8. ஸுந்த³ரீஸுத்தவண்ணனா

38. அட்ட²மே ஸக்கதோதிஆதீ³னம் பதா³னம் அத்தோ² ஹேட்டா² வண்ணிதோயேவ. அஸஹமானாதி ந ஸஹமானா, உஸூயந்தாதி அத்தோ². பி⁴க்கு²ஸங்க⁴ஸ்ஸ ச ஸக்காரம் அஸஹமானாதி ஸம்ப³ந்தோ⁴.

ஸுந்த³ரீதி தஸ்ஸா நாமம். ஸா கிர தஸ்மிம் காலே ஸப்³ப³பரிப்³பா³ஜிகாஸு அபி⁴ரூபா த³ஸ்ஸனீயா பாஸாதி³கா பரமாய வண்ணபோக்க²ரதாய ஸமன்னாக³தா, தேனேவ ஸா ‘‘ஸுந்த³ரீ’’தி பஞ்ஞாயித்த². ஸா ச அனதீதயோப்³ப³னா அஸம்யதஸமாசாராவ ஹோதி, தஸ்மா தே ஸுந்த³ரிம் பரிப்³பா³ஜிகம் பாபகம்மே உய்யோஜேஸும். தே ஹி அஞ்ஞதித்தி²யா பு³த்³து⁴ப்பாத³தோ பட்டா²ய ஸயம் ஹதலாப⁴ஸக்காரா ஹேட்டா² அக்கோஸஸுத்தவண்ணனாயம் ஆக³தனயேன ப⁴க³வதோ பி⁴க்கு²ஸங்க⁴ஸ்ஸ ச உளாரம் அபரிமிதம் லாப⁴ஸக்காரம் பவத்தமானம் தி³ஸ்வா இஸ்ஸாபகதா ஏகதோ ஹுத்வா ஸம்மந்தயிம்ஸு – மயம் ஸமணஸ்ஸ கோ³தமஸ்ஸ உப்பன்னகாலதோ பட்டா²ய நட்டா² ஹதலாப⁴ஸக்காரா, ந நோ கோசி அத்தி²பா⁴வம்பி ஜானாதி, கிம் நிஸ்ஸாய நு கோ² லோகோ ஸமணே கோ³தமே அபி⁴ப்பஸன்னோ உளாரம் ஸக்காரஸம்மானம் உபனேதீதி? தத்தே²கோ ஆஹ – ‘‘உச்சாகுலப்பஸுதோ அஸம்பி⁴ன்னாய மஹாஸம்மதப்பவேணியா ஜாதோ’’தி, அபரோ ‘‘அபி⁴ஜாதியம் தஸ்ஸ அனேகானி அச்ச²ரியானி பாதுபூ⁴தானீ’’தி, அஞ்ஞோ ‘‘காலதே³விலம் வந்தா³பேதும் உபனீதஸ்ஸ பாதா³ பரிவத்தித்வா தஸ்ஸ ஜடாஸு பதிட்டி²தா’’தி, அபரோ ‘‘வப்பமங்க³லகாலே ஜம்பு³ச்சா²யாய ஸயாபிதஸ்ஸ வீதிக்கந்தேபி மஜ்ஜ²ன்ஹிகே ஜம்பு³ச்சா²யா அபரிவத்தித்வா டி²தா’’தி, அஞ்ஞோ ‘‘அபி⁴ரூபோ த³ஸ்ஸனீயோ பாஸாதி³கோ ரூபஸம்பத்தியா’’தி, அபரோ ‘‘ஜிண்ணாதுரமதபப்³ப³ஜிதஸங்கா²தனிமித்தே தி³ஸ்வா ஸம்வேக³ஜாதோ ஆகா³மினம் சக்கவத்திரஜ்ஜம் பஹாய பப்³ப³ஜிதோ’’தி. ஏவம் அபரிமாணகாலே ஸம்ப⁴தம் அனஞ்ஞஸாதா⁴ரணம் ப⁴க³வதோ புஞ்ஞஞாணஸம்பா⁴ரம் உக்கம்ஸபாரமிப்பத்தம் நிருபமம் ஸல்லேக²ப்படிபத³ம் அனுத்தரஞ்ச ஞாணபஹானஸம்பதா³தி³பு³த்³தா⁴னுபா⁴வம் அஜானந்தா அத்தனா யதா²தி³ட்ட²ம் யதா²ஸுதம் த⁴ரமானம் தம் தம் ப⁴க³வதோ ப³ஹுமானகாரணம் கித்தேத்வா அப³ஹுமானகாரணம் பரியேஸித்வா அபஸ்ஸந்தா ‘‘கேன நு கோ² காரணேன மயம் ஸமணஸ்ஸ கோ³தமஸ்ஸ அயஸம் உப்பாதே³த்வா லாப⁴ஸக்காரம் நாஸேய்யாமா’’தி. தேஸு ஏகோ திகி²ணமந்தீ ஏவமாஹ – ‘‘அம்போ⁴ இமஸ்மிம் ஸத்தலோகே மாதுகா³மஸுகே² அஸத்தஸத்தா நாம நத்தி², அயஞ்ச ஸமணோ கோ³தமோ அபி⁴ரூபோ தே³வஸமோ தருணோ, அத்தனோ ஸமரூபம் மாதுகா³மம் லபி⁴த்வா ஸஜ்ஜேய்ய. அதா²பி ந ஸஜ்ஜேய்ய, ஜனஸ்ஸ பன ஸங்கியோ ப⁴வேய்ய, ஹந்த³ மயம் ஸுந்த³ரிம் பரிப்³பா³ஜிகம் ததா² உய்யோஜேம, யதா² ஸமணஸ்ஸ கோ³தமஸ்ஸ அயஸோ பத²வியம் பத்த²ரேய்யா’’தி.

தம் ஸுத்வா இதரே ‘‘இத³ம் ஸுட்டு² தயா சிந்திதம், ஏவஞ்ஹி கதே ஸமணோ கோ³தமோ அயஸகேன உபத்³து³தோ ஸீஸம் உக்கி²பிதும் அஸக்கோந்தோ யேன வா தேன வா பலாயிஸ்ஸதீ’’தி ஸப்³பே³வ ஏகஜ்ஜா²ஸயா ஹுத்வா ததா² உய்யோஜேதும் ஸுந்த³ரியா ஸந்திகம் அக³மம்ஸு. ஸா தே தி³ஸ்வா ‘‘கிம் தும்ஹே ஏகதோ ஆக³தத்தா²’’தி ஆஹ. தித்தி²யா அனாலபந்தா ஆராமபரியந்தே படிச்ச²ன்னே டா²னே நிஸீதி³ம்ஸு. ஸா தத்த² க³ந்த்வா புனப்புனம் ஆலபந்தீ படிவசனம் அலபி⁴த்வா கிம் தும்ஹாகம் அபரஜ்ஜ²ம்? கஸ்மா மே படிவசனம் ந தே³தா²தி? ததா² ஹி பன த்வம் அம்ஹே விஹேடி²யமானே அஜ்ஜு²பேக்க²ஸீதி. கோ தும்ஹே விஹேடே²தீதி? ‘‘கிம் பன த்வம் ந பஸ்ஸஸி, ஸமணம் கோ³தமம் அம்ஹே விஹேடே²த்வா ஹதலாப⁴ஸக்காரே கத்வா விசரந்த’’ந்தி வத்வா ‘‘தத்த² மயா கிம் காதப்³ப³’’ந்தி வுத்தே ‘‘தேன ஹி த்வம் அபி⁴க்க²ணம் ஜேதவனஸமீபம் க³ந்த்வா மஹாஜனஸ்ஸ ஏவஞ்சேவஞ்ச வதே³ய்யாஸீ’’தி ஆஹம்ஸு. ஸாபி ‘‘ஸாதூ⁴’’தி ஸம்படிச்சி². தேன வுத்தம் – ‘‘அஞ்ஞதித்தி²யா பரிப்³பா³ஜகா ப⁴க³வதோஸக்காரம் அஸஹமானா’’திஆதி³.

தத்த² உஸ்ஸஹஸீதி ஸக்கோஸி. அத்த²ந்தி ஹிதம் கிச்சம் வா. க்யாஹந்தி கிம் அஹம். யஸ்மா தே தித்தி²யா தஸ்ஸா அஞ்ஞாதகாபி ஸமானா பப்³ப³ஜ்ஜஸம்ப³ந்த⁴மத்தேன ஸங்க³ண்ஹிதும் ஞாதகா விய ஹுத்வா ‘‘உஸ்ஸஹஸி த்வம் ப⁴கி³னி ஞாதீனம் அத்த²ம் காது’’ந்தி ஆஹம்ஸு. தஸ்மா ஸாபி மிக³ம் வல்லி விய பாதே³ லக்³கா³ ஜீவிதம்பி மே பரிச்சத்தம் ஞாதீனம் அத்தா²யாதி ஆஹ.

தேன ஹீதி ‘‘யஸ்மா த்வம் ‘ஜீவிதம்பி மே தும்ஹாகம் அத்தா²ய பரிச்சத்த’ந்தி வத³ஸி, த்வஞ்ச பட²மவயே டி²தா அபி⁴ரூபா ஸோப⁴க்³க³ப்பத்தா ச, தஸ்மா யதா² தம் நிஸ்ஸாய ஸமணஸ்ஸ கோ³தமஸ்ஸ அயஸோ உப்பஜ்ஜிஸ்ஸதி, ததா² கரேய்யாஸீ’’தி வத்வா ‘‘அபி⁴க்க²ணம் ஜேதவனம் க³ச்சா²ஹீ’’தி உய்யோஜேஸும். ஸாபி கோ² பா³லா ககசத³ந்தபந்தியா புப்பா²வலிகீளம் கீளிதுகாமா விய, பபி⁴ன்னமத³ம் சண்ட³ஹத்தி²ம் ஸோண்டா³ய பராமஸந்தீ விய, நலாடேன மச்சும் க³ண்ஹந்தீ விய தித்தி²யானம் வசனம் ஸம்படிச்சி²த்வா மாலாக³ந்த⁴விலேபனதம்பூ³லமுக²வாஸாதீ³னி க³ஹேத்வா மஹாஜனஸ்ஸ ஸத்து² த⁴ம்மதே³ஸனம் ஸுத்வா நக³ரம் பவிஸனகாலே ஜேதவனாபி⁴முகீ² க³ச்ச²ந்தீ ‘‘கஹம் க³ச்ச²ஸீ’’தி ச புட்டா² ‘‘ஸமணஸ்ஸ கோ³தமஸ்ஸ ஸந்திகம், அஹஞ்ஹி தேன ஸத்³தி⁴ம் ஏகக³ந்த⁴குடியம் வஸாமீ’’தி வத்வா அஞ்ஞதரஸ்மிம் தித்தி²யாராமே வஸித்வா பாதோவ ஜேதவனமக்³க³ம் ஓதரித்வா நக³ராபி⁴முகீ² ஆக³ச்ச²ந்தீ ‘‘கிம் ஸுந்த³ரி கஹம் க³தாஸீ’’தி ச புட்டா² ‘‘ஸமணேன கோ³தமேன ஸத்³தி⁴ம் ஏகக³ந்த⁴குடியம் வஸித்வா தம் கிலேஸரதியா ரமாபேத்வா ஆக³தாம்ஹீ’’தி வத³தி. தேன வுத்தம் – ‘‘ஏவம் அய்யாதி கோ² ஸுந்த³ரீ பரிப்³பா³ஜிகா தேஸம் அஞ்ஞதித்தி²யானம் பரிப்³பா³ஜகானம் படிஸ்ஸுத்வா அபி⁴க்க²ணம் ஜேதவனம் அக³மாஸீ’’தி.

தித்தி²யா கதிபாஹஸ்ஸ அச்சயேன து⁴த்தானம் கஹாபணே த³த்வா ‘‘க³ச்ச²த², ஸுந்த³ரிம் மாரேத்வா ஸமணஸ்ஸ கோ³தமஸ்ஸ க³ந்த⁴குடியா அவிதூ³ரே மாலாகசவரந்தரே நிக்கி²பித்வா ஏதா²’’தி வதி³ம்ஸு. தே ததா² அகம்ஸு. ததோ தித்தி²யா ‘‘ஸுந்த³ரிம் ந பஸ்ஸாமா’’தி கோலாஹலம் கத்வா ரஞ்ஞோ ஆரோசேத்வா ‘‘கத்த² பன தும்ஹே பரிஸங்கதா²’’தி ரஞ்ஞா வுத்தா இமேஸு தி³வஸேஸு ஜேதவனே வஸதி, தத்த²ஸ்ஸா பவத்திம் ந ஜானாமாதி. ‘‘தேன ஹி க³ச்ச²த², நம் தத்த² விசினதா²’’தி ரஞ்ஞா அனுஞ்ஞாதா அத்தனோ உபட்டா²கே க³ஹேத்வா ஜேதவனம் க³ந்த்வா விசினந்தா விய ஹுத்வா மாலாகசவரம் ப்³யூஹித்வா தஸ்ஸா ஸரீரம் மஞ்சகம் ஆரோபேத்வா நக³ரம் பவேஸேத்வா ‘‘ஸமணஸ்ஸ கோ³தமஸ்ஸ ஸாவகா ‘ஸத்து²னா கதம் பாபகம்மம் படிச்சா²தே³ஸ்ஸாமா’தி ஸுந்த³ரிம் மாரேத்வா மாலாகசவரந்தரே நிக்கி²பிம்ஸூ’’தி ரஞ்ஞோ ஆரோசேஸும். ராஜாபி அனுபபரிக்கி²த்வா ‘‘தேன ஹி க³ச்ச²த², நக³ரம் ஆஹிண்ட³தா²’’தி ஆஹ. தே நக³ரவீதீ²ஸு ‘‘பஸ்ஸத² ஸமணானம் ஸக்யபுத்தியானம் கம்ம’’ந்திஆதீ³னி வத³ந்தா விசரித்வா புன ரஞ்ஞோ நிவேஸனத்³வாரம் அக³மம்ஸு. ராஜா ஸுந்த³ரியா ஸரீரம் ஆமகஸுஸானே அட்டகம் ஆரோபேத்வா ரக்கா²பேஸி. ஸாவத்தி²வாஸினோ ட²பேத்வா அரியஸாவகே யேபு⁴ய்யேன ‘‘பஸ்ஸத² ஸமணானம் ஸக்யபுத்தியானம் கம்ம’’ந்திஆதீ³னி வத்வா அந்தோனக³ரே ப³ஹினக³ரே ச பி⁴க்கூ² அக்கோஸந்தா விசரிம்ஸு. தேன வுத்தம் – ‘‘யதா³ தே அஞ்ஞிம்ஸு தித்தி²யா பரிப்³பா³ஜகா ‘வோதி³ட்டா² கோ² ஸுந்த³ரீ’’’திஆதி³.

தத்த² அஞ்ஞிம்ஸூதி ஜானிம்ஸு. வோதி³ட்டா²தி ப்³யபதி³ட்டா², ஜேதவனம் ஆக³ச்ச²ந்தீ ச க³ச்ச²ந்தீ ச விஸேஸதோ தி³ட்டா², ப³ஹுலம் தி³ட்டா²தி அத்தோ². பரிகா²கூபேதி தீ³கி⁴காவாடே. யா ஸா, மஹாராஜ, ஸுந்த³ரீதி, மஹாராஜ, யா ஸா இமஸ்மிம் நக³ரே ரூபஸுந்த³ரதாய ‘‘ஸுந்த³ரீ’’தி பாகடா அபி⁴ஞ்ஞாதா பரிப்³பா³ஜிகா. ஸா நோ ந தி³ஸ்ஸதீதி ஸா அம்ஹாகம் சக்கு² விய ஜீவிதம் விய ச பியாயிதப்³பா³, இதா³னி ந தி³ஸ்ஸதி. யதா²னிக்கி²த்தந்தி புரிஸே ஆணாபேத்வா மாலாகசவரந்தரே அத்தனா யதா²ட²பிதம். ‘‘யதா²னிகா²த’’ந்திபி பாடோ², பத²வியம் நிகா²தப்பகாரந்தி அத்தோ².

ரதி²யாய ரதி²யந்தி வீதி²தோ வீதி²ம். வீதீ²தி ஹி வினிவிஜ்ஜ²னகரச்சா². ஸிங்கா⁴டகந்தி திகோணரச்சா². அலஜ்ஜினோதி ந லஜ்ஜினோ, பாபஜிகு³ச்சா²விரஹிதாதி அத்தோ². து³ஸ்ஸீலாதி நிஸ்ஸீலா. பாபத⁴ம்மாதி லாமகஸபா⁴வா நிஹீனாசாரா. முஸாவாதி³னோதி து³ஸ்ஸீலா ஸமானா ‘‘ஸீலவந்தோ மய’’ந்தி அலிகவாதி³தாய முஸாவாதி³னோ. அப்³ரஹ்மசாரினோதி ‘‘மேது²னப்படிஸேவிதாய அஸேட்ட²சாரினோ இமே ஹி நாமா’’தி ஹீளேந்தா வத³ந்தி. த⁴ம்மசாரினோதி குஸலத⁴ம்மசாரினோ. ஸமசாரினோதி காயகம்மாதி³ஸமசாரினோ. கல்யாணத⁴ம்மாதி ஸுந்த³ரஸபா⁴வா, படிஜானிஸ்ஸந்தி நாமாதி ஸம்ப³ந்தோ⁴. நாமஸத்³த³யோகே³ன ஹி ஏத்த² படிஜானிஸ்ஸந்தீதி அனாக³தகாலவசனம். ஸாமஞ்ஞந்தி ஸமணபா⁴வோ ஸமிதபாபதா. ப்³ரஹ்மஞ்ஞந்தி ஸேட்ட²பா⁴வோ பா³ஹிதபாபதா. குதோதி கேன காரணேன. அபக³தாதி அபேதா பரிப⁴ட்டா². புரிஸகிச்சந்தி மேது²னப்படிஸேவனம் ஸந்தா⁴ய வத³ந்தி.

அத² பி⁴க்கூ² தம் பவத்திம் ப⁴க³வதோ ஆரோசேஸும். ஸத்தா² ‘‘தேன ஹி, பி⁴க்க²வே, தும்ஹேபி தே மனுஸ்ஸே இமாய கா³தா²ய படிசோதே³தா²’’தி வத்வா ‘‘அபூ⁴தவாதீ³’’தி கா³த²மாஹ. தம் ஸந்தா⁴ய வுத்தம் – ‘‘அத² கோ² ஸம்ப³ஹுலா…பே… நிஹீனகம்மா மனுஜா பரத்தா²’’தி. தத்த² நேஸோ, பி⁴க்க²வே, ஸத்³தோ³ சிரம் ப⁴விஸ்ஸதீதி இத³ம் ஸத்தா² தஸ்ஸ அயஸஸ்ஸ நிப்ப²த்திம் ஸப்³ப³ஞ்ஞுதஞ்ஞாணேன ஜானித்வா பி⁴க்கூ² ஸமஸ்ஸாஸேந்தோ ஆஹ.

கா³தா²யம் அபூ⁴தவாதீ³தி பரஸ்ஸ தோ³ஸம் அதி³ஸ்வாவ முஸாவாத³ம் கத்வா அபூ⁴தேன அதச்சே²ன பரம் அப்³பா⁴சிக்க²ந்தோ. யோ வாபி கத்வாதி யோ வா பன பாபகம்மம் கத்வா ‘‘நாஹம் ஏதம் கரோமீ’’தி ஆஹ. பேச்ச ஸமா ப⁴வந்தீதி தே உபோ⁴பி ஜனா இதோ பரலோகம் க³ந்த்வா நிரயூபக³மனேன க³தியா ஸமா ப⁴வந்தி. க³தியேவ ஹி நேஸம் பரிச்சி²ன்னா, ஆயூ பன அபரிச்சி²ன்னா. ப³ஹுகஞ்ஹி பாபம் கத்வா சிரம் நிரயே பச்சதி, பரித்தகம் கத்வா அப்பமத்தகமேவ காலம் பச்சதி. யஸ்மா பன நேஸம் உபி⁴ன்னம்பி லாமகமேவ கம்மம், தேன வுத்தம் – நிஹீனகம்மா மனுஜா பரத்தா²தி. ‘‘பரத்தா²’’தி இமஸ்ஸ பன பத³ஸ்ஸ புரதோ ‘‘பேச்சா’’திபதே³ன ஸம்ப³ந்தோ⁴, பேச்ச பரத்த² இதோ க³ந்த்வா தே நிஹீனகம்மா பரலோகே ஸமா ப⁴வந்தீதி அத்தோ².

பரியாபுணித்வாதி உக்³க³ஹேத்வா. அகாரகாதி அபராத⁴ஸ்ஸ ந காரகா. நயிமேஹி கதந்தி ஏவம் கிர நேஸமஹோஸி – இமேஹி ஸமணேஹி ஸக்யபுத்தியேஹி அத்³தா⁴ தம் பாபகம்மம் ந கதம், யம் அஞ்ஞதித்தி²யா உக்³கோ⁴ஸித்வா ஸகலனக³ரம் ஆஹிண்டி³ம்ஸு, யஸ்மா இமே அம்ஹேஸு ஏவம் அஸப்³பா⁴ஹி ப²ருஸாஹி வாசாஹி அப்³பா⁴சிக்க²ந்தேஸுபி ந கிஞ்சி விகாரம் த³ஸ்ஸேந்தி, க²ந்திஸோரச்சஞ்ச ந விஜஹந்தி, கேவலம் பன ‘‘அபூ⁴தவாதீ³ நிரயம் உபேதீ’’தி த⁴ம்மம்யேவ வத³ந்தா ஸபந்தியேவ, இமே ஸமணா ஸக்யபுத்தியா அம்ஹே அனுபதா⁴ரேத்வா அப்³பா⁴சிக்க²ந்தே ஸபந்தி, ஸபத²ம் கரோந்தா விய வத³ந்தி. அத² வா ‘‘யோ வாபி கத்வா ‘ந கரோமி’ சாஹா’’தி வத³ந்தா ஸபந்தி, அத்தனோ அகாரகபா⁴வம் போ³தே⁴தும் அம்ஹாகம் ஸபத²ம் கரோந்தி இமேதி அத்தோ².

தேஸஞ்ஹி மனுஸ்ஸானம் ப⁴க³வதா பா⁴ஸிதகா³தா²ய ஸவனஸமனந்தரமேவ பு³த்³தா⁴னுபா⁴வேன ஸாரஜ்ஜம் ஓக்கமி, ஸம்வேகோ³ உப்பஜ்ஜி ‘‘நயித³ம் அம்ஹேஹி பச்சக்க²தோ தி³ட்ட²ம், ஸுதம் நாம ததா²பி ஹோதி, அஞ்ஞதா²பி ஹோதி, ஏதே ச அஞ்ஞதித்தி²யா இமேஸம் அனத்த²காமா அஹிதகாமா, தஸ்மா தே ஸத்³தா⁴ய நயித³ம் அம்ஹேஹி வத்தப்³ப³ம், து³ஜ்ஜானா ஹி ஸமணா’’தி. தே ததோ பட்டா²ய ததோ ஓரமிம்ஸு.

ராஜாபி யேஹி ஸுந்த³ரீ மாரிதா, தேஸம் ஜானனத்த²ம் புரிஸே ஆணாபேஸி. அத² தே து⁴த்தா தேஹி கஹாபணேஹி ஸுரம் பிவந்தா அஞ்ஞமஞ்ஞம் கலஹம் கரிம்ஸு. தேஸு ஹி ஏகோ ஏகம் ஆஹ – ‘‘த்வம் ஸுந்த³ரிம் ஏகப்பஹாரேன மாரேத்வா மாலாகசவரந்தரே கி²பித்வா ததோ லத்³த⁴கஹாபணேஹி ஸுரம் பிவஸி, ஹோது ஹோதூ’’தி. ராஜபுரிஸா தம் ஸுத்வா தே து⁴த்தே க³ஹேத்வா ரஞ்ஞோ த³ஸ்ஸேஸும். ராஜா ‘‘தும்ஹேஹி ஸா மாரிதா’’தி தே து⁴த்தே புச்சி². ‘‘ஆம, தே³வா’’தி. ‘‘கேஹி மாராபிதா’’தி? ‘‘அஞ்ஞதித்தி²யேஹி, தே³வா’’தி. ராஜா தித்தி²யே பக்கோஸாபேத்வா தமத்த²ம் படிஜானாபேத்வா, ‘‘அயம் ஸுந்த³ரீ தஸ்ஸ ஸமணஸ்ஸ கோ³தமஸ்ஸ அவண்ணம் ஆரோபேதுகாமேஹி அம்ஹேஹி மாராபிதா, நேவ கோ³தமஸ்ஸ, ந கோ³தமஸாவகானம் தோ³ஸோ அத்தி², அம்ஹாகமேவ தோ³ஸோதி ஏவம் வத³ந்தா நக³ரம் ஆஹிண்ட³தா²’’தி ஆணாபேஸி. தே ததா² அகம்ஸு. மஹாஜனோ ஸம்மதே³வ ஸத்³த³ஹி. தித்தி²யானம் தி⁴க்காரம் அகாஸி, தித்தி²யா மனுஸ்ஸவத⁴த³ண்ட³ம் பாபுணிம்ஸு. ததோ பட்டா²ய பு³த்³த⁴ஸ்ஸ பி⁴க்கு²ஸங்க⁴ஸ்ஸ ச பி⁴ய்யோஸோமத்தாய ஸக்காரஸம்மானோ மஹா அஹோஸி. பி⁴க்கூ² அச்ச²ரியப்³பு⁴தசித்தஜாதா ப⁴க³வந்தம் அபி⁴வாதே³த்வா அத்தமனா படிவேதே³ஸும். தேன வுத்தம் – ‘‘அத² கோ² ஸம்ப³ஹுலா பி⁴க்கூ²…பே… அந்தரஹிதோ ஸோ, ப⁴ந்தே, ஸத்³தோ³’’தி.

கஸ்மா பன ப⁴க³வா ‘‘தித்தி²யானம் இத³ம் கம்ம’’ந்தி பி⁴க்கூ²னம் நாரோசேஸி? அரியானம் தாவ ஆரோசனேன பயோஜனம் நத்தி², புது²ஜ்ஜனேஸு பன ‘‘யே ந ஸத்³த³ஹேய்யும், தேஸம் தம் தீ³க⁴ரத்தம் அஹிதாய து³க்கா²ய ஸம்வத்தேய்யா’’தி நாரோசேஸி. அபிசேதம் பு³த்³தா⁴னம் அனாசிண்ணம், யம் அனாக³தஸ்ஸ ஈதி³ஸஸ்ஸ வத்து²ஸ்ஸ ஆசிக்க²னம். பரானுத்³தே³ஸிகமேவ ஹி ப⁴க³வா ஸம்கிலேஸபக்க²ம் விபா⁴வேதி, கம்மஞ்ச கதோகாஸம் ந ஸக்கா நிவத்தேதுந்தி அப்³ப⁴க்கா²னம் தன்னிமித்தஞ்ச ப⁴க³வா அஜ்ஜு²பேக்க²ந்தோ நிஸீதி³. வுத்தஞ்ஹேதம் –

‘‘ந அந்தலிக்கே² ந ஸமுத்³த³மஜ்ஜே²,

ந பப்³ப³தானம் விவரம் பவிஸ்ஸ;

ந விஜ்ஜதீ ஸோ ஜக³திப்பதே³ஸோ,

யத்த²ட்டி²தோ முச்சேய்ய பாபகம்மா’’தி. (த⁴. ப. 127; மி. ப. 4.2.4);

ஏதமத்த²ம் விதி³த்வாதி மம்மச்சே²த³னவஸேனாபி பா³லஜனேஹி பவத்திதம் து³ருத்தவசனம் க²ந்திப³லஸமன்னாக³தஸ்ஸ தீ⁴ரஸ்ஸ து³த்திதிக்கா² நாம நத்தீ²தி இமமத்த²ம் ஸப்³பா³காரதோ விதி³த்வா. இமம் உதா³னந்தி இமம் அதி⁴வாஸனக²ந்திப³லவிபா⁴வனம் உதா³னம் உதா³னேஸி.

தத்த² துத³ந்தி வாசாய ஜனா அஸஞ்ஞதா, ஸரேஹி ஸங்கா³மக³தம்வ குஞ்ஜரந்தி காயிகஸம்வராதீ³ஸு கஸ்ஸசிபி ஸம்வரஸ்ஸ அபா⁴வேன அஸம்யதா அவினீதா பா³லஜனா ஸரேஹி ஸாயகேஹி ஸங்கா³மக³தம் யுத்³த⁴க³தம் குஞ்ஜரம்வ ஹத்தி²னாக³ம் படியோதா⁴ விய வாசாஸத்தீஹி துத³ந்தி விஜ்ஜ²ந்தி, அயம் தேஸம் ஸபா⁴வோ. ஸுத்வான வாக்யம் ப²ருஸம் உதீ³ரிதம், அதி⁴வாஸயே பி⁴க்கு² அது³ட்ட²சித்தோதி தம் பன தேஹி பா³லஜனேஹி உதீ³ரிதம் பா⁴ஸிதம் மம்மக⁴ட்டனவஸேன பவத்திதம் ப²ருஸம் வாக்யம் வசனம் அபூ⁴தம் பூ⁴ததோ நிப்³பே³டே²ந்தோ மம ககசூபமஓவாத³ம் (ம. நி. 1.222 ஆத³யோ) அனுஸ்ஸரந்தோ ஈஸகம்பி அது³ட்ட²சித்தோ ஹுத்வா ‘‘ஸம்ஸாரஸபா⁴வோ ஏஸோ’’தி ஸம்ஸாரே ப⁴யம் இக்க²ணஸீலோ பி⁴க்கு² அதி⁴வாஸயே, அதி⁴வாஸனக²ந்தியம் ட²த்வா க²மேய்யாதி அத்தோ².

ஏத்தா²ஹ – கிம் பன தம் கம்மம், யம் அபரிமாணகாலம் ஸக்கச்சம் உபசிதவிபுலபுஞ்ஞஸம்பா⁴ரோ ஸத்தா² ஏவம் தா³ருணம் அபூ⁴தப்³ப⁴க்கா²னம் பாபுணீதி? வுச்சதே – அயம் ஸோ ப⁴க³வா போ³தி⁴ஸத்தபூ⁴தோ அதீதஜாதியம் முனாளி நாம து⁴த்தோ ஹுத்வா பாபஜனஸேவீ அயோனிஸோமனஸிகாரப³ஹுலோ விசரதி. ஸோ ஏகதி³வஸம் ஸுரபி⁴ம் நாம பச்சேகஸம்பு³த்³த⁴ம் நக³ரம் பிண்டா³ய பவிஸிதும் சீவரம் பாருபந்தம் பஸ்ஸி. தஸ்மிஞ்ச ஸமயே அஞ்ஞதரா இத்தீ² தஸ்ஸ அவிதூ³ரேன க³ச்ச²தி. து⁴த்தோ ‘‘அப்³ரஹ்மசாரீ அயம் ஸமணோ’’தி அப்³பா⁴சிக்கி². ஸோ தேன கம்மேன ப³ஹூனி வஸ்ஸஸதஸஹஸ்ஸானி நிரயே பச்சித்வா தஸ்ஸேவ கம்மஸ்ஸ விபாகாவஸேஸேன இதா³னி பு³த்³தோ⁴ ஹுத்வாபி ஸுந்த³ரியா காரணா அபூ⁴தப்³ப⁴க்கா²னம் பாபுணி. யதா² சேதம், ஏவம் சிஞ்சமாணவிகாதீ³னம் விகாரகித்தீ²னம் ப⁴க³வதோ அப்³ப⁴க்கா²னாதீ³னி து³க்கா²னி பத்தானி, ஸப்³பா³னி புப்³பே³ கதஸ்ஸ கம்மஸ்ஸ விபாகாவஸேஸானி, யானி ‘‘கம்மபிலோதிகானீ’’தி வுச்சந்தி. வுத்தஞ்ஹேதம் அபதா³னே (அப. தே²ர 1.39.64-96) –

‘‘அனோதத்தஸராஸன்னே, ரமணீயே ஸிலாதலே;

நானாரதனபஜ்ஜோதே, நானாக³ந்த⁴வனந்தரே.

‘‘மஹதா பி⁴க்கு²ஸங்கே⁴ன, பரேதோ லோகனாயகோ;

ஆஸீனோ ப்³யாகரீ தத்த², புப்³ப³கம்மானி அத்தனோ.

‘‘ஸுணாத² பி⁴க்க²வோ மய்ஹம், யம் கம்மம் பகதம் மயா;

பிலோதிகஸ்ஸ கம்மஸ்ஸ, பு³த்³த⁴த்தேபி விபச்சதி.

1. ‘‘முனாளி நாமஹம் து⁴த்தோ, புப்³பே³ அஞ்ஞாஸு ஜாதிஸு;

பச்சேகபு³த்³த⁴ம் ஸுரபி⁴ம், அப்³பா⁴சிக்கி²ம் அதூ³ஸகம்.

‘‘தேன கம்மவிபாகேன, நிரயே ஸம்ஸரிம் சிரம்;

ப³ஹூ வஸ்ஸஸஹஸ்ஸானி, து³க்க²ம் வேதே³மி வேத³னம்.

‘‘தேன கம்மாவஸேஸேன, இத⁴ பச்சி²மகே ப⁴வே;

அப்³ப⁴க்கா²னம் மயா லத்³த⁴ம், ஸுந்த³ரிகாய காரணா.

2. ‘‘ஸப்³பா³பி⁴பு⁴ஸ்ஸ பு³த்³த⁴ஸ்ஸ, நந்தோ³ நாமாஸி ஸாவகோ;

தம் அப்³ப⁴க்கா²ய நிரயே, சிரம் ஸம்ஸரிதம் மயா.

‘‘த³ஸ வஸ்ஸஸஹஸ்ஸானி, நிரயே ஸம்ஸரிம் சிரம்;

மனுஸ்ஸபா⁴வம் லத்³தா⁴ஹம், அப்³ப⁴க்கா²னம் ப³ஹும் லபி⁴ம்.

‘‘தேன கம்மாவஸேஸேன, சிஞ்சமாணவிகா மமம்;

அப்³பா⁴சிக்கி² அபூ⁴தேன, ஜனகாயஸ்ஸ அக்³க³தோ.

3. ‘‘ப்³ராஹ்மணோ ஸுதவா ஆஸிம், அஹம் ஸக்கதபூஜிதோ;

மஹாவனே பஞ்சஸதே, மந்தே வாசேமி மாணவே.

‘‘தத்தா²க³தோ இஸீ பீ⁴மோ, பஞ்சாபி⁴ஞ்ஞோ மஹித்³தி⁴கோ;

தஞ்சாஹம் ஆக³தம் தி³ஸ்வா, அப்³பா⁴சிக்கி²ம் அதூ³ஸகம்.

‘‘ததோஹம் அவசம் ஸிஸ்ஸே, காமபோ⁴கீ³ அயம் இஸி;

மய்ஹம்பி பா⁴ஸமானஸ்ஸ, அனுமோதி³ம்ஸு மாணவா.

‘‘ததோ மாணவகா ஸப்³பே³, பி⁴க்க²மானம் குலே குலே;

மஹாஜனஸ்ஸ ஆஹம்ஸு, காமபோ⁴கீ³ அயம் இஸி.

‘‘தேன கம்மவிபாகேன, பஞ்ச பி⁴க்கு²ஸதா இமே;

அப்³ப⁴க்கா²னம் லபு⁴ம் ஸப்³பே³, ஸுந்த³ரிகாய காரணா.

4. ‘‘வேமாதுபா⁴திகம் புப்³பே³, த⁴னஹேது ஹனிம் அஹம்;

பக்கி²பிம்கி³ரிது³க்³க³ஸ்மிம், ஸிலாய ச அபிம்ஸயிம்.

‘‘தேன கம்மவிபாகேன, தே³வத³த்தோ ஸிலம் கி²பி;

அங்கு³ட்ட²ம் பிம்ஸயீ பாதே³, மம பாஸாணஸக்க²ரா.

5. ‘‘புரேஹம் தா³ரகோ ஹுத்வா, கீளமானோ மஹாபதே²;

பச்சேகபு³த்³த⁴ம் தி³ஸ்வான, மக்³கே³ ஸகலிகம் கி²பிம்.

‘‘தேன கம்மவிபாகேன, இத⁴ பச்சி²மகே ப⁴வே;

வத⁴த்த²ம் மம் தே³வத³த்தோ, அபி⁴மாரே பயோஜயி.

6. ‘‘ஹத்தா²ரோஹோ புரே ஆஸிம், பச்சேகமுனிமுத்தமம்;

பிண்டா³ய விசரந்தம் தம், ஆஸாதே³ஸிம் க³ஜேனஹம்.

‘‘தேன கம்மவிபாகேன, ப⁴ந்தோ நாளாகி³ரீ க³ஜோ;

கி³ரிப்³ப³ஜே புரவரே, தா³ருணோ ஸமுபாக³மி.

7. ‘‘ராஜாஹம் பத்தி²வோ ஆஸிம், ஸத்தியா புரிஸே ஹனிம்;

தேன கம்மவிபாகேன, நிரயே பச்சிஸம் பு⁴ஸம்.

‘‘கம்முனோ தஸ்ஸ ஸேஸேன, ஸோதா³னி ஸகலம் மம;

பாதே³ ச²விம் பகப்பேஸி, ந ஹி கம்மம் வினஸ்ஸதி.

8. ‘‘அஹம் கேவட்டகா³மஸ்மிம், அஹும் கேவட்டதா³ரகோ;

மச்ச²கே கா⁴திதே தி³ஸ்வா, ஜனயிம் ஸோமனஸ்ஸகம்.

‘‘தேன கம்மவிபாகேன, ஸீஸது³க்க²ம் அஹூ மம;

ஸக்கா ச ஸப்³பே³ ஹஞ்ஞிம்ஸு, யதா³ ஹனி விடடூபோ⁴.

9. ‘‘பு²ஸ்ஸஸ்ஸாஹம் பாவசனே, ஸாவகே பரிபா⁴ஸயிம்;

யவம் கா²த³த² பு⁴ஞ்ஜத², மா ச பு⁴ஞ்ஜத² ஸாலயோ.

‘‘தேன கம்மவிபாகேன, தேமாஸம் கா²தி³தம் யவம்;

நிமந்திதோ ப்³ராஹ்மணேன, வேரஞ்ஜாயம் வஸிம் ததா³.

10. ‘‘நிப்³பு³த்³தே⁴ வத்தமானம்ஹி, மல்லபுத்தம் நிஹேட²யிம்;

தேன கம்மவிபாகேன, பிட்டி²து³க்க²ம் அஹூ மம.

11. ‘‘திகிச்ச²கோ அஹம் ஆஸிம், ஸேட்டி²புத்தம் விரேசயிம்;

தேன கம்மவிபாகேன, ஹோதி பக்க²ந்தி³கா மம.

12. ‘‘அவசாஹம் ஜோதிபாலோ, கஸ்ஸபம் ஸுக³தம் ததா³;

குதோ நு போ³தி⁴ முண்ட³ஸ்ஸ, போ³தி⁴ பரமது³ல்லபா⁴.

‘‘தேன கம்மவிபாகேன, அசரிம் து³க்கரம் ப³ஹும்;

ச²ப்³ப³ஸ்ஸானுருவேலாயம், ததோ போ³தி⁴ம் அபாபுணிம்.

‘‘நாஹம் ஏதேன மக்³கே³ன, பாபுணிம் போ³தி⁴முத்தமம்;

கும்மக்³கே³ன க³வேஸிஸ்ஸம், புப்³ப³கம்மேன வாரிதோ.

‘‘புஞ்ஞபாபபரிக்கீ²ணோ, ஸப்³ப³ஸந்தாபவஜ்ஜிதோ;

அஸோகோ அனுபாயாஸோ, நிப்³பா³யிஸ்ஸமனாஸவோ.

‘‘ஏவம் ஜினோ வியாகாஸி, பி⁴க்கு²ஸங்க⁴ஸ்ஸ அக்³க³தோ;

ஸப்³பா³பி⁴ஞ்ஞாப³லப்பத்தோ, அனோதத்தமஹாஸரே’’தி. (அப. தே²ர 1.39.64-96);

அட்ட²மஸுத்தவண்ணனா நிட்டி²தா.