7. ஸாரிபுத்தஸுத்தவண்ணனா

37. ஸத்தமே அபுப்³ப³ம் நத்தி². கா³தா²ய அதி⁴சேதஸோதி அதி⁴சித்தவதோ, ஸப்³ப³சித்தானம் அதி⁴கேன அரஹத்தப²லசித்தேன ஸமன்னாக³தஸ்ஸாதி அத்தோ². அப்பமஜ்ஜதோதி ந பமஜ்ஜதோ, அப்பமாதே³ன அனவஜ்ஜத⁴ம்மேஸு ஸாதச்சகிரியாய ஸமன்னாக³தஸ்ஸாதி வுத்தம் ஹோதி. முனினோதி ‘‘யோ முனாதி உபோ⁴ லோகே, முனி தேன பவுச்சதீ’’தி (த⁴. ப. 269; சூளனி. மேத்தகூ³மாணவபுச்சா²னித்³தே³ஸ 21) ஏவம் உப⁴யலோகமுனனேன மோனம் வுச்சதி ஞாணம், தேன அரஹத்தப²லஞாணஸங்கா²தேன ஞாணேன ஸமன்னாக³தத்தா வா கீ²ணாஸவோ முனி நாம, தஸ்ஸ முனினோ. மோனபதே²ஸு ஸிக்க²தோதி அரஹத்தஞாணஸங்கா²தஸ்ஸ மோனஸ்ஸ பதே²ஸு ஸத்ததிம்ஸபோ³தி⁴பக்கி²யத⁴ம்மேஸு தீஸு வா ஸிக்கா²ஸு ஸிக்க²தோ. இத³ஞ்ச புப்³ப³பா⁴க³ப்படிபத³ம் க³ஹேத்வா வுத்தம். பரினிட்டி²தஸிக்கோ² ஹி அரஹா, தஸ்மா ஏவம் ஸிக்க²தோ, இமாய ஸிக்கா²ய முனிபா⁴வம் பத்தஸ்ஸ முனினோதி ஏவமேத்த² அத்தோ² த³ட்ட²ப்³போ³. யஸ்மா ச ஏததே³வ, தஸ்மா ஹேட்டி²மமக்³க³ப²லசித்தானம் வஸேன அதி⁴சேதஸோ, சதுஸச்சஸம்போ³த⁴படிபத்தியம் அப்பமாத³வஸேன அப்பமஜ்ஜதோ, மக்³க³ஞாணஸமன்னாக³மேன முனினோதி ஏவமேதேஸம் திண்ணம் பதா³னம் அத்தோ² யுஜ்ஜதியேவ. அத² வா ‘‘அப்பமஜ்ஜதோ ஸிக்க²தோ’’தி பதா³னம் ஹேதுஅத்த²தா த³ட்ட²ப்³பா³ அப்பமஜ்ஜனஹேது ஸிக்க²னஹேது ச அதி⁴சேதஸோதி.

ஸோகா ந ப⁴வந்தி தாதி³னோதி தாதி³ஸஸ்ஸ கீ²ணாஸவமுனினோ அப்³ப⁴ந்தரே இட்ட²வியோகா³தி³வத்து²கா ஸோகா சித்தஸந்தாபா ந ஹோந்தி. அத² வா தாதி³னோதி தாதி³லக்க²ணஸமன்னாக³தஸ்ஸ ஏவரூபஸ்ஸ முனினோ ஸோகா ந ப⁴வந்தீதி அயமேத்த² அத்தோ². உபஸந்தஸ்ஸாதி ராகா³தீ³னம் அச்சந்தூபஸமேன உபஸந்தஸ்ஸ. ஸதா³ ஸதீமதோதி ஸதிவேபுல்லப்பத்தியா நிச்சகாலம் ஸதியா அவிரஹிதஸ்ஸ.

ஏத்த² ச ‘‘அதி⁴சேதஸோ’’தி இமினா அதி⁴சித்தஸிக்கா², ‘‘அப்பமஜ்ஜதோ’’தி ஏதேன அதி⁴ஸீலஸிக்கா², ‘‘முனினோ மோனபதே²ஸு ஸிக்க²தோ’’தி ஏதேஹி அதி⁴பஞ்ஞாஸிக்கா². ‘‘முனினோ’’தி வா ஏதேன அதி⁴பஞ்ஞாஸிக்கா², ‘‘மோனபதே²ஸு ஸிக்க²தோ’’தி ஏதேன தாஸம் லோகுத்தரஸிக்கா²னம் புப்³ப³பா⁴க³படிபதா³, ‘‘ஸோகா ந ப⁴வந்தீ’’திஆதீ³ஹி ஸிக்கா²பாரிபூரியா ஆனிஸம்ஸோ பகாஸிதோதி வேதி³தப்³ப³ம். ஸேஸம் வுத்தனயமேவ.

ஸத்தமஸுத்தவண்ணனா நிட்டி²தா.