5. அனுமானஸுத்தவண்ணனா

181. ஏவம் மே ஸுதந்தி அனுமானஸுத்தம். தத்த² ப⁴க்³கே³ஸூதி ஏவம்னாமகே ஜனபதே³, வசனத்தோ² பனேத்த² வுத்தானுஸாரேனேவ வேதி³தப்³போ³. ஸுஸுமாரகி³ரேதி ஏவம்னாமகே நக³ரே. தஸ்ஸ கிர நக³ரஸ்ஸ வத்து²பரிக்³க³ஹதி³வஸே அவிதூ³ரே உத³கரஹதே³ ஸும்ஸுமாரோ ஸத்³த³மகாஸி, கி³ரம் நிச்சா²ரேஸி. அத² நக³ரே நிட்டி²தே ஸும்ஸுமாரகி³ரம் த்வேவஸ்ஸ நாமம் அகம்ஸு. பே⁴ஸகளாவனேதி பே⁴ஸகளானாமகே வனே. ‘‘பே⁴ஸக³ளாவனே’’திபி பாடோ². மிக³தா³யேதி தம் வனம் மிக³பக்கீ²னம் அப⁴யதி³ன்னட்டா²னே ஜாதம், தஸ்மா மிக³தா³யோதி வுச்சதி.

பவாரேதீதி இச்சா²பேதி. வத³ந்தூதி ஓவாதா³னுஸாஸனிவஸேன வத³ந்து, அனுஸாஸந்தூதி அத்தோ². வசனீயோம்ஹீதி அஹம் தும்ஹேஹி வத்தப்³போ³, அனுஸாஸிதப்³போ³ ஓவதி³தப்³போ³தி அத்தோ². ஸோ ச ஹோதி து³ப்³ப³சோதி ஸோ ச து³க்கே²ன வத்தப்³போ³ ஹோதி, வுத்தோ ந ஸஹதி. தோ³வசஸ்ஸகரணேஹீதி து³ப்³ப³சபா⁴வகாரகேஹி உபரி ஆக³தேஹி ஸோளஸஹி த⁴ம்மேஹி. அப்பத³க்கி²ணக்³கா³ஹீ அனுஸாஸனிந்தி யோ ஹி வுச்சமானோ தும்ஹே மம் கஸ்மா வத³த², அஹம் அத்தனோ கப்பியாகப்பியம் ஸாவஜ்ஜானவஜ்ஜம் அத்தா²னத்த²ம் ஜானாமீதி வத³தி. அயம் அனுஸாஸனிம் பத³க்கி²ணதோ ந க³ண்ஹாதி, வாமதோ க³ண்ஹாதி, தஸ்மா அப்பத³க்கி²ணக்³கா³ஹீதி வுச்சதி.

பாபிகானம் இச்சா²னந்தி லாமகானம் அஸந்தஸம்ப⁴வனபத்த²னானம். படிப்ப²ரதீதி படிவிருத்³தோ⁴, பச்சனீகோ ஹுத்வா திட்ட²தி, அபஸாதே³தீதி கிம் நு கோ² துய்ஹம் பா³லஸ்ஸ அப்³யத்தஸ்ஸ ப⁴ணிதேன, த்வம்பி நாம ப⁴ணிதப்³ப³ம் மஞ்ஞிஸ்ஸஸீதி ஏவம் க⁴ட்டேதி. பச்சாரோபேதீதி, த்வம்பி கோ²ஸி இத்த²ன்னாமம் ஆபத்திம் ஆபன்னோ, தம் தாவ படிகரோஹீதி ஏவம் படிஆரோபேதி.

அஞ்ஞேனஞ்ஞம் படிசரதீதி அஞ்ஞேன காரணேன வசனேன வா அஞ்ஞம் காரணம் வசனம் வா படிச்சா²தே³தி. ‘‘ஆபத்திம் ஆபன்னோஸீ’’தி வுத்தே ‘‘கோ ஆபன்னோ, கிம் ஆபன்னோ, கிஸ்மிம் ஆபன்னோ, கம் ப⁴ணத², கிம் ப⁴ணதா²’’தி வா வத³தி. ‘‘ஏவரூபம் கிஞ்சி தயா தி³ட்ட²’’ந்தி வுத்தே ‘‘ந ஸுணாமீ’’தி ஸோதம் வா உபனேதி. ப³ஹித்³தா⁴ கத²ம் அபனாமேதீதி ‘‘இத்த²ன்னாமம் ஆபத்திம் ஆபன்னோஸீ’’தி புட்டோ² ‘‘பாடலிபுத்தம் க³தோம்ஹீ’’தி வத்வா புன ‘‘ந தவ பாடலிபுத்தக³மனம் புச்சா²ம, ஆபத்திம் புச்சா²மா’’தி வுத்தே ‘‘ததோ ராஜகே³ஹம் க³தோம்ஹீ’’தி, ராஜகே³ஹம் வா யாஹி ப்³ராஹ்மணகே³ஹம் வா, ஆபத்திம் ஆபன்னோஸீதி. தத்த² மே ஸூகரமம்ஸம் லத்³த⁴ந்திஆதீ³னி வத³ந்தோ கத²ம் ப³ஹித்³தா⁴ விக்கி²பதி.

அபதா³னேதி அத்தனோ சரியாய. ந ஸம்பாயதீதி, ஆவுஸோ, த்வம் குஹிம் வஸஸி, கம் நிஸ்ஸாய வஸஸீதி வா, யம் த்வம் வதே³ஸி ‘‘மயா ஏஸ ஆபத்திம் ஆபஜ்ஜன்னோ தி³ட்டோ²’’தி. த்வம் தஸ்மிம் ஸமயே கிம் கரோஸி, அயம் கிம் கரோதி, கத்த² வா த்வம் அச்ச²ஸி கத்த² வா அயந்திஆதி³னா நயேன சரியம் புட்டோ² ஸம்பாதே³த்வா கதே²தும் ந ஸக்கோதி.

183. தத்ராவுஸோதி, ஆவுஸோ, தேஸு ஸோளஸஸு த⁴ம்மேஸு. அத்தனாவ அத்தானம் ஏவம் அனுமினிதப்³ப³ந்தி ஏவம் அத்தனாவ அத்தா அனுமேதப்³போ³ துலேதப்³போ³ தீரேதப்³போ³.

184. பச்சவேக்கி²தப்³ப³ந்தி பச்சவேக்கி²தப்³போ³. அஹோரத்தானுஸிக்கி²னாதி தி³வாபி ரத்திம்பி ஸிக்க²ந்தேன, ரதிஞ்ச தி³வா ச குஸலேஸு த⁴ம்மேஸு ஸிக்க²ந்தேன பீதிபாமோஜ்ஜமேவ உப்பாதே³தப்³ப³ந்தி அத்தோ².

அச்சே² வா உத³கபத்தேதி பஸன்னே வா உத³கபா⁴ஜனே. முக²னிமித்தந்தி முக²படிபி³ம்ப³ம். ரஜந்தி ஆக³ந்துகரஜம். அங்க³ணந்தி தத்த² ஜாதகம் திலகம் வா பிளகம் வா. ஸப்³பே³பிமே பாபகே அகுஸலே த⁴ம்மே பஹீனேதி இமினா ஸப்³ப³ப்பஹானம் கதே²ஸி. கத²ம்? ஏத்தகா அகுஸலா த⁴ம்மா பப்³ப³ஜிதஸ்ஸ நானுச்ச²விகாதி படிஸங்கா²னம் உப்பாத³யதோ ஹி படிஸங்கா²னப்பஹானம்கதி²தம் ஹோதி. ஸீலம் பத³ட்டா²னம் கத்வா கஸிணபரிகம்மம் ஆரபி⁴த்வா அட்ட² ஸமாபத்தியோ நிப்³ப³த்தேந்தஸ்ஸ விக்க²ம்ப⁴னப்பஹானம் கதி²தம். ஸமாபத்திம் பத³ட்டா²னம் கத்வா விபஸ்ஸனம் வட்³டே⁴ந்தஸ்ஸ தத³ங்க³ப்பஹானம் கதி²தம். விபஸ்ஸனம் வட்³டே⁴த்வா மக்³க³ம் பா⁴வேந்தஸ்ஸ ஸமுச்சே²த³ப்பஹானம் கதி²தம். ப²லே ஆக³தே படிப்பஸ்ஸத்³தி⁴ப்பஹானம், நிப்³பா³னே ஆக³தே நிஸ்ஸரணப்பஹானந்தி ஏவம் இமஸ்மிம் ஸுத்தே ஸப்³ப³ப்பஹானம் கதி²தம்வ ஹோதி.

இத³ஞ்ஹி ஸுத்தம் பி⁴க்கு²பாதிமோக்க²ம் நாமாதி போராணா வத³ந்தி. இத³ம் தி³வஸஸ்ஸ திக்க²த்தும் பச்சவேக்கி²தப்³ப³ம். பாதோ ஏவ வஸனட்டா²னம் பவிஸித்வா நிஸின்னேன ‘‘இமே ஏத்தகா கிலேஸா அத்தி² நு கோ² மய்ஹம் நத்தீ²’’தி பச்சவேக்கி²தப்³பா³. ஸசே அத்தீ²தி பஸ்ஸதி, தேஸம் பஹானாய வாயமிதப்³ப³ம். நோ சே பஸ்ஸதி, ஸுபப்³ப³ஜிதோஸ்மீதி அத்தமனேன ப⁴விதப்³ப³ம். ப⁴த்தகிச்சம் கத்வா ரத்திட்டா²னே வா தி³வாட்டா²னே வா நிஸீதி³த்வாபி பச்சவேக்கி²தப்³ப³ம். ஸாயம் வஸனட்டா²னே நிஸீதி³த்வாபி பச்சவேக்கி²தப்³ப³ம். திக்க²த்தும் அஸக்கோந்தேன த்³வே வாரே பச்சவேக்கி²தப்³ப³ம். த்³வே வாரே அஸக்கோந்தேன பன அவஸ்ஸம் ஏகவாரம் பச்சவேக்கி²தப்³ப³ம், அப்பச்சவேக்கி²தும் ந வட்டதீதி வத³ந்தி. ஸேஸம் ஸப்³ப³த்த² உத்தானத்த²மேவாதி.

பபஞ்சஸூத³னியா மஜ்ஜி²மனிகாயட்ட²கதா²ய

அனுமானஸுத்தவண்ணனா நிட்டி²தா.