஞ்ஞேன தேஸம் தண்டு³லம் வா புடப⁴த்தம் வா பரிப்³ப³யம் வா தே³ந்தி. தா³ருபண்ணாதீ³னம் அத்தா²ய க³ந்த்வா ஆக³தா மனுஸ்ஸா குஹிம் க³தத்தா²தி வுத்தே அந்த⁴வனம் க³தம்ஹாதி வத³ந்தி. ஏவம் த்³வின்னம்பி பு³த்³தா⁴னம் காலே தம் வனம் அந்த⁴வனம்த்வேவ பஞ்ஞாயதி. கஸ்ஸபபு³த்³த⁴காலே பனேதம் ச²ட்³டி³தஜனபதே³ அடவி அஹோஸி. அம்ஹாகம் ப⁴க³வதோ காலே ஸாவத்தி²யா அவிதூ³ரே ஜேதவனஸ்ஸ பிட்டி²பா⁴கே³ பவிவேககாமானம் குலபுத்தானம் வஸனட்டா²னம் பதா⁴னக⁴ரம் அஹோஸி, தத்த² ஆயஸ்மா குமாரகஸ்ஸபோ தேன ஸமயேன ஸேக²படிபத³ம் பூரயமானோ விஹரதி. தேன வுத்தம் ‘‘அந்த⁴வனே விஹரதீ’’தி.

அஞ்ஞதரா தே³வதாதி நாமகோ³த்தவஸேன அபாகடா ஏகா தே³வதாதி அத்தோ². ‘‘அபி⁴ஜானாதி நோ, ப⁴ந்தே, ப⁴க³வா அஹுஞாதஞ்ஞதரஸ்ஸ மஹேஸக்க²ஸ்ஸ ஸம்கி²த்தேன தண்ஹாஸங்க²யவிமுத்திம் பா⁴ஸிதா’’தி (ம. நி. 1.365) ஏத்த² பன அபி⁴ஞ்ஞாதோ ஸக்கோபி தே³வராஜா அஞ்ஞதரோதி வுத்தோ. தே³வதாதி ச இத³ம் தே³வானம்பி தே³வதீ⁴தானம்பி ஸாதா⁴ரணவசனம். இமஸ்மிம் பனத்தே² தே³வோ அதி⁴ப்பேதோ. அபி⁴க்கந்தாய ரத்தியாதி ஏத்த² அபி⁴க்கந்தஸத்³தோ³ க²யஸுந்த³ராபி⁴ரூபஅப்³ப⁴னுமோத³னாதீ³ஸு தி³ஸ்ஸதி. தத்த² – ‘‘அபி⁴க்கந்தா, ப⁴ந்தே, ரத்தி, நிக்க²ந்தோ பட²மோ யாமோ, சிரனிஸின்னோ பி⁴க்கு²ஸங்கோ⁴, உத்³தி³ஸது, ப⁴ந்தே, ப⁴க³வா பி⁴க்கூ²னம் பாதிமோக்க²’’ந்தி ஏவமாதீ³ஸு (அ. நி. 8.20) க²யே தி³ஸ்ஸதி. ‘‘அயம் இமேஸம் சதுன்னம் புக்³க³லானம் அபி⁴க்கந்ததரோ ச பணீததரோ சா’’தி (அ. நி. 4.100) ஏவமாதீ³ஸு ஸுந்த³ரே.

‘‘கோ மே வந்த³தி பாதா³னி, இத்³தி⁴யா யஸஸா ஜலம்;

அபி⁴க்கந்தேன வண்ணேன, ஸப்³பா³ ஓபா⁴ஸயம் தி³ஸா’’தி. (வி. வ. 857) –

ஏவமாதீ³ஸு அபி⁴ரூபே. ‘‘அபி⁴க்கந்தம், போ⁴ கோ³தமா’’தி ஏவமாதீ³ஸு (பாரா. 15) அப்³ப⁴னுமோத³னே. இத⁴ பன க²யே. தேன அபி⁴க்கந்தாய ரத்தியாதி பரிக்கீ²ணாய ரத்தியாதி வுத்தம் ஹோதி. தத்தா²யம் தே³வபுத்தோ மஜ்ஜி²மயாமஸமனந்தரே ஆக³தோதி வேதி³தப்³போ³. அபி⁴க்கந்தவண்ணாதி இத⁴ அபி⁴க்கந்தஸத்³தோ³ அபி⁴ரூபே. வண்ணஸத்³தோ³ பன ச²வி-து²தி-குலவக்³க³காரண-ஸண்டா²னபமாணரூபாயதனாதீ³ஸு தி³ஸ்ஸதி. தத்த², ‘‘ஸுவண்ணவண்ணோஸி ப⁴க³வா’’தி ஏவமாதீ³ஸு ச²வியா. ‘‘கதா³ ஸஞ்ஞூள்ஹா பன தே க³ஹபதி ஸமணஸ்ஸ கோ³தமஸ்ஸ வண்ணா’’தி (ம. நி. 2.77) ஏவமாதீ³ஸு து²தியம். ‘‘சத்தாரோமே, போ⁴ கோ³தம, வண்ணா’’தி ஏவமாதீ³ஸு (தீ³. நி. 3.115) குலவக்³கே³. ‘‘அத² கேன நு வண்ணேன, க³ந்த⁴தே²னோதி வுச்சதீ’’தி ஏவமாதீ³ஸு (ஸம். நி. 1.234) காரணே. ‘‘மஹந்தம் ஹத்தி²ராஜவண்ணம் அபி⁴னிம்மினித்வா’’தி ஏவமாதீ³ஸு (ஸம். நி. 1.138) ஸண்டா²னே. ‘‘தயோ பத்தஸ்ஸ வண்ணா’’தி ஏவமாதீ³ஸு (பாரா. 602) பமாணே. ‘‘வண்ணோ க³ந்தோ⁴ ரஸோ ஓஜா’’தி ஏவமாதீ³ஸு ரூபாயதனே. ஸோ இத⁴ ச²வியம் த³ட்ட²ப்³போ³. தேன அபி⁴க்கந்தவண்ணாதி அபி⁴ரூபச²விஇட்ட²வண்ணா, மனாபவண்ணாதி வுத்தம் ஹோதி. தே³வதா ஹி மனுஸ்ஸலோகம் ஆக³ச்ச²மானா பகதிவண்ணம் பகதிஇத்³தி⁴ம் பஜஹித்வா ஓளாரிகம் அத்தபா⁴வம் கத்வா அதிரேகவண்ணம் அதிரேகஇத்³தி⁴ம் மாபேத்வா நடஸமஜ்ஜாதீ³னி க³ச்ச²ந்தா மனுஸ்ஸா விய அபி⁴ஸங்க²தேன காயேன ஆக³ச்ச²ந்தி. அயம்பி தே³வபுத்தோ ததே²வ ஆக³தோ. தேன வுத்தம் ‘‘அபி⁴க்கந்தவண்ணா’’தி.

கேவலகப்பந்தி ஏத்த² கேவலஸத்³தோ³ அனவஸேஸ-யேபூ⁴ய்ய-அப்³யாமிஸ்ஸானதிரேகத³ள்ஹத்த²-விஸம்யோகா³தி³அனேகத்தோ². ததா² ஹிஸ்ஸ, ‘‘கேவலபரிபுண்ணம் பரிஸுத்³த⁴ம் ப்³ரஹ்மசரிய’’ந்தி (பாரா. 1) ஏவமாதீ³ஸு அனவஸேஸத்தமத்தோ². ‘‘கேவலகப்பா ச அங்க³மக³தா⁴ பஹூதம் கா²த³னீயம் போ⁴ஜனீயம் ஆதா³ய உபஸங்கமிஸ்ஸந்தீ’’தி ஏவமாதீ³ஸு யேபு⁴ய்யதா. ‘‘கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதீ’’தி (விப⁴. 225) ஏவமாதீ³ஸு அப்³யாமிஸ்ஸதா. ‘‘கேவலம் ஸத்³தா⁴மத்தகம் நூன அயமாயஸ்மா’’தி (மஹாவ. 244) ஏவமாதீ³ஸு அனதிரேகதா. ‘‘ஆயஸ்மதோ அனுருத்³த⁴ஸ்ஸ பா³ஹியோ நாம ஸத்³தி⁴விஹாரிகோ கேவலகப்பம் ஸங்க⁴பே⁴தா³ய டி²தோ’’தி (அ. நி. 4.243) ஏவமாதீ³ஸு த³ள்ஹத்த²தா. ‘‘கேவலீ வுஸிதவா உத்தமபுரிஸோதி வுச்சதீ’’தி (ஸம். நி. 3.57) ஏவமாதீ³ஸு விஸம்யோகோ³. இத⁴ பனஸ்ஸ அனவஸேஸத்தமத்தோ²தி அதி⁴ப்பேதோ.

கப்பஸத்³தோ³ பனாயம் அபி⁴ஸத்³த³ஹன-வோஹார-கால-பஞ்ஞத்தி- சே²த³ன-விகப்ப-லேஸ-ஸமந்தபா⁴வாதி³-அனேகத்தோ². ததா² ஹிஸ்ஸ, ‘‘ஓகப்பனியமேதம் போ⁴தோ கோ³தமஸ்ஸ, யதா² தம் அரஹதோ ஸம்மாஸம்பு³த்³த⁴ஸ்ஸா’’தி (ம. நி. 1.387) ஏவமாதீ³ஸு அபி⁴ஸத்³த³ஹனமத்தோ². ‘‘அனுஜானாமி, பி⁴க்க²வே, பஞ்சஹி ஸமணகப்பேஹி ப²லம் பரிபு⁴ஞ்ஜிது’’ந்தி (சூளவ. 250) ஏவமாதீ³ஸு வோஹாரோ. ‘‘யேன ஸுத³ம் நிச்சகப்பம் விஹராமீ’’தி ஏவமாதீ³ஸு (ம. நி. 1.387) காலோ. ‘‘இச்சாயஸ்மா கப்போ’’தி (ஸம். நி. 3.124) ஏவமாதீ³ஸு பஞ்ஞத்தி. ‘‘அலங்கதா கப்பிதகேஸமஸ்ஸூ’’தி (ஸம். நி. 4.365) ஏவமாதீ³ஸு சே²த³னம். ‘‘கப்பதி த்³வங்கு³லகப்போ’’தி (சூளவ. 446) ஏவமாதீ³ஸு விகப்போ. ‘‘அத்தி² கப்போ நிபஜ்ஜிது’’ந்தி (அ. நி. 8.80) ஏவமாதீ³ஸு லேஸோ. ‘‘கேவலகப்பம் வேளுவனம் ஓபா⁴ஸேத்வா’’தி (ஸம். நி. 1.94) ஏவமாதீ³ஸு ஸமந்தபா⁴வோ. இத⁴ பனஸ்ஸ ஸமந்தபா⁴வோ அத்தோ² அதி⁴ப்பேதோ. தஸ்மா கேவலகப்பம் அந்த⁴வனந்தி ஏத்த² அனவஸேஸம் ஸமந்ததோ அந்த⁴வனந்தி ஏவமத்தோ² த³ட்ட²ப்³போ³.

ஓபா⁴ஸேத்வாதி வத்தா²லங்காரஸரீரஸமுட்டி²தாய ஆபா⁴ய ப²ரித்வா, சந்தி³மா விய ச ஸூரியோ விய ச ஏகோபா⁴ஸம் ஏகபஜ்ஜோதம் கரித்வாதி அத்தோ². ஏகமந்தம் அட்டா²ஸீதி ஏகஸ்மிம் அந்தே, ஏகஸ்மிம் ஓகாஸே அட்டா²ஸி. ஏதத³வோசாதி ஏதம் ‘‘பி⁴க்கு² பி⁴க்கூ²’’திஆதி³வசனமவோச. கஸ்மா பனாயம் அவந்தி³த்வா ஸமணவோஹாரேனேவ கதே²தீதி? ஸமணஸஞ்ஞாஸமுதா³சாரேனேவ. ஏவம் கிரஸ்ஸ அஹோஸி – ‘‘அயம் அந்தரா காமாவசரே வஸி. அஹம் பன அஸ்மி ததோ காலதோ பட்டா²ய ப்³ரஹ்மசாரீ’’தி ஸமணஸஞ்ஞாவஸ்ஸ ஸமுதா³சரதி, தஸ்மா அவந்தி³த்வா ஸமணவோஹாரேனேவ கதே²தி. புப்³ப³ஸஹாயோ கிரேஸோ தே³வபுத்தோ தே²ரஸ்ஸ. குதோ பட்டா²யாதி? கஸ்ஸபஸம்மாஸம்பு³த்³த⁴காலதோ பட்டா²ய. யோ ஹி புப்³ப³யோகே³ ஆக³தேஸு பஞ்சஸு ஸஹாயேஸு அனுதே²ரோ சதுத்த²தி³வஸே அனாகா³மீ அஹோஸீதி வுத்தோ, அயம் ஸோ. ததா³ கிர தேஸு ஸங்க⁴த்தே²ரஸ்ஸ அரஹத்தேனேவ ஸத்³தி⁴ம் அபி⁴ஞ்ஞா ஆக³மிம்ஸு. ஸோ, ‘‘மய்ஹம் கிச்சம் மத்த²கம் பத்த’’ந்தி வேஹாஸம் உப்பதித்வா அனோதத்தத³ஹே முக²ம் தோ⁴வித்வா உத்தரகுருதோ பிண்ட³பாதம் ஆதா³ய ஆக³ந்த்வா, ‘‘இமம், ஆவுஸோ, பிண்ட³பாதம் பு⁴ஞ்ஜித்வா அப்பமத்தா ஸமணத⁴ம்மம் கரோதா²’’தி ஆஹ. இதரே ஆஹம்ஸு – ‘‘ந, ஆவுஸோ, அம்ஹாகம் ஏவம் கதிகா அத்தி² – ‘யோ பட²மம் விஸேஸம் நிப்³ப³த்தேத்வா பிண்ட³பாதம் ஆஹரதி, தேனாப⁴தம் பு⁴ஞ்ஜித்வா ஸேஸேஹி ஸமணத⁴ம்மோ காதப்³போ³’தி. தும்ஹே அத்தனோ உபனிஸ்ஸயேன கிச்சம் மத்த²கம் பாபயித்த². மயம்பி ஸசே நோ உபனிஸ்ஸயோ ப⁴விஸ்ஸதி, கிச்சம் மத்த²கம் பாபேஸ்ஸாம. பபஞ்சோ ஏஸ அம்ஹாகம், க³ச்ச²த² தும்ஹே’’தி. ஸோ யதா²பா²ஸுகம் க³ந்த்வா ஆயுபரியோஸானே பரினிப்³பா³யி.

புனதி³வஸே அனுதே²ரோ அனாகா³மிப²லம் ஸச்ச²காஸி, தஸ்ஸ அபி⁴ஞ்ஞாயோ ஆக³மிம்ஸு. ஸோபி ததே²வ பிண்ட³பாதம் ஆஹரித்வா தேஹி படிக்கி²த்தோ யதா²பா²ஸுகம் க³ந்த்வா ஆயுபரியோஸானே ஸுத்³தா⁴வாஸே நிப்³ப³த்தி. ஸோ ஸுத்³தா⁴வாஸே ட²த்வா தே ஸஹாயே ஓலோகேந்தோ, ஏகோ ததா³வ பரினிப்³பு³தோ, ஏகோ அது⁴னா ப⁴க³வதோ ஸந்திகே அரியபூ⁴மிம் பத்தோ, ஏகோ லாப⁴ஸக்காரம் நிஸ்ஸாய, ‘‘அஹம் அரஹா’’தி சித்தம் உப்பாதே³த்வா ஸுப்பாரகபட்டனே வஸதீதி தி³ஸ்வா தம் உபஸங்கமித்வா, ‘‘ந த்வம் அரஹா, ந அரஹத்தமக்³க³ம் படிபன்னோ, க³ச்ச² ப⁴க³வந்தம் உபஸங்கமித்வா த⁴ம்மம் ஸுணாஹீ’’தி உய்யோஜேஸி. ஸோபி அந்தரக⁴ரே ப⁴க³வந்தம் ஓவாத³ம் யாசித்வா, ‘‘தஸ்மா திஹ தே பா³ஹிய ஏவம் ஸிக்கி²தப்³ப³ம் தி³ட்டே² தி³ட்ட²மத்தம் ஹோதூ’’தி (உதா³. 10) ப⁴க³வதா ஸம்கி²த்தேன ஓவதி³தோ அரியபூ⁴மிம் ஸம்பாபுணி.

ததோ அஞ்ஞோ ஏகோ அத்தி², ஸோ குஹிந்தி ஓலோகேந்தோ அந்த⁴வனே ஸேக்க²படிபத³ம் பூரயமானோ விஹரதீதி தி³ஸ்வா சிந்தேஸி – ‘‘ஸஹாயகஸ்ஸ ஸந்திகே க³மிஸ்ஸாமீதி, க³ச்ச²ந்தேன பன துச்ச²ஹத்தே²ன அக³ந்த்வா கிஞ்சி பண்ணாகாரம் க³ஹேத்வா க³ந்தும் வட்டதி, ஸஹாயோ கோ² பன மே நிராமிஸோ பப்³ப³தமத்த²கே வஸந்தோ மயா ஆகாஸே ட²த்வா தி³ன்னம் பிண்ட³பாதம்பி அபரிபு⁴ஞ்ஜித்வா ஸமணத⁴ம்மம் அகாஸி, இதா³னி ஆமிஸபண்ணாகாரம் கிம் க³ண்ஹிஸ்ஸதி? த⁴ம்மபண்ணாகாரம் க³ஹேத்வா க³மிஸ்ஸாமீ’’தி ப்³ரஹ்மலோகே டி²தோவ ரதனாவளிம் க³ந்தே²ந்தோ விய பன்னரஸ பஞ்ஹே விப⁴ஜித்வா தம் த⁴ம்மபண்ணாகாரம் ஆதா³ய ஆக³ந்த்வா ஸஹாயஸ்ஸ அவிதூ³ரே ட²த்வா அத்தனோ ஸமணஸஞ்ஞாஸமுதா³சாரவஸேன தம் அனபி⁴வாதே³த்வாவ, ‘‘பி⁴க்கு² பி⁴க்கூ²’’தி ஆலபித்வா அயம் வம்மிகோதிஆதி³மாஹ. தத்த² துரிதாலபனவஸேன பி⁴க்கு² பி⁴க்கூ²தி ஆமேடி³தம் வேதி³தப்³ப³ம். யதா² வா ஏகனேவ திலகேன நலாடம் ந ஸோப⁴தி, தம் பரிவாரேத்வா அஞ்ஞேஸுபி தி³ன்னேஸு பு²ல்லிதமண்டி³தம் விய ஸோப⁴தி, ஏவம் ஏகேனேவ பதே³ன வசனம் ந ஸோப⁴தி, பரிவாரிகபதே³ன ஸத்³தி⁴ம் பு²ல்லிதமண்டி³தம் விய ஸோப⁴தீதி தம் பரிவாரிகபத³வஸேன வசனம் பு²ல்லிதமண்டி³தம் விய கரோந்தோபி ஏவமாஹ.

அயம் வம்மிகோதி புரதோ டி²தோ வம்மிகோ நாம நத்தி², தே³ஸனாவஸேன பன புரதோ டி²தம் த³ஸ்ஸேந்தோ விய அயந்தி ஆஹ. லங்கி³ந்தி ஸத்த²ம் ஆதா³ய க²ணந்தோ பலிக⁴ம் அத்³த³ஸ. உக்கி²ப லங்கி³ம் அபி⁴க்க²ண ஸுமேதா⁴தி தாத, பண்டி³த, லங்கீ³ நாம ரத்திம் தூ⁴மாயதி தி³வா பஜ்ஜலதி. உக்கி²பேத பரம் பரதோ க²ணாதி. ஏவம் ஸப்³ப³பதே³ஸு அத்தோ² த³ட்ட²ப்³போ³. உத்³து⁴மாயிகந்தி மண்டூ³கம். சங்கவாரந்தி கா²ரபரிஸ்ஸாவனம். கும்மந்தி கச்ச²பம். அஸிஸூனந்தி மம்ஸச்சே²த³கம் அஸிஞ்சேவ அதி⁴குட்டனஞ்ச. மம்ஸபேஸிந்தி நிஸத³போதப்பமாணம் அல்லமம்ஸபிண்ட³ம். நாக³ந்தி ஸுமனபுப்ப²கலாபஸதி³ஸம் மஹாப²ணம் திவித⁴ஸோவத்தி²கபரிக்கி²த்தம் அஹினாக³ம் அத்³த³ஸ. மா நாக³ம் க⁴ட்டேஸீதி த³ண்ட³ககோடியா வா வல்லிகோடியா வா பம்ஸுசுண்ணம் வா பன கி²பமானோ மா நாக³ம் க⁴ட்டயி. நமோ கரோஹி நாக³ஸ்ஸாதி உபரிவாததோ அபக³ம்ம ஸுத்³த⁴வத்த²ம் நிவாஸேத்வா நாக³ஸ்ஸ நமக்காரம் கரோஹி. நாகே³ன அதி⁴ஸயிதம் த⁴னம் நாம யாவ ஸத்தமா குலபரிவட்டா கா²த³தோ ந கீ²யதி, நாகோ³ தே அதி⁴ஸயிதம் த⁴னம் த³ஸ்ஸதி, தஸ்மா நமோ கரோஹி நாக³ஸ்ஸாதி. இதோ வா பன ஸுத்வாதி யதா² து³க்க²க்க²ந்தே⁴ இதோதி ஸாஸனே நிஸ்ஸகம், ந ததா² இத⁴. இத⁴ பன தே³வபுத்தே நிஸ்ஸக்கம், தஸ்மா இதோ வா பனாதி மம வா பன ஸந்திகா ஸுத்வாதி அயமேத்த² அத்தோ².

251. சாதும்மஹாபூ⁴திகஸ்ஸாதி சதுமஹாபூ⁴தமயஸ்ஸ. காயஸ்ஸேதம் அதி⁴வசனந்தி ஸரீரஸ்ஸ நாமம். யதே²வ ஹி பா³ஹிரகோ வம்மிகோ, வமதீதி வந்தகோதி வந்துஸ்ஸயோதி வந்தஸினேஹஸம்ப³ந்தோ⁴தி சதூஹி காரணேஹி வம்மிகோதி வுச்சதி. ஸோ ஹி அஹிமங்கு³ஸஉந்தூ³ரக⁴ரகோ³ளிகாத³யோ நானப்பகாரே பாணகே வமதீதி வம்மிகோ. உபசிகாஹி வந்தகோதி வம்மிகோ. உபசிகாஹி வமித்வா முக²துண்ட³கேன உக்கி²த்தபம்ஸுசுண்ணேன கடிப்பமாணேனபி போரிஸப்பமாணேனபி உஸ்ஸிதோதி வம்மிகோ. உபசிகாஹி வந்தகே²ளஸினேஹேன ஆப³த்³த⁴தாய ஸத்தஸத்தாஹம் தே³வே வஸ்ஸந்தேபி ந விப்பகிரியதி, நிதா³கே⁴பி ததோ பம்ஸுமுட்டி²ம் க³ஹேத்வா தஸ்மிம் முட்டி²னா பீளியமானே ஸினேஹோ நிக்க²மதி, ஏவம் வந்தஸினேஹேன ஸம்ப³த்³தோ⁴தி வம்மிகோ. ஏவமயம் காயோபி, ‘‘அக்கி²ம்ஹா அக்கி²கூ³த²கோ’’திஆதி³னா நயேன நானப்பகாரகம் அஸுசிகலிமலம் வமதீதி வம்மிகோ. பு³த்³த⁴பச்சேகபு³த்³த⁴கீ²ணாஸவா இமஸ்மிம் அத்தபா⁴வே நிகந்திபரியாதா³னேன அத்தபா⁴வம் ச²ட்³டே³த்வா க³தாதி அரியேஹி வந்தகோதிபி வம்மிகோ. யேஹி சாயம் தீஹி அட்டி²ஸதேஹி உஸ்ஸிதோ ந்ஹாருஸம்ப³த்³தோ⁴ மம்ஸாவலேபனோ அல்லசம்மபரியோனத்³தோ⁴ ச²விரஞ்ஜிதோ ஸத்தே வஞ்சேதி, தம் ஸப்³ப³ம் அரியேஹி வந்தமேவாதி வந்துஸ்ஸயோதிபி வம்மிகோ. ‘‘தண்ஹா ஜனேதி புரிஸம், சித்தமஸ்ஸ விதா⁴வதீ’’தி (ஸம். நி. 1.55) ஏவம் தண்ஹாய ஜனிதத்தா அரியேஹி வந்தேனேவ தண்ஹாஸினேஹேன ஸம்ப³த்³தோ⁴ அயந்தி வந்தஸினேஹேன ஸம்ப³த்³தோ⁴திபி வம்மிகோ. யதா² ச வம்மிகஸ்ஸ அந்தோ நானப்பகாரா பாணகா தத்தே²வ ஜாயந்தி, உச்சாரபஸ்ஸாவம் கரோந்தி, கி³லானா ஸயந்தி, மதா பதந்தி. இதி ஸோ தேஸம் ஸூதிக⁴ரம் வச்சகுடி கி³லானஸாலா ஸுஸானஞ்ச ஹோதி. ஏவம் க²த்தியமஹாஸாலாதீ³னம்பி காயோ அயம் கோ³பிதரக்கி²தோ மண்டி³தப்பஸாதி⁴தோ மஹானுபா⁴வானம் காயோதி அசிந்தேத்வா ச²வினிஸ்ஸிதா பாணா சம்மனிஸ்ஸிதா பாணா மம்ஸனிஸ்ஸிதா பாணா ந்ஹாருனிஸ்ஸிதா பாணா அட்டி²னிஸ்ஸிதா பாணா அட்டி²மிஞ்ஜனிஸ்ஸிதா பாணாதி ஏவம் குலக³ணனாய அஸீதிமத்தானி கிமிகுலஸஹஸ்ஸானி அந்தோகாயஸ்மிம்யேவ ஜாயந்தி, உச்சாரபஸ்ஸாவம் கரோந்தி, கே³லஞ்ஞேன ஆதுரிதானி ஸயந்தி, மதானி பதந்தி, இதி அயம்பி தேஸம் பாணானம் ஸூதிக⁴ரம் வச்சகுடி கி³லானஸாலா ஸுஸானஞ்ச ஹோதீதி ‘‘வம்மிகோ’’ த்வேவ ஸங்க²ம் க³தோ. தேனாஹ ப⁴க³வா – ‘‘வம்மிகோதி கோ², பி⁴க்கு², இமஸ்ஸ சாதுமஹாபூ⁴திகஸ்ஸ காயஸ்ஸேதம் அதி⁴வசன’’ந்தி.

மாதாபேத்திகஸம்ப⁴வஸ்ஸாதி மாதிதோ ச பிதிதோ ச நிப்³ப³த்தேன மாதாபேத்திகேன ஸுக்கஸோணிதேன ஸம்பூ⁴தஸ்ஸ. ஓத³னகும்மாஸூபசயஸ்ஸாதி ஓத³னேன சேவ கும்மாஸேன ச உபசிதஸ்ஸ வட்³டி⁴தஸ்ஸ. அனிச்சுச்சா²த³னபரிமத்³த³னபே⁴த³னவித்³த⁴ம்ஸனத⁴ம்மஸ்ஸாதி ஏத்த² அயம் காயோ ஹுத்வா அபா⁴வட்டே²ன அனிச்சத⁴ம்மோ. து³க்³க³ந்த⁴விகா⁴தத்தா²ய தனுவிலேபனேன உச்சா²த³னத⁴ம்மோ. அங்க³பச்சங்கா³பா³த⁴வினோத³னத்தா²ய கு²த்³த³கஸம்பா³ஹனேன பரிமத்³த³னத⁴ம்மோ. த³ஹரகாலே வா ஊரூஸு ஸயாபேத்வா க³ப்³ப⁴வாஸேன து³ஸ்ஸண்டி²தானம் தேஸம் தேஸம் அங்கா³னம் ஸண்டா²னஸம்பாத³னத்த²ம் அஞ்ச²னபீளனாதி³வஸேன பரிமத்³த³னத⁴ம்மோ. ஏவம் பரிஹரதோபி ச பே⁴த³னவித்³த⁴ம்ஸனத⁴ம்மோ பி⁴ஜ்ஜதி சேவ விகிரதி ச, ஏவம் ஸபா⁴வோதி அத்தோ². தத்த² மாதாபேத்திகஸம்ப⁴வஓத³னகும்மாஸூபசயஉச்சா²த³னபரிமத்³த³னபதே³ஹி ஸமுத³யோ கதி²தோ, அனிச்சபே⁴த³வித்³த⁴ம்ஸனபதே³ஹி அத்த²ங்க³மோ. ஏவம் ஸத்தஹிபி பதே³ஹி சாதுமஹாபூ⁴திகஸ்ஸ காயஸ்ஸ உச்சாவசபா⁴வோ வட்³டி⁴பரிஹானி ஸமுத³யத்த²ங்க³மோ கதி²தோதி வேதி³தப்³போ³.

தி³வா கம்மந்தேதி தி³வா கத்தப்³ப³கம்மந்தே. தூ⁴மாயனாதி ஏத்த² அயம் தூ⁴மஸத்³தோ³ கோதே⁴ தண்ஹாய விதக்கே பஞ்சஸு காமகு³ணேஸு த⁴ம்மதே³ஸனாய பகதிதூ⁴மேதி இமேஸு அத்தே²ஸு வத்ததி. ‘‘கோதோ⁴ தூ⁴மோ ப⁴ஸ்மனிமோஸவஜ்ஜ’’ந்தி (ஸம். நி. 1.165) ஏத்த² ஹி கோதே⁴ வத்ததி. ‘‘இச்சா²தூ⁴மாயிதா ஸத்தா’’தி ஏத்த² தண்ஹாய. ‘‘தேன கோ² பன ஸமயேன அஞ்ஞதரோ பி⁴க்கு² ப⁴க³வதோ அவிதூ³ரே தூ⁴மாயந்தோ நிஸின்னோ ஹோதீ’’தி ஏத்த² விதக்கே.

‘‘பங்கோ ச காமா பலிபோ ச காமா,

ப⁴யஞ்ச மேதம் திமூலம் பவுத்தம்;

ரஜோ ச தூ⁴மோ ச மயா பகாஸிதா;

ஹித்வா துவம் பப்³ப³ஜ ப்³ரஹ்மத³த்தா’’தி. (ஜா. 1.6.14) –

ஏத்த² பஞ்சகாமகு³ணேஸு. ‘‘தூ⁴மம் கத்தா ஹோதீ’’தி (ம. நி. 1.349) ஏத்த² த⁴ம்மதே³ஸனாய. ‘‘த⁴ஜோ ரத²ஸ்ஸ பஞ்ஞாணம், தூ⁴மோ பஞ்ஞாணமக்³கி³னோ’’தி (ஸம். நி. 1.72) ஏத்த² பகதிதூ⁴மே. இத⁴ பனாயம் விதக்கே அதி⁴ப்பேதோ. தேனாஹ ‘‘அயம் ரத்திம் தூ⁴மாயனா’’தி.

ததா²க³தஸ்ஸேதம் அதி⁴வசனந்தி ததா²க³தோ ஹி ஸத்தன்னம் த⁴ம்மானம் பா³ஹிதத்தா ப்³ராஹ்மணோ நாம. யதா²ஹ – ‘‘ஸத்தன்னம் கோ², பி⁴க்கு², த⁴ம்மானம் பா³ஹிதத்தா ப்³ராஹ்மணோ. கதமேஸம் ஸத்தன்னம்? ராகோ³ பா³ஹிதோ ஹோதி, தோ³ஸோ… மோஹோ… மானோ… ஸக்காயதி³ட்டி²… விசிகிச்சா²… ஸீலப்³ப³தபராமாஸோ பா³ஹிதோ ஹோதி. இமேஸம் பி⁴க்கு² ஸத்தன்னம் த⁴ம்மானம் பா³ஹிதத்தா ப்³ராஹ்மணோ’’தி (சூளனி. மேத்தகூ³மாணவபுச்சா²னித்³தே³ஸ 28). ஸுமேதோ⁴தி ஸுந்த³ரபஞ்ஞோ. ஸேக்க²ஸ்ஸாதி ஏத்த² ஸிக்க²தீதி ஸேக்கோ². யதா²ஹ – ‘‘ஸிக்க²தீதி கோ², பி⁴க்கு², தஸ்மா ஸேக்கோ²தி வுச்சதி. கிஞ்ச ஸிக்க²தி? அதி⁴ஸீலம்பி ஸிக்க²தி, அதி⁴சித்தம்பி ஸிக்க²தி, அதி⁴பஞ்ஞம்பி ஸிக்க²தீ’’தி (அ. நி. 3.86).

பஞ்ஞாய அதி⁴வசனந்தி லோகியலோகுத்தராய பஞ்ஞாய ஏதம் அதி⁴வசனம், ந ஆவுத⁴ஸத்த²ஸ்ஸ. வீரியாரம்ப⁴ஸ்ஸாதி காயிகசேதஸிகவீரியஸ்ஸ. தம் பஞ்ஞாக³திகமேவ ஹோதி. லோகியாய பஞ்ஞாய லோகியம், லோகுத்தராய பஞ்ஞாய லோகுத்தரம். ஏத்த² பனாயம் அத்த²தீ³பனா –

ஏகோ கிர ஜானபதோ³ ப்³ராஹ்மணோ பாதோவ மாணவகேஹி ஸத்³தி⁴ம் கா³மதோ நிக்க²ம்ம தி³வஸம் அரஞ்ஞே மந்தே வாசேத்வா ஸாயம் கா³மம் ஆக³ச்ச²தி. அந்தராமக்³கே³ ச ஏகோ வம்மிகோ அத்தி². ஸோ ரத்திம் தூ⁴மாயதி, தி³வா பஜ்ஜலதி. ப்³ராஹ்மணோ அந்தேவாஸிம் ஸுமேத⁴ம் மாணவம் ஆஹ – ‘‘தாத, அயம் வம்மிகோ ரத்திம் தூ⁴மாயதி, தி³வா பஜ்ஜலதி, விகாரமஸ்ஸ பஸ்ஸிஸ்ஸாம, பி⁴ந்தி³த்வா நம் சத்தாரோ கோட்டா²ஸே கத்வா கி²பாஹீ’’தி. ஸோ ஸாதூ⁴தி குதா³லம் க³ஹேத்வா ஸமேஹி பாதே³ஹி பத²வியம் பதிட்டா²ய ததா² அகாஸி. தத்ர ஆசரியப்³ராஹ்மணோ விய ப⁴க³வா. ஸுமேத⁴மாணவகோ விய ஸேக்கோ² பி⁴க்கு². வம்மிகோ விய காயோ. ‘‘தாத, அயம் வம்மிகோ ரத்திம் தூ⁴மாயதி, தி³வா பஜ்ஜலதி, விகாரமஸ்ஸ பஸ்ஸிஸ்ஸாம, பி⁴ந்தி³த்வா நம் சத்தாரோ கோட்டா²ஸே கத்வா கி²பாஹீ’’தி ப்³ராஹ்மணேன வுத்தகாலோ விய, ‘‘பி⁴க்கு² சாதுமஹாபூ⁴திகம் காயம் சத்தாரோ கோட்டா²ஸே கத்வா பரிக்³க³ண்ஹாஹீ’’தி ப⁴க³வதா வுத்தகாலோ. தஸ்ஸ ஸாதூ⁴தி குதா³லம் க³ஹேத்வா ததா²கரணம் விய ஸேக்க²ஸ்ஸ பி⁴க்கு²னோ, ‘‘யோ வீஸதியா கோட்டா²ஸேஸு த²த்³த⁴பா⁴வோ, அயம் பத²வீதா⁴து. யோ த்³வாத³ஸஸு கோட்டா²ஸேஸு ஆப³ந்த⁴னபா⁴வோ, அயம் ஆபோதா⁴து. யோ சதூஸு கோட்டா²ஸேஸு பரிபாசனபா⁴வோ, அயம் தேஜோதா⁴து. யோ ச²ஸு கோட்டா²ஸேஸு வித்த²ம்ப⁴னபா⁴வோ, அயம் வாயோதா⁴தூ’’தி ஏவம் சதுதா⁴துவவத்தா²னவஸேன காயபரிக்³க³ஹோ வேதி³தப்³போ³.

லங்கீ³தி கோ², பி⁴க்கூ²தி கஸ்மா ப⁴க³வா அவிஜ்ஜம் லங்கீ³தி கத்வா த³ஸ்ஸேஸீதி? யதா² ஹி நக³ரஸ்ஸ த்³வாரம் பிதா⁴ய பலிகே⁴ யோஜிதே மஹாஜனஸ்ஸ க³மனம் பச்சி²ஜ்ஜதி, யே நக³ரஸ்ஸ அந்தோ, தே அந்தோயேவ ஹோந்தி. யே ப³ஹி, தே ப³ஹியேவ. ஏவமேவ யஸ்ஸ ஞாணமுகே² அவிஜ்ஜாலங்கீ³ பததி, தஸ்ஸ நிப்³பா³னஸம்பாபகம் ஞாணக³மனம் பச்சி²ஜ்ஜதி, தஸ்மா அவிஜ்ஜம் லங்கீ³தி கத்வா த³ஸ்ஸேஸி. பஜஹ அவிஜ்ஜந்தி ஏத்த² கம்மட்டா²னஉக்³க³ஹபரிபுச்சா²வஸேன அவிஜ்ஜாபஹானம் கதி²தம்.

உத்³து⁴மாயிகாதி கோ², பி⁴க்கூ²தி ஏத்த² உத்³து⁴மாயிகமண்டூ³கோ நாம நோ மஹந்தோ, நக²பிட்டி²ப்பமாணோ ஹோதி, புராணபண்ணந்தரே வா க³ச்ச²ந்தரே வா வல்லிஅந்தரே வா வஸதி. ஸோ த³ண்ட³கோடியா வா வல்லிகோடியா வா பம்ஸுசுண்ணகேன வா க⁴ட்டிதோ ஆயமித்வா மஹந்தோ பரிமண்ட³லோ பே³லுவபக்கப்பமாணோ ஹுத்வா சத்தாரோ பாதே³ ஆகாஸக³தே கத்வா பச்சி²ன்னக³மனோ ஹுத்வா அமித்தவஸம் யாதி, காககுலலாதி³ப⁴த்தமேவ ஹோதி. ஏவமேவ அயம் கோதோ⁴ பட²மம் உப்பஜ்ஜந்தோ சித்தாவிலமத்தகோவ ஹோதி. தஸ்மிம் க²ணே அனிக்³க³ஹிதோ வட்³டி⁴த்வா முக²விகுலனம் பாபேதி. ததா³ அனிக்³க³ஹிதோ ஹனுஸஞ்சோபனம் பாபேதி. ததா³ அனிக்³க³ஹிதோ ப²ருஸவாசானிச்சா²ரணம் பாபேதி. ததா³ அனிக்³க³ஹிதோ தி³ஸாவிலோகனம் பாபேதி. ததா³ அனிக்³க³ஹிதோ ஆகட்³ட⁴னபரிகட்³ட⁴னம் பாபேதி. ததா³ அனிக்³க³ஹிதோ பாணினா லேட்³டு³த³ண்ட³ஸத்த²பராமஸனம் பாபேதி. ததா³ அனிக்³க³ஹிதோ த³ண்ட³ஸத்தா²பி⁴னிபாதம் பாபேதி. ததா³ அனிக்³க³ஹிதோ பரகா⁴தனம்பி அத்தகா⁴தனம்பி பாபேதி. வுத்தம்பி ஹேதம் – ‘‘யதோ அயம் கோதோ⁴ பரம் கா⁴தேத்வா அத்தானம் கா⁴தேதி, ஏத்தாவதாயம் கோதோ⁴ பரமுஸ்ஸத³க³தோ ஹோதி பரமவேபுல்லப்பத்தோ’’தி. தத்த² யதா² உத்³து⁴மாயிகாய சதூஸு பாதே³ஸு ஆகாஸக³தேஸு க³மனம் பச்சி²ஜ்ஜதி, உத்³து⁴மாயிகா அமித்தவஸம் க³ந்த்வா காகாதி³ப⁴த்தம் ஹோதி, ஏவமேவ கோத⁴ஸமங்கீ³புக்³க³லோ கம்மட்டா²னம் க³ஹேத்வா வட்³டே⁴தும் ந ஸக்கோதி, அமித்தவஸம் யாதி, ஸப்³பே³ஸம் மாரானம் யதா²காமகரணீயோ ஹோதி. தேனாஹ ப⁴க³வா – ‘‘உத்³து⁴மாயிகாதி கோ², பி⁴க்கு², கோதூ⁴பாயாஸஸ்ஸேதம் அதி⁴வசன’’ந்தி. தத்த² ப³லவப்பத்தோ கோதோ⁴வ கோதூ⁴பாயாஸோ. பஜஹ கோதூ⁴பாயாஸந்தி ஏத்த² படிஸங்கா²னப்பஹானம் கதி²தம்.

த்³விதா⁴பதோ²தி ஏத்த², யதா² புரிஸோ ஸத⁴னோ ஸபோ⁴கோ³ கந்தாரத்³தா⁴னமக்³க³ப்படிபன்னோ த்³வேதா⁴பத²ம் பத்வா, ‘‘இமினா நு கோ² க³ந்தப்³ப³ம், இமினா க³ந்தப்³ப³’’ந்தி நிச்சே²தும் அஸக்கோந்தோ தத்தே²வ திட்ட²தி, அத² நம் சோரா உட்ட²ஹித்வா அனயப்³யஸனம் பாபேந்தி, ஏவமேவ கோ² மூலகம்மட்டா²னம் க³ஹேத்வா நிஸின்னோ பி⁴க்கு² பு³த்³தா⁴தீ³ஸு கங்கா²ய உப்பன்னாய கம்மட்டா²னம் வட்³டே⁴தும் ந ஸக்கோதி, அத² நம் கிலேஸமாராத³யோ ஸப்³பே³ மாரா அனயப்³யஸனம் பாபேந்தி, இதி விசிகிச்சா² த்³வேதா⁴பத²ஸமா ஹோதி. தேனாஹ ப⁴க³வா – ‘‘த்³விதா⁴பதோ²தி கோ², பி⁴க்கு², விசிகிச்சா²யேதம் அதி⁴வசன’’ந்தி. பஜஹ விசிகிச்ச²ந்தி ஏத்த² கம்மட்டா²னஉக்³க³ஹபரிபுச்சா²வஸேன விசிகிச்சா²பஹானம் கதி²தம்.

சங்க³வாரந்தி ஏத்த², யதா² ரஜகேஹி கா²ரபரிஸ்ஸாவனம்ஹி உத³கே பக்கி²த்தே ஏகோ உத³கக⁴டோ த்³வேபி த³ஸபி வீஸதிபி க⁴டஸதம்பி பக்³க⁴ரதியேவ, பஸடமத்தம்பி உத³கம் ந திட்ட²தி, ஏவமேவ நீவரணஸமங்கி³னோ புக்³க³லஸ்ஸ அப்³ப⁴ந்தரே குஸலத⁴ம்மோ ந திட்ட²தி. தேனாஹ ப⁴க³வா – ‘‘சங்க³வாரந்தி கோ², பி⁴க்கு², பஞ்சன்னேதம் நீவரணானம் அதி⁴வசன’’ந்தி. பஜஹ பஞ்சனீவரணேதி ஏத்த² விக்க²ம்ப⁴னதத³ங்க³வஸேன நீவரணப்பஹானம் கதி²தம்.

கும்மோதி ஏத்த², யதா² கச்ச²பஸ்ஸ சத்தாரோ பாதா³ ஸீஸந்தி பஞ்சேவ அங்கா³னி ஹோந்தி, ஏவமேவ ஸப்³பே³பி ஸங்க²தா த⁴ம்மா க³ய்ஹமானா பஞ்சேவ க²ந்தா⁴ ப⁴வந்தி. தேனாஹ ப⁴க³வா – ‘‘கும்மோதி கோ², பி⁴க்கு², பஞ்சன்னேதம் உபாதா³னக்க²ந்தா⁴னம் அதி⁴வசன’’ந்தி. பஜஹ பஞ்சுபாதா³னக்க²ந்தே⁴தி ஏத்த² பஞ்சஸு க²ந்தே⁴ஸு ச²ந்த³ராக³ப்பஹானம் கதி²தம்.

அஸிஸூனாதி ஏத்த², யதா² ஸூனாய உபரி மம்ஸம் ட²பேத்வா அஸினா கோட்டேந்தி, ஏவமிமே ஸத்தா வத்து²காமத்தா²ய கிலேஸகாமேஹி கா⁴தயமானா வத்து²காமானம் உபரி கத்வா கிலேஸகாமேஹி கந்திதா கோட்டிதா ச ஹோந்தி. தேனாஹ ப⁴க³வா – ‘‘அஸிஸூனாதி கோ², பி⁴க்கு², பஞ்சன்னேதம் காமகு³ணானம் அதி⁴வசன’’ந்தி. பஜஹ பஞ்ச காமகு³ணேதி ஏத்த² பஞ்சஸு காமகு³ணேஸு ச²ந்த³ராக³ப்பஹானம் கதி²தம்.

மம்ஸபேஸீதி கோ², பி⁴க்கூ²தி ஏத்த² அயம் மம்ஸபேஸி நாம ப³ஹுஜனபத்தி²தா க²த்தியாத³யோ மனுஸ்ஸாபி நம் பத்தே²ந்தி காகாத³யோ திரச்சா²னாபி. இமே ஹி ஸத்தா அவிஜ்ஜாய ஸம்மத்தா நந்தி³ராக³ம் உபக³ம்ம வட்டம் வட்³டே⁴ந்தி. யதா² வா மம்ஸபேஸி ட²பிதட²பிதட்டா²னே லக்³க³தி, ஏவமிமே ஸத்தா நந்தி³ராக³ப³த்³தா⁴ வட்டே லக்³க³ந்தி, து³க்க²ம் பத்வாபி ந உக்கண்ட²ந்தி, இதி நந்தி³ராகோ³ மம்ஸபேஸிஸதி³ஸோ ஹோதி. தேனாஹ ப⁴க³வா – ‘‘மம்ஸபேஸீதி கோ², பி⁴க்கு², நந்தி³ராக³ஸ்ஸேதம் அதி⁴வசன’’ந்தி. பஜஹ நந்தீ³ராக³ந்தி ஏத்த² சதுத்த²மக்³கே³ன நந்தீ³ராக³ப்பஹானம் கதி²தம்.

நாகோ³தி கோ², பி⁴க்கு², கீ²ணாஸவஸ்ஸேதம் பி⁴க்கு²னோ அதி⁴வசனந்தி ஏத்த² யேனத்தே²ன கீ²ணாஸவோ நாகோ³தி வுச்சதி, ஸோ அனங்க³ணஸுத்தே (ம. நி. அட்ட². 1.63) பகாஸிதோ ஏவ. நமோ கரோஹி நாக³ஸ்ஸாதி கீ²ணாஸவஸ்ஸ பு³த்³த⁴னாக³ஸ்ஸ, ‘‘பு³த்³தோ⁴ ஸோ ப⁴க³வா போ³தா⁴ய த⁴ம்மம் தே³ஸேதி, த³ந்தோ ஸோ ப⁴க³வா த³மதா²ய த⁴ம்மம் தே³ஸேதி, ஸந்தோ ஸோ ப⁴க³வா ஸமதா²ய த⁴ம்மம் தே³ஸேதி, திண்ணோ ஸோ ப⁴க³வா தரணாய த⁴ம்மம் தே³ஸேதி, பரினிப்³பு³தோ ஸோ ப⁴க³வா பரினிப்³பா³னாய த⁴ம்மம் தே³ஸேதீ’’தி (ம. நி. 1.361) ஏவம் நமக்காரம் கரோஹீதி அயமேத்த² அத்தோ². இதி இத³ம் ஸுத்தம் தே²ரஸ்ஸ கம்மட்டா²னம் அஹோஸி. தே²ரோபி இத³மேவ ஸுத்தம் கம்மட்டா²னம் கத்வா விபஸ்ஸனம் வட்³டே⁴த்வா அரஹத்தம் பத்தோ. அயமேதஸ்ஸ அத்தோ²தி அயம் ஏதஸ்ஸ பஞ்ஹஸ்ஸ அத்தோ². இதி ப⁴க³வா ரதனராஸிம்ஹி மணிகூடம் க³ண்ஹந்தோ விய யதா²னுஸந்தி⁴னாவ தே³ஸனம் நிட்ட²பேஸீதி.

பபஞ்சஸூத³னியா மஜ்ஜி²மனிகாயட்ட²கதா²ய

வம்மிகஸுத்தவண்ணனா நிட்டி²தா.