7. ஸுனிக்கி²த்தவிமானவக்³கோ³

1. சித்தலதாவிமானவண்ணனா

யதா² வனம் சித்தலதம் பபா⁴ஸதீதி சித்தலதாவிமானம். தஸ்ஸ கா உப்பத்தி? ப⁴க³வா ஸாவத்தி²யம் விஹரதி ஜேதவனே. தேன ஸமயேன ஸாவத்தி²யம் அஞ்ஞதரோ உபாஸகோ த³லித்³தோ³ அப்பபோ⁴கோ³ பரேஸம் கம்மம் கத்வா ஜீவதி. ஸோ ஸத்³தோ⁴ பஸன்னோ ஜிண்ணே வுட்³டே⁴ மாதாபிதரோ போஸேந்தோ ‘‘இத்தி²யோ நாம பதிகுலே டி²தா இஸ்ஸரியம் கரோந்தி, ஸஸ்ஸுஸஸுரானம் மனாபசாரினியோ து³ல்லபா⁴’’தி மாதாபிதூனம் சித்தது³க்க²ம் பரிஹரந்தோ தா³ரபரிக்³க³ஹம் அகத்வா ஸயமேவ நே உபட்ட²ஹதி, ஸீலானி ரக்க²தி, உபோஸத²ம் உபவஸதி, யதா²விப⁴வம் தா³னானி தே³தி. ஸோ அபரபா⁴கே³ காலம் கத்வா தாவதிம்ஸேஸு த்³வாத³ஸயோஜனிகே விமானே நிப்³ப³த்தி. தம் ஆயஸ்மா மஹாமோக்³க³ல்லானோ ஹேட்டா² வுத்தனயேன க³ந்த்வா கதகம்மம் இமாஹி கா³தா²ஹி படிபுச்சி² –

1114. ‘‘யதா² வனம் சித்தலதம் பபா⁴ஸதி, உய்யானஸேட்ட²ம் தித³ஸானமுத்தமம்;

ததூ²பமம் துய்ஹமித³ம் விமானம், ஓபா⁴ஸயம் திட்ட²தி அந்தலிக்கே².

1115. ‘‘தே³வித்³தி⁴பத்தோஸி மஹானுபா⁴வோ…பே…

வண்ணோ ச தே ஸப்³ப³தி³ஸா பபா⁴ஸதீ’’தி.

1116. ‘‘ஸோ தே³வபுத்தோ அத்தமனோ…பே… யஸ்ஸ கம்மஸ்ஸித³ம் ப²லம்’’.

1117. ‘‘அஹம் மனுஸ்ஸேஸு மனுஸ்ஸபூ⁴தோ, த³லித்³தோ³ அதாணோ கபணோ கம்மகரோ அஹோஸிம்;

ஜிண்ணே ச மாதாபிதரோ அபா⁴ரிம், பியா ச மே ஸீலவந்தோ அஹேஸும்;

அன்னஞ்ச பானஞ்ச பஸன்னசித்தோ, ஸக்கச்ச தா³னம் விபுலம் அதா³ஸிம்.

1118. ‘‘தேன மேதாதி³ஸோ வண்ணோ…பே…வண்ணோ ச மே ஸப்³ப³தி³ஸா பபா⁴ஸதீ’’தி. –

ஸோபி தஸ்ஸ ப்³யாகாஸி. ஸேஸம் வுத்தனயமேவ.

சித்தலதாவிமானவண்ணனா நிட்டி²தா.

2. நந்த³னவிமானவண்ணனா

யதா² வனம் நந்த³னம் பபா⁴ஸதீதி நந்த³னவிமானம். தஸ்ஸ கா உப்பத்தி? ப⁴க³வா ஸாவத்தி²யம் விஹரதி ஜேதவனே. தேன ஸமயேன ஸாவத்தி²யம் அஞ்ஞதரோ உபாஸகோதிஆதி³ ஸப்³ப³ம் அனந்தரவிமானஸதி³ஸம். அயம் பன தா³ரபரிக்³க³ஹம் கத்வா மாதாபிதரோ போஸேஸீதி அயமேவ விஸேஸோ.

1120. யதா² வனம் நந்த³னம் பபா⁴ஸதி, உய்யானஸேட்ட²ம் தித³ஸானமுத்தமம்;

ததூ²பமம் துய்ஹமித³ம் விமானம், ஓபா⁴ஸயம் திட்ட²தி அந்தலிக்கே².

1121. ‘‘தே³வித்³தி⁴பத்தோஸி மஹானுபா⁴வோ…பே…வண்ணோ ச தே ஸப்³ப³தி³ஸா பபா⁴ஸதீதி.

1122. ‘‘ஸோ தே³வபுத்தோ அத்தமனோ…பே… யஸ்ஸ கம்மஸ்ஸித³ம் ப²லம்’’.

1123. ‘‘அஹம் மனுஸ்ஸேஸு மனுஸ்ஸபூ⁴தோ, த³லித்³தோ³ அதாணோ கபணோ கம்மகரோ அஹோஸிம்;

ஜிண்ணே ச மாதாபிதரோ அபா⁴ரிம், பியா ச மே ஸீலவந்தோ அஹேஸும்;

அன்னஞ்ச பானஞ்ச பஸன்னசித்தோ, ஸக்கச்ச தா³னம் விபுலம் அதா³ஸிம்.

1124. ‘‘தேன மேதாதி³ஸோ வண்ணோ…பே…வண்ணோ ச மே ஸப்³ப³தி³ஸா பபா⁴ஸதீ’’தி. –

கா³தா²ஹி ப்³யாகாஸி. தத்த² கா³தா²ஸுபி அபுப்³ப³ம் நத்தி².

நந்த³னவிமானவண்ணனா நிட்டி²தா.

3. மணிதூ²ணவிமானவண்ணனா

உச்சமித³ம் மணிதூ²ணம் விமானந்தி மணிதூ²ணவிமானம். தஸ்ஸ கா உப்பத்தி? ப⁴க³வா ஸாவத்தி²யம் விஹரதி ஜேதவனே. தேன ஸமயேன ஸம்ப³ஹுலா தே²ரா பி⁴க்கூ² அரஞ்ஞாயதனே விஹரந்தி. தேஸம் கா³மம் பிண்டா³ய க³மனமக்³கே³ ஏகோ உபாஸகோ விஸமம் ஸமம் கரோதி, கண்டகே நீஹரதி, க³ச்ச²கு³ம்பே³ அபனேதி, உத³ககாலே மாதிகாஸு ஸேதும் ப³ந்த⁴தி, விவனட்டா²னேஸு சா²யாருக்கே² ரோபேதி, ஜலாஸயேஸு மத்திகம் உத்³த⁴ரித்வா தே புது²லக³ம்பீ⁴ரே கரோதி, தித்தே² ஸம்பாதே³தி, யதா²விப⁴வம் தா³னம் தே³தி, ஸீலம் ரக்க²தி. ஸோ அபரபா⁴கே³ காலம் கத்வா தாவதிம்ஸேஸு த்³வாத³ஸயோஜனிகே கனகவிமானே நிப்³ப³த்தி. தம் ஆயஸ்மா மஹாமோக்³க³ல்லானத்தே²ரோ உபஸங்கமித்வா இமாஹி கா³தா²ஹி படிபுச்சி² –

1126. ‘‘உச்சமித³ம் மணிதூ²ணம் விமானம், ஸமந்ததோ த்³வாத³ஸ யோஜனானி;

கூடாகா³ரா ஸத்தஸதா உளாரா, வேளுரியத²ம்பா⁴ ருசகத்த²தா ஸுபா⁴.

1127. ‘‘தத்த²ச்ச²ஸி பிவஸி கா²த³ஸி ச, தி³ப்³பா³ ச வீணா பவத³ந்தி வக்³கு³ம்;

தி³ப்³பா³ ரஸா காமகு³ணேத்த² பஞ்ச, நாரியோ ச நச்சந்தி ஸுவண்ணச்ச²ன்னா.

1128. ‘‘கேன தேதாதி³ஸோ வண்ணோ…பே…வண்ணோ ச தே ஸப்³ப³தி³ஸா பபா⁴ஸதீ’’தி.

ஸோபி தஸ்ஸ கா³தா²ஹி ப்³யாகாஸி –

1130. ‘‘ஸோ தே³வபுத்தோ அத்தமனோ…பே… யஸ்ஸ கம்மஸ்ஸித³ம் ப²லம்’’.

1131. ‘‘அஹம் மனுஸ்ஸேஸு மனுஸ்ஸபூ⁴தோ, விவனே பதே² ஸங்கமனம் அகாஸிம்;

ஆராமருக்கா²னி ச ரோபயிஸ்ஸம், பியா ச மே ஸீலவந்தோ அஹேஸும்;

அன்னஞ்ச பானஞ்ச பஸன்னசித்தோ, ஸக்கச்ச தா³னம் விபுலம் அதா³ஸிம்.

1132. ‘‘தேன மேதாதி³ஸோ வண்ணோ…பே…வண்ணோ ச மே ஸப்³ப³தி³ஸா பபா⁴ஸதீ’’தி.

1131. தத்த² விவனேதி அரஞ்ஞே. ஆராமருக்கா²னி சா ஆராமபூ⁴தே ருக்கே², ஆராமம் கத்வா தத்த² ருக்கே² ரோபேஸிந்தி அத்தோ². ஸேஸம் ஸப்³ப³ம் வுத்தனயமேவ.

மணிதூ²ணவிமானவண்ணனா நிட்டி²தா.

4. ஸுவண்ணவிமானவண்ணனா

ஸோவண்ணமயே பப்³ப³தஸ்மிந்தி ஸுவண்ணவிமானம். தஸ்ஸ கா உப்பத்தி? ப⁴க³வா அந்த⁴கவிந்தே³ விஹரதி. தேன ஸமயேன அஞ்ஞதரோ உபாஸகோ ஸத்³தோ⁴ பஸன்னோ விப⁴வஸம்பன்னோ தஸ்ஸ கா³மஸ்ஸ அவிதூ³ரே அஞ்ஞதரஸ்மிம் முண்ட³கபப்³ப³தே ஸப்³பா³காரஸம்பன்னம் ப⁴க³வதோ வஸனானுச்ச²விகம் க³ந்த⁴குடிம் காரேத்வா தத்த² ப⁴க³வந்தம் வஸாபேந்தோ ஸக்கச்சம் உபட்ட²ஹி, ஸயஞ்ச நிச்சஸீலே பதிட்டி²தோ ஸுவிஸுத்³த⁴ஸீலஸம்வரோ ஹுத்வா காலம் கத்வா தாவதிம்ஸப⁴வனே நிப்³ப³த்தி. தஸ்ஸ கம்மானுபா⁴வஸம்ஸூசகம் நானாரதனரம்ஸிஜாலஸமுஜ்ஜலம் விசித்தவேதி³காபரிக்கி²த்தம் விவித⁴விபுலாலங்காரோபஸோபி⁴தம் ஸுவிப⁴த்தபி⁴த்தித்த²ம்ப⁴ஸோபானம் ஆராமரமணீயகம் கஞ்சனபப்³ப³தமுத்³த⁴னி விமானம் உப்பஜ்ஜி. தம் ஆயஸ்மா மஹாமோக்³க³ல்லானோ தே³வசாரிகம் சரந்தோ தி³ஸ்வா இமாஹி கா³தா²ஹி படிபுச்சி² –

1134. ‘‘ஸோவண்ணமயே பப்³ப³தஸ்மிம், விமானம் ஸப்³ப³தோபப⁴ம்;

ஹேமஜாலபடிச்ச²ன்னம், கிங்கிணிஜாலகப்பிதம்.

1135. ‘‘அட்ட²ம்ஸா ஸுகதா த²ம்பா⁴, ஸப்³பே³ வேளுரியாமயா;

ஏகமேகாய அம்ஸியா, ரதனா ஸத்த நிம்மிதா.

1136. ‘‘வேளூரியஸுவண்ணஸ்ஸ, ப²லிகா ரூபியஸ்ஸ ச;

மஸாரக³ல்லமுத்தாஹி, லோஹிதங்க³மணீஹி ச.

1137. ‘‘சித்ரா மனோரமா பூ⁴மி, ந தத்து²த்³த⁴ம்ஸதீ ரஜோ;

கோ³பானஸீக³ணா பீதா, கூடம் தா³ரேந்தி நிம்மிதா.

1138. ‘‘ஸோபானானி ச சத்தாரி, நிம்மிதா சதுரோ தி³ஸா;

நானாரதனக³ப்³பே⁴ஹி, ஆதி³ச்சோவ விரோசதி.

1139. ‘‘வேதி³யா சதஸ்ஸோ தத்த², விப⁴த்தா பா⁴க³ஸோ மிதா;

த³த்³த³ல்லமானா ஆப⁴ந்தி, ஸமந்தா சதுரோ தி³ஸா.

1140. ‘‘தஸ்மிம் விமானே பவரே, தே³வபுத்தோ மஹப்பபோ⁴;

அதிரோசஸி வண்ணேன, உத³யந்தோவ பா⁴ணுமா.

1141. ‘‘தா³னஸ்ஸ தே இத³ம் ப²லம், அதோ² ஸீலஸ்ஸ வா பன;

அதோ² அஞ்ஜலிகம்மஸ்ஸ, தம் மே அக்கா²ஹி புச்சி²தோ’’தி.

ஸோபிஸ்ஸ இமாஹி கா³தா²ஹி ப்³யாகாஸி –

1142. ‘‘ஸோ தே³வபுத்தோ அத்தமனோ…பே… யஸ்ஸ கம்மஸ்ஸித³ம் ப²லம்’’.

1143. ‘‘அஹம் அந்த⁴கவிந்த³ஸ்மிம், பு³த்³த⁴ஸ்ஸாதி³ச்சப³ந்து⁴னோ;

விஹாரம் ஸத்து² காரேஸிம், பஸன்னோ ஸேஹி பாணிபி⁴.

1144. ‘‘தத்த² க³ந்த⁴ஞ்ச மாலஞ்ச, பச்சயஞ்ச விலேபனம்;

விஹாரம் ஸத்து² அதா³ஸிம், விப்பஸன்னேன சேதஸா;

தேன மய்ஹம் இத³ம் லத்³த⁴ம், வஸம் வத்தேமி நந்த³னே.

1145. ‘‘நந்த³னே ச வனே ரம்மே, நானாதி³ஜக³ணாயுதே;

ரமாமி நச்சகீ³தேஹி, அச்ச²ராஹி புரக்க²தோ’’தி.

1134. தத்த² ஸப்³ப³தோபப⁴ந்தி ஸப்³ப³பா⁴கே³ஹி பபா⁴ஸந்தம் பபா⁴முஞ்சனகம். கிங்கிணிஜாலகப்பிதந்தி கப்பிதகிங்கிணிகஜாலம்.

1135. ஸப்³பே³ வேளுரியாமயாதி ஸப்³பே³ த²ம்பா⁴ வேளுரியமணிமயா. தத்த² பன ஏகமேகாய அம்ஸியாதி அட்ட²ம்ஸேஸு த²ம்பே⁴ஸு ஏகமேகஸ்மிம் அம்ஸபா⁴கே³. ரதனா ஸத்த நிம்மிதாதி ஸத்தரதனகம்மனிம்மிதா, ஏகேகோ அம்ஸோ ஸத்தரதனமயோதி அத்தோ².

1136. ‘‘வேளூரியஸுவண்ணஸ்ஸா’’திஆதி³னா நானாரதனானி த³ஸ்ஸேதி. தத்த² வேளூரியஸுவண்ணஸ்ஸாதி வேளுரியேன ச ஸுவண்ணேன ச நிம்மிதா, சித்ராதி வா யோஜனா. கரணத்தே² ஹி இத³ம் ஸாமிவசனம். ப²லிகா ரூபியஸ்ஸ சாதி ஏத்தா²பி ஏஸேவ நயோ. மஸாரக³ல்லமுத்தாஹீதி கப³ரமணீஹி. லோஹிதங்க³மணீஹி சாதி ரத்தமணீஹி.

1137. ந தத்து²த்³த⁴ம்ஸதீ ரஜோதி மணிமயபூ⁴மிகத்தா ந தஸ்மிம் விமானே ரஜோ உக்³க³ச்ச²தி. கோ³பானஸீக³ணாதி கோ³பானஸீஸமூஹா. பீதாதி பீதவண்ணா, ஸுவண்ணமயா சேவ பு²ஸ்ஸராகா³தி³மணிமயா சாதி அத்தோ². கூடம் தா⁴ரேந்தீதி ஸத்தரதனமயம் கண்ணிகம் தா⁴ரேந்தி.

1138-9. நானாரதனக³ப்³பே⁴ஹீதி நானாரதனமயேஹி ஓவரகேஹி. வேதி³யாதி வேதி³கா. சதஸ்ஸோதி சதூஸு தி³ஸாஸு சதஸ்ஸோ. தேனாஹ ‘‘ஸமந்தா சதுரோ தி³ஸா’’தி.

1140. மஹப்பபோ⁴தி மஹாஜுதிகோ. உத³யந்தோதி உக்³க³ச்ச²ந்தோ. பா⁴ணுமாதி ஆதி³ச்சோ.

1143. ஸேஹி பாணிபீ⁴தி காயஸாரம் புஞ்ஞம் பஸவந்தோ அத்தனோ பாணீஹி தம் தம் கிச்சம் கரோந்தோ விஹாரம் ஸத்து² காரேஸிந்தி யோஜனா. அத² வா ஸேஹி பாணிபீ⁴தி தத்த² அந்த⁴கவிந்த³ஸ்மிம் க³ந்த⁴ஞ்ச மாலஞ்ச பச்சயஞ்ச விலேபனஞ்ச பூஜாவஸேன. யதா² கத²ம்? விஹாரஞ்ச விப்பஸன்னேன சேதஸா ஸத்து²னோ அதா³ஸிம் பூஜேஸிம் நிய்யாதே³ஸிம் சாதி ஏவமேத்த² யோஜனா வேதி³தப்³பா³.

1144. தேனாதி தேன யதா²வுத்தேன புஞ்ஞகம்மேன காரணபூ⁴தேன. மய்ஹந்தி மயா. இத³ந்தி இத³ம் புஞ்ஞப²லம், இத³ம் வா தி³ப்³ப³ம் ஆதி⁴பதேய்யம். தேனாஹ ‘‘வஸம் வத்தேமீ’’தி.

1145. நந்த³னேதி நந்தி³யா தி³ப்³ப³ஸமித்³தி⁴யா உப்பஜ்ஜனட்டா²னே இமஸ்மிம் தே³வலோகே, தத்தா²பி விஸேஸதோ நந்த³னே வனே ரம்மே, ஏவம் ரமணீயே இமஸ்மிம் நந்த³னே வனே ரமாமீதி யோஜனா. ஸேஸம் வுத்தனயமேவ.

ஏவம் தே³வதாய அத்தனோ புஞ்ஞகம்மே ஆவிகதே தே²ரோ ஸபரிவாரஸ்ஸ தஸ்ஸ தே³வபுத்தஸ்ஸ த⁴ம்மம் தே³ஸேத்வா ப⁴க³வதோ தமத்த²ம் நிவேதே³ஸி. ப⁴க³வா தம் அட்டு²ப்பத்திம் கத்வா ஸம்பத்தபரிஸாய த⁴ம்மம் தே³ஸேஸி. ஸா தே³ஸனா மஹாஜனஸ்ஸ ஸாத்தி²கா அஹோஸீதி.

ஸுவண்ணவிமானவண்ணனா நிட்டி²தா.

5. அம்ப³விமானவண்ணனா

உச்சமித³ம் மணிதூ²ணந்தி அம்ப³விமானம். தஸ்ஸ கா உப்பத்தி? ப⁴க³வா ராஜக³ஹே விஹரதி வேளுவனே. தேன ஸமயேன ராஜக³ஹே அஞ்ஞதரோ து³க்³க³தபுரிஸோ பரேஸம் ப⁴த்தவேதனப⁴தோ ஹுத்வா அம்ப³வனம் ரக்க²தி. ஸோ ஏகதி³வஸம் ஆயஸ்மந்தம் ஸாரிபுத்தம் கி³ம்ஹஸமயே ஸூரியாதபஸந்தத்தே உண்ஹவாலிகானிப்பீளிதே விப்ப²ந்த³மானமரீசிஜாலவித்த²தே பூ⁴மிப்பதே³ஸே தஸ்ஸ அம்பா³ராமஸ்ஸ அவிதூ³ரேன மக்³கே³ன ஸேதா³க³தேன க³த்தேன க³ச்ச²ந்தம் தி³ஸ்வா ஸஞ்ஜாதகா³ரவப³ஹுமானோ உபஸங்கமித்வா ஏவமாஹ ‘‘மஹா அயம், ப⁴ந்தே, க⁴ம்மபரிளாஹோ, அதிவிய பரிஸ்ஸந்தரூபோ விய தி³ஸ்ஸதி, ஸாது⁴, ப⁴ந்தே, அய்யோ இமம் அம்பா³ராமம் பவிஸித்வா முஹுத்தம் விஸ்ஸமித்வா அத்³தா⁴னபரிஸ்ஸமம் படிவினோதே³த்வா க³ச்ச²த² அனுகம்பம் உபாதா³யா’’தி. தே²ரோ விஸேஸதோ தஸ்ஸ சித்தப்பஸாத³ம் பரிப்³ரூஹேதுகாமோ தம் ஆராமம் பவிஸித்வா அஞ்ஞதரஸ்ஸ அம்ப³ருக்க²ஸ்ஸ மூலே நிஸீதி³.

புன ஸோ புரிஸோ ஆஹ ‘‘ஸசே, ப⁴ந்தே, ந்ஹாயிதுகாமத்த², அஹம் இதோ கூபதோ உத³கம் உத்³த⁴ரித்வா தும்ஹே ந்ஹாபேஸ்ஸாமி, பானீயஞ்ச த³ஸ்ஸாமீ’’தி. தே²ரோபி அதி⁴வாஸேஸி துண்ஹீபா⁴வேன. ஸோ கூபதோ உத³கம் உத்³த⁴ரித்வா பரிஸ்ஸாவேத்வா தே²ரம் ந்ஹாபேஸி, ந்ஹாபேத்வா ச ஹத்த²பாதே³ தோ⁴வித்வா நிஸின்னஸ்ஸ பானீயம் உபனேஸி. தே²ரோ பானீயம் பிவித்வா படிப்பஸ்ஸத்³த⁴த³ரதோ² தஸ்ஸ புரிஸஸ்ஸ உத³கதா³னே சேவ ந்ஹாபனே ச அனுமோத³னம் வத்வா பக்காமி. அத² ஸோ புரிஸோ ‘‘க⁴ம்மாபி⁴தத்தஸ்ஸ வத தே²ரஸ்ஸ க⁴ம்மபரிளாஹம் படிப்பஸ்ஸம்பே⁴ஸிம், ப³ஹும் வத மயா புஞ்ஞம் பஸுத’’ந்தி உளாரபீதிஸோமனஸ்ஸம் படிஸம்வேதே³ஸி. ஸோ அபரபா⁴கே³ காலம் கத்வா தாவதிம்ஸேஸு உப்பஜ்ஜி. தம் ஆயஸ்மா மஹாமோக்³க³ல்லானோ உபஸங்கமித்வா இமாஹி கா³தா²ஹி கதபுஞ்ஞம் புச்சி².

1146. ‘‘உச்சமித³ம் மணிதூ²ணம் விமானம், ஸமந்ததோ த்³வாத³ஸ யோஜனானி;

கூடாகா³ரா ஸத்தஸதா உளாரா, வேளுரியத²ம்பா⁴ ருசகத்த²தா ஸுபா⁴.

1147. ‘‘தத்த²ச்ச²ஸி பிவஸி கா²த³ஸி ச, தி³ப்³பா³ ச வீணா பவத³ந்தி வக்³கு³ம்;

தி³ப்³பா³ ரஸா காமகு³ணேத்த² பஞ்ச, நாரியோ ச நச்சந்தி ஸுவண்ணச²ன்னா.

1148. ‘‘கேன தேதாதி³ஸோ வண்ணோ…பே…

வண்ணோ ச தே ஸப்³ப³தி³ஸா பபா⁴ஸதீ’’தி.

1150. ‘‘ஸோ தே³வபுத்தோ அத்தமனோ…பே…

யஸ்ஸ கம்மஸ்ஸித³ம் ப²லம்’’.

1151. ‘‘கி³ம்ஹானம் பச்சி²மே மாஸே, பதபந்தே தி³வங்கரே;

பரேஸம் ப⁴தகோ போஸோ, அம்பா³ராமமஸிஞ்சதி.

1152. ‘‘அத² தேனாக³மா பி⁴க்கு², ஸாரிபுத்தோதி விஸ்ஸுதோ;

கிலந்தரூபோ காயேன, அகிலந்தோவ சேதஸா.

1153. ‘‘தஞ்ச தி³ஸ்வான ஆயந்தம், அவோசம் அம்ப³ஸிஞ்சகோ;

ஸாது⁴ தம் ப⁴ந்தே ந்ஹாபேய்யம், யம் மமஸ்ஸ ஸுகா²வஹம்.

1154. ‘‘தஸ்ஸ மே அனுகம்பாய, நிக்கி²பி பத்தசீவரம்;

நிஸீதி³ ருக்க²மூலஸ்மிம், சா²யாய ஏகசீவரோ.

1155. ‘‘தஞ்ச அச்சே²ன வாரினா, பஸன்னமானஸோ நரோ;

ந்ஹாபயீ ருக்க²மூலஸ்மிம், சா²யாய ஏகசீவரம்.

1156. ‘‘அம்போ³ ச ஸித்தோ ஸமணோ ச ந்ஹாபிதோ,

மயா ச புஞ்ஞம் பஸுதம் அனப்பகம்;

இதி ஸோ பீதியா காயம், ஸப்³ப³ம் ப²ரதி அத்தனோ.

1157. ‘‘ததே³வ ஏத்தகம் கம்மம், அகாஸிம் தாய ஜாதியா;

பஹாய மானுஸம் தே³ஹம், உபபன்னோம்ஹி நந்த³னம்.

1158. ‘‘நந்த³னே ச வனே ரம்மே, நானாதி³ஜக³ணாயுதே;

ரமாமி நச்சகீ³தேஹி, அச்ச²ராஹி புரக்க²தோ’’தி. –

ஸோபி தஸ்ஸ இமாஹி கா³தா²ஹி ப்³யாகாஸி.

1151. தத்த² கி³ம்ஹானம் பச்சி²மே மாஸேதி ஆஸாள்ஹிமாஸே. பதபந்தேதி அதிவிய தி³ப்பந்தே, ஸப்³ப³ஸோ உண்ஹம் விஸ்ஸஜ்ஜேந்தேதி அத்தோ². தி³வங்கரேதி தி³வாகரே, அயமேவ வா பாடோ². அஸிஞ்சதீதி ஸிஞ்சதி, -காரோ நிபாதமத்தம், ஸிஞ்சதி அம்ப³ருக்க²மூலேஸு து⁴வம் ஜலஸேகம் கரோதீதி அத்தோ². ‘‘அஸிஞ்சதா²’’தி ச பாடோ², ஸிஞ்சித்தா²தி அத்தோ². ‘‘அஸிஞ்சஹ’’ந்தி ச பட²ந்தி, பரேஸம் ப⁴தகோ போஸோ ஹுத்வா ததா³ அம்பா³ராமம் அஸிஞ்சிம் அஹந்தி அத்தோ².

1152. தேனாதி யேன தி³ஸாபா⁴கே³ன ஸோ அம்பா³ராமோ, தேன அக³மா அக³ஞ்சி². அகிலந்தோவ சேதஸாதி சேதோது³க்க²ஸ்ஸ மக்³கே³னேவ பஹீனத்தா சேதஸா அகிலந்தோபி ஸமானோ கிலந்துரூபோ காயேன தேன மக்³கே³ன அக³மாதி யோஜனா.

1153-4. அவோசம் அஹம் ததா³ அம்ப³ஸிஞ்சகோ ஹுத்வாதி யோஜனா. ஏகசீவரோதி ந்ஹாயிதுகாமோதி அதி⁴ப்பாயோ.

1156. இதீதி ஏவம் ‘‘அம்போ³ ச ஸித்தோ, ஸமணோ ச ந்ஹாபிதோ, மயா ச புஞ்ஞம் பஸுதம் அனப்பகம், ஏகேனேவ பயோகே³ன திவிதோ⁴பி அத்தோ² ஸாதி⁴தோ’’தி இமினாகாரேன பவத்தாய பீதியா ஸோ புரிஸோ அத்தனோ ஸப்³ப³ம் காயம் ப²ரதி, நிரந்தரம் பு²டம் கரோதீதி யோஜனா. அதீதத்தே² சேதம் வத்தமானவசனம், ப²ரீதி அத்தோ².

1157. ததே³வ ஏத்தகம் கம்மந்தி தம் ஏத்தகம் ஏவம் பானீயதா³னமத்தகம் கம்மம் அகாஸிம், தாய தஸ்ஸம் ஜாதியம் அஞ்ஞம் நானுஸ்ஸராமீதி அதி⁴ப்பாயோ. தேஸம் வுத்தனயமேவ.

அம்ப³விமானவண்ணனா நிட்டி²தா.

6. கோ³பாலவிமானவண்ணனா

தி³ஸ்வான தே³வம் படிபுச்சி² பி⁴க்கூ²தி கோ³பாலவிமானம். தஸ்ஸ கா உப்பத்தி? ப⁴க³வா ராஜக³ஹே விஹரதி வேளுவனே. தேன ஸமயேன ராஜக³ஹவாஸீ அஞ்ஞதரோ கோ³பாலகோ பாதராஸத்தா²ய பிலோதிகாய புடப³த்³த⁴ம் கும்மாஸம் க³ஹேத்வா நக³ரதோ நிக்க²மித்வா கா³வீனம் சரணட்டா²னபூ⁴தம் கோ³சரபூ⁴மிம் ஸம்பாபுணி. தம் ஆயஸ்மா மஹாமோக்³க³ல்லானோ ‘‘அயம் இதா³னேவ காலம் கரிஸ்ஸதி, மய்ஹஞ்ச கும்மாஸம் த³த்வா தாவதிம்ஸேஸு உப்பஜ்ஜிஸ்ஸதீ’’தி ச ஞத்வா தஸ்ஸ ஸமீபம் அக³மாஸி. ஸோ வேலம் ஓலோகேத்வா தே²ரஸ்ஸ கும்மாஸம் தா³துகாமோ அஹோஸி. தேன ச ஸமயேன கா³வியோ மாஸக்கே²த்தம் பவிஸந்தி. அத² ஸோ கோ³பாலோ சிந்தேஸி ‘‘கிம் நு கோ² தே²ரஸ்ஸ கும்மாஸம் த³தே³ய்யம், உதா³ஹு கா³வியோ மாஸக்கே²த்ததோ நீஹரேய்ய’’ந்தி. அத²ஸ்ஸ ஏதத³ஹோஸி ‘‘மாஸஸாமிகா மம் யம் இச்ச²ந்தி, தம் கரோந்து, தே²ரே பன க³தே கும்மாஸதா³னந்தராயோ மே ஸியா, ஹந்தா³ஹம் பட²மம் அய்யஸ்ஸ கும்மாஸம் த³ஸ்ஸாமீ’’தி தம் தே²ரஸ்ஸ உபனேஸி. படிக்³க³ஹேஸி தே²ரோ அனுகம்பம் உபாதா³ய.

அத² நம் கா³வியோ நிவத்தேதும் பரிஸ்ஸயம் அனோலோகேத்வா வேகே³ன உபதா⁴வந்தம் பாதே³ன பு²ட்டோ² ஆஸீவிஸோ ட³ம்ஸி. தே²ரோபி தம் அனுகம்பமானோ தம் கும்மாஸம் பரிபு⁴ஞ்ஜிதும் ஆரபி⁴. கோ³பாலகோபி கா³வியோ நிவத்தேத்வா ஆக³தோ தே²ரம் கும்மாஸம் பரிபு⁴ஞ்ஜந்தம் தி³ஸ்வா பஸன்னசித்தோ உளாரம் பீதிஸோமனஸ்ஸம் படிஸம்வேதே³ந்தோ நிஸீதி³. தாவதே³வஸ்ஸ ஸகலஸரீரம் விஸம் அஜ்ஜோ²த்த²ரி. முஹுத்தமேவ வேகே³ முத்³த⁴பத்தே காலமகாஸி, காலகதோ ச தாவதிம்ஸேஸு த்³வாத³ஸயோஜனிகே கனகவிமானே நிப்³ப³த்தி. தம் ஆயஸ்மா மஹாமோக்³க³ல்லானோ தி³ஸ்வா இமாஹி கா³தா²ஹி படிபுச்சி² –

1159. ‘‘தி³ஸ்வான தே³வம் படிபுச்சி² பி⁴க்கு², உச்சே விமானம்ஹி சிரட்டி²திகே;

ஆமுத்தஹத்தா²ப⁴ரணம் யஸஸ்ஸிம், தி³ப்³பே³ விமானம்ஹி யதா²பி சந்தி³மா.

1160. ‘‘அலங்கதோ மல்யத⁴ரோ ஸுவத்தோ², ஸுகுண்ட³லீ கப்பிதகேஸமஸ்ஸு;

ஆமுத்தஹத்தா²ப⁴ரணோ யஸஸ்ஸீ, தி³ப்³பே³ விமானம்ஹி யதா²பி சந்தி³மா.

1161. ‘‘தி³ப்³பா³ ச வீணா பவத³ந்தி வக்³கு³ம்; அட்ட²ட்ட²கா ஸிக்கி²தா ஸாது⁴ரூபா;

தி³ப்³பா³ ச கஞ்ஞா தித³ஸசரா உளாரா, நச்சந்தி கா³யந்தி பமோத³யந்தி.

1162. ‘‘தே³வித்³தி⁴பத்தோஸி மஹானுபா⁴வோ…பே…

வண்ணோ ச தே ஸப்³ப³தி³ஸா பபா⁴ஸதீ’’தி.

ஸோபி தஸ்ஸ ப்³யாகாஸி –

1163. ‘‘ஸோ தே³வபுத்தோ அத்தமனோ…பே…யஸ்ஸ கம்மஸ்ஸித³ம் ப²லம்’’.

1164. ‘‘அஹம் மனுஸ்ஸேஸு மனுஸ்ஸபூ⁴தோ, ஸங்க³ம்ம ரக்கி²ஸ்ஸம் பரேஸம் தே⁴னுயோ;

ததோ ச ஆகா³ ஸமணோ மமந்திகே, கா³வோ ச மாஸே அக³மம்ஸு கா²தி³தும்.

1165. ‘‘த்³வயஜ்ஜ கிச்சம் உப⁴யஞ்ச காரியம், இச்சேவஹம் ப⁴ந்தே ததா³ விசிந்தயிம்;

ததோ ச ஸஞ்ஞம் படிலத்³த⁴ யோனிஸோ, ‘த³தா³மி ப⁴ந்தே’தி கி²பிம் அனந்தகம்.

1166. ‘‘ஸோ மாஸகே²த்தம் துரிதோ அவாஸரிம், புரா அயம் ப⁴ஞ்ஜதி யஸ்ஸித³ம் த⁴னம்;

ததோ ச கண்ஹோ உரகோ³ மஹாவிஸோ, அட³ம்ஸி பாதே³ துரிதஸ்ஸ மே ஸதோ.

1167. ‘‘ஸ்வாஹம் அட்டோம்ஹி து³க்கே²ன பீளிதோ, பி⁴க்கு² ச தம் ஸாமம் முஞ்சித்வானந்தகம்;

அஹாஸி கும்மாஸம் மமானுகம்பயா, ததோ சுதோ காலகதோம்ஹி தே³வதா.

1168. ‘‘ததே³வ கம்மம் குஸலம் கதம் மயா, ஸுக²ஞ்ச கம்மம் அனுபோ⁴மி அத்தனா;

தயா ஹி ப⁴ந்தே அனுகம்பிதோ பு⁴ஸம், கதஞ்ஞுதாய அபி⁴வாத³யாமி தம்.

1169. ‘‘ஸதே³வகே லோகே ஸமாரகே ச, அஞ்ஞோ முனி நத்தி² தயானுகம்பகோ;

தயா ஹி ப⁴ந்தே அனுகம்பிதோ பு⁴ஸம், கதஞ்ஞுதாய அபி⁴வாத³யாமி தம்.

1170. ‘‘இமஸ்மிம் லோகே பரஸ்மிம் வா பன, அஞ்ஞோ முனீ நத்தி² தயானுகம்பகோ;

தயா ஹி ப⁴ந்தே அனுகம்பிதோ பு⁴ஸம், கதஞ்ஞுதாய அபி⁴வாத³யாமி த’’ந்தி.

அதா²யஸ்மா மஹாமோக்³க³ல்லானோ அத்தனா ச தே³வதாய ச கதி²தனியாமேனேவ தம் ப⁴க³வதோ ஆரோசேஸி. ஸத்தா² தமத்த²ம் பச்சனுபா⁴ஸித்வா தம் அட்டு²ப்பத்திம் கத்வா ஸம்பத்தபரிஸாய த⁴ம்மம் தே³ஸேதும் ‘‘தி³ஸ்வான தே³வம் படிபுச்சி² பி⁴க்கூ²’’திஆதி³மாஹ.

1159. தத்த² தே³வந்தி கோ³பாலதே³வபுத்தம். பி⁴க்கூ²தி ஆயஸ்மந்தம் மஹாமோக்³க³ல்லானம் ஸந்தா⁴ய ஸத்தா² வத³தி. ஸோ ஹி ஸப்³ப³ஸோ பி⁴ன்னகிலேஸதாய பி⁴க்கு². விமானஸ்ஸ ப³ஹுகாலாவட்டா²யிதாய கப்பட்டி²திகதாய ஏவ வா ‘‘சிரட்டி²திகே’’தி வுத்தம், ‘‘சிரட்டி²திக’’ந்திபி கேசி பட²ந்தி. தஞ்ஹி ‘‘தே³வ’’ந்தி இமினா ஸம்ப³ந்தி⁴தப்³ப³ம். ஸோபி ஹி ஸட்டி²ஸதஸஹஸ்ஸாதி⁴கா திஸ்ஸோ வஸ்ஸகோடியோ தத்த² அவட்டா²னதோ ‘‘சிரட்டி²திகே’’தி வத்தப்³ப³தம் லப⁴தி. யதா²பி சந்தி³மாதி யதா² சந்தி³மா தே³வபுத்தோ கந்தஸீதலமனோஹரகிரணஜாலஸமுஜ்ஜலே அத்தனோ தி³ப்³பே³ விமானம்ஹி விரோசதி, ஏவம் விரோசமானந்தி வசனஸேஸா.

1160. அலங்கதோதிஆதி³ தஸ்ஸ தே³வபுத்தஸ்ஸ தே²ரேன புச்சி²தாகாரத³ஸ்ஸனம், தம் ஹேட்டா² வுத்தத்த²மேவ.

1164. ஸங்க³ம்மாதி ஸங்க³மேத்வா, ஸங்க³ம்மாதி வா ஸங்க³ஹேத்வா. ஹேத்வத்தோ²பி ஹி இத⁴ அந்தோனீதோ, ப³ஹூ ஏகதோ ஹுத்வாதி அத்தோ². ஆகா³தி ஆக³ஞ்சி². மாஸேதி மாஸஸஸ்ஸானி.

1165. த்³வயஜ்ஜாதி த்³வயம் அஜ்ஜ ஏதரஹி கிச்சம் காதப்³ப³ம். உப⁴யஞ்ச காரியந்தி வுத்தஸ்ஸேவத்த²ஸ்ஸ பரியாயவசனம். ஸஞ்ஞந்தி த⁴ம்மஸஞ்ஞம். தேனாஹ ‘‘யோனிஸோ’’தி படிலத்³தா⁴தி படிலபி⁴த்வா. கி²பிந்தி பனிக்³கா³ஹாபனவஸேன ஹத்தே² கி²பிம். அனந்தகந்தி நந்தகம் கும்மாஸம் பக்கி²பித்வா ப³ந்தி⁴த்வா ட²பிதம் பிலோதிகம். அ-காரோ சேத்த² நிபாதமத்தம்.

1166. ஸோதி ஸோ அஹம். துரிதோதி துரிதோ ஸம்ப⁴மந்தோ. அவாஸரிந்தி உபக³ச்சி², பாவிஸிம் வா. புரா அயம் ப⁴ஞ்ஜதி யஸ்ஸித³ம் த⁴னந்தி யஸ்ஸ கே²த்தஸாமிகஸ்ஸ இத³ம் மாஸஸஸ்ஸம் த⁴னம், தம் அயம் கோ³க³ணோ ப⁴ஞ்ஜதி புரா தஸ்ஸ ப⁴ஞ்ஜனதோ, ஆமத்³த³னதோ புரேதரமேவாதி அத்தோ². ததோதி தத்த². துரிதஸ்ஸ மே ஸதோதி ஸம்ப⁴மந்தஸ்ஸ மே ஸமானஸ்ஸ, ஸஹஸா க³மனேன மக்³கே³ கண்ஹஸப்பம் அனோலோகேத்வா க³தஸ்ஸாதி அதி⁴ப்பாயோ.

1167. அட்டோம்ஹி து³க்கே²ன பீளிதோதி தேன ஆஸீவிஸட³ம்ஸனேன அட்டோ அட்டிதோ உபத்³து³தோ மரணது³க்கே²ன பா³தி⁴தோ ப⁴வாமி. அஹாஸீதி அஜ்ஜோ²ஹரி, பரிபு⁴ஞ்ஜீதி அத்தோ². ததோ சுதோ காலகதோம்ஹி தே³வதாதி ததோ மனுஸ்ஸத்தபா⁴வதோ சுதோ மரணகாலப்பத்தியா, தத்த² வா ஆயுஸங்கா²ரஸ்ஸ கே²பனஸங்கா²தஸ்ஸ காலஸ்ஸ கதத்தா காலகதோ, தத³னந்தரமேவ ச அம்ஹி தே³வதா தே³வத்தபா⁴வப்பத்தியா தே³வதா ஹோமீதி அத்தோ².

1169. தயாதி தயா ஸதி³ஸோ அஞ்ஞோ முனி மோனேய்யகு³ணயுத்தோ இஸி நத்தி². தயாதி வா நிஸ்ஸக்கே இத³ம் கரணவசனம். ஸேஸம் வுத்தனயமேவ.

கோ³பாலவிமானவண்ணனா நிட்டி²தா.