11. ஸுனிக்கி²த்தவிமானவண்ணனா

உச்சமித³ம் மணிதூ²ணம் விமானந்தி ஸுனிக்கி²த்தவிமானம். தஸ்ஸ கா உப்பத்தி? ப⁴க³வா ஸாவத்தி²யம் விஹரதி ஜேதவனே. தேன ஸமயேன ஆயஸ்மா மஹாமோக்³க³ல்லானோ ஹேட்டா² வுத்தனயேனேவ தே³வசாரிகம் சரந்தோ தாவதிம்ஸப⁴வனம் உபக³தோ. தஸ்மிஞ்ச க²ணே அஞ்ஞதரோ தே³வபுத்தோ அத்தனோ விமானத்³வாரே டி²தோ ஆயஸ்மந்தம் மஹாமோக்³க³ல்லானம் தி³ஸ்வா ஸஞ்ஜாதகா³ரவப³ஹுமானோ உபஸங்கமித்வா பஞ்சபதிட்டி²தேன வந்தி³த்வா அஞ்ஜலிம் பக்³க³ய்ஹ அட்டா²ஸி.

ஸோ கிர அதீதே கஸ்ஸபஸம்மாஸம்பு³த்³தே⁴ பரினிப்³பு³தே தஸ்ஸ ஸரீரதா⁴துயோ பக்கி²பித்வா யோஜனிகே கனகதூ²பே ச கதே சதஸ்ஸோ பரிஸா காலேன காலம் உபஸங்கமித்வா க³ந்த⁴புப்ப²தூ⁴பாதீ³ஹி சேதியே பூஜம் கரோந்தி, தத்த² அஞ்ஞதரோ உபாஸகோ அஞ்ஞேஸு புப்ப²பூஜம் கத்வா க³தேஸு தேஹி பூஜிதட்டா²னே து³ன்னிக்கி²த்தானி புப்பா²னி தி³ஸ்வா தத்தே²வ தானி ஸம்மதே³வ ட²பேந்தோ ஸன்னிவேஸவஸேன த³ஸ்ஸனீயம் பாஸாதி³கம் விப⁴த்திவிஸேஸயுத்தம் புப்ப²பூஜம் அகாஸி. கத்வா ச பன ஏதம் ஆரம்மணம் க³ண்ஹந்தோ ஸத்து² கு³ணே அனுஸ்ஸரித்வா பஸன்னசித்தோ தம் புஞ்ஞம் ஹத³யே ட²பேஸி.

ஸோ அபரபா⁴கே³ காலம் கத்வா தஸ்ஸேவ கம்மஸ்ஸ ஆனுபா⁴வேன தாவதிம்ஸப⁴வனே த்³வாத³ஸயோஜனிகே கனகவிமானே நிப்³ப³த்தி, மஹானுபா⁴வோ மஹா சஸ்ஸ பரிவாரோ அஹோஸி. தம் ஸந்தா⁴ய வுத்தம் ‘‘தஸ்மிஞ்ச க²ணே அஞ்ஞதரோ தே³வபுத்தோ…பே… அட்டா²ஸீ’’தி. அத² நம் ஆயஸ்மா மஹாமோக்³க³ல்லானோ யதா²லத்³த⁴ஸம்பத்திகித்தனமுகே²ன கதஸுசரிதகம்மம் இமாஹி கா³தா²ஹி புச்சி² –

1282. ‘‘உச்சமித³ம் மணிதூ²ணம் விமானம், ஸமந்ததோ த்³வாத³ஸயோஜனானி;

கூடாகா³ரா ஸத்தஸதா உளாரா, வேளுரியத²ம்பா⁴ ருசகத்த²தா ஸுபா⁴.

1283. ‘‘தத்த²ச்ச²ஸி பிவஸி கா²த³ஸி ச, தி³ப்³பா³ ச வீணா பவத³ந்தி வக்³கு³ம்;

தி³ப்³பா³ ரஸா காமகு³ணேத்த² பஞ்ச, நாரியோ ச நச்சந்தி ஸுவண்ணச²ன்னா.

1284. ‘‘கேன தேதாதி³ஸோ வண்ணோ, கேன தே இத⁴ மிஜ்ஜ²தி;

உப்பஜ்ஜந்தி ச தே போ⁴கா³, யே கேசி மனஸோ பியா.

1285. ‘‘புச்சா²மி தம் தே³வ மஹானுபா⁴வ, மனுஸ்ஸபூ⁴தோ கிமகாஸி புஞ்ஞம்;

கேனாஸி ஏவம் ஜலிதானுபா⁴வோ, வண்ணோ ச தே ஸப்³ப³தி³ஸா பபா⁴ஸதீ’’தி.

ஸோபி தஸ்ஸ அத்தனோ கதகம்மம் இமாஹி கா³தா²ஹி கதே²ஸி. தம் த³ஸ்ஸேந்தா ஸங்கீ³திகாரா ஆஹம்ஸு –

1286. ‘‘ஸோ தே³வபுத்தோ அத்தமனோ, மோக்³க³ல்லானேன புச்சி²தோ;

பஞ்ஹம் புட்டோ² வியாகாஸி, யஸ்ஸ கம்மஸ்ஸித³ம் ப²லம்’’.

1287. ‘‘து³ன்னிக்கி²த்தம் மாலம் ஸுனிக்கி²பித்வா, பதிட்ட²பேத்வா ஸுக³தஸ்ஸ தூ²பே;

மஹித்³தி⁴கோ சம்ஹி மஹானுபா⁴வோ, தி³ப்³பே³ஹி காமேஹி ஸமங்கி³பூ⁴தோ.

1288. ‘‘தேன மேதாதி³ஸோ வண்ணோ, தேன மே இத⁴ மிஜ்ஜ²தி;

உப்பஜ்ஜந்தி ச மே போ⁴கா³, யே கேசி மனஸோ பியா.

1289. ‘‘அக்கா²மி தே பி⁴க்கு² மஹானுபா⁴வ, மனுஸ்ஸபூ⁴தோ யமஹம் அகாஸிம்;

தேனம்ஹி ஏவம் ஜலிதானுபா⁴வோ, வண்ணோ ச மே ஸப்³ப³தி³ஸா பபா⁴ஸதீ’’தி.

1287. தத்த² து³ன்னிக்கி²த்தம் மாலந்தி சேதியே பூஜாகரணட்டா²னே நிரந்தரட்ட²பனாதி³னா ரசனாவிஸேஸேன அட்ட²பேத்வா யதா²னிக்கி²த்ததாய ந ஸுட்டு² நிக்கி²த்தம், வாதேன வா பஹரித்வா து³ன்னிக்கி²த்தம் புப்ப²ம். ஸுனிக்கி²பித்வாதி ஸுட்டு² நிக்கி²பித்வா ரசனாவிஸேஸேன த³ஸ்ஸனீயம் பாஸாதி³கம் கத்வா நிக்கி²பிய. பதிட்ட²பேத்வாதி விப⁴த்திவிஸேஸாதி³வஸேன புப்ப²ம் பதிட்டா²பேத்வா. தம் வா புப்ப²ம் நிக்கி²பந்தோ ஸத்து² சேதியம் உத்³தி³ஸ்ஸ மம ஸந்தானே குஸலத⁴ம்மம் பதிட்டா²பேத்வாதி ஏவம் ஏத்த² அத்தோ² த³ட்ட²ப்³போ³. ஸேஸம் வுத்தனயமேவ.

ஏவம் தே³வபுத்தேன அத்தனோ ஸுசரிதகம்மே பகாஸிதே தே²ரோ தஸ்ஸ த⁴ம்மம் தே³ஸேத்வா ஆக³ந்த்வா ப⁴க³வதோ தமத்த²ம் நிவேதே³ஸி. ப⁴க³வா தம் அட்டு²ப்பத்திம் கத்வா ஸம்பத்தமஹாஜனஸ்ஸ த⁴ம்மம் தே³ஸேஸி. தே³ஸனா மஹாஜனஸ்ஸ ஸாத்தி²கா அஹோஸீதி.

ஸுனிக்கி²த்தவிமானவண்ணனா நிட்டி²தா.

இதி பரமத்த²தீ³பனியா கு²த்³த³க-அட்ட²கதா²ய விமானவத்து²ஸ்மிம்

ஏகாத³ஸவத்து²படிமண்டி³தஸ்ஸ ஸத்தமஸ்ஸ

ஸுனிக்கி²த்தவக்³க³ஸ்ஸ அத்த²வண்ணனா நிட்டி²தா.

நிட்டி²தா ச புரிஸவிமானவண்ணனா.

நிக³மனகதா²

ஏத்தாவதா ச –

தே³வதானம் விமானாதி³-ஸம்பத்திம் தஸ்ஸ காரணம்;

பகாஸயந்தீ ஸத்தானம், ஸப்³ப³லோகஹிதாவஹா.

அப்பகானம்பி காரானம், யா விபா⁴வேதி தே³ஸனா;

உளாரப²லதம் சித்த-கே²த்தஸம்பத்தியோக³தோ.

யம் கதா²வத்து²குஸலா, ஸுபரிஞ்ஞாதவத்து²கா;

விமானவத்து²இச்சேவ, ஸங்கா³யிம்ஸு மஹேஸயோ.

தஸ்ஸ அத்த²ம் பகாஸேதும், போராணட்ட²கதா²னயம்;

ஸன்னிஸ்ஸாய ஸமாரத்³தா⁴, அத்த²ஸம்வண்ணனா மயா.

யா தத்த² பரமத்தா²னம், தத்த² தத்த² யதா²ரஹம்;

பகாஸனா பரமத்த²-தீ³பனீ நாம நாமதோ.

ஸம்பத்தா பரினிட்டா²னம், அனாகுலவினிச்ச²யா;

ஸா ஸத்தரஸமத்தாய, பாளியா பா⁴ணவாரதோ.

இதி தம் ஸங்க²ரோந்தேன, யம் தம் அதி⁴க³தம் மயா;

புஞ்ஞம் தஸ்ஸானுபா⁴வேன, லோகனாத²ஸ்ஸ ஸாஸனம்.

ஓகா³ஹேத்வா விஸுத்³தா⁴ய, ஸீலாதி³படிபத்தியா;

ஸப்³பே³பி தே³ஹினோ ஹோந்து, விமுத்திரஸபா⁴கி³னோ.

சிரம் திட்ட²து லோகஸ்மிம், ஸம்மாஸம்பு³த்³த⁴ஸாஸனம்;

தஸ்மிம் ஸகா³ரவா நிச்சம், ஹோந்து ஸப்³பே³பி பாணினோ.

ஸம்மா வஸ்ஸது காலேன, தே³வோபி ஜக³தீபதி;

ஸத்³த⁴ம்மனிரதோ லோகம், த⁴ம்மேனேவ பஸாஸதூதி.

இதி ப³த³ரதித்த²விஹாரவாஸினா ஆசரியத⁴ம்மபாலேன

கதாய

பரமத்த²தீ³பனியா கு²த்³த³க-அட்ட²கதா²ய

விமானவத்து²அத்த²வண்ணனா நிட்டி²தா.

விமானவத்து²-அட்ட²கதா² ஸமத்தா.