7. வனபத்த²பரியாயஸுத்தவண்ணனா

190. ஏவம் மே ஸுதந்தி வனபத்த²பரியாயம். தத்த² வனபத்த²பரியாயந்தி வனபத்த²காரணம், வனபத்த²தே³ஸனம் வா.

191. வனபத்த²ம் உபனிஸ்ஸாய விஹரதீதி மனுஸ்ஸூபசாராதிக்கந்தம் வனஸண்ட³ஸேனாஸனம் நிஸ்ஸாய ஸமணத⁴ம்மம் கரோந்தோ விஹரதி. அனுபட்டி²தாதிஆதீ³ஸு புப்³பே³ அனுபட்டி²தா ஸதி தம் உபனிஸ்ஸாய விஹரதோபி ந உபட்டா²தி, புப்³பே³ அஸமாஹிதம் சித்தம் ந ஸமாதி⁴யதி, புப்³பே³ அபரிக்கீ²ணா ஆஸவா ந பரிக்க²யம் க³ச்ச²ந்தி, புப்³பே³ அனனுப்பத்தம் அனுத்தரம் யோக³க்கே²மஸங்கா²தம் அரஹத்தஞ்ச ந பாபுணாதீதி அத்தோ². ஜீவிதபரிக்கா²ராதி ஜீவிதஸம்பா⁴ரா. ஸமுதா³னேதப்³பா³தி ஸமாஹரிதப்³பா³. கஸிரேன ஸமுதா³க³ச்ச²ந்தீதி து³க்கே²ன உப்பஜ்ஜந்தி. ரத்திபா⁴க³ம் வா தி³வஸபா⁴க³ம் வாதி ரத்திகோட்டா²ஸே வா தி³வஸகோட்டா²ஸே வா. ஏத்த² ச ரத்திபா⁴கே³ படிஸஞ்சிக்க²மானேன ஞத்வா ரத்திம்யேவ பக்கமிதப்³ப³ம், ரத்திம் சண்ட³வாளாதீ³னம் பரிப³ந்தே⁴ ஸதி அருணுக்³க³மனம் ஆக³மேதப்³ப³ம். தி³வஸபா⁴கே³ ஞத்வா தி³வாவ பக்கமிதப்³ப³ம், தி³வா பரிப³ந்தே⁴ ஸதி ஸூரியத்த²ங்க³மனம் ஆக³மேதப்³ப³ம்.

192. ஸங்கா²பீதி ஏவம் ஸமணத⁴ம்மஸ்ஸ அனிப்ப²ஜ்ஜனபா⁴வம் ஜானித்வா. அனந்தரவாரே பன ஸங்கா²பீதி ஏவம் ஸமணத⁴ம்மஸ்ஸ நிப்ப²ஜ்ஜனபா⁴வம் ஜானித்வா.

194. யாவஜீவந்தி யாவ ஜீவிதம் பவத்ததி, தாவ வத்த²ப்³ப³மேவ.

195. ஸோ புக்³க³லோதி பத³ஸ்ஸ நானுப³ந்தி⁴தப்³போ³தி இமினா ஸம்ப³ந்தோ⁴. அனாபுச்சா²தி இத⁴ பன தம் புக்³க³லம் அனாபுச்சா² பக்கமிதப்³ப³ந்தி அத்தோ².

197. ஸங்கா²பீதி ஏவம் ஸமணத⁴ம்மஸ்ஸ அனிப்ப²ஜ்ஜனபா⁴வம் ஞத்வா ஸோ புக்³க³லோ நானுப³ந்தி⁴தப்³போ³, தம் ஆபுச்சா² பக்கமிதப்³ப³ம்.

198. அபி பனுஜ்ஜமானேனாபீதி அபி நிக்கட்³டீ⁴யமானேனாபி. ஏவரூபோ ஹி புக்³க³லோ ஸசேபி தா³ருகலாபஸதம் வா உத³கக⁴டஸதம் வா வாலிகம்ப³ணஸதம் வா த³ண்ட³ம் ஆஹராபேதி, மா இத⁴ வஸீதி நிக்கட்³டா⁴பேதி வா, தம் தம் க²மாபேத்வா யாவஜீவம் வத்த²ப்³ப³மேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

வனபத்த²பரியாயஸுத்தவண்ணனா நிட்டி²தா.