6. சேதோகி²லஸுத்தவண்ணனா

185. ஏவம் மே ஸுதந்தி சேதோகி²லஸுத்தம். தத்த² சேதோகி²லாதி சித்தஸ்ஸ த²த்³த⁴பா⁴வா கசவரபா⁴வா கா²ணுகபா⁴வா. சேதஸோ வினிப³ந்தா⁴தி சித்தம் ப³ந்தி⁴த்வா முட்டி²யம் கத்வா விய க³ண்ஹந்தீதி சேதஸோ வினிப³ந்தா⁴. வுத்³தி⁴ந்திஆதீ³ஸு ஸீலேன வுத்³தி⁴ம், மக்³கே³ன விருள்ஹிம், நிப்³பா³னேன வேபுல்லம். ஸீலஸமாதீ⁴ஹி வா வுத்³தி⁴ம், விபஸ்ஸனாமக்³கே³ஹி விருள்ஹிம், ப²லனிப்³பா³னேஹி வேபுல்லம். ஸத்த²ரி கங்க²தீதி ஸத்து² ஸரீரே வா கு³ணே வா கங்க²தி. ஸரீரே கங்க²மானோ த்³வத்திம்ஸவரலக்க²ணப்படிமண்டி³தம் நாம ஸரீரம் அத்தி² நு கோ² நத்தீ²தி கங்க²தி, கு³ணே கங்க²மானோ அதீதானாக³தபச்சுப்பன்னஜானனஸமத்த²ம் ஸப்³ப³ஞ்ஞுதஞ்ஞாணம் அத்தி² நு கோ² நத்தீ²தி கங்க²தி. விசிகிச்ச²தீதி விசினந்தோ கிச்ச²தி, து³க்க²ம் ஆபஜ்ஜதி, வினிச்சே²தும் ந ஸக்கோதி. நாதி⁴முச்சதீதி ஏவமேதந்தி அதி⁴மோக்க²ம் ந படிலப⁴தி. ந ஸம்பஸீத³தீதி கு³ணேஸு ஓதரித்வா நிப்³பி³சிகிச்ச²பா⁴வேன பஸீதி³தும், அனாவிலோ ப⁴விதும் ந ஸக்கோதி. ஆதப்பாயாதி கிலேஸஸந்தாபகவீரியகரணத்தா²ய. அனுயோகா³யாதி புனப்புனம் யோகா³ய. ஸாதச்சாயாதி ஸததகிரியாய பதா⁴னாயாதி பத³ஹனத்தா²ய. அயம் பட²மோ சேதோகி²லோதி அயம் ஸத்த²ரி விசிகிச்சா²ஸங்கா²தோ பட²மோ சித்தஸ்ஸ த²த்³த⁴பா⁴வோ, ஏவமேதஸ்ஸ பி⁴க்கு²னோ அப்பஹீனோ ஹோதி. த⁴ம்மேதி பரியத்தித⁴ம்மே ச படிவேத⁴த⁴ம்மே ச. பரியத்தித⁴ம்மே கங்க²மானோ, தேபிடகம் பு³த்³த⁴வசனம் சதுராஸீதி த⁴ம்மக்க²ந்த⁴ஸஹஸ்ஸானீதி வத³ந்தி, அத்தி² நு கோ² ஏதம் நத்தீ²தி கங்க²தி. படிவேத⁴த⁴ம்மே கங்க²மானோ விபஸ்ஸனானிஸ்ஸந்தோ³ மக்³கோ³ நாம, மக்³க³னிஸ்ஸந்தோ³ ப²லம் நாம, ஸப்³ப³ஸங்கா²ரபடினிஸ்ஸக்³கோ³ நிப்³பா³னம் நாமாதி வத³ந்தி. தம் அத்தி² நு கோ² நத்தீ²தி கங்க²தி. ஸங்கே⁴ கங்க²தீதி ஸுப்படிபன்னோதிஆதீ³னம் பதா³னம் வஸேன ஏவரூபம் படிபத³ம் படிபன்னா சத்தாரோ மக்³க³ட்டா² சத்தாரோ ப²லட்டா²தி அட்ட²ன்னம் புக்³க³லானம் ஸமூஹபூ⁴தோ ஸங்கோ⁴ நாம, ஸோ அத்தி² நு கோ² நத்தீ²தி கங்க²தி. ஸிக்கா²ய கங்க²மானோ அதி⁴ஸீலஸிக்கா² நாம அதி⁴சித்தஸிக்கா² நாம அதி⁴பஞ்ஞாஸிக்கா² நாமாதி வத³ந்தி. ஸா அத்தி² நு கோ² நத்தீ²தி கங்க²தி. அயம் பஞ்சமோதி அயம் ஸப்³ரஹ்மசாரீஸு கோபஸங்கா²தோ பஞ்சமோ சித்தஸ்ஸ த²த்³த⁴பா⁴வோ கசவரபா⁴வோ கா²ணுகபா⁴வோ.

186. வினிப³ந்தே⁴ஸு காமேதி வத்து²காமேபி கிலேஸகாமேபி. காயேதி அத்தனோ காயே. ரூபேதி ப³ஹித்³தா⁴ ரூபே. யாவத³த்த²ந்தி யத்தகம் இச்ச²தி, தத்தகம். உத³ராவதே³ஹகந்தி உத³ரபூரம். தஞ்ஹி உத³ரம் அவதே³ஹனதோ உத³ராவதே³ஹகந்தி வுச்சதி. ஸேய்யஸுக²ந்தி மஞ்சபீட²ஸுக²ம், உதுஸுக²ம் வா. பஸ்ஸஸுக²ந்தி யதா² ஸம்பரிவத்தகம் ஸயந்தஸ்ஸ த³க்கி²ணபஸ்ஸவாமபஸ்ஸானம் ஸுக²ம் ஹோதி, ஏவம் உப்பன்னஸுக²ம். மித்³த⁴ஸுக²ந்தி நித்³தா³ஸுக²ம். அனுயுத்தோதி யுத்தபயுத்தோ விஹரதி.

பணிதா⁴யாதி பத்த²யித்வா. ஸீலேனாதிஆதீ³ஸு ஸீலந்தி சதுபாரிஸுத்³தி⁴ஸீலம். வதந்தி வதஸமாதா³னம். தபோதி தபசரணம். ப்³ரஹ்மசரியந்தி மேது²னவிரதி. தே³வோ வா ப⁴விஸ்ஸாமீதி மஹேஸக்க²தே³வோ வா ப⁴விஸ்ஸாமி. தே³வஞ்ஞதரோ வாபி அப்பேஸக்க²தே³வேஸு வா அஞ்ஞதரோ.

189. இத்³தி⁴பாதே³ஸு ச²ந்த³ம் நிஸ்ஸாய பவத்தோ ஸமாதி⁴ ச²ந்த³ஸமாதி⁴. பதா⁴னபூ⁴தா ஸங்கா²ரா பதா⁴னஸங்கா²ரா. ஸமன்னாக³தந்தி தேஹி த⁴ம்மேஹி உபேதம். இத்³தி⁴யா பாத³ம், இத்³தி⁴பூ⁴தம் வா பாத³ந்தி இத்³தி⁴பாத³ம். ஸேஸேஸுபி ஏஸேவ நயோ, அயமேத்த² ஸங்கே²போ. வித்தா²ரோ பன இத்³தி⁴பாத³விப⁴ங்கே³ ஆக³தோ யேவ. விஸுத்³தி⁴மக்³கே³பிஸ்ஸ அத்தோ² தீ³பிதோ. இதி இமேஹி சதூஹி இத்³தி⁴பாதே³ஹி விக்க²ம்ப⁴னப்பஹானம் கதி²தம். உஸ்ஸோள்ஹீயேவ பஞ்சமீதி ஏத்த² உஸ்ஸோள்ஹீதி ஸப்³ப³த்த² கத்தப்³ப³வீரியம் த³ஸ்ஸேதி. உஸ்ஸோள்ஹீபன்னரஸங்க³ஸமன்னாக³தோதி பஞ்ச சேதோகி²லப்பஹானானி பஞ்ச வினிப³ந்த⁴ப்பஹானானி சத்தாரோ இத்³தி⁴பாதா³ உஸ்ஸோள்ஹீதி ஏவம் உஸ்ஸோள்ஹியா ஸத்³தி⁴ம் பன்னரஸஹி அங்கே³ஹி ஸமன்னாக³தோ. ப⁴ப்³போ³தி அனுரூபோ, அனுச்ச²விகோ. அபி⁴னிப்³பி⁴தா³யாதி ஞாணேன கிலேஸபே⁴தா³ய. ஸம்போ³தா⁴யாதி சதுமக்³க³ஸம்போ³தா⁴ய. அனுத்தரஸ்ஸாதி ஸேட்ட²ஸ்ஸ. யோக³க்கே²மஸ்ஸாதி சதூஹி யோகே³ஹி கே²மஸ்ஸ அரஹத்தஸ்ஸ. அதி⁴க³மாயாதி படிலாபா⁴ய. ஸேய்யதா²தி ஓபம்மத்தே² நிபாதோ. பீதி ஸம்பா⁴வனத்தே². உப⁴யேனபி ஸேய்யதா²பி நாம, பி⁴க்க²வேதி த³ஸ்ஸேதி.

குக்குடியா அண்டா³னி அட்ட² வா த³ஸ வா த்³வாத³ஸ வாதி ஏத்த² பன கிஞ்சாபி குக்குடியா வுத்தப்பகாரதோ ஊனாதி⁴கானிபி அண்டா³னி ஹோந்தி, வசனஸிலிட்ட²தாய பன ஏவம் வுத்தம். ஏவஞ்ஹி லோகே ஸிலிட்ட²ம் வசனம் ஹோதி. தானஸ்ஸூதி தானி அஸ்ஸு, ப⁴வேய்யுந்தி அத்தோ². குக்குடியா ஸம்மா அதி⁴ஸயிதானீதி தாய ஜனேத்தியா குக்குடியா பக்கே² பஸாரேத்வா தேஸம் உபரி ஸயந்தியா ஸம்மா அதி⁴ஸயிதானி. ஸம்மா பரிஸேதி³தானீதி காலேன காலம் உதும் கா³ஹாபேந்தியா ஸுட்டு² ஸமந்ததோ ஸேதி³தானி உஸ்மீகதானி. ஸம்மா பரிபா⁴விதானீதி காலேன காலம் ஸுட்டு² ஸமந்ததோ பா⁴விதானி, குக்குடக³ந்த⁴ம் கா³ஹாபிதானீதி அத்தோ². கிஞ்சாபி தஸ்ஸா குக்குடியாதி தஸ்ஸா குக்குடியா இமம் திவித⁴கிரியாகரணேன அப்பமாத³ம் கத்வா கிஞ்சாபி ந ஏவம் இச்சா² உப்பஜ்ஜேய்ய. அத² கோ² ப⁴ப்³பா³வ தேதி அத² கோ² தே குக்குடபோதகா வுத்தனயேன ஸோத்தி²னா அபி⁴னிப்³பி⁴ஜ்ஜிதும் ப⁴ப்³பா³வ. தே ஹி யஸ்மா தாய குக்குடியா ஏவம் தீஹாகாரேஹி தானி அண்டா³னி பரிபாலீயமானானி ந பூதீனி ஹோந்தி. யோபி நேஸம் அல்லஸினேஹோ, ஸோபி பரியாதா³னம் க³ச்ச²தி, கபாலம் தனுகம் ஹோதி, பாத³னக²ஸிகா² ச முக²துண்ட³கஞ்ச க²ரம் ஹோதி, ஸயம் பரிபாகம் க³ச்ச²தி, கபாலஸ்ஸ தனுத்தா ப³ஹி ஆலோகோ அந்தோ பஞ்ஞாயதி, தஸ்மா ‘‘சிரம் வத மயம் ஸங்குடிதஹத்த²பாதா³ ஸம்பா³தே⁴ ஸயிம்ஹா, அயஞ்ச ப³ஹி ஆலோகோ தி³ஸ்ஸதி, ஏத்த² தா³னி நோ ஸுக²விஹாரோ ப⁴விஸ்ஸதீ’’தி நிக்க²மிதுகாமா ஹுத்வா கபாலம் பாதே³ன பஹரந்தி, கீ³வம் பஸாரேந்தி, ததோ தம் கபாலம் த்³வேதா⁴ பி⁴ஜ்ஜதி. அத² தே பக்கே² விது⁴னந்தா தங்க²ணானுரூபம் விரவந்தா நிக்க²மந்தியேவ, நிக்க²மித்வா ச கா³மக்கே²த்தம் உபஸோப⁴யமானா விசரந்தி.

ஏவமேவ கோ²தி இத³ம் ஓபம்மஸம்படிபாத³னம். தம் ஏவம் அத்தே²ன ஸம்ஸந்தே³த்வா வேதி³தப்³ப³ம் – தஸ்ஸா குக்குடியா அண்டே³ஸு திவித⁴கிரியாகரணம் விய ஹி இமஸ்ஸ பி⁴க்கு²னோ உஸ்ஸோள்ஹீபன்னரஸேஹி அங்கே³ஹி ஸமன்னாக³தபா⁴வோ. குக்குடியா திவித⁴கிரியாஸம்பாத³னேன அண்டா³னம் அபூதிபா⁴வோ விய பன்னரஸங்க³ஸமன்னாக³தஸ்ஸ பி⁴க்கு²னோ திவிதா⁴னுபஸ்ஸனாஸம்பாத³னேன விபஸ்ஸனாஞாணஸ்ஸ அபரிஹானி. தஸ்ஸா திவித⁴கிரியாகரணேன அண்டா³னம் அல்லஸினேஹபரியாதா³னம் விய தஸ்ஸ பி⁴க்கு²னோ திவிதா⁴னுபஸ்ஸனாஸம்பாத³னேன ப⁴வத்தயானுக³தனிகந்திஸினேஹபரியாதா³னம். அண்ட³கலாபானம் தனுபா⁴வோ விய பி⁴க்கு²னோ அவிஜ்ஜண்ட³கோஸஸ்ஸ தனுபா⁴வோ. குக்குடபோதகானம் பாத³னக²முதுண்ட³கானம் த²த்³த⁴க²ரபா⁴வோ விய பி⁴க்கு²னோ விபஸ்ஸனாஞாணஸ்ஸ திக்க²க²ரவிப்பஸன்னஸூரபா⁴வோ. குக்குடபோதகானம் பரிணாமகாலோ விய பி⁴க்கு²னோ விபஸ்ஸனாஞாணஸ்ஸ பரிணாமகாலோ வட்³டி⁴தகாலோ க³ப்³ப⁴க்³க³ஹணகாலோ. குக்குடபோதகானம் பாத³னக²ஸிகா²ய வா முக²துண்ட³கேன வா அண்ட³கோஸம் பதா³லேத்வா பக்கே² பப்போ²டேத்வா ஸோத்தி²னா அபி⁴னிக்க²மனகாலோ விய தஸ்ஸ பி⁴க்கு²னோ விபஸ்ஸனாஞாணக³ப்³ப⁴ம் க³ண்ஹாபேத்வா விசரந்தஸ்ஸ தஜ்ஜாதிகம் உதுஸப்பாயம் வா போ⁴ஜனஸப்பாயம் வா புக்³க³லஸப்பாயம் வா த⁴ம்மஸ்ஸவனஸப்பாயம் வா லபி⁴த்வா ஏகாஸனே நிஸின்னஸ்ஸேவ விபஸ்ஸனம் வட்³டே⁴ந்தஸ்ஸ அனுபுப்³பா³தி⁴க³தேன அரஹத்தமக்³கே³ன அவிஜ்ஜண்ட³கோஸம் பதா³லேத்வா அபி⁴ஞ்ஞாபக்கே² பப்போ²டேத்வா ஸோத்தி²னா அரஹத்தப்பத்தகாலோ வேதி³தப்³போ³. யதா² பன குக்குடபோதகானம் பரிணதபா⁴வம் ஞத்வா மாதாபி அண்ட³கோஸம் பி⁴ந்த³தி, ஏவம் ததா²ரூபஸ்ஸ பி⁴க்கு²னோ ஞாணபரிபாகம் ஞத்வா ஸத்தா²பி –

‘‘உச்சி²ந்த³ ஸினேஹமத்தனோ, குமுத³ம் ஸாரதி³கம்வ பாணினா;

ஸந்திமக்³க³மேவ ப்³ரூஹய, நிப்³பா³னம் ஸுக³தேன தே³ஸித’’ந்தி. (த⁴. ப. 285) –

ஆதி³னா நயேன ஓபா⁴ஸம் ப²ரித்வா கா³தா²ய அவிஜ்ஜண்ட³கோஸம் பஹரதி, ஸோ கா³தா²பரியோஸானே அவிஜ்ஜாண்ட³கோஸம் பி⁴ந்தி³த்வா அரஹத்தம் பாபுணாதி. ததோ பட்டா²ய யதா² தே குக்குடபோதகா கா³மக்கே²த்தம் உபஸோப⁴யமானா தத்த² தத்த² விசரந்தி, ஏவம் அயம்பி மஹாகீ²ணாஸவோ நிப்³பா³னரம்மணம் ப²லஸமாபத்திம் அப்பேத்வா ஸங்கா⁴ராமம் உபஸோப⁴யமானோ விசரதி.

இதி இமஸ்மிம் ஸுத்தே சத்தாரி பஹானானி கதி²தானி. கத²ம்? சேதோகி²லானஞ்ஹி சேதோவினிப³ந்தா⁴னம் பஹானேன படிஸங்கா²னப்பபஹானம் கதி²தம், இத்³தி⁴பாதே³ஹி விக்க²ம்ப⁴னப்பஹானம் கதி²த, மக்³கே³ ஆக³தே ஸமுச்சே²த³ப்பஹானம் கதி²தம், ப²லே ஆக³தே படிப்பஸ்ஸத்³தி⁴ப்பஹானம் கதி²தம். ஸேஸம் ஸப்³ப³த்த² உத்தானத்த²மேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

சேதோகி²லஸுத்தவண்ணனா நிட்டி²தா.